নাৰাযণীযং দশক 3 - উত্তমভক্তস্য গুণাঃ

পঠন্তো নামানি প্ৰমদভৰসিন্ধৌ নিপতিতাঃ
স্মৰন্তো ৰূপং তে ৱৰদ কথযন্তো গুণকথাঃ ।
চৰন্তো যে ভক্তাস্ত্ৱযি খলু ৰমন্তে পৰমমূ-
নহং ধন্যান্ মন্যে সমধিগতসৰ্ৱাভিলষিতান্ ॥1॥

গদক্লিষ্টং কষ্টং তৱ চৰণসেৱাৰসভৰেঽ-
প্যনাসক্তং চিত্তং ভৱতি বত ৱিষ্ণো কুৰু দযাম্ ।
ভৱত্পাদাম্ভোজস্মৰণৰসিকো নামনিৱহা-
নহং গাযং গাযং কুহচন ৱিৱত্স্যামি ৱিজনে ॥2॥

কৃপা তে জাতা চেত্কিমিৱ ন হি লভ্যং তনুভৃতাং
মদীযক্লেশৌঘপ্ৰশমনদশা নাম কিযতী ।
ন কে কে লোকেঽস্মিন্ননিশমযি শোকাভিৰহিতা
ভৱদ্ভক্তা মুক্তাঃ সুখগতিমসক্তা ৱিদধতে ॥3॥

মুনিপ্ৰৌঢা ৰূঢা জগতি খলু গূঢাত্মগতযো
ভৱত্পাদাম্ভোজস্মৰণৱিৰুজো নাৰদমুখাঃ ।
চৰন্তীশ স্ৱৈৰং সততপৰিনিৰ্ভাতপৰচি -
ত্সদানন্দাদ্ৱৈতপ্ৰসৰপৰিমগ্নাঃ কিমপৰম্ ॥4॥

ভৱদ্ভক্তিঃ স্ফীতা ভৱতু মম সৈৱ প্ৰশমযে-
দশেষক্লেশৌঘং ন খলু হৃদি সন্দেহকণিকা ।
ন চেদ্ৱ্যাসস্যোক্তিস্তৱ চ ৱচনং নৈগমৱচো
ভৱেন্মিথ্যা ৰথ্যাপুৰুষৱচনপ্ৰাযমখিলম্ ॥5॥

ভৱদ্ভক্তিস্তাৱত্ প্ৰমুখমধুৰা ত্ৱত্ গুণৰসাত্
কিমপ্যাৰূঢা চেদখিলপৰিতাপপ্ৰশমনী ।
পুনশ্চান্তে স্ৱান্তে ৱিমলপৰিবোধোদযমিল-
ন্মহানন্দাদ্ৱৈতং দিশতি কিমতঃ প্ৰাৰ্থ্যমপৰম্ ॥6॥

ৱিধূয ক্লেশান্মে কুৰু চৰণযুগ্মং ধৃতৰসং
ভৱত্ক্ষেত্ৰপ্ৰাপ্তৌ কৰমপি চ তে পূজনৱিধৌ ।
ভৱন্মূৰ্ত্যালোকে নযনমথ তে পাদতুলসী-
পৰিঘ্ৰাণে ঘ্ৰাণং শ্ৰৱণমপি তে চাৰুচৰিতে ॥7॥

প্ৰভূতাধিৱ্যাধিপ্ৰসভচলিতে মামকহৃদি
ত্ৱদীযং তদ্ৰূপং পৰমসুখচিদ্ৰূপমুদিযাত্ ।
উদঞ্চদ্ৰোমাঞ্চো গলিতবহুহৰ্ষাশ্ৰুনিৱহো
যথা ৱিস্মৰ্যাসং দুৰুপশমপীডাপৰিভৱান্ ॥8॥

মৰুদ্গেহাধীশ ত্ৱযি খলু পৰাঞ্চোঽপি সুখিনো
ভৱত্স্নেহী সোঽহং সুবহু পৰিতপ্যে চ কিমিদম্ ।
অকীৰ্তিস্তে মা ভূদ্ৱৰদ গদভাৰং প্ৰশমযন্
ভৱত্ ভক্তোত্তংসং ঝটিতি কুৰু মাং কংসদমন ॥9॥

কিমুক্তৈৰ্ভূযোভিস্তৱ হি কৰুণা যাৱদুদিযা-
দহং তাৱদ্দেৱ প্ৰহিতৱিৱিধাৰ্তপ্ৰলপিতঃ ।
পুৰঃ ক্লৃপ্তে পাদে ৱৰদ তৱ নেষ্যামি দিৱসা-
ন্যথাশক্তি ৱ্যক্তং নতিনুতিনিষেৱা ৱিৰচযন্ ॥10॥