নারাযণীযং দশক 49 - বৃন্দাবনপ্রবেশম্

ভবত্প্রভাবাবিদুরা হি গোপাস্তরুপ্রপাতাদিকমত্র গোষ্ঠে ।
অহেতুমুত্পাতগণং বিশঙ্ক্য প্রযাতুমন্যত্র মনো বিতেনুঃ ॥1॥

তত্রোপনন্দাভিধগোপবর্যো জগৌ ভবত্প্রেরণযৈব নূনম্ ।
ইতঃ প্রতীচ্যাং বিপিনং মনোজ্ঞং বৃন্দাবনং নাম বিরাজতীতি ॥2॥

বৃহদ্বনং তত্ খলু নন্দমুখ্যা বিধায গৌষ্ঠীনমথ ক্ষণেন ।
ত্বদন্বিতত্বজ্জননীনিবিষ্টগরিষ্ঠযানানুগতা বিচেলুঃ ॥3॥

অনোমনোজ্ঞধ্বনিধেনুপালীখুরপ্রণাদান্তরতো বধূভিঃ ।
ভবদ্বিনোদালপিতাক্ষরাণি প্রপীয নাজ্ঞাযত মার্গদৈর্ঘ্যম্ ॥4॥

নিরীক্ষ্য বৃন্দাবনমীশ নন্দত্প্রসূনকুন্দপ্রমুখদ্রুমৌঘম্ ।
অমোদথাঃ শাদ্বলসান্দ্রলক্ষ্ম্যা হরিন্মণীকুট্টিমপুষ্টশোভম্ ॥5॥

নবাকনির্ব্যূঢনিবাসভেদেষ্বশেষগোপেষু সুখাসিতেষু ।
বনশ্রিযং গোপকিশোরপালীবিমিশ্রিতঃ পর্যগলোকথাস্ত্বম্ ॥6॥

অরালমার্গাগতনির্মলাপাং মরালকূজাকৃতনর্মলাপাম্ ।
নিরন্তরস্মেরসরোজবক্ত্রাং কলিন্দকন্যাং সমলোকযস্ত্বম্ ॥7॥

মযূরকেকাশতলোভনীযং মযূখমালাশবলং মণীনাম্ ।
বিরিঞ্চলোকস্পৃশমুচ্চশৃঙ্গৈর্গিরিং চ গোবর্ধনমৈক্ষথাস্ত্বম্ ॥8॥

সমং ততো গোপকুমারকৈস্ত্বং সমন্ততো যত্র বনান্তমাগাঃ ।
ততস্ততস্তাং কুটিলামপশ্যঃ কলিন্দজাং রাগবতীমিবৈকাম্ ॥9॥

তথাবিধেঽস্মিন্ বিপিনে পশব্যে সমুত্সুকো বত্সগণপ্রচারে ।
চরন্ সরামোঽথ কুমারকৈস্ত্বং সমীরগেহাধিপ পাহি রোগাত্ ॥10॥