নাৰাযণীযং দশক 50 - ৱত্সাসুৰ-বকাসুৰযোঃ ৱধম্

তৰলমধুকৃত্ ৱৃন্দে ৱৃন্দাৱনেঽথ মনোহৰে
পশুপশিশুভিঃ সাকং ৱত্সানুপালনলোলুপঃ ।
হলধৰসখো দেৱ শ্ৰীমন্ ৱিচেৰিথ ধাৰযন্
গৱলমুৰলীৱেত্ৰং নেত্ৰাভিৰামতনুদ্যুতিঃ ॥1॥

ৱিহিতজগতীৰক্ষং লক্ষ্মীকৰাম্বুজলালিতং
দদতি চৰণদ্ৱন্দ্ৱং ৱৃন্দাৱনে ত্ৱযি পাৱনে ।
কিমিৱ ন বভৌ সম্পত্সম্পূৰিতং তৰুৱল্লৰী-
সলিলধৰণীগোত্ৰক্ষেত্ৰাদিকং কমলাপতে ॥2॥

ৱিলসদুলপে কান্তাৰান্তে সমীৰণশীতলে
ৱিপুলযমুনাতীৰে গোৱৰ্ধনাচলমূৰ্ধসু ।
ললিতমুৰলীনাদঃ সঞ্চাৰযন্ খলু ৱাত্সকং
ক্ৱচন দিৱসে দৈত্যং ৱত্সাকৃতিং ত্ৱমুদৈক্ষথাঃ ॥3॥

ৰভসৱিলসত্পুচ্ছং ৱিচ্ছাযতোঽস্য ৱিলোকযন্
কিমপি ৱলিতস্কন্ধং ৰন্ধ্ৰপ্ৰতীক্ষমুদীক্ষিতম্ ।
তমথ চৰণে বিভ্ৰদ্ৱিভ্ৰামযন্ মুহুৰুচ্চকৈঃ
কুহচন মহাৱৃক্ষে চিক্ষেপিথ ক্ষতজীৱিতম্ ॥4॥

নিপততি মহাদৈত্যে জাত্যা দুৰাত্মনি তত্ক্ষণং
নিপতনজৱক্ষুণ্ণক্ষোণীৰুহক্ষতকাননে ।
দিৱি পৰিমিলত্ ৱৃন্দা ৱৃন্দাৰকাঃ কুসুমোত্কৰৈঃ
শিৰসি ভৱতো হৰ্ষাদ্ৱৰ্ষন্তি নাম তদা হৰে ॥5॥

সুৰভিলতমা মূৰ্ধন্যূৰ্ধ্ৱং কুতঃ কুসুমাৱলী
নিপততি তৱেত্যুক্তো বালৈঃ সহেলমুদৈৰযঃ ।
ঝটিতি দনুজক্ষেপেণোৰ্ধ্ৱং গতস্তৰুমণ্ডলাত্
কুসুমনিকৰঃ সোঽযং নূনং সমেতি শনৈৰিতি ॥6॥

ক্ৱচন দিৱসে ভূযো ভূযস্তৰে পৰুষাতপে
তপনতনযাপাথঃ পাতুং গতা ভৱদাদযঃ ।
চলিতগৰুতং প্ৰেক্ষামাসুৰ্বকং খলু ৱিস্মৃতং
ক্ষিতিধৰগৰুচ্ছেদে কৈলাসশৈলমিৱাপৰম্ ॥7॥

পিবতি সলিলং গোপৱ্ৰাতে ভৱন্তমভিদ্ৰুতঃ
স কিল নিগিলন্নগ্নিপ্ৰখ্যং পুনৰ্দ্ৰুতমুদ্ৱমন্ ।
দলযিতুমগাত্ত্ৰোট্যাঃ কোট্যা তদাঽঽশু ভৱান্ ৱিভো
খলজনভিদাচুঞ্চুশ্চঞ্চূ প্ৰগৃহ্য দদাৰ তম্ ॥8॥

সপদি সহজাং সন্দ্ৰষ্টুং ৱা মৃতাং খলু পূতনা-
মনুজমঘমপ্যগ্ৰে গত্ৱা প্ৰতীক্ষিতুমেৱ ৱা ।
শমননিলযং যাতে তস্মিন্ বকে সুমনোগণে
কিৰতি সুমনোৱৃন্দং ৱৃন্দাৱনাত্ গৃহমৈযথাঃ ॥9॥

ললিতমুৰলীনাদং দূৰান্নিশম্য ৱধূজনৈ-
স্ত্ৱৰিতমুপগম্যাৰাদাৰূঢমোদমুদীক্ষিতঃ ।
জনিতজননীনন্দানন্দঃ সমীৰণমন্দিৰ-
প্ৰথিতৱসতে শৌৰে দূৰীকুৰুষ্ৱ মমামযান্ ॥10॥