നാരായണീയം ദശക 50 - വത്സാസുര-ബകാസുരയോഃ വധമ്

തരലമധുകൃത് വൃന്ദേ വൃന്ദാവനേഽഥ മനോഹരേ
പശുപശിശുഭിഃ സാകം വത്സാനുപാലനലോലുപഃ ।
ഹലധരസഖോ ദേവ ശ്രീമന് വിചേരിഥ ധാരയന്
ഗവലമുരലീവേത്രം നേത്രാഭിരാമതനുദ്യുതിഃ ॥1॥

വിഹിതജഗതീരക്ഷം ലക്ഷ്മീകരാമ്ബുജലാലിതം
ദദതി ചരണദ്വന്ദ്വം വൃന്ദാവനേ ത്വയി പാവനേ ।
കിമിവ ന ബഭൌ സമ്പത്സമ്പൂരിതം തരുവല്ലരീ-
സലിലധരണീഗോത്രക്ഷേത്രാദികം കമലാപതേ ॥2॥

വിലസദുലപേ കാന്താരാന്തേ സമീരണശീതലേ
വിപുലയമുനാതീരേ ഗോവര്ധനാചലമൂര്ധസു ।
ലലിതമുരലീനാദഃ സഞ്ചാരയന് ഖലു വാത്സകം
ക്വചന ദിവസേ ദൈത്യം വത്സാകൃതിം ത്വമുദൈക്ഷഥാഃ ॥3॥

രഭസവിലസത്പുച്ഛം വിച്ഛായതോഽസ്യ വിലോകയന്
കിമപി വലിതസ്കന്ധം രന്ധ്രപ്രതീക്ഷമുദീക്ഷിതമ് ।
തമഥ ചരണേ ബിഭ്രദ്വിഭ്രാമയന് മുഹുരുച്ചകൈഃ
കുഹചന മഹാവൃക്ഷേ ചിക്ഷേപിഥ ക്ഷതജീവിതമ് ॥4॥

നിപതതി മഹാദൈത്യേ ജാത്യാ ദുരാത്മനി തത്ക്ഷണം
നിപതനജവക്ഷുണ്ണക്ഷോണീരുഹക്ഷതകാനനേ ।
ദിവി പരിമിലത് വൃന്ദാ വൃന്ദാരകാഃ കുസുമോത്കരൈഃ
ശിരസി ഭവതോ ഹര്ഷാദ്വര്ഷന്തി നാമ തദാ ഹരേ ॥5॥

സുരഭിലതമാ മൂര്ധന്യൂര്ധ്വം കുതഃ കുസുമാവലീ
നിപതതി തവേത്യുക്തോ ബാലൈഃ സഹേലമുദൈരയഃ ।
ഝടിതി ദനുജക്ഷേപേണോര്ധ്വം ഗതസ്തരുമണ്ഡലാത്
കുസുമനികരഃ സോഽയം നൂനം സമേതി ശനൈരിതി ॥6॥

ക്വചന ദിവസേ ഭൂയോ ഭൂയസ്തരേ പരുഷാതപേ
തപനതനയാപാഥഃ പാതും ഗതാ ഭവദാദയഃ ।
ചലിതഗരുതം പ്രേക്ഷാമാസുര്ബകം ഖലു വിസ്മൃതം
ക്ഷിതിധരഗരുച്ഛേദേ കൈലാസശൈലമിവാപരമ് ॥7॥

പിബതി സലിലം ഗോപവ്രാതേ ഭവന്തമഭിദ്രുതഃ
സ കില നിഗിലന്നഗ്നിപ്രഖ്യം പുനര്ദ്രുതമുദ്വമന് ।
ദലയിതുമഗാത്ത്രോട്യാഃ കോട്യാ തദാഽഽശു ഭവാന് വിഭോ
ഖലജനഭിദാചുഞ്ചുശ്ചഞ്ചൂ പ്രഗൃഹ്യ ദദാര തമ് ॥8॥

സപദി സഹജാം സന്ദ്രഷ്ടും വാ മൃതാം ഖലു പൂതനാ-
മനുജമഘമപ്യഗ്രേ ഗത്വാ പ്രതീക്ഷിതുമേവ വാ ।
ശമനനിലയം യാതേ തസ്മിന് ബകേ സുമനോഗണേ
കിരതി സുമനോവൃന്ദം വൃന്ദാവനാത് ഗൃഹമൈയഥാഃ ॥9॥

ലലിതമുരലീനാദം ദൂരാന്നിശമ്യ വധൂജനൈ-
സ്ത്വരിതമുപഗമ്യാരാദാരൂഢമോദമുദീക്ഷിതഃ ।
ജനിതജനനീനന്ദാനന്ദഃ സമീരണമന്ദിര-
പ്രഥിതവസതേ ശൌരേ ദൂരീകുരുഷ്വ മമാമയാന് ॥10॥