નારાયણીયં દશક 57 - પ્રલમ્બાસુરવધમ્

રામસખઃ ક્વાપિ દિને કામદ ભગવન્ ગતો ભવાન્ વિપિનમ્ ।
સૂનુભિરપિ ગોપાનાં ધેનુભિરભિસંવૃતો લસદ્વેષઃ ॥1॥

સન્દર્શયન્ બલાય સ્વૈરં વૃન્દાવનશ્રિયં વિમલામ્ ।
કાણ્ડીરૈઃ સહ બાલૈર્ભાણ્ડીરકમાગમો વટં ક્રીડન્ ॥2॥

તાવત્તાવકનિધનસ્પૃહયાલુર્ગોપમૂર્તિરદયાલુઃ ।
દૈત્યઃ પ્રલમ્બનામા પ્રલમ્બબાહું ભવન્તમાપેદે ॥3॥

જાનન્નપ્યવિજાનન્નિવ તેન સમં નિબદ્ધસૌહાર્દઃ ।
વટનિકટે પટુપશુપવ્યાબદ્ધં દ્વન્દ્વયુદ્ધમારબ્ધાઃ ॥4॥

ગોપાન્ વિભજ્ય તન્વન્ સઙ્ઘં બલભદ્રકં ભવત્કમપિ ।
ત્વદ્બલભીરું દૈત્યં ત્વદ્બલગતમન્વમન્યથા ભગવન્ ॥5॥

કલ્પિતવિજેતૃવહને સમરે પરયૂથગં સ્વદયિતતરમ્ ।
શ્રીદામાનમધત્થાઃ પરાજિતો ભક્તદાસતાં પ્રથયન્ ॥6॥

એવં બહુષુ વિભૂમન્ બાલેષુ વહત્સુ વાહ્યમાનેષુ ।
રામવિજિતઃ પ્રલમ્બો જહાર તં દૂરતો ભવદ્ભીત્યા ॥7॥

ત્વદ્દૂરં ગમયન્તં તં દૃષ્ટ્વા હલિનિ વિહિતગરિમભરે ।
દૈત્યઃ સ્વરૂપમાગાદ્યદ્રૂપાત્ સ હિ બલોઽપિ ચકિતોઽભૂત્ ॥8॥

ઉચ્ચતયા દૈત્યતનોસ્ત્વન્મુખમાલોક્ય દૂરતો રામઃ ।
વિગતભયો દૃઢમુષ્ટ્યા ભૃશદુષ્ટં સપદિ પિષ્ટવાનેનમ્ ॥9॥

હત્વા દાનવવીરં પ્રાપ્તં બલમાલિલિઙ્ગિથ પ્રેમ્ણા ।
તાવન્મિલતોર્યુવયોઃ શિરસિ કૃતા પુષ્પવૃષ્ટિરમરગણૈઃ ॥10॥

આલમ્બો ભુવનાનાં પ્રાલમ્બં નિધનમેવમારચયન્ ।
કાલં વિહાય સદ્યો લોલમ્બરુચે હરે હરેઃ ક્લેશાન્ ॥11॥