ନାରାଯଣୀଯଂ ଦଶକ 65 - ଗୋପିକାନାଂ ଭଗଵତ୍ସାମୀପ୍ଯପ୍ରାପ୍ତିଃ

ଗୋପୀଜନାଯ କଥିତଂ ନିଯମାଵସାନେ
ମାରୋତ୍ସଵଂ ତ୍ଵମଥ ସାଧଯିତୁଂ ପ୍ରଵୃତ୍ତଃ ।
ସାନ୍ଦ୍ରେଣ ଚାନ୍ଦ୍ରମହସା ଶିଶିରୀକୃତାଶେ
ପ୍ରାପୂରଯୋ ମୁରଲିକାଂ ଯମୁନାଵନାନ୍ତେ ॥1॥

ସମ୍ମୂର୍ଛନାଭିରୁଦିତସ୍ଵରମଣ୍ଡଲାଭିଃ
ସମ୍ମୂର୍ଛଯନ୍ତମଖିଲଂ ଭୁଵନାନ୍ତରାଲମ୍ ।
ତ୍ଵଦ୍ଵେଣୁନାଦମୁପକର୍ଣ୍ଯ ଵିଭୋ ତରୁଣ୍ଯ-
ସ୍ତତ୍ତାଦୃଶଂ କମପି ଚିତ୍ତଵିମୋହମାପୁଃ ॥2॥

ତା ଗେହକୃତ୍ଯନିରତାସ୍ତନଯପ୍ରସକ୍ତାଃ
କାନ୍ତୋପସେଵନପରାଶ୍ଚ ସରୋରୁହାକ୍ଷ୍ଯଃ ।
ସର୍ଵଂ ଵିସୃଜ୍ଯ ମୁରଲୀରଵମୋହିତାସ୍ତେ
କାନ୍ତାରଦେଶମଯି କାନ୍ତତନୋ ସମେତାଃ ॥3॥

କାଶ୍ଚିନ୍ନିଜାଙ୍ଗପରିଭୂଷଣମାଦଧାନା
ଵେଣୁପ୍ରଣାଦମୁପକର୍ଣ୍ଯ କୃତାର୍ଧଭୂଷାଃ ।
ତ୍ଵାମାଗତା ନନୁ ତଥୈଵ ଵିଭୂଷିତାଭ୍ଯ-
ସ୍ତା ଏଵ ସଂରୁରୁଚିରେ ତଵ ଲୋଚନାଯ ॥4॥

ହାରଂ ନିତମ୍ବଭୁଵି କାଚନ ଧାରଯନ୍ତୀ
କାଞ୍ଚୀଂ ଚ କଣ୍ଠଭୁଵି ଦେଵ ସମାଗତା ତ୍ଵାମ୍ ।
ହାରିତ୍ଵମାତ୍ମଜଘନସ୍ଯ ମୁକୁନ୍ଦ ତୁଭ୍ଯଂ
ଵ୍ଯକ୍ତଂ ବଭାଷ ଇଵ ମୁଗ୍ଧମୁଖୀ ଵିଶେଷାତ୍ ॥5॥

କାଚିତ୍ କୁଚେ ପୁନରସଜ୍ଜିତକଞ୍ଚୁଲୀକା
ଵ୍ଯାମୋହତଃ ପରଵଧୂଭିରଲକ୍ଷ୍ଯମାଣା ।
ତ୍ଵାମାଯଯୌ ନିରୁପମପ୍ରଣଯାତିଭାର-
ରାଜ୍ଯାଭିଷେକଵିଧଯେ କଲଶୀଧରେଵ ॥6॥

କାଶ୍ଚିତ୍ ଗୃହାତ୍ କିଲ ନିରେତୁମପାରଯନ୍ତ୍ଯ-
ସ୍ତ୍ଵାମେଵ ଦେଵ ହୃଦଯେ ସୁଦୃଢଂ ଵିଭାଵ୍ଯ ।
ଦେହଂ ଵିଧୂଯ ପରଚିତ୍ସୁଖରୂପମେକଂ
ତ୍ଵାମାଵିଶନ୍ ପରମିମା ନନୁ ଧନ୍ଯଧନ୍ଯାଃ ॥7॥

ଜାରାତ୍ମନା ନ ପରମାତ୍ମତଯା ସ୍ମରନ୍ତ୍ଯୋ
ନାର୍ଯୋ ଗତାଃ ପରମହଂସଗତିଂ କ୍ଷଣେନ ।
ତଂ ତ୍ଵାଂ ପ୍ରକାଶପରମାତ୍ମତନୁଂ କଥଞ୍ଚି-
ଚ୍ଚିତ୍ତେ ଵହନ୍ନମୃତମଶ୍ରମମଶ୍ନୁଵୀଯ ॥8॥

ଅଭ୍ଯାଗତାଭିରଭିତୋ ଵ୍ରଜସୁନ୍ଦରୀଭି-
ର୍ମୁଗ୍ଧସ୍ମିତାର୍ଦ୍ରଵଦନଃ କରୁଣାଵଲୋକୀ ।
ନିସ୍ସୀମକାନ୍ତିଜଲଧିସ୍ତ୍ଵମଵେକ୍ଷ୍ଯମାଣୋ
ଵିଶ୍ଵୈକହୃଦ୍ଯ ହର ମେ ପଵନେଶ ରୋଗାନ୍ ॥9॥