ନାରାଯଣୀଯଂ ଦଶକ 66 - ଗୋପୀଜନାହ୍ଲାଦନମ୍

ଉପଯାତାନାଂ ସୁଦୃଶାଂ କୁସୁମାଯୁଧବାଣପାତଵିଵଶାନାମ୍ ।
ଅଭିଵାଞ୍ଛିତଂ ଵିଧାତୁଂ କୃତମତିରପି ତା ଜଗାଥ ଵାମମିଵ ॥1॥

ଗଗନଗତଂ ମୁନିନିଵହଂ ଶ୍ରାଵଯିତୁଂ ଜଗିଥ କୁଲଵଧୂଧର୍ମମ୍ ।
ଧର୍ମ୍ଯଂ ଖଲୁ ତେ ଵଚନଂ କର୍ମ ତୁ ନୋ ନିର୍ମଲସ୍ଯ ଵିଶ୍ଵାସ୍ଯମ୍ ॥2॥

ଆକର୍ଣ୍ଯ ତେ ପ୍ରତୀପାଂ ଵାଣୀମେଣୀଦୃଶଃ ପରଂ ଦୀନାଃ ।
ମା ମା କରୁଣାସିନ୍ଧୋ ପରିତ୍ଯଜେତ୍ଯତିଚିରଂ ଵିଲେପୁସ୍ତାଃ ॥3॥

ତାସାଂ ରୁଦିତୈର୍ଲପିତୈଃ କରୁଣାକୁଲମାନସୋ ମୁରାରେ ତ୍ଵମ୍ ।
ତାଭିସ୍ସମଂ ପ୍ରଵୃତ୍ତୋ ଯମୁନାପୁଲିନେଷୁ କାମମଭିରନ୍ତୁମ୍ ॥4॥

ଚନ୍ଦ୍ରକରସ୍ଯନ୍ଦଲସତ୍ସୁନ୍ଦରଯମୁନାତଟାନ୍ତଵୀଥୀଷୁ ।
ଗୋପୀଜନୋତ୍ତରୀଯୈରାପାଦିତସଂସ୍ତରୋ ନ୍ଯଷୀଦସ୍ତ୍ଵମ୍ ॥5॥

ସୁମଧୁରନର୍ମାଲପନୈଃ କରସଙ୍ଗ୍ରହଣୈଶ୍ଚ ଚୁମ୍ବନୋଲ୍ଲାସୈଃ ।
ଗାଢାଲିଙ୍ଗନସଙ୍ଗୈସ୍ତ୍ଵମଙ୍ଗନାଲୋକମାକୁଲୀଚକୃଷେ ॥6॥

ଵାସୋହରଣଦିନେ ଯଦ୍ଵାସୋହରଣଂ ପ୍ରତିଶ୍ରୁତଂ ତାସାମ୍ ।
ତଦପି ଵିଭୋ ରସଵିଵଶସ୍ଵାନ୍ତାନାଂ କାନ୍ତ ସୁଭ୍ରୁଵାମଦଧାଃ ॥7॥

କନ୍ଦଲିତଘର୍ମଲେଶଂ କୁନ୍ଦମୃଦୁସ୍ମେରଵକ୍ତ୍ରପାଥୋଜମ୍ ।
ନନ୍ଦସୁତ ତ୍ଵାଂ ତ୍ରିଜଗତ୍ସୁନ୍ଦରମୁପଗୂହ୍ଯ ନନ୍ଦିତା ବାଲାଃ ॥8॥

ଵିରହେଷ୍ଵଙ୍ଗାରମଯଃ ଶୃଙ୍ଗାରମଯଶ୍ଚ ସଙ୍ଗମେ ହି ତ୍ଵମ୍ ନିତରାମଙ୍ଗାରମଯସ୍ତତ୍ର ପୁନସ୍ସଙ୍ଗମେଽପି ଚିତ୍ରମିଦମ୍ ॥9॥

ରାଧାତୁଙ୍ଗପଯୋଧରସାଧୁପରୀରମ୍ଭଲୋଲୁପାତ୍ମାନମ୍ ।
ଆରାଧଯେ ଭଵନ୍ତଂ ପଵନପୁରାଧୀଶ ଶମଯ ସକଲଗଦାନ୍ ॥10॥