ନାରାଯଣୀଯଂ ଦଶକ 68 - ଗୋପିକାନାଂ ଆହ୍ଲାଦପ୍ରକଟନମ୍

ତଵ ଵିଲୋକନାଦ୍ଗୋପିକାଜନାଃ ପ୍ରମଦସଙ୍କୁଲାଃ ପଙ୍କଜେକ୍ଷଣ ।
ଅମୃତଧାରଯା ସମ୍ପ୍ଲୁତା ଇଵ ସ୍ତିମିତତାଂ ଦଧୁସ୍ତ୍ଵତ୍ପୁରୋଗତାଃ ॥1॥

ତଦନୁ କାଚନ ତ୍ଵତ୍କରାମ୍ବୁଜଂ ସପଦି ଗୃହ୍ଣତୀ ନିର୍ଵିଶଙ୍କିତମ୍ ।
ଘନପଯୋଧରେ ସନ୍ନିଧାଯ ସା ପୁଲକସଂଵୃତା ତସ୍ଥୁଷୀ ଚିରମ୍ ॥2॥

ତଵ ଵିଭୋଽପରା କୋମଲଂ ଭୁଜଂ ନିଜଗଲାନ୍ତରେ ପର୍ଯଵେଷ୍ଟଯତ୍ ।
ଗଲସମୁଦ୍ଗତଂ ପ୍ରାଣମାରୁତଂ ପ୍ରତିନିରୁନ୍ଧତୀଵାତିହର୍ଷୁଲା ॥3॥

ଅପଗତତ୍ରପା କାପି କାମିନୀ ତଵ ମୁଖାମ୍ବୁଜାତ୍ ପୂଗଚର୍ଵିତମ୍ ।
ପ୍ରତିଗୃହଯ୍ଯ ତଦ୍ଵକ୍ତ୍ରପଙ୍କଜେ ନିଦଧତୀ ଗତା ପୂର୍ଣକାମତାମ୍ ॥4॥

ଵିକରୁଣୋ ଵନେ ସଂଵିହାଯ ମାମପଗତୋଽସି କା ତ୍ଵାମିହ ସ୍ପୃଶେତ୍ ।
ଇତି ସରୋଷଯା ତାଵଦେକଯା ସଜଲଲୋଚନଂ ଵୀକ୍ଷିତୋ ଭଵାନ୍ ॥5॥

ଇତି ମୁଦାଽଽକୁଲୈର୍ଵଲ୍ଲଵୀଜନୈଃ ସମମୁପାଗତୋ ଯାମୁନେ ତଟେ ।
ମୃଦୁକୁଚାମ୍ବରୈଃ କଲ୍ପିତାସନେ ଘୁସୃଣଭାସୁରେ ପର୍ଯଶୋଭଥାଃ ॥6॥

କତିଵିଧା କୃପା କେଽପି ସର୍ଵତୋ ଧୃତଦଯୋଦଯାଃ କେଚିଦାଶ୍ରିତେ ।
କତିଚିଦୀଦୃଶା ମାଦୃଶେଷ୍ଵପୀତ୍ଯଭିହିତୋ ଭଵାନ୍ ଵଲ୍ଲଵୀଜନୈଃ ॥7॥

ଅଯି କୁମାରିକା ନୈଵ ଶଙ୍କ୍ଯତାଂ କଠିନତା ମଯି ପ୍ରେମକାତରେ ।
ମଯି ତୁ ଚେତସୋ ଵୋଽନୁଵୃତ୍ତଯେ କୃତମିଦଂ ମଯେତ୍ଯୂଚିଵାନ୍ ଭଵାନ୍ ॥8॥

ଅଯି ନିଶମ୍ଯତାଂ ଜୀଵଵଲ୍ଲଭାଃ ପ୍ରିଯତମୋ ଜନୋ ନେଦୃଶୋ ମମ ।
ତଦିହ ରମ୍ଯତାଂ ରମ୍ଯଯାମିନୀଷ୍ଵନୁପରୋଧମିତ୍ଯାଲପୋ ଵିଭୋ ॥9॥

ଇତି ଗିରାଧିକଂ ମୋଦମେଦୁରୈର୍ଵ୍ରଜଵଧୂଜନୈଃ ସାକମାରମନ୍ ।
କଲିତକୌତୁକୋ ରାସଖେଲନେ ଗୁରୁପୁରୀପତେ ପାହି ମାଂ ଗଦାତ୍ ॥10॥