নাৰাযণীযং দশক 76 - উদ্ধৱদৌত্যম্

গত্ৱা সান্দীপনিমথ চতুষ্ষষ্টিমাত্ৰৈৰহোভিঃ
সৰ্ৱজ্ঞস্ত্ৱং সহ মুসলিনা সৰ্ৱৱিদ্যা গৃহীত্ৱা ।
পুত্ৰং নষ্টং যমনিলযনাদাহৃতং দক্ষিণাৰ্থং
দত্ৱা তস্মৈ নিজপুৰমগা নাদযন্ পাঞ্চজন্যম্ ॥1॥

স্মৃত্ৱা স্মৃত্ৱা পশুপসুদৃশঃ প্ৰেমভাৰপ্ৰণুন্নাঃ
কাৰুণ্যেন ত্ৱমপি ৱিৱশঃ প্ৰাহিণোৰুদ্ধৱং তম্ ।
কিঞ্চামুষ্মৈ পৰমসুহৃদে ভক্তৱৰ্যায তাসাং
ভক্ত্যুদ্ৰেকং সকলভুৱনে দুৰ্লভং দৰ্শযিষ্যন্ ॥2॥

ত্ৱন্মাহাত্ম্যপ্ৰথিমপিশুনং গোকুলং প্ৰাপ্য সাযং
ত্ৱদ্ৱাৰ্তাভিৰ্বহু স ৰমযামাস নন্দং যশোদাম্ ।
প্ৰাতৰ্দ্দৃষ্ট্ৱা মণিমযৰথং শঙ্কিতাঃ পঙ্কজাক্ষ্যঃ
শ্ৰুত্ৱা প্ৰাপ্তং ভৱদনুচৰং ত্যক্তকাৰ্যাঃ সমীযুঃ ॥3॥

দৃষ্ট্ৱা চৈনং ত্ৱদুপমলসদ্ৱেষভূষাভিৰামং
স্মৃত্ৱা স্মৃত্ৱা তৱ ৱিলসিতান্যুচ্চকৈস্তানি তানি ।
ৰুদ্ধালাপাঃ কথমপি পুনৰ্গদ্গদাং ৱাচমূচুঃ
সৌজন্যাদীন্ নিজপৰভিদামপ্যলং ৱিস্মৰন্ত্যঃ ॥4॥

শ্ৰীমান্ কিং ত্ৱং পিতৃজনকৃতে প্ৰেষিতো নিৰ্দযেন
ক্ৱাসৌ কান্তো নগৰসুদৃশাং হা হৰে নাথ পাযাঃ ।
আশ্লেষাণামমৃতৱপুষো হন্ত তে চুম্বনানা-
মুন্মাদানাং কুহকৱচসাং ৱিস্মৰেত্ কান্ত কা ৱা ॥5॥

ৰাসক্ৰীডালুলিতললিতং ৱিশ্লথত্কেশপাশং
মন্দোদ্ভিন্নশ্ৰমজলকণং লোভনীযং ত্ৱদঙ্গম্ ।
কাৰুণ্যাব্ধে সকৃদপি সমালিঙ্গিতুং দৰ্শযেতি
প্ৰেমোন্মাদাদ্ভুৱনমদন ত্ৱত্প্ৰিযাস্ত্ৱাং ৱিলেপুঃ ॥6॥

এৱম্প্ৰাযৈৰ্ৱিৱশৱচনৈৰাকুলা গোপিকাস্তা-
স্ত্ৱত্সন্দেশৈঃ প্ৰকৃতিমনযত্ সোঽথ ৱিজ্ঞানগৰ্ভৈঃ ।
ভূযস্তাভিৰ্মুদিতমতিভিস্ত্ৱন্মযীভিৰ্ৱধূভি-
স্তত্তদ্ৱাৰ্তাসৰসমনযত্ কানিচিদ্ৱাসৰাণি ॥7॥

ত্ৱত্প্ৰোদ্গানৈঃ সহিতমনিশং সৰ্ৱতো গেহকৃত্যং
ত্ৱদ্ৱাৰ্তৈৱ প্ৰসৰতি মিথঃ সৈৱ চোত্স্ৱাপলাপাঃ ।
চেষ্টাঃ প্ৰাযস্ত্ৱদনুকৃতযস্ত্ৱন্মযং সৰ্ৱমেৱং
দৃষ্ট্ৱা তত্ৰ ৱ্যমুহদধিকং ৱিস্মযাদুদ্ধৱোঽযম্ ॥8॥

ৰাধাযা মে প্ৰিযতমমিদং মত্প্ৰিযৈৱং ব্ৰৱীতি
ত্ৱং কিং মৌনং কলযসি সখে মানিনীমত্প্ৰিযেৱ।
ইত্যাদ্যেৱ প্ৰৱদতি সখি ত্ৱত্প্ৰিযো নিৰ্জনে মা-
মিত্থংৱাদৈৰৰমদযং ত্ৱত্প্ৰিযামুত্পলাক্ষীম্ ॥9॥

এষ্যামি দ্ৰাগনুপগমনং কেৱলং কাৰ্যভাৰা-
দ্ৱিশ্লেষেঽপি স্মৰণদৃঢতাসম্ভৱান্মাস্তু খেদঃ ।
ব্ৰহ্মানন্দে মিলতি নচিৰাত্ সঙ্গমো ৱা ৱিযোগ-
স্তুল্যো ৱঃ স্যাদিতি তৱ গিৰা সোঽকৰোন্নিৰ্ৱ্যথাস্তাঃ ॥10॥

এৱং ভক্তি সকলভুৱনে নেক্ষিতা ন শ্ৰুতা ৱা
কিং শাস্ত্ৰৌঘৈঃ কিমিহ তপসা গোপিকাভ্যো নমোঽস্তু ।
ইত্যানন্দাকুলমুপগতং গোকুলাদুদ্ধৱং তং
দৃষ্ট্ৱা হৃষ্টো গুৰুপুৰপতে পাহি মামামযৌঘাত্ ॥11॥