নারাযণীযং দশক 76 - উদ্ধবদৌত্যম্

গত্বা সান্দীপনিমথ চতুষ্ষষ্টিমাত্রৈরহোভিঃ
সর্বজ্ঞস্ত্বং সহ মুসলিনা সর্ববিদ্যা গৃহীত্বা ।
পুত্রং নষ্টং যমনিলযনাদাহৃতং দক্ষিণার্থং
দত্বা তস্মৈ নিজপুরমগা নাদযন্ পাঞ্চজন্যম্ ॥1॥

স্মৃত্বা স্মৃত্বা পশুপসুদৃশঃ প্রেমভারপ্রণুন্নাঃ
কারুণ্যেন ত্বমপি বিবশঃ প্রাহিণোরুদ্ধবং তম্ ।
কিঞ্চামুষ্মৈ পরমসুহৃদে ভক্তবর্যায তাসাং
ভক্ত্যুদ্রেকং সকলভুবনে দুর্লভং দর্শযিষ্যন্ ॥2॥

ত্বন্মাহাত্ম্যপ্রথিমপিশুনং গোকুলং প্রাপ্য সাযং
ত্বদ্বার্তাভির্বহু স রমযামাস নন্দং যশোদাম্ ।
প্রাতর্দ্দৃষ্ট্বা মণিমযরথং শঙ্কিতাঃ পঙ্কজাক্ষ্যঃ
শ্রুত্বা প্রাপ্তং ভবদনুচরং ত্যক্তকার্যাঃ সমীযুঃ ॥3॥

দৃষ্ট্বা চৈনং ত্বদুপমলসদ্বেষভূষাভিরামং
স্মৃত্বা স্মৃত্বা তব বিলসিতান্যুচ্চকৈস্তানি তানি ।
রুদ্ধালাপাঃ কথমপি পুনর্গদ্গদাং বাচমূচুঃ
সৌজন্যাদীন্ নিজপরভিদামপ্যলং বিস্মরন্ত্যঃ ॥4॥

শ্রীমান্ কিং ত্বং পিতৃজনকৃতে প্রেষিতো নির্দযেন
ক্বাসৌ কান্তো নগরসুদৃশাং হা হরে নাথ পাযাঃ ।
আশ্লেষাণামমৃতবপুষো হন্ত তে চুম্বনানা-
মুন্মাদানাং কুহকবচসাং বিস্মরেত্ কান্ত কা বা ॥5॥

রাসক্রীডালুলিতললিতং বিশ্লথত্কেশপাশং
মন্দোদ্ভিন্নশ্রমজলকণং লোভনীযং ত্বদঙ্গম্ ।
কারুণ্যাব্ধে সকৃদপি সমালিঙ্গিতুং দর্শযেতি
প্রেমোন্মাদাদ্ভুবনমদন ত্বত্প্রিযাস্ত্বাং বিলেপুঃ ॥6॥

এবম্প্রাযৈর্বিবশবচনৈরাকুলা গোপিকাস্তা-
স্ত্বত্সন্দেশৈঃ প্রকৃতিমনযত্ সোঽথ বিজ্ঞানগর্ভৈঃ ।
ভূযস্তাভির্মুদিতমতিভিস্ত্বন্মযীভির্বধূভি-
স্তত্তদ্বার্তাসরসমনযত্ কানিচিদ্বাসরাণি ॥7॥

ত্বত্প্রোদ্গানৈঃ সহিতমনিশং সর্বতো গেহকৃত্যং
ত্বদ্বার্তৈব প্রসরতি মিথঃ সৈব চোত্স্বাপলাপাঃ ।
চেষ্টাঃ প্রাযস্ত্বদনুকৃতযস্ত্বন্মযং সর্বমেবং
দৃষ্ট্বা তত্র ব্যমুহদধিকং বিস্মযাদুদ্ধবোঽযম্ ॥8॥

রাধাযা মে প্রিযতমমিদং মত্প্রিযৈবং ব্রবীতি
ত্বং কিং মৌনং কলযসি সখে মানিনীমত্প্রিযেব।
ইত্যাদ্যেব প্রবদতি সখি ত্বত্প্রিযো নির্জনে মা-
মিত্থংবাদৈররমদযং ত্বত্প্রিযামুত্পলাক্ষীম্ ॥9॥

এষ্যামি দ্রাগনুপগমনং কেবলং কার্যভারা-
দ্বিশ্লেষেঽপি স্মরণদৃঢতাসম্ভবান্মাস্তু খেদঃ ।
ব্রহ্মানন্দে মিলতি নচিরাত্ সঙ্গমো বা বিযোগ-
স্তুল্যো বঃ স্যাদিতি তব গিরা সোঽকরোন্নির্ব্যথাস্তাঃ ॥10॥

এবং ভক্তি সকলভুবনে নেক্ষিতা ন শ্রুতা বা
কিং শাস্ত্রৌঘৈঃ কিমিহ তপসা গোপিকাভ্যো নমোঽস্তু ।
ইত্যানন্দাকুলমুপগতং গোকুলাদুদ্ধবং তং
দৃষ্ট্বা হৃষ্টো গুরুপুরপতে পাহি মামামযৌঘাত্ ॥11॥