নাৰাযণীযং দশক 77 - জৰাসন্ধাদিভিঃ সহ যুদ্ধম্

সৈৰন্ধ্ৰ্যাস্তদনু চিৰং স্মৰাতুৰাযা
যাতোঽভূঃ সুললিতমুদ্ধৱেন সাৰ্ধম্ ।
আৱাসং ত্ৱদুপগমোত্সৱং সদৈৱ
ধ্যাযন্ত্যাঃ প্ৰতিদিনৱাসসজ্জিকাযাঃ ॥1॥

উপগতে ত্ৱযি পূৰ্ণমনোৰথাং প্ৰমদসম্ভ্ৰমকম্প্ৰপযোধৰাম্ ।
ৱিৱিধমাননমাদধতীং মুদা ৰহসি তাং ৰমযাঞ্চকৃষে সুখম্ ॥2॥

পৃষ্টা ৱৰং পুনৰসাৱৱৃণোদ্ৱৰাকী
ভূযস্ত্ৱযা সুৰতমেৱ নিশান্তৰেষু ।
সাযুজ্যমস্ত্ৱিতি ৱদেত্ বুধ এৱ কামং
সামীপ্যমস্ত্ৱনিশমিত্যপি নাব্ৰৱীত্ কিম্ ॥3॥

ততো ভৱান্ দেৱ নিশাসু কাসুচিন্মৃগীদৃশং তাং নিভৃতং ৱিনোদযন্ ।
অদাদুপশ্লোক ইতি শ্ৰুতং সুতং স নাৰদাত্ সাত্ত্ৱততন্ত্ৰৱিদ্ববভৌ ॥4॥

অক্ৰূৰমন্দিৰমিতোঽথ বলোদ্ধৱাভ্যা-
মভ্যৰ্চিতো বহু নুতো মুদিতেন তেন ।
এনং ৱিসৃজ্য ৱিপিনাগতপাণ্ডৱেয-
ৱৃত্তং ৱিৱেদিথ তথা ধৃতৰাষ্ট্ৰ্চেষ্টাম্ ॥5॥

ৱিঘাতাজ্জামাতুঃ পৰমসুহৃদো ভোজনৃপতে-
ৰ্জৰাসন্ধে ৰুন্ধত্যনৱধিৰুষান্ধেঽথ মথুৰাম্ ।
ৰথাদ্যৈৰ্দ্যোৰ্লব্ধৈঃ কতিপযবলস্ত্ৱং বলযুত-
স্ত্ৰযোৱিংশত্যক্ষৌহিণি তদুপনীতং সমহৃথাঃ ॥6॥

বদ্ধং বলাদথ বলেন বলোত্তৰং ত্ৱং
ভূযো বলোদ্যমৰসেন মুমোচিথৈনম্ ।
নিশ্শেষদিগ্জযসমাহৃতৱিশ্ৱসৈন্যাত্
কোঽন্যস্ততো হি বলপৌৰুষৱাংস্তদানীম্ ॥7॥

ভগ্নঃ স লগ্নহৃদযোঽপি নৃপৈঃ প্ৰণুন্নো
যুদ্ধং ত্ৱযা ৱ্যধিত ষোডশকৃত্ৱ এৱম্ ।
অক্ষৌহিণীঃ শিৱ শিৱাস্য জঘন্থ ৱিষ্ণো
সম্ভূয সৈকনৱতিত্ৰিশতং তদানীম্ ॥8॥

অষ্টাদশেঽস্য সমৰে সমুপেযুষি ত্ৱং
দৃষ্ট্ৱা পুৰোঽথ যৱনং যৱনত্ৰিকোট্যা ।
ত্ৱষ্ট্ৰা ৱিধাপ্য পুৰমাশু পযোধিমধ্যে
তত্ৰাঽথ যোগবলতঃ স্ৱজনাননৈষীঃ ॥9॥

পদভ্যাং ত্ৱাং পদ্মমালী চকিত ইৱ পুৰান্নিৰ্গতো ধাৱমানো
ম্লেচ্ছেশেনানুযাতো ৱধসুকৃতৱিহীনেন শৈলে ন্যলৈষীঃ ।
সুপ্তেনাঙ্ঘ্ৰ্যাহতেন দ্ৰুতমথ মুচুকুন্দেন ভস্মীকৃতেঽস্মিন্
ভূপাযাস্মৈ গুহান্তে সুললিতৱপুষা তস্থিষে ভক্তিভাজে ॥10॥

ঐক্ষ্ৱাকোঽহং ৱিৰক্তোঽস্ম্যখিলনৃপসুখে ত্ৱত্প্ৰসাদৈককাঙ্ক্ষী
হা দেৱেতি স্তুৱন্তং ৱৰৱিততিষু তং নিস্পৃহং ৱীক্ষ্য হৃষ্যন্ ।
মুক্তেস্তুল্যাং চ ভক্তিং ধুতসকলমলাং মোক্ষমপ্যাশু দত্ৱা
কাৰ্যং হিংসাৱিশুদ্ধ্যৈ তপ ইতি চ তদা প্ৰাত্থ লোকপ্ৰতীত্যৈ ॥11॥

তদনু মথুৰাং গত্ৱা হত্ৱা চমূং যৱনাহৃতাং
মগধপতিনা মাৰ্গে সৈন্যৈঃ পুৰেৱ নিৱাৰিতঃ ।
চৰমৱিজযং দৰ্পাযাস্মৈ প্ৰদায পলাযিতো
জলধিনগৰীং যাতো ৱাতালযেশ্ৱৰ পাহি মাম্ ॥12॥