নাৰাযণীযং দশক 88 - সন্তানগোপালম্

প্ৰাগেৱাচাৰ্যপুত্ৰাহৃতিনিশমনযা স্ৱীযষট্সূনুৱীক্ষাং
কাঙ্ক্ষন্ত্যা মাতুৰুক্ত্যা সুতলভুৱি বলিং প্ৰাপ্য তেনাৰ্চিতস্ত্ৱম্ ।
ধাতুঃ শাপাদ্ধিৰণ্যান্ৱিতকশিপুভৱান্ শৌৰিজান্ কংসভগ্না-
নানীযৈনান্ প্ৰদৰ্শ্য স্ৱপদমনযথাঃ পূৰ্ৱপুত্ৰান্ মৰীচেঃ ॥1॥

শ্ৰুতদেৱ ইতি শ্ৰুতং দ্ৱিজেন্দ্ৰং
বহুলাশ্ৱং নৃপতিং চ ভক্তিপূৰ্ণম্ ।
যুগপত্ত্ৱমনুগ্ৰহীতুকামো
মিথিলাং প্ৰাপিথং তাপসৈঃ সমেতঃ ॥2॥

গচ্ছন্ দ্ৱিমূৰ্তিৰুভযোৰ্যুগপন্নিকেত-
মেকেন ভূৰিৱিভৱৈৰ্ৱিহিতোপচাৰঃ ।
অন্যেন তদ্দিনভৃতৈশ্চ ফলৌদনাদ্যৈ-
স্তুল্যং প্ৰসেদিথ দদথ চ মুক্তিমাভ্যাম্ ॥3॥

ভূযোঽথ দ্ৱাৰৱত্যাং দ্ৱিজতনযমৃতিং তত্প্ৰলাপানপি ত্ৱম্
কো ৱা দৈৱং নিৰুন্ধ্যাদিতি কিল কথযন্ ৱিশ্ৱৱোঢাপ্যসোঢাঃ ।
জিষ্ণোৰ্গৰ্ৱং ৱিনেতুং ত্ৱযি মনুজধিযা কুণ্ঠিতাং চাস্য বুদ্ধিং
তত্ত্ৱাৰূঢাং ৱিধাতুং পৰমতমপদপ্ৰেক্ষণেনেতি মন্যে ॥4॥

নষ্টা অষ্টাস্য পুত্ৰাঃ পুনৰপি তৱ তূপেক্ষযা কষ্টৱাদঃ
স্পষ্টো জাতো জনানামথ তদৱসৰে দ্ৱাৰকামাপ পাৰ্থঃ ।
মৈত্ৰ্যা তত্ৰোষিতোঽসৌ নৱমসুতমৃতৌ ৱিপ্ৰৱৰ্যপ্ৰৰোদং
শ্ৰুত্ৱা চক্ৰে প্ৰতিজ্ঞামনুপহৃতসুতঃ সন্নিৱেক্ষ্যে কৃশানুম্ ॥5॥

মানী স ত্ৱামপৃষ্ট্ৱা দ্ৱিজনিলযগতো বাণজালৈৰ্মহাস্ত্ৰৈ
ৰুন্ধানঃ সূতিগেহং পুনৰপি সহসা দৃষ্টনষ্টে কুমাৰে ।
যাম্যামৈন্দ্ৰীং তথাঽন্যাঃ সুৰৱৰনগৰীৰ্ৱিদ্যযাঽঽসাদ্য সদ্যো
মোঘোদ্যোগঃ পতিষ্যন্ হুতভুজি ভৱতা সস্মিতং ৱাৰিতোঽভূত্ ॥6॥

সাৰ্ধং তেন প্ৰতীচীং দিশমতিজৱিনা স্যন্দনেনাভিযাতো
লোকালোকং ৱ্যতীতস্তিমিৰভৰমথো চক্ৰধাম্না নিৰুন্ধন্ ।
চক্ৰাংশুক্লিষ্টদৃষ্টিং স্থিতমথ ৱিজযং পশ্য পশ্যেতি ৱাৰাং
পাৰে ত্ৱং প্ৰাদদৰ্শঃ কিমপি হি তমসাং দূৰদূৰং পদং তে ॥7॥

তত্ৰাসীনং ভুজঙ্গাধিপশযনতলে দিৱ্যভূষাযুধাদ্যৈ-
ৰাৱীতং পীতচেলং প্ৰতিনৱজলদশ্যামলং শ্ৰীমদঙ্গম্ ।
মূৰ্তীনামীশিতাৰং পৰমিহ তিসৃণামেকমৰ্থং শ্ৰুতীনাং
ত্ৱামেৱ ত্ৱং পৰাত্মন্ প্ৰিযসখসহিতো নেমিথ ক্ষেমৰূপম্ ॥8॥

যুৱাং মামেৱ দ্ৱাৱধিকৱিৱৃতান্তৰ্হিততযা
ৱিভিন্নৌ সন্দ্ৰষ্টুং স্ৱযমহমহাৰ্ষং দ্ৱিজসুতান্ ।
নযেতং দ্ৰাগেতানিতি খলু ৱিতীৰ্ণান্ পুনৰমূন্
দ্ৱিজাযাদাযাদাঃ প্ৰণুতমহিমা পাণ্ডুজনুষা ॥9॥

এৱং নানাৱিহাৰৈৰ্জগদভিৰমযন্ ৱৃষ্ণিৱংশং প্ৰপুষ্ণ-
ন্নীজানো যজ্ঞভেদৈৰতুলৱিহৃতিভিঃ প্ৰীণযন্নেণনেত্ৰাঃ ।
ভূভাৰক্ষেপদম্ভাত্ পদকমলজুষাং মোক্ষণাযাৱতীৰ্ণঃ
পূৰ্ণং ব্ৰহ্মৈৱ সাক্ষাদ্যদুষু মনুজতাৰূষিতস্ত্ৱং ৱ্যলাসীঃ ॥10॥

প্ৰাযেণ দ্ৱাৰৱত্যামৱৃতদযি তদা নাৰদস্ত্ৱদ্ৰসাৰ্দ্ৰ-
স্তস্মাল্লেভে কদাচিত্খলু সুকৃতনিধিস্ত্ৱত্পিতা তত্ত্ৱবোধম্ ।
ভক্তানামগ্ৰযাযী স চ খলু মতিমানুদ্ধৱস্ত্ৱত্ত এৱ
প্ৰাপ্তো ৱিজ্ঞানসাৰং স কিল জনহিতাযাধুনাঽঽস্তে বদৰ্যাম্ ॥11॥

সোঽযং কৃষ্ণাৱতাৰো জযতি তৱ ৱিভো যত্ৰ সৌহাৰ্দভীতি-
স্নেহদ্ৱেষানুৰাগপ্ৰভৃতিভিৰতুলৈৰশ্ৰমৈৰ্যোগভেদৈঃ ।
আৰ্তিং তীৰ্ত্ৱা সমস্তামমৃতপদমগুস্সৰ্ৱতঃ সৰ্ৱলোকাঃ
স ত্ৱং ৱিশ্ৱাৰ্তিশান্ত্যৈ পৱনপুৰপতে ভক্তিপূৰ্ত্যৈ চ ভূযাঃ ॥12॥