নাৰাযণীযং দশক 99 - ৱেদমন্ত্ৰমূলাত্মকা ৱিষ্ণুস্তুতিঃ

ৱিষ্ণোৰ্ৱীৰ্যাণি কো ৱা কথযতু ধৰণেঃ কশ্চ ৰেণূন্মিমীতে
যস্যৈৱাঙ্ঘ্ৰিত্ৰযেণ ত্ৰিজগদভিমিতং মোদতে পূৰ্ণসম্পত্
যোসৌ ৱিশ্ৱানি ধত্তে প্ৰিযমিহ পৰমং ধাম তস্যাভিযাযাং
ত্ৱদ্ভক্তা যত্ৰ মাদ্যন্ত্যমৃতৰসমৰন্দস্য যত্ৰ প্ৰৱাহঃ ॥1॥

আদ্যাযাশেষকৰ্ত্ৰে প্ৰতিনিমিষনৱীনায ভৰ্ত্ৰে ৱিভূতে-
ৰ্ভক্তাত্মা ৱিষ্ণৱে যঃ প্ৰদিশতি হৱিৰাদীনি যজ্ঞাৰ্চনাদৌ ।
কৃষ্ণাদ্যং জন্ম যো ৱা মহদিহ মহতো ৱৰ্ণযেত্সোঽযমেৱ
প্ৰীতঃ পূৰ্ণো যশোভিস্ত্ৱৰিতমভিসৰেত্ প্ৰাপ্যমন্তে পদং তে ॥2॥

হে স্তোতাৰঃ কৱীন্দ্ৰাস্তমিহ খলু যথা চেতযধ্ৱে তথৈৱ
ৱ্যক্তং ৱেদস্য সাৰং প্ৰণুৱত জননোপাত্তলীলাকথাভিঃ ।
জানন্তশ্চাস্য নামান্যখিলসুখকৰাণীতি সঙ্কীৰ্তযধ্ৱং
হে ৱিষ্ণো কীৰ্তনাদ্যৈস্তৱ খলু মহতস্তত্ত্ৱবোধং ভজেযম্ ॥3॥

ৱিষ্ণোঃ কৰ্মাণি সম্পশ্যত মনসি সদা যৈঃ স ধৰ্মানবধ্নাদ্
যানীন্দ্ৰস্যৈষ ভৃত্যঃ প্ৰিযসখ ইৱ চ ৱ্যাতনোত্ ক্ষেমকাৰী ।
ৱীক্ষন্তে যোগসিদ্ধাঃ পৰপদমনিশং যস্য সম্যক্প্ৰকাশং
ৱিপ্ৰেন্দ্ৰা জাগৰূকাঃ কৃতবহুনুতযো যচ্চ নিৰ্ভাসযন্তে ॥4॥

নো জাতো জাযমানোঽপি চ সমধিগতস্ত্ৱন্মহিম্নোঽৱসানং
দেৱ শ্ৰেযাংসি ৱিদ্ৱান্ প্ৰতিমুহুৰপি তে নাম শংসামি ৱিষ্ণো ।
তং ত্ৱাং সংস্তৌমি নানাৱিধনুতিৱচনৈৰস্য লোকত্ৰযস্যা-
প্যূৰ্ধ্ৱং ৱিভ্ৰাজমানে ৱিৰচিতৱসতিং তত্ৰ ৱৈকুণ্ঠলোকে ॥5॥

আপঃ সৃষ্ট্যাদিজন্যাঃ প্ৰথমমযি ৱিভো গৰ্ভদেশে দধুস্ত্ৱাং
যত্ৰ ত্ৱয্যেৱ জীৱা জলশযন হৰে সঙ্গতা ঐক্যমাপন্ ।
তস্যাজস্য প্ৰভো তে ৱিনিহিতমভৱত্ পদ্মমেকং হি নাভৌ
দিক্পত্ৰং যত্ কিলাহুঃ কনকধৰণিভৃত্ কৰ্ণিকং লোকৰূপম্ ॥6॥

হে লোকা ৱিষ্ণুৰেতদ্ভুৱনমজনযত্তন্ন জানীথ যূযং
যুষ্মাকং হ্যন্তৰস্থং কিমপি তদপৰং ৱিদ্যতে ৱিষ্ণুৰূপম্ ।
নীহাৰপ্ৰখ্যমাযাপৰিৱৃতমনসো মোহিতা নামৰূপৈঃ
প্ৰাণপ্ৰীত্যেকতৃপ্তাশ্চৰথ মখপৰা হন্ত নেচ্ছা মুকুন্দে ॥7॥

মূৰ্ধ্নামক্ষ্ণাং পদানাং ৱহসি খলু সহস্ৰাণি সম্পূৰ্য ৱিশ্ৱং
তত্প্ৰোত্ক্ৰম্যাপি তিষ্ঠন্ পৰিমিতৱিৱৰে ভাসি চিত্তান্তৰেঽপি ।
ভূতং ভৱ্যং চ সৰ্ৱং পৰপুৰুষ ভৱান্ কিঞ্চ দেহেন্দ্ৰিযাদি-
ষ্ৱাৱিষ্টোঽপ্যুদ্গতত্ৱাদমৃতসুখৰসং চানুভুঙ্ক্ষে ত্ৱমেৱ ॥8॥

যত্তু ত্ৰৈলোক্যৰূপং দধদপি চ ততো নিৰ্গতোঽনন্তশুদ্ধ-
জ্ঞানাত্মা ৱৰ্তসে ত্ৱং তৱ খলু মহিমা সোঽপি তাৱান্ কিমন্যত্ ।
স্তোকস্তে ভাগ এৱাখিলভুৱনতযা দৃশ্যতে ত্ৰ্যংশকল্পং
ভূযিষ্ঠং সান্দ্ৰমোদাত্মকমুপৰি ততো ভাতি তস্মৈ নমস্তে ॥9॥

অৱ্যক্তং তে স্ৱৰূপং দুৰধিগমতমং তত্তু শুদ্ধৈকসত্ত্ৱং
ৱ্যক্তং চাপ্যেতদেৱ স্ফুটমমৃতৰসাম্ভোধিকল্লোলতুল্যম্ ।
সৰ্ৱোত্কৃষ্টামভীষ্টাং তদিহ গুণৰসেনৈৱ চিত্তং হৰন্তীং
মূৰ্তিং তে সংশ্ৰযেঽহং পৱনপুৰপতে পাহি মাং কৃষ্ণ ৰোগাত্ ॥10॥