শ্ৰী গুৰুগীতা দ্ৱিতীযোধ্যাযঃ

সৰ্ৱসৌখ্যকৰং চৈৱ ভুক্তিমুক্তিপ্ৰদাযকম্ ॥ 109 ॥

শ্ৰীমত্পৰং ব্ৰহ্ম গুৰুং স্মৰামি
শ্ৰীমত্পৰং ব্ৰহ্ম গুৰুং ভজামি ।
শ্ৰীমত্পৰং ব্ৰহ্ম গুৰুং ৱদামি
শ্ৰীমত্পৰং ব্ৰহ্ম গুৰুং নমামি ॥ 110 ॥

ব্ৰহ্মানন্দং পৰমসুখদং কেৱলং জ্ঞানমূৰ্তিং
দ্ৱন্দ্ৱাতীতং গগনসদৃশং তত্ত্ৱমস্যাদিলক্ষ্যম্ ।
একং নিত্যং ৱিমলমচলং সৰ্ৱধীসাক্ষিভূতং
ভাৱাতীতং ত্ৰিগুণৰহিতং সদ্গুৰুং তং নমামি ॥ 111 ॥

হৃদম্বুজে কৰ্ণিকমধ্যসংস্থে
সিংহাসনে সংস্থিতদিৱ্যমূৰ্তিম্ ।
ধ্যাযেদ্গুৰুং চন্দ্ৰকলাপ্ৰকাশং
সচ্চিত্সুখাভীষ্টৱৰং দধানম্ ॥ 112 ॥

শ্ৱেতাম্বৰং শ্ৱেতৱিলেপপুষ্পং
মুক্তাৱিভূষং মুদিতং দ্ৱিনেত্ৰম্ ।
ৱামাঙ্কপীঠস্থিতদিৱ্যশক্তিং
মন্দস্মিতং পূৰ্ণকৃপানিধানম্ ॥ 113 ॥

আনন্দমানন্দকৰং প্ৰসন্নং
জ্ঞানস্ৱৰূপং নিজভাৱযুক্তম্ ।
যোগীন্দ্ৰমীড্যং ভৱৰোগৱৈদ্যং
শ্ৰীমদ্গুৰুং নিত্যমহং নমামি ॥ 114 ॥

ৱন্দে গুৰূণাং চৰণাৰৱিন্দং
সন্দৰ্শিতস্ৱাত্মসুখাৱবোধে ।
জনস্য যে জাঙ্গলিকাযমানে
সংসাৰহালাহলমোহশান্ত্যৈ ॥ 115 ॥

যস্মিন্ সৃষ্টিস্থিতিধ্ৱংসনিগ্ৰহানুগ্ৰহাত্মকম্ ।
কৃত্যং পঞ্চৱিধং শশ্ৱত্ ভাসতে তং গুৰুং ভজেত্ ॥ 116 ॥

পাদাব্জে সৰ্ৱসংসাৰদাৱকালানলং স্ৱকে ।
ব্ৰহ্মৰন্ধ্ৰে স্থিতাম্ভোজমধ্যস্থং চন্দ্ৰমণ্ডলম্ ॥ 117 ॥

অকথাদিত্ৰিৰেখাব্জে সহস্ৰদলমণ্ডলে ।
হংসপাৰ্শ্ৱত্ৰিকোণে চ স্মৰেত্তন্মধ্যগং গুৰুম্ ॥ 118 ॥

নিত্যং শুদ্ধং নিৰাভাসং নিৰাকাৰং নিৰঞ্জনম্ ।
নিত্যবোধং চিদানন্দং গুৰুং ব্ৰহ্ম নমাম্যহম্ ॥ 119 ॥

সকলভুৱনসৃষ্টিঃ কল্পিতাশেষসৃষ্টিঃ
নিখিলনিগমদৃষ্টিঃ সত্পদাৰ্থৈকসৃষ্টিঃ ।
অতদ্গণপৰমেষ্টিঃ সত্পদাৰ্থৈকদৃষ্টিঃ
ভৱগুণপৰমেষ্টিৰ্মোক্ষমাৰ্গৈকদৃষ্টিঃ ॥ 120 ॥

সকলভুৱনৰঙ্গস্থাপনাস্তম্ভযষ্টিঃ
সকৰুণৰসৱৃষ্টিস্তত্ত্ৱমালাসমষ্টিঃ ।
সকলসমযসৃষ্টিস্সচ্চিদানন্দদৃষ্টিঃ
নিৱসতু মযি নিত্যং শ্ৰীগুৰোৰ্দিৱ্যদৃষ্টিঃ ॥ 121 ॥

ন গুৰোৰধিকং ন গুৰোৰধিকং
ন গুৰোৰধিকং ন গুৰোৰধিকম্ ।
শিৱশাসনতঃ শিৱশাসনতঃ
শিৱশাসনতঃ শিৱশাসনতঃ ॥ 122 ॥

ইদমেৱ শিৱং ইদমেৱ শিৱং
ইদমেৱ শিৱং ইদমেৱ শিৱম্ ।
হৰিশাসনতো হৰিশাসনতো
হৰিশাসনতো হৰিশাসনতঃ ॥ 123 ॥

ৱিদিতং ৱিদিতং ৱিদিতং ৱিদিতং
ৱিজনং ৱিজনং ৱিজনং ৱিজনম্ ।
ৱিধিশাসনতো ৱিধিশাসনতো
ৱিধিশাসনতো ৱিধিশাসনতঃ ॥ 124 ॥

এৱংৱিধং গুৰুং ধ্যাত্ৱা জ্ঞানমুত্পদ্যতে স্ৱযম্ ।
তদা গুৰূপদেশেন মুক্তোঽহমিতি ভাৱযেত্ ॥ 125 ॥

গুৰূপদিষ্টমাৰ্গেণ মনশ্শুদ্ধিং তু কাৰযেত্ ।
অনিত্যং খণ্ডযেত্সৰ্ৱং যত্কিঞ্চিদাত্মগোচৰম্ ॥ 126 ॥

জ্ঞেযং সৰ্ৱং প্ৰতীতং চ জ্ঞানং চ মন উচ্যতে ।
জ্ঞানং জ্ঞেযং সমং কুৰ্যান্নান্যঃ পন্থা দ্ৱিতীযকঃ ॥ 127 ॥

কিমত্ৰ বহুনোক্তেন শাস্ত্ৰকোটিশতৈৰপি ।
দুৰ্লভা চিত্তৱিশ্ৰান্তিঃ ৱিনা গুৰুকৃপাং পৰাম্ ॥ 128 ॥

কৰুণাখড্গপাতেন ছিত্ৱা পাশাষ্টকং শিশোঃ ।
সম্যগানন্দজনকঃ সদ্গুৰুঃ সোঽভিধীযতে ॥ 129 ॥

এৱং শ্ৰুত্ৱা মহাদেৱি গুৰুনিন্দাং কৰোতি যঃ ।
স যাতি নৰকান্ ঘোৰান্ যাৱচ্চন্দ্ৰদিৱাকৰৌ ॥ 130 ॥

যাৱত্কল্পান্তকো দেহস্তাৱদ্দেৱি গুৰুং স্মৰেত্ ।
গুৰুলোপো ন কৰ্তৱ্যঃ স্ৱচ্ছন্দো যদি ৱা ভৱেত্ ॥ 131 ॥

হুঙ্কাৰেণ ন ৱক্তৱ্যং প্ৰাজ্ঞশিষ্যৈঃ কদাচন ।
গুৰোৰগ্ৰ ন ৱক্তৱ্যমসত্যং তু কদাচন ॥ 132 ॥

গুৰুং ত্ৱঙ্কৃত্য হুঙ্কৃত্য গুৰুসান্নিধ্যভাষণঃ ।
অৰণ্যে নিৰ্জলে দেশে সম্ভৱেদ্ ব্ৰহ্মৰাক্ষসঃ ॥ 133 ॥

অদ্ৱৈতং ভাৱযেন্নিত্যং সৰ্ৱাৱস্থাসু সৰ্ৱদা ।
কদাচিদপি নো কুৰ্যাদদ্ৱৈতং গুৰুসন্নিধৌ ॥ 134 ॥

দৃশ্যৱিস্মৃতিপৰ্যন্তং কুৰ্যাদ্ গুৰুপদাৰ্চনম্ ।
তাদৃশস্যৈৱ কৈৱল্যং ন চ তদ্ৱ্যতিৰেকিণঃ ॥ 135 ॥

অপি সম্পূৰ্ণতত্ত্ৱজ্ঞো গুৰুত্যাগী ভৱেদ্যদা ।
ভৱত্যেৱ হি তস্যান্তকালে ৱিক্ষেপমুত্কটম্ ॥ 136 ॥

গুৰুকাৰ্যং ন লঙ্ঘেত নাপৃষ্ট্ৱা কাৰ্যমাচৰেত্ ।
ন হ্যুত্তিষ্ঠেদ্দিশেঽনত্ৱা গুৰুসদ্ভাৱশোভিতঃ ॥ 137 ॥

গুৰৌ সতি স্ৱযং দেৱি পৰেষাং তু কদাচন ।
উপদেশং ন ৱৈ কুৰ্যাত্ তথা চেদ্ৰাক্ষসো ভৱেত্ ॥ 138 ॥

ন গুৰোৰাশ্ৰমে কুৰ্যাত্ দুষ্পানং পৰিসৰ্পণম্ ।
দীক্ষা ৱ্যাখ্যা প্ৰভুত্ৱাদি গুৰোৰাজ্ঞাং ন কাৰযেত্ ॥ 139 ॥

নোপাশ্ৰযং চ পৰ্যকং ন চ পাদপ্ৰসাৰণম্ ।
নাঙ্গভোগাদিকং কুৰ্যান্ন লীলামপৰামপি ॥ 140 ॥

গুৰূণাং সদসদ্ৱাঽপি যদুক্তং তন্ন লঙ্ঘযেত্ ।
কুৰ্ৱন্নাজ্ঞাং দিৱা ৰাত্ৰৌ দাসৱন্নিৱসেদ্গুৰো ॥ 141 ॥

অদত্তং ন গুৰোৰ্দ্ৰৱ্যমুপভুঞ্জীত কৰ্হিচিত্ ।
দত্তে চ ৰঙ্কৱদ্গ্ৰাহ্যং প্ৰাণোঽপ্যেতেন লভ্যতে ॥ 142 ॥

পাদুকাসনশয্যাদি গুৰুণা যদভীষ্টিতম্ ।
নমস্কুৰ্ৱীত তত্সৰ্ৱং পাদাভ্যাং ন স্পৃশেত্ ক্ৱচিত্ ॥ 143 ॥

গচ্ছতঃ পৃষ্ঠতো গচ্ছেত্ গুৰুচ্ছাযাং ন লঙ্ঘযেত্ ।
নোল্বণং ধাৰযেদ্ৱেষং নালঙ্কাৰাংস্ততোল্বণান্ ॥ 144 ॥

গুৰুনিন্দাকৰং দৃষ্ট্ৱা ধাৱযেদথ ৱাসযেত্ ।
স্থানং ৱা তত্পৰিত্যাজ্যং জিহ্ৱাচ্ছেদাক্ষমো যদি ॥ 145 ॥

নোচ্ছিষ্টং কস্যচিদ্দেযং গুৰোৰাজ্ঞাং ন চ ত্যজেত্ ।
কৃত্স্নমুচ্ছিষ্টমাদায হৱিৰিৱ ভক্ষযেত্স্ৱযম্ ॥ 146 ॥

নাঽনৃতং নাঽপ্ৰিযং চৈৱ ন গৰ্ৱং নাঽপি ৱা বহু ।
ন নিযোগপৰং ব্ৰূযাত্ গুৰোৰাজ্ঞাং ৱিভাৱযেত্ ॥ 147 ॥

প্ৰভো দেৱকুলেশানাং স্ৱামিন্ ৰাজন্ কুলেশ্ৱৰ ।
ইতি সম্বোধনৈৰ্ভীতো গুৰুভাৱেন সৰ্ৱদা ॥ 148 ॥

মুনিভিঃ পন্নগৈৰ্ৱাপি সুৰৈৰ্ৱা শাপিতো যদি ।
কালমৃত্যুভযাদ্ৱাপি গুৰুঃ সন্ত্ৰাতি পাৰ্ৱতি ॥ 149 ॥

অশক্তা হি সুৰাদ্যাশ্চ হ্যশক্তাঃ মুনযস্তথা ।
গুৰুশাপোপপন্নস্য ৰক্ষণায চ কুত্ৰচিত্ ॥ 150 ॥

মন্ত্ৰৰাজমিদং দেৱি গুৰুৰিত্যক্ষৰদ্ৱযম্ ।
স্মৃতিৱেদপুৰাণানাং সাৰমেৱ ন সংশযঃ ॥ 151 ॥

সত্কাৰমানপূজাৰ্থং দণ্ডকাষযধাৰণঃ ।
স সন্ন্যাসী ন ৱক্তৱ্যঃ সন্ন্যাসী জ্ঞানতত্পৰঃ ॥ 152 ॥

ৱিজানন্তি মহাৱাক্যং গুৰোশ্চৰণ সেৱযা ।
তে ৱৈ সন্ন্যাসিনঃ প্ৰোক্তা ইতৰে ৱেষধাৰিণঃ ॥ 153 ॥

[পাঠভেদঃ –
নিত্যং ব্ৰহ্ম নিৰাকাৰং নিৰ্গুণং বোধযেত্পৰম্ ।
ভাসযন্ ব্ৰহ্মভাৱং চ দীপো দীপান্তৰং যথা ॥
]
নিত্যং ব্ৰহ্ম নিৰাকাৰং নিৰ্গুণং সত্যচিদ্ধনম্ ।
যঃ সাক্ষাত্কুৰুতে লোকে গুৰুত্ৱং তস্য শোভতে ॥ 154 ॥

গুৰুপ্ৰসাদতঃ স্ৱাত্মন্যাত্মাৰামনিৰীক্ষণাত্ ।
সমতা মুক্তিমাৰ্গেণ স্ৱাত্মজ্ঞানং প্ৰৱৰ্ততে ॥ 155 ॥

আব্ৰহ্মস্তম্বপৰ্যন্তং পৰমাত্মস্ৱৰূপকম্ ।
স্থাৱৰং জঙ্গমং চৈৱ প্ৰণমামি জগন্মযম্ ॥ 156 ॥

ৱন্দেঽহং সচ্চিদানন্দং ভাৱাতীতং জগদ্গুৰুম্ ।
নিত্যং পূৰ্ণং নিৰাকাৰং নিৰ্গুণং স্ৱাত্মসংস্থিতম্ ॥ 157 ॥

পৰাত্পৰতৰং ধ্যাযেন্নিত্যমানন্দকাৰকম্ ।
হৃদযাকাশমধ্যস্থং শুদ্ধস্ফটিকসন্নিভম্ ॥ 158 ॥

স্ফাটিকে স্ফাটিকং ৰূপং দৰ্পণে দৰ্পণো যথা ।
তথাঽঽত্মনি চিদাকাৰমানন্দং সোঽহমিত্যুত ॥ 159 ॥

অঙ্গুষ্ঠমাত্ৰং পুৰুষং ধ্যাযেচ্চ চিন্মযং হৃদি ।
তত্ৰ স্ফুৰতি যো ভাৱঃ শৃণু তত্কথযামি তে ॥ 160 ॥

অজোঽহমমৰোঽহং চ অনাদিনিধনো হ্যহম্ ।
অৱিকাৰশ্চিদানন্দো হ্যণীযান্মহতো মহান্ ॥ 161 ॥

অপূৰ্ৱমপৰং নিত্যং স্ৱযঞ্জ্যোতিৰ্নিৰামযম্ ।
ৱিৰজং পৰমাকাশং ধ্ৰুৱমানন্দমৱ্যযম্ ॥ 162 ॥

অগোচৰং তথাঽগম্যং নামৰূপৱিৱৰ্জিতম্ ।
নিশ্শব্দং তু ৱিজানীযাত্স্ৱভাৱাদ্ব্ৰহ্ম পাৰ্ৱতি ॥ 163 ॥

যথা গন্ধস্ৱভাৱত্ৱং কৰ্পূৰকুসুমাদিষু ।
শীতোষ্ণত্ৱস্ৱভাৱত্ৱং তথা ব্ৰহ্মণি শাশ্ৱতম্ ॥ 164 ॥

যথা নিজস্ৱভাৱেন কুণ্ডলে কটকাদযঃ ।
সুৱৰ্ণত্ৱেন তিষ্ঠন্তি তথাঽহং ব্ৰহ্ম শাশ্ৱতম্ ॥ 165 ॥

স্ৱযং তথাৱিধো ভূত্ৱা স্থাতৱ্যং যত্ৰ কুত্ৰ চিত্ ।
কীটো ভৃঙ্গ ইৱ ধ্যানাদ্যথা ভৱতি তাদৃশঃ ॥ 166 ॥

গুৰুধ্যানং তথা কৃত্ৱা স্ৱযং ব্ৰহ্মমযো ভৱেত্ ।
পিণ্ডে পদে তথা ৰূপে মুক্তাস্তে নাত্ৰ সংশযঃ ॥ 167 ॥

শ্ৰীপাৰ্ৱতী উৱাচ।
পিণ্ডং কিং তু মহাদেৱ পদং কিং সমুদাহৃতম্ ।
ৰূপাতীতং চ ৰূপং কিং এতদাখ্যাহি শঙ্কৰ ॥ 168 ॥

শ্ৰীমহাদেৱ উৱাচ।
পিণ্ডং কুণ্ডলিনী শক্তিঃ পদং হংসমুদাহৃতম্ ।
ৰূপং বিন্দুৰিতি জ্ঞেযং ৰূপাতীতং নিৰঞ্জনম্ ॥ 169 ॥

পিণ্ডে মুক্তাঃ পদে মুক্তা ৰূপে মুক্তা ৱৰাননে ।
ৰূপাতীতে তু যে মুক্তাস্তে মুক্তা নাঽত্ৰ সংশযঃ ॥ 170 ॥

গুৰুৰ্ধ্যানেনৈৱ নিত্যং দেহী ব্ৰহ্মমযো ভৱেত্ ।
স্থিতশ্চ যত্ৰ কুত্ৰাঽপি মুক্তোঽসৌ নাঽত্ৰ সংশযঃ ॥ 171 ॥

জ্ঞানং ৱৈৰাগ্যমৈশ্ৱৰ্যং যশশ্ৰীঃ স্ৱমুদাহৃতম্ ।
ষড্গুণৈশ্ৱৰ্যযুক্তো হি ভগৱান্ শ্ৰীগুৰুঃ প্ৰিযে ॥ 172 ॥

গুৰুশ্শিৱো গুৰুৰ্দেৱো গুৰুৰ্বন্ধুঃ শৰীৰিণাম্ ।
গুৰুৰাত্মা গুৰুৰ্জীৱো গুৰোৰন্যন্ন ৱিদ্যতে ॥ 173 ॥

একাকী নিস্স্পৃহঃ শান্তশ্চিন্তাঽসূযাদিৱৰ্জিতঃ ।
বাল্যভাৱেন যো ভাতি ব্ৰহ্মজ্ঞানী স উচ্যতে ॥ 174 ॥

ন সুখং ৱেদশাস্ত্ৰেষু ন সুখং মন্ত্ৰযন্ত্ৰকে ।
গুৰোঃ প্ৰসাদাদন্যত্ৰ সুখং নাস্তি মহীতলে ॥ 175 ॥

চাৰ্ৱাকৱৈষ্ণৱমতে সুখং প্ৰাভাকৰে ন হি ।
গুৰোঃ পাদান্তিকে যদ্ৱত্সুখং ৱেদান্তসম্মতম্ ॥ 176 ॥

ন তত্সুখং সুৰেন্দ্ৰস্য ন সুখং চক্ৰৱৰ্তিনাম্ ।
যত্সুখং ৱীতৰাগস্য মুনেৰেকান্তৱাসিনঃ ॥ 177 ॥

নিত্যং ব্ৰহ্মৰসং পীত্ৱা তৃপ্তো যঃ পৰমাত্মনি ।
ইন্দ্ৰং চ মন্যতে তুচ্ছং নৃপাণাং তত্ৰ কা কথা ॥ 178 ॥

যতঃ পৰমকৈৱল্যং গুৰুমাৰ্গেণ ৱৈ ভৱেত্ ।
গুৰুভক্তিৰতঃ কাৰ্যা সৰ্ৱদা মোক্ষকাঙ্ক্ষিভিঃ ॥ 179 ॥

এক এৱাঽদ্ৱিতীযোঽহং গুৰুৱাক্যেন নিশ্চিতঃ ।
এৱমভ্যস্যতা নিত্যং ন সেৱ্যং ৱৈ ৱনান্তৰম্ ॥ 180 ॥

অভ্যাসান্নিমিষেণৈৱ সমাধিমধিগচ্ছতি ।
আজন্মজনিতং পাপং তত্ক্ষণাদেৱ নশ্যতি ॥ 181 ॥

কিমাৱাহনমৱ্যক্তে ৱ্যাপকে কিং ৱিসৰ্জনম্ ।
অমূৰ্তে চ কথং পূজা কথং ধ্যানং নিৰামযে ॥ 182 ॥

গুৰুৰ্ৱিষ্ণুঃ সত্ত্ৱমযো ৰাজসশ্চতুৰাননঃ ।
তামসো ৰুদ্ৰৰূপেণ সৃজত্যৱতি হন্তি চ ॥ 183 ॥

স্ৱযং ব্ৰহ্মমযো ভূত্ৱা তত্পৰং চাৱলোকযেত্ ।
পৰাত্পৰতৰং নান্যত্ সৰ্ৱগং তন্নিৰামযম্ ॥ 184 ॥

তস্যাৱলোকনং প্ৰাপ্য সৰ্ৱসঙ্গৱিৱৰ্জিতঃ ।
একাকী নিস্স্পৃহঃ শান্তঃ স্থাতৱ্যং তত্প্ৰসাদতঃ ॥ 185 ॥

লব্ধং ৱাঽথ ন লব্ধং ৱা স্ৱল্পং ৱা বহুলং তথা ।
নিষ্কামেনৈৱ ভোক্তৱ্যং সদা সন্তুষ্টমানসঃ ॥ 186 ॥

সৰ্ৱজ্ঞপদমিত্যাহুৰ্দেহী সৰ্ৱমযো ভুৱি ।
সদাঽঽনন্দঃ সদা শান্তো ৰমতে যত্ৰ কুত্ৰ চিত্ ॥ 187 ॥

যত্ৰৈৱ তিষ্ঠতে সোঽপি স দেশঃ পুণ্যভাজনঃ ।
মুক্তস্য লক্ষণং দেৱি তৱাঽগ্ৰে কথিতং মযা ॥ 188 ॥

উপদেশস্ত্ৱযং দেৱি গুৰুমাৰ্গেণ মুক্তিদঃ ।
গুৰুভক্তিঃ তথাঽত্যন্তা কৰ্তৱ্যা ৱৈ মনীষিভিঃ ॥ 189 ॥

নিত্যযুক্তাশ্ৰযঃ সৰ্ৱৱেদকৃত্সৰ্ৱৱেদকৃত্ ।
স্ৱপৰজ্ঞানদাতা চ তং ৱন্দে গুৰুমীশ্ৱৰম্ ॥ 190 ॥

যদ্যপ্যধীতা নিগমাঃ ষডঙ্গা আগমাঃ প্ৰিযে ।
অধ্যাত্মাদীনি শাস্ত্ৰাণি জ্ঞানং নাস্তি গুৰুং ৱিনা ॥ 191 ॥

শিৱপূজাৰতো ৱাঽপি ৱিষ্ণুপূজাৰতোঽথৱা ।
গুৰুতত্ত্ৱৱিহীনশ্চেত্তত্সৰ্ৱং ৱ্যৰ্থমেৱ হি ॥ 192 ॥

শিৱস্ৱৰূপমজ্ঞাত্ৱা শিৱপূজা কৃতা যদি ।
সা পূজা নামমাত্ৰং স্যাচ্চিত্ৰদীপ ইৱ প্ৰিযে ॥ 193 ॥

সৰ্ৱং স্যাত্সফলং কৰ্ম গুৰুদীক্ষাপ্ৰভাৱতঃ ।
গুৰুলাভাত্সৰ্ৱলাভো গুৰুহীনস্তু বালিশঃ ॥ 194 ॥

গুৰুহীনঃ পশুঃ কীটঃ পতঙ্গো ৱক্তুমৰ্হতি ।
শিৱৰূপং স্ৱৰূপং চ ন জানাতি যতস্স্ৱযম্ ॥ 195 ॥

তস্মাত্সৰ্ৱপ্ৰযত্নেন সৰ্ৱসঙ্গৱিৱৰ্জিতঃ ।
ৱিহায শাস্ত্ৰজালানি গুৰুমেৱ সমাশ্ৰযেত্ ॥ 196 ॥

নিৰস্তসৰ্ৱসন্দেহো একীকৃত্য সুদৰ্শনম্ ।
ৰহস্যং যো দৰ্শযতি ভজামি গুৰুমীশ্ৱৰম্ ॥ 197 ॥

জ্ঞানহীনো গুৰুস্ত্যাজ্যো মিথ্যাৱাদী ৱিডম্বকঃ ।
স্ৱৱিশ্ৰান্তিং ন জানাতি পৰশান্তিং কৰোতি কিম্ ॥ 198 ॥

শিলাযাঃ কিং পৰং জ্ঞানং শিলাসঙ্ঘপ্ৰতাৰণে ।
স্ৱযং তৰ্তুং ন জানাতি পৰং নিস্তাৰযেত্ কথম্ ॥ 199 ॥

ন ৱন্দনীযাস্তে কষ্টং দৰ্শনাদ্ভ্ৰান্তিকাৰকাঃ ।
ৱৰ্জযেত্তান্ গুৰূন্ দূৰে ধীৰস্য তু সমাশ্ৰযেত্ ॥ 200 ॥

পাষণ্ডিনঃ পাপৰতাঃ নাস্তিকা ভেদবুদ্ধযঃ ।
স্ত্ৰীলম্পটা দুৰাচাৰাঃ কৃতঘ্না বকৱৃত্তযঃ ॥ 201 ॥

কৰ্মভ্ৰষ্টাঃ ক্ষমানষ্টা নিন্দ্যতৰ্কৈশ্চ ৱাদিনঃ ।
কামিনঃ ক্ৰোধিনশ্চৈৱ হিংস্ৰাশ্চণ্ডাঃ শঠাস্তথা ॥ 202 ॥

জ্ঞানলুপ্তা ন কৰ্তৱ্যা মহাপাপাস্তথা প্ৰিযে ।
এভ্যো ভিন্নো গুৰুঃ সেৱ্যঃ একভক্ত্যা ৱিচাৰ্য চ ॥ 203 ॥

শিষ্যাদন্যত্ৰ দেৱেশি ন ৱদেদ্যস্য কস্যচিত্ ।
নৰাণাং চ ফলপ্ৰাপ্তৌ ভক্তিৰেৱ হি কাৰণম্ ॥ 204 ॥

গূঢো দৃঢশ্চ প্ৰীতশ্চ মৌনেন সুসমাহিতঃ ।
সকৃত্কামগতো ৱাঽপি পঞ্চধা গুৰুৰীৰিতঃ ॥ 205 ॥

সৰ্ৱং গুৰুমুখাল্লব্ধং সফলং পাপনাশনম্ ।
যদ্যদাত্মহিতং ৱস্তু তত্তদ্দ্ৰৱ্যং ন ৱঞ্চযেত্ ॥ 206 ॥

গুৰুদেৱাৰ্পণং ৱস্তু তেন তুষ্টোঽস্মি সুৱ্ৰতে ।
শ্ৰীগুৰোঃ পাদুকাং মুদ্ৰাং মূলমন্ত্ৰং চ গোপযেত্ ॥ 207 ॥

নতাঽস্মি তে নাথ পদাৰৱিন্দং
বুদ্ধীন্দ্ৰিযপ্ৰাণমনোৱচোভিঃ ।
যচ্চিন্ত্যতে ভাৱিত আত্মযুক্তৌ
মুমুক্ষিভিঃ কৰ্মমযোপশান্তযে ॥ 208 ॥

অনেন যদ্ভৱেত্কাৰ্যং তদ্ৱদামি তৱ প্ৰিযে ।
লোকোপকাৰকং দেৱি লৌকিকং তু ৱিৱৰ্জযেত্ ॥ 209 ॥

লৌকিকাদ্ধৰ্মতো যাতি জ্ঞানহীনো ভৱাৰ্ণৱে ।
জ্ঞানভাৱে চ যত্সৰ্ৱং কৰ্ম নিষ্কৰ্ম শাম্যতি ॥ 210 ॥

ইমাং তু ভক্তিভাৱেন পঠেদ্ৱৈ শৃণুযাদপি ।
লিখিত্ৱা যত্প্ৰদানেন তত্সৰ্ৱং ফলমশ্নুতে ॥ 211 ॥

গুৰুগীতামিমাং দেৱি হৃদি নিত্যং ৱিভাৱয ।
মহাৱ্যাধিগতৈৰ্দুঃখৈঃ সৰ্ৱদা প্ৰজপেন্মুদা ॥ 212 ॥

গুৰুগীতাক্ষৰৈকৈকং মন্ত্ৰৰাজমিদং প্ৰিযে ।
অন্যে চ ৱিৱিধাঃ মন্ত্ৰাঃ কলাং নাৰ্হন্তি ষোডশীম্ ॥ 213 ॥

অনন্ত ফলমাপ্নোতি গুৰুগীতা জপেন তু ।
সৰ্ৱপাপহৰা দেৱি সৰ্ৱদাৰিদ্ৰ্যনাশিনী ॥ 214 ॥

অকালমৃত্যুহৰা চৈৱ সৰ্ৱসঙ্কটনাশিনী ।
যক্ষৰাক্ষসভূতাদিচোৰৱ্যাঘ্ৰৱিঘাতিনী ॥ 215 ॥

সৰ্ৱোপদ্ৰৱকুষ্ঠাদিদুষ্টদোষনিৱাৰিণী ।
যত্ফলং গুৰুসান্নিধ্যাত্তত্ফলং পঠনাদ্ভৱেত্ ॥ 216 ॥

মহাৱ্যাধিহৰা সৰ্ৱৱিভূতেঃ সিদ্ধিদা ভৱেত্ ।
অথৱা মোহনে ৱশ্যে স্ৱযমেৱ জপেত্সদা ॥ 217 ॥

কুশদূৰ্ৱাসনে দেৱি হ্যাসনে শুভ্ৰকম্বলে ।
উপৱিশ্য ততো দেৱি জপেদেকাগ্ৰমানসঃ ॥ 218 ॥

শুক্লং সৰ্ৱত্ৰ ৱৈ প্ৰোক্তং ৱশ্যে ৰক্তাসনং প্ৰিযে ।
পদ্মাসনে জপেন্নিত্যং শান্তিৱশ্যকৰং পৰম্ ॥ 219 ॥

ৱস্ত্ৰাসনে চ দাৰিদ্ৰ্যং পাষাণে ৰোগসম্ভৱঃ ।
মেদিন্যাং দুঃখমাপ্নোতি কাষ্ঠে ভৱতি নিষ্ফলম্ ॥ 220 ॥

কৃষ্ণাজিনে জ্ঞানসিদ্ধিঃ মোক্ষশ্ৰীৰ্ৱ্যাঘ্ৰচৰ্মণি ।
কুশাসনে জ্ঞানসিদ্ধিঃ সৰ্ৱসিদ্ধিস্তু কম্বলে ॥ 221 ॥

আগ্নেয্যাং কৰ্ষণং চৈৱ ৱাযৱ্যাং শত্ৰুনাশনম্ ।
নৈৰৃত্যাং দৰ্শনং চৈৱ ঈশান্যাং জ্ঞানমেৱ চ ॥ 222 ॥

উদঙ্মুখঃ শান্তিজাপ্যে ৱশ্যে পূৰ্ৱমুখস্তথা ।
যাম্যে তু মাৰণং প্ৰোক্তং পশ্চিমে চ ধনাগমঃ ॥ 223 ॥

মোহনং সৰ্ৱভূতানাং বন্ধমোক্ষকৰং পৰম্ ।
দেৱৰাজপ্ৰিযকৰং ৰাজানং ৱশমানযেত্ ॥ 224 ॥

মুখস্তম্ভকৰং চৈৱ গুণানাং চ ৱিৱৰ্ধনম্ ।
দুষ্কৰ্মনাশনং চৈৱ তথা সত্কৰ্মসিদ্ধিদম্ ॥ 225 ॥

অসিদ্ধং সাধযেত্কাৰ্যং নৱগ্ৰহভযাপহম্ ।
দুঃস্ৱপ্ননাশনং চৈৱ সুস্ৱপ্নফলদাযকম্ ॥ 226 ॥

মোহশান্তিকৰং চৈৱ বন্ধমোক্ষকৰং পৰম্ ।
স্ৱৰূপজ্ঞাননিলযং গীতাশাস্ত্ৰমিদং শিৱে ॥ 227 ॥

যং যং চিন্তযতে কামং তং তং প্ৰাপ্নোতি নিশ্চযম্ ।
নিত্যং সৌভাগ্যদং পুণ্যং তাপত্ৰযকুলাপহম্ ॥ 228 ॥

সৰ্ৱশান্তিকৰং নিত্যং তথা ৱন্ধ্যা সুপুত্ৰদম্ ।
অৱৈধৱ্যকৰং স্ত্ৰীণাং সৌভাগ্যস্য ৱিৱৰ্ধনম্ ॥ 229 ॥

আযুৰাৰোগ্যমৈশ্ৱৰ্যং পুত্ৰপৌত্ৰৱিৱৰ্ধনম্ ।
নিষ্কামজাপী ৱিধৱা পঠেন্মোক্ষমৱাপ্নুযাত্ ॥ 230 ॥

অৱৈধৱ্যং সকামা তু লভতে চান্যজন্মনি ।
সৰ্ৱদুঃখমযং ৱিঘ্নং নাশযেত্তাপহাৰকম্ ॥ 231 ॥

সৰ্ৱপাপপ্ৰশমনং ধৰ্মকামাৰ্থমোক্ষদম্ ।
যং যং চিন্তযতে কামং তং তং প্ৰাপ্নোতি নিশ্চিতম্ ॥ 232 ॥

কাম্যানাং কামধেনুৰ্ৱৈ কল্পতে কল্পপাদপঃ ।
চিন্তামণিশ্চিন্তিতস্য সৰ্ৱমঙ্গলকাৰকম্ ॥ 233 ॥

লিখিত্ৱা পূজযেদ্যস্তু মোক্ষশ্ৰিযমৱাপ্নুযাত্ ।
গুৰূভক্তিৰ্ৱিশেষেণ জাযতে হৃদি সৰ্ৱদা ॥ 234 ॥

জপন্তি শাক্তাঃ সৌৰাশ্চ গাণপত্যাশ্চ ৱৈষ্ণৱাঃ ।
শৈৱাঃ পাশুপতাঃ সৰ্ৱে সত্যং সত্যং ন সংশযঃ ॥ 235 ॥