শ্ৰী গুৰুগীতা তৃতীযোধ্যাযঃ

সাগৰান্তে সৰিত্তীৰে তীৰ্থে হৰিহৰালযে ॥ 236 ॥

শক্তিদেৱালযে গোষ্ঠে সৰ্ৱদেৱালযে শুভে ।
ৱটস্য ধাত্ৰ্যা মূলে ৱা মঠে বৃন্দাৱনে তথা ॥ 237 ॥

পৱিত্ৰে নিৰ্মলে দেশে নিত্যানুষ্ঠানতোঽপি ৱা ।
নিৰ্ৱেদনেন মৌনেন জপমেতত্ সমাৰভেত্ ॥ 238 ॥

জাপ্যেন জযমাপ্নোতি জপসিদ্ধিং ফলং তথা ।
হীনং কৰ্ম ত্যজেত্সৰ্ৱং গৰ্হিতস্থানমেৱ চ ॥ 239 ॥

শ্মশানে বিল্ৱমূলে ৱা ৱটমূলান্তিকে তথা ।
সিদ্ধ্যন্তি কানকে মূলে চূতৱৃক্ষস্য সন্নিধৌ ॥ 240 ॥

পীতাসনং মোহনে তু হ্যসিতং চাভিচাৰিকে ।
জ্ঞেযং শুক্লং চ শান্ত্যৰ্থং ৱশ্যে ৰক্তং প্ৰকীৰ্তিতম্ ॥ 241 ॥

জপং হীনাসনং কুৰ্ৱন্ হীনকৰ্মফলপ্ৰদম্ ।
গুৰুগীতাং প্ৰযাণে ৱা সঙ্গ্ৰামে ৰিপুসঙ্কটে ॥ 242 ॥

জপন্ জযমৱাপ্নোতি মৰণে মুক্তিদাযিকা ।
সৰ্ৱকৰ্মাণি সিদ্ধ্যন্তি গুৰুপুত্ৰে ন সংশযঃ ॥ 243 ॥

গুৰুমন্ত্ৰো মুখে যস্য তস্য সিদ্ধ্যন্তি নাঽন্যথা ।
দীক্ষযা সৰ্ৱকৰ্মাণি সিদ্ধ্যন্তি গুৰুপুত্ৰকে ॥ 244 ॥

ভৱমূলৱিনাশায চাষ্টপাশনিৱৃত্তযে ।
গুৰুগীতাম্ভসি স্নানং তত্ত্ৱজ্ঞঃ কুৰুতে সদা ॥ 245 ॥

স এৱং সদ্গুৰুঃ সাক্ষাত্ সদসদ্ব্ৰহ্মৱিত্তমঃ ।
তস্য স্থানানি সৰ্ৱাণি পৱিত্ৰাণি ন সংশযঃ ॥ 246 ॥

সৰ্ৱশুদ্ধঃ পৱিত্ৰোঽসৌ স্ৱভাৱাদ্যত্ৰ তিষ্ঠতি ।
তত্ৰ দেৱগণাঃ সৰ্ৱে ক্ষেত্ৰপীঠে চৰন্তি চ ॥ 247 ॥

আসনস্থাঃ শযানা ৱা গচ্ছন্তস্তিষ্ঠতোঽপি ৱা ।
অশ্ৱাৰূঢা গজাৰূঢাঃ সুষুপ্তা জাগ্ৰতোঽপি ৱা ॥ 248 ॥

শুচিৰ্ভূতা জ্ঞানৱন্তো গুৰুগীতাং জপন্তি যে ।
তেষাং দৰ্শনসংস্পৰ্শাত্ দিৱ্যজ্ঞানং প্ৰজাযতে ॥ 249 ॥

সমুদ্ৰে ৱৈ যথা তোযং ক্ষীৰে ক্ষীৰং জলে জলম্ ।
ভিন্নে কুম্ভে যথাঽঽকাশং তথাঽঽত্মা পৰমাত্মনি ॥ 250 ॥

তথৈৱ জ্ঞানৱান্ জীৱঃ পৰমাত্মনি সৰ্ৱদা ।
ঐক্যেন ৰমতে জ্ঞানী যত্ৰ কুত্ৰ দিৱানিশম্ ॥ 251 ॥

এৱংৱিধো মহাযুক্তঃ সৰ্ৱত্ৰ ৱৰ্ততে সদা ।
তস্মাত্সৰ্ৱপ্ৰকাৰেণ গুৰুভক্তিং সমাচৰেত্ ॥ 252 ॥

গুৰুসন্তোষণাদেৱ মুক্তো ভৱতি পাৰ্ৱতি ।
অণিমাদিষু ভোক্তৃত্ৱং কৃপযা দেৱি জাযতে ॥ 253 ॥

সাম্যেন ৰমতে জ্ঞানী দিৱা ৱা যদি ৱা নিশি ।
এৱংৱিধো মহামৌনী ত্ৰৈলোক্যসমতাং ৱ্ৰজেত্ ॥ 254 ॥

অথ সংসাৰিণঃ সৰ্ৱে গুৰুগীতা জপেন তু ।
সৰ্ৱান্ কামাংস্তু ভুঞ্জন্তি ত্ৰিসত্যং মম ভাষিতম্ ॥ 255 ॥

সত্যং সত্যং পুনঃ সত্যং ধৰ্মসাৰং মযোদিতম্ ।
গুৰুগীতাসমং স্তোত্ৰং নাস্তি তত্ত্ৱং গুৰোঃ পৰম্ ॥ 256 ॥

গুৰুৰ্দেৱো গুৰুৰ্ধৰ্মো গুৰৌ নিষ্ঠা পৰং তপঃ ।
গুৰোঃ পৰতৰং নাস্তি ত্ৰিৱাৰং কথযামি তে ॥ 257 ॥

ধন্যা মাতা পিতা ধন্যো গোত্ৰং ধন্যং কুলোদ্ভৱঃ ।
ধন্যা চ ৱসুধা দেৱি যত্ৰ স্যাদ্গুৰুভক্ততা ॥ 258 ॥

আকল্পজন্ম কোটীনাং যজ্ঞৱ্ৰততপঃ ক্ৰিযাঃ ।
তাঃ সৰ্ৱাঃ সফলা দেৱি গুৰূসন্তোষমাত্ৰতঃ ॥ 259 ॥

শৰীৰমিন্দ্ৰিযং প্ৰাণমৰ্থং স্ৱজনবন্ধুতা ।
মাতৃকুলং পিতৃকুলং গুৰুৰেৱ ন সংশযঃ ॥ 260 ॥

মন্দভাগ্যা হ্যশক্তাশ্চ যে জনা নানুমন্ৱতে ।
গুৰুসেৱাসু ৱিমুখাঃ পচ্যন্তে নৰকেঽশুচৌ ॥ 261 ॥

ৱিদ্যা ধনং বলং চৈৱ তেষাং ভাগ্যং নিৰৰ্থকম্ ।
যেষাং গুৰূকৃপা নাস্তি অধো গচ্ছন্তি পাৰ্ৱতি ॥ 262 ॥

ব্ৰহ্মা ৱিষ্ণুশ্চ ৰুদ্ৰশ্চ দেৱাশ্চ পিতৃকিন্নৰাঃ ।
সিদ্ধচাৰণযক্ষাশ্চ অন্যে চ মুনযো জনাঃ ॥ 263 ॥

গুৰুভাৱঃ পৰং তীৰ্থমন্যতীৰ্থং নিৰৰ্থকম্ ।
সৰ্ৱতীৰ্থমযং দেৱি শ্ৰীগুৰোশ্চৰণাম্বুজম্ ॥ 264 ॥

কন্যাভোগৰতা মন্দাঃ স্ৱকান্তাযাঃ পৰাঙ্মুখাঃ ।
অতঃ পৰং মযা দেৱি কথিতং ন মম প্ৰিযে ॥ 265 ॥

ইদং ৰহস্যমস্পষ্টং ৱক্তৱ্যং চ ৱৰাননে ।
সুগোপ্যং চ তৱাগ্ৰে তু মমাত্মপ্ৰীতযে সতি ॥ 266 ॥

স্ৱামিমুখ্যগণেশাদ্যান্ ৱৈষ্ণৱাদীংশ্চ পাৰ্ৱতি ।
ন ৱক্তৱ্যং মহামাযে পাদস্পৰ্শং কুৰুষ্ৱ মে ॥ 267 ॥

অভক্তে ৱঞ্চকে ধূৰ্তে পাষণ্ডে নাস্তিকাদিষু ।
মনসাঽপি ন ৱক্তৱ্যা গুৰুগীতা কদাচন ॥ 268 ॥

গুৰৱো বহৱঃ সন্তি শিষ্যৱিত্তাপহাৰকাঃ ।
তমেকং দুৰ্লভং মন্যে শিষ্যহৃত্তাপহাৰকম্ ॥ 269 ॥

চাতুৰ্যৱান্ ৱিৱেকী চ অধ্যাত্মজ্ঞানৱান্ শুচিঃ ।
মানসং নিৰ্মলং যস্য গুৰুত্ৱং তস্য শোভতে ॥ 270 ॥

গুৰৱো নিৰ্মলাঃ শান্তাঃ সাধৱো মিতভাষিণঃ ।
কামক্ৰোধৱিনিৰ্মুক্তাঃ সদাচাৰাঃ জিতেন্দ্ৰিযাঃ ॥ 271 ॥

সূচকাদিপ্ৰভেদেন গুৰৱো বহুধা স্মৃতাঃ ।
স্ৱযং সম্যক্ পৰীক্ষ্যাথ তত্ত্ৱনিষ্ঠং ভজেত্সুধীঃ ॥ 272 ॥

ৱৰ্ণজালমিদং তদ্ৱদ্বাহ্যশাস্ত্ৰং তু লৌকিকম্ ।
যস্মিন্ দেৱি সমভ্যস্তং স গুৰুঃ সুচকঃ স্মৃতঃ ॥ 273 ॥

ৱৰ্ণাশ্ৰমোচিতাং ৱিদ্যাং ধৰ্মাধৰ্মৱিধাযিনীম্ ।
প্ৰৱক্তাৰং গুৰুং ৱিদ্ধি ৱাচকং ত্ৱিতি পাৰ্ৱতি ॥ 274 ॥

পঞ্চাক্ষৰ্যাদিমন্ত্ৰাণামুপদেষ্টা তু পাৰ্ৱতি ।
স গুৰুৰ্বোধকো ভূযাদুভযোৰযমুত্তমঃ ॥ 275 ॥

মোহমাৰণৱশ্যাদিতুচ্ছমন্ত্ৰোপদেশিনম্ ।
নিষিদ্ধগুৰুৰিত্যাহুঃ পণ্ডিতাস্তত্ত্ৱদৰ্শিনঃ ॥ 276 ॥

অনিত্যমিতি নিৰ্দিশ্য সংসাৰং সঙ্কটালযম্ ।
ৱৈৰাগ্যপথদৰ্শী যঃ স গুৰুৰ্ৱিহিতঃ প্ৰিযে ॥ 277 ॥

তত্ত্ৱমস্যাদিৱাক্যানামুপদেষ্টা তু পাৰ্ৱতি ।
কাৰণাখ্যো গুৰুঃ প্ৰোক্তো ভৱৰোগনিৱাৰকঃ ॥ 278 ॥

সৰ্ৱসন্দেহসন্দোহনিৰ্মূলনৱিচক্ষণঃ ।
জন্মমৃত্যুভযঘ্নো যঃ স গুৰুঃ পৰমো মতঃ ॥ 279 ॥

বহুজন্মকৃতাত্ পুণ্যাল্লভ্যতেঽসৌ মহাগুৰুঃ ।
লব্ধ্ৱাঽমুং ন পুনৰ্যাতি শিষ্যঃ সংসাৰবন্ধনম্ ॥ 280 ॥

এৱং বহুৱিধা লোকে গুৰৱঃ সন্তি পাৰ্ৱতি ।
তেষু সৰ্ৱপ্ৰযত্নেন সেৱ্যো হি পৰমো গুৰুঃ ॥ 281 ॥

নিষিদ্ধগুৰুশিষ্যস্তু দুষ্টসঙ্কল্পদূষিতঃ ।
ব্ৰহ্মপ্ৰলযপৰ্যন্তং ন পুনৰ্যাতি মৰ্ত্যতাম্ ॥ 282 ॥

এৱং শ্ৰুত্ৱা মহাদেৱী মহাদেৱৱচস্তথা ।
অত্যন্তৱিহ্ৱলমনাঃ শঙ্কৰং পৰিপৃচ্ছতি ॥ 283 ॥

পাৰ্ৱত্যুৱাচ।
নমস্তে দেৱদেৱাত্ৰ শ্ৰোতৱ্যং কিঞ্চিদস্তি মে ।
শ্ৰুত্ৱা ত্ৱদ্ৱাক্যমধুনা ভৃশং স্যাদ্ৱিহ্ৱলং মনঃ ॥ 284 ॥

স্ৱযং মূঢা মৃত্যুভীতাঃ সুকৃতাদ্ৱিৰতিং গতাঃ ।
দৈৱান্নিষিদ্ধগুৰুগা যদি তেষাং তু কা গতিঃ ॥ 285 ॥

শ্ৰী মহাদেৱ উৱাচ।
শৃণু তত্ত্ৱমিদং দেৱি যদা স্যাদ্ৱিৰতো নৰঃ ।
তদাঽসাৱধিকাৰীতি প্ৰোচ্যতে শ্ৰুতিমস্তকৈঃ ॥ 286 ॥

অখণ্ডৈকৰসং ব্ৰহ্ম নিত্যমুক্তং নিৰামযম্ ।
স্ৱস্মিন্ সন্দৰ্শিতং যেন স ভৱেদস্যং দেশিকঃ ॥ 287 ॥

জলানাং সাগৰো ৰাজা যথা ভৱতি পাৰ্ৱতি ।
গুৰূণাং তত্ৰ সৰ্ৱেষাং ৰাজাঽযং পৰমো গুৰুঃ ॥ 288 ॥

মোহাদিৰহিতঃ শান্তো নিত্যতৃপ্তো নিৰাশ্ৰযঃ ।
তৃণীকৃতব্ৰহ্মৱিষ্ণুৱৈভৱঃ পৰমো গুৰুঃ ॥ 289 ॥

সৰ্ৱকালৱিদেশেষু স্ৱতন্ত্ৰো নিশ্চলস্সুখী ।
অখণ্ডৈকৰসাস্ৱাদতৃপ্তো হি পৰমো গুৰুঃ ॥ 290 ॥

দ্ৱৈতাদ্ৱৈতৱিনিৰ্মুক্তঃ স্ৱানুভূতিপ্ৰকাশৱান্ ।
অজ্ঞানান্ধতমশ্ছেত্তা সৰ্ৱজ্ঞঃ পৰমো গুৰুঃ ॥ 291 ॥

যস্য দৰ্শনমাত্ৰেণ মনসঃ স্যাত্ প্ৰসন্নতা ।
স্ৱযং ভূযাত্ ধৃতিশ্শান্তিঃ স ভৱেত্ পৰমো গুৰুঃ ॥ 292 ॥

সিদ্ধিজালং সমালোক্য যোগিনাং মন্ত্ৰৱাদিনাম্ ।
তুচ্ছাকাৰমনোৱৃত্তিঃ যস্যাসৌ পৰমো গুৰুঃ ॥ 293 ॥

স্ৱশৰীৰং শৱং পশ্যন্ তথা স্ৱাত্মানমদ্ৱযম্ ।
যঃ স্ত্ৰীকনকমোহঘ্নঃ স ভৱেত্ পৰমো গুৰুঃ ॥ 294 ॥

মৌনী ৱাগ্মীতি তত্ত্ৱজ্ঞো দ্ৱিধাঽভূচ্ছৃণু পাৰ্ৱতি ।
ন কশ্চিন্মৌনিনাং লোভো লোকেঽস্মিন্ভৱতি প্ৰিযে ॥ 295 ॥

ৱাগ্মী তূত্কটসংসাৰসাগৰোত্তাৰণক্ষমঃ ।
যতোঽসৌ সংশযচ্ছেত্তা শাস্ত্ৰযুক্ত্যনুভূতিভিঃ ॥ 296 ॥

গুৰুনামজপাদ্দেৱি বহুজন্মাৰ্জিতান্যপি ।
পাপানি ৱিলযং যান্তি নাস্তি সন্দেহমণ্ৱপি ॥ 297 ॥

শ্ৰীগুৰোস্সদৃশং দৈৱং শ্ৰীগুৰোসদৃশঃ পিতা ।
গুৰুধ্যানসমং কৰ্ম নাস্তি নাস্তি মহীতলে ॥ 298 ॥

কুলং ধনং বলং শাস্ত্ৰং বান্ধৱাস্সোদৰা ইমে ।
মৰণে নোপযুজ্যন্তে গুৰুৰেকো হি তাৰকঃ ॥ 299 ॥

কুলমেৱ পৱিত্ৰং স্যাত্ সত্যং স্ৱগুৰুসেৱযা ।
তৃপ্তাঃ স্যুস্সকলা দেৱা ব্ৰহ্মাদ্যা গুৰুতৰ্পণাত্ ॥ 300 ॥

গুৰুৰেকো হি জানাতি স্ৱৰূপং দেৱমৱ্যযম্ ।
তদ্জ্ঞানং যত্প্ৰসাদেন নান্যথা শাস্ত্ৰকোটিভিঃ ॥ 301 ॥

স্ৱৰূপজ্ঞানশূন্যেন কৃতমপ্যকৃতং ভৱেত্ ।
তপোজপাদিকং দেৱি সকলং বালজল্পৱত্ ॥ 302 ॥

শিৱং কেচিদ্ধৰিং কেচিদ্ৱিধিং কেচিত্তু কেচন ।
শক্তিং দৈৱমিতি জ্ঞাত্ৱা ৱিৱদন্তি ৱৃথা নৰাঃ ॥ 303 ॥

ন জানন্তি পৰং তত্ত্ৱং গুৰুদীক্ষাপৰাঙ্মুখাঃ ।
ভ্ৰান্তাঃ পশুসমা হ্যেতে স্ৱপৰিজ্ঞানৱৰ্জিতাঃ ॥ 304 ॥

তস্মাত্কৈৱল্যসিদ্ধ্যৰ্থং গুৰুমেৱ ভজেত্প্ৰিযে ।
গুৰুং ৱিনা ন জানন্তি মূঢাস্তত্পৰমং পদম্ ॥ 305 ॥

ভিদ্যতে হৃদযগ্ৰন্থিশ্ছিদ্যন্তে সৰ্ৱসংশযাঃ ।
ক্ষীযন্তে সৰ্ৱকৰ্মাণি গুৰোঃ কৰুণযা শিৱে ॥ 306 ॥

কৃতাযা গুৰুভক্তেস্তু ৱেদশাস্ত্ৰানুসাৰতঃ ।
মুচ্যতে পাতকাদ্ঘোৰাত্ গুৰুভক্তো ৱিশেষতঃ ॥ 307 ॥

দুস্সঙ্গং চ পৰিত্যজ্য পাপকৰ্ম পৰিত্যজেত্ ।
চিত্তচিহ্নমিদং যস্য তস্য দীক্ষা ৱিধীযতে ॥ 308 ॥

চিত্তত্যাগনিযুক্তশ্চ ক্ৰোধগৰ্ৱৱিৱৰ্জিতঃ ।
দ্ৱৈতভাৱপৰিত্যাগী তস্য দীক্ষা ৱিধীযতে ॥ 309 ॥

এতল্লক্ষণযুক্তত্ৱং সৰ্ৱভূতহিতে ৰতম্ ।
নিৰ্মলং জীৱিতং যস্য তস্য দীক্ষা ৱিধীযতে ॥ 310 ॥

ক্ৰিযযা চান্ৱিতং পূৰ্ৱং দীক্ষাজালং নিৰূপিতম্ ।
মন্ত্ৰদীক্ষাভিধং সাঙ্গোপাঙ্গং সৰ্ৱং শিৱোদিতম্ ॥ 311 ॥

ক্ৰিযযা স্যাদ্ৱিৰহিতাং গুৰুসাযুজ্যদাযিনীম্ ।
গুৰুদীক্ষাং ৱিনা কো ৱা গুৰুত্ৱাচাৰপালকঃ ॥ 312 ॥

শক্তো ন চাপি শক্তো ৱা দৈশিকাঙ্ঘ্ৰি সমাশ্ৰযেত্ ।
তস্য জন্মাস্তি সফলং ভোগমোক্ষফলপ্ৰদম্ ॥ 313 ॥

অত্যন্তচিত্তপক্ৱস্য শ্ৰদ্ধাভক্তিযুতস্য চ ।
প্ৰৱক্তৱ্যমিদং দেৱি মমাত্মপ্ৰীতযে সদা ॥ 314 ॥

ৰহস্যং সৰ্ৱশাস্ত্ৰেষু গীতাশাস্ত্ৰমিদং শিৱে ।
সম্যক্পৰীক্ষ্য ৱক্তৱ্যং সাধকস্য মহাত্মনঃ ॥ 315 ॥

সত্কৰ্মপৰিপাকাচ্চ চিত্তশুদ্ধিশ্চ ধীমতঃ ।
সাধকস্যৈৱ ৱক্তৱ্যা গুৰুগীতা প্ৰযত্নতঃ ॥ 316 ॥

নাস্তিকায কৃতঘ্নায দাম্ভিকায শঠায চ ।
অভক্তায ৱিভক্তায ন ৱাচ্যেযং কদাচন ॥ 317 ॥

স্ত্ৰীলোলুপায মূৰ্খায কামোপহতচেতসে ।
নিন্দকায ন ৱক্তৱ্যা গুৰুগীতা স্ৱভাৱতঃ ॥ 318 ॥

সৰ্ৱপাপপ্ৰশমনং সৰ্ৱোপদ্ৰৱৱাৰকম্ ।
জন্মমৃত্যুহৰং দেৱি গীতাশাস্ত্ৰমিদং শিৱে ॥ 319 ॥

শ্ৰুতিসাৰমিদং দেৱি সৰ্ৱমুক্তং সমাসতঃ ।
নান্যথা সদ্গতিঃ পুংসাং ৱিনা গুৰুপদং শিৱে ॥ 320 ॥

বহুজন্মকৃতাত্পাপাদযমৰ্থো ন ৰোচতে ।
জন্মবন্ধনিৱৃত্ত্যৰ্থং গুৰুমেৱ ভজেত্সদা ॥ 321 ॥

অহমেৱ জগত্সৰ্ৱমহমেৱ পৰং পদম্ ।
এতদ্জ্ঞানং যতো ভূযাত্তং গুৰুং প্ৰণমাম্যহম্ ॥ 322 ॥

অলং ৱিকল্পৈৰহমেৱ কেৱলং
মযি স্থিতং ৱিশ্ৱমিদং চৰাচৰম্ ।
ইদং ৰহস্যং মম যেন দৰ্শিতং
স ৱন্দনীযো গুৰুৰেৱ কেৱলম্ ॥ 323 ॥

যস্যান্তং নাদিমধ্যং ন হি কৰচৰণং নামগোত্ৰং ন সূত্ৰম্ ।
নো জাতিৰ্নৈৱ ৱৰ্ণো ন ভৱতি পুৰুষো নো নপুংসো ন চ স্ত্ৰী ॥ 324 ॥

নাকাৰং নো ৱিকাৰং ন হি জনিমৰণং নাস্তি পুণ্যং ন পাপম্ ।
নোঽতত্ত্ৱং তত্ত্ৱমেকং সহজসমৰসং সদ্গুৰুং তং নমামি ॥ 325 ॥

নিত্যায সত্যায চিদাত্মকায
নৱ্যায ভৱ্যায পৰাত্পৰায ।
শুদ্ধায বুদ্ধায নিৰঞ্জনায
নমোঽস্তু নিত্যং গুৰুশেখৰায ॥ 326 ॥

সচ্চিদানন্দৰূপায ৱ্যাপিনে পৰমাত্মনে ।
নমঃ শ্ৰীগুৰুনাথায প্ৰকাশানন্দমূৰ্তযে ॥ 327 ॥

সত্যানন্দস্ৱৰূপায বোধৈকসুখকাৰিণে ।
নমো ৱেদান্তৱেদ্যায গুৰৱে বুদ্ধিসাক্ষিণে ॥ 328 ॥

নমস্তে নাথ ভগৱন্ শিৱায গুৰুৰূপিণে ।
ৱিদ্যাৱতাৰসংসিদ্ধ্যৈ স্ৱীকৃতানেকৱিগ্ৰহ ॥ 329 ॥

নৱায নৱৰূপায পৰমাৰ্থৈকৰূপিণে ।
সৰ্ৱাজ্ঞানতমোভেদভানৱে চিদ্ঘনায তে ॥ 330 ॥

স্ৱতন্ত্ৰায দযাক্লুপ্তৱিগ্ৰহায শিৱাত্মনে ।
পৰতন্ত্ৰায ভক্তানাং ভৱ্যানাং ভৱ্যৰূপিণে ॥ 331 ॥

ৱিৱেকিনাং ৱিৱেকায ৱিমৰ্শায ৱিমৰ্শিনাম্ ।
প্ৰকাশিনাং প্ৰকাশায জ্ঞানিনাং জ্ঞানৰূপিণে ॥ 332 ॥

পুৰস্তাত্পাৰ্শ্ৱযোঃ পৃষ্ঠে নমস্কুৰ্যাদুপৰ্যধঃ ।
সদা মচ্চিত্তৰূপেণ ৱিধেহি ভৱদাসনম্ ॥ 333 ॥

শ্ৰীগুৰুং পৰমানন্দং ৱন্দে হ্যানন্দৱিগ্ৰহম্ ।
যস্য সন্নিধিমাত্ৰেণ চিদানন্দায তে মনঃ ॥ 334 ॥

নমোঽস্তু গুৰৱে তুভ্যং সহজানন্দৰূপিণে ।
যস্য ৱাগমৃতং হন্তি ৱিষং সংসাৰসঞ্জ্ঞকম্ ॥ 335 ॥

নানাযুক্তোপদেশেন তাৰিতা শিষ্যসন্ততিঃ ।
তত্কৃপাসাৰৱেদেন গুৰুচিত্পদমচ্যুতম্ ॥ 336 ॥

[পাঠভেদঃ -
অচ্যুতায নমস্তুভ্যং গুৰৱে পৰমাত্মনে ।
স্ৱাৰামোক্তপদেচ্ছূনাং দত্তং যেনাচ্যুতং পদম্ ॥
]
অচ্যুতায নমস্তুভ্যং গুৰৱে পৰমাত্মনে ।
সৰ্ৱতন্ত্ৰস্ৱতন্ত্ৰায চিদ্ঘনানন্দমূৰ্তযে ॥ 337 ॥

নমোঽচ্যুতায গুৰৱেঽজ্ঞানধ্ৱান্তৈকভানৱে ।
শিষ্যসন্মাৰ্গপটৱে কৃপাপীযূষসিন্ধৱে ॥ 338 ॥

ওমচ্যুতায গুৰৱে শিষ্যসংসাৰসেতৱে ।
ভক্তকাৰ্যৈকসিংহায নমস্তে চিত্সুখাত্মনে ॥ 339 ॥

গুৰুনামসমং দৈৱং ন পিতা ন চ বান্ধৱাঃ ।
গুৰুনামসমঃ স্ৱামী নেদৃশং পৰমং পদম্ ॥ 340 ॥

একাক্ষৰপ্ৰদাতাৰং যো গুৰুং নৈৱ মন্যতে ।
শ্ৱানযোনিশতং গত্ৱা চাণ্ডালেষ্ৱপি জাযতে ॥ 341 ॥

গুৰুত্যাগাদ্ভৱেন্মৃত্যুঃ মন্ত্ৰত্যাগাদ্দৰিদ্ৰতা ।
গুৰুমন্ত্ৰপৰিত্যাগী ৰৌৰৱং নৰকং ৱ্ৰজেত্ ॥ 342 ॥

শিৱক্ৰোধাদ্গুৰুস্ত্ৰাতা গুৰুক্ৰোধাচ্ছিৱো ন হি ।
তস্মাত্সৰ্ৱপ্ৰযত্নেন গুৰোৰাজ্ঞাং ন লঙ্ঘযেত্ ॥ 343 ॥

সংসাৰসাগৰসমুদ্ধৰণৈকমন্ত্ৰং
ব্ৰহ্মাদিদেৱমুনিপূজিতসিদ্ধমন্ত্ৰম্ ।
দাৰিদ্ৰ্যদুঃখভৱৰোগৱিনাশমন্ত্ৰং
ৱন্দে মহাভযহৰং গুৰুৰাজমন্ত্ৰম্ ॥ 344 ॥

সপ্তকোটিমহামন্ত্ৰাশ্চিত্তৱিভ্ৰমকাৰকাঃ ।
এক এৱ মহামন্ত্ৰো গুৰুৰিত্যক্ষৰদ্ৱযম্ ॥ 345 ॥

এৱমুক্ত্ৱা মহাদেৱঃ পাৰ্ৱতীং পুনৰব্ৰৱীত্ ।
ইদমেৱ পৰং তত্ত্ৱং শৃণু দেৱি সুখাৱহম্ ॥ 346 ॥

গুৰুতত্ত্ৱমিদং দেৱি সৰ্ৱমুক্তং সমাসতঃ ।
ৰহস্যমিদমৱ্যক্তং ন ৱদেদ্যস্য কস্যচিত্ ॥ 347 ॥

ন মৃষা স্যাদিযং দেৱি মদুক্তিঃ সত্যৰূপিণী ।
গুৰুগীতাসমং স্তোত্ৰং নাস্তি নাস্তি মহীতলে ॥ 348 ॥

গুৰুগীতামিমাং দেৱি ভৱদুঃখৱিনাশিনীম্ ।
গুৰুদীক্ষাৱিহীনস্য পুৰতো ন পঠেত্ ক্ৱচিত্ ॥ 349 ॥

ৰহস্যমত্যন্তৰহস্যমেতন্ন পাপিনা লভ্যমিদং মহেশ্ৱৰি ।
অনেকজন্মাৰ্জিতপুণ্যপাকাদ্গুৰোস্তু তত্ত্ৱং লভতে মনুষ্যঃ ॥ 350 ॥

যস্য প্ৰসাদাদহমেৱ সৰ্ৱং
ময্যেৱ সৰ্ৱং পৰিকল্পিতং চ ।
ইত্থং ৱিজানামি সদাত্মৰূপং
তস্যাঙ্ঘ্ৰিপদ্মং প্ৰণতোঽস্মি নিত্যম্ ॥ 351 ॥

অজ্ঞানতিমিৰান্ধস্য ৱিষযাক্ৰান্তচেতসঃ ।
জ্ঞানপ্ৰভাপ্ৰদানেন প্ৰসাদং কুৰু মে প্ৰভো ॥ 352 ॥