1.8 - അനുമത്യൈ പുരോഡാശമഷ്ടാകപാലമ് - കൃഷ്ണ യജുര്വേദ തൈത്തിരീയ സംഹിതാ പാഠഃ

കൃഷ്ണ യജുര്വേദീയ തൈത്തിരീയ സംഹിതായാ-മ്പ്രഥമകാണ്ഡേ അഷമഃ പ്രശ്നഃ - രാജസൂയഃ
ഓ-ന്നമഃ പരമാത്മനേ, ശ്രീ മഹാഗണപതയേ നമഃ,
ശ്രീ ഗുരുഭ്യോ നമഃ । ഹരിഃ ഓമ് ॥
അനുമത്യൈ പുരോഡാശ-മഷ്ടാകപാല-ന്നിര്വപതി ധേനു-ര്ദക്ഷിണാ യേ പ്രത്യഞ്ച-ശ്ശമ്യായാ അവശീയന്തേ ത-ന്നൈര്-ഋത-മേകകപാല-ങ്കൃഷ്ണം-വാഁസഃ കൃഷ്ണതൂഷ-ന്ദക്ഷിണാ വീഹി സ്വാഹാ-ഽഽഹുതി-ഞ്ജുഷാണ ഏഷ തേ നിര്-ഋതേ ഭാഗോ ഭൂതേ ഹവിഷ്മത്യസി മുഞ്ചേമ-മഗ്ംഹസ-സ്സ്വാഹാ നമോ യ ഇദ-ഞ്ചകാരാ-ഽഽദിത്യ-ഞ്ചരു-ന്നിര്വപതി വരോ ദക്ഷിണാ-ഽഽഗ്നാവൈഷ്ണവ-മേകാദശകപാലം-വാഁമനോ വഹീ ദക്ഷിണാ ഽഗ്നീഷോമീയ- [ദക്ഷിണാ ഽഗ്നീഷോമീയമ്, ഏകാദശകപാലഗ്ം ഹിരണ്യം] 1
-മേകാദശകപാലഗ്ം ഹിരണ്യ-ന്ദക്ഷിണൈന്ദ്ര-മേകാദശകപാല-മൃഷഭോ വഹീ ദക്ഷിണാ-ഽഽഗ്നേയ-മഷ്ടാകപാലമൈന്ദ്ര-ന്ദദ്ധ്യൃഷഭോ വഹീ ദക്ഷിണൈന്ദ്രാഗ്ന-ന്ദ്വാദശകപാലം-വൈഁശ്വദേവ-ഞ്ചരു-മ്പ്രഥമജോ വഥ്സോ ദക്ഷിണാ സൌമ്യഗ്ഗ് ശ്യാമാക-ഞ്ചരും-വാഁസോ ദക്ഷിണാ സരസ്വത്യൈ ചരുഗ്ം സരസ്വതേ ചരു-മ്മിഥുനൌ ഗാവൌ ദക്ഷിണാ ॥ 2 ॥

(അഗ്നീഷോമീയം-ചതുസ്ത്രിഗ്ംശച്ച) (അ. 1)
ആഗ്നേയമഷ്ടാകപാല-ന്നിര്വപതി സൌമ്യ-ഞ്ചരുഗ്ം സാവിത്രം-ദ്വാദശകപാലഗ്ം സാരസ്വത-ഞ്ചരു-മ്പൌഷ്ണ-ഞ്ചരു-മ്മാരുതഗ്ം സപ്തകപാലം-വൈഁശ്വദേവീ-മാമിക്ഷാ-ന്ദ്യാവാപൃഥിവ്യ-മേകകപാലമ് ॥ 3 ॥

(ആഗ്നേയഗ്ം സൌമ്യ-മ്മാരുത-മഷ്ടാദശ) (അ. 2)
ഐന്ദ്രാഗ്ന-മേകാദശകപാല-മ്മാരുതീ-മാമിക്ഷാം-വാഁരുണീ-മാമിക്ഷാ-ങ്കായമേകകപാല-മ്പ്രഘാസ്യാന്. ഹവാമഹേ മരുതോ യജ്ഞവാഹസഃ കരമ്ഭേണ സജോഷസഃ ॥ മോ ഷൂ ണ ഇന്ദ്ര പൃഥ്സു ദേവാസ്തു സ്മ തേ ശുഷ്മിന്നവയാ । മഹീ ഹ്യസ്യ മീഢുഷോ യവ്യാ । ഹവിഷ്മതോ മരുതോ വന്ദതേ ഗീഃ ॥ യ-ദ്ഗ്രാമേ യദരണ്യേ യ-ഥ്സഭായാം-യഁദിന്ദ്രിയേ । യച്ഛൂദ്രേ യദര്യ ഏനശ്ചകൃമാ വയമ് । യദേ കസ്യാധി ധര്മണി തസ്യാവയജനമസി സ്വാഹാ ॥ അക്രന് കര്മ കര്മകൃതഃ സഹ വാചാ മയോഭുവാ । ദേവേഭ്യഃ കര്മ കൃത്വാ-ഽസ്ത-മ്പ്രേത സുദാനവഃ ॥ 4 ॥

(വയംയഁ-ദ്വിഗ്ംശതിശ്ച) (അ. 3)
അഗ്നയേ-ഽനീകവതേ പുരോഡാശ-മഷ്ടാകപാല-ന്നിര്വപതി സാകഗ്ം സൂര്യേണോദ്യതാ മരുദ്ഭ്യഃ സാന്തപനേഭ്യോ മദ്ധ്യന്ദിനേ ചരു-മ്മരുദ്ഭ്യോ ഗൃഹമേധിഭ്യ-സ്സര്വാസാ-ന്ദുഗ്ധേ സായ-ഞ്ചരു-മ്പൂര്ണാ ദര്വി പരാപത സുപൂര്ണാ പുനരാ പത । വസ്നേവ വി ക്രീണാവഹാ ഇഷമൂര്ജഗ്ം ശതക്രതോ ॥ ദേഹി മേ ദദാമി തേ നി മേ ധേഹി നി തേ ദധേ । നിഹാരമിന്നി മേ ഹരാ നി ഹാര- [നി ഹാരമ്, നി ഹരാമി തേ ।] 5
-ന്നി ഹരാമി തേ ॥ മരുദ്ഭ്യഃ ക്രീഡിഭ്യഃ പുരോഡാശഗ്ം സപ്തകപാല-ന്നിര്വപതി സാകഗ്ം സൂര്യേണോദ്യതാ-ഽഽഗ്നേയ-മഷ്ടാകപാല-ന്നിര്വപതി സൌമ്യ-ഞ്ചരുഗ്ം സാവിത്ര-ന്ദ്വാദശകപാലഗ്ം സാരസ്വത-ഞ്ചരു-മ്പൌഷ്ണ-ഞ്ചരുമൈന്ദ്രാഗ്ന-മേകാദശകപാല-മൈന്ദ്ര-ഞ്ചരും-വൈഁശ്വകര്മണ-മേകകപാലമ് ॥ 6 ॥

(ഹരാ നിഹാരന്-ത്രിഗ്ംശച്ച) (അ. 4)
സോമായ പിതൃമതേ പുരോഡാശഗ്ം ഷട്കപാല-ന്നിര്വപതി പിതൃഭ്യോ ബര്ഹിഷദ്ഭ്യോ ധാനാഃ പിതൃഭ്യോ-ഽഗ്നിഷ്വാത്തേഭ്യോ ഽഭിവാന്യായൈ ദുഗ്ധേ മന്ഥമേത-ത്തേ തത യേ ച ത്വാ-മന്വേത-ത്തേ പിതാമഹ പ്രപിതാമഹ യേ ച ത്വാമന്വത്ര പിതരോ യഥാഭാഗ-മ്മന്ദദ്ധ്വഗ്ം സുസന്ദൃശ-ന്ത്വാ വയ-മ്മഘവ-ന്മന്ദിഷീമഹി । പ്രനൂന-മ്പൂര്ണവന്ധുര-സ്സ്തുതോ യാസി വശാഗ്ം അനു । യോജാ ന്വിന്ദ്ര തേ ഹരീ ॥ 7 ॥

അക്ഷന്നമീമദന്ത ഹ്യവ പ്രിയാ അധൂഷത । അസ്തോഷത സ്വഭാനവോ വിപ്രാ നവിഷ്ഠയാ മതീ । യോജാ ന്വിന്ദ്ര തേ ഹരീ ॥ അക്ഷ-ന്പിതരോ-ഽമീമദന്ത പിതരോ-ഽതീതൃപന്ത പിതരോ-ഽമീമൃജന്ത പിതരഃ ॥ പരേത പിതര-സ്സോമ്യാ ഗമ്ഭീരൈഃ പഥിഭിഃ പൂര്വ്യൈഃ । അഥാ പിതൃന്-ഥ്സുവിദത്രാഗ്ം അപീത യമേന യേ സധമാദ-മ്മദന്തി ॥ മനോ ന്വാ ഹുവാമഹേ നാരാശഗ്ംസേന സ്തോമേന പിതൃണാ-ഞ്ച മന്മഭിഃ ॥ ആ [ആ, ന ഏതു മനഃ പുനഃ ക്രത്വേ] 8
ന ഏതു മനഃ പുനഃ ക്രത്വേ ദക്ഷായ ജീവസേ । ജ്യോക്ച സൂര്യ-ന്ദൃശേ ॥ പുനര്നഃ പിതരോ മനോ ദദാതു ദൈവ്യോ ജനഃ । ജീവം-വ്രാഁതഗ്ം സചേമഹി ॥ യദന്തരിക്ഷ-മ്പൃഥിവീമുത ദ്യാം-യഁന്മാതര-മ്പിതരം-വാഁ ജിഹിഗ്ംസിമ । അഗ്നി-ര്മാ തസ്മാദേനസോ ഗാര്ഹപത്യഃ പ്ര മുഞ്ചതു ദുരിതാ യാനി ചകൃമ കരോതു മാ-മനേനസമ് ॥ 9 ॥

(ഹരീ-മന്മഭിരാ-ചതുശ്ചത്വാരിഗ്ംശച്ച) (അ. 5)
പ്രതിപൂരുഷമേകകപാലാ-ന്നിര്വപത്യേക-മതിരിക്തം-യാഁവന്തോ ഗൃഹ്യാ-സ്സ്മസ്തേഭ്യഃ കമകര-മ്പശൂനാഗ്ം ശര്മാസി ശര്മ യജമാനസ്യ ശര്മ മേ യച്ഛൈക ഏവ രുദ്രോ ന ദ്വിതീയായ തസ്ഥ ആഖുസ്തേ രുദ്ര പശുസ്ത-ഞ്ജുഷസ്വൈഷ തേ രുദ്ര ഭാഗ-സ്സഹ സ്വസ്രാ-ഽമ്ബികയാ ത-ഞ്ജുഷസ്വ ഭേഷജ-ങ്ഗവേ-ഽശ്വായ പുരുഷായ ഭേഷജമഥോ അസ്മഭ്യ-മ്ഭേഷജഗ്ം സുഭേഷജം- [സുഭേഷജമ്, യഥാ-ഽസതി ।] 10
-ഁയഥാ-ഽസതി । സുഗ-മ്മേഷായ മേഷ്യാ അവാമ്ബ രുദ്ര-മദിമഹ്യവ ദേവ-ന്ത്യ്രമ്ബകമ് । യഥാ ന-ശ്ശ്രേയസഃ കര-ദ്യഥാ നോ വസ്യസഃ കര-ദ്യഥാ നഃ പശുമതഃ കര-ദ്യഥാ നോ വ്യവസായയാത് ॥ ത്യ്രമ്ബകം-യഁജാമഹേ സുഗന്ധി-മ്പുഷ്ടിവര്ധനമ് । ഉര്വാരുക-മിവ ബന്ധനാ-ന്മൃത്യോ-ര്മുക്ഷീയ മാ-ഽമൃതാത് ॥ ഏഷ തേ രുദ്ര ഭാഗസ്ത-ഞ്ജുഷസ്വ തേനാവസേന പരോ മൂജവതോ-ഽതീഹ്യ വതതധന്വാ പിനാകഹസ്തഃ കൃത്തിവാസാഃ ॥ 11 ॥

(സുഭേഷജ-മിഹി ത്രീണി ച) (അ. 6)
ഐന്ദ്രാഗ്ന-ന്ദ്വാദശകപാലം-വൈഁശ്വദേവ-ഞ്ചരുമിന്ദ്രായ ശുനാസീരായ പുരോഡാശ-ന്ദ്വാദശകപാലം-വാഁയവ്യ-മ്പയഃ സൌര്യമേകകപാല-ന്ദ്വാദശഗവഗ്ം സീര-ന്ദക്ഷിണാ- ഽഽഗ്നേയ-മഷ്ടാകപാല-ന്നിര്വപതി രൌദ്ര-ങ്ഗാവീധുക-ഞ്ചരുമൈന്ദ്ര-ന്ദധി വാരുണം-യഁവമയ-ഞ്ചരും-വഁഹിനീ ധേനു-ര്ദക്ഷിണാ യേ ദേവാഃ പുരസ്സദോ-ഽഗ്നിനേത്രാ ദക്ഷിണസദോ യമനേത്രാഃ പശ്ചാഥ്സദഃ സവിതൃനേത്രാ ഉത്തരസദോ വരുണനേത്രാ ഉപരിഷദോ ബൃഹസ്പതിനേത്രാ രക്ഷോഹണസ്തേ നഃ പാന്തു തേ നോ-ഽവന്തു തേഭ്യോ [തേ നോ-ഽവന്തു തേഭ്യഃ, നമസ്തേഭ്യ-സ്സ്വാഹാ] 12
നമസ്തേഭ്യ-സ്സ്വാഹാ സമൂഢഗ്ം രക്ഷ-സ്സന്ദഗ്ധഗ്ം രക്ഷ ഇദമഹഗ്ം രക്ഷോ-ഽഭി സ-ന്ദഹാമ്യഗ്നയേ രക്ഷോഘ്നേ സ്വാഹാ യമായ സവിത്രേ വരുണായ ബൃഹസ്പതയേ ദുവസ്വതേ രക്ഷോഘ്നേ സ്വാഹാ പ്രഷ്ടിവാഹീ രഥോ ദക്ഷിണാ ദേവസ്യ ത്വാ സവിതുഃ പ്രസവേ-ഽശ്വിനോ-ര്ബാഹുഭ്യാ-മ്പൂഷ്ണോ ഹസ്താഭ്യാഗ്ം രക്ഷസോ വധ-ഞ്ജുഹോമി ഹതഗ്ം രക്ഷോ-ഽവധിഷ്മ രക്ഷോ യ-ദ്വസ്തേ ത-ദ്ദക്ഷിണാ ॥ 13 ॥

(തേഭ്യഃ-പഞ്ചചത്വാരിഗ്ംശച്ച) (അ. 7)
ധാത്രേ പുരോഡാശ-ന്ദ്വാദശകപാല-ന്നിര്വപത്യനുമത്യൈ ചരുഗ്ം രാകായൈ ചരുഗ്ം സിനീവാല്യൈ ചരു-ങ്കുഹ്വൈ ചരു-മ്മിഥുനൌ ഗാവൌ ദക്ഷിണാ ഽഽഗ്നാവൈഷ്ണവ-മേകാദശകപാല-ന്നിര്വപത്യൈന്ദ്രാവൈഷ്ണവ-മേകാദശകപാലം-വൈഁഷ്ണവ-ന്ത്രികപാലം-വാഁമനോ വഹീ ദക്ഷിണാ-ഽഗ്നീഷോമീയ-മേകാദശകപാല-ന്നിര്വപതീന്ദ്രാസോമീയ- മേകാദശകപാലഗ്ം സൌമ്യ-ഞ്ചരു-മ്ബഭ്രു-ര്ദക്ഷിണാ സോമാപൌഷ്ണ-ഞ്ചരു-ന്നിര്വപത്യൈന്ദ്രാ പൌഷ്ണ-ഞ്ചരു-മ്പൌഷ്ണ-ഞ്ചരുഗ്ഗ് ശ്യാമോ ദക്ഷിണാ വൈശ്വാനര-ന്ദ്വാദശകപാല-ന്നിര്വപതി ഹിരണ്യ-ന്ദക്ഷിണാ വാരുണം-യഁവമയ-ഞ്ചരുമശ്വോ ദക്ഷിണാ ॥ 14 ॥

(വൈശ്വാനര-ന്ദ്വാദശകപാല-ന്നി-രഷ്ടൌ ച) (അ. 8)
ബാര്ഹസ്പത്യ-ഞ്ചരു-ന്നിര്വപതി ബ്രഹ്മണോ ഗൃഹേ ശിതിപൃഷ്ഠോ ദക്ഷിണൈന്ദ്ര-മേകാദശകപാലഗ്ം രാജന്യസ്യ ഗൃഹ ഋഷഭോ ദക്ഷിണാ-ഽഽദിത്യ-ഞ്ചരു-മ്മഹിഷ്യൈ ഗൃഹേ ധേനു-ര്ദക്ഷിണാ നൈര്-ഋത-ഞ്ചരു-മ്പരിവൃക്ത്യൈ ഗൃഹേ കൃഷ്ണാനാം-വ്രീഁഹീണാ-ന്നഖനിര്ഭിന്ന-ങ്കൃഷ്ണാ കൂടാ ദക്ഷിണാ ഽഽഗ്നേയമഷ്ടാകപാലഗ്ം സേനാന്യോ ഗൃഹേ ഹിരണ്യ-ന്ദക്ഷിണാ വാരുണ-ന്ദശകപാലഗ്ം സൂതസ്യ ഗൃഹേ മഹാനിരഷ്ടോ ദക്ഷിണാ മാരുതഗ്ം സപ്തകപാല-ങ്ഗ്രാമണ്യോ ഗൃഹേ പൃശ്ഞി-ര്ദക്ഷിണാ സാവിത്ര-ന്ദ്വാദശകപാലം- [ദ്വാദശകപാലമ്, ക്ഷത്തു-ര്ഗൃഹ] 15
-ക്ഷത്തു-ര്ഗൃഹ ഉപദ്ധ്വസ്തോ ദക്ഷിണാ-ഽഽശ്വിന-ന്ദ്വികപാലഗ്ം സങ്ഗ്രഹീതു-ര്ഗൃഹേ സവാത്യൌ ദക്ഷിണാ പൌഷ്ണ-ഞ്ചരു-മ്ഭാഗദുഘസ്യ ഗൃഹേ ശ്യാമോ ദക്ഷിണാ രൌദ്ര-ങ്ഗാവീധുക-ഞ്ചരുമക്ഷാവാപസ്യ ഗൃഹേ ശബല ഉദ്വാരോ ദക്ഷിണേന്ദ്രായ സുത്രാംണേ പുരോഡാശമേകാദശകപാല-മ്പ്രതി നിര്വപതീന്ദ്രായാഗ്ംഹോമുചേ ഽയ-ന്നോ രാജാ വൃത്രഹാ രാജാ ഭൂത്വാ വൃത്രം-വഁദ്ധ്യാ-ന്മൈത്രാബാര്ഹസ്പത്യ-മ്ഭവതി ശ്വേതായൈ ശ്വേതവഥ്സായൈ ദുഗ്ധേ സ്വയമ്മൂര്തേ സ്വയമ്മഥിത ആജ്യ ആശ്വത്ഥേ [ആശ്വത്ഥേ, പാത്രേ ചതുഃസ്രക്തൌ] 16
പാത്രേ ചതുഃസ്രക്തൌ സ്വയമവപന്നായൈ ശാഖായൈ കര്ണാഗ്ശ്ചാകര്ണാഗ്ശ്ച തണ്ഡുലാന് വി ചിനുയാ-ദ്യേകര്ണാ-സ്സ പയസി ബാര്ഹസ്പത്യോ യേ-ഽകര്ണാ-സ്സ ആജ്യേ മൈത്ര-സ്സ്വയങ്കൃതാ വേദി-ര്ഭവതി സ്വയന്ദിന-മ്ബര്ഹി-സ്സ്വയങ്കൃത ഇദ്ധ്മ-സ്സൈവ ശ്വേതാ ശ്വേതവഥ്സാ ദക്ഷിണാ ॥ 17 ॥

(സാവിത്ര-ന്ദ്വാദശകപാല-മാശ്വത്ഥേ ത്രയസ്ത്രിഗ്ംശച്ച) (അ. 9)
അഗ്നയേ ഗൃഹപതയേ പുരോഡാശമഷ്ടാകപാല-ന്നിര്വപതി കൃഷ്ണാനാം-വ്രീഁഹീണാഗ്ം സോമായ വനസ്പതയേ ശ്യാമാക-ഞ്ചരുഗ്ം സവിത്രേ സത്യപ്രസവായ പുരോഡാശ-ന്ദ്വാദശകപാല-മാശൂനാം-വ്രീഁഹീണാഗ്ം രുദ്രായ പശുപതയേ ഗാവീധുക-ഞ്ചരു-മ്ബൃഹസ്പതയേ വാചസ്പതയേ നൈവാര-ഞ്ചരുമിന്ദ്രായ ജ്യേഷ്ഠായ പുരോഡാശ-മേകാദശകപാല-മ്മഹാവ്രീഹീണാ-മ്മിത്രായ സത്യായാ-ഽഽമ്ബാനാ-ഞ്ചരും-വഁരുണായ ധര്മപതയേ യവമയ-ഞ്ചരുഗ്ം സവിതാ ത്വാ പ്രസവാനാഗ്ം സുവതാമഗ്നി-ര്ഗൃഹപതീനാഗ്ം സോമോ വനസ്പതീനാഗ്ം രുദ്രഃ പശൂനാം- [പശൂനാമ്, ബൃഹസ്പതി-ര്വാചാമിന്ദ്രോ] 18
-ബൃഹസ്പതി-ര്വാചാമിന്ദ്രോ ജ്യേഷ്ഠാനാ-മ്മിത്ര-സ്സത്യാനാം-വഁരുണോ ധര്മപതീനാം-യേഁ ദേവാ ദേവസുവ-സ്സ്ഥ ത ഇമ-മാമുഷ്യായണ-മനമിത്രായ സുവദ്ധ്വ-മ്മഹതേ ക്ഷത്രായ മഹത ആധിപത്യായ മഹതേ ജാനരാജ്യായൈഷ വോ ഭരതാ രാജാ സോമോ-ഽസ്മാക-മ്ബ്രാഹ്മണാനാഗ്ം രാജാ പ്രതി ത്യന്നാമ രാജ്യ-മധായി സ്വാ-ന്തനുവം-വഁരുണോ അശിശ്രേച്ഛുചേ-ര്മിത്രസ്യ വ്രത്യാ അഭൂമാമന്മഹി മഹത ഋതസ്യ നാമ സര്വേ വ്രാതാ വരുണസ്യാഭൂവന് വി മിത്ര ഏവൈ-രരാതി-മതാരീദസൂഷുദന്ത യജ്ഞിയാ ഋതേന വ്യു ത്രിതോ ജരിമാണ-ന്ന ആന-ഡ്വിഷ്ണോഃ ക്രമോ-ഽസി വിഷ്ണോഃ ക്രാന്തമസി വിഷ്ണോ-ര്വിക്രാന്ത-മസി ॥ 19 ॥

(പശൂനാംവ്രാഁതാഃ-പഞ്ചവിഗ്ംശതിശ്ച) (അ. 10)
അര്ഥേതഃ സ്ഥാ-ഽപാ-മ്പതിരസി വൃഷാ-ഽസ്യൂര്മി-ര്വൃഷസേനോ-ഽസി വ്രജക്ഷിതഃ സ്ഥ മരുതാമോജഃ സ്ഥ സൂര്യവര്ചസ-സ്സ്ഥ സൂര്യത്വചസ-സ്സ്ഥ മാന്ദാ-സ്സ്ഥ വാശാ-സ്സ്ഥ ശക്വരീ-സ്സ്ഥ വിശ്വഭൃതഃ സ്ഥ ജനഭൃതഃ സ്ഥാ-ഽഗ്നേസ്തേജസ്യാ-സ്സ്ഥാ-ഽപാമോഷധീനാഗ്ം രസഃ സ്ഥാ-ഽപോ ദേവീ-ര്മധുമതീരഗൃഹ്ണന്നൂര്ജസ്വതീ രാജസൂയായ ചിതാനാഃ ॥ യാഭി-ര്മിത്രാവരുണാവ-ഭ്യഷിഞ്ചന്. യാഭി-രിന്ദ്രമനയന്നത്യ രാതീഃ ॥ രാഷ്ട്രദാ-സ്സ്ഥ രാഷ്ട്ര-ന്ദത്ത സ്വാഹാ രാഷ്ട്രദാ-സ്സ്ഥ രാഷ്ട്രമമുഷ്മൈ ദത്ത ॥ 20 ॥

(അത്യേ-കാദശ ച) (അ. 11)
ദേവീരാപ-സ്സ-മ്മധുമതീ-ര്മധുമതീഭി-സ്സൃജ്യദ്ധ്വ-മ്മഹി വര്ചഃ ക്ഷത്രിയായ വന്വാനാ അനാധൃഷ്ടാ-സ്സീദതോര്ജസ്വതീര്മഹി വര്ചഃ ക്ഷത്രിയായ ദധതീരനിഭൃഷ്ടമസി വാചോ ബന്ധുസ്തപോജാ-സ്സോമസ്യ ദാത്രമസി ശുക്രാ വഃ ശുക്രേണോത്പുനാമി ചന്ദ്രാശ്ചന്ദ്രേണാമൃതാ അമൃതേന സ്വാഹാ രാജസൂയായ ചിതാനാഃ । സധമാദോ ദ്യുമ്നിനീരൂര്ജ ഏതാ അനിഭൃഷ്ടാ അപസ്യുവോ വസാനഃ ॥ പസ്ത്യാസു ചക്രേ വരുണ-സ്സധസ്ഥമപാഗ്ം ശിശു- [ശിശുഃ, മാതൃതമാസ്വന്തഃ ।] 21
-ര്മാതൃതമാസ്വന്തഃ ॥ ക്ഷത്രസ്യോല്ബമസി ക്ഷത്രസ്യ യോനിരസ്യാവിന്നോ അഗ്നി-ര്ഗൃഹപതിരാവിന്ന ഇന്ദ്രോ വൃദ്ധശ്രവാ ആവിന്നഃ പൂഷാ വിശ്വവേദാ ആവിന്നൌ മിത്രാവരുണാ വൃതാവൃധാവാവിന്നേ ദ്യാവാപൃഥിവീ ധൃതവ്രതേ ആവിന്നാ ദേവ്യദിതി-ര്വിശ്വരൂപ്യാവിന്നോ ഽയമസാവാമുഷ്യായണോ-ഽസ്യാം-വിഁശ്യസ്മി-ന്രാഷ്ട്രേ മഹതേ ക്ഷത്രായ മഹത ആധിപത്യായ മഹതേ ജാനരാജ്യായൈഷ വോ ഭരതാ രാജാ സോമോ-ഽസ്മാക-മ്ബ്രാഹ്മണാനാഗ്ം രാജേന്ദ്രസ്യ [രാജേന്ദ്രസ്യ, വജ്രോ-ഽസി] 22
വജ്രോ-ഽസി വാര്ത്രഘ്നസ്ത്വയാ യം-വൃഁത്രം-വഁദ്ധ്യാച്ഛത്രുബാധനാ-സ്സ്ഥ പാത മാ പ്രത്യഞ്ച-മ്പാത മാ തിര്യഞ്ചമന്വഞ്ച-മ്മാ പാത ദിഗ്ഭ്യോ മാ പാത വിശ്വാഭ്യോ മാ നാഷ്ട്രാഭ്യഃ പാത ഹിരണ്യവര്ണാ-വുഷസാം ഁവിരോകേ-ഽയഃസ്ഥൂണാ-വുദിതൌ സൂര്യസ്യാ-ഽഽ രോഹതം-വഁരുണ മിത്ര ഗര്ത-ന്തതശ്ചക്ഷാഥാമദിതി-ന്ദിതി-ഞ്ച ॥ 23 ॥

(ശിശു-രിന്ദ്രസ്യൈ-കചത്വാരിഗ്ംശച്ച) (അ. 12)
സമിധമാ തിഷ്ഠ ഗായത്രീ ത്വാ ഛന്ദസാമവതു ത്രിവൃഥ്സ്തോമോ രഥന്തരഗ്ം സാമാഗ്നി-ര്ദേവതാ ബ്രഹ്മ ദ്രവിണമുഗ്രാമാ തിഷ്ഠ ത്രിഷ്ടു-പ്ത്വാ ഛന്ദസാമവതു പഞ്ചദശ-സ്സ്തോമോ ബൃഹ-ഥ്സാമേന്ദ്രോ ദേവതാ ക്ഷത്ര-ന്ദ്രവിണം-വിഁരാജമാ തിഷ്ഠ ജഗതീ ത്വാ ഛന്ദസാമവതു സപ്തദശ-സ്സ്തോമോ വൈരൂപഗ്ം സാമ മരുതോ ദേവതാ വി-ഡ്ദ്രവിണ-മുദീചീമാ-തിഷ്ഠാനുഷ്ടു-പ്ത്വാ - [തിഷ്ഠാനുഷ്ടു-പ്ത്വാ, ഛന്ദസാ-] 24
ഛന്ദസാ-മവത്വേകവിഗ്ംശ-സ്സ്തോമോ വൈരാജഗ്ം സാമ മിത്രാവരുണൌ ദേവതാ ബല-ന്ദ്രവിണ-മൂര്ധ്വാമാ തിഷ്ഠ പങ്ക്തിസ്ത്വാ ഛന്ദസാമവതു ത്രിണവത്രയസ്ത്രിഗ്ംശൌ സ്തോമൌ ശാക്വരരൈവതേ സാമനീ ബൃഹസ്പതി-ര്ദേവതാ വര്ചോ ദ്രവിണ-മീദൃ-ഞ്ചാന്യാദൃ-ഞ്ചൈതാദൃ-ഞ്ച പ്രതിദൃ-ഞ്ച മിതശ്ച സമ്മിതശ്ച സഭരാഃ । ശുക്രജ്യോതിശ്ച ചിത്രജ്യോതിശ്ച സത്യജ്യോതിശ്ച ജ്യോതിഷ്മാഗ്ശ്ച സത്യശ്ചര്തപാശ്ചാ- [സത്യശ്ചര്തപാശ്ച, അത്യഗ്ംഹാഃ ।] 25
-ഽത്യഗ്ംഹാഃ । അഗ്നയേ സ്വാഹാ സോമായ സ്വാഹാ സവിത്രേ സ്വാഹാ സരസ്വത്യൈ സ്വാഹാ പൂഷ്ണേ സ്വാഹാ ബൃഹസ്പതയേ സ്വാഹേന്ദ്രായ സ്വാഹാ ഘോഷായ സ്വാഹാ ശ്ലോകായ സ്വാഹാ ഽഗ്ംശായ സ്വാഹാ ഭഗായ സ്വാഹാ ക്ഷേത്രസ്യ പതയേ സ്വാഹാ പൃഥിവ്യൈ സ്വാഹാ ഽന്തരിക്ഷായ സ്വാഹാ ദിവേ സ്വാഹാ സൂര്യായ സ്വാഹാ ചന്ദ്രമസേ സ്വാഹാ നക്ഷത്രേഭ്യ-സ്സ്വാഹാ ഽദ്ഭ്യ-സ്സ്വാഹൌഷധീഭ്യ-സ്സ്വാഹാ വനസ്പതിഭ്യ-സ്സ്വാഹാ ചരാചരേഭ്യ-സ്സ്വാഹാ പരിപ്ലവേഭ്യ-സ്സ്വാഹാ സരീസൃപേഭ്യ-സ്സ്വാഹാ ॥ 26 ॥

(അനുഷ്ടുപ്ത്വ-ര്തപാശ്ച - സരീസൃപേഭ്യ-സ്സ്വാഹാ) (അ. 13)
സോമസ്യ ത്വിഷിരസി തവേവ മേ ത്വിഷി-ര്ഭൂയാദമൃതമസി മൃത്യോ-ര്മാ പാഹി ദിദ്യോന്മാ പാഹ്യവേഷ്ടാ ദന്ദശൂകാ നിരസ്ത-ന്നമുചേ-ശ്ശിരഃ ॥ സോമോ രാജാ വരുണോ ദേവാ ധര്മസുവശ്ച യേ । തേ തേ വാചഗ്ം സുവന്താ-ന്തേ തേ പ്രാണഗ്ം സുവന്താ-ന്തേ തേ ചക്ഷുഃ സുവന്താ-ന്തേ തേ ശ്രോത്രഗ്ം സുവന്താഗ്ം സോമസ്യ ത്വാ ദ്യുമ്നേനാഭി ഷിഞ്ചാമ്യഗ്നേ- [ഷിഞ്ചാമ്യഗ്നേഃ, തേജസാ സൂര്യസ്യ] 27
-സ്തേജസാ സൂര്യസ്യ വര്ചസേന്ദ്രസ്യേന്ദ്രിയേണ മിത്രാവരുണയോ-ര്വീര്യേണ മരുതാമോജസാ ക്ഷത്രാണാ-ങ്ക്ഷത്രപതിരസ്യതി ദിവസ്പാഹി സമാവവൃത്രന്ന-ധരാഗുദീചീ-രഹി-മ്ബുദ്ധ്നിയമനു സഞ്ചരന്തീസ്താഃ പര്വതസ്യ വൃഷഭസ്യ പൃഷ്ഠേ നാവശ്ചരന്തി സ്വസിച ഇയാനാഃ ॥ രുദ്ര യത്തേ ക്രയീ പര-ന്നാമ തസ്മൈ ഹുതമസി യമേഷ്ടമസി । പ്രജാപതേ ന ത്വദേതാന്യന്യോ വിശ്വാ ജാതാനി പരി താ ബഭൂവ । യത്കാമാസ്തേ ജുഹുമസ്തന്നോ അസ്തു വയഗ്ഗ് സ്യാമ പതയോ രയീണാമ് ॥ 28 ॥

(അഗ്നേ-സ്തൈ-കാദശ ച) (അ. 14)
ഇന്ദ്രസ്യ വജ്രോ-ഽസി വാര്ത്രഘ്നസ്ത്വയാ-ഽയം-വൃഁത്രം-വഁദ്ധ്യാ-ന്മിത്രാവരുണയോസ്ത്വാ പ്രശാസ്ത്രോഃ പ്രശിഷാ യുനജ്മി യജ്ഞസ്യ യോഗേന വിഷ്ണോഃ ക്രമോ-ഽസി വിഷ്ണോഃ ക്രാന്തമസി വിഷ്ണോ-ര്വിക്രാന്തമസി മരുതാ-മ്പ്രസവേ ജേഷമാപ്ത-മ്മന-സ്സമഹമിന്ദ്രിയേണ വീര്യേണ പശൂനാ-മ്മന്യുരസി തവേവ മേ മന്യു-ര്ഭൂയാന്നമോ മാത്രേ പൃഥിവ്യൈ മാ-ഽഹ-മ്മാതര-മ്പൃഥിവീഗ്ം ഹിഗ്ംസിഷ-മ്മാ [ ] 29
മാ-മ്മാതാ പൃഥിവീ ഹിഗ്ംസീദിയദസ്യായു-രസ്യായു-ര്മേ ധേഹ്യൂര്ഗസ്യൂര്ജ-മ്മേ ധേഹി യുങ്ങസി വര്ചോ-ഽസി വര്ചോ മയി ധേഹ്യഗ്നയേ ഗൃഹപതയേ സ്വാഹാ സോമായ വനസ്പതയേ സ്വാഹേന്ദ്രസ്യ ബലായ സ്വാഹാ മരുതാമോജസേ സ്വാഹാ ഹഗ്ംസ-ശ്ശുചിഷ-ദ്വസുരന്തരിക്ഷ -സദ്ധോതാ വേദിഷദതിഥി-ര്ദുരോണസത് । നൃഷ-ദ്വരസദൃതസ-ദ്വ്യോമസദബ്ജാ ഗോജാ ഋതജാ അദ്രിജാ ഋത-മ്ബൃഹത് ॥ 30 ॥

(ഹിഗ്ംസിഷ-മ്മ-ര്തജാ-സ്ത്രീണി ച) (അ. 15)
മിത്രോ-ഽസി വരുണോ-ഽസി സമഹം-വിഁശ്വൈ-ര്ദേവൈഃ, ക്ഷത്രസ്യ നാഭിരസി ക്ഷത്രസ്യ യോനിരസി സ്യോനാമാ സീദ സുഷദാമാ സീദ മാ ത്വാ ഹിഗ്ംസീന്മാ മാ ഹിഗ്ംസീന്നി ഷസാദ ധൃതവ്രതോ വരുണഃ പസ്ത്യാസ്വാ സാമ്രാജ്യായ സുക്രതു-ര്ബ്രഹ്മാ(3)-ന്ത്വഗ്ം രാജ-ന്ബ്രഹ്മാ-ഽസി സവിതാ-ഽസി സത്യസവോ ബ്രഹ്മാ(3)-ന്ത്വഗ്ം രാജ-ന്ബ്രഹ്മാ-ഽസീന്ദ്രോ-ഽസി സത്യൌജാ [സത്യൌജാഃ, ബ്രഹ്മാ(3)ന്ത്വഗ്ം] 31
ബ്രഹ്മാ(3)ന്ത്വഗ്ം രാജ-ന്ബ്രഹ്മാ-ഽസി മിത്രോ-ഽസി സുശേവോ ബ്രഹ്മാ(3)-ന്ത്വഗ്ം രാജ-ന്ബ്രഹ്മാ-ഽസി വരുണോ-ഽസി സത്യധര്മേന്ദ്രസ്യ വജ്രോ-ഽസി വാര്ത്രഘ്നസ്തേന മേ രദ്ധ്യ ദിശോ-ഽഭ്യയഗ്ം രാജാ-ഽഭൂ-ഥ്സുശ്ലോകാഁ(4) സുമങ്ഗലാഁ(4) സത്യരാജാ(3)ന് । അപാ-ന്നപ്ത്രേ സ്വാഹോര്ജോ നപ്ത്രേ സ്വാഹാ-ഽഗ്നയേ ഗൃഹപതയേ സ്വാഹാ ॥ 32 ॥

(സത്യൌജാ-ശ്ചത്വാരിഗ്ംശച്ച) (അ. 16)
ആഗ്നേയമഷ്ടാകപാല-ന്നിര്വപതി ഹിരണ്യ-ന്ദക്ഷിണാ സാരസ്വത-ഞ്ചരും-വഁഥ്സതരീ ദക്ഷിണാ സാവിത്ര-ന്ദ്വാദശകപാല-മുപദ്ധ്വസ്തോ ദക്ഷിണാ പൌഷ്ണ-ഞ്ചരുഗ്ഗ് ശ്യാമോ ദക്ഷിണാ ബാര്ഹസ്പത്യ-ഞ്ചരുഗ്ം ശിതിപൃഷ്ഠോ ദക്ഷിണൈന്ദ്ര-മേകാദശകപാല-മൃഷഭോ ദക്ഷിണാ വാരുണ-ന്ദശകപാല-മ്മഹാനിരഷ്ടോ ദക്ഷിണാ സൌമ്യ-ഞ്ചരു-മ്ബഭ്രു-ര്ദക്ഷിണാ ത്വാഷ്ട്രമഷ്ടാകപാലഗ്ം ശുണ്ഠോ ദക്ഷിണാ വൈഷ്ണവ-ന്ത്രികപാലം-വാഁമനോ ദക്ഷിണാ ॥ 33 ॥

(ആഗ്നേയഗ്ം ഹിരണ്യഗ്ം സാരസ്വതം-ദ്വിചത്വാരിഗ്ംശത് ) (അ. 17)
സദ്യോ ദീക്ഷയന്തി സദ്യ-സ്സോമ-ങ്ക്രീണന്തി പുണ്ഡരിസ്രജാ-മ്പ്ര യച്ഛതി ദശഭി-ര്വഥ്സതരൈ-സ്സോമ-ങ്ക്രീണാതി ദശപേയോ ഭവതി ശത-മ്ബ്രാഹ്മണാഃ പിബന്തി സപ്തദശഗ്ഗ് സ്തോത്ര-മ്ഭവതി പ്രാകാശാവദ്ധ്വര്യവേ ദദാതി സ്രജ-മുദ്ഗാത്രേ രുക്മഗ്ം ഹോത്രേ-ഽശ്വ-മ്പ്രസ്തോതൃപ്രതിഹര്തൃഭ്യാ-ന്ദ്വാദശ പഷ്ഠൌഹീ-ര്ബ്രഹ്മണേ വശാ-മ്മൈത്രാവരുണായര്ഷഭ-മ്ബ്രാഹ്മണാച്ഛഗ്ംസിനേ വാസസീ നേഷ്ടാപോതൃഭ്യാഗ് സ്ഥൂരി യവാചിത-മച്ഛാവാകായാ-ഽനഡ്വാഹ-മഗ്നീധേ ഭാര്ഗവോ ഹോതാ ഭവതി ശ്രായന്തീയ-മ്ബ്രഹ്മസാമ-മ്ഭവതി വാരവന്തീയ മഗ്നിഷ്ടോമസാമഗ്ം സാരസ്വതീ-രപോ ഗൃഹ്ണാതി ॥ 34 ॥

(വാരവന്തീയ-ഞ്ചത്വാരി ച)(ആ18)
ആഗ്നേയ-മഷ്ടാകപാല-ന്നിര്വപതി ഹിരണ്യ-ന്ദക്ഷിണൈന്ദ്ര-മേകാദശകപാല-മൃഷഭോ ദക്ഷിണാ വൈശ്വദേവ-ഞ്ചരു-മ്പിശങ്ഗീ പഷ്ഠൌഹീ ദക്ഷിണാ മൈത്രാവരുണീ-മാമിക്ഷാം-വഁശാ ദക്ഷിണാ ബാര്ഹസ്പത്യ-ഞ്ചരുഗ്ം ശിതിപൃഷ്ഠോ ദക്ഷിണാ-ഽഽദിത്യാ-മ്മല്ഃആ-ങ്ഗര്ഭിണീമാ ലഭതേ മാരുതീ-മ്പൃശ്ഞി-മ്പഷ്ഠൌഹീ-മശ്വിഭ്യാ-മ്പൂഷ്ണേ പുരോഡാശ-ന്ദ്വാദശകപാല-ന്നിര്വപതി സരസ്വതേ സത്യവാചേ ചരുഗ്ം സവിത്രേ സത്യപ്രസവായ പുരോഡാശ-ന്ദ്വാദശകപാല-ന്തിസൃധന്വഗ്ം ശുഷ്കദൃതി-ര്ദക്ഷിണാ ॥ 35 ॥

(അഗ്നേയഗ്ം ഹിരണ്യമൈദ്രമൃഷഭോ വൈശ്വദേവ-മ്പിശങ്ഗീ ബാര്ഹസ്പത്യഗ്ം-സപ്തചത്വാരിഗ്ംശത്) (അ. 19)
ആഗ്നേയ-മഷ്ടാകപാല-ന്നിര്വപതി സൌമ്യ-ഞ്ചരുഗ്ം സാവിത്ര-ന്ദ്വാദശകപാല-മ്ബാര്ഹസ്പത്യ-ഞ്ചരു-ന്ത്വാഷ്ട്രമഷ്ടാകപാലം-വൈഁശ്വാനര-ന്ദ്വാദശകപാല-ന്ദക്ഷിണോ രഥവാഹനവാഹോ ദക്ഷിണാ സാരസ്വത-ഞ്ചരു-ന്നിര്വപതി പൌഷ്ണ-ഞ്ചരു-മ്മൈത്ര-ഞ്ചരും-വാഁരുണ-ഞ്ചരു-ങ്ക്ഷൈത്രപത്യ-ഞ്ചരുമാദിത്യ-ഞ്ചരുമുത്തരോ രഥവാഹനവാഹോ ദക്ഷിണാ ॥ 36 ॥

(ആഗ്നേയഗ്ം സൌമ്യ-മ്ബാര്ഹസ്പത്യം-ചതുസ്ത്രിഗ്ംശത്) (അ. 20)
സ്വാദ്വീ-ന്ത്വാ സ്വാദുനാ തീവ്രാ-ന്തീവ്രേണാ-ഽമൃതാ-മമൃതേന സൃജാമി സഗ്ം സോമേന സോമോ-ഽസ്യശ്വിഭ്യാ-മ്പച്യസ്വ സരസ്വത്യൈ പച്യസ്വേന്ദ്രായ സുത്രാംണേ പച്യസ്വ പുനാതു തേ പരിസ്രുതഗ്ം സോമഗ്ം സൂര്യസ്യ ദുഹിതാ । വാരേണ ശശ്വതാ തനാ ॥ വായുഃ പൂതഃ പവിത്രേണ പ്രത്യം സോമോ അതിദ്രുതഃ । ഇന്ദ്രസ്യ യുജ്യ-സ്സഖാ ॥ കുവിദം-യഁവമന്തോ യവ-ഞ്ചി-ദ്യഥാ ദാന്ത്യനുപൂര്വം-വിഁയൂയ । ഇഹേഹൈഷാ-ങ്കൃണുത ഭോജനാനി യേ ബര്ഹിഷോ നമോവൃക്തി-ന്ന ജഗ്മുഃ ॥ ആശ്വിന-ന്ധൂമ്രമാ ലഭതേ സാരസ്വത-മ്മേഷമൈന്ദ്രമൃഷഭ-മൈന്ദ്ര-മേകാദശകപാല-ന്നിര്വപതി സാവിത്ര-ന്ദ്വാദശകപാലം-വാഁരുണ-ന്ദശകപാലഗ്ം സോമപ്രതീകാഃ പിതരസ്തൃപ്ണുത വഡബാ ദക്ഷിണാ ॥ 37 ॥
(ഭോജനാനി-ഷഡ്വിഗ്ംശതിശ്ച) (അ. 21)
അഗ്നാവിഷ്ണൂ മഹി ത-ദ്വാ-മ്മഹിത്വം-വീഁത-ങ്ഘൃതസ്യ ഗുഹ്യാനി നാമ । ദമേദമേ സപ്ത രത്നാ ദധാനാ പ്രതി വാ-ഞ്ജിഹ്വാ ഘൃതമാ ചരണ്യേത് ॥ അഗ്നാവിഷ്ണൂ മഹി ധാമ പ്രിയം-വാഁം-വീഁഥോ ഘൃതസ്യ ഗുഹ്യാ ജുഷാണാ । ദമേദമേ സുഷ്ടുതീ-ര്വാവൃധാനാ പ്രതി വാ-ഞ്ജിഹ്വാ ഘൃതമുച്ചരണ്യേത് ॥ പ്ര ണോ ദേവീ സരസ്വതീ വാജേഭി-ര്വാജിനീവതീ । ധീനാ-മവിത്ര്യവതു । ആ നോ ദിവോ ബൃഹതഃ - [ബൃഹതഃ, പര്വതാദാ] 38
പര്വതാദാ സരസ്വതീ യജതാ ഗന്തു യജ്ഞമ് । ഹവ-ന്ദേവീ ജുജുഷാണാ ഘൃതാചീ ശഗ്മാ-ന്നോ വാചമുശതീ ശൃണോതു ॥ ബൃഹസ്പതേ ജുഷസ്വ നോ ഹവ്യാനി വിശ്വദേവ്യ । രാസ്വ രത്നാനി ദാശുഷേ ॥ ഏവാ പിത്രേ വിശ്വദേവായ വൃഷ്ണേ യജ്ഞൈ-ര്വിധേമ നമസാ ഹവിര്ഭിഃ । ബൃഹസ്പതേ സുപ്രജാ വീരവന്തോ വയഗ്ഗ് സ്യാമ പതയോ രയീണാമ് ॥ ബൃഹസ്പതേ അതി യദര്യോ അര്ഹാ-ദ്ദ്യുമ-ദ്വിഭാതി ക്രതുമജ്ജനേഷു । യ-ദ്ദീദയച്ഛവസ- [യ-ദ്ദീദയച്ഛവസഃ, ഋതപ്രജാത തദസ്മാസു] 39
-ര്തപ്രജാത തദസ്മാസു ദ്രവിണ-ന്ധേഹി ചിത്രമ് ॥ ആ നോ മിത്രാവരുണാ ഘൃതൈ-ര്ഗവ്യൂതിമുക്ഷതമ് । മദ്ധ്വാ രജാഗ്ംസി സുക്രതൂ ॥ പ്ര ബാഹവാ സിസൃത-ഞ്ജീവസേ ന ആ നോ ഗവ്യൂതി-മുക്ഷത-ങ്ഘൃതേന । ആ നോ ജനേ ശ്രവയതം-യുഁവാനാ ശ്രുത-മ്മേ മിത്രാവരുണാ ഹവേമാ ॥ അഗ്നിം-വഃ ഁപൂര്വ്യ-ങ്ഗിരാ ദേവമീഡേ വസൂനാമ് । സപര്യന്തഃ പുരുപ്രിയ-മ്മിത്ര-ന്ന ക്ഷേത്രസാധസമ് ॥ മക്ഷൂ ദേവവതോ രഥ- [രഥഃ, ശൂരോ വാ പൃഥ്സു] 40
-ശ്ശൂരോ വാ പൃഥ്സു കാസു ചിത് । ദേവാനാം-യഁ ഇന്മനോ യജമാന ഇയക്ഷത്യഭീദയജ്വനോ ഭുവത് ॥ ന യജമാന രിഷ്യസി ന സുന്വാന ന ദേവയോ ॥ അസദത്ര സുവീര്യമുത ത്യദാശ്വശ്വിയമ് ॥ നകിഷ്ട-ങ്കര്മണാ നശന്ന പ്ര യോഷന്ന യോഷതി ॥ ഉപ ക്ഷരന്തി സിന്ധവോ മയോഭുവ ഈജാന-ഞ്ച യക്ഷ്യമാണ-ഞ്ച ധേനവഃ । പൃണന്ത-ഞ്ച പപുരി-ഞ്ച [പപുരി-ഞ്ച, ശ്രവസ്യവോ ഘൃതസ്യ] 41
ശ്രവസ്യവോ ഘൃതസ്യ ധാരാ ഉപ യന്തി വിശ്വതഃ ॥സോമാരുദ്രാ വി വൃഹതം-വിഁഷൂചീമമീവാ യാ നോ ഗയ-മാവിവേശ । ആരേ ബാധേഥാ-ന്നിര്-ഋതി-മ്പരാചൈഃ കൃത-ഞ്ചിദേനഃ പ്ര മുമുക്ത-മസ്മത് ॥ സോമാരുദ്രാ യുവ-മേതാന്യസ്മേ വിശ്വാ തനൂഷു ഭേഷജാനി ധത്തമ് । അവ സ്യത-മ്മുഞ്ചതം-യഁന്നോ അസ്തി തനൂഷു ബദ്ധ-ങ്കൃതമേനോ അസ്മത് ॥ സോമാപൂഷണാ ജനനാ രയീണാ-ഞ്ജനനാ ദിവോ ജനനാ പൃഥിവ്യാഃ । ജാതൌ വിശ്വസ്യ ഭുവനസ്യ ഗോപൌ ദേവാ അകൃണ്വന്നമൃതസ്യ നാഭിമ് ॥ ഇമൌ ദേവൌ ജായമാനൌ ജുഷന്തേമൌ തമാഗ്ംസി ഗൂഹതാ-മജുഷ്ടാ । ആഭ്യാമിന്ദ്രഃ പക്വമാമാസ്വന്ത-സ്സോമാപൂഷഭ്യാ-ഞ്ജനദുസ്രിയാസു ॥ 42 ॥
(ബൃഹതഃ-ശവസാ-രഥഃ-പപുരി-ഞ്ച-ദിവോ ജനനാ-പഞ്ചവിഗ്ംശതിശ്ച) (അ. 22)
(അനുമത്യാ-ആഗ്നേയ-മൈന്ദ്രാഗ്നമഗ്നയേ-സോമായ-പ്രതിപൂരുഷ-മൈന്ദ്രാഗ്നം-ധാത്രേ ബാര്ഹസ്പത്യ-മഗ്നയേ-ര്-ഽഥതോ-ദേവീഃ-സമിധഗ്ം-സോമസ്യേ-ന്ദ്രസ്യ -മിത്ര-ആഗ്നേയഗ്ം-സദ്യ-ആഗ്നേയഗ്ം-മാഗ്നേയഗ്ഗ്-സ്വാദ്വീ-ന്ത്വാ-ഽഗ്നാവിഷ്ണൂ-ദ്വാവിഗ്ംശതിഃ । )
(അനുമത്യൈ-യഥാ-ഽസതി-ദേവീരാപോ-മിത്രോ-ഽസി-ശൂരോ വാ-ദ്വിചത്വാരിഗ്ംശത് । )
(അനുമത്യാ, ഉസ്രിയാസു)
(ഇഷ, ആപോ, ദേവസ്യാ, ഽഽദദേ, ദേവാസുരാ, സ്സന്ത്വാ, പാകയജ്ഞ, മനുമത്യാ, അഷ്ടൌ) (8)
॥ ഹരിഃ ഓമ് ॥
॥ കൃഷ്ണ യജുര്വേദീയ തൈത്തിരീയ സംഹിതായാ-മ്പ്രഥമകാണ്ഡേ അഷ്തമഃ പ്രശ്ന-സ്സമാപ്തഃ ॥