নারাযণীযং দশক 21 - নব বর্ষাঃ তথা সপ্তদ্বীপাঃ

মধ্যোদ্ভবে ভুব ইলাবৃতনাম্নি বর্ষে
গৌরীপ্রধানবনিতাজনমাত্রভাজি ।
শর্বেণ মন্ত্রনুতিভিঃ সমুপাস্যমানং
সঙ্কর্ষণাত্মকমধীশ্বর সংশ্রযে ত্বাম্ ॥1॥

ভদ্রাশ্বনামক ইলাবৃতপূর্ববর্ষে
ভদ্রশ্রবোভিঃ ঋষিভিঃ পরিণূযমানম্ ।
কল্পান্তগূঢনিগমোদ্ধরণপ্রবীণং
ধ্যাযামি দেব হযশীর্ষতনুং ভবন্তম্ ॥2॥

ধ্যাযামি দক্ষিণগতে হরিবর্ষবর্ষে
প্রহ্লাদমুখ্যপুরুষৈঃ পরিষেব্যমাণম্ ।
উত্তুঙ্গশান্তধবলাকৃতিমেকশুদ্ধ-
জ্ঞানপ্রদং নরহরিং ভগবন্ ভবন্তম্ ॥3॥

বর্ষে প্রতীচি ললিতাত্মনি কেতুমালে
লীলাবিশেষললিতস্মিতশোভনাঙ্গম্ ।
লক্ষ্ম্যা প্রজাপতিসুতৈশ্চ নিষেব্যমাণং
তস্যাঃ প্রিযায ধৃতকামতনুং ভজে ত্বাম্ ॥4॥

রম্যে হ্যুদীচি খলু রম্যকনাম্নি বর্ষে
তদ্বর্ষনাথমনুবর্যসপর্যমাণম্ ।
ভক্তৈকবত্সলমমত্সরহৃত্সু ভান্তং
মত্স্যাকৃতিং ভুবননাথ ভজে ভবন্তম্ ॥5॥

বর্ষং হিরণ্মযসমাহ্বযমৌত্তরাহ-
মাসীনমদ্রিধৃতিকর্মঠকামঠাঙ্গম্ ।
সংসেবতে পিতৃগণপ্রবরোঽর্যমা যং
তং ত্বাং ভজামি ভগবন্ পরচিন্মযাত্মন্ ॥6॥

কিঞ্চোত্তরেষু কুরুষু প্রিযযা ধরণ্যা
সংসেবিতো মহিতমন্ত্রনুতিপ্রভেদৈঃ ।
দংষ্ট্রাগ্রঘৃষ্টঘনপৃষ্ঠগরিষ্ঠবর্ষ্মা
ত্বং পাহি বিজ্ঞনুত যজ্ঞবরাহমূর্তে ॥7॥

যাম্যাং দিশং ভজতি কিম্পুরুষাখ্যবর্ষে
সংসেবিতো হনুমতা দৃঢভক্তিভাজা ।
সীতাভিরামপরমাদ্ভুতরূপশালী
রামাত্মকঃ পরিলসন্ পরিপাহি বিষ্ণো ॥8॥

শ্রীনারদেন সহ ভারতখণ্ডমুখ্যৈ-
স্ত্বং সাঙ্খ্যযোগনুতিভিঃ সমুপাস্যমানঃ ।
আকল্পকালমিহ সাধুজনাভিরক্ষী
নারাযণো নরসখঃ পরিপাহি ভূমন্ ॥9॥

প্লাক্ষেঽর্করূপমযি শাল্মল ইন্দুরূপং
দ্বীপে ভজন্তি কুশনামনি বহ্নিরূপম্ ।
ক্রৌঞ্চেঽম্বুরূপমথ বাযুমযং চ শাকে
ত্বাং ব্রহ্মরূপমপি পুষ্করনাম্নি লোকাঃ ॥10॥

সর্বৈর্ধ্রুবাদিভিরুডুপ্রকরৈর্গ্রহৈশ্চ
পুচ্ছাদিকেষ্ববযবেষ্বভিকল্প্যমানৈঃ ।
ত্বং শিংশুমারবপুষা মহতামুপাস্যঃ
সন্ধ্যাসু রুন্ধি নরকং মম সিন্ধুশাযিন্ ॥11॥

পাতালমূলভুবি শেষতনুং ভবন্তং
লোলৈককুণ্ডলবিরাজিসহস্রশীর্ষম্ ।
নীলাম্বরং ধৃতহলং ভুজগাঙ্গনাভি-
র্জুষ্টং ভজে হর গদান্ গুরুগেহনাথ ॥12॥