ନାରାଯଣୀଯଂ ଦଶକ 21 - ନଵ ଵର୍ଷାଃ ତଥା ସପ୍ତଦ୍ଵୀପାଃ

ମଧ୍ଯୋଦ୍ଭଵେ ଭୁଵ ଇଲାଵୃତନାମ୍ନି ଵର୍ଷେ
ଗୌରୀପ୍ରଧାନଵନିତାଜନମାତ୍ରଭାଜି ।
ଶର୍ଵେଣ ମନ୍ତ୍ରନୁତିଭିଃ ସମୁପାସ୍ଯମାନଂ
ସଙ୍କର୍ଷଣାତ୍ମକମଧୀଶ୍ଵର ସଂଶ୍ରଯେ ତ୍ଵାମ୍ ॥1॥

ଭଦ୍ରାଶ୍ଵନାମକ ଇଲାଵୃତପୂର୍ଵଵର୍ଷେ
ଭଦ୍ରଶ୍ରଵୋଭିଃ ଋଷିଭିଃ ପରିଣୂଯମାନମ୍ ।
କଲ୍ପାନ୍ତଗୂଢନିଗମୋଦ୍ଧରଣପ୍ରଵୀଣଂ
ଧ୍ଯାଯାମି ଦେଵ ହଯଶୀର୍ଷତନୁଂ ଭଵନ୍ତମ୍ ॥2॥

ଧ୍ଯାଯାମି ଦକ୍ଷିଣଗତେ ହରିଵର୍ଷଵର୍ଷେ
ପ୍ରହ୍ଲାଦମୁଖ୍ଯପୁରୁଷୈଃ ପରିଷେଵ୍ଯମାଣମ୍ ।
ଉତ୍ତୁଙ୍ଗଶାନ୍ତଧଵଲାକୃତିମେକଶୁଦ୍ଧ-
ଜ୍ଞାନପ୍ରଦଂ ନରହରିଂ ଭଗଵନ୍ ଭଵନ୍ତମ୍ ॥3॥

ଵର୍ଷେ ପ୍ରତୀଚି ଲଲିତାତ୍ମନି କେତୁମାଲେ
ଲୀଲାଵିଶେଷଲଲିତସ୍ମିତଶୋଭନାଙ୍ଗମ୍ ।
ଲକ୍ଷ୍ମ୍ଯା ପ୍ରଜାପତିସୁତୈଶ୍ଚ ନିଷେଵ୍ଯମାଣଂ
ତସ୍ଯାଃ ପ୍ରିଯାଯ ଧୃତକାମତନୁଂ ଭଜେ ତ୍ଵାମ୍ ॥4॥

ରମ୍ଯେ ହ୍ଯୁଦୀଚି ଖଲୁ ରମ୍ଯକନାମ୍ନି ଵର୍ଷେ
ତଦ୍ଵର୍ଷନାଥମନୁଵର୍ଯସପର୍ଯମାଣମ୍ ।
ଭକ୍ତୈକଵତ୍ସଲମମତ୍ସରହୃତ୍ସୁ ଭାନ୍ତଂ
ମତ୍ସ୍ଯାକୃତିଂ ଭୁଵନନାଥ ଭଜେ ଭଵନ୍ତମ୍ ॥5॥

ଵର୍ଷଂ ହିରଣ୍ମଯସମାହ୍ଵଯମୌତ୍ତରାହ-
ମାସୀନମଦ୍ରିଧୃତିକର୍ମଠକାମଠାଙ୍ଗମ୍ ।
ସଂସେଵତେ ପିତୃଗଣପ୍ରଵରୋଽର୍ଯମା ଯଂ
ତଂ ତ୍ଵାଂ ଭଜାମି ଭଗଵନ୍ ପରଚିନ୍ମଯାତ୍ମନ୍ ॥6॥

କିଞ୍ଚୋତ୍ତରେଷୁ କୁରୁଷୁ ପ୍ରିଯଯା ଧରଣ୍ଯା
ସଂସେଵିତୋ ମହିତମନ୍ତ୍ରନୁତିପ୍ରଭେଦୈଃ ।
ଦଂଷ୍ଟ୍ରାଗ୍ରଘୃଷ୍ଟଘନପୃଷ୍ଠଗରିଷ୍ଠଵର୍ଷ୍ମା
ତ୍ଵଂ ପାହି ବିଜ୍ଞନୁତ ଯଜ୍ଞଵରାହମୂର୍ତେ ॥7॥

ଯାମ୍ଯାଂ ଦିଶଂ ଭଜତି କିମ୍ପୁରୁଷାଖ୍ଯଵର୍ଷେ
ସଂସେଵିତୋ ହନୁମତା ଦୃଢଭକ୍ତିଭାଜା ।
ସୀତାଭିରାମପରମାଦ୍ଭୁତରୂପଶାଲୀ
ରାମାତ୍ମକଃ ପରିଲସନ୍ ପରିପାହି ଵିଷ୍ଣୋ ॥8॥

ଶ୍ରୀନାରଦେନ ସହ ଭାରତଖଣ୍ଡମୁଖ୍ଯୈ-
ସ୍ତ୍ଵଂ ସାଙ୍ଖ୍ଯଯୋଗନୁତିଭିଃ ସମୁପାସ୍ଯମାନଃ ।
ଆକଲ୍ପକାଲମିହ ସାଧୁଜନାଭିରକ୍ଷୀ
ନାରାଯଣୋ ନରସଖଃ ପରିପାହି ଭୂମନ୍ ॥9॥

ପ୍ଲାକ୍ଷେଽର୍କରୂପମଯି ଶାଲ୍ମଲ ଇନ୍ଦୁରୂପଂ
ଦ୍ଵୀପେ ଭଜନ୍ତି କୁଶନାମନି ଵହ୍ନିରୂପମ୍ ।
କ୍ରୌଞ୍ଚେଽମ୍ବୁରୂପମଥ ଵାଯୁମଯଂ ଚ ଶାକେ
ତ୍ଵାଂ ବ୍ରହ୍ମରୂପମପି ପୁଷ୍କରନାମ୍ନି ଲୋକାଃ ॥10॥

ସର୍ଵୈର୍ଧ୍ରୁଵାଦିଭିରୁଡୁପ୍ରକରୈର୍ଗ୍ରହୈଶ୍ଚ
ପୁଚ୍ଛାଦିକେଷ୍ଵଵଯଵେଷ୍ଵଭିକଲ୍ପ୍ଯମାନୈଃ ।
ତ୍ଵଂ ଶିଂଶୁମାରଵପୁଷା ମହତାମୁପାସ୍ଯଃ
ସନ୍ଧ୍ଯାସୁ ରୁନ୍ଧି ନରକଂ ମମ ସିନ୍ଧୁଶାଯିନ୍ ॥11॥

ପାତାଲମୂଲଭୁଵି ଶେଷତନୁଂ ଭଵନ୍ତଂ
ଲୋଲୈକକୁଣ୍ଡଲଵିରାଜିସହସ୍ରଶୀର୍ଷମ୍ ।
ନୀଲାମ୍ବରଂ ଧୃତହଲଂ ଭୁଜଗାଙ୍ଗନାଭି-
ର୍ଜୁଷ୍ଟଂ ଭଜେ ହର ଗଦାନ୍ ଗୁରୁଗେହନାଥ ॥12॥