নারাযণীযং দশক 22 - অজামিলোপাখ্যানম্

অজামিলো নাম মহীসুরঃ পুরা
চরন্ বিভো ধর্মপথান্ গৃহাশ্রমী ।
গুরোর্গিরা কাননমেত্য দৃষ্টবান্
সুধৃষ্টশীলাং কুলটাং মদাকুলাম্ ॥1॥

স্বতঃ প্রশান্তোঽপি তদাহৃতাশযঃ
স্বধর্মমুত্সৃজ্য তযা সমারমন্ ।
অধর্মকারী দশমী ভবন্ পুন-
র্দধৌ ভবন্নামযুতে সুতে রতিম্ ॥2॥

স মৃত্যুকালে যমরাজকিঙ্করান্
ভযঙ্করাংস্ত্রীনভিলক্ষযন্ ভিযা ।
পুরা মনাক্ ত্বত্স্মৃতিবাসনাবলাত্
জুহাব নারাযণনামকং সুতম্ ॥3॥

দুরাশযস্যাপি তদাত্বনির্গত-
ত্বদীযনামাক্ষরমাত্রবৈভবাত্ ।
পুরোঽভিপেতুর্ভবদীযপার্ষদাঃ
চতুর্ভুজাঃ পীতপটা মনোরমাঃ ॥4॥

অমুং চ সম্পাশ্য বিকর্ষতো ভটান্
বিমুঞ্চতেত্যারুরুধুর্বলাদমী ।
নিবারিতাস্তে চ ভবজ্জনৈস্তদা
তদীযপাপং নিখিলং ন্যবেদযন্ ॥5॥

ভবন্তু পাপানি কথং তু নিষ্কৃতে
কৃতেঽপি ভো দণ্ডনমস্তি পণ্ডিতাঃ ।
ন নিষ্কৃতিঃ কিং বিদিতা ভবাদৃশা-
মিতি প্রভো ত্বত্পুরুষা বভাষিরে ॥6॥

শ্রুতিস্মৃতিভ্যাং বিহিতা ব্রতাদযঃ
পুনন্তি পাপং ন লুনন্তি বাসনাম্ ।
অনন্তসেবা তু নিকৃন্ততি দ্বযী-
মিতি প্রভো ত্বত্পুরুষা বভাষিরে ॥7॥

অনেন ভো জন্মসহস্রকোটিভিঃ
কৃতেষু পাপেষ্বপি নিষ্কৃতিঃ কৃতা ।
যদগ্রহীন্নাম ভযাকুলো হরে-
রিতি প্রভো ত্বত্পুরুষা বভাষিরে ॥8॥

নৃণামবুদ্ধ্যাপি মুকুন্দকীর্তনং
দহত্যঘৌঘান্ মহিমাস্য তাদৃশঃ ।
যথাগ্নিরেধাংসি যথৌষধং গদা -
নিতি প্রভো ত্বত্পুরুষা বভাষিরে ॥9॥

ইতীরিতৈর্যাম্যভটৈরপাসৃতে
ভবদ্ভটানাং চ গণে তিরোহিতে ।
ভবত্স্মৃতিং কঞ্চন কালমাচরন্
ভবত্পদং প্রাপি ভবদ্ভটৈরসৌ ॥10॥

স্বকিঙ্করাবেদনশঙ্কিতো যম-
স্ত্বদঙ্ঘ্রিভক্তেষু ন গম্যতামিতি ।
স্বকীযভৃত্যানশিশিক্ষদুচ্চকৈঃ
স দেব বাতালযনাথ পাহি মাম্ ॥11॥