നാരായണീയം ദശക 22 - അജാമിലോപാഖ്യാനമ്

അജാമിലോ നാമ മഹീസുരഃ പുരാ
ചരന് വിഭോ ധര്മപഥാന് ഗൃഹാശ്രമീ ।
ഗുരോര്ഗിരാ കാനനമേത്യ ദൃഷ്ടവാന്
സുധൃഷ്ടശീലാം കുലടാം മദാകുലാമ് ॥1॥

സ്വതഃ പ്രശാന്തോഽപി തദാഹൃതാശയഃ
സ്വധര്മമുത്സൃജ്യ തയാ സമാരമന് ।
അധര്മകാരീ ദശമീ ഭവന് പുന-
ര്ദധൌ ഭവന്നാമയുതേ സുതേ രതിമ് ॥2॥

സ മൃത്യുകാലേ യമരാജകിങ്കരാന്
ഭയങ്കരാംസ്ത്രീനഭിലക്ഷയന് ഭിയാ ।
പുരാ മനാക് ത്വത്സ്മൃതിവാസനാബലാത്
ജുഹാവ നാരായണനാമകം സുതമ് ॥3॥

ദുരാശയസ്യാപി തദാത്വനിര്ഗത-
ത്വദീയനാമാക്ഷരമാത്രവൈഭവാത് ।
പുരോഽഭിപേതുര്ഭവദീയപാര്ഷദാഃ
ചതുര്ഭുജാഃ പീതപടാ മനോരമാഃ ॥4॥

അമും ച സമ്പാശ്യ വികര്ഷതോ ഭടാന്
വിമുഞ്ചതേത്യാരുരുധുര്ബലാദമീ ।
നിവാരിതാസ്തേ ച ഭവജ്ജനൈസ്തദാ
തദീയപാപം നിഖിലം ന്യവേദയന് ॥5॥

ഭവന്തു പാപാനി കഥം തു നിഷ്കൃതേ
കൃതേഽപി ഭോ ദണ്ഡനമസ്തി പണ്ഡിതാഃ ।
ന നിഷ്കൃതിഃ കിം വിദിതാ ഭവാദൃശാ-
മിതി പ്രഭോ ത്വത്പുരുഷാ ബഭാഷിരേ ॥6॥

ശ്രുതിസ്മൃതിഭ്യാം വിഹിതാ വ്രതാദയഃ
പുനന്തി പാപം ന ലുനന്തി വാസനാമ് ।
അനന്തസേവാ തു നികൃന്തതി ദ്വയീ-
മിതി പ്രഭോ ത്വത്പുരുഷാ ബഭാഷിരേ ॥7॥

അനേന ഭോ ജന്മസഹസ്രകോടിഭിഃ
കൃതേഷു പാപേഷ്വപി നിഷ്കൃതിഃ കൃതാ ।
യദഗ്രഹീന്നാമ ഭയാകുലോ ഹരേ-
രിതി പ്രഭോ ത്വത്പുരുഷാ ബഭാഷിരേ ॥8॥

നൃണാമബുദ്ധ്യാപി മുകുന്ദകീര്തനം
ദഹത്യഘൌഘാന് മഹിമാസ്യ താദൃശഃ ।
യഥാഗ്നിരേധാംസി യഥൌഷധം ഗദാ -
നിതി പ്രഭോ ത്വത്പുരുഷാ ബഭാഷിരേ ॥9॥

ഇതീരിതൈര്യാമ്യഭടൈരപാസൃതേ
ഭവദ്ഭടാനാം ച ഗണേ തിരോഹിതേ ।
ഭവത്സ്മൃതിം കഞ്ചന കാലമാചരന്
ഭവത്പദം പ്രാപി ഭവദ്ഭടൈരസൌ ॥10॥

സ്വകിങ്കരാവേദനശങ്കിതോ യമ-
സ്ത്വദങ്ഘ്രിഭക്തേഷു ന ഗമ്യതാമിതി ।
സ്വകീയഭൃത്യാനശിശിക്ഷദുച്ചകൈഃ
സ ദേവ വാതാലയനാഥ പാഹി മാമ് ॥11॥