নাৰাযণীযং দশক 40 - পূতনামোক্ষম্

তদনু নন্দমমন্দশুভাস্পদং নৃপপুৰীং কৰদানকৃতে গতম্।
সমৱলোক্য জগাদ ভৱত্পিতা ৱিদিতকংসসহাযজনোদ্যমঃ ॥1॥

অযি সখে তৱ বালকজন্ম মাং সুখযতেঽদ্য নিজাত্মজজন্মৱত্ ।
ইতি ভৱত্পিতৃতাং ৱ্ৰজনাযকে সমধিৰোপ্য শশংস তমাদৰাত্ ॥2॥

ইহ চ সন্ত্যনিমিত্তশতানি তে কটকসীম্নি ততো লঘু গম্যতাম্ ।
ইতি চ তদ্ৱচসা ৱ্ৰজনাযকো ভৱদপাযভিযা দ্ৰুতমাযযৌ ॥3॥

অৱসৰে খলু তত্ৰ চ কাচন ৱ্ৰজপদে মধুৰাকৃতিৰঙ্গনা ।
তৰলষট্পদলালিতকুন্তলা কপটপোতক তে নিকটং গতা ॥4॥

সপদি সা হৃতবালকচেতনা নিশিচৰান্ৱযজা কিল পূতনা ।
ৱ্ৰজৱধূষ্ৱিহ কেযমিতি ক্ষণং ৱিমৃশতীষু ভৱন্তমুপাদদে ॥5॥
ললিতভাৱৱিলাসহৃতাত্মভিৰ্যুৱতিভিঃ প্ৰতিৰোদ্ধুমপাৰিতা ।
স্তনমসৌ ভৱনান্তনিষেদুষী প্ৰদদুষী ভৱতে কপটাত্মনে ॥5॥
সমধিৰুহ্য তদঙ্কমশঙ্কিতস্ত্ৱমথ বালকলোপনৰোষিতঃ ।
মহদিৱাম্ৰফলং কুচমণ্ডলং প্ৰতিচুচূষিথ দুৰ্ৱিষদূষিতম্ ॥7॥
অসুভিৰেৱ সমং ধযতি ত্ৱযি স্তনমসৌ স্তনিতোপমনিস্ৱনা ।
নিৰপতদ্ভযদাযি নিজং ৱপুঃ প্ৰতিগতা প্ৰৱিসাৰ্য ভুজাৱুভৌ ॥8॥
ভযদঘোষণভীষণৱিগ্ৰহশ্ৰৱণদৰ্শনমোহিতৱল্লৱে ।
ৱ্ৰজপদে তদুৰঃস্থলখেলনং ননু ভৱন্তমগৃহ্ণত গোপিকাঃ ॥9॥
ভুৱনমঙ্গলনামভিৰেৱ তে যুৱতিভিৰ্বহুধা কৃতৰক্ষণঃ ।
ত্ৱমযি ৱাতনিকেতননাথ মামগদযন্ কুৰু তাৱকসেৱকম্ ॥10॥