ନାରାଯଣୀଯଂ ଦଶକ 41 - ପୂତନାଦହନଂ ତଥା କୃଷ୍ଣଲାଲନାହ୍ଲାଦମ୍

ଵ୍ରଜେଶ୍ଵରୈଃ ଶୌରିଵଚୋ ନିଶମ୍ଯ ସମାଵ୍ରଜନ୍ନଧ୍ଵନି ଭୀତଚେତାଃ ।
ନିଷ୍ପିଷ୍ଟନିଶ୍ଶେଷତରୁଂ ନିରୀକ୍ଷ୍ଯ କଞ୍ଚିତ୍ପଦାର୍ଥଂ ଶରଣଂ ଗତସ୍ଵାମ୍ ॥1॥

ନିଶମ୍ଯ ଗୋପୀଵଚନାଦୁଦନ୍ତଂ ସର୍ଵେଽପି ଗୋପା ଭଯଵିସ୍ମଯାନ୍ଧାଃ ।
ତ୍ଵତ୍ପାତିତଂ ଘୋରପିଶାଚଦେହଂ ଦେହୁର୍ଵିଦୂରେଽଥ କୁଠାରକୃତ୍ତମ୍ ॥2॥

ତ୍ଵତ୍ପୀତପୂତସ୍ତନତଚ୍ଛରୀରାତ୍ ସମୁଚ୍ଚଲନ୍ନୁଚ୍ଚତରୋ ହି ଧୂମଃ ।
ଶଙ୍କାମଧାଦାଗରଵଃ କିମେଷ କିଂ ଚାନ୍ଦନୋ ଗୌଲ୍ଗୁଲଵୋଽଥଵେତି ॥3॥

ମଦଙ୍ଗସଙ୍ଗସ୍ଯ ଫଲଂ ନ ଦୂରେ କ୍ଷଣେନ ତାଵତ୍ ଭଵତାମପି ସ୍ଯାତ୍ ।
ଇତ୍ଯୁଲ୍ଲପନ୍ ଵଲ୍ଲଵତଲ୍ଲଜେଭ୍ଯଃ ତ୍ଵଂ ପୂତନାମାତନୁଥାଃ ସୁଗନ୍ଧିମ୍ ॥4॥

ଚିତ୍ରଂ ପିଶାଚ୍ଯା ନ ହତଃ କୁମାରଃ ଚିତ୍ରଂ ପୁରୈଵାକଥି ଶୌରିଣେଦମ୍ ।
ଇତି ପ୍ରଶଂସନ୍ କିଲ ଗୋପଲୋକୋ ଭଵନ୍ମୁଖାଲୋକରସେ ନ୍ଯମାଙ୍କ୍ଷୀତ୍ ॥5॥

ଦିନେଦିନେଽଥ ପ୍ରତିଵୃଦ୍ଧଲକ୍ଷ୍ମୀରକ୍ଷୀଣମାଙ୍ଗଲ୍ଯଶତୋ ଵ୍ରଜୋଽଯମ୍ ।
ଭଵନ୍ନିଵାସାଦଯି ଵାସୁଦେଵ ପ୍ରମୋଦସାନ୍ଦ୍ରଃ ପରିତୋ ଵିରେଜେ ॥6॥

ଗୃହେଷୁ ତେ କୋମଲରୂପହାସମିଥଃକଥାସଙ୍କୁଲିତାଃ କମନ୍ଯଃ ।
ଵୃତ୍ତେଷୁ କୃତ୍ଯେଷୁ ଭଵନ୍ନିରୀକ୍ଷାସମାଗତାଃ ପ୍ରତ୍ଯହମତ୍ଯନନ୍ଦନ୍ ॥7॥

ଅହୋ କୁମାରୋ ମଯି ଦତ୍ତଦୃଷ୍ଟିଃ ସ୍ମିତଂ କୃତଂ ମାଂ ପ୍ରତି ଵତ୍ସକେନ ।
ଏହ୍ଯେହି ମାମିତ୍ଯୁପସାର୍ଯ ପାଣୀ ତ୍ଵଯୀଶ କିଂ କିଂ ନ କୃତଂ ଵଧୂଭିଃ ॥8॥

ଭଵଦ୍ଵପୁଃସ୍ପର୍ଶନକୌତୁକେନ କରାତ୍କରଂ ଗୋପଵଧୂଜନେନ ।
ନୀତସ୍ତ୍ଵମାତାମ୍ରସରୋଜମାଲାଵ୍ଯାଲମ୍ବିଲୋଲମ୍ବତୁଲାମଲାସୀଃ ॥9॥

ନିପାଯଯନ୍ତୀ ସ୍ତନମଙ୍କଗଂ ତ୍ଵାଂ ଵିଲୋକଯନ୍ତୀ ଵଦନଂ ହସନ୍ତୀ ।
ଦଶାଂ ଯଶୋଦା କତମାଂ ନ ଭେଜେ ସ ତାଦୃଶଃ ପାହି ହରେ ଗଦାନ୍ମାମ୍ ॥10॥