নাৰাযণীযং দশক 81 - নৰকাসুৰৱধং তথা সুভদ্ৰাহৰণম্

স্নিগ্ধাং মুগ্ধাং সততমপি তাং লালযন্ সত্যভামাং
যাতো ভূযঃ সহ খলু তযা যাজ্ঞসেনীৱিৱাহম্ ।
পাৰ্থপ্ৰীত্যৈ পুনৰপি মনাগাস্থিতো হস্তিপুৰ্যাং
সশক্ৰপ্ৰস্থং পুৰমপি ৱিভো সংৱিধাযাগতোঽভূঃ ॥1॥

ভদ্ৰাং ভদ্ৰাং ভৱদৱৰজাং কৌৰৱেণাৰ্থ্যমানাং
ত্ৱদ্ৱাচা তামহৃত কুহনামস্কৰী শক্ৰসূনুঃ ।
তত্ৰ ক্ৰুদ্ধং বলমনুনযন্ প্ৰত্যগাস্তেন সাৰ্ধং
শক্ৰপ্ৰস্থং প্ৰিযসখমুদে সত্যভামাসহাযঃ ॥2॥

তত্ৰ ক্ৰীডন্নপি চ যমুনাকূলদৃষ্টাং গৃহীত্ৱা
তাং কালিন্দীং নগৰমগমঃ খাণ্ডৱপ্ৰীণিতাগ্নিঃ ।
ভ্ৰাতৃত্ৰস্তাং প্ৰণযৱিৱশাং দেৱ পৈতৃষ্ৱসেযীং
ৰাজ্ঞাং মধ্যে সপদি জহৃষে মিত্ৰৱিন্দামৱন্তীম্ ॥3॥

সত্যাং গত্ৱা পুনৰুদৱহো নগ্নজিন্নন্দনাং তাং
বধ্ৱা সপ্তাপি চ ৱৃষৱৰান্ সপ্তমূৰ্তিৰ্নিমেষাত্ ।
ভদ্ৰাং নাম প্ৰদদুৰথ তে দেৱ সন্তৰ্দনাদ্যা-
স্তত্সোদৰ্যা ৱৰদ ভৱতঃ সাঽপি পৈতৃষ্ৱসেযী ॥4॥

পাৰ্থাদ্যৈৰপ্যকৃতলৱনং তোযমাত্ৰাভিলক্ষ্যং
লক্ষং ছিত্ৱা শফৰমৱৃথা লক্ষ্মণাং মদ্ৰকন্যাম্ ।
অষ্টাৱেৱং তৱ সমভৱন্ ৱল্লভাস্তত্ৰ মধ্যে
শুশ্ৰোথ ত্ৱং সুৰপতিগিৰা ভৌমদুশ্চেষ্টিতানি ॥5॥

স্মৃতাযাতং পক্ষিপ্ৰৱৰমধিৰূঢস্ত্ৱমগমো
ৱহন্নঙ্কে ভামামুপৱনমিৱাৰাতিভৱনম্ ।
ৱিভিন্দন্ দুৰ্গাণি ত্ৰুটিতপৃতনাশোণিতৰসৈঃ
পুৰং তাৱত্ প্ৰাগ্জ্যোতিষমকুৰুথাঃ শোণিতপুৰম্ ॥6॥

মুৰস্ত্ৱাং পঞ্চাস্যো জলধিৱনমধ্যাদুদপতত্
স চক্ৰে চক্ৰেণ প্ৰদলিতশিৰা মঙ্ক্ষু ভৱতা ।
চতুৰ্দন্তৈৰ্দন্তাৱলপতিভিৰিন্ধানসমৰং
ৰথাঙ্গেন ছিত্ৱা নৰকমকৰোস্তীৰ্ণনৰকম্ ॥7॥

স্তুতো ভূম্যা ৰাজ্যং সপদি ভগদত্তেঽস্য তনযে
গজঞ্চৈকং দত্ৱা প্ৰজিঘযিথ নাগান্নিজপুৰীম্ ।
খলেনাবদ্ধানাং স্ৱগতমনসাং ষোডশ পুনঃ
সহস্ৰাণি স্ত্ৰীণামপি চ ধনৰাশিং চ ৱিপুলম্ ॥8॥

ভৌমাপাহৃতকুণ্ডলং তদদিতেৰ্দাতুং প্ৰযাতো দিৱং
শক্ৰাদ্যৈৰ্মহিতঃ সমং দযিতযা দ্যুস্ত্ৰীষু দত্তহ্ৰিযা ।
হৃত্ৱা কল্পতৰুং ৰুষাভিপতিতং জিত্ৱেন্দ্ৰমভ্যাগম-
স্তত্তু শ্ৰীমদদোষ ঈদৃশ ইতি ৱ্যাখ্যাতুমেৱাকৃথাঃ ॥9॥

কল্পদ্ৰুং সত্যভামাভৱনভুৱি সৃজন্ দ্ৱ্যষ্টসাহস্ৰযোষাঃ
স্ৱীকৃত্য প্ৰত্যগাৰং ৱিহিতবহুৱপুৰ্লালযন্ কেলিভেদৈঃ ।
আশ্চৰ্যান্নাৰদালোকিতৱিৱিধগতিস্তত্ৰ তত্ৰাপি গেহে
ভূযঃ সৰ্ৱাসু কুৰ্ৱন্ দশ দশ তনযান্ পাহি ৱাতালযেশ ॥10॥