નારાયણીયં દશક 81 - નરકાસુરવધં તથા સુભદ્રાહરણમ્

સ્નિગ્ધાં મુગ્ધાં સતતમપિ તાં લાલયન્ સત્યભામાં
યાતો ભૂયઃ સહ ખલુ તયા યાજ્ઞસેનીવિવાહમ્ ।
પાર્થપ્રીત્યૈ પુનરપિ મનાગાસ્થિતો હસ્તિપુર્યાં
સશક્રપ્રસ્થં પુરમપિ વિભો સંવિધાયાગતોઽભૂઃ ॥1॥

ભદ્રાં ભદ્રાં ભવદવરજાં કૌરવેણાર્થ્યમાનાં
ત્વદ્વાચા તામહૃત કુહનામસ્કરી શક્રસૂનુઃ ।
તત્ર ક્રુદ્ધં બલમનુનયન્ પ્રત્યગાસ્તેન સાર્ધં
શક્રપ્રસ્થં પ્રિયસખમુદે સત્યભામાસહાયઃ ॥2॥

તત્ર ક્રીડન્નપિ ચ યમુનાકૂલદૃષ્ટાં ગૃહીત્વા
તાં કાલિન્દીં નગરમગમઃ ખાણ્ડવપ્રીણિતાગ્નિઃ ।
ભ્રાતૃત્રસ્તાં પ્રણયવિવશાં દેવ પૈતૃષ્વસેયીં
રાજ્ઞાં મધ્યે સપદિ જહૃષે મિત્રવિન્દામવન્તીમ્ ॥3॥

સત્યાં ગત્વા પુનરુદવહો નગ્નજિન્નન્દનાં તાં
બધ્વા સપ્તાપિ ચ વૃષવરાન્ સપ્તમૂર્તિર્નિમેષાત્ ।
ભદ્રાં નામ પ્રદદુરથ તે દેવ સન્તર્દનાદ્યા-
સ્તત્સોદર્યા વરદ ભવતઃ સાઽપિ પૈતૃષ્વસેયી ॥4॥

પાર્થાદ્યૈરપ્યકૃતલવનં તોયમાત્રાભિલક્ષ્યં
લક્ષં છિત્વા શફરમવૃથા લક્ષ્મણાં મદ્રકન્યામ્ ।
અષ્ટાવેવં તવ સમભવન્ વલ્લભાસ્તત્ર મધ્યે
શુશ્રોથ ત્વં સુરપતિગિરા ભૌમદુશ્ચેષ્ટિતાનિ ॥5॥

સ્મૃતાયાતં પક્ષિપ્રવરમધિરૂઢસ્ત્વમગમો
વહન્નઙ્કે ભામામુપવનમિવારાતિભવનમ્ ।
વિભિન્દન્ દુર્ગાણિ ત્રુટિતપૃતનાશોણિતરસૈઃ
પુરં તાવત્ પ્રાગ્જ્યોતિષમકુરુથાઃ શોણિતપુરમ્ ॥6॥

મુરસ્ત્વાં પઞ્ચાસ્યો જલધિવનમધ્યાદુદપતત્
સ ચક્રે ચક્રેણ પ્રદલિતશિરા મઙ્ક્ષુ ભવતા ।
ચતુર્દન્તૈર્દન્તાવલપતિભિરિન્ધાનસમરં
રથાઙ્ગેન છિત્વા નરકમકરોસ્તીર્ણનરકમ્ ॥7॥

સ્તુતો ભૂમ્યા રાજ્યં સપદિ ભગદત્તેઽસ્ય તનયે
ગજઞ્ચૈકં દત્વા પ્રજિઘયિથ નાગાન્નિજપુરીમ્ ।
ખલેનાબદ્ધાનાં સ્વગતમનસાં ષોડશ પુનઃ
સહસ્રાણિ સ્ત્રીણામપિ ચ ધનરાશિં ચ વિપુલમ્ ॥8॥

ભૌમાપાહૃતકુણ્ડલં તદદિતેર્દાતું પ્રયાતો દિવં
શક્રાદ્યૈર્મહિતઃ સમં દયિતયા દ્યુસ્ત્રીષુ દત્તહ્રિયા ।
હૃત્વા કલ્પતરું રુષાભિપતિતં જિત્વેન્દ્રમભ્યાગમ-
સ્તત્તુ શ્રીમદદોષ ઈદૃશ ઇતિ વ્યાખ્યાતુમેવાકૃથાઃ ॥9॥

કલ્પદ્રું સત્યભામાભવનભુવિ સૃજન્ દ્વ્યષ્ટસાહસ્રયોષાઃ
સ્વીકૃત્ય પ્રત્યગારં વિહિતબહુવપુર્લાલયન્ કેલિભેદૈઃ ।
આશ્ચર્યાન્નારદાલોકિતવિવિધગતિસ્તત્ર તત્રાપિ ગેહે
ભૂયઃ સર્વાસુ કુર્વન્ દશ દશ તનયાન્ પાહિ વાતાલયેશ ॥10॥