śrī dakṣiṇāmūrti mālāmantra stavam

|| śrī dakṣiṇāmūrti mālāmantra stavam ||

|| viniyogaḥ ||

asya śrī dakṣiṇāmūrti mālāmantra stavasya brahmā ṛṣiḥ gāyatrī chandaḥ śrīdakṣiṇāmūrtiḥ paramātmā devatā oṃ bījaṃ svāhā śaktiḥ phaṭ kīlakaṃ śrī dakṣiṇāmūrti prasādasiddhyarthaṃ jape viniyogaḥ || āmityādi nyāsaḥ ||

|| dhyānam ||

bhasmavyāpāṇḍurāṅgaḥ śaśiśakaladharo jñānamudrākṣamālā-
-vīṇāpustairvirājatkarakamaladharo yogapaṭṭābhirāmaḥ |
vyākhyāpīṭheniṣaṇṇo munivaranikaraiḥ sevyamānaḥ prasannaḥ
savyālaḥ kṛttivāsāḥ satatamavatu no dakṣiṇāmūrtirīśaḥ ||

lamityādi pañcapūjāṃ kuryāt ||

oṃ sahanāvavatviti śāntiḥ ||

|| mālāmantra stavam (16 svarūpa) ||

oṃ namo bhagavate śrīśuddhadakṣiṇāmūrtaye gurvantevāsivatsalāya gurave sūkṣmarūpāya sadāśivāya nirmalajñānapradāya ṣaḍguṇaparipūrṇāya ṣaṭtriṃśattattvādhikāya mahādeva mahāmunīśvara mahānandarūpa śrīśuddhadakṣiṇāmūrti sadāśiva māmajñānānnivartaya nivartaya sujñāne māṃ pravartaya pravartaya oṃ huṃ phaṭ svāhā || 1 ||

oṃ aiṃ hrīṃ sauḥ oṃ namo bhagavate śrīmedhādakṣiṇāmūrtaye vidyā medhā prajñādāyine pustaka rudrākṣamālādhāriṇe sakalasāmrājyapradāyine parama sadāśiva gurumūrtaye mama catuṣṣaṣṭikalāvidyāḥ prāpaya prāpaya brahmarākṣasagaṇānuoccāṭayoccāṭaya medhāṃ prajñāṃ dāpaya dāpaya oṃ sauḥ hrīṃ aiṃ oṃ huṃ phaṭ svāhā || 2 ||

oṃ aiṃ hrīṃ sauḥ jñānendhanadīptāya jñānāgnijvaladdīptaye ānandājyahaviḥ prīta samyag jñānaṃ prayaccha me sauḥ hrīṃ aiṃ om | oṃ namo bhagavate śrīvidyādakṣiṇāmūrtaye aṃ āṃ ajñānendhanapāvakāya iṃ īṃ icchāvilasavilasanāya uṃ ūṃ bhaktopadravanāśakāya ṛṃ ṝṃ ṛkārasvarūpāya luṃ lūṃ lalāṭānalanetrāya trinetrāya eṃ aiṃ vāgbhavabījasvarūpāya vidyāpradāya oṃ auṃ praṇavātmakāya nādabindukalātītāya aṃ aḥ ṣaṭsvarūpāya vedastutāya śrīvidyādakṣiṇāmūrtaye tubhyaṃ mama sakalavidyājālaṃ dehi dehi dāpaya dāpaya oṃ sauḥ hrīṃ aiṃ oṃ huṃ phaṭ svāhā || 3 ||

oṃ śrīṃ aiṃ hrīṃ śrīṃ oṃ namo bhagavate śrīlakṣmīdakṣiṇāmūrtaye śrāṃ śamitāsurabṛndāya śrīṃ śrīmattripurasundarīparisevita pādāravindayugalāya śrūṃ śamitaśakrādijanabṛndāya dhanurbāṇahastāya khaḍgadharāya paraśuhastāya śraiṃ śreṣṭhajanasaṃstuta guṇabṛndāya surūpāya suravanditāya śrauṃ śrautasmārtādi sakalakarmaphalapradāya śarīrarakṣakāya bhaktaśatruvināśakāya divyamaṅgalavigrahāya hrīṃ hrīmatīparisevitāya aṣṭaiśvarya saṃstutāya lakṣmīpradāya lalitāmanorañjanāya śrīlakṣmīdakṣiṇāmūrtaye tubhyaṃ sadāśiva mama sakalaiśvaryaṃ dehi dehi dāpaya dāpaya dāridryapīḍitaṃ māmāpyāyaya āpyāyaya oṃ śrīṃ hrīṃ aiṃ śrīṃ oṃ huṃ phaṭ svāhā || 4 ||

oṃ aiṃ hrīṃ sauḥ oṃ namo bhagavate śrīvāgīśvarābhidhāna śrīdakṣiṇāmūrtaye hrāṃ hrīṃ hrūṃ hraiṃ hrauṃ hraḥ sakalanigamārādhita divyapīṭhasthita sakalasāmrāḍrūpiṇe vidyānirmita vividhabhūṣaṇa bhūṣitāya drāṃ drīṃ drūṃ draiṃ drauṃ draḥ dāridryāraṇyadavānalāya garuḍavāhanasodarī manorañjanāya sāṃ sīṃ sūṃ saiṃ sauṃ saḥ sakalalokaikadīpakāya tejomayāya tejorūpāya bhaktāpadvinivāraṇāya apasmārottamāṅganihita savyapāda saroruhāya sakaladuritaughabhañjanāya duṣṭavidūrāya śrīvāgīśvarābhidhāna dakṣiṇāmūrtaye tubhyaṃ bhaktānāṃ vāgvijayaṃ dehi dehi dāpaya dāpaya sphuṭavāgvilāsaṃ sabhājayaṃ kuru kuru oṃ sauḥ hrīṃ aiṃ oṃ huṃ phaṭ svāhā || 5 ||

oṃ hrīṃ hrāṃ oṃ namo bhagavate vaṭamūlanivāsābhidhāna śrīdakṣiṇāmūrtaye śrīṃ śyāmalāmbā vīṇāgānāsaktamanaskāya niścalāya nirmalāya hrīṃ gāyaka manobhīṣṭaphaladāya gānavinodāya phaṇābhūṣaṇāya ratnakirīṭāñcitasuśiraskāya candrakalāvataṃsāya aiṃ sakalanigamārādhita divyapādasaroruhāya somāya ādityānalanetrāya oṃ tattvajñāya tattvamayāya tāpasārādhita divyadehāya āṃ aruṇāruṇa kausumbhāmbarābharaṇāya amarakāminī kadamba pāṇisaroruha saṃsthita cāmara saṃvījitāya klīṃ kāmamadāpaharaṇāya kāmitārthaphalapradāya kamalāsanavanditāya kaṭākṣacandrikāsakta bhaktacakorāya vaṭamūlanivāsābhidhāna śrīdakṣiṇāmūrtaye tubhyaṃ mama caturvidhapuruṣārthān pradehi pradehi putrapautrādi sakalasampadaḥ pradehi pradehi oṃ hrāṃ hrīṃ oṃ huṃ phaṭ svāhā || 6 ||

oṃ aiṃ klīṃ sauḥ namaḥ śivāya oṃ namo bhagavate śrīsāmbadakṣiṇāmūrtaye aiṃ aiṅkārapīṭhasthāmbā manorañjanāya oṃ jñānaikaniratāya jñānapradāya jñānagamyāya jñānaikagocarāya jñānaikanirata munisaṃsevita pādayugalāya klīṃ kamalālayāprāṇanāyaka netrasaroruhasampūjita pādayugalāya namaḥ bhaktābhīṣṭapradāyaka kalpabhūbhujāya sauḥ sūryaniśākaranirmita rathacakrāya śivāya śivamayāya śivāsaktavāmabhāgāya klīṃ kamalāsanasārathaye bhūnirmitarathāya nigamarathāśvāya merupinākanāmaka cāpayugaladharāya jalanidhitūṇāya kamalāmanonāyakacarāya viṣadharanāthajyādhanuṣkāya triśūladharāya tripurāntakāya śrīsāmbadakṣiṇāmūrtaye tubhyaṃ mama dharmārthakāmamokṣākhya caturvidhapuruṣārthān dehi dehi dāpaya dāpaya māmāpyāyaya āpyāyaya māmānandaya ānandaya māmurarīkuru urarīkuru oṃ śivāya namaḥ sauḥ klīṃ aiṃ oṃ huṃ phaṭ svāhā || 7 ||

oṃ aṃ hrīṃ oṃ hrīṃ hauṃ oṃ namo bhagavate śrīhaṃsadakṣiṇāmūrtaye śivāya mahādevāya oṃ āṃ hrīṃ oṃ hrīṃ hauṃ aryamṇe somāyānalanetrāya andhakasaṃhārakāya oṃ iṃ hrīṃ oṃ hrīṃ hauṃ rudrāya asuranāśakāya mitrāya oṃ īṃ hrīṃ oṃ hrīṃ hauṃ śaṅkarāya śaśāṅkaśekharāya varuṇāya oṃ uṃ hrīṃ oṃ hrīṃ hauṃ nīlalohitāya śambhave sadāśivāya oṃ ūṃ hrīṃ oṃ hrīṃ hauṃ īśānāya bhargāya bhavanāśanāya oṃ eṃ hrīṃ oṃ hrīṃ hauṃ vijayāya vivasvate virūpākṣāya oṃ aiṃ hrīṃ oṃ hrīṃ hauṃ bhīmāya indrāya kāmitārthapradāya oṃ oṃ hrīṃ oṃ hrīṃ hauṃ kapardine pūṣṇe viśvatomukhāya oṃ auṃ hrīṃ oṃ hrīṃ hauṃ varuṇāya parjanyāya tārādhipabhūṣaṇāya oṃ aṃ hrīṃ oṃ hrīṃ hauṃ sthāṇave tvaṣṭre nīlalohitāya oṃ aḥ hrīṃ oṃ hrīṃ hauṃ nīlakaṇṭhāya nirmalāya nirañjanāya viṣṇave sadāśivāya śrīhaṃsadakṣiṇāmūrtaye tubhyaṃ mahyaṃ medhāṃ prajñāṃ vidyāṃ dehi dehi dāpaya dāpaya oṃ hauṃ hrīṃ oṃ hrīṃ aṃ oṃ huṃ phaṭ svāhā || 8 ||

oṃ hrāṃ oṃ hrīṃ oṃ hrūṃ oṃ hraiṃ oṃ hrauṃ oṃ hraḥ oṃ namo bhagavate śrīlakuṭadakṣiṇāmūrtaye vibudhavanditavigrahāya śukādyanekamuniparivṛtāya nīlakaṇṭhāya kuṭhārapāṇaye trinetrāya daityakulanirnāśakāya sujanarakṣakāya dvijavarasevitāya phaṇibhūṣaṇāya nigamasambodhitāharmukhāya nirupamāya nirguṇāya nijabhaktarakṣakāya nikhila sukhaika nidānabhūtāya sundarāya jñānapradāya kamalāsanaparisevitāya ratnakirīṭāya viṣadharakuṇḍalāya dvijarājakalāvataṃsāya phaṇihārāya bhujagarājakaṅkaṇāya nigamavirājitamañjīrāya sakalaiśvaryapradāya śrīlakuṭadakṣiṇāmūrtaye tubhyaṃ mama sakalaiśvaryaṃ dehi dehi dāpaya dāpaya niravacchinnasukhaṃ dehi dehi dāpaya dāpaya dāridryāmayataptaṃ māmujjīvayojjīvaya saṃsārārṇavamagnaṃ māmuddharoddhara oṃ hraḥ oṃ hrauṃ oṃ hraiṃ oṃ hrūṃ oṃ hrīṃ oṃ hrāṃ oṃ huṃ phaṭ svāhā || 9 ||

oṃ aiṃ klīṃ sauḥ śrīṃ hrīṃ oṃ namo bhagavate śrīcidambaradakṣiṇāmūrtaye śriyai jyotirmayāya jyotiḥ svarūpāya sabhāpataye tāṇḍavavinodāya gānāsaktamanaskāya nāgendracarmadharāya nāgabhūṣaṇāya diṅnāgaparisevitāya sakalabṛndāraka bṛndavandyamāna pādāravindayugalāya vanditajagadambāñcita vāmabhāgāya pramadhānekānītānokahasūna samarcitāya pradoṣakṛtatāṇḍavāya jaganmaṅgalāparisevitā muktākapālāñcita ratnakirīṭāya raghupatimanaḥ puṇḍarīkāñcita divyacañcarīkāya dhavalāṅgāya piṅgalajaṭājūṭāya ravicandrānalanetrāya śrīcidambaradakṣiṇāmūrtaye tubhyaṃ mama caturvidhapuruṣārthān dehi dehi dāpaya dāpaya oṃ hrīṃ śrīṃ sauḥ klīṃ aiṃ oṃ huṃ phaṭ svāhā || 10 ||

oṃ hrāṃ hrīṃ hrūṃ kheṃ kheṃ kheṃ oṃ namo bhagavate śrīvīravijayapratāpa jvālānalanetrāya śrīvīradakṣiṇāmūrtaye śūla ṭaṅka gadā śakti bhiṇḍivāla musala mudgara prāsa parighānekāyudhahastāya hrāṃ hrīṃ hrūṃ tripurasaṃhārakāya jvālānalatulyabāṇāya tīkṣṇapinākāyudhāya kheṃ kheṃ kheṃ madanāntakasaṃhārakāya jālandharādyanekāsuranirnāśakāya apasmṛtivināśakāya kroṃ kroṃ kroṃ sakalabhūtagrahākarṣakāya sakalayakṣiṇīgrahākarṣakāya sakalakāminīgrahākarṣakāya sakalastrīgrahākarṣakāya sakalapaiśācikagrahākarṣakāya prayogagrahākarṣakāya hrāṃ hrīṃ hrūṃ kheṃ kheṃ kheṃ sakalabhūtagrahoccāṭanāya sakalarākṣasagrahoccāṭanāya sakalayakṣiṇīgrahoccāṭanāya sakalakāminīgrahoccāṭanāya sakalamohinīgrahoccāṭanāya sakalayakṣagrahoccāṭanāya sakalarākṣasagrahoccāṭanāya sakalapuruṣagrahoccāṭanāya sakalastrīgrahoccāṭanāya sakalapaiśācikagrahoccāṭanāya kheṃ kheṃ kheṃ sakalaprayogagrahoccāṭanāya sarvagrahoccāṭanāya śrīvīravijayapratāpa jvālānalanetra śrīvīradakṣiṇāmūrtaye tubhyaṃ mamopadravān nāśaya nāśaya corānnāśaya nāśaya mama śatrūnnāśaya nāśaya bhūta bhetāla mārīcagaṇa brahmarākṣasānnirmūlaya nirmūlaya rākṣasagrahānuccāṭayoccāṭaya | tāmasagrahānuccāṭayoccāṭaya rājasagrahānuccāṭayoccāṭaya sattvagrahānuccāṭayoccāṭaya sarvagrahānuccāṭayoccāṭaya māmuddharoddhara māmānandayānandaya oṃ kheṃ kheṃ kheṃ hrūṃ hrīṃ hrāṃ oṃ huṃ phaṭ svāhā || 11 ||

oṃ jūṃ saḥ aiṃ hrīṃ śrīṃ śrīṃ hrīṃ aiṃ oṃ hrīṃ hauṃ oṃ namo bhagavate śrīvīrabhadradakṣiṇāmūrtaye śrīmahāsiṃhāsanādhīśvarāya śrītrijaganmohanalīlāvatārāya śrīsarvajanatāvaśaṅkarāya sarvarājavaśaṅkarāya sādhyasādhakāya sarvastrīvaśaṅkarāya trijagadvaśyakarāya dakṣādhvaravināśakāya dhavalaśarīrāya daśarathasutaparisevitāya dāritāsuranikarāya dāridryanirmūlanāya śatrusaṃhārakāya tīkṣṇanakhadaṃṣṭrāya jvaladagnisavarṇanetrāya prāsaparighādyanekāyudhahastāya anekapiśācaparisevita pārśvayugalāya pādanyāsavicālita bhūmaṇḍalāyordhvakeśāya saṃhāritānekāsurabṛndāya surasaṃstutāya suravarapradāya sarvopadravanāśakāya śrīvīrabhadradakṣiṇāmūrtaye tubhyaṃ mama rāja prajā vaśaṃ kuru kuru mama sundarī vaśaṃ kuru kuru mama tiryaṅmanuṣyādi sakala vaśaṃ kuru kuru oṃ hauṃ hrīṃ oṃ aiṃ hrīṃ śrīṃ śrīṃ hrīṃ aiṃ saḥ jūṃ oṃ huṃ phaṭ svāhā || 12 ||

oṃ aiṃ hrīṃ oṃ oṃ hrīṃ aiṃ oṃ namo bhagavate śrīkīrtidakṣiṇāmūrtaye sakalabhuvanaikadīpakāya sakalasurāsurārādhyāya sucaritrāya suślokāya bhaktasulabhāya bhāvanāgamyāya bhānumaṇḍaladīpanāya bhadrakālīnamaskṛtacaraṇāya ramāpatisevitāya rāghavasamārādhita divyacaraṇayugalāya agastyavanditāya vālakhilyādi munivarasupūjitāya suranāyaka saṃstuta gaṇabṛndāya yadupatirakṣakāya yamaniyamādi pariniṣṭhāya paramapuruṣāya pativratāsaṃstuta suyaśaskāya śrīkīrtidakṣiṇāmūrtaye tubhyaṃ mama sukīrtiṃ dehi dehi dāpaya dāpaya susthirāṃ śriyaṃ dehi dehi dāpaya dāpaya oṃ aiṃ hrīṃ oṃ oṃ hrīṃ aiṃ oṃ huṃ phaṭ svāhā || 13 ||

oṃ oṃ oṃ vaṃ vaṃ vaṃ oṃ namo bhagavate śrībrahmadakṣiṇāmūrtaye jyotirmayāya nānārūpavarjitāya nādabindukalātītāya sattvarajastamo'tītāya guṇātmakāya guṇaprakāśakāya jñānagamyāya jñānaikanirataparisevita pādayugalāya svacchāya nirmalāya nirupamavaibhavāya nirantarāya nijabhaktasaṃrakṣakāya nigamabodhitāya nigamapratipādyāya nigamarakṣakāya nigamaśikhāsaṃstutaguṇavaibhavāya varadāya variṣṭhāya vaśiṣṭhādimunisaṃstutāya śrībrahmadakṣiṇāmūrtaye tubhyaṃ mama susthirajñānaṃ dehi dehi dāpaya dāpaya mama sakala sāmrājyādi susthira sakalaiśvaryaṃ dehi dehi dāpaya dāpaya oṃ vaṃ vaṃ vaṃ oṃ oṃ oṃ huṃ phaṭ svāhā || 14 ||

oṃ aiṃ klīṃ sauḥ sauḥ klīṃ aiṃ oṃ namo bhagavate śrīśaktidakṣiṇāmūrtaye sakalajaganmohanāya ādhyātmikaduḥkhanikṛntanāya himaśailasutāmanorañjanāya amitatejomaṇḍalāya tejaḥsvarūpāya prakṛtiviviktakāya māyāśrayāya māyikamanaśchedakāya amāyaka pūjāparituṣṭamanaskāya sucaritrāya duṣṭavidūrāya durārādhyāya dūrvāsapūjita pādayugalāya paramakāruṇikāya kaṭākṣacandrikāsakta bhaktamanaścakorāya susthirāya sthirasthānapradāya sthiraparipālakāya sthāvararūpāya strīpuruṣasvarūpāya śrīśaktidakṣiṇāmūrtaye tubhyaṃ mama sakaladharmārthakāmamokṣākhya caturvidhapuruṣārthasuphalaṃ dehi dehi dāpaya dāpaya sarvato māṃ rakṣa rakṣa oṃ aiṃ klīṃ sauḥ sauḥ klīṃ aiṃ oṃ huṃ phaṭ svāhā || 15 ||

oṃ hsauṃ oṃ hsauṃ oṃ hsauṃ oṃ namo bhagavate śrīsiddhadakṣiṇāmūrtaye aṃ āṃ iṃ īṃ uṃ ūṃ ṛṃ ṝṃ luṃ lūṃ eṃ aiṃ oṃ auṃ aṃ aḥ śrīmattripurasundarīsamyuktavāmabhāgāya kaṃ khaṃ gaṃ ghaṃ ṅaṃ brahmavidyāpradāya sāṅkhyavedaniratasusevitāya caṃ chaṃ jaṃ jhaṃ ñaṃ muktājālapariṣkṛta suvarṇanirmitadivyachatrāya ṭaṃ ṭhaṃ ḍaṃ ḍhaṃ ṇaṃ cāmaravyajanāsakta kamalāsana padmalocana samāśrita pārśvayugalāya taṃ thaṃ daṃ dhaṃ naṃ suravarasaṃsevitāya paṃ phaṃ baṃ bhaṃ maṃ vijayapradāya vīrasamārādhita vaśiṣṭhādimunisaṅghasaṃstutāya śrīsiddhadakṣiṇāmūrtaye tubhyaṃ mama sakalapuruṣārthasiddhiṃ dehi dehi dāpaya dāpaya mama sukalatraputrādikaṃ dehi dehi dāpaya dāpaya oṃ hsauṃ oṃ hsauṃ oṃ hsauṃ oṃ huṃ phaṭ svāhā || 16 ||

oṃ sahanāvavatviti śāntiḥ ||

|| phalaśruti ||

mantraṣoḍaśasamyuktaṃ mālāmantrastavaṃ priye |
yaḥ paṭhetsatataṃ bhaktyā tasya śrīḥ sarvato bhavet || 1 ||

paṭhedanudinaṃ yastu mālāmantrastavaṃ naraḥ |
tasya sarvāṇi kāryāṇi karasthāni na saṃśayaḥ || 2 ||

hṛdayaṃ prajapedādau tato mantraṃ japetpriye |
mantraṣoḍaśasamyuktaṃ mālāmantrastavaṃ tataḥ || 3 ||

tato varṇāvalīstotraṃ prajapetkamalālaye |
yāvajjīvaṃ japenmantraṃ dakṣiṇāmūrtituṣṭaye || 4 ||

ṣaḍvargasahito mantraḥ sarvasaukhyapradāyakaḥ |
niyamenaiva japtavyo niyamaḥ sarvakāmadhuk || 5 ||

niyamaṃ yaḥ parityajya japenmantravaraṃ naraḥ |
sa mṛtyuṃ śīghramāpnoti satyaṃ satyaṃ mayoditam || 6 ||

krameṇaiva japeddevi mantrāṅgāni vicakṣaṇaḥ |
viṣameva japedyastu kramaṃ santyajya sundari || 7 ||

so'cirānmṛtyumāpnoti hyalakṣmīko bhaveddhṛvam |
aṅgahīnastu yo mantraḥ sa sarvārthavināśakaḥ || 8 ||

pravakṣyāmi surārādhye mantrasyāṅgāni vai śṛṇu |
priye mantrasya hṛdayaṃ mukhamityucyate budhaiḥ || 9 ||

mālāmantrastavaścāsya cakṣuṣī kamalālaye |
varṇāvalīstavaścāsya śrotraṃ ceti pracakṣate || 10 ||

trijaganmohanaṃ nāma kavacaṃ mantravigraham |
hastadvayamiti proktaṃ nāmnāmaṣṭottaraṃ śatam || 11 ||

nāsike tu surārādhye mantrajñaiḥ parikīrtitam |
nāmnāṃ sahasraṃ kamale pādadvayamitīritam || 12 ||

mantramūrteḥ ṣaḍaṅgāni kramādetāni sundari |
etaiḥ ṣaḍaṅgaiḥ sahito mantraḥ sarvārthadāyakaḥ || 13 ||

vakṣyāmi śṛṇu deveśi mantravarṇakramaṃ śubham |
uṣaḥkāle samutthāya śayanāddharivallabhe || 14 ||

pādau prakṣālya cācamya niyamena samāhitaḥ |
kuśāsane samāsīno dhyātvā śrīgurupādukām || 15 ||

tataḥ stutvā surārādhyaṃ devadevaṃ trilocanam |
stotrairvedāntasadṛśaistataḥ prātarbhavaṃ caret || 16 ||

tataḥ snātvā ca vidhivannadyāṃ sandhyāṃ samācaret |
tataḥ śrīdakṣiṇāmūrterhṛdayaṃ parijapya ca || 17 ||

mantraṃ samyagjapedbāle mālāmantrastavaṃ tataḥ |
śrīdakṣiṇāmūrtimantraṃ kalpoktavidhinā yajet || 18 ||

sahasranāmabhiḥ pūjya naivedyādīn samarpya ca |
stutvā stotrairanekaiśca tataḥ kuryāt kṣamārpaṇam || 19 ||

evaṃ dine dine kāryaṃ dakṣiṇāmūrtiśarmaṇaḥ |
mantradhyānādikaṃ pūjāṃ sarvasaubhāgyasiddhaye || 20 ||

evaṃ yaḥ kurute nityaṃ tasya devaḥ prasīdati |
tasya devāḥ prasīdanti brahmaviṣṇvādayaḥ priye || 21 ||

vināyakauśca śāmyanti lakṣmīrbhavati susthirā |
mantraṣoḍaśasamyuktaṃ mālāmantrastavaṃ priye || 22 ||

paṭhedanudinaṃ yastu tasya gehe ramā sthitā |
rājyasiddhiṃ khecaratvaṃ vidyāsiddhiṃ śriyaṃ sthirām || 23 ||

mālāmantrastavaṃ japtvā prāpnoti bhuvi mānavaḥ |
imaṃ mālāmantrayutaṃ stotraṃ dugdhābdhisambhave || 24 ||

sarvābhīṣṭapradaṃ guhyaṃ sarvopadravanāśanam |
jñānavairāgyabhaktīnāmādhāraṃ munisaṃstutam || 25 ||

amaṅgalaghnaṃ pāpaghnaṃ yajñadānaphalapradam |
maharṣaya siddhimīyuḥ kṛṣṇadvaipāyanādayaḥ || 26 ||

parāśaro nāradādyāstathā sarve maharṣayaḥ |
muktiṃ gatāśca paṭhanāddevagandharvadānavāḥ || 27 ||

siddhāḥ sādhyāśca yakṣāśca paṭhanānmuktimāpnuyuḥ |
indrādyāḥ prāpnuyuḥ sarve muktiṃ bhuktiṃ tathā'pare || 28 ||

īśvarādyāstathaiśvaryaṃ bhuktiṃ muktimavāpnuyuḥ |
brahmādayastathaiśvaryaṃ paṭhanāddhāraṇādapi || 29 ||

aśvamedhasahasrāṇi vājapeyaśatāni ca |
mahādānāni yānyeva prādakṣiṇyaṃ bhuvastathā || 30 ||

kalāṃ nārhanti kamale ṣoḍaśīṃ vā'pyasundari |
yasya gehe tu likhitaṃ mālāmantrastavaṃ ca tat |
tasya gehe ramādevīpūtaṃ hi daśayojanam || 31 ||