ଶ୍ରୀ ଵିଷ୍ଣୁ ପଞ୍ଜର ସ୍ତୋତ୍ରମ୍

ଓଁ ଅସ୍ଯ ଶ୍ରୀଵିଷ୍ଣୁପଞ୍ଜରସ୍ତୋତ୍ର ମହାମନ୍ତ୍ରସ୍ଯ ନାରଦ ଋଷିଃ । ଅନୁଷ୍ଟୁପ୍ ଛନ୍ଦଃ । ଶ୍ରୀଵିଷ୍ଣୁଃ ପରମାତ୍ମା ଦେଵତା । ଅହଂ ବୀଜମ୍ । ସୋହଂ ଶକ୍ତିଃ । ଓଁ ହ୍ରୀଂ କୀଲକମ୍ । ମମ ସର୍ଵଦେହରକ୍ଷଣାର୍ଥଂ ଜପେ ଵିନିଯୋଗଃ ।
ନାରଦ ଋଷଯେ ନମଃ ମୁଖେ । ଶ୍ରୀଵିଷ୍ଣୁପରମାତ୍ମଦେଵତାଯୈ ନମଃ ହୃଦଯେ । ଅହଂ ବୀଜଂ ଗୁହ୍ଯେ । ସୋହଂ ଶକ୍ତିଃ ପାଦଯୋଃ । ଓଁ ହ୍ରୀଂ କୀଲକଂ ପାଦାଗ୍ରେ । ଓଁ ହ୍ରାଂ ହ୍ରୀଂ ହ୍ରୂଂ ହ୍ରୈଂ ହ୍ରୌଂ ହ୍ରଃ ଇତି ମନ୍ତ୍ରଃ ।
ଓଁ ହ୍ରାଂ ଅଙ୍ଗୁଷ୍ଠାଭ୍ଯାଂ ନମଃ ।
ଓଁ ହ୍ରୀଂ ତର୍ଜନୀଭ୍ଯାଂ ନମଃ ।
ଓଁ ହ୍ରୂଂ ମଧ୍ଯମାଭ୍ଯାଂ ନମଃ ।
ଓଁ ହ୍ରୈଂ ଅନାମିକାଭ୍ଯାଂ ନମଃ ।
ଓଁ ହ୍ରୌଂ କନିଷ୍ଠିକାଭ୍ଯାଂ ନମଃ ।
ଓଁ ହ୍ରଃ କରତଲକରପୃଷ୍ଠାଭ୍ଯାଂ ନମଃ ।
ଇତି କରନ୍ଯାସଃ ।
ଓଁ ହ୍ରାଂ ହୃଦଯାଯ ନମଃ ।
ଓଁ ହ୍ରୀଂ ଶିରସେ ସ୍ଵାହା ।
ଓଁ ହ୍ରୂଂ ଶିଖାଯୈ ଵଷଟ୍ ।
ଓଁ ହ୍ରୈଂ କଵଚାଯ ହୁମ୍ ।
ଓଁ ହ୍ରୌଂ ନେତ୍ରତ୍ରଯାଯ ଵୌଷଟ୍ ।
ଓଁ ହ୍ରଃ ଅସ୍ତ୍ରାଯ ଫଟ୍ ।
ଇତି ଅଙ୍ଗନ୍ଯାସଃ ।
ଅହଂ ବୀଜଂ ପ୍ରାଣାଯାମଂ ମନ୍ତ୍ରତ୍ରଯେଣ କୁର୍ଯାତ୍ ।
ଧ୍ଯାନମ୍ ।
ପରଂ ପରସ୍ମାତ୍ପ୍ରକୃତେରନାଦିମେକଂ ନିଵିଷ୍ଟଂ ବହୁଧା ଗୁହାଯାମ୍ ।
ସର୍ଵାଲଯଂ ସର୍ଵଚରାଚରସ୍ଥଂ ନମାମି ଵିଷ୍ଣୁଂ ଜଗଦେକନାଥମ୍ ॥ 1 ॥

ଓଁ ଵିଷ୍ଣୁପଞ୍ଜରକଂ ଦିଵ୍ଯଂ ସର୍ଵଦୁଷ୍ଟନିଵାରଣମ୍ ।
ଉଗ୍ରତେଜୋ ମହାଵୀର୍ଯଂ ସର୍ଵଶତ୍ରୁନିକୃନ୍ତନମ୍ ॥ 2 ॥

ତ୍ରିପୁରଂ ଦହମାନସ୍ଯ ହରସ୍ଯ ବ୍ରହ୍ମଣୋ ହିତମ୍ ।
ତଦହଂ ସମ୍ପ୍ରଵକ୍ଷ୍ଯାମି ଆତ୍ମରକ୍ଷାକରଂ ନୃଣାମ୍ ॥ 3 ॥

ପାଦୌ ରକ୍ଷତୁ ଗୋଵିନ୍ଦୋ ଜଙ୍ଘେ ଚୈଵ ତ୍ରିଵିକ୍ରମଃ ।
ଊରୂ ମେ କେଶଵଃ ପାତୁ କଟିଂ ଚୈଵ ଜନାର୍ଦନଃ ॥ 4 ॥

ନାଭିଂ ଚୈଵାଚ୍ଯୁତଃ ପାତୁ ଗୁହ୍ଯଂ ଚୈଵ ତୁ ଵାମନଃ ।
ଉଦରଂ ପଦ୍ମନାଭଶ୍ଚ ପୃଷ୍ଠଂ ଚୈଵ ତୁ ମାଧଵଃ ॥ 5 ॥

ଵାମପାର୍ଶ୍ଵଂ ତଥା ଵିଷ୍ଣୁର୍ଦକ୍ଷିଣଂ ମଧୁସୂଦନଃ ।
ବାହୂ ଵୈ ଵାସୁଦେଵଶ୍ଚ ହୃଦି ଦାମୋଦରସ୍ତଥା ॥ 6 ॥

କଣ୍ଠଂ ରକ୍ଷତୁ ଵାରାହଃ କୃଷ୍ଣଶ୍ଚ ମୁଖମଣ୍ଡଲମ୍ ।
ମାଧଵଃ କର୍ଣମୂଲେ ତୁ ହୃଷୀକେଶଶ୍ଚ ନାସିକେ ॥ 7 ॥

ନେତ୍ରେ ନାରାଯଣୋ ରକ୍ଷେଲ୍ଲଲାଟଂ ଗରୁଡଧ୍ଵଜଃ ।
କପୋଲୌ କେଶଵୋ ରକ୍ଷେଦ୍ଵୈକୁଣ୍ଠଃ ସର୍ଵତୋଦିଶମ୍ ॥ 8 ॥

ଶ୍ରୀଵତ୍ସାଙ୍କଶ୍ଚ ସର୍ଵେଷାମଙ୍ଗାନାଂ ରକ୍ଷକୋ ଭଵେତ୍ ।
ପୂର୍ଵସ୍ଯାଂ ପୁଣ୍ଡରୀକାକ୍ଷ ଆଗ୍ନେଯ୍ଯାଂ ଶ୍ରୀଧରସ୍ତଥା ॥ 9 ॥

ଦକ୍ଷିଣେ ନାରସିଂହଶ୍ଚ ନୈରୃତ୍ଯାଂ ମାଧଵୋଽଵତୁ ।
ପୁରୁଷୋତ୍ତମୋ ଵାରୁଣ୍ଯାଂ ଵାଯଵ୍ଯାଂ ଚ ଜନାର୍ଦନଃ ॥ 10 ॥

ଗଦାଧରସ୍ତୁ କୌବେର୍ଯାମୀଶାନ୍ଯାଂ ପାତୁ କେଶଵଃ ।
ଆକାଶେ ଚ ଗଦା ପାତୁ ପାତାଲେ ଚ ସୁଦର୍ଶନମ୍ ॥ 11 ॥

ସନ୍ନଦ୍ଧଃ ସର୍ଵଗାତ୍ରେଷୁ ପ୍ରଵିଷ୍ଟୋ ଵିଷ୍ଣୁପଞ୍ଜରଃ ।
ଵିଷ୍ଣୁପଞ୍ଜରଵିଷ୍ଟୋଽହଂ ଵିଚରାମି ମହୀତଲେ ॥ 12 ॥

ରାଜଦ୍ଵାରେଽପଥେ ଘୋରେ ସଙ୍ଗ୍ରାମେ ଶତ୍ରୁସଙ୍କଟେ ।
ନଦୀଷୁ ଚ ରଣେ ଚୈଵ ଚୋରଵ୍ଯାଘ୍ରଭଯେଷୁ ଚ ॥ 13 ॥

ଡାକିନୀପ୍ରେତଭୂତେଷୁ ଭଯଂ ତସ୍ଯ ନ ଜାଯତେ ।
ରକ୍ଷ ରକ୍ଷ ମହାଦେଵ ରକ୍ଷ ରକ୍ଷ ଜନେଶ୍ଵର ॥ 14 ॥

ରକ୍ଷନ୍ତୁ ଦେଵତାଃ ସର୍ଵା ବ୍ରହ୍ମଵିଷ୍ଣୁମହେଶ୍ଵରାଃ ।
ଜଲେ ରକ୍ଷତୁ ଵାରାହଃ ସ୍ଥଲେ ରକ୍ଷତୁ ଵାମନଃ ॥ 15 ॥

ଅଟଵ୍ଯାଂ ନାରସିଂହଶ୍ଚ ସର୍ଵତଃ ପାତୁ କେଶଵଃ ॥
ଦିଵା ରକ୍ଷତୁ ମାଂ ସୂର୍ଯୋ ରାତ୍ରୌ ରକ୍ଷତୁ ଚନ୍ଦ୍ରମାଃ ॥ 16 ॥

ପନ୍ଥାନଂ ଦୁର୍ଗମଂ ରକ୍ଷେତ୍ସର୍ଵମେଵ ଜନାର୍ଦନଃ ।
ରୋଗଵିଘ୍ନହତଶ୍ଚୈଵ ବ୍ରହ୍ମହା ଗୁରୁତଲ୍ପଗଃ ॥ 17 ॥

ସ୍ତ୍ରୀହନ୍ତା ବାଲଘାତୀ ଚ ସୁରାପୋ ଵୃଷଲୀପତିଃ ।
ମୁଚ୍ଯତେ ସର୍ଵପାପେଭ୍ଯୋ ଯଃ ପଠେନ୍ନାତ୍ର ସଂଶଯଃ ॥ 18 ॥

ଅପୁତ୍ରୋ ଲଭତେ ପୁତ୍ରଂ ଧନାର୍ଥୀ ଲଭତେ ଧନମ୍ ।
ଵିଦ୍ଯାର୍ଥୀ ଲଭତେ ଵିଦ୍ଯାଂ ମୋକ୍ଷାର୍ଥୀ ଲଭତେ ଗତିମ୍ ॥ 19 ॥

ଆପଦୋ ହରତେ ନିତ୍ଯଂ ଵିଷ୍ଣୁସ୍ତୋତ୍ରାର୍ଥସମ୍ପଦା ।
ଯସ୍ତ୍ଵିଦଂ ପଠତେ ସ୍ତୋତ୍ରଂ ଵିଷ୍ଣୁପଞ୍ଜରମୁତ୍ତମମ୍ ॥ 20 ॥

ମୁଚ୍ଯତେ ସର୍ଵପାପେଭ୍ଯୋ ଵିଷ୍ଣୁଲୋକଂ ସ ଗଚ୍ଛତି ।
ଗୋସହସ୍ରଫଲଂ ତସ୍ଯ ଵାଜପେଯଶତସ୍ଯ ଚ ॥ 21 ॥

ଅଶ୍ଵମେଧସହସ୍ରସ୍ଯ ଫଲଂ ପ୍ରାପ୍ନୋତି ମାନଵଃ ।
ସର୍ଵକାମଂ ଲଭେଦସ୍ଯ ପଠନାନ୍ନାତ୍ର ସଂଶଯଃ ॥ 22 ॥

ଜଲେ ଵିଷ୍ଣୁଃ ସ୍ଥଲେ ଵିଷ୍ଣୁର୍ଵିଷ୍ଣୁଃ ପର୍ଵତମସ୍ତକେ ।
ଜ୍ଵାଲାମାଲାକୁଲେ ଵିଷ୍ଣୁଃ ସର୍ଵଂ ଵିଷ୍ଣୁମଯଂ ଜଗତ୍ ॥ 23 ॥