ମହାଶାଶ୍ତା ଅନୁଗ୍ରହ କଵଚମ୍

ଭଗଵନ୍ ଦେଵଦେଵେଶ ସର୍ଵଜ୍ଞ ତ୍ରିପୁରାନ୍ତକ ।
ପ୍ରାପ୍ତେ କଲିଯୁଗେ ଘୋରେ ମହାଭୂତୈଃ ସମାଵୃତେ ॥ 1

ମହାଵ୍ଯାଧି ମହାଵ୍ଯାଲ ଘୋରରାଜୈଃ ସମାଵୃତେ ।
ଦୁଃସ୍ଵପ୍ନଶୋକସନ୍ତାପୈଃ ଦୁର୍ଵିନୀତୈଃ ସମାଵୃତେ ॥ 2

ସ୍ଵଧର୍ମଵିରତେମାର୍ଗେ ପ୍ରଵୃତ୍ତେ ହୃଦି ସର୍ଵଦା ।
ତେଷାଂ ସିଦ୍ଧିଂ ଚ ମୁକ୍ତିଂ ଚ ତ୍ଵଂ ମେ ବ୍ରୂହି ଵୃଷଦ୍ଵଜ ॥ 3

ଈଶ୍ଵର ଉଵାଚ-
ଶୃଣୁ ଦେଵି ମହାଭାଗେ ସର୍ଵକଲ୍ଯାଣକାରଣେ ।
ମହାଶାସ୍ତୁଶ୍ଚ ଦେଵେଶି କଵଚଂ ପୁଣ୍ଯଵର୍ଧନମ୍ ॥ 4

ଅଗ୍ନିସ୍ତମ୍ଭ ଜଲସ୍ତମ୍ଭ ସେନାସ୍ତମ୍ଭ ଵିଧାଯକମ୍ ।
ମହାଭୂତପ୍ରଶମନଂ ମହାଵ୍ଯାଧିନିଵାରଣମ୍ ॥ 5

ମହାଜ୍ଞାନପ୍ରଦଂ ପୁଣ୍ଯଂ ଵିଶେଷାତ୍ କଲିତାପହମ୍ ।
ସର୍ଵରକ୍ଷୋତ୍ତମଂ ପୁଂସାଂ ଆଯୁରାରୋଗ୍ଯଵର୍ଧନମ୍ ॥ 6

କିମତୋ ବହୁନୋକ୍ତେନ ଯଂ ଯଂ କାମଯତେ ଦ୍ଵିଜଃ ।
ତଂ ତମାପ୍ନୋତ୍ଯସନ୍ଦେହୋ ମହାଶାସ୍ତୁଃ ପ୍ରସାଦନାତ୍ ॥ 7

କଵଚସ୍ଯ ଋଷିର୍ବ୍ରହ୍ମା ଗାଯତ୍ରୀଃ ଛନ୍ଦ ଉଚ୍ଯତେ ।
ଦେଵତା ଶ୍ରୀମହାଶାସ୍ତା ଦେଵୋ ହରିହରାତ୍ମଜଃ ॥ 8

ଷଡଙ୍ଗମାଚରେଦ୍ଭକ୍ତ୍ଯା ମାତ୍ରଯା ଜାତିଯୁକ୍ତଯା ।
ଧ୍ଯାନମସ୍ଯ ପ୍ରଵକ୍ଷ୍ଯାମି ଶୃଣୁଷ୍ଵାଵହିତା ପ୍ରିଯେ ॥ 9
ଅସ୍ଯ ଶ୍ରୀ ମହାଶାସ୍ତୁଃ କଵଚମନ୍ତ୍ରସ୍ଯ । ବ୍ରହ୍ମା ଋଷିଃ । ଗାଯତ୍ରୀଃ ଛନ୍ଦଃ । ମହାଶାସ୍ତା ଦେଵତା । ହ୍ରାଂ ବୀଜମ୍ । ହ୍ରୀଂ ଶକ୍ତିଃ । ହ୍ରୂଂ କୀଲକମ୍ । ଶ୍ରୀ ମହାଶାସ୍ତୁଃ ପ୍ରସାଦ ସିଦ୍ଧ୍ଯର୍ଥେ ଜପେ ଵିନିଯୋଗଃ ॥
ହ୍ରାଂ ଇତ୍ଯାଦି ଷଡଙ୍ଗନ୍ଯାସଃ ॥
ଧ୍ଯାନମ୍-
ତେଜୋମଣ୍ଡଲମଧ୍ଯଗଂ ତ୍ରିନଯନଂ ଦିଵ୍ଯାମ୍ବରାଲଙ୍କୃତଂ
ଦେଵଂ ପୁଷ୍ପଶରେକ୍ଷୁକାର୍ମୁକ ଲସନ୍ମାଣିକ୍ଯପାତ୍ରାଽଭଯମ୍ ।
ବିଭ୍ରାଣଂ କରପଙ୍କଜୈଃ ମଦଗଜ ସ୍କନ୍ଧାଧିରୂଢଂ ଵିଭୁଂ
ଶାସ୍ତାରଂ ଶରଣଂ ଭଜାମି ସତତଂ ତ୍ରୈଲୋକ୍ଯ ସମ୍ମୋହନମ୍ ॥
ମହାଶାସ୍ତା ଶିରଃ ପାତୁ ଫାଲଂ ହରିହରାତ୍ମଜଃ ।
କାମରୂପୀ ଦୃଶଂ ପାତୁ ସର୍ଵଜ୍ଞୋ ମେ ଶ୍ରୁତିଂ ସଦା ॥ 1
ଘ୍ରାଣଂ ପାତୁ କୃପାଧ୍ଯକ୍ଷଃ ମୁଖଂ ଗୌରୀପ୍ରିଯଃ ସଦା ।
ଵେଦାଧ୍ଯାଯୀ ଚ ମେ ଜିହ୍ଵାଂ ପାତୁ ମେ ଚିବୁକଂ ଗୁରୁଃ ॥ 2
କଣ୍ଠଂ ପାତୁ ଵିଶୁଦ୍ଧାତ୍ମା ସ୍କନ୍ଧୌ ପାତୁ ସୁରାର୍ଚିତଃ ।
ବାହୂ ପାତୁ ଵିରୂପାକ୍ଷଃ କରୌ ତୁ କମଲାପ୍ରିଯଃ ॥ 3
ଭୂତାଧିପୋ ମେ ହୃଦଯଂ ମଧ୍ଯଂ ପାତୁ ମହାବଲଃ ।
ନାଭିଂ ପାତୁ ମହାଵୀରଃ କମଲାକ୍ଷୋଽଵତୁ କଟିମ୍ ॥ 4
ସନୀପଂ ପାତୁ ଵିଶ୍ଵେଶଃ ଗୁହ୍ଯଂ ଗୁହ୍ଯାର୍ଥଵିତ୍ସଦା ।
ଊରୂ ପାତୁ ଗଜାରୂଢଃ ଵଜ୍ରଧାରୀ ଚ ଜାନୁନୀ ॥ 5
ଜଙ୍ଘେ ପାତ୍ଵଙ୍କୁଶଧରଃ ପାଦୌ ପାତୁ ମହାମତିଃ ।
ସର୍ଵାଙ୍ଗଂ ପାତୁ ମେ ନିତ୍ଯଂ ମହାମାଯାଵିଶାରଦଃ ॥ 6
ଇତୀଦଂ କଵଚଂ ପୁଣ୍ଯଂ ସର୍ଵାଘୌଘନିକୃନ୍ତନମ୍ ।
ମହାଵ୍ଯାଧିପ୍ରଶମନଂ ମହାପାତକନାଶନମ୍ ॥ 7
ଜ୍ଞାନଵୈରାଗ୍ଯଦଂ ଦିଵ୍ଯମଣିମାଦିଵିଭୂଷିତମ୍ ।
ଆଯୁରାରୋଗ୍ଯଜନନଂ ମହାଵଶ୍ଯକରଂ ପରମ୍ ॥ 8
ଯଂ ଯଂ କାମଯତେ କାମଂ ତଂ ତମାପ୍ନୋତ୍ଯସଂଶଯଃ ।
ତ୍ରିସନ୍ଧ୍ଯଂ ଯଃ ପଠେଦ୍ଵିଦ୍ଵାନ୍ ସ ଯାତି ପରମାଂ ଗତିମ୍ ॥