śrī nārāyaṇa aṣṭakama

vātsalyādabhayapradānasamayādārttārtinirvāpaṇād
audāryyādaghaśoṣaṇādagaṇitaśreyaḥ padaprāpaṇāt |
sevyaḥ śrīpatireka eva jagatāmete'bhavansākṣiṇaḥ
prahlādaśca vibhīṣaṇaśca karirāṭ pāñcālyahalyādhruvaḥ || 1||

prahlādāsti yadīśvaro vada hariḥ sarvatra me darśaya
staṃbhe caivamiti bruvantamasuraṃ tatrāvirāsīddhariḥ |
vakṣastasya vidārayannijanakhairvātsalyamāpādayan
nārttatrāṇaparāyaṇaḥ sa bhagavānnārāyaṇo me gatiḥ || 2||

śrīrāmo'tra vibhīṣaṇo'yamanagho rakṣobhayādāgataḥ
sugrīvānaya pālayainamadhunā paulastyamevāgatam |
ityuktvā'bhayamasya sarvaviditaṃ yo rāghavo dattavān
ārttatrāṇaparāyaṇaḥ sa bhagavānnārāyaṇo me gatiḥ || 3||

nakragrastapadaṃ samuddhṛtakaraṃ brahmādayo bhoḥ surā
rakṣantāmiti dīnavākyakariṇaṃ deveṣvaśakteṣu yaḥ |
mā bhaiṣīriti tasya nakrahanane cakrāyudhaḥ śrīdharo
hyārttatrāṇaparāyaṇaḥ sa bhagavānnārāyaṇo me gatiḥ || 4||

bhoḥ kṛṣṇācyutaḥ bhoḥ kṛpālaya hare bhoḥ pāṇḍavānāṃ sakhe
kvāsi kvāsi suyodhanādhyapahṛtāṃ bho rakṣa māmāturām |
ityuktto'kṣayavastrasaṃbhṛtatanuryo'pālayaddraupadīm
ārttatrāṇaparāyaṇaḥ sa bhagavānnārāyaṇo me gatiḥ || 5||

yatpādābjanakhodakaṃ trijagatāṃ pāpaughavidhvaṃsanaṃ
yannāmāmṛtapūrakaṃ ca pibatāṃ saṃsārasantārakam |
pāṣāṇo'pi yadaṅighrapaṅkarajasā śāpānmunermocito
hyārttatrāṇaparāyaṇaḥ sa bhagavānnārāyaṇo me gatiḥ || 6||

pitrā bhrātaramuttamāsanagataṃ hyauttānapādirdhruvo
dṛṣṭvā tatsamamārurukṣuradhikaṃ mātrā'vamānaṃ gataḥ |
yaṃ gatvā śaraṇaṃ yadāpa tapasā hemādrisiṃhāsanaṃ
hyārttatrāṇaparāyaṇaḥ sa bhagavānnārāyaṇo me gatiḥ || 7||

ārttā viṣaṇṇāḥ śithilāśca bhītā ghoreśu ca vyādhiśu vartamānāḥ |
saṃkīrtya nārāyaṇaśabdamātraṃ vimuktaduḥkhāḥ sukhino bhavanti || 8||

iti śrīkūreśasvāmiviracitaṃ nārāyaṇāṣṭakaṃ sampūrṇam |