নারাযণীযং দশক 47 - উলূখলবন্ধনম্

একদা দধিবিমাথকারিণীং মাতরং সমুপসেদিবান্ ভবান্ ।
স্তন্যলোলুপতযা নিবারযন্নঙ্কমেত্য পপিবান্ পযোধরৌ ॥1॥

অর্ধপীতকুচকুড্মলে ত্বযি স্নিগ্ধহাসমধুরাননাম্বুজে ।
দুগ্ধমীশ দহনে পরিস্রুতং ধর্তুমাশু জননী জগাম তে ॥2॥

সামিপীতরসভঙ্গসঙ্গতক্রোধভারপরিভূতচেতসা।
মন্থদণ্ডমুপগৃহ্য পাটিতং হন্ত দেব দধিভাজনং ত্বযা ॥3॥

উচ্চলদ্ধ্বনিতমুচ্চকৈস্তদা সন্নিশম্য জননী সমাদ্রুতা ।
ত্বদ্যশোবিসরবদ্দদর্শ সা সদ্য এব দধি বিস্তৃতং ক্ষিতৌ ॥4॥

বেদমার্গপরিমার্গিতং রুষা ত্বমবীক্ষ্য পরিমার্গযন্ত্যসৌ ।
সন্দদর্শ সুকৃতিন্যুলূখলে দীযমাননবনীতমোতবে ॥5॥

ত্বাং প্রগৃহ্য বত ভীতিভাবনাভাসুরাননসরোজমাশু সা ।
রোষরূষিতমুখী সখীপুরো বন্ধনায রশনামুপাদদে ॥6॥

বন্ধুমিচ্ছতি যমেব সজ্জনস্তং ভবন্তমযি বন্ধুমিচ্ছতী ।
সা নিযুজ্য রশনাগুণান্ বহূন্ দ্ব্যঙ্গুলোনমখিলং কিলৈক্ষত ॥7॥

বিস্মিতোত্স্মিতসখীজনেক্ষিতাং স্বিন্নসন্নবপুষং নিরীক্ষ্য তাম্ ।
নিত্যমুক্তবপুরপ্যহো হরে বন্ধমেব কৃপযাঽন্বমন্যথাঃ ॥8॥

স্থীযতাং চিরমুলূখলে খলেত্যাগতা ভবনমেব সা যদা।
প্রাগুলূখলবিলান্তরে তদা সর্পিরর্পিতমদন্নবাস্থিথাঃ ॥9॥

যদ্যপাশসুগমো বিভো ভবান্ সংযতঃ কিমু সপাশযাঽনযা ।
এবমাদি দিবিজৈরভিষ্টুতো বাতনাথ পরিপাহি মাং গদাত্ ॥10॥