ಅಮೋಘ ಶಿವ ಕವಚ

।। ಶ್ರೀಗಣೇಶಾಯ ನಮಃ ।।
ವಿನಿಯೋಗ
ಓಂ ಅಸ್ಯ ಶ್ರೀಶಿವಕವಚಸ್ತೋತ್ರಮಂತ್ರಸ್ಯ ಬ್ರಹ್ಮಾ ಋಷಿಃ ಅನುಷ್ಟಪ್ ಛನ್ದಃ।
ಶ್ರೀಸದಾಶಿವರುದ್ರೋ ದೇವತಾ। ಹ್ರೀಂ ಶಕ್ತಿಃ।
ರಂ ಕೀಲಕಮ್। ಶ್ರೀಂ ಹ್ರೀ ಕ್ಲೀಂ ಬೀಜಮ್।
ಶ್ರೀಸದಾಶಿವಪ್ರೀತ್ಯರ್ಥೇ ಶಿವಕವಚಸ್ತೋತ್ರಜಪೇ ವಿನಿಯೋಗಃ।
ಕರ-ನ್ಯಾಸ
ಓಂ ನಮೋ ಭಗವತೇ ಜ್ವಲಜ್ಜ್ವಾಲಾಮಾಲಿನೇ
ಓಂ ಹ್ಲಾಂಸರ್ವಶಕ್ತಿಧಾಮ್ನೇ ಈಶಾನಾತ್ಮನೇ ಅಂಗುಷ್ಠಾಭ್ಯಾಂ ನಮಃ ।
ಓಂ ನಮೋ ಭಗವತೇ ಜ್ವಲಜ್ಜ್ವಾಲಾಮಾಲಿನೇ
ಓಂ ನಂ ರಿಂ ನಿತ್ಯತೃಪ್ತಿಧಾಮ್ನೇ ತತ್ಪುರುಷಾತ್ಮನೇ ತರ್ಜನೀಭ್ಯಾಂ ನಮಃ ।
ಓಂ ನಮೋ ಭಗವತೇ ಜ್ವಲಜ್ಜ್ವಾಲಾಮಾಲಿನೇ
ಓಂ ಮಂ ರುಂ ಅನಾದಿಶಕ್ತಿಧಾಮ್ನೇ ಅಘೋರಾತ್ಮನೇ ಮಧ್ಯಾಮಾಭ್ಯಾಂ ನಮಃ ।
ಓಂ ನಮೋ ಭಗವತೇ ಜ್ವಲಜ್ಜ್ವಾಲಾಮಾಲಿನೇ
ಓಂ ಶಿಂ ರೈಂ ಸ್ವತಂತ್ರಶಕ್ತಿಧಾಮ್ನೇ ವಾಮದೇವಾತ್ಮನೇ ಅನಾಮಿಕಾಭ್ಯಾಂ ನಮಃ ।
ಓಂ ನಮೋ ಭಗವತೇ ಜ್ವಲಜ್ಜ್ವಾಲಾಮಾಲಿನೇ
ಓಂ ವಾಂರೌಂ ಅಲುಪ್ತಶಕ್ತಿಧಾಮ್ನೇ ಸದ್ಯೋ ಜಾತಾತ್ಮನೇ ಕನಿಷ್ಠಿಕಾಭ್ಯಾಂ ನಮಃ ।
ಓಂ ನಮೋ ಭಗವತೇ ಜ್ವಲಜ್ಜ್ವಾಲಾಮಾಲಿನೇ
ಓಂ ಯಂರಃ ಅನಾದಿಶಕ್ತಿಧಾಮ್ನೇ ಸರ್ವಾತ್ಮನೇ ಕರತಲ ಕರಪೃಷ್ಠಾಭ್ಯಾಂ ನಮಃ।

ವಜ್ರದಂಷ್ಟ್ರಂ ತ್ರಿನಯನಂ ಕಾಲಕಣ್ಠಮರಿನ್ದಮಮ್ ।
ಸಹಸ್ರಕರಮತ್ಯುಗ್ರಂ ವಂದೇ ಶಂಭುಮುಪತಿಮ್ ॥ ೧ ॥

।। ಋಷಭ ಉವಾಚ।।
ಅಥಾಪರಂ ಸರ್ವಪುರಾಣಗುಹ್ಯಂ ನಿಶೇಃಷಪಾಪೌಘಹರಂ ಪವಿತ್ರಮ್ ।
ಜಯಪ್ರದಂ ಸರ್ವವಿಪತ್ಪ್ರಮೋಚನಂ ವಕ್ಷ್ಯಾಮಿ ಶೈವಂ ಕವಚಂ ಹಿತಾಯ ತೇ ॥ ೨ ॥

ನಮಸ್ಕೃತ್ಯ ಮಹಾದೇವಂ ವಿಶ್ವವ್ಯಾಪಿನಮೀಶ್ವರಮ್।
ವಕ್ಷ್ಯೇ ಶಿವಮಯಂ ವರ್ಮ ಸರ್ವರಕ್ಷಾಕರಂ ನೃಣಾಮ್ ॥ ೩ ॥

ಶುಚೌ ದೇಶೇ ಸಮಾಸೀನೋ ಯಥಾವತ್ಕಲ್ಪಿತಾಸನಃ ।
ಜಿತೇನ್ದ್ರಿಯೋ ಜಿತಪ್ರಾಣಶ್ಚಿಂತಯೇಚ್ಛಿವಮವ್ಯಯಮ್ ॥ ೪ ॥

ಹ್ರತ್ಪುಂಡರೀಕ ತರಸನ್ನಿವಿಷ್ಟಂ ಸ್ವತೇಜಸಾ ವ್ಯಾಪ್ತನಭೋವಕಾಶಮ್ ।
ಅತೀಂದ್ರಿಯಂ ಸೂಕ್ಷ್ಮಮನಂತತಾದ್ಯಂಧ್ಯಾಯೇತ್ಪರಾನಂದಮಯಂ ಮಹೇಶಮ್ ॥ ೫ ॥

ಧ್ಯಾನಾವಧೂತಾಖಿಲಕರ್ಮಬನ್ಧಶ್ಚರಂ ಚಿತಾನನ್ದನಿಮಗ್ನಚೇತಾಃ ।
ಷಡಕ್ಷರನ್ಯಾಸಸಮಾಹಿತಾತ್ಮಾ ಶೈವೇನ ಕುರ್ಯಾತ್ಕವಚೇನ ರಕ್ಷಾಮ್ ॥ ೬ ॥

ಮಾಂ ಪಾತು ದೇವೋಽಖಿಲದೇವತ್ಮಾ ಸಂಸಾರಕೂಪೇ ಪತಿತಂ ಗಂಭೀರೇ
ತನ್ನಾಮ ದಿವ್ಯಂ ವರಮಂತ್ರಮೂಲಂ ಧುನೋತು ಮೇ ಸರ್ವಮಘಂ ಹ್ರದಿಸ್ಥಮ್ ॥ ೭ ॥

ಸರ್ವತ್ರಮಾಂ ರಕ್ಷತು ವಿಶ್ವಮೂರ್ತಿರ್ಜ್ಯೋತಿರ್ಮಯಾನಂದಘನಶ್ಚಿದಾತ್ಮಾ ।
ಅಣೋರಣೀಯಾನುರುಶಕ್ತಿರೇಕಃ ಸ ಈಶ್ವರಃ ಪಾತು ಭಯಾದಶೇಷಾತ್ ॥ ೮ ॥

ಯೋ ಭೂಸ್ವರೂಪೇಣ ಬಿರ್ಭೀತ ವಿಶ್ವಂ ಪಾಯಾತ್ಸ ಭೂಮೇರ್ಗಿರಿಶೋಽಷ್ಟಮೂರ್ತಿಃ ।
ಯೋಽಪಾಂಸ್ವರೂಪೇಣ ನೃಣಾಂ ಕರೋತಿ ಸಂಜೀವನಂ ಸೋಽವತು ಮಾಂ ಜಲೇಭ್ಯಃ ॥ ೯ ॥

ಕಲ್ಪಾವಸಾನೇ ಭುವನಾನಿ ದಗ್ಧ್ವಾ ಸರ್ವಾಣಿ ಯೋ ನೃತ್ಯತಿ ಭೂರಿಲೀಲಃ ।
ಸ ಕಾಲರುದ್ರೋಽವತು ಮಾಂ ದವಾಗ್ನೇರ್ವಾತ್ಯಾದಿಭೀತೇರಖಿಲಾಚ್ಚ ತಾಪಾತ್ ॥ ೧೦ ॥

ಪ್ರದೀಪ್ತವಿದ್ಯುತ್ಕನಕಾವಭಾಸೋ ವಿದ್ಯಾವರಾಭೀತಿ ಕುಠಾರಪಾಣಿಃ ।
ಚತುರ್ಮುಖಸ್ತತ್ಪುರುಷಸ್ತ್ರಿನೇತ್ರಃ ಪ್ರಾಚ್ಯಾಂ ಸ್ಥಿತಂ ರಕ್ಷತು ಮಾಮಜಸ್ತ್ರಮ್ ॥ ೧೧ ॥

ಕುಠಾರವೇದಾಂಕುಶಪಾಶಶೂಲಕಪಾಲಢಕ್ಕಾಕ್ಷಗುಣಾನ್ ದಧಾನಃ ।
ಚತುರ್ಮುಖೋನೀಲರುಚಿಸ್ತ್ರಿನೇತ್ರಃ ಪಾಯಾದಘೋರೋ ದಿಶಿ ದಕ್ಷಿಣಸ್ಯಾಮ್ ॥ ೧೨ ॥

ಕುಂದೇಂದುಶಂಖಸ್ಫಟಿಕಾವಭಾಸೋ ವೇದಾಕ್ಷಮಾಲಾ ವರದಾಭಯಾಂಕಃ ।
ತ್ರ್ಯಕ್ಷಶ್ಚತುರ್ವಕ್ರ ಉರುಪ್ರಭಾವಃ ಸದ್ಯೋಧಿಜಾತೋಽವಸ್ತು ಮಾಂ ಪ್ರತೀಚ್ಯಾಮ್ ॥ ೧೩ ॥

ವರಾಕ್ಷಮಾಲಾಭಯಟಂಕಹಸ್ತಃ ಸರೋಜ ಕಿಂಜಲ್ಕಸಮಾನವರ್ಣಃ ।
ತ್ರಿಲೋಚನಶ್ಚಾರುಚತುರ್ಮುಖೋ ಮಾಂ ಪಾಯಾದುದೀಚ್ಯಾ ದಿಶಿ ವಾಮದೇವಃ ॥ ೧೪ ॥

ವೇದಾಭ್ಯೇಷ್ಟಾಂಕುಶಪಾಶ ಟಂಕಕಪಾಲಢಕ್ಕಾಕ್ಷಕಶೂಲಪಾಣಿಃ ।
ಸಿತದ್ಯುತಿಃ ಪಂಚಮುಖೋಽವತಾನ್ಮಾಮೀಶಾನ ಊರ್ಧ್ವಂ ಪರಮಪ್ರಕಾಶಃ ॥ ೧೫ ॥

ಮೂರ್ಧಾನಮವ್ಯಾನ್ಮಮ ಚಂದ್ರಮೌಲಿರ್ಭಾಲಂ ಮಮಾವ್ಯಾದಥ ಭಾಲನೇತ್ರಃ ।
ನೇತ್ರೇ ಮಮಾ ವ್ಯಾದ್ಭಗನೇತ್ರಹಾರೀ ನಾಸಾಂ ಸದಾ ರಕ್ಷತು ವಿಶ್ವನಾಥಃ ॥ ೧೬ ॥

ಪಾಯಾಚ್ಛ್ರ ತೀ ಮೇ ಶ್ರುತಿಗೀತಕೀರ್ತಿಃ ಕಪೋಲಮವ್ಯಾತ್ಸತತಂ ಕಪಾಲೀ ।
ವಕ್ರಂ ಸದಾ ರಕ್ಷತು ಪಂಚವಕ್ರೋ ಜಿಹ್ವಾಂ ಸದಾ ರಕ್ಷತು ವೇದಜಿಹ್ವಃ ॥ ೧೭ ॥

ಕಂಠಂ ಗಿರೀಶೋಽವತು ನೀಲಕಣ್ಠಃ ಪಾಣಿಃ ದ್ವಯಂ ಪಾತುಃ ಪಿನಾಕಪಾಣಿಃ ।
ದೋರ್ಮೂಲಮವ್ಯಾನ್ಮಮ ಧರ್ಮವಾಹುರ್ವಕ್ಷಃಸ್ಥಲಂ ದಕ್ಷಮಖಾತಕೋಽವ್ಯಾತ್ ॥ ೧೮ ॥

ಮನೋದರಂ ಪಾತು ಗಿರೀಂದ್ರಧನ್ವಾ ಮಧ್ಯಂ ಮಮಾವ್ಯಾನ್ಮದನಾಂತಕಾರೀ ।
ಹೇರಂಬತಾತೋ ಮಮ ಪಾತು ನಾಭಿಂ ಪಾಯಾತ್ಕಟಿಂ ಧೂರ್ಜಟಿರೀಶ್ವರೋ ಮೇ ॥ ೧೯ ॥

ಊರುದ್ವಯಂ ಪಾತು ಕುಬೇರಮಿತ್ರೋ ಜಾನುದ್ವಯಂ ಮೇ ಜಗದೀಶ್ವರೋಽವ್ಯಾತ್ ।
ಜಂಘಾಯುಗಂಪುಂಗವಕೇತುಖ್ಯಾತಪಾದೌ ಮಮಾವ್ಯತ್ಸುರವಂದ್ಯಪಾದಃ ॥ ೨೦ ॥

ಮಹೇಶ್ವರಃ ಪಾತು ದಿನಾದಿಯಾಮೇ ಮಾಂ ಮಧ್ಯಯಾಮೇಽವತು ವಾಮದೇವಃ ।
ತ್ರಿಲೋಚನಃ ಪಾತು ತೃತೀಯಯಾಮೇ ವೃಷಧ್ವಜಃ ಪಾತು ದಿನಾಂತ್ಯಯಾಮೇ ॥ ೨೧ ॥

ಪಾಯಾನ್ನಿಶಾದೌ ಶಶಿಶೇಖರೋ ಮಾಂ ಗಂಗಾಧರೋ ರಕ್ಷತು ಮಾಂ ನಿಶೀಥೇ ।
ಗೌರೀ ಪತಿಃ ಪಾತು ನಿಶಾವಸಾನೇ ಮೃತ್ಯುಂಜಯೋ ರಕ್ಷತು ಸರ್ವಕಾಲಮ್ ॥ ೨೨ ॥

ಅನ್ತಃಸ್ಥಿತಂ ರಕ್ಷತು ಶಂಕರೋ ಮಾಂ ಸ್ಥಾಣುಃ ಸದಾಪಾತು ಬಹಿಃ ಸ್ಥಿತ ಮಾಮ್ ।
ತದಂತರೇ ಪಾತು ಪತಿಃ ಪಶೂನಾಂ ಸದಾಶಿವೋರಕ್ಷತು ಮಾಂ ಸಮಂತಾತ್ ॥ ೨೩ ॥

ತಿಷ್ಠತಮವ್ಯಾದ್ಭುವನೈಕನಾಥಃ ಪಾಯಾದ್ವ್ರಜಂತಂ ಪ್ರಥಮಾಧಿನಾಥಃ ।
ವೇದಾಂತವೇದ್ಯೋಽವತು ಮಾಂ ನಿಷಣ್ಣಂ ಮಾಮವ್ಯಯಃ ಪಾತು ಶಿವಃ ಶಯಾನಮ್ ॥ ೨೪ ॥

ಮಾರ್ಗೇಷು ಮಾಂ ರಕ್ಷತು ನೀಲಕಂಠಃ ಶೈಲಾದಿದುರ್ಗೇಷು ಪುರತ್ರಯಾರಿಃ ।
ಅರಣ್ಯವಾಸಾದಿಮಹಾಪ್ರವಾಸೇ ಪಾಯಾನ್ಮೃಗವ್ಯಾಧ ಉದಾರಶಕ್ತಿಃ ॥ ೨೫ ॥

ಕಲ್ಪಾಂತಕೋಟೋಪಪಟುಪ್ರಕೋಪ-ಸ್ಫುಟಾಟ್ಟಹಾಸೋಚ್ಚಲಿತಾಂಡಕೋಶಃ ।
ಘೋರಾರಿಸೇನರ್ಣವದುರ್ನಿವಾರಮಹಾಭಯಾದ್ರಕ್ಷತು ವೀರಭದ್ರಃ ॥ ೨೬ ॥

ಪತ್ತ್ಯಶ್ವಮಾತಂಗಘಟಾವರೂಥಸಹಸ್ರಲಕ್ಷಾಯುತಕೋಟಿಭೀಷಣಮ್ ।
ಅಕ್ಷೌಹಿಣೀನಾಂ ಶತಮಾತತಾಯಿನಾಂ ಛಿಂದ್ಯಾನ್ಮೃಡೋಘೋರ ಕುಠಾರ ಧಾರಯಾ ॥ ೨೭॥

ನಿಹಂತು ದಸ್ಯೂನ್ಪ್ರಲಯಾನಲಾರ್ಚಿರ್ಜ್ವಲತ್ರಿಶೂಲಂ ತ್ರಿಪುರಾಂತಕಸ್ಯ ।
ಶಾರ್ದೂಲ ಸಿಂಹರ್ಕ್ಷವೃಕಾದಿಹಿಂಸ್ರಾನ್ಸಂತ್ರಾಸಯತ್ವೀಶಧನುಃ ಪಿನಾಕಃ ॥ ೨೮ ॥

ದುಃಸ್ವಪ್ನದುಃಶಕುನದುರ್ಗತಿದೌರ್ಮನಸ್ಯರ್ದುರ್ಭಿಕ್ಷದುರ್ವ್ಯಸನದುಃಸಹದುರ್ಯಶಾಂಸಿ ।
ಉತ್ಪಾತತಾಪವಿಷಭೀತಿಮಸದ್ಗ್ರಹಾರ್ತಿ ವ್ಯಾಧೀಂಶ್ಚ ನಾಶಯತು ಮೇ ಜಗತಾಮಧೀಶಃ ॥ ೨೯ ॥

ಓಂ ನಮೋ ಭಗವತೇ ಸದಾಶಿವಾಯ ಸಕಲತತ್ತ್ವಾತ್ಮಕಾಯ
ಸರ್ವಮಂತ್ರಸ್ವರೂಪಾಯ ಸರ್ವಯಂತ್ರಾಧಿಷ್ಠಿತಾಯ ಸರ್ವತಂತ್ರಸ್ವರೂಪಾಯ
ಸರ್ವತ್ತ್ವವಿದೂರಾಯ ಬ್ರಹ್ಮರುದ್ರಾವತಾರಿಣೇ ನೀಲಕಂಠಾಯ
ಪಾರ್ವತೀಮನೋಹರಪ್ರಿಯಾಯ ಸೋಮಸೂರ್ಯಾಗ್ನಿಲೋಚನಾಯ ಭಸ್ಮೋದ್ಧೂಲಿತವಿಗ್ರಹಾಯ
ಮಹಾಮಣಿಮುಕುಟಧಾರಣಾಯ ಮಾಣಿಕ್ಯಭೂಷಣಾಯ
ಸೃಷ್ಟಿಸ್ಥಿತಿಪ್ರಲಯಕಾಲರೌದ್ರಾವತಾರಾಯ ದಕ್ಷಾಧ್ವರಧ್ವಂಸಕಾಯ
ಮಹಾಕಾಲಭೇದನಾಯ ಮೂಲಾಧಾರೈಕನಿಲಯಾಯ ತತ್ತ್ವಾತೀತಾಯ
ಗಂಗಾಧರಾಯ ಸರ್ವದೇವಾಧಿದೇವಾಯ ಷಡಾಶ್ರಯಾಯ ವೇದಾಂತಸಾರಾಯ ತ್ರಿವರ್ಗಸಾಧನಾಯಾನಂತಕೋಟಿಬ್ರಹ್ಮಾಣ್ಡನಾಯಕಾಯಾನಂತವಾಸುಕಿತ
ಕ್ಷಕಕರ್ಕೋಟಕಙ್ಖಕುಲಿಕ ಪದ್ಮ
ಮಹಾಪದ್ಮೇತ್ಯಷ್ಟಮಹಾನಾಗಕುಲಭೂಷಣಾಯಪ್ರಣವಸ್ವರೂಪಾಯ ಚಿದಾಕಾಶಾಯ
ಆಕಾಶದಿಕ್ಸ್ವರೂಪಾಯಗ್ರಹನಕ್ಷತ್ರಮಾಲಿನೇ ಸಕಲಾಯ ಕಲಂಕರಹಿತಾಯ
ಸಕಲಲೋಕೈಕರ್ತ್ರೇ ಸಕಲಲೋಕೈಕಭರ್ತ್ರೇ ಸಕಲಲೋಕೈಕಸಂಹರ್ತ್ರೇ
ಸಕಲಲೋಕೈಕಗುರವೇ ಸಕಲಲೋಕೈಕಸಾಕ್ಷಿಣೇ ಸಕಲನಿಗಮಗುಹ್ಯಾಯ
ಸಕಲ ವೇದಾನ್ತಪಾರಗಾಯ ಸಕಲಲೋಕೈಕವರಪ್ರದಾಯ
ಸಕಲಕೋಲೋಕೈಕಶಂಕರಾಯ ಶಶಾಂಕಶೇಖರಾಯ ಶಾಶ್ವತನಿಜಾವಾಸಾಯ
ನಿರಾಭಾಸಾಯ ನಿರಾಮಯಾಯ ನಿರ್ಮಲಾಯ ನಿರ್ಲೋಭಾಯ
ನಿರ್ಮದಾಯ ನಿಶ್ಚಿಂತಾಯ ನಿರಹಂಕಾರಾಯ ನಿರಂಕುಶಾಯ
ನಿಷ್ಕಲಂಕಾಯ ನಿರ್ಗುಣಾಯ ನಿಷ್ಕಾಮಾಯ ನಿರುಪಪ್ಲವಾಯ
ನಿರವದ್ಯಾಯ ನಿರಂತರಾಯ ನಿಷ್ಕಾರಣಾಯ ನಿರಂತಕಾಯ
ನಿಷ್ಪ್ರಪಂಚಾಯ ನಿಃಸಂಗಾಯ ನಿರ್ದ್ವಂದ್ವಾಯ ನಿರಾಧಾರಾಯ ನೀರಾಗಾಯ
ನಿಷ್ಕ್ರೋಧಾಯ ನಿರ್ಮಲಾಯ ನಿಷ್ಪಾಪಾಯ ನಿರ್ಭಯಾಯ ನಿರ್ವಿಕಲ್ಪಾಯ
ನಿರ್ಭೇದಾಯ ನಿಷ್ಕ್ರಿಯಯ ನಿಸ್ತುಲಾಯ ನಿಃಸಂಶಯಾಯ ನಿರಂಜನಾಯ
ನಿರುಪಮವಿಭವಾಯನಿತ್ಯಶುದ್ಧಬುದ್ಧ ಪರಿಪೂರ್ಣಸಚ್ಚಿದಾನಂದಾದ್ವಯಾಯ
ಪರಮಶಾಂತಸ್ವರೂಪಾಯ ತೇಜೋರೂಪಾಯ ತೇಜೋಮಯಾಯ
ಜಯ ಜಯ ರುದ್ರಮಹಾರೌದ್ರಭದ್ರಾವತಾರ ಮಹಾಭೈರವ ಕಾಲಭೈರವ ಕಲ್ಪಾಂತಭೈರವ
ಕಪಾಲಮಾಲಾಧರ ಖಟ್ವಾಂಗಖಡ್ಗಚರ್ಮಪಾಶಾಂಕುಶಡಮರುಶೂಲಚಾಪಬಾಣಗದಾಶಕ್ತಿ
ಭಿಂದಿಪಾಲತೋಮರಮುಸಲಮುದ್ಗರಪಾಶಪರಿಘ ಭುಶುಣ್ಡೀಶತಘ್ನೀ ಚಕ್ರಾದ್ಯಾಯುಧಭೀಷಣಕರಸಹಸ್ರಮುಖದಂಷ್ಟ್ರಾಕರಾಲವದನವಿ
ಕಟಾಟ್ಟಹಾಸವಿಸ್ಫಾರಿತಬ್ರಹ್ಮಾಂಡಮಂಡಲ ನಾಗೇಂದ್ರಕುಂಡಲ ನಾಗೇಂದ್ರಹಾರ
ನಾಗೇನ್ದ್ರವಲಯ ನಾಗೇಂದ್ರಚರ್ಮಧರಮೃಯುಂಜಯ ತ್ರ್ಯಂಬಕಪುರಾಂತಕ
ವಿಶ್ವರೂಪ ವಿರೂಪಾಕ್ಷ ವಿಶ್ವೇಶ್ವರ ವೃಷಭವಾಹನ ವಿಷವಿಭೂಷಣ
ವಿಶ್ವತೋಮುಖ ಸರ್ವತೋ ರಕ್ಷ ರಕ್ಷ ಮಾಂ ಜ್ವಲ ಜ್ವಲ ಮಹಾಮೃತ್ಯುಮಪಮೃತ್ಯುಭಯಂ
ನಾಶಯನಾಶಯಚೋರಭಯಮುತ್ಸಾದಯೋತ್ಸಾದಯ ವಿಷಸರ್ಪಭಯಂ
ಶಮಯ ಶಮಯ ಚೋರಾನ್ಮಾರಯ ಮಾರಯ ಮಮಶಮನುಚ್ಚಾಟ್ಯೋಚ್ಚಾಟಯತ್ರಿಶೂಲೇನವಿದಾರಯ
ಕುಠಾರೇಣಭಿಂಧಿಭಿಂಭಧಿ ಖಡ್ಗೇನ ಛಿಂಧಿ ಛಿಂಧಿ ಖಟ್ವಾಂಗೇನ
ವಿಪೋಥಯ ವಿಪೋಥಯ ಮುಸಲೇನ ನಿಷ್ಪೇಷಯ ನಿಷ್ಪೇಷಯ ವಾಣೈಃ ಸಂತಾಡಯ ಸಂತಾಡಯ
ರಕ್ಷಾಂಸಿ ಭೀಷಯ ಭೀಷಯಶೇಷಭೂತಾನಿ ನಿದ್ರಾವಯ ಕೂಷ್ಮಾಂಡವೇತಾಲಮಾರೀಚ
ಬ್ರಹ್ಮರಾಕ್ಷಸಗಣಾನ್ಸಂತ್ರಾಸಯ ಸಂತ್ರಾಸಯ ಮಮಾಭಯ ಕುರು ಕುರು
ವಿತ್ರಸ್ತಂ ಮಾಮಾಶ್ವಾಸಯಾಶ್ವಾಸಯ ನರಕಮಹಾಭಯಾನ್ಮಾಮುದ್ಧರಸಂಜೀವಯ
ಸಂಜೀವಯಕ್ಷುತ್ತೃಡ್ಭ್ಯಾಂ ಮಾಮಾಪ್ಯಾಯ-ಆಪ್ಯಾಯ ದುಃಖಾತುರಂ ಮಾಮಾನನ್ದಯಾನನ್ದಯಶಿವಕವಚೇನ ಮಾಮಾಚ್ಛಾದಯಾಚ್ಛಾದಯಮೃತ್ಯುಂಜಯ ತ್ರ್ಯಂಬಕ ಸದಾಶಿವ ನಮಸ್ತೇ ನಮಸ್ತೇ ನಮಸ್ತೇ।
।। ಋಷಭ ಉವಾಚ।।
ಇತ್ಯೇತತ್ಕವಚಂ ಶೈವಂ ವರದಂ ವ್ಯಾಹ್ರತಂ ಮಯಾ ॥

ಸರ್ವಬಾಧಾಪ್ರಶಮನಂ ರಹಸ್ಯಂ ಸರ್ವದೇಹಿನಾಮ್ ॥ ೩೦ ॥

ಯಃ ಸದಾ ಧಾರಯೇನ್ಮರ್ತ್ಯಃ ಶೈವಂ ಕವಚಮುತ್ತಮಮ್ ।
ನ ತಸ್ಯ ಜಾಯತೇ ಕ್ವಾಪಿ ಭಯಂ ಶಂಭೋರನುಗ್ರಹಾತ್ ॥ ೩೧ ॥

ಕ್ಷೀಣಾಯುಅಃಪ್ರಾಪ್ತಮೃತ್ಯುರ್ವಾ ಮಹಾರೋಗಹತೋಽಪಿ ವಾ ॥

ಸದ್ಯಃ ಸುಖಮವಾಪ್ನೋತಿ ದೀರ್ಘಮಾಯುಶ್ಚವಿಂದತಿ ॥ ೩೨ ॥

ಸರ್ವದಾರಿದ್ರ್ಯ ಶಮನಂ ಸೌಮಂಗಲ್ಯವಿವರ್ಧನಮ್ ।
ಯೋ ಧತ್ತೇ ಕವಚಂ ಶೈವಂ ಸದೇವೈರಪಿ ಪೂಜ್ಯತೇ ॥ ೩೩ ॥

ಮಹಾಪಾತಕಸಂಘಾತೈರ್ಮುಚ್ಯತೇ ಚೋಪಪಾತಕೈಃ ।
ದೇಹಾಂತೇ ಮುಕ್ತಿಮಾಪ್ನೋತಿ ಶಿವವರ್ಮಾನುಭಾವತಃ ॥ ೩೪ ॥

ತ್ವಮಪಿ ಶ್ರದ್ಧಯಾ ವತ್ಸ ಶೈವಂ ಕವಚಮುತ್ತಮಮ್
ಧಾರಯಸ್ವ ಮಯಾ ದತ್ತಂ ಸದ್ಯಃ ಶ್ರೇಯೋ ಹ್ಯವಾಪ್ಸ್ಯಸಿ ॥ ೩೫ ॥

॥ ಸೂತ ಉವಾಚ॥

ಇತ್ಯುಕ್ತ್ವಾಋಷಭೋ ಯೋಗೀ ತಸ್ಮೈ ಪಾರ್ಥಿವಸೂನವೇ ।
ದದೌ ಶಂಖಂ ಮಹಾರಾವಂ ಖಡ್ಗಂ ಚಾರಿನಿಷೂದನಮ್ ॥ ೩೬ ॥

ಪುನಶ್ಚ ಭಸ್ಮ ಸಂಮತ್ರ್ಯ ತದಂಗಂ ಪರಿತೋಽಸ್ಪೃಶತ್ ।
ಗಜಾನಾಂ ಷಟ್ಸಹಸ್ರಸ್ಯ ದ್ವಿಗುಣಸ್ಯ ಬಲಂ ದದೌ । ೩೭ ॥

ಭಸ್ಮಪ್ರಭಾವಾತ್ಸಂಪ್ರಾಪ್ತಬಲೈಶ್ವರ್ಯಧೃತಿಸ್ಮೃತಿಃ ।
ಸ ರಾಜಪುತ್ರಃ ಶುಶುಭೇ ಶರದರ್ಕ ಇವ ಶ್ರಿಯಾ ॥ ೩೮ ॥

ತಮಾಹ ಪ್ರಾಂಜಲಿಂ ಭೂಯಃ ಸ ಯೋಗೀ ನೃಪನಂದನಮ್ ।
ಏಷ ಖಡ್ಗೋ ಮಯಾ ದತ್ತಸ್ತಪೋಮಂತ್ರಾನುಭಾವಿತಃ ॥ ೩೯ ॥

ಶಿತಧಾರಮಿಮಂಖಡ್ಗಂ ಯಸ್ಮೈ ದರ್ಶಯಸೇ ಸ್ಫುಟಮ್ ।
ಸ ಸದ್ಯೋ ಮ್ರಿಯತೇಶತ್ರುಃ ಸಾಕ್ಷಾನ್ಮೃತ್ಯುರಪಿ ಸ್ವಯಮ್ ॥ ೪೦ ॥

ಅಸ್ಯ ಶಂಖಸ್ಯ ನಿರ್ಹ್ಲಾದಂ ಯೇ ಶ್ರೃಣ್ವಂತಿ ತವಾಹಿತಾಃ ।
ತೇ ಮೂರ್ಚ್ಛಿತಾಃ ಪತಿಷ್ಯಂತಿ ನ್ಯಸ್ತಶಸ್ತ್ರಾ ವಿಚೇತನಾಃ ॥ ೪೧ ॥

ಖಡ್ಗಶಂಖಾವಿಮೌ ದಿವ್ಯೌ ಪರಸೈನ್ಯ ನಿವಾಶಿನೌ ।
ಆತ್ಮಸೈನ್ಯಸ್ಯಪಕ್ಷಾಣಾಂ ಶೌರ್ಯತೇಜೋವಿವರ್ಧನೋ ॥ ೪೨ ॥

ಏತಯೋಶ್ಚ ಪ್ರಭಾವೇಣ ಶೈವೇನ ಕವಚೇನ ಚ ।
ದ್ವಿಷಟ್ಸಹಸ್ತ್ರನಾಗಾನಾಂ ಬಲೇನ ಮಹತಾಪಿ ಚ ॥ ೪೩ ॥

ಭಸ್ಮಧಾರಣಸಾಮರ್ಥ್ಯಾಚ್ಛತ್ರುಸೈನ್ಯಂ ವಿಜೇಷ್ಯಸಿ ।
ಪ್ರಾಪ್ಯ ಸಿಂಹಾಸನಂ ಪಿತ್ರ್ಯಂ ಗೋಪ್ತಾಸಿ ಪೃಥಿವೀಮಿಮಾಮ್ ॥ ೪೪ ॥

ಇತಿ ಭದ್ರಾಯುಷಂ ಸಮ್ಯಗನುಶಾಸ್ಯ ಸಮಾತೃಕಮ್ ।
ತಾಭ್ಯಾಂ ಪೂಜಿತಃ ಸೋಽಥ ಯೋಗೀ ಸ್ವೈರಗತಿರ್ಯಯೌ ॥ ೪೫ ॥

।। ಇತಿ ಶ್ರೀಸ್ಕಂದಪುರಾಣೇ ಏಕಾಶೀತಿಸಾಹಸ್ತ್ರಯಾಂ ತೃತೀಯೇ
ಬ್ರಹ್ಮೋತ್ತರಖಣ್ಡೇ ಅಮೋಘ-ಶಿವ-ಕವಚಂ ಸಮಾಪ್ತಮ್ ।।