শ্রীনারাযণ উবাচ
রাধা রাসেশ্বরী রাসবাসিনী রসিকেশ্বরী । কৃষ্ণপ্রাণাধিকাঽকৃষ্ণপ্রিযা কৃষ্ণস্বরূপিণী ॥
কৃষ্ণবামাঙ্গসম্ভূতা পরমানন্দরূপিণী । কৃষ্ণা বৃন্দাবনী বৃন্দা বৃন্দাবনবিনোদিনী ॥
চন্দ্রাবলী চন্দ্রকান্তা শরচ্চন্দ্রপ্রভাননা । নামান্যেতানি সারাণি তেষামভ্যন্তরাণি চ ॥
রাধেত্যেবং চ সংসিদ্ধৌ রাকারো দানবাচকঃ । স্বযং নির্বাণদাত্রী যা সা রাধা পরিকীর্তিতা ॥
রাসেশ্বরস্য পত্নীযং তেন রাসেশ্বরী স্মৃতা । রাসে চ বাসো যস্যাশ্চ তেন সা রাসবাসিনী ॥
সর্বাসাং রসিকানাং চ দেবীনামীশ্বরী পরা । প্রবদন্তি পুরা সন্তস্তেন তাং রসিকেশ্বরীম্ ॥
প্রাণাধিকাঽপ্রেযসী সা কৃষ্ণস্য পরমাত্মনঃ । কৃষ্ণপ্রাণাধিকা সা চ কৃষ্ণেন পরিকীর্তিতা ॥
কৃষ্ণস্যাতিপ্রিযা কান্তা কৃষ্ণো বাস্যাঃ প্রিযঃ সদা । সর্বৈর্দেবগণৈরুক্তা তেন কৃষ্ণপ্রিযা স্মৃতা ॥
কৃষ্ণরূপং সংনিধাতুং যা শক্তা চাবলীলযা । সর্বাংশৈঃ কৃষ্ণসদৃশী তেন কৃষ্ণস্বরূপিণী ॥
বামাঙ্গার্ধেন কৃষ্ণস্য যা সম্ভূতা পরা সতী । কৃষ্ণবামাঙ্গসম্ভূতা তেন কৃষ্ণেন কীর্তিতা ॥
পরমানন্দরাশিশ্চ স্বযং মূর্তিমতী সতী । শ্রুতিভিঃ কীর্তিতা তেন পরমানন্দরূপিণী ॥
কৃষির্মোক্ষার্থবচনো ন এবোত্কৃষ্টবাচকঃ । আকারো দাতৃবচনস্তেন কৃষ্ণা প্রকীর্তিতা ॥
অস্তি বৃন্দাবনং যস্যাস্তেন বৃন্দাবনী স্মৃতা । বৃন্দাবনস্যাধিদেবী তেন বাথ প্রকীর্তিতা ॥
সঙ্ঘঃ সখীনাং বৃন্দঃ স্যাদকারোঽপ্যস্তিবাচকঃ । সখিবৃন্দোঽস্তি যস্যাশ্চ সা বৃন্দা পরিকীর্তিতা ॥
বৃন্দাবনে বিনোদশ্চ সোঽস্যা হ্যস্তি চ তত্র বৈ । বেদা বদন্তি তাং তেন বৃন্দাবনবিনোদিনীম্ ॥
নখচন্দ্রাবলী বক্ত্রচন্দ্রোঽস্তি যত্র সংততম্ । তেন চন্দ্রাবলী সা চ কৃষ্ণেন পরিকীর্তিতা ॥
কান্তিরস্তি চন্দ্রতুল্যা সদা যস্যা দিবানিশম্ । সা চন্দ্রকান্তা হর্ষেণ হরিণা পরিকীর্তিতা ॥
শরচ্চন্দ্রপ্রভা যস্যাশ্চাননেঽস্তি দিবানিশম্ । মুনিনা কীর্তিতা তেন শরচ্চন্দ্রপ্রভাননা ॥
ইদং ষোডশনামোক্তমর্থব্যাখ্যানসংযুতম্ । নারাযণেন যদ্দত্তং ব্রহ্মণে নাভিপঙ্কজে ॥
ব্রহ্মণা চ পুরা দত্তং ধর্মায জনকায মে । ধর্মেণ কৃপযা দত্তং মহ্যমাদিত্যপর্বণি ॥
পুষ্করে চ মহাতীর্থে পুণ্যাহে দেবসংসদি । রাধাপ্রভাবপ্রস্তাবে সুপ্রসন্নেন চেতসা ॥
ইদং স্তোত্রং মহাপুণ্যং তুভ্যং দত্তং মযা মুনে । নিন্দকাযাবৈষ্ণবায ন দাতব্যং মহামুনে ॥
যাবজ্জীবমিদং স্তোত্রং ত্রিসংধ্যং যঃ পঠেন্নরঃ । রাধামাধবযোঃ পাদপদ্মে ভক্তির্ভবেদিহ ॥
অন্তে লভেত্তযোর্দাস্যং শশ্বত্সহচরো ভবেত্ । অণিমাদিকসিদ্ধিং চ সম্প্রাপ্য নিত্যবিগ্রহম্ ॥
ব্রতদানোপবাসৈশ্চ সর্বৈর্নিযমপূর্বকৈঃ । চতুর্ণাং চৈব বেদানাং পাঠৈঃ সর্বার্থসংযুতৈঃ ॥
সর্বেষাং যজ্ঞতীর্থানাং করণৈর্বিধিবোধিতৈঃ । প্রদক্ষিণেন ভূমেশ্চ কৃত্স্নাযা এব সপ্তধা ॥
শরণাগতরক্ষাযামজ্ঞানাং জ্ঞানদানতঃ । দেবানাং বৈষ্ণবানাং চ দর্শনেনাপি যত্ ফলম্ ॥
তদেব স্তোত্রপাঠস্য কলাং নার্হতি ষোডশীম্ । স্তোত্রস্যাস্য প্রভাবেণ জীবন্মুক্তো ভবেন্নরঃ ॥
॥ ইতি শ্রীব্রহ্মবৈবর্তমহাপুরাণে শ্রীনারাযণকৃতং রাধাষোডশনামস্তোত্রং সম্পূর্ণম্ ॥