ଶ୍ରୀ ଦକ୍ଷିଣାମୂର୍ଥି ସହସ୍ରନାମ ସ୍ତୋତ୍ରମ୍

ଅସ୍ଯ ଶ୍ରୀଦକ୍ଷିଣାମୂର୍ତି ସହସ୍ରନାମସ୍ତୋତ୍ରସ୍ଯ ବ୍ରହ୍ମା ଋଷିଃ ଅନୁଷ୍ଟୁପ୍ ଛନ୍ଦଃ ଶ୍ରୀଦକ୍ଷିଣାମୂର୍ତିର୍ଦେଵତା ଓଁ ବୀଜଂ ସ୍ଵାହା ଶକ୍ତିଃ ନମଃ କୀଲକଂ ମେଧାଦକ୍ଷିଣାମୂର୍ତି ପ୍ରସାଦସିଦ୍ଧ୍ଯର୍ଥେ ଜପେ ଵିନିଯୋଗଃ ॥
ହ୍ରାମିତ୍ଯାଦିନା ନ୍ଯାସଃ ॥
ଧ୍ଯାନଂ
ସିଦ୍ଧିତୋଯନିଧେର୍ମଧ୍ଯେ ରତ୍ନଗ୍ରୈଵେ ମନୋରମେ ।
କଦମ୍ବଵନିକାମଧ୍ଯେ ଶ୍ରୀମଦ୍ଵଟତରୋରଧଃ ॥ 1 ॥

ଆସୀନମାଦ୍ଯଂ ପୁରୁଷମାଦିମଧ୍ଯାନ୍ତଵର୍ଜିତମ୍ ।
ଶୁଦ୍ଧସ୍ଫଟିକଗୋକ୍ଷୀରଶରତ୍ପୂର୍ଣେନ୍ଦୁଶେଖରମ୍ ॥ 2 ॥

ଦକ୍ଷିଣେ ଚାକ୍ଷମାଲାଂ ଚ ଵହ୍ନିଂ ଵୈ ଵାମହସ୍ତକେ ।
ଜଟାମଣ୍ଡଲସଂଲଗ୍ନଶୀତାଂଶୁକରମଣ୍ଡିତମ୍ ॥ 3 ॥

ନାଗହାରଧରଂ ଚାରୁକଙ୍କଣୈଃ କଟିସୂତ୍ରକୈଃ ।
ଵିରାଜମାନଵୃଷଭଂ ଵ୍ଯାଘ୍ରଚର୍ମାମ୍ବରାଵୃତମ୍ ॥ 4 ॥

ଚିନ୍ତାମଣିମହାବୃନ୍ଦୈଃ କଲ୍ପକୈଃ କାମଧେନୁଭିଃ ।
ଚତୁଃଷଷ୍ଟିକଲାଵିଦ୍ଯାମୂର୍ତିଭିଃ ଶ୍ରୁତିମସ୍ତକୈଃ ॥ 5 ॥

ରତ୍ନସିଂହାସନେ ସାଧୁଦ୍ଵୀପିଚର୍ମସମାଯୁତେ ।
ତତ୍ରାଷ୍ଟଦଲପଦ୍ମସ୍ଯ କର୍ଣିକାଯାଂ ସୁଶୋଭନେ ॥ 6 ॥

ଵୀରାସନେ ସମାସୀନଂ ଲମ୍ବଦକ୍ଷପଦାମ୍ବୁଜମ୍ ।
ଜ୍ଞାନମୁଦ୍ରାଂ ପୁସ୍ତକଂ ଚ ଵରାଭୀତିଧରଂ ହରମ୍ ॥ 7 ॥

ପାଦମୂଲସମାକ୍ରାନ୍ତମହାପସ୍ମାରଵୈଭଵମ୍ ।
ରୁଦ୍ରାକ୍ଷମାଲାଭରଣଭୂଷିତଂ ଭୂତିଭାସୁରମ୍ ॥ 8 ॥

ଗଜଚର୍ମୋତ୍ତରୀଯଂ ଚ ମନ୍ଦସ୍ମିତମୁଖାମ୍ବୁଜମ୍ ।
ସିଦ୍ଧବୃନ୍ଦୈର୍ଯୋଗିବୃନ୍ଦୈର୍ମୁନିବୃନ୍ଦୈର୍ନିଷେଵିତମ୍ ॥ 9 ॥

ଆରାଧ୍ଯମାନଵୃଷଭମଗ୍ନୀନ୍ଦୁରଵିଲୋଚନମ୍ ।
ପୂରଯନ୍ତଂ କୃପାଦୃଷ୍ଟ୍ଯା ପୁମର୍ଥାନାଶ୍ରିତେ ଜନେ ॥ 10 ॥

ଏଵଂ ଵିଭାଵଯେଦୀଶଂ ସର୍ଵଵିଦ୍ଯାକଲାନିଧିମ୍ ॥ 11 ॥
ଲମିତ୍ଯାଦି ପଞ୍ଚୋପଚାରାଃ ॥
ସ୍ତୋତ୍ରଂ
ଓମ୍ । ଦେଵଦେଵୋ ମହାଦେଵୋ ଦେଵାନାମପି ଦେଶିକଃ ।
ଦକ୍ଷିଣାମୂର୍ତିରୀଶାନୋ ଦଯାପୂରିତଦିଙ୍ମୁଖଃ ॥ 1 ॥
କୈଲାସଶିଖରୋତ୍ତୁଙ୍ଗକମନୀଯନିଜାକୃତିଃ ।
ଵଟଦ୍ରୁମତଟୀଦିଵ୍ଯକନକାସନସଂସ୍ଥିତଃ ॥ 2 ॥
କଟୀତଟପଟୀଭୂତକରିଚର୍ମୋଜ୍ଜ୍ଵଲାକୃତିଃ ।
ପାଟୀରପାଣ୍ଡୁରାକାରପରିପୂର୍ଣସୁଧାଧିପଃ ।3 ॥
ଜଟାକୋଟୀରଘଟିତସୁଧାକରସୁଧାପ୍ଲୁତଃ ।
ପଶ୍ଯଲ୍ଲଲାଟସୁଭଗସୁନ୍ଦରଭ୍ରୂଵିଲାସଵାନ୍ ॥ 4 ॥
କଟାକ୍ଷସରଣୀନିର୍ଯତ୍କରୁଣାପୂର୍ଣଲୋଚନଃ ।
କର୍ଣାଲୋଲତଟିଦ୍ଵର୍ଣକୁଣ୍ଡଲୋଜ୍ଜ୍ଵଲଗଣ୍ଡଭୂଃ ॥ 5 ॥
ତିଲପ୍ରସୂନସଙ୍କାଶନାସିକାପୁଟଭାସୁରଃ ।
ମନ୍ଦସ୍ମିତସ୍ଫୁରନ୍ମୁଗ୍ଧମହନୀଯମୁଖାମ୍ବୁଜଃ ॥ 6 ॥
କୁନ୍ଦକୁଡ୍ମଲସଂସ୍ପର୍ଧିଦନ୍ତପଙ୍କ୍ତିଵିରାଜିତଃ ।
ସିନ୍ଦୂରାରୁଣସୁସ୍ନିଗ୍ଧକୋମଲାଧରପଲ୍ଲଵଃ ॥ 7 ॥
ଶଙ୍ଖାଟୋପଗଲଦ୍ଦିଵ୍ଯଗଲଵୈଭଵମଞ୍ଜୁଲଃ ।
କରକନ୍ଦଲିତଜ୍ଞାନମୁଦ୍ରାରୁଦ୍ରାକ୍ଷମାଲିକଃ ॥ 8 ॥
ଅନ୍ଯହସ୍ତତଲନ୍ଯସ୍ତଵୀଣାପୁସ୍ତୋଲ୍ଲସଦ୍ଵପୁଃ ।
ଵିଶାଲରୁଚିରୋରସ୍କଵଲିମତ୍ପଲ୍ଲଵୋଦରଃ ॥ 9 ॥
ବୃହତ୍କଟିନିତମ୍ବାଢ୍ଯଃ ପୀଵରୋରୁଦ୍ଵଯାନ୍ଵିତଃ ।
ଜଙ୍ଘାଵିଜିତତୂଣୀରସ୍ତୁଙ୍ଗଗୁଲ୍ଫଯୁଗୋଜ୍ଜ୍ଵଲଃ ॥ 10 ॥
ମୃଦୁପାଟଲପାଦାବ୍ଜଶ୍ଚନ୍ଦ୍ରାଭନଖଦୀଧିତିଃ ।
ଅପସଵ୍ଯୋରୁଵିନ୍ଯସ୍ତସଵ୍ଯପାଦସରୋରୁହଃ ॥ 11 ॥
ଘୋରାପସ୍ମାରନିକ୍ଷିପ୍ତଧୀରଦକ୍ଷପଦାମ୍ବୁଜଃ ।
ସନକାଦିମୁନିଧ୍ଯେଯଃ ସର୍ଵାଭରଣଭୂଷିତଃ ॥ 12 ॥
ଦିଵ୍ଯଚନ୍ଦନଲିପ୍ତାଙ୍ଗଶ୍ଚାରୁହାସପରିଷ୍କୃତଃ ।
କର୍ପୂରଧଵଲାକାରଃ କନ୍ଦର୍ପଶତସୁନ୍ଦରଃ ॥ 13 ॥
କାତ୍ଯାଯନୀପ୍ରେମନିଧିଃ କରୁଣାରସଵାରିଧିଃ ।
କାମିତାର୍ଥପ୍ରଦଃ ଶ୍ରୀମତ୍କମଲାଵଲ୍ଲଭପ୍ରିଯଃ ॥ 14 ॥
କଟାକ୍ଷିତାତ୍ମଵିଜ୍ଞାନଃ କୈଵଲ୍ଯାନନ୍ଦକନ୍ଦଲଃ ।
ମନ୍ଦହାସସମାନେନ୍ଦୁଶ୍ଛିନ୍ନାଜ୍ଞାନତମସ୍ତତିଃ ॥ 15 ॥
ସଂସାରାନଲସନ୍ତପ୍ତଜନତାମୃତସାଗରଃ ।
ଗମ୍ଭୀରହୃଦଯାମ୍ଭୋଜନଭୋମଣିନିଭାକୃତିଃ ॥ 16 ॥
ନିଶାକରକରାକାରଵଶୀକୃତଜଗତ୍ତ୍ରଯଃ ।
ତାପସାରାଧ୍ଯପାଦାବ୍ଜସ୍ତରୁଣାନନ୍ଦଵିଗ୍ରହଃ ॥ 17 ॥
ଭୂତିଭୂଷିତସର୍ଵାଙ୍ଗୋ ଭୂତାଧିପତିରୀଶ୍ଵରଃ ।
ଵଦନେନ୍ଦୁସ୍ମିତଜ୍ଯୋତ୍ସ୍ନାନିଲୀନତ୍ରିପୁରାକୃତିଃ ॥ 18 ॥
ତାପତ୍ରଯତମୋଭାନୁଃ ପାପାରଣ୍ଯଦଵାନଲଃ ।
ସଂସାରସାଗରୋଦ୍ଧର୍ତା ହଂସାଗ୍ର୍ଯୋପାସ୍ଯଵିଗ୍ରହଃ ॥ 19 ॥
ଲଲାଟହୁତଭୁଗ୍ଦଗ୍ଧମନୋଭଵଶୁଭାକୃତିଃ ।
ତୁଚ୍ଛୀକୃତଜଗଜ୍ଜାଲସ୍ତୁଷାରକରଶୀତଲଃ ॥ 20 ॥
ଅସ୍ତଙ୍ଗତସମସ୍ତେଚ୍ଛୋ ନିସ୍ତୁଲାନନ୍ଦମନ୍ଥରଃ ।
ଧୀରୋଦାତ୍ତଗୁଣାଧାର ଉଦାରଵରଵୈଭଵଃ ॥ 21 ॥
ଅପାରକରୁଣାମୂର୍ତିରଜ୍ଞାନଧ୍ଵାନ୍ତଭାସ୍କରଃ ।
ଭକ୍ତମାନସହଂସାଗ୍ର୍ଯୋ ଭଵାମଯଭିଷକ୍ତମଃ ॥ 22 ॥
ଯୋଗୀନ୍ଦ୍ରପୂଜ୍ଯପାଦାବ୍ଜୋ ଯୋଗପଟ୍ଟୋଲ୍ଲସତ୍କଟିଃ ।
ଶୁଦ୍ଧସ୍ଫଟିକସଙ୍କାଶୋ ବଦ୍ଧପନ୍ନଗଭୂଷଣଃ ॥ 23 ॥
ନାନାମୁନିସମାକୀର୍ଣୋ ନାସାଗ୍ରନ୍ଯସ୍ତଲୋଚନଃ ।
ଵେଦମୂର୍ଧୈକସଂଵେଦ୍ଯୋ ନାଦଧ୍ଯାନପରାଯଣଃ ॥ 24 ॥
ଧରାଧରେନ୍ଦୁରାନନ୍ଦସନ୍ଦୋହରସସାଗରଃ ।
ଦ୍ଵୈତବୃନ୍ଦଵିମୋହାନ୍ଧ୍ଯପରାକୃତଦୃଗଦ୍ଭୁତଃ ॥ 25 ॥
ପ୍ରତ୍ଯଗାତ୍ମା ପରଞ୍ଜ୍ଯୋତିଃ ପୁରାଣଃ ପରମେଶ୍ଵରଃ ।
ପ୍ରପଞ୍ଚୋପଶମଃ ପ୍ରାଜ୍ଞଃ ପୁଣ୍ଯକୀର୍ତିଃ ପୁରାତନଃ ॥ 26 ॥
ସର୍ଵାଧିଷ୍ଠାନସନ୍ମାତ୍ରଃ ସ୍ଵାତ୍ମବନ୍ଧହରୋ ହରଃ ।
ସର୍ଵପ୍ରେମନିଜାହାସଃ ସର୍ଵାନୁଗ୍ରହକୃଚ୍ଛିଵଃ ॥ 27 ॥
ସର୍ଵେନ୍ଦ୍ରିଯଗୁଣାଭାସଃ ସର୍ଵଭୂତଗୁଣାଶ୍ରଯଃ ।
ସଚ୍ଚିଦାନନ୍ଦପୂର୍ଣାତ୍ମା ସର୍ଵଭୂତଗୁଣାଶ୍ରଯଃ ॥ 28 ॥
ସର୍ଵଭୂତାନ୍ତରଃ ସାକ୍ଷୀ ସର୍ଵଜ୍ଞଃ ସର୍ଵକାମଦଃ ।
ସନକାଦିମହାଯୋଗିସମାରାଧିତପାଦୁକଃ ॥ 29 ॥
ଆଦିଦେଵୋ ଦଯାସିନ୍ଧୁଃ ଶିକ୍ଷିତାସୁରଵିଗ୍ରହଃ ।
ଯକ୍ଷକିନ୍ନରଗନ୍ଧର୍ଵସ୍ତୂଯମାନାତ୍ମଵୈଭଵଃ ॥ 30 ॥
ବ୍ରହ୍ମାଦିଦେଵଵିନୁତୋ ଯୋଗମାଯାନିଯୋଜକଃ ।
ଶିଵଯୋଗୀ ଶିଵାନନ୍ଦଃ ଶିଵଭକ୍ତସମୁଦ୍ଧରଃ ॥ 31 ॥
ଵେଦାନ୍ତସାରସନ୍ଦୋହଃ ସର୍ଵସତ୍ତ୍ଵାଵଲମ୍ବନଃ ।
ଵଟମୂଲାଶ୍ରଯୋ ଵାଗ୍ମୀ ମାନ୍ଯୋ ମଲଯଜପ୍ରିଯଃ ॥ 32 ॥
ସୁଶୀଲୋ ଵାଞ୍ଛିତାର୍ଥଜ୍ଞଃ ପ୍ରସନ୍ନଵଦନେକ୍ଷଣଃ ।
ନୃତ୍ତଗୀତକଲାଭିଜ୍ଞଃ କର୍ମଵିତ୍କର୍ମମୋଚକଃ ॥ 33 ॥
କର୍ମସାକ୍ଷୀ କର୍ମମଯଃ କର୍ମଣାଂ ଚ ଫଲପ୍ରଦଃ ।
ଜ୍ଞାନଦାତା ସଦାଚାରଃ ସର୍ଵୋପଦ୍ରଵମୋଚକଃ ॥ 34 ॥
ଅନାଥନାଥୋ ଭଗଵାନାଶ୍ରିତାମରପାଦପଃ ।
ଵରପ୍ରଦଃ ପ୍ରକାଶାତ୍ମା ସର୍ଵଭୂତହିତେ ରତଃ ॥ 35 ॥
ଵ୍ଯାଘ୍ରଚର୍ମାସନାସୀନ ଆଦିକର୍ତା ମହେଶ୍ଵରଃ ।
ସୁଵିକ୍ରମଃ ସର୍ଵଗତୋ ଵିଶିଷ୍ଟଜନଵତ୍ସଲଃ ॥ 36 ॥
ଚିନ୍ତାଶୋକପ୍ରଶମନୋ ଜଗଦାନନ୍ଦକାରକଃ ।
ରଶ୍ମିମାନ୍ ଭୁଵନେଶଶ୍ଚ ଦେଵାସୁରସୁପୂଜିତଃ ॥ 37 ॥
ମୃତ୍ଯୁଞ୍ଜଯୋ ଵ୍ଯୋମକେଶଃ ଷଟ୍ତ୍ରିଂଶତ୍ତତ୍ତ୍ଵସଙ୍ଗ୍ରହଃ ।
ଅଜ୍ଞାତସମ୍ଭଵୋ ଭିକ୍ଷୁରଦ୍ଵିତୀଯୋ ଦିଗମ୍ବରଃ ॥ 38 ॥
ସମସ୍ତଦେଵତାମୂର୍ତିଃ ସୋମସୂର୍ଯାଗ୍ନିଲୋଚନଃ ।
ସର୍ଵସାମ୍ରାଜ୍ଯନିପୁଣୋ ଧର୍ମମାର୍ଗପ୍ରଵର୍ତକଃ ॥ 39 ॥
ଵିଶ୍ଵାଧିକଃ ପଶୁପତିଃ ପଶୁପାଶଵିମୋଚକଃ ।
ଅଷ୍ଟମୂର୍ତିର୍ଦୀପ୍ତମୂର୍ତିର୍ନାମୋଚ୍ଚାରଣମୁକ୍ତିଦଃ ॥ 40 ॥
ସହସ୍ରାଦିତ୍ଯସଙ୍କାଶଃ ସଦାଷୋଡଶଵାର୍ଷିକଃ ।
ଦିଵ୍ଯକେଲୀସମାଯୁକ୍ତୋ ଦିଵ୍ଯମାଲ୍ଯାମ୍ବରାଵୃତଃ ॥ 41 ॥
ଅନର୍ଘରତ୍ନସମ୍ପୂର୍ଣୋ ମଲ୍ଲିକାକୁସୁମପ୍ରିଯଃ ।
ତପ୍ତଚାମୀକରାକାରୋ ଜିତଦାଵାନଲାକୃତିଃ ॥ 42 ॥
ନିରଞ୍ଜନୋ ନିର୍ଵିକାରୋ ନିଜାଵାସୋ ନିରାକୃତିଃ ।
ଜଗଦ୍ଗୁରୁର୍ଜଗତ୍କର୍ତା ଜଗଦୀଶୋ ଜଗତ୍ପତିଃ ॥ 43 ॥
କାମହନ୍ତା କାମମୂର୍ତିଃ କଲ୍ଯାଣଵୃଷଵାହନଃ ।
ଗଙ୍ଗାଧରୋ ମହାଦେଵୋ ଦୀନବନ୍ଧଵିମୋଚକଃ ॥ 44 ॥
ଧୂର୍ଜଟିଃ ଖଣ୍ଡପରଶୁଃ ସଦ୍ଗୁଣୋ ଗିରିଜାସଖଃ ।
ଅଵ୍ଯଯୋ ଭୂତସେନେଶଃ ପାପଘ୍ନଃ ପୁଣ୍ଯଦାଯକଃ ॥ 45 ॥
ଉପଦେଷ୍ଟା ଦୃଢପ୍ରଜ୍ଞୋ ରୁଦ୍ରୋ ରୋଗଵିନାଶନଃ ।
ନିତ୍ଯାନନ୍ଦୋ ନିରାଧାରୋ ହରୋ ଦେଵଶିଖାମଣିଃ ॥ 46 ॥
ପ୍ରଣତାର୍ତିହରଃ ସୋମଃ ସାନ୍ଦ୍ରାନନ୍ଦୋ ମହାମତିଃ ।
ଆଶ୍ଚର୍ଯଵୈଭଵୋ ଦେଵଃ ସଂସାରାର୍ଣଵତାରକଃ ॥ 47 ॥
ଯଜ୍ଞେଶୋ ରାଜରାଜେଶୋ ଭସ୍ମରୁଦ୍ରାକ୍ଷଲାଞ୍ଛନଃ ।
ଅନନ୍ତସ୍ତାରକଃ ସ୍ଥାଣୁଃ ସର୍ଵଵିଦ୍ଯେଶ୍ଵରୋ ହରିଃ ॥ 48 ॥
ଵିଶ୍ଵରୂପୋ ଵିରୂପାକ୍ଷଃ ପ୍ରଭୁଃ ପରିବୃଢୋ ଦୃଢଃ ।
ଭଵ୍ଯୋ ଜିତାରିଷଡ୍ଵର୍ଗୋ ମହୋଦାରୋ ଵିଷାଶନଃ ॥ 49 ॥
ସୁକୀର୍ତିରାଦିପୁରୁଷୋ ଜରାମରଣଵର୍ଜିତଃ ।
ପ୍ରମାଣଭୂତୋ ଦୁର୍ଜ୍ଞେଯଃ ପୁଣ୍ଯଃ ପରପୁରଞ୍ଜଯଃ ॥ 50 ॥
ଗୁଣାକରୋ ଗୁଣଶ୍ରେଷ୍ଠଃ ସଚ୍ଚିଦାନନ୍ଦଵିଗ୍ରହଃ ।
ସୁଖଦଃ କାରଣଂ କର୍ତା ଭଵବନ୍ଧଵିମୋଚକଃ ॥ 51 ॥
ଅନିର୍ଵିଣ୍ଣୋ ଗୁଣଗ୍ରାହୀ ନିଷ୍କଲଙ୍କଃ କଲଙ୍କହା ।
ପୁରୁଷଃ ଶାଶ୍ଵତୋ ଯୋଗୀ ଵ୍ଯକ୍ତାଵ୍ଯକ୍ତଃ ସନାତନଃ ॥ 52 ॥
ଚରାଚରାତ୍ମା ସୂକ୍ଷ୍ମାତ୍ମା ଵିଶ୍ଵକର୍ମା ତମୋପହୃତ୍ ।
ଭୁଜଙ୍ଗଭୂଷଣୋ ଭର୍ଗସ୍ତରୁଣଃ କରୁଣାଲଯଃ ॥ 53 ॥
ଅଣିମାଦିଗୁଣୋପେତୋ ଲୋକଵଶ୍ଯଵିଧାଯକଃ ।
ଯୋଗପଟ୍ଟଧରୋ ମୁକ୍ତୋ ମୁକ୍ତାନାଂ ପରମା ଗତିଃ ॥ 54 ॥
ଗୁରୁରୂପଧରଃ ଶ୍ରୀମତ୍ପରମାନନ୍ଦସାଗରଃ ।
ସହସ୍ରବାହୁଃ ସର୍ଵେଶଃ ସହସ୍ରାଵଯଵାନ୍ଵିତଃ ॥ 55 ॥
ସହସ୍ରମୂର୍ଧା ସର୍ଵାତ୍ମା ସହସ୍ରାକ୍ଷଃ ସହସ୍ରପାତ୍ ।
ନିରାଭାସଃ ସୂକ୍ଷ୍ମତନୁର୍ହୃଦି ଜ୍ଞାତଃ ପରାତ୍ପରଃ ॥ 56 ॥
ସର୍ଵାତ୍ମଗଃ ସର୍ଵସାକ୍ଷୀ ନିଃସଙ୍ଗୋ ନିରୁପଦ୍ରଵଃ ।
ନିଷ୍କଲଃ ସକଲାଧ୍ଯକ୍ଷଶ୍ଚିନ୍ମଯସ୍ତମସଃ ପରଃ ॥ 57 ॥
ଜ୍ଞାନଵୈରାଗ୍ଯସମ୍ପନ୍ନୋ ଯୋଗାନନ୍ଦମଯଃ ଶିଵଃ ।
ଶାଶ୍ଵତୈଶ୍ଵର୍ଯସମ୍ପୂର୍ଣୋ ମହାଯୋଗୀଶ୍ଵରେଶ୍ଵରଃ ॥ 58 ॥
ସହସ୍ରଶକ୍ତିସଂଯୁକ୍ତଃ ପୁଣ୍ଯକାଯୋ ଦୁରାସଦଃ ।
ତାରକବ୍ରହ୍ମସମ୍ପୂର୍ଣସ୍ତପସ୍ଵିଜନସଂଵୃତଃ ॥ 59 ॥
ଵିଧୀନ୍ଦ୍ରାମରସମ୍ପୂଜ୍ଯୋ ଜ୍ଯୋତିଷାଂ ଜ୍ଯୋତିରୁତ୍ତମଃ ।
ନିରକ୍ଷରୋ ନିରାଲମ୍ବଃ ସ୍ଵାତ୍ମାରାମୋ ଵିକର୍ତନଃ ॥ 60 ॥
ନିରଵଦ୍ଯୋ ନିରାତଙ୍କୋ ଭୀମୋ ଭୀମପରାକ୍ରମଃ ।
ଵୀରଭଦ୍ରଃ ପୁରାରାତିର୍ଜଲନ୍ଧରଶିରୋହରଃ ॥ 61 ॥
ଅନ୍ଧକାସୁରସଂହର୍ତା ଭଗନେତ୍ରଭିଦଦ୍ଭୁତଃ ।
ଵିଶ୍ଵଗ୍ରାସୋଽଧର୍ମଶତ୍ରୁର୍ବ୍ରହ୍ମଜ୍ଞାନୈକମନ୍ଥରଃ ॥ 62 ॥
ଅଗ୍ରେସରସ୍ତୀର୍ଥଭୂତଃ ସିତଭସ୍ମାଵକୁଣ୍ଠନଃ ।
ଅକୁଣ୍ଠମେଧାଃ ଶ୍ରୀକଣ୍ଠୋ ଵୈକୁଣ୍ଠପରମପ୍ରିଯଃ ॥ 63 ॥
ଲଲାଟୋଜ୍ଜ୍ଵଲନେତ୍ରାବ୍ଜସ୍ତୁଷାରକରଶେଖରଃ ।
ଗଜାସୁରଶିରଶ୍ଛେତ୍ତା ଗଙ୍ଗୋଦ୍ଭାସିତମୂର୍ଧଜଃ ॥ 64 ॥
କଲ୍ଯାଣାଚଲକୋଦଣ୍ଡଃ କମଲାପତିସାଯକଃ ।
ଵାରାଂଶେଵଧିତୂଣୀରଃ ସରୋଜାସନସାରଥିଃ ॥ 65 ॥
ତ୍ରଯୀତୁରଙ୍ଗସଙ୍କ୍ରାନ୍ତୋ ଵାସୁକିଜ୍ଯାଵିରାଜିତଃ ।
ରଵୀନ୍ଦୁଚରଣାଚାରିଧରାରଥଵିରାଜିତଃ ॥ 66 ॥
ତ୍ରଯ୍ଯନ୍ତପ୍ରଗ୍ରହୋଦାରଚାରୁଘଣ୍ଟାରଵୋଜ୍ଜ୍ଵଲଃ ।
ଉତ୍ତାନପର୍ଵଲୋମାଢ୍ଯୋ ଲୀଲାଵିଜିତମନ୍ମଥଃ ॥ 67 ॥
ଜାତୁପ୍ରପନ୍ନଜନତାଜୀଵନୋପାଯନୋତ୍ସୁକଃ ।
ସଂସାରାର୍ଣଵନିର୍ମଗ୍ନସମୁଦ୍ଧରଣପଣ୍ଡିତଃ ॥ 68 ॥
ମଦଦ୍ଵିରଦଧିକ୍କାରିଗତିମଞ୍ଜୁଲଵୈଭଵଃ ।
ମତ୍ତକୋକିଲମାଧୁର୍ଯରସନିର୍ଭରଗୀର୍ଗଣଃ ॥ 69 ॥
କୈଵଲ୍ଯୋଦଧିକଲ୍ଲୋଲଲୀଲାତାଣ୍ଡଵପଣ୍ଡିତଃ ।
ଵିଷ୍ଣୁର୍ଜିଷ୍ଣୁର୍ଵାସୁଦେଵଃ ପ୍ରଭଵିଷ୍ଣୁଃ ପୁରାତନଃ ॥ 70 ॥
ଵର୍ଧିଷ୍ଣୁର୍ଵରଦୋ ଵୈଦ୍ଯୋ ହରିର୍ନାରାଯଣୋଽଚ୍ଯୁତଃ ।
ଅଜ୍ଞାନଵନଦାଵାଗ୍ନିଃ ପ୍ରଜ୍ଞାପ୍ରାସାଦଭୂପତିଃ ॥ 71 ॥
ସର୍ପଭୂଷିତସର୍ଵାଙ୍ଗଃ କର୍ପୂରୋଜ୍ଜ୍ଵଲିତାକୃତିଃ ।
ଅନାଦିମଧ୍ଯନିଧନୋ ଗିରୀଶୋ ଗିରିଜାପତିଃ ॥ 72 ॥
ଵୀତରାଗୋ ଵିନୀତାତ୍ମା ତପସ୍ଵୀ ଭୂତଭାଵନଃ ।
ଦେଵାସୁରଗୁରୁଧ୍ଯେଯୋ ଦେଵାସୁରନମସ୍କୃତଃ ॥ 73 ॥
ଦେଵାଦିଦେଵୋ ଦେଵର୍ଷିର୍ଦେଵାସୁରଵରପ୍ରଦଃ ।
ସର୍ଵଦେଵମଯୋଽଚିନ୍ତ୍ଯୋ ଦେଵାତ୍ମା ଚାତ୍ମସମ୍ଭଵଃ ॥ 74 ॥
ନିର୍ଲେପୋ ନିଷ୍ପ୍ରପଞ୍ଚାତ୍ମା ନିର୍ଵିଘ୍ନୋ ଵିଘ୍ନନାଶକଃ ।
ଏକଜ୍ଯୋତିର୍ନିରାତଙ୍କୋ ଵ୍ଯାପ୍ତମୂର୍ତିରନାକୁଲଃ ॥ 75 ॥
ନିରଵଦ୍ଯପଦୋପାଧିର୍ଵିଦ୍ଯାରାଶିରନୁତ୍ତମଃ ।
ନିତ୍ଯାନନ୍ଦଃ ସୁରାଧ୍ଯକ୍ଷୋ ନିଃସଙ୍କଲ୍ପୋ ନିରଞ୍ଜନଃ ॥ 76 ॥
ନିଷ୍କଲଙ୍କୋ ନିରାକାରୋ ନିଷ୍ପ୍ରପଞ୍ଚୋ ନିରାମଯଃ ।
ଵିଦ୍ଯାଧରୋ ଵିଯତ୍କେଶୋ ମାର୍କଣ୍ଡେଯଵରପ୍ରଦଃ ॥ 77 ॥
ଭୈରଵୋ ଭୈରଵୀନାଥଃ କାମଦଃ କମଲାସନଃ ।
ଵେଦଵେଦ୍ଯଃ ସୁରାନନ୍ଦୋ ଲସଜ୍ଜ୍ଯୋତିଃ ପ୍ରଭାକରଃ ॥ 78 ॥
ଚୂଡାମଣିଃ ସୁରାଧୀଶୋ ଯଜ୍ଞଗେଯୋ ହରିପ୍ରିଯଃ ।
ନିର୍ଲେପୋ ନୀତିମାନ୍ ସୂତ୍ରୀ ଶ୍ରୀହାଲାହଲସୁନ୍ଦରଃ ॥ 79 ॥
ଧର୍ମଦକ୍ଷୋ ମହାରାଜଃ କିରୀଟୀ ଵନ୍ଦିତୋ ଗୁହଃ ।
ମାଧଵୋ ଯାମିନୀନାଥଃ ଶମ୍ବରଃ ଶବରୀପ୍ରିଯଃ ॥ 80 ॥
ସଙ୍ଗୀତଵେତ୍ତା ଲୋକଜ୍ଞଃ ଶାନ୍ତଃ କଲଶସମ୍ଭଵଃ ।
ବ୍ରହ୍ମଣ୍ଯୋ ଵରଦୋ ନିତ୍ଯଃ ଶୂଲୀ ଗୁରୁଵରୋ ହରଃ ॥ 81 ॥
ମାର୍ତାଣ୍ଡଃ ପୁଣ୍ଡରୀକାକ୍ଷୋ ଲୋକନାଯକଵିକ୍ରମଃ ।
ମୁକୁନ୍ଦାର୍ଚ୍ଯୋ ଵୈଦ୍ଯନାଥଃ ପୁରନ୍ଦରଵରପ୍ରଦଃ ॥ 82 ॥
ଭାଷାଵିହୀନୋ ଭାଷାଜ୍ଞୋ ଵିଘ୍ନେଶୋ ଵିଘ୍ନନାଶନଃ ।
କିନ୍ନରେଶୋ ବୃହଦ୍ଭାନୁଃ ଶ୍ରୀନିଵାସଃ କପାଲଭୃତ୍ ॥ 83 ॥
ଵିଜଯୋ ଭୂତଭାଵଜ୍ଞୋ ଭୀମସେନୋ ଦିଵାକରଃ ।
ବିଲ୍ଵପ୍ରିଯୋ ଵସିଷ୍ଠେଶଃ ସର୍ଵମାର୍ଗପ୍ରଵର୍ତକଃ ॥ 84 ॥
ଓଷଧୀଶୋ ଵାମଦେଵୋ ଗୋଵିନ୍ଦୋ ନୀଲଲୋହିତଃ ।
ଷଡର୍ଧନଯନଃ ଶ୍ରୀମନ୍ମହାଦେଵୋ ଵୃଷଧ୍ଵଜଃ ॥ 85 ॥
କର୍ପୂରଦୀପିକାଲୋଲଃ କର୍ପୂରରସଚର୍ଚିତଃ ।
ଅଵ୍ଯାଜକରୁଣାମୂର୍ତିସ୍ତ୍ଯାଗରାଜଃ କ୍ଷପାକରଃ ॥ 86 ॥
ଆଶ୍ଚର୍ଯଵିଗ୍ରହଃ ସୂକ୍ଷ୍ମଃ ସିଦ୍ଧେଶଃ ସ୍ଵର୍ଣଭୈରଵଃ ।
ଦେଵରାଜଃ କୃପାସିନ୍ଧୁରଦ୍ଵଯୋଽମିତଵିକ୍ରମଃ ॥ 87 ॥
ନିର୍ଭେଦୋ ନିତ୍ଯସତ୍ଵସ୍ଥୋ ନିର୍ଯୋଗକ୍ଷେମ ଆତ୍ମଵାନ୍ ।
ନିରପାଯୋ ନିରାସଙ୍ଗୋ ନିଃଶବ୍ଦୋ ନିରୁପାଧିକଃ ॥ 88 ॥
ଭଵଃ ସର୍ଵେଶ୍ଵରଃ ସ୍ଵାମୀ ଭଵଭୀତିଵିଭଞ୍ଜନଃ ।
ଦାରିଦ୍ର୍ଯତୃଣକୂଟାଗ୍ନିର୍ଦାରିତାସୁରସନ୍ତତିଃ ॥ 89 ॥
ମୁକ୍ତିଦୋ ମୁଦିତୋଽକୁବ୍ଜୋ ଧାର୍ମିକୋ ଭକ୍ତଵତ୍ସଲଃ ।
ଅଭ୍ଯାସାତିଶଯଜ୍ଞେଯଶ୍ଚନ୍ଦ୍ରମୌଲିଃ କଲାଧରଃ ॥ 90 ॥
ମହାବଲୋ ମହାଵୀର୍ଯୋ ଵିଭୁଃ ଶ୍ରୀଶଃ ଶୁଭପ୍ରଦଃ ।
ସିଦ୍ଧଃ ପୁରାଣପୁରୁଷୋ ରଣମଣ୍ଡଲଭୈରଵଃ ॥ 91 ॥
ସଦ୍ଯୋଜାତୋ ଵଟାରଣ୍ଯଵାସୀ ପୁରୁଷଵଲ୍ଲଭଃ ।
ହରିକେଶୋ ମହାତ୍ରାତା ନୀଲଗ୍ରୀଵଃ ସୁମଙ୍ଗଲଃ ॥ 92 ॥
ହିରଣ୍ଯବାହୁସ୍ତୀକ୍ଷ୍ଣାଂଶୁଃ କାମେଶଃ ସୋମଵିଗ୍ରହଃ ।
ସର୍ଵାତ୍ମା ସର୍ଵକର୍ତା ଚ ତାଣ୍ଡଵୋ ମୁଣ୍ଡମାଲିକଃ ॥ 93 ॥
ଅଗ୍ରଗଣ୍ଯଃ ସୁଗମ୍ଭୀରୋ ଦେଶିକୋ ଵୈଦିକୋତ୍ତମଃ ।
ପ୍ରସନ୍ନଦେଵୋ ଵାଗୀଶଶ୍ଚିନ୍ତାତିମିରଭାସ୍କରଃ ॥ 94 ॥
ଗୌରୀପତିସ୍ତୁଙ୍ଗମୌଲିର୍ମଖରାଜୋ ମହାକଵିଃ ।
ଶ୍ରୀଧରଃ ସର୍ଵସିଦ୍ଧେଶୋ ଵିଶ୍ଵନାଥୋ ଦଯାନିଧିଃ ॥ 95 ॥
ଅନ୍ତର୍ମୁଖୋ ବହିର୍ଦୃଷ୍ଟିଃ ସିଦ୍ଧଵେଷମନୋହରଃ ।
କୃତ୍ତିଵାସାଃ କୃପାସିନ୍ଧୁର୍ମନ୍ତ୍ରସିଦ୍ଧୋ ମତିପ୍ରଦଃ ॥ 96 ॥
ମହୋତ୍କୃଷ୍ଟଃ ପୁଣ୍ଯକରୋ ଜଗତ୍ସାକ୍ଷୀ ସଦାଶିଵଃ ।
ମହାକ୍ରତୁର୍ମହାଯଜ୍ଵା ଵିଶ୍ଵକର୍ମା ତପୋନିଧିଃ ॥ 97 ॥
ଛନ୍ଦୋମଯୋ ମହାଜ୍ଞାନୀ ସର୍ଵଜ୍ଞୋ ଦେଵଵନ୍ଦିତଃ ।
ସାର୍ଵଭୌମଃ ସଦାନନ୍ଦଃ କରୁଣାମୃତଵାରିଧିଃ ॥ 98 ॥
କାଲକାଲଃ କଲିଧ୍ଵଂସୀ ଜରାମରଣନାଶକଃ ।
ଶିତିକଣ୍ଠଶ୍ଚିଦାନନ୍ଦୋ ଯୋଗିନୀଗଣସେଵିତଃ ॥ 99 ॥
ଚଣ୍ଡୀଶଃ ଶୁକସଂଵେଦ୍ଯଃ ପୁଣ୍ଯଶ୍ଲୋକୋ ଦିଵସ୍ପତିଃ ।
ସ୍ଥାଯୀ ସକଲତତ୍ତ୍ଵାତ୍ମା ସଦାସେଵକଵର୍ଧନଃ ॥ 100 ॥
ରୋହିତାଶ୍ଵଃ କ୍ଷମାରୂପୀ ତପ୍ତଚାମୀକରପ୍ରଭଃ ।
ତ୍ରିଯମ୍ବକୋ ଵରରୁଚିର୍ଦେଵଦେଵଶ୍ଚତୁର୍ଭୁଜଃ ॥ 101 ॥
ଵିଶ୍ଵମ୍ଭରୋ ଵିଚିତ୍ରାଙ୍ଗୋ ଵିଧାତା ପୁରଶାସନଃ ।
ସୁବ୍ରହ୍ମଣ୍ଯୋ ଜଗତ୍ସ୍ଵାମୀ ରୋହିତାକ୍ଷଃ ଶିଵୋତ୍ତମଃ ॥ 102 ॥
ନକ୍ଷତ୍ରମାଲାଭରଣୋ ମଘଵାନ୍ ଅଘନାଶନଃ ।
ଵିଧିକର୍ତା ଵିଧାନଜ୍ଞଃ ପ୍ରଧାନପୁରୁଷେଶ୍ଵରଃ ॥ 103 ॥
ଚିନ୍ତାମଣିଃ ସୁରଗୁରୁର୍ଧ୍ଯେଯୋ ନୀରାଜନପ୍ରିଯଃ ।
ଗୋଵିନ୍ଦୋ ରାଜରାଜେଶୋ ବହୁପୁଷ୍ପାର୍ଚନପ୍ରିଯଃ ॥ 104 ॥
ସର୍ଵାନନ୍ଦୋ ଦଯାରୂପୀ ଶୈଲଜାସୁମନୋହରଃ ।
ସୁଵିକ୍ରମଃ ସର୍ଵଗତୋ ହେତୁସାଧନଵର୍ଜିତଃ ॥ 105 ॥
ଵୃଷାଙ୍କୋ ରମଣୀଯାଙ୍ଗଃ ସଦଙ୍ଘ୍ରିଃ ସାମପାରଗଃ ।
ମନ୍ତ୍ରାତ୍ମା କୋଟିକନ୍ଦର୍ପସୌନ୍ଦର୍ଯରସଵାରିଧିଃ ॥ 106 ॥
ଯଜ୍ଞେଶୋ ଯଜ୍ଞପୁରୁଷଃ ସୃଷ୍ଟିସ୍ଥିତ୍ଯନ୍ତକାରଣମ୍ ।
ପରହଂସୈକଜିଜ୍ଞାସ୍ଯଃ ସ୍ଵପ୍ରକାଶସ୍ଵରୂପଵାନ୍ ॥ 107 ॥
ମୁନିମୃଗ୍ଯୋ ଦେଵମୃଗ୍ଯୋ ମୃଗହସ୍ତୋ ମୃଗେଶ୍ଵରଃ ।
ମୃଗେନ୍ଦ୍ରଚର୍ମଵସନୋ ନରସିଂହନିପାତନଃ ॥ 108 ॥
ମୁନିଵନ୍ଦ୍ଯୋ ମୁନିଶ୍ରେଷ୍ଠୋ ମୁନିବୃନ୍ଦନିଷେଵିତଃ ।
ଦୁଷ୍ଟମୃତ୍ଯୁରଦୁଷ୍ଟେହୋ ମୃତ୍ଯୁହା ମୃତ୍ଯୁପୂଜିତଃ ॥ 109 ॥
ଅଵ୍ଯକ୍ତୋଽମ୍ବୁଜଜନ୍ମାଦିକୋଟିକୋଟିସୁପୂଜିତଃ ।
ଲିଙ୍ଗମୂର୍ତିରଲିଙ୍ଗାତ୍ମା ଲିଙ୍ଗାତ୍ମା ଲିଙ୍ଗଵିଗ୍ରହଃ ॥ 110 ॥
ଯଜୁର୍ମୂର୍ତିଃ ସାମମୂର୍ତିରୃଙ୍ମୂର୍ତିର୍ମୂର୍ତିଵର୍ଜିତଃ ।
ଵିଶ୍ଵେଶୋ ଗଜଚର୍ମୈକଚେଲାଞ୍ଚିତକଟୀତଟଃ ॥ 111 ॥
ପାଵନାନ୍ତେଵସଦ୍ଯୋଗିଜନସାର୍ଥସୁଧାକରଃ ।
ଅନନ୍ତସୋମସୂର୍ଯାଗ୍ନିମଣ୍ଡଲପ୍ରତିମପ୍ରଭଃ ॥ 112 ॥
ଚିନ୍ତାଶୋକପ୍ରଶମନଃ ସର୍ଵଵିଦ୍ଯାଵିଶାରଦଃ ।
ଭକ୍ତଵିଜ୍ଞପ୍ତିସନ୍ଧାତା କର୍ତା ଗିରିଵରାକୃତିଃ ॥ 113 ॥
ଜ୍ଞାନପ୍ରଦୋ ମନୋଵାସଃ କ୍ଷେମ୍ଯୋ ମୋହଵିନାଶନଃ ।
ସୁରୋତ୍ତମଶ୍ଚିତ୍ରଭାନୁଃ ସଦାଵୈଭଵତତ୍ପରଃ ॥ 114 ॥
ସୁହୃଦଗ୍ରେସରଃ ସିଦ୍ଧଜ୍ଞାନମୁଦ୍ରୋ ଗଣାଧିପଃ ।
ଆଗମଶ୍ଚର୍ମଵସନୋ ଵାଞ୍ଛିତାର୍ଥଫଲପ୍ରଦଃ ॥ 115 ॥
ଅନ୍ତର୍ହିତୋଽସମାନଶ୍ଚ ଦେଵସିଂହାସନାଧିପଃ ।
ଵିଵାଦହନ୍ତା ସର୍ଵାତ୍ମା କାଲଃ କାଲଵିଵର୍ଜିତଃ ॥ 116 ॥
ଵିଶ୍ଵାତୀତୋ ଵିଶ୍ଵକର୍ତା ଵିଶ୍ଵେଶୋ ଵିଶ୍ଵକାରଣମ୍ ।
ଯୋଗିଧ୍ଯେଯୋ ଯୋଗନିଷ୍ଠୋ ଯୋଗାତ୍ମା ଯୋଗଵିତ୍ତମଃ ॥ 117 ॥
ଓଙ୍କାରରୂପୋ ଭଗଵାନ୍ ବିନ୍ଦୁନାଦମଯଃ ଶିଵଃ ।
ଚତୁର୍ମୁଖାଦିସଂସ୍ତୁତ୍ଯଶ୍ଚତୁର୍ଵର୍ଗଫଲପ୍ରଦଃ ॥ 118 ॥
ସହ୍ଯାଚଲଗୁହାଵାସୀ ସାକ୍ଷାନ୍ମୋକ୍ଷରସାମୃତଃ ।
ଦକ୍ଷାଧ୍ଵରସମୁଚ୍ଛେତ୍ତା ପକ୍ଷପାତଵିଵର୍ଜିତଃ ॥ 119 ॥
ଓଙ୍କାରଵାଚକଃ ଶମ୍ଭୁଃ ଶଙ୍କରଃ ଶଶିଶୀତଲଃ ।
ପଙ୍କଜାସନସଂସେଵ୍ଯଃ କିଙ୍କରାମରଵତ୍ସଲଃ ॥ 120 ॥
ନତଦୌର୍ଭାଗ୍ଯତୂଲାଗ୍ନିଃ କୃତକୌତୁକମଙ୍ଗଲଃ ।
ତ୍ରିଲୋକମୋହନଃ ଶ୍ରୀମତ୍ତ୍ରିପୁଣ୍ଡ୍ରାଙ୍କିତମସ୍ତକଃ ॥ 121 ॥
କ୍ରୌଞ୍ଚାରିଜନକଃ ଶ୍ରୀମଦ୍ଗଣନାଥସୁତାନ୍ଵିତଃ ।
ଅଦ୍ଭୁତାନନ୍ତଵରଦୋଽପରିଚ୍ଛିନାତ୍ମଵୈଭଵଃ ॥ 122 ॥
ଇଷ୍ଟାପୂର୍ତପ୍ରିଯଃ ଶର୍ଵ ଏକଵୀରଃ ପ୍ରିଯଂଵଦଃ ।
ଊହାପୋହଵିନିର୍ମୁକ୍ତ ଓଙ୍କାରେଶ୍ଵରପୂଜିତଃ ॥ 123 ॥
ରୁଦ୍ରାକ୍ଷଵକ୍ଷା ରୁଦ୍ରାକ୍ଷରୂପୋ ରୁଦ୍ରାକ୍ଷପକ୍ଷକଃ ।
ଭୁଜଗେନ୍ଦ୍ରଲସତ୍କଣ୍ଠୋ ଭୁଜଙ୍ଗାଭରଣପ୍ରିଯଃ ॥ 124 ॥
କଲ୍ଯାଣରୂପଃ କଲ୍ଯାଣଃ କଲ୍ଯାଣଗୁଣସଂଶ୍ରଯଃ ।
ସୁନ୍ଦରଭ୍ରୂଃ ସୁନଯନଃ ସୁଲଲାଟଃ ସୁକନ୍ଧରଃ ॥ 125 ॥
ଵିଦ୍ଵଜ୍ଜନାଶ୍ରଯୋ ଵିଦ୍ଵଜ୍ଜନସ୍ତଵ୍ଯପରାକ୍ରମଃ ।
ଵିନୀତଵତ୍ସଲୋ ନୀତିସ୍ଵରୂପୋ ନୀତିସଂଶ୍ରଯଃ ॥ 126 ॥
ଅତିରାଗୀ ଵୀତରାଗୀ ରାଗହେତୁର୍ଵିରାଗଵିତ୍ ।
ରାଗହା ରାଗଶମନୋ ରାଗଦୋ ରାଗିରାଗଵିତ୍ ॥ 127 ॥
ମନୋନ୍ମନୋ ମନୋରୂପୋ ବଲପ୍ରମଥନୋ ବଲଃ ।
ଵିଦ୍ଯାକରୋ ମହାଵିଦ୍ଯୋ ଵିଦ୍ଯାଵିଦ୍ଯାଵିଶାରଦଃ ॥ 128 ॥
ଵସନ୍ତକୃଦ୍ଵସନ୍ତାତ୍ମା ଵସନ୍ତେଶୋ ଵସନ୍ତଦଃ ।
ପ୍ରାଵୃଟ୍କୃତ୍ ପ୍ରାଵୃଡାକାରଃ ପ୍ରାଵୃଟ୍କାଲପ୍ରଵର୍ତକଃ ॥ 129 ॥
ଶରନ୍ନାଥୋ ଶରତ୍କାଲନାଶକଃ ଶରଦାଶ୍ରଯଃ ।
କୁନ୍ଦମନ୍ଦାରପୁଷ୍ପୌଘଲସଦ୍ଵାଯୁନିଷେଵିତଃ ॥ 130 ॥
ଦିଵ୍ଯଦେହପ୍ରଭାକୂଟସନ୍ଦୀପିତଦିଗନ୍ତରଃ ।
ଦେଵାସୁରଗୁରୁସ୍ତଵ୍ଯୋ ଦେଵାସୁରନମସ୍କୃତଃ ॥ 131 ॥
ଵାମାଙ୍ଗଭାଗଵିଲସଚ୍ଛ୍ଯାମଲାଵୀକ୍ଷଣପ୍ରିଯଃ ।
କୀର୍ତ୍ଯାଧାରଃ କୀର୍ତିକରଃ କୀର୍ତିହେତୁରହେତୁକଃ ॥ 132 ॥
ଶରଣାଗତଦୀନାର୍ତପରିତ୍ରାଣପରାଯଣଃ ।
ମହାପ୍ରେତାସନାସୀନୋ ଜିତସର୍ଵପିତାମହଃ ॥ 133 ॥
ମୁକ୍ତାଦାମପରୀତାଙ୍ଗୋ ନାନାଗାନଵିଶାରଦଃ ।
ଵିଷ୍ଣୁବ୍ରହ୍ମାଦିଵନ୍ଦ୍ଯାଙ୍ଘ୍ରିର୍ନାନାଦେଶୈକନାଯକଃ ॥ 134 ॥
ଧୀରୋଦାତ୍ତୋ ମହାଧୀରୋ ଧୈର୍ଯଦୋ ଧୈର୍ଯଵର୍ଧକଃ ।
ଵିଜ୍ଞାନମଯ ଆନନ୍ଦମଯଃ ପ୍ରାଣମଯୋଽନ୍ନଦଃ ॥ 135 ॥
ଭଵାବ୍ଧିତରଣୋପାଯଃ କଵିର୍ଦୁଃସ୍ଵପ୍ନନାଶନଃ ।
ଗୌରୀଵିଲାସସଦନଃ ପିଶଚାନୁଚରାଵୃତଃ ॥ 136 ॥
ଦକ୍ଷିଣାପ୍ରେମସନ୍ତୁଷ୍ଟୋ ଦାରିଦ୍ର୍ଯଵଡଵାନଲଃ ।
ଅଦ୍ଭୁତାନନ୍ତସଙ୍ଗ୍ରାମୋ ଢକ୍କାଵାଦନତତ୍ପରଃ ॥ 137 ॥
ପ୍ରାଚ୍ଯାତ୍ମା ଦକ୍ଷିଣାକାରଃ ପ୍ରତୀଚ୍ଯାତ୍ମୋତ୍ତରାକୃତିଃ ।
ଊର୍ଧ୍ଵାଦ୍ଯନ୍ଯଦିଗାକାରୋ ମର୍ମଜ୍ଞଃ ସର୍ଵଶିକ୍ଷକଃ ॥ 138 ॥
ଯୁଗାଵହୋ ଯୁଗାଧୀଶୋ ଯୁଗାତ୍ମା ଯୁଗନାଯକଃ ।
ଜଙ୍ଗମଃ ସ୍ଥାଵରାକାରଃ କୈଲାସଶିଖରପ୍ରିଯଃ ॥ 139 ॥
ହସ୍ତରାଜତ୍ପୁଣ୍ଡରୀକଃ ପୁଣ୍ଡରୀକନିଭେକ୍ଷଣଃ ।
ଲୀଲାଵିଡମ୍ବିତଵପୁର୍ଭକ୍ତମାନସମଣ୍ଡିତଃ ॥ 140 ॥
ବୃନ୍ଦାରକପ୍ରିଯତମୋ ବୃନ୍ଦାରକଵରାର୍ଚିତଃ ।
ନାନାଵିଧାନେକରତ୍ନଲସତ୍କୁଣ୍ଡଲମଣ୍ଡିତଃ ॥ 141 ॥
ନିଃସୀମମହିମା ନିତ୍ଯଲୀଲାଵିଗ୍ରହରୂପଧୃତ୍ ।
ଚନ୍ଦନଦ୍ରଵଦିଗ୍ଧାଙ୍ଗଶ୍ଚାମ୍ପେଯକୁସୁମାର୍ଚିତଃ ॥ 142 ॥
ସମସ୍ତଭକ୍ତସୁଖଦଃ ପରମାଣୁର୍ମହାହ୍ରଦଃ ।
ଅଲୌକିକୋ ଦୁଷ୍ପ୍ରଧର୍ଷଃ କପିଲଃ କାଲକନ୍ଧରଃ ॥ 143 ॥
କର୍ପୂରଗୌରଃ କୁଶଲଃ ସତ୍ଯସନ୍ଧୋ ଜିତେନ୍ଦ୍ରିଯଃ ।
ଶାଶ୍ଵତୈଶ୍ଵର୍ଯଵିଭଵଃ ପୋଷକଃ ସୁସମାହିତଃ ॥ 144 ॥
ମହର୍ଷିନାଥିତୋ ବ୍ରହ୍ମଯୋନିଃ ସର୍ଵୋତ୍ତମୋତ୍ତମଃ ।
ଭୂମିଭାରାର୍ତିସଂହର୍ତା ଷଡୂର୍ମିରହିତୋ ମୃଡଃ ॥ 145 ॥
ତ୍ରିଵିଷ୍ଟପେଶ୍ଵରଃ ସର୍ଵହୃଦଯାମ୍ବୁଜମଧ୍ଯଗଃ ।
ସହସ୍ରଦଲପଦ୍ମସ୍ଥଃ ସର୍ଵଵର୍ଣୋପଶୋଭିତଃ ॥ 146 ॥
ପୁଣ୍ଯମୂର୍ତିଃ ପୁଣ୍ଯଲଭ୍ଯଃ ପୁଣ୍ଯଶ୍ରଵଣକୀର୍ତନଃ ।
ସୂର୍ଯମଣ୍ଡଲମଧ୍ଯସ୍ଥଶ୍ଚନ୍ଦ୍ରମଣ୍ଡଲମଧ୍ଯଗଃ ॥ 147 ॥
ସଦ୍ଭକ୍ତଧ୍ଯାନନିଗଲଃ ଶରଣାଗତପାଲକଃ ।
ଶ୍ଵେତାତପତ୍ରରୁଚିରଃ ଶ୍ଵେତଚାମରଵୀଜିତଃ ॥ 148 ॥
ସର୍ଵାଵଯଵସମ୍ପୂର୍ଣଃ ସର୍ଵଲକ୍ଷଣଲକ୍ଷିତଃ ।
ସର୍ଵମଙ୍ଗଲମାଙ୍ଗଲ୍ଯଃ ସର୍ଵକାରଣକାରଣଃ ॥ 149 ॥
ଆମୋଦୋ ମୋଦଜନକଃ ସର୍ପରାଜୋତ୍ତରୀଯକଃ ।
କପାଲୀ କୋଵିଦଃ ସିଦ୍ଧକାନ୍ତିସଂଵଲିତାନନଃ ॥ 150 ॥
ସର୍ଵସଦ୍ଗୁରୁସଂସେଵ୍ଯୋ ଦିଵ୍ଯଚନ୍ଦନଚର୍ଚିତଃ ।
ଵିଲାସିନୀକୃତୋଲ୍ଲାସ ଇଚ୍ଛାଶକ୍ତିନିଷେଵିତଃ ॥ 151 ॥
ଅନନ୍ତାନନ୍ଦସୁଖଦୋ ନନ୍ଦନଃ ଶ୍ରୀନିକେତନଃ ।
ଅମୃତାବ୍ଧିକୃତାଵାସୋ ନିତ୍ଯକ୍ଲୀବୋ ନିରାମଯଃ ॥ 152 ॥
ଅନପାଯୋଽନନ୍ତଦୃଷ୍ଟିରପ୍ରମେଯୋଽଜରୋଽମରଃ ।
ତମୋମୋହପ୍ରତିହତିରପ୍ରତର୍କ୍ଯୋଽମୃତୋଽକ୍ଷରଃ ॥ 153 ॥
ଅମୋଘବୁଦ୍ଧିରାଧାର ଆଧାରାଧେଯଵର୍ଜିତଃ ।
ଈଷଣାତ୍ରଯନିର୍ମୁକ୍ତ ଇହାମୁତ୍ରଵିଵର୍ଜିତଃ ॥ 154 ॥
ଋଗ୍ଯଜୁଃସାମନଯନୋ ବୁଦ୍ଧିସିଦ୍ଧିସମୃଦ୍ଧିଦଃ ।
ଔଦାର୍ଯନିଧିରାପୂର୍ଣ ଐହିକାମୁଷ୍ମିକପ୍ରଦଃ ॥ 155 ॥
ଶୁଦ୍ଧସନ୍ମାତ୍ରସଂଵିଦ୍ଧୀସ୍ଵରୂପସୁଖଵିଗ୍ରହଃ ।
ଦର୍ଶନପ୍ରଥମାଭାସୋ ଦୃଷ୍ଟିଦୃଶ୍ଯଵିଵର୍ଜିତଃ ॥ 156 ॥
ଅଗ୍ରଗଣ୍ଯୋଽଚିନ୍ତ୍ଯରୂପଃ କଲିକଲ୍ମଷନାଶନଃ ।
ଵିମର୍ଶରୂପୋ ଵିମଲୋ ନିତ୍ଯରୂପୋ ନିରାଶ୍ରଯଃ ॥ 157 ॥
ନିତ୍ଯଶୁଦ୍ଧୋ ନିତ୍ଯବୁଦ୍ଧୋ ନିତ୍ଯମୁକ୍ତୋଽପରାକୃତଃ ।
ମୈତ୍ର୍ଯାଦିଵାସନାଲଭ୍ଯୋ ମହାପ୍ରଲଯସଂସ୍ଥିତଃ ॥ 158 ॥
ମହାକୈଲାସନିଲଯଃ ପ୍ରଜ୍ଞାନଘନଵିଗ୍ରହଃ ।
ଶ୍ରୀମାନ୍ ଵ୍ଯାଘ୍ରପୁରାଵାସୋ ଭୁକ୍ତିମୁକ୍ତିପ୍ରଦାଯକଃ ॥ 159 ॥
ଜଗଦ୍ଯୋନିର୍ଜଗତ୍ସାକ୍ଷୀ ଜଗଦୀଶୋ ଜଗନ୍ମଯଃ ।
ଜପୋ ଜପପରୋ ଜପ୍ଯୋ ଵିଦ୍ଯାସିଂହାସନପ୍ରଭୁଃ ॥ 160 ॥
ତତ୍ତ୍ଵାନାଂ ପ୍ରକୃତିସ୍ତତ୍ତ୍ଵଂ ତତ୍ତ୍ଵମ୍ପଦନିରୂପିତଃ ।
ଦିକ୍କାଲାଦ୍ଯନଵଚ୍ଛିନ୍ନଃ ସହଜାନନ୍ଦସାଗରଃ ॥ 161 ॥
ପ୍ରକୃତିଃ ପ୍ରାକୃତାତୀତୋ ଵିଜ୍ଞାନୈକରସାକୃତିଃ ।
ନିଃଶଙ୍କମତିଦୂରସ୍ଥଶ୍ଚୈତ୍ଯଚେତନଚିନ୍ତନଃ ॥ 162 ॥
ତାରକାନାଂ ହୃଦନ୍ତସ୍ଥସ୍ତାରକସ୍ତାରକାନ୍ତକଃ ।
ଧ୍ଯାନୈକପ୍ରକଟୋ ଧ୍ଯେଯୋ ଧ୍ଯାନୀ ଧ୍ଯାନଵିଭୂଷଣଃ ॥ 163 ॥
ପରଂ ଵ୍ଯୋମ ପରଂ ଧାମ ପରମାତ୍ମା ପରଂ ପଦମ୍ ।
ପୂର୍ଣାନନ୍ଦଃ ସଦାନନ୍ଦୋ ନାଦମଧ୍ଯପ୍ରତିଷ୍ଠିତଃ ॥ 164 ॥
ପ୍ରମାଵିପର୍ଯଯାତୀତଃ ପ୍ରଣତାଜ୍ଞାନନାଶକଃ ।
ବାଣାର୍ଚିତାଙ୍ଘ୍ରିର୍ବହୁଦୋ ବାଲକେଲିକୁତୂହଲୀ ॥ 165 ॥
ବ୍ରହ୍ମରୂପୀ ବ୍ରହ୍ମପଦଂ ବ୍ରହ୍ମଵିଦ୍ବ୍ରାହ୍ମଣପ୍ରିଯଃ ।
ଭୂକ୍ଷେପଦତ୍ତଲକ୍ଷ୍ମୀକୋ ଭ୍ରୂମଧ୍ଯଧ୍ଯାନଲକ୍ଷିତଃ ॥ 166 ॥
ଯଶସ୍କରୋ ରତ୍ନଗର୍ଭୋ ମହାରାଜ୍ଯସୁଖପ୍ରଦଃ ।
ଶବ୍ଦବ୍ରହ୍ମ ଶମପ୍ରାପ୍ଯୋ ଲାଭକୃଲ୍ଲୋକଵିଶ୍ରୁତଃ ॥ 167 ॥
ଶାସ୍ତା ଶିଵାଦ୍ରିନିଲଯଃ ଶରଣ୍ଯୋ ଯାଜକପ୍ରିଯଃ ।
ସଂସାରଵୈଦ୍ଯଃ ସର୍ଵଜ୍ଞଃ ସଭେଷଜଵିଭେଷଜଃ ॥ 168 ॥
ମନୋଵଚୋଭିରଗ୍ରାହ୍ଯଃ ପଞ୍ଚକୋଶଵିଲକ୍ଷଣଃ ।
ଅଵସ୍ଥାତ୍ରଯନିର୍ମୁକ୍ତସ୍ତ୍ଵଵସ୍ଥାସାକ୍ଷିତୁର୍ଯକଃ ॥ 169 ॥
ପଞ୍ଚଭୂତାଦିଦୂରସ୍ଥଃ ପ୍ରତ୍ଯଗେକରସୋଽଵ୍ଯଯଃ ।
ଷଟ୍ଚକ୍ରାନ୍ତର୍ଗତୋଲ୍ଲାସୀ ଷଡ୍ଵିକାରଵିଵର୍ଜିତଃ ॥ 170 ॥
ଵିଜ୍ଞାନଘନସମ୍ପୂର୍ଣୋ ଵୀଣାଵାଦନତତ୍ପରଃ ।
ନୀହାରାକାରଗୌରାଙ୍ଗୋ ମହାଲାଵଣ୍ଯଵାରିଧିଃ ॥ 171 ॥
ପରାଭିଚାରଶମନଃ ଷଡଧ୍ଵୋପରିସଂସ୍ଥିତଃ ।
ସୁଷୁମ୍ନାମାର୍ଗସଞ୍ଚାରୀ ବିସତନ୍ତୁନିଭାକୃତିଃ ॥ 172 ॥
ପିନାକୀ ଲିଙ୍ଗରୂପଶ୍ରୀଃ ମଙ୍ଗଲାଵଯଵୋଜ୍ଜ୍ଵଲଃ ।
କ୍ଷେତ୍ରାଧିପଃ ସୁସଂଵେଦ୍ଯଃ ଶ୍ରୀପ୍ରଦୋ ଵିଭଵପ୍ରଦଃ ॥ 173 ॥
ସର୍ଵଵଶ୍ଯକରଃ ସର୍ଵଦୋଷହା ପୁତ୍ରପୌତ୍ରଦଃ ।
ତୈଲଦୀପପ୍ରିଯସ୍ତୈଲପକ୍ଵାନ୍ନପ୍ରୀତମାନସଃ ॥ 174 ॥
ତୈଲାଭିଷେକସନ୍ତୁଷ୍ଟସ୍ତିଲଭକ୍ଷଣତତ୍ପରଃ ।
ଆପାଦକଣିକାମୁକ୍ତାଭୂଷାଶତମନୋହରଃ ॥ 175 ॥
ଶାଣୋଲ୍ଲୀଢମଣିଶ୍ରେଣୀରମ୍ଯାଙ୍ଘ୍ରିନଖମଣ୍ଡଲଃ ।
ମଣିମଞ୍ଜୀରକିରଣକିଞ୍ଜଲ୍କିତପଦାମ୍ବୁଜଃ ॥ 176 ॥
ଅପସ୍ମାରୋପରିନ୍ଯସ୍ତସଵ୍ଯପାଦସରୋରୁହଃ ।
କନ୍ଦର୍ପତୂଣାଭଜଙ୍ଘୋ ଗୁଲ୍ଫୋଦଞ୍ଚିତନୂପୁରଃ ॥ 177 ॥
କରିହସ୍ତୋପମେଯୋରୁରାଦର୍ଶୋଜ୍ଜ୍ଵଲଜାନୁଭୃତ୍ ।
ଵିଶଙ୍କଟକଟିନ୍ଯସ୍ତଵାଚାଲମଣିମେଖଲଃ ॥ 178 ॥
ଆଵର୍ତନାଭିରୋମାଲିଵଲିମତ୍ପଲ୍ଲଵୋଦରଃ ।
ମୁକ୍ତାହାରଲସତ୍ତୁଙ୍ଗଵିପୁଲୋରସ୍କରଞ୍ଜିତଃ ॥ 179 ॥
ଵୀରାସନସମାସୀନୋ ଵୀଣାପୁସ୍ତୋଲ୍ଲସତ୍କରଃ ।
ଅକ୍ଷମାଲାଲସତ୍ପାଣିଶ୍ଚିନ୍ମୁଦ୍ରିତକରାମ୍ବୁଜଃ ॥ 180 ॥
ମାଣିକ୍ଯକଙ୍କଣୋଲ୍ଲାସିକରାମ୍ବୁଜଵିରାଜିତଃ ।
ଅନର୍ଘରତ୍ନଗ୍ରୈଵେଯଵିଲସତ୍କମ୍ବୁକନ୍ଧରଃ ॥ 181 ॥
ଅନାକଲିତସାଦୃଶ୍ଯଚିବୁକଶ୍ରୀଵିରାଜିତଃ ।
ମୁଗ୍ଧସ୍ମିତପରୀପାକପ୍ରକାଶିତରଦାଙ୍କୁରଃ ॥ 182 ॥
ଚାରୁଚାମ୍ପେଯପୁଷ୍ପାଭନାସିକାପୁଟରଞ୍ଜିତଃ ।
ଵରଵଜ୍ରଶିଲାଦର୍ଶପରିଭାଵିକପୋଲଭୂଃ ॥ 183 ॥
କର୍ଣଦ୍ଵଯୋଲ୍ଲସଦ୍ଦିଵ୍ଯମଣିକୁଣ୍ଡଲମଣ୍ଡିତଃ ।
କରୁଣାଲହରୀପୂର୍ଣକର୍ଣାନ୍ତାଯତଲୋଚନଃ ॥ 184 ॥
ଅର୍ଧଚନ୍ଦ୍ରାଭନିଟିଲପାଟୀରତିଲକୋଜ୍ଜ୍ଵଲଃ ।
ଚାରୁଚାମୀକରାକାରଜଟାଚର୍ଚିତଚନ୍ଦନଃ ।
କୈଲାସଶିଖରସ୍ଫର୍ଧିକମନୀଯନିଜାକୃତିଃ ॥ 185 ॥