śrī kālikāṣṭakam

galadraktamuṇḍāvalīkaṇṭhamālā
mahāghorarāvā sudaṃṣṭrā karālā |
vivastrā śmaśānālayā muktakeśī
mahākālakāmākulā kālikeyam || 1 ||

bhuje vāmayugme śiro'siṃ dadhānā
varaṃ dakṣayugme'bhayaṃ vai tathaiva |
sumadhyā'pi tuṅgastanā bhāranamrā
lasadraktasṛkkadvayā susmitāsyā || 2 ||

śavadvandvakarṇāvataṃsā sukeśī
lasatpretapāṇiṃ prayuktaikakāñcī |
śavākāramañcādhirūḍhā śivābhiḥ
caturdikṣuśabdāyamānā'bhireje || 3 ||
stutiḥ
virañcyādidevāstrayaste guṇāstrīn
samārādhya kālīṃ pradhānā babhūvuḥ |
anādiṃ surādiṃ makhādiṃ bhavādiṃ
svarūpaṃ tvadīyaṃ na vindanti devāḥ || 1 ||
jaganmohinīyaṃ tu vāgvādinīyaṃ
suhṛtpoṣiṇī śatrusaṃhāraṇīyam |
vacastambhanīyaṃ kimuccāṭanīyaṃ
svarūpaṃ tvadīyaṃ na vindanti devāḥ || 2 ||
iyaṃ svargadātrī punaḥ kalpavallī
manojāstu kāmān yathārthaṃ prakuryāt |
tathā te kṛtārthā bhavantīti nityaṃ
svarūpaṃ tvadīyaṃ na vindanti devāḥ || 3 ||
surāpānamattā subhaktānuraktā
lasatpūtacitte sadāvirbhavatte |
japadhyānapūjāsudhādhautapaṅkā
svarūpaṃ tvadīyaṃ na vindanti devāḥ || 4 ||
cidānandakandaṃ hasanmandamandaṃ
śaraccandrakoṭiprabhāpuñjabimbam |
munīnāṃ kavīnāṃ hṛdi dyotayantaṃ
svarūpaṃ tvadīyaṃ na vindanti devāḥ || 5 ||
mahāmeghakālī suraktāpi śubhrā
kadācidvicitrākṛtiryogamāyā |
na bālā na vṛddhā na kāmāturāpi
svarūpaṃ tvadīyaṃ na vindanti devāḥ || 6 ||
kṣamasvāparādhaṃ mahāguptabhāvaṃ
mayā lokamadhye prakāśīkṛtaṃ yat |
tava dhyānapūtena cāpalyabhāvāt
svarūpaṃ tvadīyaṃ na vindanti devāḥ || 7 ||
yadi dhyānayuktaṃ paṭhedyo manuṣyaḥ
tadā sarvaloke viśālo bhavecca |
gṛhe cāṣṭasiddhirmṛte cāpi muktiḥ
svarūpaṃ tvadīyaṃ na vindanti devāḥ || 8 ||