ଶ୍ରୀ ମହା କାଲଭୈରଵ କଵଚଂ

ଦେଵଦେଵ ମହାବାହୋ ଭକ୍ତାନାଂ ସୁଖଵର୍ଧନ ।
କେନ ସିଦ୍ଧିଂ ଦଦାତ୍ଯାଶୁ କାଲୀ ତ୍ରୈଲୋକ୍ଯମୋହନ ॥ 1॥

ତନ୍ମେ ଵଦ ଦଯାଽଽଧାର ସାଧକାଭୀଷ୍ଟସିଦ୍ଧଯେ ।
କୃପାଂ କୁରୁ ଜଗନ୍ନାଥ ଵଦ ଵେଦଵିଦାଂ ଵର ॥ 2॥

ଶ୍ରୀଭୈରଵ ଉଵାଚ।
ଗୋପନୀଯଂ ପ୍ରଯତ୍ନେନ ତତ୍ତ୍ଵାତ୍ ତତ୍ତ୍ଵଂ ପରାତ୍ପରମ୍ ।
ଏଷ ସିଦ୍ଧିକରଃ ସମ୍ଯକ୍ କିମଥୋ କଥଯାମ୍ଯହମ୍ ॥ 3॥

ମହାକାଲମହଂ ଵନ୍ଦେ ସର୍ଵସିଦ୍ଧିପ୍ରଦାଯକମ୍ ।
ଦେଵଦାନଵଗନ୍ଧର୍ଵକିନ୍ନରପରିସେଵିତମ୍ ॥ 4॥

କଵଚଂ ତତ୍ତ୍ଵଦେଵସ୍ଯ ପଠନାଦ୍ ଘୋରଦର୍ଶନେ ।
ସତ୍ଯଂ ଭଵତି ସାନ୍ନିଧ୍ଯଂ କଵଚସ୍ତଵନାନ୍ତରାତ୍ ॥ 5॥

ସିଦ୍ଧିଂ ଦଦାତି ସା ତୁଷ୍ଟା କୃତ୍ଵା କଵଚମୁତ୍ତମମ୍ ।
ସାମ୍ରାଜ୍ଯତ୍ଵଂ ପ୍ରିଯଂ ଦତ୍ଵା ପୁତ୍ରଵତ୍ ପରିପାଲଯେତ୍ ॥ 6॥

କଵଚସ୍ଯ ଋଷିର୍ଦେଵୀ କାଲିକା ଦକ୍ଷିଣା ତଥା
ଵିରାଟ୍ଛନ୍ଦଃ ସୁଵିଜ୍ଞେଯଂ ମହାକାଲସ୍ତୁ ଦେଵତା ।
କାଲିକା ସାଧନେ ଚୈଵ ଵିନିଯୋଗଃ ପ୍ରକୀର୍ତ୍ତିତଃ ॥ 7॥

ଓଁ ଶ୍ମଶାନସ୍ଥୋ ମହାରୁଦ୍ରୋ ମହାକାଲୋ ଦିଗମ୍ବରଃ ।
କପାଲକର୍ତୃକା ଵାମେ ଶୂଲଂ ଖଟ୍ଵାଙ୍ଗଂ ଦକ୍ଷିଣେ ॥ 8॥

ଭୁଜଙ୍ଗଭୂଷିତେ ଦେଵି ଭସ୍ମାସ୍ଥିମଣିମଣ୍ଡିତଃ ।
ଜ୍ଵଲତ୍ପାଵକମଧ୍ଯସ୍ଥୋ ଭସ୍ମଶଯ୍ଯାଵ୍ଯଵସ୍ଥିତଃ ॥ 9॥

ଵିପରୀତରତାଂ ତତ୍ର କାଲିକାଂ ହୃଦଯୋପରି ।
ପେଯଂ ଖାଦ୍ଯଂ ଚ ଚୋଷ୍ଯଂ ଚ ତୌ କୃତ୍ଵା ତୁ ପରସ୍ପରମ୍ ।
ଏଵଂ ଭକ୍ତ୍ଯା ଯଜେଦ୍ ଦେଵଂ ସର୍ଵସିଦ୍ଧିଃ ପ୍ରଜାଯତେ ॥ 10॥

ପ୍ରଣଵଂ ପୂର୍ଵମୁଚ୍ଚାର୍ଯ ମହାକାଲାଯ ତତ୍ପଦମ୍ ।
ନମଃ ପାତୁ ମହାମନ୍ତ୍ରଃ ସର୍ଵଶାସ୍ତ୍ରାର୍ଥପାରଗଃ ॥ 11॥

ଅଷ୍ଟକ୍ଷରୋ ମହା ମନ୍ତ୍ରଃ ସର୍ଵାଶାପରିପୂରକଃ ।
ସର୍ଵପାପକ୍ଷଯଂ ଯାତି ଗ୍ରହଣେ ଭକ୍ତଵତ୍ସଲେ ॥ 12॥

କୂର୍ଚଦ୍ଵନ୍ଦ୍ଵଂ ମହାକାଲ ପ୍ରସୀଦେତି ପଦଦ୍ଵଯମ୍ ।
ଲଜ୍ଜାଯୁଗ୍ମଂ ଵହ୍ନିଜାଯା ସ ତୁ ରାଜେଶ୍ଵରୋ ମହାନ୍ ॥ 13॥

ମନ୍ତ୍ରଗ୍ରହଣମାତ୍ରେଣ ଭଵେତ ସତ୍ଯଂ ମହାକଵିଃ ।
ଗଦ୍ଯପଦ୍ଯମଯୀ ଵାଣୀ ଗଙ୍ଗାନିର୍ଝରିତା ତଥା ॥ 14॥

ତସ୍ଯ ନାମ ତୁ ଦେଵେଶି ଦେଵା ଗାଯନ୍ତି ଭାଵୁକାଃ ।
ଶକ୍ତିବୀଜଦ୍ଵଯଂ ଦତ୍ଵା କୂର୍ଚଂ ସ୍ଯାତ୍ ତଦନନ୍ତରମ୍ ॥ 15॥

ମହାକାଲପଦଂ ଦତ୍ଵା ମାଯାବୀଜଯୁଗଂ ତଥା ।
କୂର୍ଚମେକଂ ସମୁଦ୍ଧୃତ୍ଯ ମହାମନ୍ତ୍ରୋ ଦଶାକ୍ଷରଃ ॥ 16॥

ରାଜସ୍ଥାନେ ଦୁର୍ଗମେ ଚ ପାତୁ ମାଂ ସର୍ଵତୋ ମୁଦା ।
ଵେଦାଦିବୀଜମାଦାଯ ଭଗମାନ୍ ତଦନନ୍ତରମ୍ ॥ 17॥

ମହାକାଲାଯ ସମ୍ପ୍ରୋଚ୍ଯ କୂର୍ଚଂ ଦତ୍ଵା ଚ ଠଦ୍ଵଯମ୍ ।
ହ୍ରୀଙ୍କାରପୂର୍ଵମୁଦ୍ଧୃତ୍ଯ ଵେଦାଦିସ୍ତଦନନ୍ତରମ୍ ॥ 18॥

ମହାକାଲସ୍ଯାନ୍ତଭାଗେ ସ୍ଵାହାନ୍ତମନୁମୁତ୍ତମମ୍ ।
ଧନଂ ପୁତ୍ରଂ ସଦା ପାତୁ ବନ୍ଧୁଦାରାନିକେତନମ୍ ॥ 19॥

ପିଙ୍ଗଲାକ୍ଷୋ ମଞ୍ଜୁଯୁଦ୍ଧେ ଯୁଦ୍ଧେ ନିତ୍ଯଂ ଜଯପ୍ରଦଃ ।
ସମ୍ଭାଵ୍ଯଃ ସର୍ଵଦୁଷ୍ଟଘ୍ନଃ ପାତୁ ସ୍ଵସ୍ଥାନଵଲ୍ଲଭଃ ॥ 20॥

ଇତି ତେ କଥିତଂ ତୁଭ୍ଯଂ ଦେଵାନାମପି ଦୁର୍ଲଭମ୍ ।
ଅନେନ ପଠନାଦ୍ ଦେଵି ଵିଘ୍ନନାଶୋ ଯଥା ଭଵେତ୍ ॥ 21॥

ସମ୍ପୂଜକଃ ଶୁଚିସ୍ନାତଃ ଭକ୍ତିଯୁକ୍ତଃ ସମାହିତଃ ।
ସର୍ଵଵ୍ଯାଧିଵିନିର୍ମୁକ୍ତଃ ଵୈରିମଧ୍ଯେ ଵିଶେଷତଃ ॥ 22॥

ମହାଭୀମଃ ସଦା ପାତୁ ସର୍ଵସ୍ଥାନ ଵଲ୍ଲଭମ୍ । ?
କାଲୀପାର୍ଶ୍ଵସ୍ଥିତୋ ଦେଵଃ ସର୍ଵଦା ପାତୁ ମେ ମୁଖେ ॥ 23॥
॥ ଫଲ ଶ୍ରୁତି॥
ପଠନାତ୍ କାଲିକାଦେଵୀ ପଠେତ୍ କଵଚମୁତ୍ତମମ୍ ।
ଶ୍ରୁଣୁଯାଦ୍ ଵା ପ୍ରଯତ୍ନେନ ସଦାଽଽନନ୍ଦମଯୋ ଭଵେତ୍ ॥ 1॥
ଶ୍ରଦ୍ଧଯାଽଶ୍ରଦ୍ଧଯା ଵାପି ପଠନାତ୍ କଵଚସ୍ଯ ଯତ୍ ।
ସର୍ଵସିଦ୍ଧିମଵାପ୍ନୋତି ଯଦ୍ଯନ୍ମନସି ଵର୍ତତେ ॥ 2॥
ବିଲ୍ଵମୂଲେ ପଠେଦ୍ ଯସ୍ତୁ ପଠନାଦ୍ କଵଚସ୍ଯ ଯତ୍ ।
ତ୍ରିସନ୍ଧ୍ଯଂ ପଠନାଦ୍ ଦେଵି ଭଵେନ୍ନିତ୍ଯଂ ମହାକଵିଃ ॥ 3॥
କୁମାରୀଂ ପୂଜଯିତ୍ଵା ତୁ ଯଃ ପଠେଦ୍ ଭାଵତତ୍ପରଃ ।
ନ କିଞ୍ଚିଦ୍ ଦୁର୍ଲଭଂ ତସ୍ଯ ଦିଵି ଵା ଭୁଵି ମୋଦତେ ॥ 4॥
ଦୁର୍ଭିକ୍ଷେ ରାଜପୀଡାଯାଂ ଗ୍ରାମେ ଵା ଵୈରିମଧ୍ଯକେ ।
ଯତ୍ର ଯତ୍ର ଭଯଂ ପ୍ରାପ୍ତଃ ସର୍ଵତ୍ର ପ୍ରପଠେନ୍ନରଃ ॥ 5॥
ତତ୍ର ତତ୍ରାଭଯଂ ତସ୍ଯ ଭଵତ୍ଯେଵ ନ ସଂଶଯଃ ।
ଵାମପାର୍ଶ୍ଵେ ସମାନୀଯ ଶୋଭିତାଂ ଵରକାମିନୀମ୍ ॥ 6॥
ଶ୍ରଦ୍ଧଯାଽଶ୍ରଦ୍ଧଯା ଵାପି ପଠନାତ୍ କଵଚସ୍ଯ ତୁ ।
ପ୍ରଯତ୍ନତଃ ପଠେଦ୍ ଯସ୍ତୁ ତସ୍ଯ ସିଦ୍ଧିଃ କରେ ସ୍ଥିତା ॥ 7॥
ଇଦଂ କଵଚମଜ୍ଞାତ୍ଵା କାଲଂ ଯୋ ଭଜତେ ନରଃ ।
ନୈଵ ସିଦ୍ଧିର୍ଭଵେତ୍ ତସ୍ଯ ଵିଘ୍ନସ୍ତସ୍ଯ ପଦେ ପଦେ ।
ଆଦୌ ଵର୍ମ ପଠିତ୍ଵା ତୁ ତସ୍ଯ ସିଦ୍ଧିର୍ଭଵିଷ୍ଯତି ॥ 8॥