śrī mātaṅgī aṣṭottara śata nāmā stotraṃ

bhagavan śrotumicchāmi mātaṅgyāḥ śatanāmakam |
yadguhyaṃ sarvatantreṣu kenāpi na prakāśitam || 1 ||

śṛṇu devi pravakṣyāmi rahasyātirahasyakam |
nākhyeyaṃ yatra kutrāpi paṭhanīyaṃ parātparam || 2 ||

yasyaikavārapaṭhanātsarve vighnā upadravāḥ |
naśyanti tatkṣaṇāddevi vahninā tūlarāśivat || 3 ||

prasannā jāyate devī mātaṅgī cāsya pāṭhataḥ |
sahasranāmapaṭhane yatphalaṃ parikīrtitam |
tatkoṭiguṇitaṃ devīnāmāṣṭaśatakaṃ śubham || 4 ||
asya śrīmātaṅgyaṣṭottaraśatanāmastotrasya bhagavānmataṅga ṛṣiḥ anuṣṭupchandaḥ śrīmātaṅgī devatā śrīmātaṅgī prītaye jape viniyogaḥ |
mahāmattamātaṅginī siddhirūpā
tathā yoginī bhadrakālī ramā ca |
bhavānī bhavaprītidā bhūtiyuktā
bhavārādhitā bhūtisampatkarī ca || 1 ||
dhanādhīśamātā dhanāgāradṛṣṭi-
-rdhaneśārcitā dhīravāpī varāṅgī |
prakṛṣṭā prabhārūpiṇī kāmarūpā
prahṛṣṭā mahākīrtidā karṇanālī || 2 ||
karālī bhagā ghorarūpā bhagāṅgī
bhagāhvā bhagaprītidā bhīmarūpā |
bhavānī mahākauśikī kośapūrṇā
kiśorī kiśorapriyā nandīhā || 3 ||
mahākāraṇā'kāraṇā karmaśīlā
kapālī prasiddhā mahāsiddhakhaṇḍā |
makārapriyā mānarūpā maheśī
malollāsinī lāsyalīlālayāṅgī || 4 ||
kṣamā kṣemaśīlā kṣapākāriṇī cā-
-'kṣayaprītidā bhūtiyuktā bhavānī |
bhavārādhitā bhūtisatyātmikā ca
prabhodbhāsitā bhānubhāsvatkarā ca || 5 ||
dharādhīśamātā dharāgāradṛṣṭi-
-rdhareśārcitā dhīvarā dhīvarāṅgī |
prakṛṣṭā prabhārūpiṇī prāṇarūpā
prakṛṣṭasvarūpā svarūpapriyā ca || 6 ||
calatkuṇḍalā kāminī kāntayuktā
kapālā'calā kālakoddhāriṇī ca |
kadambapriyā koṭarī koṭadehā
kramā kīrtidā karṇarūpā ca kākṣmīḥ || 7 ||
kṣamāṅgī kṣayapremarūpā kṣayā ca
kṣayākṣā kṣayāhvā kṣayaprāntarā ca |
kṣavatkāminī kṣāriṇī kṣīrapūrṇā
śivāṅgī ca śākambharī śākadehā || 8 ||
mahāśākayajñā phalaprāśakā ca
śakāhvā'śakāhvā śakākhyā śakā ca |
śakākṣāntaroṣā suroṣā surekhā
mahāśeṣayajñopavītapriyā ca || 9 ||
jayantī jayā jāgratī yogyarūpā
jayāṅgā japadhyānasantuṣṭasañjñā |
jayaprāṇarūpā jayasvarṇadehā
jayajvālinī yāminī yāmyarūpā || 10 ||
jaganmātṛrūpā jagadrakṣaṇā ca
svadhāvauṣaḍantā vilambā'vilambā |
ṣaḍaṅgā mahālambarūpāsihastā-
padāhāriṇīhāriṇī hāriṇī ca || 11 ||
mahāmaṅgalā maṅgalapremakīrti-
-rniśumbhacchidā śumbhadarpāpahā ca |
tathā''nandabījādimuktisvarūpā
tathā caṇḍamuṇḍāpadā mukhyacaṇḍā || 12 ||
pracaṇḍā'pracaṇḍā mahācaṇḍavegā
calaccāmarā cāmarā candrakīrtiḥ |
sucāmīkarā citrabhūṣojjvalāṅgī
susaṅgītagītā ca pāyādapāyāt || 13 ||