శ్రీ రుద్రం లఘున్యాసమ్

ఓం అథాత్మానగ్ం శివాత్మానం శ్రీ రుద్రరూప-న్ధ్యాయేత్ ॥
శుద్ధస్ఫటిక సఙ్కాశ-న్త్రినేత్ర-మ్పఞ్చ వక్త్రకమ్ ।
గఙ్గాధర-న్దశభుజం సర్వాభరణ భూషితమ్ ॥
నీలగ్రీవం శశాఙ్కాఙ్క-న్నాగ యజ్ఞోప వీతినమ్ ।
వ్యాఘ్ర చర్మోత్తరీయ-ఞ్చ వరేణ్యమభయ ప్రదమ్ ॥
కమణ్డల్-వక్ష సూత్రాణా-న్ధారిణం శూలపాణినమ్ ।
జ్వలన్త-మ్పిఙ్గలజటా శిఖా-ముద్యోత ధారిణమ్ ॥
వృష స్కన్ధ సమారూఢం ఉమా దేహార్ధ ధారిణమ్ ।
అమృతేనాప్లుతం శాన్త-న్దివ్యభోగ సమన్వితమ్ ॥
దిగ్దేవతా సమాయుక్తం సురాసుర నమస్కృతమ్ ।
నిత్య-ఞ్చ శాశ్వతం శుద్ధ-న్ధ్రువ-మక్షర-మవ్యయమ్ ।
సర్వ వ్యాపిన-మీశానం రుద్రం-వైఁ విశ్వరూపిణమ్ ।
ఏవ-న్ధ్యాత్వా ద్విజ-స్సమ్య-క్తతో యజనమారభేత్ ॥
అథాతో రుద్ర స్నానార్చనాభిషేక విధిం-వ్యాఁఖ్యాస్యామః ।
ఆదిత ఏవ తీర్థే స్నాత్వా,
ఉదేత్య శుచిః ప్రయతో బ్రహ్మచారీ శుక్లవాసా దేవాభిముఖ-స్స్థిత్వా,
ఆత్మని దేవతా-స్స్థాపయేత్ ॥
ప్రజననే బ్రహ్మా తిష్ఠతు ।
పాదయోర్విష్ణుస్తిష్ఠతు ।
హస్తయోర్హరస్తిష్ఠతు ।
బాహ్వోరిన్ద్రస్తిష్ఠతు ।
జఠరే-ఽఅగ్నిస్తిష్ఠతు ।
హృదయే శివస్తిష్ఠతు ।
కణ్ఠే వసవస్తిష్ఠన్తు ।
వక్త్రే సరస్వతీ తిష్ఠతు ।
నాసికయో-ర్వాయుస్తిష్ఠతు ।
నయనయో-శ్చన్ద్రాదిత్యౌ తిష్ఠేతామ్ ।
కర్ణయోరశ్వినౌ తిష్ఠేతామ్ ।
లలాటే రుద్రాస్తిష్ఠన్తు ।
మూర్ధ్న్యాదిత్యాస్తిష్ఠన్తు ।
శిరసి మహాదేవస్తిష్ఠతు ।
శిఖాయాం-వాఁమదేవాస్తిష్ఠతు ।
పృష్ఠే పినాకీ తిష్ఠతు ।
పురత-శ్శూలీ తిష్ఠతు ।
పార్శ్వయో-శ్శివాశఙ్కరౌ తిష్ఠేతామ్ ।
సర్వతో వాయుస్తిష్ఠతు ।
తతో బహి-స్సర్వతో-ఽగ్నిర్జ్వాలామాలా-పరివృతస్తిష్ఠతు ।
సర్వేష్వఙ్గేషు సర్వా దేవతా యథాస్థాన-న్తిష్ఠన్తు ।
మాగ్ం రక్షన్తు ।
అగ్నిర్మే వాచి శ్రితః । వాఘృదయే । హృదయ-మ్మయి । అహమమృతే । అమృత-మ్బ్రహ్మణి ।
వాయుర్మే ప్రాణే శ్రితః । ప్రాణో హృదయే । హృదయ-మ్మయి । అహమమృతే । అమృత-మ్బ్రహ్మణి ।
సూర్యో మే చక్షుషి శ్రితః । చక్షుర్హృదయే । హృదయ-మ్మయి । అహమమృతే । అమృత-మ్బ్రహ్మణి ।
చన్ద్రమా మే మనసి శ్రితః । మనో హృదయే । హృదయ-మ్మయి । అహమమృతే । అమృత-మ్బ్రహ్మణి ।
దిశో మే శ్రోత్రే శ్రితాః । శ్రోత్రగ్ం హృదయే । హృదయ-మ్మయి । అహమమృతే । అమృత-మ్బ్రహ్మణి ।
ఆపోమే రేతసి శ్రితాః । రేతో హృదయే । హృదయ-మ్మయి । అహమమృతే । అమృత-మ్బ్రహ్మణి ।
పృథివీ మే శరీరే శ్రితా । శరీరగ్ం హృదయే । హృదయ-మ్మయి । అహమమృతే । అమృత-మ్బ్రహ్మణి ।
ఓషధి వనస్పతయో మే లోమసు శ్రితాః । లోమాని హృదయే । హృదయ-మ్మయి । అహమమృతే । అమృత-మ్బ్రహ్మణి ।
ఇన్ద్రో మే బలే శ్రితః । బలగ్ం హృదయే । హృదయ-మ్మయి । అహమమృతే । అమృత-మ్బ్రహ్మణి ।
పర్జన్యో మే మూర్ద్ని శ్రితః । మూర్ధా హృదయే । హృదయ-మ్మయి । అహమమృతే । అమృత-మ్బ్రహ్మణి ।
ఈశానో మే మన్యౌ శ్రితః । మన్యుర్హృదయే । హృదయ-మ్మయి । అహమమృతే । అమృత-మ్బ్రహ్మణి ।
ఆత్మా మ ఆత్మని శ్రితః । ఆత్మా హృదయే । హృదయ-మ్మయి । అహమమృతే । అమృత-మ్బ్రహ్మణి ।
పునర్మ ఆత్మా పునరాయు రాగాత్ । పునః ప్రాణః పునరాకూతమాగాత్ । వైశ్వానరో రశ్మిభిర్వావృధానః । అన్తస్తిష్ఠత్వమృతస్య గోపాః ॥
అస్య శ్రీ రుద్రాధ్యాయ ప్రశ్న మహామన్త్రస్య,
అఘోర ఋషిః,
అనుష్టు-ప్ఛన్దః,
సఙ్కర్షణ మూర్తి స్వరూపో యో-ఽసావాదిత్యః పరమపురుష-స్స ఏష రుద్రో దేవతా ।
నమ-శ్శివాయేతి బీజమ్ ।
శివతరాయేతి శక్తిః ।
మహాదేవాయేతి కీలకమ్ ।
శ్రీ సామ్బ సదాశివ ప్రసాద సిద్ధ్యర్థే జపే వినియోగః ॥
ఓం అగ్నిహోత్రాత్మనే అఙ్గుష్ఠాభ్యా-న్నమః ।
దర్శపూర్ణ మాసాత్మనే తర్జనీభ్యా-న్నమః ।
చాతుర్మాస్యాత్మనే మధ్యమాభ్యా-న్నమః ।
నిరూఢ పశుబన్ధాత్మనే అనామికాభ్యా-న్నమః ।
జ్యోతిష్టోమాత్మనే కనిష్ఠికాభ్యా-న్నమః ।
సర్వక్రత్వాత్మనే కరతల కరపృష్ఠాభ్యా-న్నమః ॥
అగ్నిహోత్రాత్మనే హృదయాయ నమః ।
దర్శపూర్ణ మాసాత్మనే శిరసే స్వాహా ।
చాతుర్మాస్యాత్మనే శిఖాయై వషట్ ।
నిరూఢ పశుబన్ధాత్మనే కవచాయ హుమ్ ।
జ్యోతిష్టోమాత్మనే నేత్రత్రయాయ వౌషట్ ।
సర్వక్రత్వాత్మనే అస్త్రాయఫట్ । భూర్భువస్సువరోమితి దిగ్బన్ధః ॥
ధ్యానం
ఆపాతాల-నభస్స్థలాన్త-భువన-బ్రహ్మాణ్డ-మావిస్ఫురత్-
జ్యోతి-స్స్ఫాటిక-లిఙ్గ-మౌలి-విలసత్-పూర్ణేన్దు-వాన్తామృతైః ।
అస్తోకాప్లుత-మేక-మీశ-మనిశం రుద్రాను-వాకాఞ్జపన్
ధ్యాయే-దీప్సిత-సిద్ధయే ధ్రువపదం-విఁప్రో-ఽభిషిఞ్చే-చ్చివమ్ ॥
బ్రహ్మాణ్డ వ్యాప్తదేహా భసిత హిమరుచా భాసమానా భుజఙ్గైః
కణ్ఠే కాలాః కపర్దాః కలిత-శశికలా-శ్చణ్డ కోదణ్డ హస్తాః ।
త్ర్యక్షా రుద్రాక్షమాలాః ప్రకటితవిభవా-శ్శామ్భవా మూర్తిభేదాః
రుద్రా-శ్శ్రీరుద్రసూక్త-ప్రకటితవిభవా నః ప్రయచ్చన్తు సౌఖ్యమ్ ॥
ఓ-ఙ్గణానా-న్త్వా గణపతిగ్ం హవామహే కవి-ఙ్కవీనాముపమశ్రవస్తమమ్ ।
జ్యేష్ఠరాజ-మ్బ్రహ్మణా-మ్బ్రహ్మణస్పత ఆ నః శృణ్వన్నూతిభిస్సీద సాదనమ్ ॥
మహాగణపతయే నమః ॥
శ-ఞ్చ మే మయశ్చ మే ప్రియ-ఞ్చ మే-ఽనుకామశ్చ మే కామశ్చ మే సౌమనసశ్చ మే భద్ర-ఞ్చ మే శ్రేయశ్చ మే వస్యశ్చ మే యశశ్చ మే భగశ్చ మే ద్రవిణ-ఞ్చ మే యన్తా చ మే ధర్తా చ మే క్షేమశ్చ మే ధృతిశ్చ మే విశ్వ-ఞ్చ మే మహశ్చ మే సంవిఁచ్చ మే జ్ఞాత్ర-ఞ్చ మే సూశ్చ మే ప్రసూశ్చ మే సీర-ఞ్చ మే లయశ్చ మ ఋత-ఞ్చ మే-ఽమృత-ఞ్చ మే-ఽయక్ష్మ-ఞ్చ మే-ఽనామయచ్చ మే జీవాతుశ్చ మే దీర్ఘాయుత్వ-ఞ్చ మే-ఽనమిత్ర-ఞ్చ మే-ఽభయ-ఞ్చ మే సుగ-ఞ్చ మే శయన-ఞ్చ మే సూషా చ మే సుదిన-ఞ్చ మే ॥
ఓం శాన్తి-శ్శాన్తి-శ్శాన్తిః ॥