ଶ୍ରୀମଦ୍ଭାଗଵତମ୍ ୧୦.୨୧

ଶ୍ରୀଶୁକ ଉଵାଚ
ଇତ୍ଥଂ ଶରତ୍ସ୍ଵଚ୍ଛଜଲଂ ପଦ୍ମାକରସୁଗନ୍ଧିନା ।
ନ୍ଯଵିଶଦ୍ ଵାଯୁନା ଵାତଂ ସଗୋଗୋପାଲକୋଽଚ୍ଯୁତଃ ॥ ୧ ॥

କୁସୁମିତଵନରାଜିଶୁଷ୍ମିଭୃଙ୍ଗ-
ଦ୍ଵିଜକୁଲଘୁଷ୍ଟସରଃସରିନ୍ମହୀଧ୍ରମ୍ ।
ମଧୁପତିରଵଗାହ୍ଯ ଚାରଯନ୍ ଗାଃ
ସହପଶୁପାଲବଲଶ୍ଚୁକୂଜ ଵେଣୁମ୍ ॥ ୨ ॥

ତଦ୍ ଵ୍ରଜସ୍ତ୍ରିଯ ଆଶ୍ରୁତ୍ଯ ଵେଣୁଗୀତଂ ସ୍ମରୋଦଯମ୍ ।
କାଶ୍ଚିତ୍ପରୋକ୍ଷଂ କୃଷ୍ଣସ୍ଯ ସ୍ଵସଖୀଭ୍ଯୋଽନ୍ଵଵର୍ଣଯନ୍ ॥ ୩ ॥

ତଦ୍ଵର୍ଣଯିତୁମାରବ୍ଧାଃ ସ୍ମରନ୍ତ୍ଯଃ କୃଷ୍ଣଚେଷ୍ଟିତମ୍ ।
ନାଶକନ୍ ସ୍ମରଵେଗେନ ଵିକ୍ଷିପ୍ତମନସୋ ନୃପ ॥ ୪ ॥

ବର୍ହାପୀଡଂ ନଟଵରଵପୁଃ କର୍ଣଯୋଃ କର୍ଣିକାରଂ
ବିଭ୍ରଦ୍ ଵାସଃ କନକକପିଶଂ ଵୈଜଯନ୍ତୀଂ ଚ ମାଲାମ୍ ।
ରନ୍ଧ୍ରାନ୍ ଵେଣୋରଧରସୁଧଯା ପୂରଯନ୍ଗୋପଵୃନ୍ଦୈ-
ର୍ଵୃନ୍ଦାରଣ୍ଯଂ ସ୍ଵପଦରମଣଂ ପ୍ରାଵିଶଦ୍ ଗୀତକୀର୍ତିଃ ॥ ୫ ॥

ଇତି ଵେଣୁରଵଂ ରାଜନ୍ ସର୍ଵଭୂତମନୋହରମ୍ ।
ଶ୍ରୁତ୍ଵା ଵ୍ରଜସ୍ତ୍ରିଯଃ ସର୍ଵା ଵର୍ଣଯନ୍ତ୍ଯୋଽଭିରେଭିରେ ॥ ୬ ॥

ଶ୍ରୀଗୋପ୍ଯ ଊଚୁଃ
ଅକ୍ଷଣ୍ଵତାଂ ଫଲମିଦଂ ନ ପରଂ ଵିଦାମଃ
ସଖ୍ଯଃ ପଶୂନନୁ ଵିଵେଶଯତୋର୍ଵଯସ୍ଯୈଃ ।
ଵକ୍ତ୍ରଂ ଵ୍ରଜେଶସୁତଯୋରନଵେଣୁ ଜୁଷ୍ଟଂ
ଯୈର୍ଵା ନିପୀତମନୁରକ୍ତକଟାକ୍ଷମୋକ୍ଷମ୍ ॥ ୭ ॥

ଚୂତପ୍ରଵାଲବର୍ହସ୍ତବକୋତ୍ପଲାବ୍ଜ-
ମାଲାନୁପୃକ୍ତପରିଧାନଵିଚିତ୍ରଵେଶୌ ।
ମଧ୍ଯେ ଵିରେଜତୁରଲଂ ପଶୁପାଲଗୋଷ୍ଠ୍ଯାଂ
ରଙ୍ଗେ ଯଥା ନଟଵରୌ କ୍ଵ ଚ ଗାଯମାନୌ ॥ ୮ ॥

ଗୋପ୍ଯଃ କିମାଚରଦଯଂ କୁଶଲଂ ସ୍ମ ଵେଣୁ-
ର୍ଦାମୋଦରାଧରସୁଧାମପି ଗୋପିକାନାମ୍ ।
ଭୁଙ୍କ୍ତେ ସ୍ଵଯଂ ଯଦଵଶିଷ୍ଟରସଂ ହ୍ରଦିନ୍ଯୋ
ହୃଷ୍ଯତ୍ତ୍ଵଚୋଽଶ୍ରୁ ମୁମୁଚୁସ୍ତରଵୋ ଯଥାର୍ଯାଃ ॥ ୯ ॥

ଵୃନ୍ଦାଵନଂ ସଖି ଭୁଵୋ ଵିତନୋତି କୀର୍ତିଂ
ଯଦ୍ ଦେଵକୀସୁତପଦାମ୍ବୁଜଲବ୍ଧଲକ୍ଷ୍ମି ।
ଗୋଵିନ୍ଦଵେଣୁମନୁ ମତ୍ତମଯୂରନୃତ୍ଯଂ
ପ୍ରେକ୍ଷ୍ଯାଦ୍ରିସାନ୍ଵଵରତାନ୍ଯସମସ୍ତସତ୍ତ୍ଵମ୍ ॥ ୧୦ ॥

ଧନ୍ଯାଃ ସ୍ମ ମୂଢଗତଯୋଽପି ହରିଣ୍ଯ ଏତା
ଯା ନନ୍ଦନନ୍ଦନମୁପାତ୍ତଵିଚିତ୍ରଵେଶମ୍ ।
ଆକର୍ଣ୍ଯ ଵେଣୁରଣିତଂ ସହକୃଷ୍ଣସାରାଃ
ପୂଜାଂ ଦଧୁର୍ଵିରଚିତାଂ ପ୍ରଣଯାଵଲୋକୈଃ ॥ ୧୧ ॥

କୃଷ୍ଣଂ ନିରୀକ୍ଷ୍ଯ ଵନିତୋତ୍ସଵରୂପଶୀଲଂ
ଶ୍ରୁତ୍ଵା ଚ ତତ୍କ୍ଵଣିତଵେଣୁଵିଵିକ୍ତଗୀତମ୍ ।
ଦେଵ୍ଯୋ ଵିମାନଗତଯଃ ସ୍ମରନୁନ୍ନସାରା
ଭ୍ରଶ୍ଯତ୍ପ୍ରସୂନକବରା ମୁମୁହୁର୍ଵିନୀଵ୍ଯଃ ॥ ୧୨ ॥

ଗାଵଶ୍ଚ କୃଷ୍ଣମୁଖନିର୍ଗତଵେଣୁଗୀତ-
ପୀଯୂଷମୁତ୍ତଭିତକର୍ଣପୁଟୈଃ ପିବନ୍ତ୍ଯଃ ।
ଶାଵାଃ ସ୍ନୁତସ୍ତନପଯଃକଵଲାଃ ସ୍ମ ତସ୍ଥୁ-
ର୍ଗୋଵିନ୍ଦମାତ୍ମନି ଦୃଶାଶ୍ରୁକଲାଃ ସ୍ପୃଶନ୍ତ୍ଯଃ ॥ ୧୩ ॥

ପ୍ରାଯୋ ବତାମ୍ବ ଵିହଗା ମୁନଯୋ ଵନେଽସ୍ମିନ୍
କୃଷ୍ଣେକ୍ଷିତଂ ତଦୁଦିତଂ କଲଵେଣୁଗୀତମ୍ ।
ଆରୁହ୍ଯ ଯେ ଦ୍ରୁମଭୁଜାନ୍ ରୁଚିରପ୍ରଵାଲାନ୍
ଶୃଣ୍ଵନ୍ତି ମୀଲିତଦୃଶୋ ଵିଗତାନ୍ଯଵାଚଃ ॥ ୧୪ ॥

ନଦ୍ଯସ୍ତଦା ତଦୁପଧାର୍ଯ ମୁକୁନ୍ଦଗୀତ-
ମାଵର୍ତଲକ୍ଷିତମନୋଭଵଭଗ୍ନଵେଗାଃ ।
ଆଲିଙ୍ଗନସ୍ଥଗିତମୂର୍ମିଭୁଜୈର୍ମୁରାରେ-
ର୍ଗୃହ୍ଣନ୍ତି ପାଦଯୁଗଲଂ କମଲୋପହାରାଃ ॥ ୧୫ ॥

ଦୃଷ୍ଟ୍ଵାତପେ ଵ୍ରଜପଶୂନ୍ ସହ ରାମଗୋପୈଃ
ସଞ୍ଚାରଯନ୍ତମନୁ ଵେଣୁମୁଦୀରଯନ୍ତମ୍ ।
ପ୍ରେମପ୍ରଵୃଦ୍ଧ ଉଦିତଃ କୁସୁମାଵଲୀଭିଃ
ସଖ୍ଯୁର୍ଵ୍ଯଧାତ୍ ସ୍ଵଵପୁଷାମ୍ବୁଦ ଆତପତ୍ରମ୍ ॥ ୧୬ ॥

ପୂର୍ଣାଃ ପୁଲିନ୍ଦ୍ଯ ଉରୁଗାଯପଦାବ୍ଜରାଗ-
ଶ୍ରୀକୁଙ୍କୁମେନ ଦଯିତାସ୍ତନମଣ୍ଡିତେନ ।
ତଦ୍ଦର୍ଶନସ୍ମରରୁଜସ୍ତୃଣରୂଷିତେନ
ଲିମ୍ପନ୍ତ୍ଯ ଆନନକୁଚେଷୁ ଜହୁସ୍ତଦାଧିମ୍ ॥ ୧୭ ॥

ହନ୍ତାଯମଦ୍ରିରବଲା ହରିଦାସଵର୍ଯୋ
ଯଦ୍ ରାମକୃଷ୍ଣଚରଣସ୍ପରଶପ୍ରମୋଦଃ ।
ମାନଂ ତନୋତି ସହଗୋଗଣଯୋସ୍ତଯୋର୍ଯତ୍
ପାନୀଯସୂଯଵସକନ୍ଦରକନ୍ଦମୂଲୈଃ ॥ ୧୮ ॥

ଗା ଗୋପକୈରନୁଵନଂ ନଯତୋରୁଦାର-
ଵେଣୁସ୍ଵନୈଃ କଲପଦୈସ୍ତନୁଭୃତ୍ସୁ ସଖ୍ଯଃ ।
ଅସ୍ପନ୍ଦନଂ ଗତିମତାଂ ପୁଲକସ୍ତରୁଣାଂ
ନିର୍ଯୋଗପାଶକୃତଲକ୍ଷଣଯୋର୍ଵିଚିତ୍ରମ୍ ॥ ୧୯ ॥

ଏଵଂଵିଧା ଭଗଵତୋ ଯା ଵୃନ୍ଦାଵନଚାରିଣଃ ।
ଵର୍ଣଯନ୍ତ୍ଯୋ ମିଥୋ ଗୋପ୍ଯଃ କ୍ରୀଡାସ୍ତନ୍ମଯତାଂ ଯଯୁଃ ॥ ୨୦ ॥