দেবী বৈভবাশ্চর্য অষ্টোত্তর শত নাম স্তোত্রম্

অস্য শ্রী দেবীবৈভবাশ্চর্যাষ্টোত্তরশতদিব্যনাম স্তোত্রমহামন্ত্রস্য আনন্দভৈরব ঋষিঃ, অনুষ্টুপ্ ছন্দঃ, শ্রী আনন্দভৈরবী শ্রীমহাত্রিপুরসুন্দরী দেবতা, ঐং বীজং, হ্রীং শক্তিঃ, শ্রীং কীলকং, মম শ্রীআনন্দভৈরবী শ্রীমহাত্রিপুরসুন্দরী প্রসাদসিদ্ধ্যর্থে জপে বিনিযোগঃ ।
ধ্যানম্
কুঙ্কুমপঙ্কসমাভা-
-মঙ্কুশপাশেক্ষুকোদণ্ডশরাম্ ।
পঙ্কজমধ্যনিষণ্ণাং
পঙ্কেরুহলোচনাং পরাং বন্দে ॥
পঞ্চপূজা
লং পৃথিব্যাত্মিকাযৈ গন্ধং সমর্পযামি ।
হং আকাশাত্মিকাযৈ পুষ্পৈঃ পূজযামি ।
যং বায্বাত্মিকাযৈ ধূপমাঘ্রাপযামি ।
রং অগ্ন্যাত্মিকাযৈ দীপং দর্শযামি ।
বং অমৃতাত্মিকাযৈ অমৃতং মহানৈবেদ্যং নিবেদযামি ।
সং সর্বাত্মিকাযৈ সর্বোপচারান্ সমর্পযামি ॥
ওঁ ঐং হ্রীং শ্রীম্ ।
পরমানন্দলহরী পরচৈতন্যদীপিকা ।
স্বযম্প্রকাশকিরণা নিত্যবৈভবশালিনী ॥ 1 ॥

বিশুদ্ধকেবলাখণ্ডসত্যকালাত্মরূপিণী ।
আদিমধ্যান্তরহিতা মহামাযাবিলাসিনী ॥ 2 ॥

গুণত্রযপরিচ্ছেত্রী সর্বতত্ত্বপ্রকাশিনী ।
স্ত্রীপুংসভাবরসিকা জগত্সর্গাদিলম্পটা ॥ 3 ॥

অশেষনামরূপাদিভেদচ্ছেদরবিপ্রভা ।
অনাদিবাসনারূপা বাসনোদ্যত্প্রপঞ্চিকা ॥ 4 ॥

প্রপঞ্চোপশমপ্রৌঢা চরাচরজগন্মযী ।
সমস্তজগদাধারা সর্বসঞ্জীবনোত্সুকা ॥ 5 ॥

ভক্তচেতোমযানন্তস্বার্থবৈভববিভ্রমা ।
সর্বাকর্ষণবশ্যাদিসর্বকর্মধুরন্ধরা ॥ 6 ॥

বিজ্ঞানপরমানন্দবিদ্যা সন্তানসিদ্ধিদা ।
আযুরারোগ্যসৌভাগ্যবলশ্রীকীর্তিভাগ্যদা ॥ 7 ॥

ধনধান্যমণীবস্ত্রভূষালেপনমাল্যদা ।
গৃহগ্রামমহারাজ্যসাম্রাজ্যসুখদাযিনী ॥ 8 ॥

সপ্তাঙ্গশক্তিসম্পূর্ণসার্বভৌমফলপ্রদা ।
ব্রহ্মবিষ্ণুশিবেন্দ্রাদিপদবিশ্রাণনক্ষমা ॥ 9 ॥

ভুক্তিমুক্তিমহাভক্তিবিরক্ত্যদ্বৈতদাযিনী ।
নিগ্রহানুগ্রহাধ্যক্ষা জ্ঞাননির্দ্বৈতদাযিনী ॥ 10 ॥

পরকাযপ্রবেশাদিযোগসিদ্ধিপ্রদাযিনী ।
শিষ্টসঞ্জীবনপ্রৌঢা দুষ্টসংহারসিদ্ধিদা ॥ 11 ॥

লীলাবিনির্মিতানেককোটিব্রহ্মাণ্ডমণ্ডলা ।
একানেকাত্মিকা নানারূপিণ্যর্ধাঙ্গনেশ্বরী ॥ 12 ॥

শিবশক্তিমযী নিত্যশৃঙ্গারৈকরসপ্রিযা ।
তুষ্টা পুষ্টাঽপরিচ্ছিন্না নিত্যযৌবনমোহিনী ॥ 13 ॥

সমস্তদেবতারূপা সর্বদেবাধিদেবতা ।
দেবর্ষিপিতৃসিদ্ধাদিযোগিনীভৈরবাত্মিকা ॥ 14 ॥

নিধিসিদ্ধিমণীমুদ্রা শস্ত্রাস্ত্রাযুধভাসুরা ।
ছত্রচামরবাদিত্রপতাকাব্যজনাঞ্চিতা ॥ 15 ॥

হস্ত্যশ্বরথপাদাতামাত্যসেনাসুসেবিতা ।
পুরোহিতকুলাচার্যগুরুশিষ্যাদিসেবিতা ॥ 16 ॥

সুধাসমুদ্রমধ্যোদ্যত্সুরদ্রুমনিবাসিনী ।
মণিদ্বীপান্তরপ্রোদ্যত্কদম্ববনবাসিনী ॥ 17 ॥

চিন্তামণিগৃহান্তঃস্থা মণিমণ্টপমধ্যগা ।
রত্নসিংহাসনপ্রোদ্যচ্ছিবমঞ্চাধিশাযিনী ॥ 18 ॥

সদাশিবমহালিঙ্গমূলসঙ্ঘট্টযোনিকা ।
অন্যোন্যালিঙ্গসঙ্ঘর্ষকণ্ডূসঙ্ক্ষুব্ধমানসা ॥ 19 ॥

কলোদ্যদ্বিন্দুকালিন্যাতুর্যনাদপরম্পরা ।
নাদান্তানন্দসন্দোহস্বযংব্যক্তবচোঽমৃতা ॥ 20 ॥

কামরাজমহাতন্ত্ররহস্যাচারদক্ষিণা ।
মকারপঞ্চকোদ্ভূতপ্রৌঢান্তোল্লাসসুন্দরী ॥ 21 ॥

শ্রীচক্ররাজনিলযা শ্রীবিদ্যামন্ত্রবিগ্রহা ।
অখণ্ডসচ্চিদানন্দশিবশক্ত্যৈক্যরূপিণী ॥ 22 ॥

ত্রিপুরা ত্রিপুরেশানী মহাত্রিপুরসুন্দরী ।
ত্রিপুরাবাসরসিকা ত্রিপুরাশ্রীস্বরূপিণী ॥ 23 ॥

মহাপদ্মবনান্তস্থা শ্রীমত্ত্রিপুরমালিনী ।
মহাত্রিপুরসিদ্ধাম্বা শ্রীমহাত্রিপুরাম্বিকা ॥ 24 ॥

নবচক্রক্রমাদেবী মহাত্রিপুরভৈরবী ।
শ্রীমাতা ললিতা বালা রাজরাজেশ্বরী শিবা ॥ 25 ॥

উত্পত্তিস্থিতিসংহারক্রমচক্রনিবাসিনী ।
অর্ধমের্বাত্মচক্রস্থা সর্বলোকমহেশ্বরী ॥ 26 ॥

বল্মীকপুরমধ্যস্থা জম্বূবননিবাসিনী ।
অরুণাচলশৃঙ্গস্থা ব্যাঘ্রালযনিবাসিনী ॥ 27 ॥

শ্রীকালহস্তিনিলযা কাশীপুরনিবাসিনী ।
শ্রীমত্কৈলাসনিলযা দ্বাদশান্তমহেশ্বরী ॥ 28 ॥

শ্রীষোডশান্তমধ্যস্থা সর্ববেদান্তলক্ষিতা ।
শ্রুতিস্মৃতিপুরাণেতিহাসাগমকলেশ্বরী ॥ 29 ॥

ভূতভৌতিকতন্মাত্রদেবতাপ্রাণহৃন্মযী ।
জীবেশ্বরব্রহ্মরূপা শ্রীগুণাঢ্যা গুণাত্মিকা ॥ 30 ॥

অবস্থাত্রযনির্মুক্তা বাগ্রমোমামহীমযী ।
গাযত্রীভুবনেশানীদুর্গাকাল্যাদিরূপিণী ॥ 31 ॥

মত্স্যকূর্মবরাহাদিনানারূপবিলাসিনী ।
মহাযোগীশ্বরারাধ্যা মহাবীরবরপ্রদা ॥ 32 ॥

সিদ্ধেশ্বরকুলারাধ্যা শ্রীমচ্চরণবৈভবা ॥ 33 ॥
পুনর্ধ্যানম্
কুঙ্কুমপঙ্কসমাভা-
-মঙ্কুশপাশেক্ষুকোদণ্ডশরাম্ ।
পঙ্কজমধ্যনিষণ্ণাং
পঙ্কেরুহলোচনাং পরাং বন্দে ॥