ଦେଵୀ ଵୈଭଵାଶ୍ଚର୍ଯ ଅଷ୍ଟୋତ୍ତର ଶତ ନାମ ସ୍ତୋତ୍ରମ୍

ଅସ୍ଯ ଶ୍ରୀ ଦେଵୀଵୈଭଵାଶ୍ଚର୍ଯାଷ୍ଟୋତ୍ତରଶତଦିଵ୍ଯନାମ ସ୍ତୋତ୍ରମହାମନ୍ତ୍ରସ୍ଯ ଆନନ୍ଦଭୈରଵ ଋଷିଃ, ଅନୁଷ୍ଟୁପ୍ ଛନ୍ଦଃ, ଶ୍ରୀ ଆନନ୍ଦଭୈରଵୀ ଶ୍ରୀମହାତ୍ରିପୁରସୁନ୍ଦରୀ ଦେଵତା, ଐଂ ବୀଜଂ, ହ୍ରୀଂ ଶକ୍ତିଃ, ଶ୍ରୀଂ କୀଲକଂ, ମମ ଶ୍ରୀଆନନ୍ଦଭୈରଵୀ ଶ୍ରୀମହାତ୍ରିପୁରସୁନ୍ଦରୀ ପ୍ରସାଦସିଦ୍ଧ୍ଯର୍ଥେ ଜପେ ଵିନିଯୋଗଃ ।
ଧ୍ଯାନମ୍
କୁଙ୍କୁମପଙ୍କସମାଭା-
-ମଙ୍କୁଶପାଶେକ୍ଷୁକୋଦଣ୍ଡଶରାମ୍ ।
ପଙ୍କଜମଧ୍ଯନିଷଣ୍ଣାଂ
ପଙ୍କେରୁହଲୋଚନାଂ ପରାଂ ଵନ୍ଦେ ॥
ପଞ୍ଚପୂଜା
ଲଂ ପୃଥିଵ୍ଯାତ୍ମିକାଯୈ ଗନ୍ଧଂ ସମର୍ପଯାମି ।
ହଂ ଆକାଶାତ୍ମିକାଯୈ ପୁଷ୍ପୈଃ ପୂଜଯାମି ।
ଯଂ ଵାଯ୍ଵାତ୍ମିକାଯୈ ଧୂପମାଘ୍ରାପଯାମି ।
ରଂ ଅଗ୍ନ୍ଯାତ୍ମିକାଯୈ ଦୀପଂ ଦର୍ଶଯାମି ।
ଵଂ ଅମୃତାତ୍ମିକାଯୈ ଅମୃତଂ ମହାନୈଵେଦ୍ଯଂ ନିଵେଦଯାମି ।
ସଂ ସର୍ଵାତ୍ମିକାଯୈ ସର୍ଵୋପଚାରାନ୍ ସମର୍ପଯାମି ॥
ଓଁ ଐଂ ହ୍ରୀଂ ଶ୍ରୀମ୍ ।
ପରମାନନ୍ଦଲହରୀ ପରଚୈତନ୍ଯଦୀପିକା ।
ସ୍ଵଯମ୍ପ୍ରକାଶକିରଣା ନିତ୍ଯଵୈଭଵଶାଲିନୀ ॥ 1 ॥

ଵିଶୁଦ୍ଧକେଵଲାଖଣ୍ଡସତ୍ଯକାଲାତ୍ମରୂପିଣୀ ।
ଆଦିମଧ୍ଯାନ୍ତରହିତା ମହାମାଯାଵିଲାସିନୀ ॥ 2 ॥

ଗୁଣତ୍ରଯପରିଚ୍ଛେତ୍ରୀ ସର୍ଵତତ୍ତ୍ଵପ୍ରକାଶିନୀ ।
ସ୍ତ୍ରୀପୁଂସଭାଵରସିକା ଜଗତ୍ସର୍ଗାଦିଲମ୍ପଟା ॥ 3 ॥

ଅଶେଷନାମରୂପାଦିଭେଦଚ୍ଛେଦରଵିପ୍ରଭା ।
ଅନାଦିଵାସନାରୂପା ଵାସନୋଦ୍ଯତ୍ପ୍ରପଞ୍ଚିକା ॥ 4 ॥

ପ୍ରପଞ୍ଚୋପଶମପ୍ରୌଢା ଚରାଚରଜଗନ୍ମଯୀ ।
ସମସ୍ତଜଗଦାଧାରା ସର୍ଵସଞ୍ଜୀଵନୋତ୍ସୁକା ॥ 5 ॥

ଭକ୍ତଚେତୋମଯାନନ୍ତସ୍ଵାର୍ଥଵୈଭଵଵିଭ୍ରମା ।
ସର୍ଵାକର୍ଷଣଵଶ୍ଯାଦିସର୍ଵକର୍ମଧୁରନ୍ଧରା ॥ 6 ॥

ଵିଜ୍ଞାନପରମାନନ୍ଦଵିଦ୍ଯା ସନ୍ତାନସିଦ୍ଧିଦା ।
ଆଯୁରାରୋଗ୍ଯସୌଭାଗ୍ଯବଲଶ୍ରୀକୀର୍ତିଭାଗ୍ଯଦା ॥ 7 ॥

ଧନଧାନ୍ଯମଣୀଵସ୍ତ୍ରଭୂଷାଲେପନମାଲ୍ଯଦା ।
ଗୃହଗ୍ରାମମହାରାଜ୍ଯସାମ୍ରାଜ୍ଯସୁଖଦାଯିନୀ ॥ 8 ॥

ସପ୍ତାଙ୍ଗଶକ୍ତିସମ୍ପୂର୍ଣସାର୍ଵଭୌମଫଲପ୍ରଦା ।
ବ୍ରହ୍ମଵିଷ୍ଣୁଶିଵେନ୍ଦ୍ରାଦିପଦଵିଶ୍ରାଣନକ୍ଷମା ॥ 9 ॥

ଭୁକ୍ତିମୁକ୍ତିମହାଭକ୍ତିଵିରକ୍ତ୍ଯଦ୍ଵୈତଦାଯିନୀ ।
ନିଗ୍ରହାନୁଗ୍ରହାଧ୍ଯକ୍ଷା ଜ୍ଞାନନିର୍ଦ୍ଵୈତଦାଯିନୀ ॥ 10 ॥

ପରକାଯପ୍ରଵେଶାଦିଯୋଗସିଦ୍ଧିପ୍ରଦାଯିନୀ ।
ଶିଷ୍ଟସଞ୍ଜୀଵନପ୍ରୌଢା ଦୁଷ୍ଟସଂହାରସିଦ୍ଧିଦା ॥ 11 ॥

ଲୀଲାଵିନିର୍ମିତାନେକକୋଟିବ୍ରହ୍ମାଣ୍ଡମଣ୍ଡଲା ।
ଏକାନେକାତ୍ମିକା ନାନାରୂପିଣ୍ଯର୍ଧାଙ୍ଗନେଶ୍ଵରୀ ॥ 12 ॥

ଶିଵଶକ୍ତିମଯୀ ନିତ୍ଯଶୃଙ୍ଗାରୈକରସପ୍ରିଯା ।
ତୁଷ୍ଟା ପୁଷ୍ଟାଽପରିଚ୍ଛିନ୍ନା ନିତ୍ଯଯୌଵନମୋହିନୀ ॥ 13 ॥

ସମସ୍ତଦେଵତାରୂପା ସର୍ଵଦେଵାଧିଦେଵତା ।
ଦେଵର୍ଷିପିତୃସିଦ୍ଧାଦିଯୋଗିନୀଭୈରଵାତ୍ମିକା ॥ 14 ॥

ନିଧିସିଦ୍ଧିମଣୀମୁଦ୍ରା ଶସ୍ତ୍ରାସ୍ତ୍ରାଯୁଧଭାସୁରା ।
ଛତ୍ରଚାମରଵାଦିତ୍ରପତାକାଵ୍ଯଜନାଞ୍ଚିତା ॥ 15 ॥

ହସ୍ତ୍ଯଶ୍ଵରଥପାଦାତାମାତ୍ଯସେନାସୁସେଵିତା ।
ପୁରୋହିତକୁଲାଚାର୍ଯଗୁରୁଶିଷ୍ଯାଦିସେଵିତା ॥ 16 ॥

ସୁଧାସମୁଦ୍ରମଧ୍ଯୋଦ୍ଯତ୍ସୁରଦ୍ରୁମନିଵାସିନୀ ।
ମଣିଦ୍ଵୀପାନ୍ତରପ୍ରୋଦ୍ଯତ୍କଦମ୍ବଵନଵାସିନୀ ॥ 17 ॥

ଚିନ୍ତାମଣିଗୃହାନ୍ତଃସ୍ଥା ମଣିମଣ୍ଟପମଧ୍ଯଗା ।
ରତ୍ନସିଂହାସନପ୍ରୋଦ୍ଯଚ୍ଛିଵମଞ୍ଚାଧିଶାଯିନୀ ॥ 18 ॥

ସଦାଶିଵମହାଲିଙ୍ଗମୂଲସଙ୍ଘଟ୍ଟଯୋନିକା ।
ଅନ୍ଯୋନ୍ଯାଲିଙ୍ଗସଙ୍ଘର୍ଷକଣ୍ଡୂସଙ୍କ୍ଷୁବ୍ଧମାନସା ॥ 19 ॥

କଲୋଦ୍ଯଦ୍ବିନ୍ଦୁକାଲିନ୍ଯାତୁର୍ଯନାଦପରମ୍ପରା ।
ନାଦାନ୍ତାନନ୍ଦସନ୍ଦୋହସ୍ଵଯଂଵ୍ଯକ୍ତଵଚୋଽମୃତା ॥ 20 ॥

କାମରାଜମହାତନ୍ତ୍ରରହସ୍ଯାଚାରଦକ୍ଷିଣା ।
ମକାରପଞ୍ଚକୋଦ୍ଭୂତପ୍ରୌଢାନ୍ତୋଲ୍ଲାସସୁନ୍ଦରୀ ॥ 21 ॥

ଶ୍ରୀଚକ୍ରରାଜନିଲଯା ଶ୍ରୀଵିଦ୍ଯାମନ୍ତ୍ରଵିଗ୍ରହା ।
ଅଖଣ୍ଡସଚ୍ଚିଦାନନ୍ଦଶିଵଶକ୍ତ୍ଯୈକ୍ଯରୂପିଣୀ ॥ 22 ॥

ତ୍ରିପୁରା ତ୍ରିପୁରେଶାନୀ ମହାତ୍ରିପୁରସୁନ୍ଦରୀ ।
ତ୍ରିପୁରାଵାସରସିକା ତ୍ରିପୁରାଶ୍ରୀସ୍ଵରୂପିଣୀ ॥ 23 ॥

ମହାପଦ୍ମଵନାନ୍ତସ୍ଥା ଶ୍ରୀମତ୍ତ୍ରିପୁରମାଲିନୀ ।
ମହାତ୍ରିପୁରସିଦ୍ଧାମ୍ବା ଶ୍ରୀମହାତ୍ରିପୁରାମ୍ବିକା ॥ 24 ॥

ନଵଚକ୍ରକ୍ରମାଦେଵୀ ମହାତ୍ରିପୁରଭୈରଵୀ ।
ଶ୍ରୀମାତା ଲଲିତା ବାଲା ରାଜରାଜେଶ୍ଵରୀ ଶିଵା ॥ 25 ॥

ଉତ୍ପତ୍ତିସ୍ଥିତିସଂହାରକ୍ରମଚକ୍ରନିଵାସିନୀ ।
ଅର୍ଧମେର୍ଵାତ୍ମଚକ୍ରସ୍ଥା ସର୍ଵଲୋକମହେଶ୍ଵରୀ ॥ 26 ॥

ଵଲ୍ମୀକପୁରମଧ୍ଯସ୍ଥା ଜମ୍ବୂଵନନିଵାସିନୀ ।
ଅରୁଣାଚଲଶୃଙ୍ଗସ୍ଥା ଵ୍ଯାଘ୍ରାଲଯନିଵାସିନୀ ॥ 27 ॥

ଶ୍ରୀକାଲହସ୍ତିନିଲଯା କାଶୀପୁରନିଵାସିନୀ ।
ଶ୍ରୀମତ୍କୈଲାସନିଲଯା ଦ୍ଵାଦଶାନ୍ତମହେଶ୍ଵରୀ ॥ 28 ॥

ଶ୍ରୀଷୋଡଶାନ୍ତମଧ୍ଯସ୍ଥା ସର୍ଵଵେଦାନ୍ତଲକ୍ଷିତା ।
ଶ୍ରୁତିସ୍ମୃତିପୁରାଣେତିହାସାଗମକଲେଶ୍ଵରୀ ॥ 29 ॥

ଭୂତଭୌତିକତନ୍ମାତ୍ରଦେଵତାପ୍ରାଣହୃନ୍ମଯୀ ।
ଜୀଵେଶ୍ଵରବ୍ରହ୍ମରୂପା ଶ୍ରୀଗୁଣାଢ୍ଯା ଗୁଣାତ୍ମିକା ॥ 30 ॥

ଅଵସ୍ଥାତ୍ରଯନିର୍ମୁକ୍ତା ଵାଗ୍ରମୋମାମହୀମଯୀ ।
ଗାଯତ୍ରୀଭୁଵନେଶାନୀଦୁର୍ଗାକାଲ୍ଯାଦିରୂପିଣୀ ॥ 31 ॥

ମତ୍ସ୍ଯକୂର୍ମଵରାହାଦିନାନାରୂପଵିଲାସିନୀ ।
ମହାଯୋଗୀଶ୍ଵରାରାଧ୍ଯା ମହାଵୀରଵରପ୍ରଦା ॥ 32 ॥

ସିଦ୍ଧେଶ୍ଵରକୁଲାରାଧ୍ଯା ଶ୍ରୀମଚ୍ଚରଣଵୈଭଵା ॥ 33 ॥
ପୁନର୍ଧ୍ଯାନମ୍
କୁଙ୍କୁମପଙ୍କସମାଭା-
-ମଙ୍କୁଶପାଶେକ୍ଷୁକୋଦଣ୍ଡଶରାମ୍ ।
ପଙ୍କଜମଧ୍ଯନିଷଣ୍ଣାଂ
ପଙ୍କେରୁହଲୋଚନାଂ ପରାଂ ଵନ୍ଦେ ॥