4.4 - raśmirasi kṣayāya tvā - kṛṣṇa yajurveda taittirīya saṃhitā pāṭhaḥ

kṛṣṇa yajurvedīya taittirīya saṃhitāyā-ñcaturthakāṇḍe caturthaḥ praśnaḥ - pañcamacitiśeṣanirūpaṇaṃ
o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | hariḥ om ||
raśmira̭si kṣayā̭ya tvā kṣaya̭-ñjinva preti̭rasi dharmā̭ya tvā dharma̭-ñjinvānvi̭tirasi dive tvā diva̭-ñjinva sandhira̭syantari̭kṣāya tvā-'ntari̭kṣa-ñjinva pratidhira̭si pṛthivyai tvā̭ pṛthivī-ñji̭nva viṣṭabhoṃ̭-'si vṛṣṭyai tvā vṛṣṭi̭-ñjinva pravā-'syahne tvā-'ha̭rjinvānu vā-'si rātri̭yai tvā rātri̭-ñjinvo śiga̭si [rātri̭-ñjinvo śiga̭si, vasṷbhyastvā] 1
vasṷbhyastvā vasūñjinva praketo̭-'si rudrebhya̭stvā rudrāñji̭nva sudītira̭syādityebhya̭stvā ''dityāñjinvaujo̭-'si pitṛbhya̭stvā pitṝñji̭nva tantṷrasi prajābhya̭stvā prajā ji̭nva pṛtanāṣāḍa̭si paśubhya̭stvā paśūñji̭nva revadasyoṣa̭dhībhya-stvauṣa̭dhī-rjinvābhijida̭si yuktagrāvendrā̭ya tvendra̭-ñjinvādhi̭patirasi prāṇāya̭ [prāṇāya̭, tvā prāṇa-ñji̭nva] 2
tvā prāṇa-ñji̭nva yantā-'sya̭pānāya̭ tvā-'pāna-ñji̭nva sagṃsarpo̭-'si cakṣṷṣe tvā cakṣṷrjinva vayodhā a̭si śrotrā̭ya tvā śrotra̭-ñjinva trivṛda̭si pravṛda̭si saṃvṛ~da̭si vivṛda̭si sagṃroho̭-'si nīroho̭-'si praroho-'syanuroho̭-'si vasuko̭-'si veṣa̭śrirasi vasya̭ṣṭirasi || 3 ||

(uśiga̭si - prāṇāya - trica̭tvārigṃśacca) (a. 1)
rājñya̭si prācī digvasa̭vaste devā adhi̭patayo-'gnirhḙtīnā-mpra̭tidhartā trivṛ-ttvā stomaḥ̭ pṛthivyāg śra̭yatvājya̭-mukthamavya̭thaya-thstabhnātu rathantaragṃ sāma prati̭ṣṭhityai virāḍa̭si dakṣiṇā digrudrāstḙ devā adhi̭pataya indro̭ hetīnā-mpra̭tidhartā pa̭ñcadaśastvā stomaḥ̭ pṛthivyāg śra̭yatu pra-ṷgamuktha-mavya̭thaya-thstabhnātu bṛha-thsāma prati̭ṣṭhityai samrāḍa̭si pratīcī di- [dik, ādityāstḙ] 4
-gā̭dityāstḙ devā adhi̭pataya-ssomo̭ hetīnā-mpra̭tidhartā sa̭ptadaśastvā stomaḥ̭ pṛthivyāg śra̭yatu marutvatīya̭muktha-mavya̭thaya-thstabhnātu vairūpagṃ sāma prati̭ṣṭhityāyai svarāḍasyudī̭cī dig viśvḙ te devā adhi̭patayo varṷṇo hetīnā-mpra̭tidhartaika̭vigṃśa stvā stomaḥ̭ pṛthivyāg śra̭yatu niṣkḙvalya-mukthamavya̭thaya-thstabhnātu vairājagṃ sāma prati̭ṣṭhityā adhi̭patnyasi bṛhatī dimmaruta̭ste devā adhi̭patayo [adhi̭patayaḥ, bṛhaspati̭rhetī-] 5
bṛhaspati̭rhetīnā-mpra̭tidhartā tri̭ṇavatrayastrigṃśau tvā stomaṷ pṛthivyāg śra̭yatāṃ-vai~śvadevāgnimārute ukthe avya̭thayantī stabhnītāgṃ śākvararaivate sāma̭nī prati̭ṣṭhityā antari̭kṣāyarṣa̭yastvā prathamajā deveṣṷ divo mātra̭yā variṇā pra̭thantu vidhartā cāyamadhi̭patiśca te tvā sarvḙ saṃvi~dānā nāka̭sya pṛṣṭhe sṷvarge loke yaja̭māna-ñca sādayantu || 6 ||

(pratīcī diṃ - maruta̭ste devā adhi̭pataya - ścatvārigṃśacca̭) (a. 2)
aya-mpuro hari̭keśa-ssūrya̭raśmistasya̭ rathagṛthsaśca rathaṷjāśca senāni grāmaṇyaṷ puñjikasthalā ca̭ kṛtasthalā cāphsarasaṷ yātudhānā̭ hetī rakṣāgṃ̭si prahḙti raya-nda̭kṣiṇā viśva ka̭rmā tasya̭ rathasvanaśca rathḙcitraśca senāni grāmaṇyaṷ menakā ca̭ sahajanyā cāphsarasaṷ daṃṇavaḥ̭ paśavo̭ hetiḥ paurṷṣeyo vadhaḥ prahḙti raya-mpaścā-dviśvavya̭cā stasya ratha̭ protaścā-sa̭marathaśca senāni grāmaṇyau pramloca̭ntī cā- [pramloca̭ntī ca, anumloca̭ntī-] 7
-'numloca̭ntī-cāphsarasaṷ sarpā heti rvyāghrāḥ prahḙti raya mṷttarā-thsaṃya~d- va̭sustasya̭ senajicca̭ suṣeṇa̭śca senāni grāmaṇyaṷ viśvācī̭ ca ghṛtācī̭ cāphsarasā vāpo̭ heti rvātaḥ prahḙti rayamuparya rvāgva̭-sustasya tārkṣya-ścāri̭ṣṭa-nemiśca senāni grāmaṇyā̭ vurvaśī̭ ca pūrvaci̭ttiścā-phsarasaṷ vidyuddhetira̭-vasphūrja-nprahḙti stebhyo namaste no̭ mṛḍayantu te ya- [te yam, dviṣmo] 8
-ndviṣmo yaśca̭ no dveṣṭi taṃ-vo~ jambhḙ dadhāmyāyostvā sada̭ne sādayāmyava̭ta śchāyāyā-nnamaḥ̭ samudrāya namaḥ̭ samudrasya cakṣa̭se parameṣṭhī tvā̭ sādayatu divaḥ pṛṣṭhe vyaca̭svatī-mpratha̭svatīṃ-vi~bhūma̭tī-mprabhūma̭tī-mparibhūma̭tī-ndivaṃ̭-ya~ccha diva̭-ndṛgṃha diva-mmā higṃ̭sīrviśva̭smai prāṇāyā̭pānāya̭ vyānāyo̭dānāya̭ pratiṣṭhāyai̭ caritrā̭ya sūrya̭stvā-'bhi pā̭tu mahyā svastyā chardiṣā śanta̭mena tayā̭ devata̭yā-'ṅgirasva-ddhruvā sī̭da || prothadaśvo na yava̭se aviṣyan. yadā maha-ssa~vara̭ṇā-dvyasthāt | āda̭sya vāto anṷ vāti śociradha̭ sma te vraja̭na-ṅkṛṣṇama̭sti || 9 ||

(pramloca̭ntī ca - yagg - svastyā - 'ṣṭāvigṃ̭śatiśca) (a. 3)
agnirmūrdhā divaḥ kaku-tpatiḥ̭ pṛthivyā ayam | apāgṃ retāgṃ̭si jinvati || tvāma̭gne puṣka̭rādaddhyatha̭rvā nira̭manthata | mūrdhno viśva̭sya vāghataḥ̭ || ayamagni-ssa̭hasriṇo vāja̭sya śatinaspatiḥ̭ | mūrdhā kavī ra̭yīṇām || bhuvo̭ yajñasya raja̭saśca netā yatrā̭ niyudbhi-ssaca̭se śivābhiḥ̭ | divi mūrdhāna̭-ndadhiṣe suvarṣā-ñjihvāma̭gne cakṛṣe havyavāham || aboddhyagni-ssamidhā janā̭nā- [janā̭nām, prati̭] 10
-mprati̭ dhenumi̭vā yatīmuṣāsam | yahvā i̭va pravayā mujjihā̭nāḥ pra bhānavaḥ̭ sisrate nākamaccha̭ || avo̭cāma kavaye meddhyā̭ya vaco̭ vandārṷ vṛṣabhāya vṛṣṇe | gavi̭ṣṭhiro nama̭sā stoma̭magnau divīva̭ rukmamurvyañca̭maśret || jana̭sya gopā a̭janiṣṭa jāgṛ̭viragni-ssudakṣaḥ̭ suvitāya navya̭se | ghṛtapra̭tīko bṛhatā di̭vispṛśā dyumadvi bhā̭ti bharatebhya-śśuciḥ̭ || tvāma̭gne aṅgi̭raso [aṅgi̭rasaḥ, guhā̭ hitamanva̭-] 11
guhā̭ hitamanva̭-vindañchiśriyāṇaṃ-va~nḙvane | sa jā̭yase mathyamā̭na-ssaho̭ maha-ttvāmā̭hu-ssaha̭sasputrama̭ṅgiraḥ || yajñasya̭ ketu-mpra̭thama-mpurohi̭tamagni-nnara̭striṣadhasthe sami̭ndhate | indrḙṇa devai-ssarathagṃ sa barhiṣi sīdanni hotā̭ yajathā̭ya sukratuḥ̭ || tvā-ñci̭traśravastama hava̭nte vikṣu jantavaḥ̭ | śociṣkḙśa-mpurupriyāgnḙ havyāya voḍha̭ve || sakhā̭ya-ssaṃvaḥ̭ ~samyañca-miṣagg- [-miṣam, stoma̭-ñcāgnaye |] 12
-stoma̭-ñcāgnaye | varṣi̭ṣṭhāya kṣitīnāmūrjo naptre saha̭svate || sagṃsamidyṷvase vṛṣannagne viśvānyarya ā | iḍaspade sami̭ddhyase sa no vasūnyā bha̭ra || enā vo̭ agni-nnama̭sorjo napā̭tamā hṷve | priya-ñceti̭ṣṭhamaratigg sva̭ddhvaraṃ-vi~śva̭sya dūtamamṛtam || sa yo̭jate aruṣo viśvabho̭jasā sa dṷdrava-thsvā̭hutaḥ | subrahmā̭ yajña-ssuśamī [yajña-ssuśamī, vasṷ̄nā-] 13
vasṷ̄nā-ndevagṃ rādho janā̭nām || uda̭sya śocira̭sthādā-juhvā̭nasya mīḍhuṣaḥ̭ | uddhamāso̭ aruṣāso̭ divispṛśa-ssamagnimi̭ndhate naraḥ̭ || agne vāja̭sya goma̭ta īśā̭na-ssahaso yaho | asme dhḙhi jātavedo mahi śravaḥ̭ || sa i̭dhāno vasṷṣkavi-ragnirīḍenyo̭ girā | revadasmabhya̭-mpurvaṇīka dīdihi || kṣapo rā̭jannuta tmanā-'gne vasto̭rutoṣasaḥ̭ | sa ti̭gmajambha [ ] 14
rakṣaso̭ daha prati̭ || ā tḙ agna idhīmahi dyumanta̭-ndevājaram | yaddha syā te panī̭yasī sami-ddīdaya̭ti dyavīṣagg̭ stotṛbhya ā bha̭ra || ā tḙ agna ṛcā havi-śśukrasya̭ jyotiṣaspate | suśca̭ndra dasma viśpa̭te havya̭vā-ṭtubhyagṃ̭ hūyata iṣagg̭ stotṛbhya ā bha̭ra || ubhe sṷścandra sarpiṣo darvī śrīṇīṣa āsani̭ | uto na u-tpṷpūryā [u-tpṷpūryāḥ, uktheṣṷ] 15
uktheṣṷ śavasaspata iṣagg̭ stotṛbhya ā bha̭ra || agne tamadyāśva-nna stomaiḥ kratu-nna bhadragṃ hṛ̭dispṛśam | ṛddhyāmā̭ ta ohaiḥ || adhā hya̭gne kratorbhadrasya dakṣa̭sya sādhoḥ | rathīr-ṛtasya̭ bṛhato babhūtha̭ || ābhiṣṭḙ adya gīrbhirgṛṇanto-'gne dāśḙma | pra tḙ divo na sta̭nayanti śuṣmāḥ || ebhirno̭ arkairbhavā̭ no arvā- [arvāṅ, suvarna jyotiḥ̭ |] 16
-ṅkhsuvarna jyotiḥ̭ | agne viśvḙbhi-ssumanā anī̭kaiḥ || agnigṃ hotā̭ra-mmanye dāsva̭ntaṃ-va~so-ssūnugṃ saha̭so jātavḙdasam | vipra-nna jātavḙdasam | ya ūrdhvayā svaddhvaro devo devācyā̭ kṛpā | ghṛtasya vibhrāṣṭimanṷ śukraśo̭ciṣa ājuhvā̭nasya sarpiṣaḥ̭ || agne tva-nno anta̭maḥ | uta trātā śivo bha̭va varūthyaḥ̭ || ta-ntvā̭ śociṣṭha dīdivaḥ | sumnāya̭ nūnamī̭mahe sakhi̭bhyaḥ || vasṷragnirvasṷśravāḥ | acchā̭ nakṣi dyumatta̭mo rayi-ndāḥ || 17 ||

(janā̭nā - maṅgi̭rasa - iṣagṃ̭ - suśamī̭ - tigmajambha - pupūryā - arvāṃ - vasṷśravāḥ - pañca̭ ca) (a. 4)
indrāgnibhyā-ntvā sayujā̭ yujā yṷnajmyā ghārābhyā-nteja̭sā varca̭so kthebhi-sstomḙbhi śchando̭bhī rayyai poṣā̭ya sajātānā-mmaddhyamastheyā̭ya mayā tvā sayujā̭ yujā yṷnajmyabā-ndulā ni̭tatni rabhraya̭ntī meghaya̭ntī varṣaya̭ntī cupuṇīkā nāmā̭si prajāpa̭tinā tvā viśvā̭bhirdhībhirupa̭ dadhāmi pṛthivyṷdapuramannḙna viṣṭā ma̭nuṣyāste goptāro 'gnirviya̭tto-'syāṃ sā tāmaha-mpra pa̭dye sā [ ] 18
me śarma̭ ca varma̭ cāstvadhi̭ dyaurantari̭kṣa-mbrahma̭ṇā viṣṭā maruta̭ste goptāro̭ vāyurviya̭tto-'syā-ntāmaha-mpra pa̭dye sā me śarma̭ ca varma̭ cāstu dyaurapa̭rājitā-'mṛtḙna viṣṭā-''dityāstḙ goptāra-ssūryo viya̭tto-'syā-ntāmaha-mpra pa̭dye sā me śarma̭ ca varma̭ cāstu || 19 ||

(sā - 'ṣṭāca̭tvārigṃśacca) (a. 5)
bṛhaspati̭stvā sādayatu pṛthivyāḥ pṛṣṭhe jyoti̭ṣmatīṃ-vi~śva̭smai prāṇāyā̭pānāya viśva-ñjyoti̭ryacchā- gniste-'dhi̭pati rviśvaka̭rmā tvā sādayatvantari̭kṣasya pṛṣṭhe jyoti̭ṣmatīṃ-vi~śva̭smai prāṇāyā̭pānāya viśva-ñjyoti̭ryaccha vāyuste-'dhi̭patiḥ prajāpa̭tistvā sādayatu divaḥ pṛṣṭhe jyoti̭ṣmatīṃ-vi~śva̭smai prāṇāyā̭pānāya viśva-ñjyoti̭ryaccha parameṣṭhī te-'dhi̭patiḥ purovātasani̭rasya bhrasani̭rasi vidyuthsani̭- [vidyuthsaniḥ̭, asi stanayitnusani̭rasi] 20
-rasi stanayitnusani̭rasi vṛṣṭisani̭rasya-gneryānya̭si devānā̭magne yānya̭si vāyoryānya̭si devānāṃ-vā~yoyānya̭syantari̭kṣasya yānya̭si devānā̭- mantarikṣayānya̭sya-ntari̭kṣamasyantari̭kṣāya tvā salilāya̭ tvā sarṇī̭kāya tvā satī̭kāya tvā ketā̭ya tvā pracḙtase tvā viva̭svate tvā divastvā jyoti̭ṣa ādityebhya̭stvarce tvā̭ ruce tvā dyute tvā̭ bhāse tvā jyoti̭ṣe tvā yaśodā-ntvā yaśa̭si tejodā-ntvā teja̭si payodā-ntvā paya̭si varcodā-ntvā varca̭si draviṇodā-ntvā dravi̭ṇe sādayāmi tenarṣi̭ṇā tena brahma̭ṇā tayā̭ devata̭yā-'ṅgirasva-ddhruvā sī̭da || 21 ||

(vidyuthsani̭ - rdyute tvai - kānna trigṃśacca̭) (a. 6)
bhūyaskṛda̭si varivaskṛda̭si prācya̭syūrdhvā-'sya̭-ntarikṣasada̭sya-ntari̭kṣe sīdā-phsuṣada̭si śyenasada̭si gṛddhrasada̭si suparṇasada̭si nākasada̭si pṛthivyāstvā dravi̭ṇe sādayāmya-ntari̭kṣasya tvā dravi̭ṇe sādayāmi divastvā dravi̭ṇe sādayāmi diśā-ntvā dravi̭ṇe sādayāmi draviṇodā-ntvā dravi̭ṇe sādayāmi prāṇa-mmḙ pāhya-pāna-mmḙ pāhi vyāna-mmḙ [vyāna-mme, pāhyāyṷrme pāhi] 22
pāhyāyṷrme pāhi viśvāyṷrme pāhi sarvāyṷrme pāhyagne ya-tte paragṃ hṛnnāma tāvehi sagṃ ra̭bhāvahai pāñca̭ janyeṣva-pyeddhyagne yāvā ayā̭vā evā ūmā-ssabda-ssaga̭ra-ssumekaḥ̭ || 23 ||

(vyāna-mme-dvātrigṃ̭śacca) (a. 7)
agninā̭ viśvāṣāṭ sūryḙṇa svarā-ṭkratvā śacīpati̭r-ṛṣabheṇa tvaṣṭā̭ yajñena̭ maghavā-ndakṣi̭ṇayā suvargo manyunā̭ vṛtrahā sauhārdyena tanūdhā annḙna gayaḥ̭ pṛthivyā-'sa̭no dṛgbhira̭nnādo va̭ṣaṭkāreṇardha-ssāmnā̭ tanūpā virājā jyoti̭ṣmā-nbrahma̭ṇā somapā gobhi̭ryajña-ndā̭dhāra kṣatreṇa̭ manuṣyā̭-naśvḙna ca rathḙna ca vajryṛ̭tubhiḥ̭ prabhu-ssaṃ̭va~thsareṇa̭ paribhū stapasā-'nā̭dhṛṣṭa-ssūrya-ssa-ntanūbhiḥ̭ || 24 ||

(agni - raikānna pa̭ñcāśat) (a. 8)
prajāpa̭tirmanasā 'ndho-'cchḙto dhātā dīkṣāyāgṃ̭ savitā bhṛtyā-mpūṣā so̭makraya̭ṇyāṃ-va~rṷṇa upa̭naddho 'sṷraḥ krīyamā̭ṇo mitraḥ krīta-śśi̭piviṣṭa āsā̭dito narandhi̭ṣaḥ prohyamāṇo 'dhi̭patirāga̭taḥ prajāpa̭tiḥ praṇīyamā̭no 'gnirāgnīddhre bṛhaspatirāgnīddhrā-tpraṇīyamā̭na indro̭ havirdhāne 'di̭tirāsā̭dito viṣṇṷrupāvahriyamāṇo 'tharvopotto yamo̭-'bhiṣṷto 'pūtapā ā̭dhūyamā̭no vāyuḥ pūyamā̭no mitraḥ, kṣī̭raśrīrmanthī sa̭ktuśrīrvaiśvadeva unnī̭to rudra āhṷto vāyurāvṛ̭tto nṛcakṣāḥ prati̭khyāto bhakṣa āga̭taḥ pitṛṇā-nnā̭rāśagṃso 'surātta-ssindhṷra-vabhṛthama̭vaprayan-thsa̭mudro 'va̭gata-ssalilaḥ praplṷta-ssuva̭rudṛca̭-ṅgataḥ || 25 ||

(rudra - eka̭vigṃśatiśca) (a. 9)
kṛtti̭kā nakṣa̭tra-magnirdevatā-'gne rucaḥ̭ stha prajāpa̭terdhātu-ssoma̭syarce tvā̭ ruce tvā dyute tvā̭ bhāse tvā jyoti̭ṣe tvā rohiṇī nakṣa̭tra-mprajāpa̭tirdevatā̭ mṛgaśīrṣa-nnakṣa̭tragṃ somo̭ devatā ''rdrā nakṣa̭tragṃ rudro devatā puna̭rvasū nakṣa̭tramadi̭tirdevatā̭- tiṣyo̭ nakṣa̭tra-mbṛhaspati̭rdevatā ''śreṣā nakṣa̭tragṃ sarpā devatā̭ maghā nakṣa̭tra-mpitaro̭ devatā phalgṷnī nakṣa̭tra- [nakṣa̭tram, aryamā] 26
-maryamā devatā phalgṷnī nakṣa̭tra-mbhago̭ devatā hasto nakṣa̭tragṃ savitā devatā̭ citrā nakṣa̭tramindro̭ devatā svātī nakṣa̭traṃ-vā~yurdevatā viśā̭khe nakṣa̭tramindrāgnī devatā̭ 'nūrādhā nakṣa̭tra-mmitro devatā̭ rohiṇī nakṣa̭tramindro̭ devatā̭ vicṛtau nakṣa̭tra-mpitaro̭ devatā̭ 'ṣāḍhā nakṣa̭tramāpo̭ devatā̭ 'ṣāḍhā nakṣa̭traṃ-vi~śvḙ devā devatā śroṇā nakṣa̭traṃ-vi~ṣṇṷrdevatā śravi̭ṣṭhā nakṣa̭traṃ-va~sa̭vo [nakṣa̭traṃ-va~sa̭vaḥ, devatā̭] 27
devatā̭ śatabhi̭ṣa-nnakṣa̭tramindro̭ devatā proṣṭhapadā nakṣa̭tramaja eka̭pā-ddevatā proṣṭhapadā nakṣa̭tramahi̭rbuddhniyo̭ devatā̭ revatī nakṣa̭tra-mpūṣā devatā 'śvayujau nakṣa̭tramaśvinaṷ devatā̭ 'pabhara̭ṇīrnakṣa̭traṃ-ya~mo devatā̭, pūrṇā paścādya-ttḙ devā ada̭dhuḥ || 28 ||

(phalgṷnī nakṣa̭traṃ - ~vasa̭va - straya̭strigṃśacca) (a. 10)
madhṷśca mādha̭vaśca vāsa̭ntikāvṛtū śukraśca śuci̭śca graiṣmā̭vṛtū nabha̭śca nabhasya̭śca vārṣi̭kāvṛtū iṣaścorjaśca̭ śāradāvṛtū saha̭śca sahasya̭śca haima̭ntikāvṛtū tapa̭śca tapasya̭śca śaiśirāvṛtū agnera̭nta-śśleṣo̭-'si kalpḙtā-ndyāvā̭pṛthivī kalpa̭ntāmāpa oṣa̭dhīḥ kalpa̭ntāmagnayaḥ pṛthammama jyaiṣṭhya̭ya savra̭tā [savra̭tāḥ, ye-'gnaya-] 29
ye-'gnaya-ssama̭naso-'ntarā dyāvā̭pṛthivī śai̭śirāvṛtū abhi kalpa̭mānā indra̭miva devā abhi saṃvi~̭śantu saṃya~cca pracḙtāścāgne-ssoma̭sya sūrya̭syo-grā ca̭ bhīmā ca̭ pitṛṇāṃ-ya~masyendra̭sya dhruvā ca̭ pṛthivī ca̭ devasya̭ saviturmarutāṃ-va~rṷṇasya dhartrī ca dhari̭trī ca mitrāvarṷṇayo rmitrasya̭ dhātuḥ prācī̭ ca pratīcī̭ ca vasṷ̄nāgṃ rudrāṇā̭- [rudrāṇām, ādityānā-nte] 30
-mādityānā-nte te-'dhi̭patayastebhyo namaste no̭ mṛḍayantu te ya-ndviṣmo yaśca̭ no dveṣṭi taṃ-vo~ jambhḙ dadhāmi sahasra̭sya pramā a̭si sahasra̭sya pratimā a̭si sahasra̭sya vimā a̭si sahasra̭syonmā a̭si sāhasro̭-'si sahasrā̭ya tvemā mḙ agna iṣṭa̭kā dhenavaḥ̭ santvekā̭ ca śata-ñca̭ sahasra̭-ñcāyuta̭-ñca [ ] 31
niyuta̭-ñca prayuta-ñcārbṷda-ñca nya̭rbuda-ñca samudraśca maddhya-ñcānta̭śca parārdhaścemā mḙ agna iṣṭa̭kā dhenavaḥ̭ santu ṣaṣṭhi-ssahasra̭mayuta-makṣī̭yamāṇā ṛtasthā stha̭rtāvṛdho̭ ghṛtaścuto̭ madhuścuta ūrja̭svatī-ssvadhāvinīstā mḙ agna iṣṭa̭kā dhenavaḥ̭ santu virājo nāma̭ kāmadughā̭ amutrāmuṣmi̭n ~loke || 32 ||

(savra̭tā - rudrāṇā̭ - mayuta̭ñca - pañca̭catvārigṃśacca) (a. 11)
sami-ddiśāmāśayā̭ na-ssuvarvinmadhorato mādha̭vaḥ pātvasmān | agnirdevo duṣṭarī̭turadābhya ida-ṅkṣatragṃ ra̭kṣatu pātvasmān || rathantaragṃ sāma̭bhiḥ pātvasmā-ngā̭yatrī chanda̭sāṃ-vi~śvarṷ̄pā | trivṛnno̭ viṣṭhayā stomo ahnāgṃ̭ samudro vāta̭ idamojaḥ̭ pipartu || ugrā diśāmabhi-bhṷ̄tirvayodhā-śśuciḥ̭ śukre aha̭nyojasīnā | indrādhi̭patiḥ pipṛtādato̭ no mahi̭ [ ] 33
kṣatraṃ-vi~śvato̭ dhārayedam || bṛha-thsāma̭ kṣatrabhṛ-dvṛddha vṛ̭ṣṇiya-ntriṣṭubhaujaḥ̭ śubhita mugravī̭ram | indra stomḙna pañcadaśena maddhya̭midaṃ-vā~tḙna saga̭reṇa rakṣa || prācī̭ diśāgṃ sahaya̭śā yaśa̭svatī viśvḙ devāḥ prāvṛṣā 'hnāgṃ suva̭rvatī | ida-ṅkṣatra-nduṣṭara̭mastvojo 'nā̭dhṛṣṭagṃ sahasriyagṃ saha̭svat || vairūpe sāma̭nniha taccha̭kema jaga̭tyainaṃ-vi~kṣvā vḙśayāmaḥ | viśvḙ devā-ssaptadaśena [saptadaśena̭, varca̭ ida-ṅkṣatragṃ] 34
varca̭ ida-ṅkṣatragṃ sa̭lilavā̭tamugram || dhartrī diśā-ṅkṣatramida-ndā̭dhāropasthā-''śā̭nā-mmitrava̭dastvojaḥ̭ | mitrā̭varuṇā śaradā-'hnā-ñcikitnū asmai rāṣṭrāya mahi śarma̭ yacchatam || vairāje sāmannadhi̭ me manīṣā-'nuṣṭubhā sambhṛ̭taṃ-vī~ryagṃ̭ sahaḥ̭ | ida-ṅkṣatra-mmitrava̭dārdradā̭nu mitrā̭varuṇā rakṣa̭ta-mādhi̭patyaiḥ || samrā-ḍdiśāgṃ sahasāmnī saha̭svatyṛturhḙmanto viṣṭhayā̭ naḥ pipartu | avasyuvā̭tā [avasyuvā̭tāḥ, bṛhatīrnu] 35
bṛhatīrnu śakva̭rīrimaṃ-ya~jñama̭vantu no ghṛtācīḥ || suva̭rvatī sudughā̭ naḥ paya̭svatī diśā-ndevya̭vatu no ghṛtācī | tva-ṅgopāḥ pṷraetota paścā-dbṛha̭spate yāmyāṃ-yu~ṅgdhi vācam || ūrdhvā diśāgṃ rantirāśauṣa̭dhīnāgṃ saṃva~thsareṇa̭ savitā no ahnām | reva-thsāmāti̭cchandā u chando-'jā̭ta śatru-ssyonā no̭ astu || stoma̭trayastrigṃśe bhuva̭nasya patni viva̭svadvāte abhi no̭ [abhi naḥ̭, gṛṇāhi |] 36
gṛṇāhi | ghṛtava̭tī savitarādhi̭patyaiḥ paya̭svatī rantirāśā̭ no astu || dhruvā diśāṃ-vi~ṣṇṷpatnyagho̭rā-'syeśā̭nā saha̭so yā manotā | bṛhaspati̭ rmātariśvota vāyu-ssa̭ndhuvānā vātā̭ abhi no̭ gṛṇantu || viṣṭabho-ndivo dharuṇaḥ̭ pṛthivyā asyeśā̭nā jaga̭to viṣṇṷpatnī | viśvavya̭cā iṣaya̭ntī subhṷ̄ti-śśivā no̭ astvadi̭tirupasthe || vaiśvānaro na̭ ūtyāpṛṣṭo divyanṷ no 'dyānṷmatiranvida̭numate tva-ṅkayā̭ naścitra ābhṷvatko adya yṷṅkte || 37 ||