পাণ্ডৱগীতা

প্ৰহ্লাদনাৰদপৰাশৰপুণ্ডৰীক-
ৱ্যাসাম্বৰীষশুকশৌনকভীষ্মকাৱ্যাঃ ।
ৰুক্মাঙ্গদাৰ্জুনৱসিষ্ঠৱিভীষণাদ্যা
এতানহং পৰমভাগৱতান্ নমামি ॥ 1॥

লোমহৰ্ষণ উৱাচ।
ধৰ্মো ৱিৱৰ্ধতি যুধিষ্ঠিৰকীৰ্তনেন
পাপং প্ৰণশ্যতি ৱৃকোদৰকীৰ্তনেন ।
শত্ৰুৰ্ৱিনশ্যতি ধনঞ্জযকীৰ্তনেন
মাদ্ৰীসুতৌ কথযতাং ন ভৱন্তি ৰোগাঃ ॥ 2॥

ব্ৰহ্মোৱাচ ।
যে মানৱা ৱিগতৰাগপৰা¶জ্ঞা
নাৰাযণং সুৰগুৰুং সততং স্মৰন্তি ।
ধ্যানেন তেন হতকিল্বিষ চেতনাস্তে
মাতুঃ পযোধৰৰসং ন পুনঃ পিবন্তি ॥ 3॥

ইন্দ্ৰ উৱাচ।
নাৰাযণো নাম নৰো নৰাণাং
প্ৰসিদ্ধচৌৰঃ কথিতঃ পৃথিৱ্যাম্ ।
অনেকজন্মাৰ্জিতপাপসঞ্চযং
হৰত্যশেষং স্মৃতমাত্ৰ এৱ যঃ ॥ 4॥

যুধিষ্ঠিৰ উৱাচ।
মেঘশ্যামং পীতকৌশেযৱাসং
শ্ৰীৱত্সাঙ্কং কৌস্তুভোদ্ভাসিতাঙ্গম্ ।
পুণ্যোপেতং পুণ্ডৰীকাযতাক্ষং
ৱিষ্ণুং ৱন্দে সৰ্ৱলোকৈকনাথম্ ॥ 5॥

ভীম উৱাচ।
জলৌঘমগ্না সচৰাঽচৰা ধৰা
ৱিষাণকোট্যাঽখিলৱিশ্ৱমূৰ্তিনা ।
সমুদ্ধৃতা যেন ৱৰাহৰূপিণা
স মে স্ৱযম্ভূৰ্ভগৱান্ প্ৰসীদৰু ॥ 6॥

অৰ্জুন উৱাচ।
অচিন্ত্যমৱ্যক্তমনন্তমৱ্যযং
ৱিভুং প্ৰভুং ভাৱিতৱিশ্ৱভাৱনম্ ।
ত্ৰৈলোক্যৱিস্তাৰৱিচাৰকাৰকং
হৰিং প্ৰপন্নোঽস্মি গতিং মহাত্মনাম্ ॥ 7॥

নকুল উৱাচ।
যদি গমনমধস্তাত্ কালপাশানুবন্ধাদ্
যদি চ কুলৱিহীনে জাযতে পক্ষিকীটে ।
কৃমিশতমপি গত্ৱা ধ্যাযতে চান্তৰাত্মা
মম ভৱতু হৃদিস্থা কেশৱে ভক্তিৰেকা ॥ 8॥

সহদেৱ উৱাচ।
তস্য যজ্ঞৱৰাহস্য ৱিষ্ণোৰতুলতেজসঃ ।
প্ৰণামং যে প্ৰকুৰ্ৱন্তি তেষামপি নমো নমঃ ॥ 9॥

কুন্তী উৱাচ।
স্ৱকৰ্মফলনিৰ্দিষ্টাং যাং যাং যোনিং ৱ্ৰজাম্যহম্ ।
তস্যাং তস্যাং হৃষীকেশ ত্ৱযি ভক্তিৰ্দৃঢাঽস্তু মে ॥ 10॥

মাদ্ৰী উৱাচ।
কৃষ্ণে ৰতাঃ কৃষ্ণমনুস্মৰন্তি
ৰাত্ৰৌ চ কৃষ্ণং পুনৰুত্থিতা যে ।
তে ভিন্নদেহাঃ প্ৰৱিশন্তি কৃষ্ণে
হৱিৰ্যথা মন্ত্ৰহুতং হুতাশে ॥ 11॥

দ্ৰৌপদী উৱাচ।
কীটেষু পক্ষিষু মৃগেষু সৰীসৃপেষু
ৰক্ষঃপিশাচমনুজেষ্ৱপি যত্ৰ যত্ৰ ।
জাতস্য মে ভৱতু কেশৱ ত্ৱত্প্ৰসাদাত্
ত্ৱয্যেৱ ভক্তিৰচলাঽৱ্যভিচাৰিণী চ ॥ 12॥

সুভদ্ৰা উৱাচ।
একোঽপি কৃষ্ণস্য কৃতঃ প্ৰণামো
দশাশ্ৱমেধাৱভৃথেন তুল্যঃ ।
দশাশ্ৱমেধী পুনৰেতি জন্ম
কৃষ্ণপ্ৰণামী ন পুনৰ্ভৱায ॥ 13॥

অভিমন্যুৰুৱাচ ।
গোৱিন্দ গোৱিন্দ হৰে মুৰাৰে
গোৱিন্দ গোৱিন্দ মুকুন্দ কৃষ্ণ
গোৱিন্দ গোৱিন্দ ৰথাঙ্গপাণে ।
গোৱিন্দ গোৱিন্দ নমামি নিত্যম্ ॥ 14॥

ধৃষ্টদ্যুম্ন উৱাচ।
শ্ৰীৰাম নাৰাযণ ৱাসুদেৱ
গোৱিন্দ ৱৈকুণ্ঠ মুকুন্দ কৃষ্ণ ।
শ্ৰীকেশৱানন্ত নৃসিংহ ৱিষ্ণো
মাং ত্ৰাহি সংসাৰভুজঙ্গদষ্টম্ ॥ 15॥

সাত্যকিৰুৱাচ ।
অপ্ৰমেয হৰে ৱিষ্ণো কৃষ্ণ দামোদৰাঽচ্যুত ।
গোৱিন্দানন্ত সৰ্ৱেশ ৱাসুদেৱ নমোঽস্তু তে ॥ 16॥

উদ্ধৱ উৱাচ।
ৱাসুদেৱং পৰিত্যজ্য যোঽন্যং দেৱমুপাসতে ।
তৃষিতো জাহ্নৱীতীৰে কূপং খনতি দুৰ্মতিঃ ॥ 17॥

ধৌম্য উৱাচ।
অপাং সমীপে শযনাসনস্থিতে
দিৱা চ ৰাত্ৰৌ চ যথাধিগচ্ছতা ।
যদ্যস্তি কিঞ্চিত্ সুকৃতং কৃতং মযা
জনাৰ্দনস্তেন কৃতেন তুষ্যতু ॥ 18॥

সঞ্জয উৱাচ।
আৰ্তা ৱিষণ্ণাঃ শিথিলাশ্চ ভীতা
ঘোৰেষু ৱ্যাঘ্ৰাদিষু ৱৰ্তমানাঃ ।
সঙ্কীৰ্ত্য নাৰাযণশব্দমাত্ৰং
ৱিমুক্তদুঃখাঃ সুখিনো ভৱন্তি ॥ 19॥

অক্ৰূৰ উৱাচ।
অহং তু নাৰাযণদাসদাস-
দাসস্য দাসস্য চ দাসদাসঃ ।
অন্যো ন হীশো জগতো নৰাণাং
তস্মাদহং ধন্যতৰোঽস্মি লোকে ॥ 20॥

ৱিৰাট উৱাচ।
ৱাসুদেৱস্য যে ভক্তাঃ শান্তাস্তদ্গতচেতসঃ ।
তেষাং দাসস্য দাসোঽহং ভৱেযং জন্মজন্মনি ॥ 21॥

ভীষ্ম উৱাচ।
ৱিপৰীতেষু কালেষু পৰিক্ষীণেষু বন্ধুষু ।
ত্ৰাহি মাং কৃপযা কৃষ্ণ শৰণাগতৱত্সল ॥ 22॥

দ্ৰোণ উৱাচ।
যে যে হতাশ্চক্ৰধৰেণ দৈত্যাং-
স্ত্ৰৈলোক্যনাথেন জনাৰ্দনেন ।
তে তে গতা ৱিষ্ণুপুৰীং প্ৰযাতাঃ
ক্ৰোধোঽপি দেৱস্য ৱৰেণ তুল্যঃ ॥ 23॥

কৃপাচাৰ্য উৱাচ।
মজ্জন্মনঃ ফলমিদং মধুকৈটভাৰে
মত্প্ৰাৰ্থনীয মদনুগ্ৰহ এষ এৱ ।
ত্ৱদ্ভৃত্যভৃত্যপৰিচাৰকভৃত্যভৃত্য-
ভৃত্যস্য ভৃত্য ইতি মাং স্মৰ লোকনাথ ॥ 24॥

অশ্ৱত্থাম উৱাচ।
গোৱিন্দ কেশৱ জনাৰ্দন ৱাসুদেৱ
ৱিশ্ৱেশ ৱিশ্ৱ মধুসূদন ৱিশ্ৱৰূপ ।
শ্ৰীপদ্মনাভ পুৰুষোত্তম দেহি দাস্যং
নাৰাযণাচ্যুত নৃসিংহ নমো নমস্তে ॥ 25॥

কৰ্ণ উৱাচ।
নান্যং ৱদামি ন শঋণোমি ন চিন্তযামি
নান্যং স্মৰামি ন ভজামি ন চাশ্ৰযামি ।
ভক্ত্যা ত্ৱদীযচৰণাম্বুজমাদৰেণ
শ্ৰীশ্ৰীনিৱাস পুৰুষোত্তম দেহি দাস্যম্ ॥ 26॥

ধৃতৰাষ্ট্ৰ উৱাচ।
নমো নমঃ কাৰণৱামনায
নাৰাযণাযামিতৱিক্ৰমায ।
শ্ৰীশাৰ্ঙ্গচক্ৰাসিগদাধৰায
নমোঽস্তু তস্মৈ পুৰুষোত্তমায ॥ 27॥

গান্ধাৰী উৱাচ।
ত্ৱমেৱ মাতা চ পিতা ত্ৱমেৱ
ত্ৱমেৱ বন্ধুশ্চ সখা ত্ৱমেৱ ।
ত্ৱমেৱ ৱিদ্যা দ্ৰৱিণং ত্ৱমেৱ
ত্ৱমেৱ সৰ্ৱং মম দেৱ দেৱ ॥ 28॥

দ্ৰুপদ উৱাচ।
যজ্ঞেশাচ্যুত গোৱিন্দ মাধৱানন্ত কেশৱ ।
কৃষ্ণ ৱিষ্ণো হৃষীকেশ ৱাসুদেৱ নমোঽস্তু তে ॥ 29॥

জযদ্ৰথ উৱাচ।
নমঃ কৃষ্ণায দেৱায ব্ৰহ্মণেঽনন্তশক্তযে ।
যোগেশ্ৱৰায যোগায ত্ৱামহং শৰণং গতঃ ॥ 30॥

ৱিকৰ্ণ উৱাচ।
কৃষ্ণায ৱাসুদেৱায দেৱকীনন্দনায চ ।
নন্দগোপকুমাৰায গোৱিন্দায নমো নমঃ ॥ 31॥

ৱিৰাট উৱাচ।
নমো ব্ৰহ্মণ্যদেৱায গোব্ৰাহ্মণহিতায চ ।
জগদ্ধিতায কৃষ্ণায গোৱিন্দায নমো নমঃ ॥ 32॥

শল্য উৱাচ।
অতসীপুষ্পসঙ্কাশং পীতৱাসসমচ্যুতম্ ।
যে নমস্যন্তি গোৱিন্দং তেষাং ন ৱিদ্যতে ভযম্ ॥ 33॥

বলভদ্ৰ উৱাচ।
কৃষ্ণ কৃষ্ণ কৃপালো ত্ৱমগতীনাং গতিৰ্ভৱ ।
সংসাৰাৰ্ণৱমগ্নানাং প্ৰসীদ পুৰুষোত্তম ॥ 34॥

শ্ৰীকৃষ্ণ উৱাচ।
কৃষ্ণ কৃষ্ণেতি কৃষ্ণেতি যো মাং স্মৰতি নিত্যশঃ ।
জলং ভিত্ৱা যথা পদ্মং নৰকাদুদ্ধৰাম্যহম্ ॥ 35॥

শ্ৰীকৃষ্ণ উৱাচ।
নিত্যং ৱদামি মনুজাঃ স্ৱযমূৰ্ধ্ৱবাহু-
ৰ্যো মাং মুকুন্দ নৰসিংহ জনাৰ্দনেতি ।
জীৱো জপত্যনুদিনং মৰণে ৰণে ৱা
পাষাণকাষ্ঠসদৃশায দদাম্যভীষ্টম্ ॥ 36॥

ঈশ্ৱৰ উৱাচ।
সকৃন্নাৰাযণেত্যুক্ত্ৱা পুমান্ কল্পশতত্ৰযম্ ।
গঙ্গাদিসৰ্ৱতীৰ্থেষু স্নাতো ভৱতি পুত্ৰক ॥ 37॥

সূত উৱাচ।
তত্ৰৈৱ গঙ্গা যমুনা চ তত্ৰ
গোদাৱৰী সিন্ধু সৰস্ৱতী চ ।
সৰ্ৱাণি তীৰ্থানি ৱসন্তি তত্ৰ
যত্ৰাচ্যুতোদাৰ কথাপ্ৰসঙ্গঃ ॥ 38॥
যম উৱাচ।
নৰকে পচ্যমানং তু যমেনং পৰিভাষিতম্ ।
কিং ত্ৱযা নাৰ্চিতো দেৱঃ কেশৱঃ ক্লেশনাশনঃ ॥ 35॥
নাৰদ উৱাচ।
জন্মান্তৰসহস্ৰেণ তপোধ্যানসমাধিনা ।
নৰাণাং ক্ষীণপাপানাং কৃষ্ণে ভক্তিঃ প্ৰজাযতে ॥ 40॥
প্ৰহ্লাদ উৱাচ।
নাথ যোনিসহস্ৰেষু যেষু যেষু ৱ্ৰজাম্যহম্ ।
তেষু তেষ্ৱচলা ভক্তিৰচ্যুতাঽস্তু সদা ত্ৱযি ॥ 41॥
যা প্ৰীতিৰৱিৱেকনাং ৱিষযেষ্ৱনপাযিনি ।
ত্ৱামনুস্মৰতঃ সা মে হৃদযান্মাঽপসৰ্পতু ॥ 42॥
ৱিশ্ৱামিত্ৰ উৱাচ।
কিং তস্য দানৈঃ কিং তীৰ্থৈঃ কিং তপোভিঃ কিমধ্ৱৰৈঃ ।
যো নিত্যং ধ্যাযতে দেৱং নাৰাযণমনন্যধীঃ ॥ 43॥
জমদগ্নিৰুৱাচ ।
নিত্যোত্সৱো ভৱেত্তেষাং নিত্যং নিত্যং চ মঙ্গলম্ ।
যেষাং হৃদিস্থো ভগৱান্মঙ্গলাযতনং হৰিঃ ॥ 44॥
ভৰদ্ৱাজ উৱাচ।
লাভস্তেষাং জযস্তেষাং কুতস্তেষাং পৰাজযঃ ।
যেষামিন্দীশ্ৱৰশ্যামো হৃদযস্থো জনাৰ্দনঃ ॥ 45॥
গৌতম উৱাচ।
গোকোটিদানং গ্ৰহণেষু কাশী-
প্ৰযাগগঙ্গাযুতকল্পৱাসঃ ।
যজ্ঞাযুতং মেৰুসুৱৰ্ণদানং
গোৱিন্দনামস্মৰণেন তুল্যম্ ॥ 46॥
অগ্নিৰুৱাচ ।
গোৱিন্দেতি সদা স্নানং গোৱিন্দেতি সদা জপঃ ।
গোৱিন্দেতি সদা ধ্যানং সদা গোৱিন্দকীৰ্তনম্ ॥ 47॥
ত্ৰ্যক্ষৰং পৰমং ব্ৰহ্ম গোৱিন্দ ত্ৰ্যক্ষৰং পৰম্ ।
তস্মাদুচ্চাৰিতং যেন ব্ৰহ্মভূযায কল্পতে ॥ 48॥
ৱেদৱ্যাস উৱাচ।
অচ্যুতঃ কল্পৱৃক্ষোঽসাৱনন্তঃ কামধেনু ৱৈ ।
চিন্তামণিস্তু গোৱিন্দো হৰেৰ্নাম ৱিচিন্তযেত্ ॥ 49॥
ইন্দ্ৰ উৱাচ।
জযতু জযতু দেৱো দেৱকীনন্দনোঽযং
জযতু জযতু কৃষ্ণো ৱৃষ্ণিৱংশপ্ৰদীপঃ ।
জযতু জযতু মেঘশ্যামলঃ কোমলাঙ্গো
জযতু জযতু পৃথ্ৱীভাৰনাশো মুকুন্দঃ ॥ 50॥
পিপ্পলাযন উৱাচ।
শ্ৰীমন্নৃসিংহৱিভৱে গৰুডধ্ৱজায
তাপত্ৰযোপশমনায ভৱৌষধায ।
কৃষ্ণায ৱৃশ্চিকজলাগ্নিভুজঙ্গৰোগ-
ক্লেশৱ্যযায হৰযে গুৰৱে নমস্তে ॥ 51॥
আৱিৰ্হোত্ৰ উৱাচ।
কৃষ্ণ ত্ৱদীযপদপঙ্কজপঞ্জৰান্তে
অদ্যৈৱ মে ৱিশতু মানসৰাজহংসঃ ।
প্ৰাণপ্ৰযাণসমযে কফৱাতপিত্তৈঃ
কণ্ঠাৱৰোধনৱিধৌ স্মৰণং কুতস্তে ॥ 52॥
ৱিদুৰ উৱাচ।
হৰেৰ্নামৈৱ নামৈৱ নামৈৱ মম জীৱনম্ ।
কলৌ নাস্ত্যেৱ নাস্ত্যেৱ নাস্ত্যেৱ গতিৰন্যথা ॥ 53॥
ৱসিষ্ঠ উৱাচ।
কৃষ্ণেতি মঙ্গলং নাম যস্য ৱাচি প্ৰৱৰ্ততে ।
ভস্মীভৱন্তি তস্যাশু মহাপাতককোটযঃ ॥ 54॥
অৰুন্ধত্যুৱাচ।
কৃষ্ণায ৱাসুদেৱায হৰযে পৰমাত্মনে ।
প্ৰণতক্লেশনাশায গোৱিন্দায নমো নমঃ ॥ 55॥
কশ্যপ উৱাচ।
কৃষ্ণানুস্মৰণাদেৱ পাপসঙ্ঘট্টপঞ্জৰম্ ।
শতধা ভেদমাপ্নোতি গিৰিৰ্ৱজ্ৰহতো যথা ॥ 56॥
দুৰ্যোধন উৱাচ।
জানামি ধৰ্মং ন চ মে প্ৰৱৃত্তি-
ৰ্জানামি পাপং ন চ মে নিৱৃত্তিঃ ।
কেনাপি দেৱেন হৃদি স্থিতেন
যথা নিযুক্তোঽস্মি তথা কৰোমি ॥ 57॥
যন্ত্ৰস্য মম দোষেণ ক্ষম্যতাং মধুসূদন ।
অহং যন্ত্ৰং ভৱান্ যন্ত্ৰী মম দোষো ন দীযতাম্ ॥ 58॥
ভৃগুৰুৱাচ ।
নামৈৱ তৱ গোৱিন্দ নাম ত্ৱত্তঃ শতাধিকম্ ।
দদাত্ত্যুচ্চাৰণান্মুক্তিঃ ভৱানষ্টাঙ্গযোগতঃ ॥ 59॥
লোমশ উৱাচ।
নমামি নাৰাযণ পাদপঙ্কজং
কৰোমি নাৰাযণপূজনং সদা ।
ৱদামি নাৰাযণনাম নিৰ্মলং
স্মৰামি নাৰাযণতত্ত্ৱমৱ্যযম্ ॥ 60॥
শৌনক উৱাচ।
স্মৃতেঃ সকলকল্যাণং ভজনং যস্য জাযতে ।
পুৰুষং তমজং নিত্যং ৱ্ৰজামি শৰণং হৰিম্ ॥ 61॥
গৰ্গ উৱাচ।
নাৰাযণেতি মন্ত্ৰোঽস্তি ৱাগস্তি ৱশৱৰ্তিনী ।
তথাপি নৰকে ঘোৰে পতন্তীত্যদ্ভুতং মহত্ ॥ 62॥
দাল্ভ্য উৱাচ।
কিং তস্য বহুভিৰ্মন্ত্ৰৈৰ্ভক্তিৰ্যস্য জনাৰ্দনে ।
নমো নাৰাযণাযেতি মন্ত্ৰঃ সৰ্ৱাৰ্থসাধাকে ॥ 63॥
ৱৈশম্পাযন উৱাচ।
যত্ৰ যোগেশ্ৱৰঃ কৃষ্ণো যত্ৰ পাৰ্থো ধনুৰ্ধৰঃ ।
তত্ৰ শ্ৰীৰ্ৱিজযো ভূতিৰ্ধ্ৰুৱা নীতিৰ্মতিৰ্মম ॥ 64॥
অগ্নিৰুৱাচ ।
হৰিৰ্হৰতি পাপানি দুষ্টচিত্তৈৰপি স্মৃতঃ ।
অনিচ্ছযাপি সংস্পৃষ্টো দহত্যেৱ হি পাৱকঃ ॥ 65॥
পৰমেশ্ৱৰ উৱাচ।
সকৃদুচ্চৰিতং যেন হৰিৰিত্যক্ষৰদ্ৱযম্ ।
লব্ধঃ পৰিকৰস্তেন মোক্ষায গমনং প্ৰতি ॥ 66॥
পুলস্ত্য উৱাচ।
হে জিহ্ৱে ৰসসাৰজ্ঞে সৰ্ৱদা মধুৰপ্ৰিযে ।
নাৰাযণাখ্যপীযূষং পিব জিহ্ৱে নিৰন্তৰম্ ॥ 67॥
ৱ্যাস উৱাচ।
সত্যং সত্যং পুনঃ সত্যং সত্যং সত্যং ৱদাম্যহম্ ।
নাস্তি ৱেদাত্পৰং শাস্ত্ৰং ন দেৱঃ কেশৱাত্পৰঃ ॥ 68॥
ধন্ৱন্তৰিৰুৱাচ ।
অচ্যুতানন্ত গোৱিন্দ নামোচ্চাৰণভেষজাত্ ।
নশ্যন্তি সকলা ৰোগাঃ সত্যং সত্যং ৱদাম্যহম্ ॥ 69॥
মাৰ্কণ্ডেয উৱাচ।
স্ৱৰ্গদং মোক্ষদং দেৱং সুখদং জগতো গুৰুম্ ।
কথং মুহুৰ্তমপি তং ৱাসুদেৱং ন চিন্তযেত্ ॥ 70॥
অগস্ত্য উৱাচ।
নিমিষং নিমিষাৰ্ধং ৱা প্ৰাণিনাং ৱিষ্ণুচিন্তনম্ ।
তত্ৰ তত্ৰ কুৰুক্ষেত্ৰং প্ৰযাগো নৈমিষং ৱৰম্ ॥ 71॥
ৱামদেৱ উৱাচ।
নিমিষং নিমিষাৰ্ধং ৱা প্ৰাণিনাং ৱিষ্ণুচিন্তনম্ ।
কল্পকোটিসহস্ৰাণি লভতে ৱাঞ্ছিতং ফলম্ ॥ 72॥
শুক উৱাচ।
আলোড্য সৰ্ৱশাস্ত্ৰাণি ৱিচাৰ্য চ পুনঃ পুনঃ ।
ইদমেকং সুনিষ্পন্নং ধ্যেযো নাৰাযণঃ সদা ॥ 73॥
শ্ৰীমহাদেৱ উৱাচ।
শৰীৰে জৰ্জৰীভূতে ৱ্যাধিগ্ৰস্তে কলেৱৰে ।
ঔষধং জাহ্নৱীতোযং ৱৈদ্যো নাৰাযণো হৰিঃ ॥ 74॥
শৌনক উৱাচ।
ভোজনাচ্ছাদনে চিন্তাং ৱৃথা কুৰ্ৱন্তি ৱৈষ্ণৱাঃ ।
যোঽসৌ ৱিশ্ৱম্ভৰো দেৱঃ স কিং ভক্তানুপেক্ষতে ॥ 75॥
সনত্কুমাৰ উৱাচ।
যস্য হস্তে গদা চক্ৰং গৰুডো যস্য ৱাহনম্ ।
শঙ্খচক্ৰগদাপদ্মী স মে ৱিষ্ণুঃ প্ৰসীদতু ॥ 76॥
এৱং ব্ৰহ্মাদযো দেৱা ঋষযশ্চ তপোধনাঃ ।
কীৰ্তযন্তি সুৰশ্ৰেষ্ঠমেৱং নাৰাযণং ৱিভুম্ ॥ 77॥
ইদং পৱিত্ৰমাযুষ্যং পুণ্যং পাপপ্ৰণাশনম্ ।
দুঃস্ৱপ্ননাশনং স্তোত্ৰং পাণ্ডৱৈঃ পৰিকীৰ্তিতম্ ॥ 78॥
যঃ পঠেত্প্ৰাতৰুত্থায শুচিস্তদ্গতমানসঃ ।
গৱাং শতসহস্ৰস্য সম্যগ্দত্তস্য যত্ফলম্ ॥ 79॥
তত্ফলং সমৱাপ্নোতি যঃ পঠেদিতি সংস্তৱম্ ।
সৰ্ৱপাপৱিনিৰ্মুক্তো ৱিষ্ণুলোকং স গচ্ছতি ॥ 80॥
গঙ্গা গীতা চ গাযত্ৰী গোৱিন্দো গৰুডধ্ৱজঃ ।
গকাৰৈঃ পঞ্চভিৰ্যুক্তঃ পুনৰ্জন্ম ন ৱিদ্যতে ॥ 81॥
গীতাং যঃ পঠতে নিত্যং শ্লোকাৰ্ধং শ্লোকমেৱ ৱা ।
মুচ্যতে সৰ্ৱপাপেভ্যো ৱিষ্ণুলোকং স গচ্ছতি ॥ 82॥