পৰশুৰাম উৱাচ
শ্ৰীকৃষ্ণস্য চ গোলোকে পৰিপূৰ্ণতমস্য চ আৱিৰ্ভূতা ৱিগ্ৰহতঃ পুৰা সৃষ্ট্যুন্মুখস্য চ
সূৰ্যকোটিপ্ৰভাযুক্তা ৱস্ত্ৰালঙ্কাৰভূষিতা ৱহ্নিশুদ্ধাংশুকাধানা সস্মিতা সুমনোহৰা
নৱযৌৱনসম্পন্না সিন্দূৰাৰুণ্যশোভিতা ললিতং কবৰীভাৰং মালতীমাল্যমণ্ডিতম্
অহোঽনিৰ্ৱচনীযা ত্ৱং চাৰুমূৰ্তিং চ বিভ্ৰতী মোক্ষপ্ৰদা মুমুক্ষূণাং মহাৱিষ্ণুৰ্ৱিধিঃ স্ৱযম্
মুমোহ ক্ষণমাত্ৰেণ দৃষ্ট্ৱা ত্ৱাং সৰ্ৱমোহিনীম্ বালৈঃ সম্ভূয সহসা সস্মিতা ধাৱিতা পুৰা
সদ্ভিঃ খ্যাতা তেন ৰাধা মূলপ্ৰকৃতিৰীশ্ৱৰী কৃষ্ণস্তাং সহসা ভীতো ৱীৰ্যাধানং চকাৰ হ
ততো ডিম্ভং মহজ্জজ্ঞে ততো জাতো মহাৱিৰাট্ যস্যৈৱ লোমকূপেষু ব্ৰহ্মাণ্ডান্যখিলানি চ
ৰাধাৰতিক্ৰমেণৈৱ তন্নিঃশ্ৱাসো বভূৱ হ স নিঃশ্ৱাসো মহাৱাযুঃ স ৱিৰাড্ৱিশ্ৱধাৰকঃ
ভযধৰ্মজলেনৈৱ পুপ্লুৱে ৱিশ্ৱগোলকম্ স ৱিৰাড্ৱিশ্ৱনিলযো জলৰাশিৰ্বভূৱ হ
ততস্ত্ৱং পঞ্চধা ভূয পঞ্চমূৰ্তীশ্চ বিভ্ৰতী প্ৰাণাধিষ্ঠাতৃমূৰ্তিৰ্যা কৃষ্ণস্য পৰমাত্মনঃ
কৃষ্ণপ্ৰাণাধিকাং ৰাধাং তাং ৱদন্তি পুৰাৱিদঃ ৱেদাধিষ্ঠাতৃমূৰ্তিৰ্যা ৱেদাশাস্ত্ৰপ্ৰসূৰপি
তাং সাৱিত্ৰীং শুদ্ধৰূপাং প্ৰৱদন্তি মনীষিণঃ ঐশ্ৱৰ্যাধিষ্ঠাতৃমূৰ্তিঃ শান্তিস্ত্ৱং শান্তৰূপিণী
লক্ষ্মীং ৱদন্তি সন্তস্তাং শুদ্ধাং সত্ত্ৱস্ৱৰূপিণীম্ ৰাগাধিষ্ঠাতৃদেৱী যা শুক্লমূৰ্তিঃ সতাং প্ৰসূঃ
সৰস্ৱতীং তাং শাস্ত্ৰজ্ঞাং শাস্ত্ৰজ্ঞাঃ প্ৰৱদন্ত্যহো বুদ্ধিৰ্ৱিদ্যা সৰ্ৱশক্তেৰ্যা মূৰ্তিৰধিদেৱতা
সৰ্ৱমঙ্গলদা সন্তো ৱদন্তি সৰ্ৱমঙ্গলাম্ সৰ্ৱমঙ্গলমঙ্গল্যা সৰ্ৱমঙ্গলৰূপিণী
সৰ্ৱমঙ্গলবীজস্য শিৱস্য নিলযেঽধুনা শিৱে শিৱাস্ৱৰূপা ত্ৱং লক্ষ্মীৰ্নাৰাযণান্তিকে
সৰস্ৱতী চ সাৱিত্ৰী ৱেদসূৰ্ব্ৰহ্মণঃ প্ৰিযা ৰাধা ৰাসেশ্ৱৰস্যৈৱ পৰিপূৰ্ণতমস্য চ
পৰমানন্দৰূপস্য পৰমানন্দৰূপিণী ত্ৱত্কলাংশাংশকলযা দেৱানামপি যোষিতঃ
ত্ৱং ৱিদ্যা যোষিতঃ সৰ্ৱাঃ সৰ্ৱেষাং বীজৰূপিণী ছাযা সূৰ্যস্য চন্দ্ৰস্য ৰোহিণী সৰ্ৱমোহিনী
শচী শক্ৰস্য কামস্য কামিনী ৰতিৰীশ্ৱৰী ৱৰুণানী জলেশস্য ৱাযোঃ স্ত্ৰী প্ৰাণৱল্লভা
ৱহ্নেঃ প্ৰিযা হি স্ৱাহা চ কুবেৰস্য চ সুন্দৰী যমস্য তু সুশীলা চ নৈৰৃতস্য চ কৈটভী
ঐশানী স্যাচ্ছশিকলা শতৰূপা মনোঃ প্ৰিযা দেৱহূতিঃ কৰ্দমস্য ৱসিষ্ঠস্যাপ্যৰুন্ধতী
লোপামুদ্ৰাঽপ্যগস্ত্যস্য দেৱমাতাঽদিতিস্তথা অহল্যা গৌতমস্যাপি সৰ্ৱাধাৰা ৱসুন্ধৰা
গঙ্গা চ তুলসী চাপি পৃথিৱ্যাং যাঃ সৰিদ্ৱৰা এতাঃ সৰ্ৱাশ্চ যা হ্যন্যা সৰ্ৱাস্ত্ৱত্কলযাম্বিকে
গৃহলক্ষ্মীৰ্গৃহে নৄণাং ৰাজলক্ষ্মীশ্চ ৰাজসু তপস্ৱিনাং তপস্যা ত্ৱং গাযত্ৰী ব্ৰাহ্মণস্য চ
সতাং সত্ত্ৱস্ৱৰূপা ত্ৱমসতাং কলহাঙ্কুৰা জ্যোতিৰূপা নিৰ্গুণস্য শক্তিস্ত্ৱং সগুণস্য চ
সূৰ্যে প্ৰভাস্ৱৰূপা ত্ৱং দাহিকা চ হুতাশনে জলে শৈত্যস্ৱৰূপা চ শোভাৰূপা নিশাকৰে
ত্ৱং ভূমৌ গন্ধৰূপা চাপ্যাকাশে শব্দৰূপিণী ক্ষুত্পিপাসাদযস্ত্ৱং চ জীৱিনাং সৰ্ৱশক্তযঃ
সৰ্ৱবীজস্ৱৰূপা ত্ৱং সংসাৰে সাৰৰূপিণী স্মৃতিৰ্মেধা চ বুদ্ধিৰ্ৱা জ্ঞানশক্তিৰ্ৱিপশ্চিতাম্
কৃষ্ণেন ৱিদ্যা যা দত্তা সৰ্ৱজ্ঞানপ্ৰসূঃ শুভা শূলিনে কৃপযা সা ত্ৱং যযা মৃত্যুঞ্জযঃ শিৱঃ
সৃষ্টিপালনসংহাৰশক্তযস্ত্ৰিৱিধাশ্চ যাঃ ব্ৰহ্মৱিষ্ণুমহেশানাং সা ত্ৱমেৱ নমোঽস্তু তে
মধুকৈটভভীত্যা চ ত্ৰস্তো ধাতা প্ৰকম্পিতঃ স্তুত্ৱা মুক্তশ্চ যাং দেৱীং তাং মূৰ্ধ্না প্ৰণমাম্যহম্
মধুকৈটভযোৰ্যুদ্ধে ত্ৰাতাঽসৌ ৱিষ্ণুৰীশ্ৱৰীম্ বভূৱ শক্তিমান্ স্তুত্ৱা তাং দুৰ্গাং প্ৰণমাম্যহম্
ত্ৰিপুৰস্য মহাযুদ্ধে সৰথে পতিতে শিৱে যাং তুষ্টুৱুঃ সুৰাঃ সৰ্ৱে তাং দুৰ্গাং প্ৰণমাম্যহম্
ৱিষ্ণুনা ৱৃষৰূপেণ স্ৱযং শম্ভুঃ সমুত্থিতঃ জঘান ত্ৰিপুৰং স্তুত্ৱা তাং দুৰ্গাং প্ৰণমাম্যহম্
যদাজ্ঞযা ৱাতি ৱাতঃ সূৰ্যস্তপতি সন্ততম্ ৱৰ্ষতীন্দ্ৰো দহত্যগ্নিস্তাং দুৰ্গাং প্ৰণমাম্যহম্
যদাজ্ঞযা হি কালশ্চ শশ্ৱদ্ভ্ৰমতি ৱেগতঃ মৃত্যুশ্চৰতি জন্তূনাং তাং দুৰ্গাং প্ৰণমাম্যহম্
স্ৰষ্টা সৃজতি সৃষ্টিং চ পাতা পাতি যদাজ্ঞযা সংহৰ্তা সংহৰেত্কালে তাং দুৰ্গাং প্ৰণমাম্যহম্
জ্যোতিঃস্ৱৰূপো ভগৱান্ শ্ৰীকৃষ্ণো নিৰ্গুণঃ স্ৱযম্ যযা ৱিনা ন শক্তশ্চ সৃষ্টিং কৰ্তুং নমামি তাম্
ৰক্ষ ৰক্ষ জগন্মাতৰপৰাধং ক্ষমস্ৱ মে শিশূনামপৰাধেন কুতো মাতা হি কুপ্যতি
ইত্যুক্ত্ৱা পৰশুৰামশ্চ নত্ৱা তাং চ ৰুৰোদ হ তুষ্টা দুৰ্গা সম্ভ্ৰমেণ চাভযং চ ৱৰং দদৌ
অমৰো ভৱ হে পুত্ৰ ৱত্স সুস্থিৰতাং ৱ্ৰজ শৰ্ৱপ্ৰসাদাত্সৰ্ৱত্ৰ জযোঽস্তু তৱ সন্ততম্
সৰ্ৱান্তৰাত্মা ভগৱাংস্তুষ্টঃ স্যাত্সন্ততং হৰিঃ ভক্তিৰ্ভৱতু তে কৃষ্ণে শিৱদে চ শিৱে গুৰৌ
ইষ্টদেৱে গুৰৌ যস্য ভক্তিৰ্ভৱতি শাশ্ৱতী তং হন্তুং ন হি শক্তা ৱা ৰুষ্টা ৱা সৰ্ৱদেৱতাঃ
শ্ৰীকৃষ্ণস্য চ ভক্তস্ত্ৱং শিষ্যো ৱৈ শঙ্কৰস্য চ গুৰুপত্নীং স্তৌষি যস্মাত্কস্ত্ৱাং হন্তুমিহেশ্ৱৰঃ
অহো ন কৃষ্ণভক্তানামশুভং ৱিদ্যতে ক্ৱচিত্ অন্যদেৱেষু যে ভক্তা ন ভক্তা ৱা নিৰঙ্কুশাঃ
চন্দ্ৰমা বলৱাংস্তুষ্টো যেষাং ভাগ্যৱতাং ভৃগো তেষাং তাৰাগণা ৰুষ্টাঃ কিং কুৰ্ৱন্তি চ দুৰ্বলাঃ
যস্মৈ তুষ্টঃ পালযতি নৰদেৱো মহান্সুখী তস্য কিং ৱা কৰিষ্যন্তি ৰুষ্টা ভৃত্যাশ্চ দুৰ্বলাঃ
ইত্যুক্ত্ৱা পাৰ্ৱতী তুষ্টা দত্ত্ৱা ৰামায চাশিষম্ জগামান্তঃপুৰং তূৰ্ণং হৰিশব্দো বভূৱ হ
স্তোত্ৰং ৱৈ কাণ্ৱশাখোক্তং পূজাকালে চ যঃ পঠেত্ যাত্ৰাকালে তথাপ্ৰাতৰ্ৱাঞ্ছিতাৰ্থং লভেদ্ধ্ৰুৱম্
পুত্ৰাৰ্থী লভতে পুত্ৰং কন্যাৰ্থী কন্যকাং লভেত্ ৱিদ্যাৰ্থী লভতে ৱিদ্যাং প্ৰজাৰ্থী চাপ্নুযাত্প্ৰজাঃ
ভ্ৰষ্টৰাজ্যো লভেদ্ৰাজ্যং নষ্টৱিত্তো ধনং লভেত্ যস্য ৰুষ্টো গুৰুৰ্দেৱো ৰাজা ৱা বান্ধৱোঽথৱা
তস্য তুষ্টশ্চ ৱৰদঃ স্তোত্ৰৰাজপ্ৰসাদতঃ দস্যুগ্ৰস্তঃ ফণিগ্ৰস্তঃ শত্ৰুগ্ৰস্তো ভযানকঃ
ৱ্যাধিগ্ৰস্তো ভৱেন্মুক্তঃ স্তোত্ৰস্মৰণমাত্ৰতঃ ৰাজদ্ৱাৰে শ্মশানে চ কাৰাগাৰে চ বন্ধনে
জলৰাশৌ নিমগ্নশ্চ মুক্তস্তত্ স্মৃতিমাত্ৰতঃ স্ৱামিভেদে পুত্ৰভেদে মিত্ৰভেদে চ দাৰুণে
স্তোত্ৰস্মৰণমাত্ৰেণ ৱাঞ্ছিতাৰ্থং লভেদ্ধ্ৰুৱম্
কৃত্ৱা হৱিষ্যং ৱৰ্ষং চ স্তোত্ৰৰাজং শৃণোতি যা ভক্ত্যা দুৰ্গাং চ সম্পূজ্য মহাৱন্ধ্যা প্ৰসূযতে
লভতে সা দিৱ্যপুত্ৰং জ্ঞানিনং চিৰজীৱিনম্ অসৌভাগ্যা চ সৌভাগ্যং ষণ্মাসশ্ৰৱণাল্লভেত্
নৱমাসং কাকৱন্ধ্যা মৃতৱত্সা চ ভক্তিতঃ স্তোত্ৰৰাজং যা শৃণোতি সা পুত্ৰং লভতে ধ্ৰুৱম্
কন্যামাতা পুত্ৰহীনা পঞ্চমাসং শৃণোতি যা ঘটে সম্পূজ্য দুৰ্গাং চ সা পুত্ৰং লভতে ধ্ৰুৱম্
॥ ইতি শ্ৰীব্ৰহ্মৱৈৱৰ্তে মহাপুৰাণে গণপতিখণ্ডে নাৰদনাৰাযণসংৱাদে পৰশুৰামকৃত দুৰ্গা স্তোত্ৰম্ ॥