પરશુરામ ઉવાચ
શ્રીકૃષ્ણસ્ય ચ ગોલોકે પરિપૂર્ણતમસ્ય ચ આવિર્ભૂતા વિગ્રહતઃ પુરા સૃષ્ટ્યુન્મુખસ્ય ચ
સૂર્યકોટિપ્રભાયુક્તા વસ્ત્રાલઙ્કારભૂષિતા વહ્નિશુદ્ધાંશુકાધાના સસ્મિતા સુમનોહરા
નવયૌવનસમ્પન્ના સિન્દૂરારુણ્યશોભિતા લલિતં કબરીભારં માલતીમાલ્યમણ્ડિતમ્
અહોઽનિર્વચનીયા ત્વં ચારુમૂર્તિં ચ બિભ્રતી મોક્ષપ્રદા મુમુક્ષૂણાં મહાવિષ્ણુર્વિધિઃ સ્વયમ્
મુમોહ ક્ષણમાત્રેણ દૃષ્ટ્વા ત્વાં સર્વમોહિનીમ્ બાલૈઃ સમ્ભૂય સહસા સસ્મિતા ધાવિતા પુરા
સદ્ભિઃ ખ્યાતા તેન રાધા મૂલપ્રકૃતિરીશ્વરી કૃષ્ણસ્તાં સહસા ભીતો વીર્યાધાનં ચકાર હ
તતો ડિમ્ભં મહજ્જજ્ઞે તતો જાતો મહાવિરાટ્ યસ્યૈવ લોમકૂપેષુ બ્રહ્માણ્ડાન્યખિલાનિ ચ
રાધારતિક્રમેણૈવ તન્નિઃશ્વાસો બભૂવ હ સ નિઃશ્વાસો મહાવાયુઃ સ વિરાડ્વિશ્વધારકઃ
ભયધર્મજલેનૈવ પુપ્લુવે વિશ્વગોલકમ્ સ વિરાડ્વિશ્વનિલયો જલરાશિર્બભૂવ હ
તતસ્ત્વં પઞ્ચધા ભૂય પઞ્ચમૂર્તીશ્ચ બિભ્રતી પ્રાણાધિષ્ઠાતૃમૂર્તિર્યા કૃષ્ણસ્ય પરમાત્મનઃ
કૃષ્ણપ્રાણાધિકાં રાધાં તાં વદન્તિ પુરાવિદઃ વેદાધિષ્ઠાતૃમૂર્તિર્યા વેદાશાસ્ત્રપ્રસૂરપિ
તાં સાવિત્રીં શુદ્ધરૂપાં પ્રવદન્તિ મનીષિણઃ ઐશ્વર્યાધિષ્ઠાતૃમૂર્તિઃ શાન્તિસ્ત્વં શાન્તરૂપિણી
લક્ષ્મીં વદન્તિ સન્તસ્તાં શુદ્ધાં સત્ત્વસ્વરૂપિણીમ્ રાગાધિષ્ઠાતૃદેવી યા શુક્લમૂર્તિઃ સતાં પ્રસૂઃ
સરસ્વતીં તાં શાસ્ત્રજ્ઞાં શાસ્ત્રજ્ઞાઃ પ્રવદન્ત્યહો બુદ્ધિર્વિદ્યા સર્વશક્તેર્યા મૂર્તિરધિદેવતા
સર્વમઙ્ગલદા સન્તો વદન્તિ સર્વમઙ્ગલામ્ સર્વમઙ્ગલમઙ્ગલ્યા સર્વમઙ્ગલરૂપિણી
સર્વમઙ્ગલબીજસ્ય શિવસ્ય નિલયેઽધુના શિવે શિવાસ્વરૂપા ત્વં લક્ષ્મીર્નારાયણાન્તિકે
સરસ્વતી ચ સાવિત્રી વેદસૂર્બ્રહ્મણઃ પ્રિયા રાધા રાસેશ્વરસ્યૈવ પરિપૂર્ણતમસ્ય ચ
પરમાનન્દરૂપસ્ય પરમાનન્દરૂપિણી ત્વત્કલાંશાંશકલયા દેવાનામપિ યોષિતઃ
ત્વં વિદ્યા યોષિતઃ સર્વાઃ સર્વેષાં બીજરૂપિણી છાયા સૂર્યસ્ય ચન્દ્રસ્ય રોહિણી સર્વમોહિની
શચી શક્રસ્ય કામસ્ય કામિની રતિરીશ્વરી વરુણાની જલેશસ્ય વાયોઃ સ્ત્રી પ્રાણવલ્લભા
વહ્નેઃ પ્રિયા હિ સ્વાહા ચ કુબેરસ્ય ચ સુન્દરી યમસ્ય તુ સુશીલા ચ નૈરૃતસ્ય ચ કૈટભી
ઐશાની સ્યાચ્છશિકલા શતરૂપા મનોઃ પ્રિયા દેવહૂતિઃ કર્દમસ્ય વસિષ્ઠસ્યાપ્યરુન્ધતી
લોપામુદ્રાઽપ્યગસ્ત્યસ્ય દેવમાતાઽદિતિસ્તથા અહલ્યા ગૌતમસ્યાપિ સર્વાધારા વસુન્ધરા
ગઙ્ગા ચ તુલસી ચાપિ પૃથિવ્યાં યાઃ સરિદ્વરા એતાઃ સર્વાશ્ચ યા હ્યન્યા સર્વાસ્ત્વત્કલયામ્બિકે
ગૃહલક્ષ્મીર્ગૃહે નૄણાં રાજલક્ષ્મીશ્ચ રાજસુ તપસ્વિનાં તપસ્યા ત્વં ગાયત્રી બ્રાહ્મણસ્ય ચ
સતાં સત્ત્વસ્વરૂપા ત્વમસતાં કલહાઙ્કુરા જ્યોતિરૂપા નિર્ગુણસ્ય શક્તિસ્ત્વં સગુણસ્ય ચ
સૂર્યે પ્રભાસ્વરૂપા ત્વં દાહિકા ચ હુતાશને જલે શૈત્યસ્વરૂપા ચ શોભારૂપા નિશાકરે
ત્વં ભૂમૌ ગન્ધરૂપા ચાપ્યાકાશે શબ્દરૂપિણી ક્ષુત્પિપાસાદયસ્ત્વં ચ જીવિનાં સર્વશક્તયઃ
સર્વબીજસ્વરૂપા ત્વં સંસારે સારરૂપિણી સ્મૃતિર્મેધા ચ બુદ્ધિર્વા જ્ઞાનશક્તિર્વિપશ્ચિતામ્
કૃષ્ણેન વિદ્યા યા દત્તા સર્વજ્ઞાનપ્રસૂઃ શુભા શૂલિને કૃપયા સા ત્વં યયા મૃત્યુઞ્જયઃ શિવઃ
સૃષ્ટિપાલનસંહારશક્તયસ્ત્રિવિધાશ્ચ યાઃ બ્રહ્મવિષ્ણુમહેશાનાં સા ત્વમેવ નમોઽસ્તુ તે
મધુકૈટભભીત્યા ચ ત્રસ્તો ધાતા પ્રકમ્પિતઃ સ્તુત્વા મુક્તશ્ચ યાં દેવીં તાં મૂર્ધ્ના પ્રણમામ્યહમ્
મધુકૈટભયોર્યુદ્ધે ત્રાતાઽસૌ વિષ્ણુરીશ્વરીમ્ બભૂવ શક્તિમાન્ સ્તુત્વા તાં દુર્ગાં પ્રણમામ્યહમ્
ત્રિપુરસ્ય મહાયુદ્ધે સરથે પતિતે શિવે યાં તુષ્ટુવુઃ સુરાઃ સર્વે તાં દુર્ગાં પ્રણમામ્યહમ્
વિષ્ણુના વૃષરૂપેણ સ્વયં શમ્ભુઃ સમુત્થિતઃ જઘાન ત્રિપુરં સ્તુત્વા તાં દુર્ગાં પ્રણમામ્યહમ્
યદાજ્ઞયા વાતિ વાતઃ સૂર્યસ્તપતિ સન્તતમ્ વર્ષતીન્દ્રો દહત્યગ્નિસ્તાં દુર્ગાં પ્રણમામ્યહમ્
યદાજ્ઞયા હિ કાલશ્ચ શશ્વદ્ભ્રમતિ વેગતઃ મૃત્યુશ્ચરતિ જન્તૂનાં તાં દુર્ગાં પ્રણમામ્યહમ્
સ્રષ્ટા સૃજતિ સૃષ્ટિં ચ પાતા પાતિ યદાજ્ઞયા સંહર્તા સંહરેત્કાલે તાં દુર્ગાં પ્રણમામ્યહમ્
જ્યોતિઃસ્વરૂપો ભગવાન્ શ્રીકૃષ્ણો નિર્ગુણઃ સ્વયમ્ યયા વિના ન શક્તશ્ચ સૃષ્ટિં કર્તું નમામિ તામ્
રક્ષ રક્ષ જગન્માતરપરાધં ક્ષમસ્વ મે શિશૂનામપરાધેન કુતો માતા હિ કુપ્યતિ
ઇત્યુક્ત્વા પરશુરામશ્ચ નત્વા તાં ચ રુરોદ હ તુષ્ટા દુર્ગા સમ્ભ્રમેણ ચાભયં ચ વરં દદૌ
અમરો ભવ હે પુત્ર વત્સ સુસ્થિરતાં વ્રજ શર્વપ્રસાદાત્સર્વત્ર જયોઽસ્તુ તવ સન્તતમ્
સર્વાન્તરાત્મા ભગવાંસ્તુષ્ટઃ સ્યાત્સન્તતં હરિઃ ભક્તિર્ભવતુ તે કૃષ્ણે શિવદે ચ શિવે ગુરૌ
ઇષ્ટદેવે ગુરૌ યસ્ય ભક્તિર્ભવતિ શાશ્વતી તં હન્તું ન હિ શક્તા વા રુષ્ટા વા સર્વદેવતાઃ
શ્રીકૃષ્ણસ્ય ચ ભક્તસ્ત્વં શિષ્યો વૈ શઙ્કરસ્ય ચ ગુરુપત્નીં સ્તૌષિ યસ્માત્કસ્ત્વાં હન્તુમિહેશ્વરઃ
અહો ન કૃષ્ણભક્તાનામશુભં વિદ્યતે ક્વચિત્ અન્યદેવેષુ યે ભક્તા ન ભક્તા વા નિરઙ્કુશાઃ
ચન્દ્રમા બલવાંસ્તુષ્ટો યેષાં ભાગ્યવતાં ભૃગો તેષાં તારાગણા રુષ્ટાઃ કિં કુર્વન્તિ ચ દુર્બલાઃ
યસ્મૈ તુષ્ટઃ પાલયતિ નરદેવો મહાન્સુખી તસ્ય કિં વા કરિષ્યન્તિ રુષ્ટા ભૃત્યાશ્ચ દુર્બલાઃ
ઇત્યુક્ત્વા પાર્વતી તુષ્ટા દત્ત્વા રામાય ચાશિષમ્ જગામાન્તઃપુરં તૂર્ણં હરિશબ્દો બભૂવ હ
સ્તોત્રં વૈ કાણ્વશાખોક્તં પૂજાકાલે ચ યઃ પઠેત્ યાત્રાકાલે તથાપ્રાતર્વાઞ્છિતાર્થં લભેદ્ધ્રુવમ્
પુત્રાર્થી લભતે પુત્રં કન્યાર્થી કન્યકાં લભેત્ વિદ્યાર્થી લભતે વિદ્યાં પ્રજાર્થી ચાપ્નુયાત્પ્રજાઃ
ભ્રષ્ટરાજ્યો લભેદ્રાજ્યં નષ્ટવિત્તો ધનં લભેત્ યસ્ય રુષ્ટો ગુરુર્દેવો રાજા વા બાન્ધવોઽથવા
તસ્ય તુષ્ટશ્ચ વરદઃ સ્તોત્રરાજપ્રસાદતઃ દસ્યુગ્રસ્તઃ ફણિગ્રસ્તઃ શત્રુગ્રસ્તો ભયાનકઃ
વ્યાધિગ્રસ્તો ભવેન્મુક્તઃ સ્તોત્રસ્મરણમાત્રતઃ રાજદ્વારે શ્મશાને ચ કારાગારે ચ બન્ધને
જલરાશૌ નિમગ્નશ્ચ મુક્તસ્તત્ સ્મૃતિમાત્રતઃ સ્વામિભેદે પુત્રભેદે મિત્રભેદે ચ દારુણે
સ્તોત્રસ્મરણમાત્રેણ વાઞ્છિતાર્થં લભેદ્ધ્રુવમ્
કૃત્વા હવિષ્યં વર્ષં ચ સ્તોત્રરાજં શૃણોતિ યા ભક્ત્યા દુર્ગાં ચ સમ્પૂજ્ય મહાવન્ધ્યા પ્રસૂયતે
લભતે સા દિવ્યપુત્રં જ્ઞાનિનં ચિરજીવિનમ્ અસૌભાગ્યા ચ સૌભાગ્યં ષણ્માસશ્રવણાલ્લભેત્
નવમાસં કાકવન્ધ્યા મૃતવત્સા ચ ભક્તિતઃ સ્તોત્રરાજં યા શૃણોતિ સા પુત્રં લભતે ધ્રુવમ્
કન્યામાતા પુત્રહીના પઞ્ચમાસં શૃણોતિ યા ઘટે સમ્પૂજ્ય દુર્ગાં ચ સા પુત્રં લભતે ધ્રુવમ્
॥ ઇતિ શ્રીબ્રહ્મવૈવર્તે મહાપુરાણે ગણપતિખણ્ડે નારદનારાયણસંવાદે પરશુરામકૃત દુર્ગા સ્તોત્રમ્ ॥