॥ दोहा ॥
श्री राधे वृषभानुजा, भक्तनि प्राणाधार । वृन्दाविपिन विहारिणी, प्रणवौं बारंबार ॥
जैसो तैसो रावरौ, कृष्ण प्रिया सुखधाम । चरण शरण निज दीजिये, सुन्दर सुखद ललाम ॥
श्री राधे वृषभानुजा, भक्तनि प्राणाधार । वृन्दाविपिन विहारिणी, प्रणवौं बारंबार ॥
जैसो तैसो रावरौ, कृष्ण प्रिया सुखधाम । चरण शरण निज दीजिये, सुन्दर सुखद ललाम ॥
॥ चौपाई ॥
जय वृषभानु कुँवरि श्री श्यामा । कीरति नंदिनी शोभा धामा ॥
नित्य विहारिणी श्याम अधारा । अमित मोद मंगल दातारा ॥
रास विलासिनि रस विस्तारिनी । सहचरि सुभग यूथ मन भावनी ॥
नित्य किशोरी राधा गोरी । श्याम प्राणधन अति जिय भोरी ॥
करुणा सागर हिय उमंगिनी । ललितादिक सखियन की संगिनी ॥
दिनकर कन्या कूल विहारिणी । कृष्ण प्राण प्रिय हिय हुलसावनी ॥
नित्य श्याम तुम्हरौ गुण गावें । राधा राधा कहि हरषावें ॥
मुरली में नित नाम उचारें । तुम कारण लीला वपु धारें ॥
प्रेम स्वरूपिणी अति सुकुमारी । श्याम प्रिया वृषभानु दुलारी ॥
नवल किशोरी अति छवि धामा । द्युति लघु लगै कोटि रति कामा ॥
गौरांगी शशि निंदक वदना । सुभग चपल अनियारे नयना ॥
जावक युग युग पंकज चरना । नूपुर धुनि प्रीतम मन हरना ॥
संतत सहचरि सेवा करहीं । महा मोद मंगल मन भरहीं ॥
रसिकन जीवन प्राण अधारा । राधा नाम सकल सुख सारा ॥
अगम अगोचर नित्य स्वरूपा । ध्यान धरत निशिदिन ब्रज भूपा ॥
उपजेउ जासु अंश गुण खानी । कोटिन उमा रमा ब्रह्मानी ॥
नित्य धाम गोलोक विहारिणी । जन रक्षक दुख दोष नसावनी ॥
शिव अज मुनि सनकादिक नारद । पार न पायें शेष अरु शारद ॥
राधा शुभ गुण रूप उजारी । निरखि प्रसन्न होत बनवारी ॥
ब्रज जीवन धन राधा रानी । महिमा अमित न जाय बखानी ॥
प्रीतम संग देई गलबाँही । बिहरति नित्य वृन्दावन माँही ॥
राधा कृष्ण कृष्ण कहैं राधा । एक रूप दोउ प्रीति अगाधा ॥
श्री राधा मोहन मन हरनी । जन सुख दायक प्रफुल्लित बदनी ॥
कोटिक रूप धरें नंद नन्दा । दर्श करन हित गोकुल चन्दा ॥
रास केलि करि तुम्हें रिझावें । मान करौ जब अति दुख पावें ॥
प्रफुलित होत दर्श जब पावें । विविध भाँति नित विनय सुनावें ॥
वृन्दारण्य विहारिणि श्यामा । नाम लेत पूरण सब कामा ॥
कोटिन यज्ञ तपस्या करहू । विविध नेम व्रत हिय में धरहू ॥
तऊ न श्याम भक्तहिं अपनावें । जब लगि राधा नाम न गावें ॥
वृन्दाविपिन स्वामिनी राधा । लीला बपु तब अमित अगाधा ॥
स्वयं कृष्ण पावैं नहिं पारा । और तुम्हैं को जानन हारा ॥
श्री राधा रस प्रीति अभेदा । सादर गान करत नित वेदा ॥
राधा त्यागि कृष्ण को भजिहैं । ते सपनेहु जग जलधि न तरिहैं ॥
कीरति कुँवरि लाड़िली राधा । सुमिरत सकल मिटहिं भव बाधा ॥
नाम अमंगल मूल नसावन । त्रिविध ताप हर हरि मन भावन ॥
राधा नाम लेइ जो कोई । सहजहि दामोदर बस होई ॥
राधा नाम परम सुखदाई । भजतहिं कृपा करहिं यदुराई ॥
यशुमति नन्दन पीछे फिरिहैं । जो कोउ राधा नाम सुमिरिहैं ॥
रास विहारिणि श्यामा प्यारी । करहु कृपा बरसाने वारी ॥
वृन्दावन है शरण तिहारौ । जय जय जय वृषभानु दुलारी ॥
॥ दोहा ॥
श्री राधा सर्वेश्वरी, रसिकेश्वर घनश्याम । करहुँ निरंतर बास मैं, श्री वृन्दावन धाम ॥
श्री राधा सर्वेश्वरी, रसिकेश्वर घनश्याम । करहुँ निरंतर बास मैं, श्री वृन्दावन धाम ॥
॥ इति श्री राधा चालीसा ॥