അഥ ചതുര്ഥസ്തോത്രമ്
നിജപൂര്ണസുഖാമിതബോധതനുഃ പരശക്തിരനന്തഗുണഃ പരമഃ ।
അജരാമരണഃ സകലാര്തിഹരഃ കമലാപതിരീഡ്യതമോഽവതു നഃ ॥ 1॥
നിജപൂര്ണസുഖാമിതബോധതനുഃ പരശക്തിരനന്തഗുണഃ പരമഃ ।
അജരാമരണഃ സകലാര്തിഹരഃ കമലാപതിരീഡ്യതമോഽവതു നഃ ॥ 1॥
യദസുപ്തിഗതോഽപി ഹരിഃ സുഖവാന് സുഖരൂപിണമാഹുരതോ നിഗമാഃ ।
സ്വമതിപ്രഭവം ജഗദസ്യ യതഃ പരബോധതനും ച തതഃ ഖപതിമ് ॥ 2॥
സ്വമതിപ്രഭവം ജഗദസ്യ യതഃ പരബോധതനും ച തതഃ ഖപതിമ് ॥ 2॥
(സുമതിപ്രഭവമ്)
ബഹുചിത്രജഗത് ബഹുധാകരണാത്പരശക്തിരനന്തഗുണഃ പരമഃ ।
സുഖരൂപമമുഷ്യപദം പരമം സ്മരതസ്തു ഭവിഷ്യതി തത്സതതമ് ॥ 3॥
ബഹുചിത്രജഗത് ബഹുധാകരണാത്പരശക്തിരനന്തഗുണഃ പരമഃ ।
സുഖരൂപമമുഷ്യപദം പരമം സ്മരതസ്തു ഭവിഷ്യതി തത്സതതമ് ॥ 3॥
സ്മരണേ ഹി പരേശിതുരസ്യ വിഭോര്മലിനാനി മനാംസി കുതഃ കരണമ് ।
വിമലം ഹി പദം പരമം സ്വരതം തരുണാര്കസവര്ണമജസ്യ ഹരേഃ ॥ 4॥
വിമലം ഹി പദം പരമം സ്വരതം തരുണാര്കസവര്ണമജസ്യ ഹരേഃ ॥ 4॥
വിമലൈഃ ശ്രുതിശാണനിശാതതമൈഃ സുമനോഽസിഭിരാശു നിഹത്യ ദൃഢമ് ।
ബലിനം നിജവൈരിണമാത്മതമോഭിദമീശമനന്തമുപാസ്വ ഹരിമ് ॥ 5॥
ബലിനം നിജവൈരിണമാത്മതമോഭിദമീശമനന്തമുപാസ്വ ഹരിമ് ॥ 5॥
ന ഹി വിശ്വസൃജോ വിഭുശമ്ഭുപുരന്ദര സൂര്യമുഖാനപരാനപരാന് ।
സൃജതീഡ്യതമോഽവതി ഹന്തി നിജം പദമാപയതി പ്രണതാം സ്വധിയാ ॥ 6॥
സൃജതീഡ്യതമോഽവതി ഹന്തി നിജം പദമാപയതി പ്രണതാം സ്വധിയാ ॥ 6॥
പരമോഽപി രമേശിതുരസ്യ സമോ ന ഹി കശ്ചിദഭൂന്ന ഭവിഷ്യതി ച ।
ക്വചിദദ്യതനോഽപി ന പൂര്ണസദാഗണിതേഡ്യഗുണാനുഭവൈകതനോഃ ॥ 7॥
ക്വചിദദ്യതനോഽപി ന പൂര്ണസദാഗണിതേഡ്യഗുണാനുഭവൈകതനോഃ ॥ 7॥
ഇതി ദേവവരസ്യ ഹരേഃ സ്തവനം കൃതവാന് മുനിരുത്തമമാദരതഃ ।
സുഖതീര്ഥപദാഭിഹിതഃ പഠതസ്തദിദം ഭവതി ധ്രുവമുച്ചസുഖമ് ॥ 8॥
സുഖതീര്ഥപദാഭിഹിതഃ പഠതസ്തദിദം ഭവതി ധ്രുവമുച്ചസുഖമ് ॥ 8॥
ഇതി ശ്രീമദാനന്ദതീര്ഥഭഗവത്പാദാചാര്യ വിരചിതം
ദ്വാദശസ്തോത്രേഷു ചതുര്ഥസ്തോത്രം സമ്പൂര്ണമ്