What is Umasahacarya Viracitam Sri Matangi Stotram Agamasara?

Read Umasahacarya Viracitam Sri Matangi Stotram Agamasara in Bengali script — full lyrics with English meaning and transliteration. Ninety-five verses given in the colophon to Umasahacharya and placed in the Agamasara, and the fuller of two recensions of one hymn: the fifty-eight-verse Matangi Stuti in this corpus shares thirty-one of its verses closely, including the meditation both open on. What the extra length is spent on is repetition of the figure under different lights — the same dark-limbed goddess with vina and book returned to again and again in different metres — and on a phalasruti of its own, which promises skill in undertakings, eloquence, wealth beyond the ordinary, force of mind, good fortune, and the regard of kings to whoever repeats it daily. It closes by asking that the supreme power be pleased.

Which deity is Umasahacarya Viracitam Sri Matangi Stotram Agamasara dedicated to?

Umasahacarya Viracitam Sri Matangi Stotram Agamasara is a Sanskrit hymn dedicated to Goddess Matangi.

Umasahacarya Viracitam Sri Matangi Stotram… in Bengali

॥ উমাসহাচার্যবিরচিতং মাতঙ্গী স্তোত্রম্ ॥

॥ ওঁ ক্লীং মাতঙ্গ্যৈ নমঃ ॥

মাতঙ্গী নবযাবকার্দ্রচরণাং প্রোল্লাসিকৃষ্ণাংশুকাং
বীণোল্লাসিকরাং সমুন্নতকুচাং মুক্তাপ্রবালাবলীম্ ।
হৃদ্যাঙ্গীং সিতশঙ্খকুণ্ডলধরাং বিম্বাধরাং সুস্মিতাং
আকীর্ণালকবেণিমব্জনযনাং ধ্যাযেত্ শুক-শ্যামলাম্ ॥ ১॥

কলাধীশোত্তংসাং করকলিতবীণাহিতরসাং
কলিন্দাপত্যাভাং কলিতহৃদযারক্তবসনাম্ ।
পুরাণীং কল্যাণীং পুরমথনপুণ্যোদযকলাং
অধীরাক্ষীমেনামবটুতটসন্নদ্ধকবরীম্ ॥ ২॥

করোদঞ্চদ্বীণং কনকদলতাটঙ্কনিহিতং
স্তনাভ্যামানম্রং তরুণমিহিরারক্তবসনম্ ।
মহঃ কল্যাণং তন্মধুমদভরাতাম্রনযনং
তমালশ্যামং নঃ স্তবকযতু সৌখ্যানি সততম্ ॥ ৩॥

করাঞ্চিতবিপঞ্চিকাং কলিতচন্দ্রচূডামণিং
কপোলবিলসন্মহঃকনকপত্রতাটঙ্কিনীম্ ।
তপঃকলমধীশিতস্তরুণভানুরক্তাম্বরাং
তমালদলমেচকাং তরললোচনামাশ্রযে ॥ ৪॥

কস্তূরীরচিতাভিরামতিলকা কল্যাণতাটঙ্কিনী
বালা শীতমযূখশোণবসনা প্রালম্বিধম্মিল্লকা ।
হারোদঞ্চিতপীবরস্তনতটা হালামদোল্লাসিনী
শ্যামা কাঞ্চন কামিনী বিজযতে চঞ্চদ্বিপঞ্চীকরা ॥ ৫॥

মাতা মরকতশ্যামা, মাতঙ্গী মৃদুভাষিণী ।
কটাক্ষযে তু কল্যাণী কদম্ববনবাসিনী ॥ ৬॥

শৃঙ্গে সুমেরোঃ সহচারিণীভির্গীযন্তি মাতঙ্গি তবাবদানম্ ।
আমোদিনীমাগলমাপিবন্তঃ কাদম্বরীমম্বরবাসিনস্তে ॥ ৭॥

একেন চাপমপরেণ করেণ বাণা-
নন্যেন পাশমিতরেণ শৃণিং দধানা ।
আনন্দকন্দলিতবিদ্রুমবালবল্লী
সংবিন্মযী স্ফুরতু কাঞ্চন দেবতা মে ॥ ৮॥

গজদানকলঙ্কিকণ্ঠমূলা
কবরীবেষ্টনকাঙ্ক্ষণীযগুঞ্জা ।
কুরুতাদ্ দুরিতাদ্ বিমোক্ষণং মে
কুহুনা ভিল্লকুটুম্বিনী ভবানী ॥ ৯॥

পাণৌ মৃণালসগুণং দধতীক্ষুচাপং
পৃষ্ঠে লসত্কনককেতকবাণকোশৌ ।
অঙ্গে প্রবালকবচং বনবাসিনী সা
পঞ্চাননং মৃগযতে কদলীবনান্তে ॥ ১০॥

বামে বিস্তৃতিশালিনি স্তনতটে বিন্যস্য বীণামুখং
তন্ত্রীং তারবিরাবিণীমসকলৈরাস্ফালযন্তী নখৈঃ ।
অর্দ্ধোন্মীলদপাঙ্গদিক্ষুবলিতগ্রীবং মুখং বিভ্রতী
মাযা কাঞ্চন মোহিনী বিজযতে মাতঙ্গকন্যামযী ॥ ১১॥

প্রতিক্ষণপযোধর-প্রবিলসদ্বিপঞ্চীগুণ-
প্রসারি করপঙ্কজং বলভিদশ্মপুঞ্জোপমম্ ।
কদম্ববনমালিকাশশিকলাসমুদ্ভাসিতং
মতঙ্গকুলমণ্ডনং মনসি মে মহো জৃম্ভতাম্ ॥ ১২॥

লাক্ষালোহিতপাদপঙ্কজদলামাপীনতুঙ্গস্তনীং
কর্পূরোজ্জ্বলচারুশঙ্খবলযাং কাশ্মীরপত্রাঙ্কুরাম্ ।
তন্ত্রীতাডনপাটলাঙ্গুলিদলাং অন্দামহ্ মাতরং
মাতঙ্গীং মদমন্থরাং মরকতশ্যামাং মনোহারিণীম্ ॥ ১৩॥

স্রস্তং কেশরদামভির্বলযিতং ধম্মিল্লমাবিভ্রতী
তালীপত্রপুটান্তরৈঃ সুঘটিতৈস্তাটঙ্কিনী মৌক্তিকৈঃ ।
মূলে কল্পতরোর্মদস্খলিতদৃগ্ দৃষ্ট্যৈব সম্মোহিনী
কাচিদ্ গাযনদেবতা বিজযতে বীণাবতী বাসনা ॥ ১৪॥

যত্ ষট্পত্রং কমলমুদিতং তস্য যত্কর্ণিকান্ত-
র্জ্যোতিস্তস্যাপ্যুদরকুহরে যত্তদোঙ্কারপীঠম্ ।
তস্যাপ্যন্তঃ স্তনভরনতাং কুণ্ডলীতি প্রসিদ্ধাং
শ্যামাকারাং সকলজননীং সন্ততং ভাবযামি ॥ ১৫॥

নিশি নিশি বলিমস্যৈ ভুক্তশেষেণ দত্ত্বা
মনু মনু গণনাথো মন্ত্রজাপং বিতন্বন্ ।
ভবতি নৃপতিপূজ্যো যোষিতাং প্রীতিপাত্রং
ব্রজতি চ পুনরন্তে শাশ্বতীং মূর্তিমাদ্যাম্ ॥ ১৬॥

কাসারন্তি পযোধযো বিষধরাঃ কর্পূরহারন্তি চ
শ্রীখণ্ডন্তি দবানলা বনগজাঃ সারঙ্গশাবন্তি চ ।
দাসন্ত্যদ্ভুতশাত্রবাঃ কিমপরং পুষ্যন্তি বজ্রাণ্যপি
শ্রীদামোদরসোদরে ভগবতি ! ত্বত্পাদনিষ্ঠাত্মনাম্ ॥ ১৭॥

কুবলযনিভা কৌশেযার্দ্ধোরুকা মুকুটোজ্জ্বলা
হলমুশলিনী সদ্ভক্তেভ্যো বরাভযদাযিনী ।
কপিলনযনা মধ্যেক্ষামা কঠোরঘনস্তনী
জযতি জগতাং মাতঃ ! সা তে বরাহমুখী তনুঃ ॥ ১৮॥

অমৃতমহোদধিমধ্যে রত্নদ্বীপে সকল্পবৃক্ষবনে ।
নবমণিমণ্ডপমধ্যে মণিমযসিংহাসনস্যোর্দ্ধ্বম্ ॥ ১৯॥

মাতঙ্গীং ভূষিতাঙ্গীং মধুমদমুদিতাং ঘূর্ণমাণাক্ষিযুগ্মাং
স্বিদ্যদ্বক্ত্রাং কদম্বপ্রসবপরিলসদ্বেণিকামাত্তবীণাম্ ।
বিম্বোষ্ঠীং রক্তবস্ত্রাং মৃগমদতিলকামিন্দুলেখাবতংসাং
কর্ণোদ্যচ্ছঙ্খপত্রাং কঠিনকুচভরাক্রান্তকান্তাবলগ্নাম্ ॥ ২০॥

উন্মীলদ্যৌবনাঢ্যাং নিবিডমদভরোদ্বেগলীলাবকাশাং
রত্নগ্রৈবেযহারাঙ্গদকটককটীসূত্রমঞ্জীরভূষাম্ ।
আনীযার্থানভীষ্টান্ স্মিতমধুরদৃশা সাধকং তর্পযন্তীং
ধ্যাযেদ্ দেবীং শুকাভাং শুকমখিলকলারূপমস্যাশ্চ পার্শ্বে ॥ ২১॥

অমৃতোদধিমধ্যেঽত্র রত্নদ্বীপে মনোরমে ।
কদম্ববিল্বনিলযে কল্পবৃক্ষোপশোভিতে ॥ ২২॥

তস্য মধ্যে সুখাস্তীর্ণে রত্নসিংহাসনে শুভে ।
ত্রিকোণকর্ণিকামধ্যে তদ্বহিঃ পঞ্চপত্রকম্ ॥ ২৩॥

অষ্টপত্রং মহাপদ্মং কেসরাঢ্যং সকর্ণিকম্ ।
তত্পার্শ্বেঽষ্টদলং প্রোক্তং চতুঃপত্রং পুনঃ প্রিযে ॥ ২৪॥

চতুরস্রং চ তদ্বাহ্যে এবং দেব্যাসনং ভবেত্ ।
তস্য মধ্যে সুখাসীনাং শ্যামবর্ণাং শুচিস্মিতাম্ ॥ ২৫॥

কদম্বমালাপরিতঃ প্রান্তবদ্ধশিরোরুহাম্ ।
প্রালম্বালকসংযুক্তাং চন্দ্রলেখাবতংসকাম্ ॥ ২৬॥

ললাটতিলকোপেতাং ঈষত্প্রহসিতাননাম্ ।
কিঞ্চিত্স্বেদাম্বুরচিতললাটফলকোজ্জ্বলাম্ ॥ ২৭॥

ত্রিবলীতরঙ্গমধ্যস্থরোমরাজিবিরাজিতাম্ ।
সর্বালঙ্কারসংযুক্তাং সর্বাভরণভূষণাম্ ॥ ২৮॥

নূপুরৈ রত্নখচিতৈঃ কটিসূত্রৈরলঙ্কৃতাম্ ।
বলযৈ রত্নরচিতৈঃ কেযূরৈর্মণিভূষণৈঃ ॥ ২৯॥

ভূষিতাং দ্বিভুজাং বালাং মদাঘূর্ণিতলোচনাম্ ।
বাদযন্তীং সদা বীণাং শঙ্খকুণ্ডলভূষণাম্ ॥ ৩0॥

প্রালম্বিকর্ণাভরণাং কর্ণোত্তংসবিরাজিতাম্ ।
যৌবনোন্মাদিনীং বীরাং রক্তাংশুকপরিগ্রহাম্ ॥ ৩১॥

তমালনীলাং তরুণীং মদমত্তাং মতঙ্গিনীম্ ।
চতুঃষষ্টিকলারূপাং পার্শ্বস্থশুকসারিকাম্ ॥ ৩২॥

মাতঙ্গেশীং মহাদেবীং নিঃশ্বস্যৈনান্তরাত্মনা ।
সূর্যকোটিপ্রতীকাশাং জপাকুসুমসন্নিভাম্ ॥ ৩৩॥

অথবা পীতবর্ণাং চ শ্যামামেবাপরাং শ্রযে ।
নিষ্পাপস্য মনুষ্যস্য কিং ন সিদ্ধ্যতি ভূতলে ॥ ৩৪॥

কামবচ্চরতে ভূমৌ সাক্ষাদ্ বৈশ্রবণাযতে ।
গদ্যপদ্যমযী বাণী তস্য বক্ত্রাদ্ বিনির্গতা ॥ ৩৫॥

ভৈরবী ত্রিপুরা লক্ষ্মীর্বাণী মাতঙ্গিনীতি চ ।
পর্যাযবাচকা হ্যেতে সত্যমেতদ্ ব্রবীমি তে ॥ ৩৬॥

ত্রিক-পঞ্চকাষ্টযুগলং ষোডশকোষ্ঠাষ্টকং চতুঃষষ্টৌ ।
ধ্যাত্বাঽঙ্গদেবতানাং দেব্যাঃ পরিতো যজেত ভাবেন ॥ ৩৭॥

মাতঙ্গি ! মাতরীশে ! মধুমথনারাধিতে ! মহামাযে ! ।
মোহিনি ! মোহপ্রমথিনি ! মন্মথমথনপ্রিযে নমস্তেঽস্তু ॥ ৩৮॥

স্তুতিষু তব দেবি ! বিধিরপি বিহিতমতির্ভবতি চাপ্যবিহিতমতিঃ ।
যদ্যপি ভক্তির্মামপি ভবতীং স্তোতুং বিলোভযতি ॥ ৩৯॥

যতিজনহৃদযাবাসে ! বাসববন্দ্যে বরাঙ্গি মাতঙ্গি ! ।
বীণাবাদ্যবিনোদ্যৈর্নারদগীতে ! নমো দেবি ! ॥ ৪০॥

দেবি ! প্রসীদ সুন্দরি পীনস্তনি কম্বুকণ্ঠি ঘনকেশি! ।
শ্যামাঙ্গি বিদ্রুমোষ্ঠি স্মিতমুখি মুগ্ধাক্ষি মৌক্তিকাভরণে! ॥ ৪১॥

ভরণে ত্রিবিষ্টপস্য প্রভবসি তত এব ভৈরবী ত্বমসি ।
ত্বদ্ভক্তিলব্ধবিভবো ভবতি ক্ষুদ্রোঽপি ভুবনপতিঃ ॥ ৪২॥

পতিতঃ কৃপণো মূকোঽপ্যম্ব! ভবত্যাঃ প্রসাদলেশেন ।
পূজ্যঃ সুভগো বাগ্মী ভবতি জডশ্চাপি সর্বজ্ঞঃ ॥ ৪৩॥

জ্ঞানাত্মকে জগন্মযি নিরঞ্জনে নিত্যশুদ্ধপদে! ।
নির্বাণরূপিণি পরে ত্রিপুরে! শরণং প্রপন্নস্ত্বাম্ ॥ ৪৪॥

ত্বাং মনসি ক্ষণমপি যো ধ্যাযতি মুক্তাবৃতাং শ্যামাম্ ।
তস্য জগত্ত্রিতযেঽস্মিন্ কাস্তা যা ন স্ত্রিযঃ সাধ্যাঃ ॥ ৪৫॥

সাধ্যাক্ষরগর্ভিতপঞ্চনবত্যক্ষরাত্মিকে জগন্মাতঃ! ।
ভগবতি মাতঙ্গেশ্বরি ! নমোঽস্তু তুভ্যং মহাদেবি ! ॥ ৪৬॥

বিদ্যাধরসুরকিন্নরগুহ্যকগন্ধর্বসিদ্ধযক্ষবরৈঃ ।
আরাধিতে ! নমস্তেঽস্তু প্রসীদ কৃপযৈব মাতঙ্গি! ॥ ৪৭॥

মাতঙ্গীস্তুতিরিযমন্বহং প্রজপ্তা
জন্তূনাং বিতরতি কৌশলং ক্রিযাসু ।
বাগ্মিত্বং শ্রিযমধিকাং চ মানশক্তিং
সৌভাগ্যং নৃপতিভিরর্চনীযতাং স যাতি ॥ ৪৮॥

মাতঙ্গীমনুদিনমেবমর্চযন্তঃ
শ্রীমন্তঃ সুভগতরাঃ কবিত্বভাজঃ ।
প্রাপ্যান্তে সকলসমীহিতার্থবর্গং
দেহান্তে বিমলতরং বিশন্তি ধাম ॥ ৪৯॥

অবটুতটঘটিতচোলীং তাডিততাডীং পলাশতাটঙ্কাম্ ।
বীণাবাদনবেলাকম্পিতশিরসং নমামি মাতঙ্গীম্ ॥ ৫০॥

বীণাবাদননিরতং তদলাবুস্থগিতবামকৃতকুচম্ ।
শ্যামলকোমলগাত্রং পাটলনযনং পরং ভজে ধাম ॥ ৫১॥

অঙ্কিতপাণিচতুষ্টযমঙ্কুশপাশেক্ষুপুষ্পচাপশরৈঃ ।
শঙ্করজীবিতমিত্রং পঙ্কজনযনং পরং ভজে ধাম ॥ ৫২॥

করকলিতকনকবীণালাবুককদলীকৃতৈককুচকমলা ।
জযতি জগদেকমাতা মাতঙ্গী মঙ্গলাযতনা ॥ ৫৩॥

অঙ্গলালিতমনঙ্গবিদ্বিষস্তুঙ্গপীনকুচভারভঙ্গুরম্ ।
শ্যামলং শশিনিভাননং ভজে কোমলং কুটিলকুন্তলং মহঃ ॥ ৫৪॥

বীণাবাদ্যবিনোদগীতনিরতাং লীলাশুকোল্লাসিনীং
বিম্বোষ্ঠীং নবযাবকার্দ্রচরণামাকীর্ণকেশালকাম্ ।
হৃদ্যাঙ্গীং সিতশঙ্খকুণ্ডলধরালঙ্কারবেষোজ্বলাং
মাতঙ্গীং প্রণতোঽস্মি সুস্মিতমুখীং দেবীং শুকশ্যামলাম্ ॥ ৫৫॥

বেণীমূলবিরাজিতেন্দুশকলাং বীণানিনাদপ্রিযাং
ক্ষোণীপালসুরেন্দ্রপন্নগগণৈরারাধিতাংহ্রিদ্বযাম্ ।
এণীচঞ্চললোচনাং সুবদনাং বাণীং পুরাণোজ্জ্বলাং
শ্রোণীভারভরালসামনিমিষাং পশ্যামি বিশ্বেশ্বরীম্ ॥ ৫৬॥

কুচকলশনিষণ্ণকেলিবীণাং
কলমধুরধ্বনিকম্পিতোত্তমাঙ্গীম্ ।
মরকতমণিভঙ্গমেচকাভাং
মদনবিরোধিমনস্বিনীমুপাসে ॥ ৫৭॥

তাডীদলোল্লসিতকোমলকর্ণপালীং
কেশাবলীকলিতদীর্ঘসুনীলবেণীম্ ।
বক্ষোজপীঠনিহিতোজ্জ্বলনাদবীণাং
বাণীং নমামি মদিরারুণনেত্রযুগ্মাম্ ॥ ৫৮॥

যামামনন্তি মুনযঃ প্রকৃতিং পুরাণীং
বিদ্যেতি যাং শ্রুতিরহস্যবিদো গৃণন্তি ।
তামর্দ্ধপল্লবিতশঙ্কররূপমুদ্রাং
দেবীমনন্যশরণঃ শরণং প্রপদ্যে ॥ ৫৯॥

যঃ স্ফাটিকাক্ষবরপুস্তককুণ্ডিকাঢ্যাং
ব্যাখ্যাসমুদ্যতকরাং শরদিন্দুশুভ্রাম্ ।
পদ্মাসনাং চ হৃদযে ভবতীমুপাস্তে ।
মাতঃ! স বিশ্বকবিতার্কিকচক্রবর্তী ॥ ৬০॥

বর্হাবতংসঘনবন্ধুরকেশপাশাং
গুঞ্জাবলীকৃতঘনস্তনহারশোভাম্ ।
শ্যামাং প্রবালবসনাং শরচাপহস্তাং
তামেব নৌমি শবরীং শবরস্য নাথাম্ ॥ ৬১॥

অজ্ঞাতসম্ভবমনাকলিতান্ববাযং
ভিক্ষুং কপালিনমবাসসমদ্বিতীযম্ ।
পূর্বং করগ্রহণমঙ্গলতো ভবত্যাঃ
শম্ভুঃ ক এব বুবুধে গিরিরাজকন্যে ! ॥ ৬২॥

চর্মাম্বরং চ শবভস্মবিলেপনং চ
ভিক্ষাটনং চ নটনং চ পরেতভূমৌ ।
বেতালসংহতিপরিগ্রহতাং চ শম্ভোঃ
শোভাং বহন্তি গিরিজে ! তব সাহচর্যাত্ ॥ ৬৩॥

গলে গুঞ্জাবীজাবলিমপি চ কর্ণে শিখিশিখাং
শিরো রঙ্গে নৃত্যত্কনককদলীমঞ্জুলদলম্ ।
ধনুর্বামে চাংসে শরমপরপাণৌ চ দধতীং
নিতম্বে বর্হালীং কুটিলকবরীং সিদ্ধশবরীম্ ॥ ৬৪॥

লসদ্গুঞ্জাপুঞ্জাভরণকিরণারক্তনযনাং
জপাকর্ণাভূষাং শিখিবরকলাপাম্বরবতীম্ ।
নদজ্ঝিল্লীপল্লীবনতরুদলৈঃ সম্পরিবৃতাম্ ।
নমামি বামোরুং কুটিলকবরীং সিদ্ধশবরীম্ ॥ ৬৫॥

অপর্ণাহোপর্ণাং সিরসকদলীসম্ভবমলং
ভবং জেতুং প্রৌঢিং কিল মনসি বালা বিদধতী ।
নদজ্ঝিল্লীপল্লীবনতরুষু হল্লীসকরুচি-
র্লসত্পল্লীভিল্লী করকলিতভল্লী বিজযতে ॥ ৬৬॥

ধনিনামবিনাভবন্মদানাং ভবনদ্বারি দুরাশযা শযানাম্ ।
অবলোকয মামগেন্দ্রকন্যে! করুণাকন্দলিতৈঃ কটাক্ষমোক্ষৈঃ ॥ ৬৭॥

কুবলযদলনীলং বর্বরস্নিগ্ধকেশং
পৃথুতরকুচভারাক্রান্তকান্তাবলগ্নম্ ।
কিমিতি বহুভিরুক্তৈস্ত্বত্স্বরূপং পদং নঃ
সকলজননি মাতঃ ! সন্ততং সন্নিধত্তাম্ ॥ ৬৮॥

মিথঃ কেশাকেশি প্রধননিধনাস্তর্কঘটনা
বহুশ্রদ্ধাভক্তিপ্রণতিবিষযাশ্চাপ্তবিধযঃ ।
প্রসীদ প্রত্যক্ষীভব গিরিসুতে! দেহি শরণং
নিরালম্বে ! চেতঃ পরিলুঠতি পারিপ্লবমিদম্ ॥ ৬৯॥

লসদ্গুঞ্জাহারস্তনভরনমন্মধ্যলতিকা-
মুদঞ্চদ্ঘর্মাম্ভঃকণগুণিতবক্ত্রাম্বুজরুচম্ ।
শিবং পার্থত্রাণপ্রণবমৃগযাকারকরণং
শিবামন্বক্যান্তীং শরণমহমন্বেমি শবরীম্ ॥ ৭০॥

শিরসি ধনুরটন্যা তাড্যমানস্য শম্ভো-
রলক-নযন-কোণে কিঞ্চিদালজ্যমানে ।
উপনিষদুপগীতং রুদ্রমুদ্ঘোষযন্তী
পরিহরতি মৃডানী মধ্যমং পাণ্ডবানাম্ ॥ ৭১॥

যদ্গলাভরণতন্তুবৈভবান্ নাযকো গরলমাগলং পপৌ ।
তাং চরাচরগুরোঃ কুটুম্বিনীং নৌমি যৌবনভরেণ লালসাম্ ॥ ৭২॥

সুধামপ্যাস্বাদ্য প্রতিভযহরা মৃত্যুহরণীং
বিপদ্যন্তে সর্বে বিধি-শতমখাদ্যা দিবিষদঃ ।
করালং যত্ ক্ষ্বেডং কবলিতবতঃ কালকলনা
ন শম্ভোস্তন্মূলং জননি ! তব তাটঙ্কমহিমা ॥ ৭৩॥

করোপান্তে কান্তে বিতরণিনিশান্তে বিদধতীং
লসদ্বীণাশোণাং নখরুচিভিরেণাঙ্কবদনাম্ ।
সদা বন্দে সন্দেতরুরুহবশন্দেশকবশাত্
কৃপালম্বামম্বাং কুসুমিতকদম্বাঙ্গণগৃহাম্ ॥ ৭৪॥

কর্ণলম্বিতকদম্বমঞ্জরীকেসরারুণকপোলমণ্ডলম্ ।
কেবলং নিগমবাদগোচরং নীলিমানমবলোকযামহে ॥ ৭৫॥

অকৃশং কুচযোঃ কৃশং বিলগ্নে বিপুলং চক্ষুষি বিস্তৃতং নিতম্বে ।
অরুণাধরমাবিরস্তু চিত্তে করুণাশালিকপালিভাগধেযম্ ॥ ৭৬॥

অনভঙ্গুরকেশপাশমম্ব! প্রভযা কীচকমেচকং বপুস্তে ।
পরিতঃ পরিতো বিলোকযামঃ প্রতিপচ্চন্দ্রকলাধিরূঢচূডম্ ॥ ৭7॥

ধ্যাযেযং রত্নপীঠে শুককলপঠিতং শৃণ্বতীং শ্যামগাত্রীং
ন্যস্তৈকাঙ্ঘ্রীসরোজে শশিশকলধরাং বল্লকীং বাদযন্তীম্ ।
কহ্লারাবদ্ধভালাং নিযমিতবিলসচ্চূলিকাং রক্তবস্ত্রাং
মাতঙ্গীং শঙ্খপত্রাং মধুমদবিবশাং চিত্রকোদ্ভাসিভালাম্ ॥ ৭৮॥

আরাধ্য মাতশ্চরণাম্বুজং তে ব্রহ্মাদযো বিশ্রুতকীর্তিমাপুঃ ।
অন্যে পরং বাগ্বিভবং মুনীন্দ্রাঃ পরাং শ্রিযং ভক্তিভরেণ চান্যে ॥ ৭৯॥

নমামি দেবীং নবচন্দ্রমৌলিং মাতঙ্গিনীং চন্দ্রকলাবতংসাম্ ।
আম্নাযবাগ্ভিঃ প্রতিপাদিতার্থং প্রবোধযন্তীং শুকমাদরেণ ॥ ৮০॥

বিনম্রদেবাসুরমৌলিরত্নৈর্নীরাজিতং তে চরণারবিন্দম্ ।
ভজন্তি যে দেবি ! মহীপতীনাং পরাং শ্রিযং ভক্তিমুপাশ্রযন্তি ॥ ৮১॥

মাতঙ্গি! লীলাগমনে ! ভবত্যাঃ সঞ্জাতমঞ্জীরমিষাদ্ ভজন্তে ।
মাতস্ত্বদীযং চরণারবিন্দং অকৃত্রিমাণাং বচসাং বিগুম্ফাঃ ॥ ৮2॥

পদাত্পদং সিঞ্জিতনূপুরাভ্যাং কৃতার্থযন্তী পদবীং পদাভ্যাম্ ।
আস্ফালযন্তী কলবল্লকীং তাং মাতঙ্গিনী মে হৃদযং ধিনোতু ॥ ৮৩॥

লীলাংশুকাবদ্ধনিতম্ববিম্বাং তাডীদলেনার্পিতকর্ণভূষাম্ ।
মাধ্বীমদাঘূর্ণিতনেত্রপদ্মাং ঘনস্তনীং শম্ভুবধূং স্মরামি ॥ ৮৪॥

তডিল্লতাকান্তমলব্ধভূষম্, চিরেণ লক্ষ্যং নবরোমরাজ্যা ।
স্মরামি ভক্ত্যা জগতামধীশি ! বলিত্রযাঙ্কং তব মধ্যমম্ব! ॥ ৮৫॥

নীলোত্পলানাং শ্রিযমাহরন্তীং কান্ত্যাঃ কটাক্ষৈঃ কমলাকরাণাম্ ।
কদম্বমালাঞ্চিতকেশপাশাং মাতঙ্গকন্যাং হৃদি ভাবযামি ॥ ৮৬॥

ধ্যাযেযমারক্তকপোলকান্তং বিম্বাধরং ন্যস্তললাটরম্যম্ ।
আলোললীলাযিতমাযতাক্ষং মন্দস্মিতং তে বদনং মহেশি ! ॥ ৮৭॥

বামস্তনাসঙ্গসখীং বিপঞ্চীং উদ্ঘাটযন্তীমরুণাঙ্গুলীভিঃ ।
তদুত্থসৌভাগ্যবিলোলমৌলিং শ্যামাং ভজে যৌবনভারখিন্নাম্ ॥ ৮৮॥

স্তুত্যানযা শঙ্কর-ধর্মপত্নীং মাতঙ্গিনীং বাগধিদেবতাং তাম্ ।
স্তুবন্তি যে ভক্তিযুতা মনুষ্যাঃ পরাং শ্রিযং ভক্তিমুপাশ্রযন্তি ॥ ৮৯॥

গেহং নাকতি গর্বিতঃ প্রণমতি স্ত্রীসঙ্গমো মোক্ষতি
মৃত্যুর্বৈদ্যতি দূষণং চ গুণতি ক্ষ্মাবল্লভো দাসতি ।
বজ্রং পুষ্পতি পন্নগোঽব্জনলতি হালাহলং ভুজ্যতি
দ্বেষী মিত্রতি পাতকং সুকৃততি ত্বত্পাদসঞ্চিন্তনাত্ ॥ ৯০॥

এহ্যেহি মাতস্ত্রিপুরে পবিত্রে ! যন্ত্রান্তরে ত্বং বসতিং বিধেহি ।
গৃহ্ণস্ব গৃহ্ণস্ব বলিং প্রপূজাং ত্রিকোণষট্কোণদলেঽষ্টকুণ্ডে ॥ ৯১॥

এহ্যেহি মাতস্ত্রিপুরে মদীযে নেত্রে নিবাসং কুরু মঞ্জুনেত্রে ।
ভূতাত্মকং বিশ্বমিদং নরস্য মে দর্শয ত্বং তব চিত্স্বরূপম্ ॥ ৯২॥

এহ্যেহি মাতস্ত্রিপুরে মদীযে বক্ত্রে নিবাসং কুরু চন্দ্রবক্ত্রি !।
পরাপবাদং বচনং নরস্য বাগীশ্বরং মে বদতাং কুরুষ্ব ॥ ৯৩॥

এহ্যেহি মাতস্ত্রিপুরে মদীযে চিত্তে নিবাসং কুরু কল্পবল্লি ! ।
বেগেন জাড্যাদি তমো নিরস্য বিধেহি দীপ্তং তব চিত্স্বরূপম্ ॥ ৯৪॥

অনেন স্তোত্রপাঠেন সর্বপাপহরেণ বৈ ।
প্রীযতাং পরমা শক্তির্মাতঙ্গী সর্বকামদা ॥ ৯৫॥

॥ ইত্যাগমসারে উমাসহাচার্যবিরচিতং শ্রীমাতঙ্গীস্তোত্রং সম্পূর্ণম্ ॥

উমাসহাচার্য বিরচিতং শ্রী মাতঙ্গী স্তোত্রম্ (আগমসার)

Explore More

More Matangi Stotras

Explore More