What is Umasahacarya Viracitam Sri Matangi Stotram Agamasara?

Read Umasahacarya Viracitam Sri Matangi Stotram Agamasara in English (IAST) script — full lyrics with English meaning and transliteration. Ninety-five verses given in the colophon to Umasahacharya and placed in the Agamasara, and the fuller of two recensions of one hymn: the fifty-eight-verse Matangi Stuti in this corpus shares thirty-one of its verses closely, including the meditation both open on. What the extra length is spent on is repetition of the figure under different lights — the same dark-limbed goddess with vina and book returned to again and again in different metres — and on a phalasruti of its own, which promises skill in undertakings, eloquence, wealth beyond the ordinary, force of mind, good fortune, and the regard of kings to whoever repeats it daily. It closes by asking that the supreme power be pleased.

Which deity is Umasahacarya Viracitam Sri Matangi Stotram Agamasara dedicated to?

Umasahacarya Viracitam Sri Matangi Stotram Agamasara is a Sanskrit hymn dedicated to Goddess Matangi.

Umasahacarya Viracitam Sri Matangi… in English (IAST)

|| umāsahācāryaviracitaṃ mātaṅgī stotram ||

|| oṃ klīṃ mātaṅgyai namaḥ ||

mātaṅgī navayāvakārdracaraṇāṃ prollāsikṛṣṇāṃśukāṃ
vīṇollāsikarāṃ samunnatakucāṃ muktāpravālāvalīm |
hṛdyāṅgīṃ sitaśaṅkhakuṇḍaladharāṃ bimbādharāṃ susmitāṃ
ākīrṇālakaveṇimabjanayanāṃ dhyāyet śuka-śyāmalām || 1||

kalādhīśottaṃsāṃ karakalitavīṇāhitarasāṃ
kalindāpatyābhāṃ kalitahṛdayāraktavasanām |
purāṇīṃ kalyāṇīṃ puramathanapuṇyodayakalāṃ
adhīrākṣīmenāmavaṭutaṭasannaddhakabarīm || 2||

karodañcadvīṇaṃ kanakadalatāṭaṅkanihitaṃ
stanābhyāmānamraṃ taruṇamihirāraktavasanam |
mahaḥ kalyāṇaṃ tanmadhumadabharātāmranayanaṃ
tamālaśyāmaṃ naḥ stabakayatu saukhyāni satatam || 3||

karāñcitavipañcikāṃ kalitacandracūḍāmaṇiṃ
kapolavilasanmahaḥkanakapatratāṭaṅkinīm |
tapaḥkalamadhīśitastaruṇabhānuraktāmbarāṃ
tamāladalamecakāṃ taralalocanāmāśraye || 4||

kastūrīracitābhirāmatilakā kalyāṇatāṭaṅkinī
bālā śītamayūkhaśoṇavasanā prālambidhammillakā |
hārodañcitapīvarastanataṭā hālāmadollāsinī
śyāmā kāñcana kāminī vijayate cañcadvipañcīkarā || 5||

mātā marakataśyāmā, mātaṅgī mṛdubhāṣiṇī |
kaṭākṣaye tu kalyāṇī kadambavanavāsinī || 6||

śṛṅge sumeroḥ sahacāriṇībhirgīyanti mātaṅgi tavāvadānam |
āmodinīmāgalamāpibantaḥ kādambarīmambaravāsinaste || 7||

ekena cāpamapareṇa kareṇa bāṇā-
nanyena pāśamitareṇa śṛṇiṃ dadhānā |
ānandakandalitavidrumabālavallī
saṃvinmayī sphuratu kāñcana devatā me || 8||

gajadānakalaṅkikaṇṭhamūlā
kabarīveṣṭanakāṅkṣaṇīyaguñjā |
kurutād duritād vimokṣaṇaṃ me
kuhunā bhillakuṭumbinī bhavānī || 9||

pāṇau mṛṇālasaguṇaṃ dadhatīkṣucāpaṃ
pṛṣṭhe lasatkanakaketakabāṇakośau |
aṅge pravālakavacaṃ vanavāsinī sā
pañcānanaṃ mṛgayate kadalīvanānte || 10||

vāme vistṛtiśālini stanataṭe vinyasya vīṇāmukhaṃ
tantrīṃ tāravirāviṇīmasakalairāsphālayantī nakhaiḥ |
arddhonmīladapāṅgadikṣuvalitagrīvaṃ mukhaṃ bibhratī
māyā kāñcana mohinī vijayate mātaṅgakanyāmayī || 11||

pratikṣaṇapayodhara-pravilasadvipañcīguṇa-
prasāri karapaṅkajaṃ balabhidaśmapuñjopamam |
kadambavanamālikāśaśikalāsamudbhāsitaṃ
mataṅgakulamaṇḍanaṃ manasi me maho jṛmbhatām || 12||

lākṣālohitapādapaṅkajadalāmāpīnatuṅgastanīṃ
karpūrojjvalacāruśaṅkhavalayāṃ kāśmīrapatrāṅkurām |
tantrītāḍanapāṭalāṅgulidalāṃ andāmah mātaraṃ
mātaṅgīṃ madamantharāṃ marakataśyāmāṃ manohāriṇīm || 13||

srastaṃ keśaradāmabhirvalayitaṃ dhammillamābibhratī
tālīpatrapuṭāntaraiḥ sughaṭitaistāṭaṅkinī mauktikaiḥ |
mūle kalpatarormadaskhalitadṛg dṛṣṭyaiva sammohinī
kācid gāyanadevatā vijayate vīṇāvatī vāsanā || 14||

yat ṣaṭpatraṃ kamalamuditaṃ tasya yatkarṇikānta-
rjyotistasyāpyudarakuhare yattadoṅkārapīṭham |
tasyāpyantaḥ stanabharanatāṃ kuṇḍalīti prasiddhāṃ
śyāmākārāṃ sakalajananīṃ santataṃ bhāvayāmi || 15||

niśi niśi balimasyai bhuktaśeṣeṇa dattvā
manu manu gaṇanātho mantrajāpaṃ vitanvan |
bhavati nṛpatipūjyo yoṣitāṃ prītipātraṃ
vrajati ca punarante śāśvatīṃ mūrtimādyām || 16||

kāsāranti payodhayo viṣadharāḥ karpūrahāranti ca
śrīkhaṇḍanti davānalā vanagajāḥ sāraṅgaśāvanti ca |
dāsantyadbhutaśātravāḥ kimaparaṃ puṣyanti vajrāṇyapi
śrīdāmodarasodare bhagavati ! tvatpādaniṣṭhātmanām || 17||

kuvalayanibhā kauśeyārddhorukā mukuṭojjvalā
halamuśalinī sadbhaktebhyo varābhayadāyinī |
kapilanayanā madhyekṣāmā kaṭhoraghanastanī
jayati jagatāṃ mātaḥ ! sā te varāhamukhī tanuḥ || 18||

amṛtamahodadhimadhye ratnadvīpe sakalpavṛkṣavane |
navamaṇimaṇḍapamadhye maṇimayasiṃhāsanasyorddhvam || 19||

mātaṅgīṃ bhūṣitāṅgīṃ madhumadamuditāṃ ghūrṇamāṇākṣiyugmāṃ
svidyadvaktrāṃ kadambaprasavaparilasadveṇikāmāttavīṇām |
bimboṣṭhīṃ raktavastrāṃ mṛgamadatilakāmindulekhāvataṃsāṃ
karṇodyacchaṅkhapatrāṃ kaṭhinakucabharākrāntakāntāvalagnām || 20||

unmīladyauvanāḍhyāṃ nibiḍamadabharodvegalīlāvakāśāṃ
ratnagraiveyahārāṅgadakaṭakakaṭīsūtramañjīrabhūṣām |
ānīyārthānabhīṣṭān smitamadhuradṛśā sādhakaṃ tarpayantīṃ
dhyāyed devīṃ śukābhāṃ śukamakhilakalārūpamasyāśca pārśve || 21||

amṛtodadhimadhye'tra ratnadvīpe manorame |
kadambabilvanilaye kalpavṛkṣopaśobhite || 22||

tasya madhye sukhāstīrṇe ratnasiṃhāsane śubhe |
trikoṇakarṇikāmadhye tadbahiḥ pañcapatrakam || 23||

aṣṭapatraṃ mahāpadmaṃ kesarāḍhyaṃ sakarṇikam |
tatpārśve'ṣṭadalaṃ proktaṃ catuḥpatraṃ punaḥ priye || 24||

caturasraṃ ca tadbāhye evaṃ devyāsanaṃ bhavet |
tasya madhye sukhāsīnāṃ śyāmavarṇāṃ śucismitām || 25||

kadambamālāparitaḥ prāntabaddhaśiroruhām |
prālambālakasaṃyuktāṃ candralekhāvataṃsakām || 26||

lalāṭatilakopetāṃ īṣatprahasitānanām |
kiñcitsvedāmburacitalalāṭaphalakojjvalām || 27||

trivalītaraṅgamadhyastharomarājivirājitām |
sarvālaṅkārasaṃyuktāṃ sarvābharaṇabhūṣaṇām || 28||

nūpurai ratnakhacitaiḥ kaṭisūtrairalaṅkṛtām |
valayai ratnaracitaiḥ keyūrairmaṇibhūṣaṇaiḥ || 29||

bhūṣitāṃ dvibhujāṃ bālāṃ madāghūrṇitalocanām |
vādayantīṃ sadā vīṇāṃ śaṅkhakuṇḍalabhūṣaṇām || 30||

prālambikarṇābharaṇāṃ karṇottaṃsavirājitām |
yauvanonmādinīṃ vīrāṃ raktāṃśukaparigrahām || 31||

tamālanīlāṃ taruṇīṃ madamattāṃ mataṅginīm |
catuḥṣaṣṭikalārūpāṃ pārśvasthaśukasārikām || 32||

mātaṅgeśīṃ mahādevīṃ niḥśvasyaināntarātmanā |
sūryakoṭipratīkāśāṃ japākusumasannibhām || 33||

athavā pītavarṇāṃ ca śyāmāmevāparāṃ śraye |
niṣpāpasya manuṣyasya kiṃ na siddhyati bhūtale || 34||

kāmavaccarate bhūmau sākṣād vaiśravaṇāyate |
gadyapadyamayī vāṇī tasya vaktrād vinirgatā || 35||

bhairavī tripurā lakṣmīrvāṇī mātaṅginīti ca |
paryāyavācakā hyete satyametad bravīmi te || 36||

trika-pañcakāṣṭayugalaṃ ṣoḍaśakoṣṭhāṣṭakaṃ catuḥṣaṣṭau |
dhyātvā'ṅgadevatānāṃ devyāḥ parito yajeta bhāvena || 37||

mātaṅgi ! mātarīśe ! madhumathanārādhite ! mahāmāye ! |
mohini ! mohapramathini ! manmathamathanapriye namaste'stu || 38||

stutiṣu tava devi ! vidhirapi vihitamatirbhavati cāpyavihitamatiḥ |
yadyapi bhaktirmāmapi bhavatīṃ stotuṃ vilobhayati || 39||

yatijanahṛdayāvāse ! vāsavavandye varāṅgi mātaṅgi ! |
vīṇāvādyavinodyairnāradagīte ! namo devi ! || 40||

devi ! prasīda sundari pīnastani kambukaṇṭhi ghanakeśi! |
śyāmāṅgi vidrumoṣṭhi smitamukhi mugdhākṣi mauktikābharaṇe! || 41||

bharaṇe triviṣṭapasya prabhavasi tata eva bhairavī tvamasi |
tvadbhaktilabdhavibhavo bhavati kṣudro'pi bhuvanapatiḥ || 42||

patitaḥ kṛpaṇo mūko'pyamba! bhavatyāḥ prasādaleśena |
pūjyaḥ subhago vāgmī bhavati jaḍaścāpi sarvajñaḥ || 43||

jñānātmake jaganmayi nirañjane nityaśuddhapade! |
nirvāṇarūpiṇi pare tripure! śaraṇaṃ prapannastvām || 44||

tvāṃ manasi kṣaṇamapi yo dhyāyati muktāvṛtāṃ śyāmām |
tasya jagattritaye'smin kāstā yā na striyaḥ sādhyāḥ || 45||

sādhyākṣaragarbhitapañcanavatyakṣarātmike jaganmātaḥ! |
bhagavati mātaṅgeśvari ! namo'stu tubhyaṃ mahādevi ! || 46||

vidyādharasurakinnaraguhyakagandharvasiddhayakṣavaraiḥ |
ārādhite ! namaste'stu prasīda kṛpayaiva mātaṅgi! || 47||

mātaṅgīstutiriyamanvahaṃ prajaptā
jantūnāṃ vitarati kauśalaṃ kriyāsu |
vāgmitvaṃ śriyamadhikāṃ ca mānaśaktiṃ
saubhāgyaṃ nṛpatibhirarcanīyatāṃ sa yāti || 48||

mātaṅgīmanudinamevamarcayantaḥ
śrīmantaḥ subhagatarāḥ kavitvabhājaḥ |
prāpyānte sakalasamīhitārthavargaṃ
dehānte vimalataraṃ viśanti dhāma || 49||

avaṭutaṭaghaṭitacolīṃ tāḍitatāḍīṃ palāśatāṭaṅkām |
vīṇāvādanavelākampitaśirasaṃ namāmi mātaṅgīm || 50||

vīṇāvādananirataṃ tadalābusthagitavāmakṛtakucam |
śyāmalakomalagātraṃ pāṭalanayanaṃ paraṃ bhaje dhāma || 51||

aṅkitapāṇicatuṣṭayamaṅkuśapāśekṣupuṣpacāpaśaraiḥ |
śaṅkarajīvitamitraṃ paṅkajanayanaṃ paraṃ bhaje dhāma || 52||

karakalitakanakavīṇālābukakadalīkṛtaikakucakamalā |
jayati jagadekamātā mātaṅgī maṅgalāyatanā || 53||

aṅgalālitamanaṅgavidviṣastuṅgapīnakucabhārabhaṅguram |
śyāmalaṃ śaśinibhānanaṃ bhaje komalaṃ kuṭilakuntalaṃ mahaḥ || 54||

vīṇāvādyavinodagītaniratāṃ līlāśukollāsinīṃ
bimboṣṭhīṃ navayāvakārdracaraṇāmākīrṇakeśālakām |
hṛdyāṅgīṃ sitaśaṅkhakuṇḍaladharālaṅkāraveṣojvalāṃ
mātaṅgīṃ praṇato'smi susmitamukhīṃ devīṃ śukaśyāmalām || 55||

veṇīmūlavirājitenduśakalāṃ vīṇāninādapriyāṃ
kṣoṇīpālasurendrapannagagaṇairārādhitāṃhridvayām |
eṇīcañcalalocanāṃ suvadanāṃ vāṇīṃ purāṇojjvalāṃ
śroṇībhārabharālasāmanimiṣāṃ paśyāmi viśveśvarīm || 56||

kucakalaśaniṣaṇṇakelivīṇāṃ
kalamadhuradhvanikampitottamāṅgīm |
marakatamaṇibhaṅgamecakābhāṃ
madanavirodhimanasvinīmupāse || 57||

tāḍīdalollasitakomalakarṇapālīṃ
keśāvalīkalitadīrghasunīlaveṇīm |
vakṣojapīṭhanihitojjvalanādavīṇāṃ
vāṇīṃ namāmi madirāruṇanetrayugmām || 58||

yāmāmananti munayaḥ prakṛtiṃ purāṇīṃ
vidyeti yāṃ śrutirahasyavido gṛṇanti |
tāmarddhapallavitaśaṅkararūpamudrāṃ
devīmananyaśaraṇaḥ śaraṇaṃ prapadye || 59||

yaḥ sphāṭikākṣavarapustakakuṇḍikāḍhyāṃ
vyākhyāsamudyatakarāṃ śaradinduśubhrām |
padmāsanāṃ ca hṛdaye bhavatīmupāste |
mātaḥ! sa viśvakavitārkikacakravartī || 60||

barhāvataṃsaghanabandhurakeśapāśāṃ
guñjāvalīkṛtaghanastanahāraśobhām |
śyāmāṃ pravālavasanāṃ śaracāpahastāṃ
tāmeva naumi śabarīṃ śabarasya nāthām || 61||

ajñātasambhavamanākalitānvavāyaṃ
bhikṣuṃ kapālinamavāsasamadvitīyam |
pūrvaṃ karagrahaṇamaṅgalato bhavatyāḥ
śambhuḥ ka eva bubudhe girirājakanye ! || 62||

carmāmbaraṃ ca śavabhasmavilepanaṃ ca
bhikṣāṭanaṃ ca naṭanaṃ ca paretabhūmau |
vetālasaṃhatiparigrahatāṃ ca śambhoḥ
śobhāṃ vahanti girije ! tava sāhacaryāt || 63||

gale guñjābījāvalimapi ca karṇe śikhiśikhāṃ
śiro raṅge nṛtyatkanakakadalīmañjuladalam |
dhanurvāme cāṃse śaramaparapāṇau ca dadhatīṃ
nitambe barhālīṃ kuṭilakabarīṃ siddhaśabarīm || 64||

lasadguñjāpuñjābharaṇakiraṇāraktanayanāṃ
japākarṇābhūṣāṃ śikhivarakalāpāmbaravatīm |
nadajjhillīpallīvanatarudalaiḥ samparivṛtām |
namāmi vāmoruṃ kuṭilakabarīṃ siddhaśabarīm || 65||

aparṇāhoparṇāṃ sirasakadalīsambhavamalaṃ
bhavaṃ jetuṃ prauḍhiṃ kila manasi bālā vidadhatī |
nadajjhillīpallīvanataruṣu hallīsakaruci-
rlasatpallībhillī karakalitabhallī vijayate || 66||

dhanināmavinābhavanmadānāṃ bhavanadvāri durāśayā śayānām |
avalokaya māmagendrakanye! karuṇākandalitaiḥ kaṭākṣamokṣaiḥ || 67||

kuvalayadalanīlaṃ barbarasnigdhakeśaṃ
pṛthutarakucabhārākrāntakāntāvalagnam |
kimiti bahubhiruktaistvatsvarūpaṃ padaṃ naḥ
sakalajanani mātaḥ ! santataṃ sannidhattām || 68||

mithaḥ keśākeśi pradhananidhanāstarkaghaṭanā
bahuśraddhābhaktipraṇativiṣayāścāptavidhayaḥ |
prasīda pratyakṣībhava girisute! dehi śaraṇaṃ
nirālambe ! cetaḥ pariluṭhati pāriplavamidam || 69||

lasadguñjāhārastanabharanamanmadhyalatikā-
mudañcadgharmāmbhaḥkaṇaguṇitavaktrāmbujarucam |
śivaṃ pārthatrāṇapraṇavamṛgayākārakaraṇaṃ
śivāmanvakyāntīṃ śaraṇamahamanvemi śabarīm || 70||

śirasi dhanuraṭanyā tāḍyamānasya śambho-
ralaka-nayana-koṇe kiñcidālajyamāne |
upaniṣadupagītaṃ rudramudghoṣayantī
pariharati mṛḍānī madhyamaṃ pāṇḍavānām || 71||

yadgalābharaṇatantuvaibhavān nāyako garalamāgalaṃ papau |
tāṃ carācaraguroḥ kuṭumbinīṃ naumi yauvanabhareṇa lālasām || 72||

sudhāmapyāsvādya pratibhayaharā mṛtyuharaṇīṃ
vipadyante sarve vidhi-śatamakhādyā diviṣadaḥ |
karālaṃ yat kṣveḍaṃ kavalitavataḥ kālakalanā
na śambhostanmūlaṃ janani ! tava tāṭaṅkamahimā || 73||

karopānte kānte vitaraṇiniśānte vidadhatīṃ
lasadvīṇāśoṇāṃ nakharucibhireṇāṅkavadanām |
sadā vande sandetaruruhavaśandeśakavaśāt
kṛpālambāmambāṃ kusumitakadambāṅgaṇagṛhām || 74||

karṇalambitakadambamañjarīkesarāruṇakapolamaṇḍalam |
kevalaṃ nigamavādagocaraṃ nīlimānamavalokayāmahe || 75||

akṛśaṃ kucayoḥ kṛśaṃ vilagne vipulaṃ cakṣuṣi vistṛtaṃ nitambe |
aruṇādharamāvirastu citte karuṇāśālikapālibhāgadheyam || 76||

anabhaṅgurakeśapāśamamba! prabhayā kīcakamecakaṃ vapuste |
paritaḥ parito vilokayāmaḥ pratipaccandrakalādhirūḍhacūḍam || 77||

dhyāyeyaṃ ratnapīṭhe śukakalapaṭhitaṃ śṛṇvatīṃ śyāmagātrīṃ
nyastaikāṅghrīsaroje śaśiśakaladharāṃ vallakīṃ vādayantīm |
kahlārābaddhabhālāṃ niyamitavilasaccūlikāṃ raktavastrāṃ
mātaṅgīṃ śaṅkhapatrāṃ madhumadavivaśāṃ citrakodbhāsibhālām || 78||

ārādhya mātaścaraṇāmbujaṃ te brahmādayo viśrutakīrtimāpuḥ |
anye paraṃ vāgvibhavaṃ munīndrāḥ parāṃ śriyaṃ bhaktibhareṇa cānye || 79||

namāmi devīṃ navacandramauliṃ mātaṅginīṃ candrakalāvataṃsām |
āmnāyavāgbhiḥ pratipāditārthaṃ prabodhayantīṃ śukamādareṇa || 80||

vinamradevāsuramauliratnairnīrājitaṃ te caraṇāravindam |
bhajanti ye devi ! mahīpatīnāṃ parāṃ śriyaṃ bhaktimupāśrayanti || 81||

mātaṅgi! līlāgamane ! bhavatyāḥ sañjātamañjīramiṣād bhajante |
mātastvadīyaṃ caraṇāravindaṃ akṛtrimāṇāṃ vacasāṃ vigumphāḥ || 82||

padātpadaṃ siñjitanūpurābhyāṃ kṛtārthayantī padavīṃ padābhyām |
āsphālayantī kalavallakīṃ tāṃ mātaṅginī me hṛdayaṃ dhinotu || 83||

līlāṃśukābaddhanitambabimbāṃ tāḍīdalenārpitakarṇabhūṣām |
mādhvīmadāghūrṇitanetrapadmāṃ ghanastanīṃ śambhuvadhūṃ smarāmi || 84||

taḍillatākāntamalabdhabhūṣam, cireṇa lakṣyaṃ navaromarājyā |
smarāmi bhaktyā jagatāmadhīśi ! valitrayāṅkaṃ tava madhyamamba! || 85||

nīlotpalānāṃ śriyamāharantīṃ kāntyāḥ kaṭākṣaiḥ kamalākarāṇām |
kadambamālāñcitakeśapāśāṃ mātaṅgakanyāṃ hṛdi bhāvayāmi || 86||

dhyāyeyamāraktakapolakāntaṃ bimbādharaṃ nyastalalāṭaramyam |
ālolalīlāyitamāyatākṣaṃ mandasmitaṃ te vadanaṃ maheśi ! || 87||

vāmastanāsaṅgasakhīṃ vipañcīṃ udghāṭayantīmaruṇāṅgulībhiḥ |
tadutthasaubhāgyavilolamauliṃ śyāmāṃ bhaje yauvanabhārakhinnām || 88||

stutyānayā śaṅkara-dharmapatnīṃ mātaṅginīṃ vāgadhidevatāṃ tām |
stuvanti ye bhaktiyutā manuṣyāḥ parāṃ śriyaṃ bhaktimupāśrayanti || 89||

gehaṃ nākati garvitaḥ praṇamati strīsaṅgamo mokṣati
mṛtyurvaidyati dūṣaṇaṃ ca guṇati kṣmāvallabho dāsati |
vajraṃ puṣpati pannago'bjanalati hālāhalaṃ bhujyati
dveṣī mitrati pātakaṃ sukṛtati tvatpādasañcintanāt || 90||

ehyehi mātastripure pavitre ! yantrāntare tvaṃ vasatiṃ vidhehi |
gṛhṇasva gṛhṇasva baliṃ prapūjāṃ trikoṇaṣaṭkoṇadale'ṣṭakuṇḍe || 91||

ehyehi mātastripure madīye netre nivāsaṃ kuru mañjunetre |
bhūtātmakaṃ viśvamidaṃ narasya me darśaya tvaṃ tava citsvarūpam || 92||

ehyehi mātastripure madīye vaktre nivāsaṃ kuru candravaktri !|
parāpavādaṃ vacanaṃ narasya vāgīśvaraṃ me vadatāṃ kuruṣva || 93||

ehyehi mātastripure madīye citte nivāsaṃ kuru kalpavalli ! |
vegena jāḍyādi tamo nirasya vidhehi dīptaṃ tava citsvarūpam || 94||

anena stotrapāṭhena sarvapāpahareṇa vai |
prīyatāṃ paramā śaktirmātaṅgī sarvakāmadā || 95||

|| ityāgamasāre umāsahācāryaviracitaṃ śrīmātaṅgīstotraṃ sampūrṇam ||

umāsahācārya viracitaṃ śrī mātaṅgī stotram (āgamasāra)

Explore More

More Matangi Stotras

Explore More