śrī rāma carita mānasa - bālakāṇḍa

|| śrī gaṇeśāya namaḥ ||
śrījānakīvallabho vijayate
śrī rāmacarita mānasa
prathama sopāna
(bālakāṇḍa śloka)

varṇānāmarthasaṃghānāṃ rasānāṃ chandasāmapi|
maṅgalānāṃ ca karttārau vande vāṇīvināyakau || 1 ||

bhavānīśaṅkarau vande śraddhāviśvāsarūpiṇau|
yābhyāṃ vinā na paśyanti siddhāḥsvāntaḥsthamīśvaram || 2 ||

vande bodhamayaṃ nityaṃ guruṃ śaṅkararūpiṇam|
yamāśrito hi vakro'pi candraḥ sarvatra vandyate || 3 ||

sītārāmaguṇagrāmapuṇyāraṇyavihāriṇau|
vande viśuddhavijñānau kabīśvarakapīśvarau || 4 ||

udbhavasthitisaṃhārakāriṇīṃ kleśahāriṇīm|
sarvaśreyaskarīṃ sītāṃ nato'haṃ rāmavallabhām || 5 ||

yanmāyāvaśavartiṃ viśvamakhilaṃ brahmādidevāsurā
yatsatvādamṛṣaiva bhāti sakalaṃ rajjau yathāherbhramaḥ|
yatpādaplavamekameva hi bhavāmbhodhestitīrṣāvatāṃ
vande'haṃ tamaśeṣakāraṇaparaṃ rāmākhyamīśaṃ harim || 6 ||

nānāpurāṇanigamāgamasammataṃ yad
rāmāyaṇe nigaditaṃ kvacidanyato'pi|
svāntaḥsukhāya tulasī raghunāthagāthā-
bhāṣānibandhamatimañjulamātanoti || 7 ||

so. jo sumirata sidhi hoi gana nāyaka karibara badana|
karau anugraha soi buddhi rāsi subha guna sadana || 1 ||

mūka hoi bācāla paṃgu caḍhai giribara gahana|
jāsu kṛpā~ so dayāla dravau sakala kali mala dahana || 2 ||

nīla saroruha syāma taruna aruna bārija nayana|
karau so mama ura dhāma sadā chīrasāgara sayana || 3 ||

kuṃda iṃdu sama deha umā ramana karunā ayana|
jāhi dīna para neha karau kṛpā mardana mayana || 4 ||

baṃdau guru pada kaṃja kṛpā siṃdhu nararūpa hari|
mahāmoha tama puṃja jāsu bacana rabi kara nikara || 5 ||

baṃdau guru pada paduma parāgā| suruci subāsa sarasa anurāgā ||
amiya mūrimaya cūrana cārū| samana sakala bhava ruja parivārū ||
sukṛti saṃbhu tana bimala bibhūtī| maṃjula maṃgala moda prasūtī ||
jana mana maṃju mukura mala haranī| kie~ tilaka guna gana basa karanī ||
śrīgura pada nakha mani gana jotī| sumirata dibya drṛṣṭi hiya~ hotī ||
dalana moha tama so saprakāsū| baṛe bhāga ura āvai jāsū ||
ugharahiṃ bimala bilocana hī ke| miṭahiṃ doṣa dukha bhava rajanī ke ||
sūjhahiṃ rāma carita mani mānika| guputa pragaṭa jaha~ jo jehi khānika ||

do. jathā suaṃjana aṃji dṛga sādhaka siddha sujāna|
kautuka dekhata saila bana bhūtala bhūri nidhāna || 1 ||

guru pada raja mṛdu maṃjula aṃjana| nayana amia dṛga doṣa bibhaṃjana ||
tehiṃ kari bimala bibeka bilocana| baranau~ rāma carita bhava mocana ||
baṃdau~ prathama mahīsura caranā| moha janita saṃsaya saba haranā ||
sujana samāja sakala guna khānī| karau~ pranāma saprema subānī ||
sādhu carita subha carita kapāsū| nirasa bisada gunamaya phala jāsū ||
jo sahi dukha parachidra durāvā| baṃdanīya jehiṃ jaga jasa pāvā ||
muda maṃgalamaya saṃta samājū| jo jaga jaṃgama tīratharājū ||
rāma bhakti jaha~ surasari dhārā| sarasai brahma bicāra pracārā ||
bidhi niṣedhamaya kali mala haranī| karama kathā rabinaṃdani baranī ||
hari hara kathā birājati benī| sunata sakala muda maṃgala denī ||
baṭu bisvāsa acala nija dharamā| tīratharāja samāja sukaramā ||
sabahiṃ sulabha saba dina saba desā| sevata sādara samana kalesā ||
akatha alaukika tīratharāū| dei sadya phala pragaṭa prabhāū ||

do. suni samujhahiṃ jana mudita mana majjahiṃ ati anurāga|
lahahiṃ cāri phala achata tanu sādhu samāja prayāga || 2 ||

majjana phala pekhia tatakālā| kāka hohiṃ pika bakau marālā ||
suni ācaraja karai jani koī| satasaṃgati mahimā nahiṃ goī ||
bālamīka nārada ghaṭajonī| nija nija mukhani kahī nija honī ||
jalacara thalacara nabhacara nānā| je jaṛa cetana jīva jahānā ||
mati kīrati gati bhūti bhalāī| jaba jehiṃ jatana jahā~ jehiṃ pāī ||
so jānaba satasaṃga prabhāū| lokahu~ beda na āna upāū ||
binu satasaṃga bibeka na hoī| rāma kṛpā binu sulabha na soī ||
satasaṃgata muda maṃgala mūlā| soi phala sidhi saba sādhana phūlā ||
saṭha sudharahiṃ satasaṃgati pāī| pārasa parasa kudhāta suhāī ||
bidhi basa sujana kusaṃgata parahīṃ| phani mani sama nija guna anusarahīṃ ||
bidhi hari hara kabi kobida bānī| kahata sādhu mahimā sakucānī ||
so mo sana kahi jāta na kaiseṃ| sāka banika mani guna gana jaiseṃ ||

do. baṃdau~ saṃta samāna cita hita anahita nahiṃ koi|
aṃjali gata subha sumana jimi sama sugaṃdha kara doi || 3(ka) ||

saṃta sarala cita jagata hita jāni subhāu sanehu|
bālabinaya suni kari kṛpā rāma carana rati dehu || 3(kha) ||

bahuri baṃdi khala gana satibhāe~| je binu kāja dāhinehu bāe~ ||
para hita hāni lābha jinha kereṃ| ujareṃ haraṣa biṣāda basereṃ ||
hari hara jasa rākesa rāhu se| para akāja bhaṭa sahasabāhu se ||
je para doṣa lakhahiṃ sahasākhī| para hita ghṛta jinha ke mana mākhī ||
teja kṛsānu roṣa mahiṣesā| agha avaguna dhana dhanī dhanesā ||
udaya keta sama hita sabahī ke| kuṃbhakarana sama sovata nīke ||
para akāju lagi tanu pariharahīṃ| jimi hima upala kṛṣī dali garahīṃ ||
baṃdau~ khala jasa seṣa saroṣā| sahasa badana baranai para doṣā ||
puni pranavau~ pṛthurāja samānā| para agha sunai sahasa dasa kānā ||
bahuri sakra sama binavau~ tehī| saṃtata surānīka hita jehī ||
bacana bajra jehi sadā piārā| sahasa nayana para doṣa nihārā ||

do. udāsīna ari mīta hita sunata jarahiṃ khala rīti|
jāni pāni juga jori jana binatī karai saprīti || 4 ||

maiṃ apanī disi kīnha nihorā| tinha nija ora na lāuba bhorā ||
bāyasa paliahiṃ ati anurāgā| hohiṃ nirāmiṣa kabahu~ ki kāgā ||
baṃdau~ saṃta asajjana caranā| dukhaprada ubhaya bīca kachu baranā ||
bichurata eka prāna hari lehīṃ| milata eka dukha dāruna dehīṃ ||
upajahiṃ eka saṃga jaga māhīṃ| jalaja joṃka jimi guna bilagāhīṃ ||
sudhā surā sama sādhū asādhū| janaka eka jaga jaladhi agādhū ||
bhala anabhala nija nija karatūtī| lahata sujasa apaloka bibhūtī ||
sudhā sudhākara surasari sādhū| garala anala kalimala sari byādhū ||
guna avaguna jānata saba koī| jo jehi bhāva nīka tehi soī ||

do. bhalo bhalāihi pai lahai lahai nicāihi nīcu|
sudhā sarāhia amaratā~ garala sarāhia mīcu || 5 ||

khala agha aguna sādhū guna gāhā| ubhaya apāra udadhi avagāhā ||
tehi teṃ kachu guna doṣa bakhāne| saṃgraha tyāga na binu pahicāne ||
bhaleu poca saba bidhi upajāe| gani guna doṣa beda bilagāe ||
kahahiṃ beda itihāsa purānā| bidhi prapaṃcu guna avaguna sānā ||
dukha sukha pāpa punya dina rātī| sādhu asādhu sujāti kujātī ||
dānava deva ū~ca aru nīcū| amia sujīvanu māhuru mīcū ||
māyā brahma jīva jagadīsā| lacchi alacchi raṃka avanīsā ||
kāsī maga surasari kramanāsā| maru mārava mahideva gavāsā ||
saraga naraka anurāga birāgā| nigamāgama guna doṣa bibhāgā ||

do. jaṛa cetana guna doṣamaya bisva kīnha karatāra|
saṃta haṃsa guna gahahiṃ paya parihari bāri bikāra || 6 ||

asa bibeka jaba dei bidhātā| taba taji doṣa gunahiṃ manu rātā ||
kāla subhāu karama bariāī| bhaleu prakṛti basa cukai bhalāī ||
so sudhāri harijana jimi lehīṃ| dali dukha doṣa bimala jasu dehīṃ ||
khalau karahiṃ bhala pāi susaṃgū| miṭai na malina subhāu abhaṃgū ||
lakhi subeṣa jaga baṃcaka jeū| beṣa pratāpa pūjiahiṃ teū ||
udharahiṃ aṃta na hoi nibāhū| kālanemi jimi rāvana rāhū ||
kiehu~ kubeṣa sādhu sanamānū| jimi jaga jāmavaṃta hanumānū ||
hāni kusaṃga susaṃgati lāhū| lokahu~ beda bidita saba kāhū ||
gagana caṛhai raja pavana prasaṃgā| kīcahiṃ milai nīca jala saṃgā ||
sādhu asādhu sadana suka sārīṃ| sumirahiṃ rāma dehiṃ gani gārī ||
dhūma kusaṃgati kārikha hoī| likhia purāna maṃju masi soī ||
soi jala anala anila saṃghātā| hoi jalada jaga jīvana dātā ||

do. graha bheṣaja jala pavana paṭa pāi kujoga sujoga|
hohi kubastu subastu jaga lakhahiṃ sulacchana loga || 7(ka) ||

sama prakāsa tama pākha duhu~ nāma bheda bidhi kīnha|
sasi soṣaka poṣaka samujhi jaga jasa apajasa dīnha || 7(kha) ||

jaṛa cetana jaga jīva jata sakala rāmamaya jāni|
baṃdau~ saba ke pada kamala sadā jori juga pāni || 7(ga) ||

deva danuja nara nāga khaga preta pitara gaṃdharba|
baṃdau~ kiṃnara rajanicara kṛpā karahu aba sarba || 7(gha) ||

ākara cāri lākha caurāsī| jāti jīva jala thala nabha bāsī ||
sīya rāmamaya saba jaga jānī| karau~ pranāma jori juga pānī ||
jāni kṛpākara kiṃkara mohū| saba mili karahu chāṛi chala chohū ||
nija budhi bala bharosa mohi nāhīṃ| tāteṃ binaya karau~ saba pāhī ||
karana cahau~ raghupati guna gāhā| laghu mati mori carita avagāhā ||
sūjha na ekau aṃga upāū| mana mati raṃka manoratha rāū ||
mati ati nīca ū~ci ruci āchī| cahia amia jaga jurai na chāchī ||
chamihahiṃ sajjana mori ḍhiṭhāī| sunihahiṃ bālabacana mana lāī ||
jau bālaka kaha totari bātā| sunahiṃ mudita mana pitu aru mātā ||
ha~sihahi kūra kuṭila kubicārī| je para dūṣana bhūṣanadhārī ||
nija kavita kehi lāga na nīkā| sarasa hou athavā ati phīkā ||
je para bhaniti sunata haraṣāhī| te bara puruṣa bahuta jaga nāhīṃ ||
jaga bahu nara sara sari sama bhāī| je nija bāṛhi baṛhahiṃ jala pāī ||
sajjana sakṛta siṃdhu sama koī| dekhi pūra bidhu bāṛhai joī ||

do. bhāga choṭa abhilāṣu baṛa karau~ eka bisvāsa|
paihahiṃ sukha suni sujana saba khala karahahiṃ upahāsa || 8 ||

khala parihāsa hoi hita morā| kāka kahahiṃ kalakaṃṭha kaṭhorā ||
haṃsahi baka dādura cātakahī| ha~sahiṃ malina khala bimala batakahī ||
kabita rasika na rāma pada nehū| tinha kaha~ sukhada hāsa rasa ehū ||
bhāṣā bhaniti bhori mati morī| ha~sibe joga ha~seṃ nahiṃ khorī ||
prabhu pada prīti na sāmujhi nīkī| tinhahi kathā suni lāgahi phīkī ||
hari hara pada rati mati na kutarakī| tinha kahu~ madhura kathā raghuvara kī ||
rāma bhagati bhūṣita jiya~ jānī| sunihahiṃ sujana sarāhi subānī ||
kabi na hou~ nahiṃ bacana prabīnū| sakala kalā saba bidyā hīnū ||
ākhara aratha alaṃkṛti nānā| chaṃda prabaṃdha aneka bidhānā ||
bhāva bheda rasa bheda apārā| kabita doṣa guna bibidha prakārā ||
kabita bibeka eka nahiṃ moreṃ| satya kahau~ likhi kāgada kore ||

do. bhaniti mori saba guna rahita bisva bidita guna eka|
so bicāri sunihahiṃ sumati jinha keṃ bimala biveka || 9 ||

ehi maha~ raghupati nāma udārā| ati pāvana purāna śruti sārā ||
maṃgala bhavana amaṃgala hārī| umā sahita jehi japata purārī ||
bhaniti bicitra sukabi kṛta joū| rāma nāma binu soha na soū ||
bidhubadanī saba bhā~ti sa~vārī| sona na basana binā bara nārī ||
saba guna rahita kukabi kṛta bānī| rāma nāma jasa aṃkita jānī ||
sādara kahahiṃ sunahiṃ budha tāhī| madhukara sarisa saṃta gunagrāhī ||
jadapi kabita rasa ekau nāhī| rāma pratāpa prakaṭa ehi māhīṃ ||
soi bharosa moreṃ mana āvā| kehiṃ na susaṃga baḍappanu pāvā ||
dhūmau tajai sahaja karuāī| agaru prasaṃga sugaṃdha basāī ||
bhaniti bhadesa bastu bhali baranī| rāma kathā jaga maṃgala karanī ||

chaṃ. maṃgala karani kali mala harani tulasī kathā raghunātha kī ||
gati kūra kabitā sarita kī jyoṃ sarita pāvana pātha kī ||
prabhu sujasa saṃgati bhaniti bhali hoihi sujana mana bhāvanī ||
bhava aṃga bhūti masāna kī sumirata suhāvani pāvanī ||

do. priya lāgihi ati sabahi mama bhaniti rāma jasa saṃga|
dāru bicāru ki karai kou baṃdia malaya prasaṃga || 10(ka) ||

syāma surabhi paya bisada ati gunada karahiṃ saba pāna|
girā grāmya siya rāma jasa gāvahiṃ sunahiṃ sujāna || 10(kha) ||

mani mānika mukutā chabi jaisī| ahi giri gaja sira soha na taisī ||
nṛpa kirīṭa tarunī tanu pāī| lahahiṃ sakala sobhā adhikāī ||
taisehiṃ sukabi kabita budha kahahīṃ| upajahiṃ anata anata chabi lahahīṃ ||
bhagati hetu bidhi bhavana bihāī| sumirata sārada āvati dhāī ||
rāma carita sara binu anhavāe~| so śrama jāi na koṭi upāe~ ||
kabi kobida asa hṛdaya~ bicārī| gāvahiṃ hari jasa kali mala hārī ||
kīnheṃ prākṛta jana guna gānā| sira dhuni girā lagata pachitānā ||
hṛdaya siṃdhu mati sīpa samānā| svāti sāradā kahahiṃ sujānā ||
jauṃ baraṣai bara bāri bicārū| hohiṃ kabita mukutāmani cārū ||

do. juguti bedhi puni pohiahiṃ rāmacarita bara tāga|
pahirahiṃ sajjana bimala ura sobhā ati anurāga || 11 ||

je janame kalikāla karālā| karataba bāyasa beṣa marālā ||
calata kupaṃtha beda maga chā~ṛe| kapaṭa kalevara kali mala bhā~ṛeṃ ||
baṃcaka bhagata kahāi rāma ke| kiṃkara kaṃcana koha kāma ke ||
tinha maha~ prathama rekha jaga morī| dhīṃga dharamadhvaja dhaṃdhaka dhorī ||
jauṃ apane avaguna saba kahaū~| bāṛhai kathā pāra nahiṃ lahaū~ ||
tāte maiṃ ati alapa bakhāne| thore mahu~ jānihahiṃ sayāne ||
samujhi bibidhi bidhi binatī morī| kou na kathā suni deihi khorī ||
etehu para karihahiṃ je asaṃkā| mohi te adhika te jaṛa mati raṃkā ||
kabi na hou~ nahiṃ catura kahāvau~| mati anurūpa rāma guna gāvau~ ||
kaha~ raghupati ke carita apārā| kaha~ mati mori nirata saṃsārā ||
jehiṃ māruta giri meru uṛāhīṃ| kahahu tūla kehi lekhe māhīṃ ||
samujhata amita rāma prabhutāī| karata kathā mana ati kadarāī ||

do. sārada sesa mahesa bidhi āgama nigama purāna|
neti neti kahi jāsu guna karahiṃ niraṃtara gāna || 12 ||

saba jānata prabhu prabhutā soī| tadapi kaheṃ binu rahā na koī ||
tahā~ beda asa kārana rākhā| bhajana prabhāu bhā~ti bahu bhāṣā ||
eka anīha arūpa anāmā| aja saccidānaṃda para dhāmā ||
byāpaka bisvarūpa bhagavānā| tehiṃ dhari deha carita kṛta nānā ||
so kevala bhagatana hita lāgī| parama kṛpāla pranata anurāgī ||
jehi jana para mamatā ati chohū| jehiṃ karunā kari kīnha na kohū ||
gaī bahora garība nevājū| sarala sabala sāhiba raghurājū ||
budha baranahiṃ hari jasa asa jānī| karahi punīta suphala nija bānī ||
tehiṃ bala maiṃ raghupati guna gāthā| kahihau~ nāi rāma pada māthā ||
muninha prathama hari kīrati gāī| tehiṃ maga calata sugama mohi bhāī ||


do. ati apāra je sarita bara jauṃ nṛpa setu karāhiṃ|
caḍhi pipīlikau parama laghu binu śrama pārahi jāhiṃ || 13 ||

ehi prakāra bala manahi dekhāī| karihau~ raghupati kathā suhāī ||
byāsa ādi kabi puṃgava nānā| jinha sādara hari sujasa bakhānā ||
carana kamala baṃdau~ tinha kere| puravahu~ sakala manoratha mere ||
kali ke kabinha karau~ paranāmā| jinha barane raghupati guna grāmā ||
je prākṛta kabi parama sayāne| bhāṣā~ jinha hari carita bakhāne ||
bhae je ahahiṃ je hoihahiṃ āgeṃ| pranavau~ sabahiṃ kapaṭa saba tyāgeṃ ||
hohu prasanna dehu baradānū| sādhu samāja bhaniti sanamānū ||
jo prabaṃdha budha nahiṃ ādarahīṃ| so śrama bādi bāla kabi karahīṃ ||
kīrati bhaniti bhūti bhali soī| surasari sama saba kaha~ hita hoī ||
rāma sukīrati bhaniti bhadesā| asamaṃjasa asa mohi a~desā ||
tumharī kṛpā sulabha sou more| siani suhāvani ṭāṭa paṭore ||

do. sarala kabita kīrati bimala soi ādarahiṃ sujāna|
sahaja bayara bisarāi ripu jo suni karahiṃ bakhāna || 14(ka) ||

so na hoi binu bimala mati mohi mati bala ati thora|
karahu kṛpā hari jasa kahau~ puni puni karau~ nihora || 14(kha) ||

kabi kobida raghubara carita mānasa maṃju marāla|
bāla binaya suni suruci lakhi mopara hohu kṛpāla || 14(ga) ||

so. baṃdau~ muni pada kaṃju rāmāyana jehiṃ niramayau|
sakhara sukomala maṃju doṣa rahita dūṣana sahita || 14(gha) ||

baṃdau~ cāriu beda bhava bāridhi bohita sarisa|
jinhahi na sapanehu~ kheda baranata raghubara bisada jasu || 14(ṅa) ||

baṃdau~ bidhi pada renu bhava sāgara jehi kīnha jaha~|
saṃta sudhā sasi dhenu pragaṭe khala biṣa bārunī || 14(ca) ||

do. bibudha bipra budha graha carana baṃdi kahau~ kara jori|
hoi prasanna puravahu sakala maṃju manoratha mori || 14(cha) ||

puni baṃdau~ sārada surasaritā| jugala punīta manohara caritā ||
majjana pāna pāpa hara ekā| kahata sunata eka hara abibekā ||
gura pitu mātu mahesa bhavānī| pranavau~ dīnabaṃdhu dina dānī ||
sevaka svāmi sakhā siya pī ke| hita nirupadhi saba bidhi tulasīke ||
kali biloki jaga hita hara girijā| sābara maṃtra jāla jinha sirijā ||
anamila ākhara aratha na jāpū| pragaṭa prabhāu mahesa pratāpū ||
so umesa mohi para anukūlā| karihiṃ kathā muda maṃgala mūlā ||
sumiri sivā siva pāi pasāū| baranau~ rāmacarita cita cāū ||
bhaniti mori siva kṛpā~ bibhātī| sasi samāja mili manahu~ surātī ||
je ehi kathahi saneha sametā| kahihahiṃ sunihahiṃ samujhi sacetā ||
hoihahiṃ rāma carana anurāgī| kali mala rahita sumaṃgala bhāgī ||

do. sapanehu~ sācehu~ mohi para jauṃ hara gauri pasāu|
tau phura hou jo kaheu~ saba bhāṣā bhaniti prabhāu || 15 ||

baṃdau~ avadha purī ati pāvani| sarajū sari kali kaluṣa nasāvani ||
pranavau~ pura nara nāri bahorī| mamatā jinha para prabhuhi na thorī ||
siya niṃdaka agha ogha nasāe| loka bisoka banāi basāe ||
baṃdau~ kausalyā disi prācī| kīrati jāsu sakala jaga mācī ||
pragaṭeu jaha~ raghupati sasi cārū| bisva sukhada khala kamala tusārū ||
dasaratha rāu sahita saba rānī| sukṛta sumaṃgala mūrati mānī ||
karau~ pranāma karama mana bānī| karahu kṛpā suta sevaka jānī ||
jinhahi biraci baṛa bhayau bidhātā| mahimā avadhi rāma pitu mātā ||

so. baṃdau~ avadha bhuāla satya prema jehi rāma pada|
bichurata dīnadayāla priya tanu tṛna iva parihareu || 16 ||

pranavau~ parijana sahita bidehū| jāhi rāma pada gūṛha sanehū ||
joga bhoga maha~ rākheu goī| rāma bilokata pragaṭeu soī ||
pranavau~ prathama bharata ke caranā| jāsu nema brata jāi na baranā ||
rāma carana paṃkaja mana jāsū| lubudha madhupa iva tajai na pāsū ||
baṃdau~ lachimana pada jalajātā| sītala subhaga bhagata sukha dātā ||
raghupati kīrati bimala patākā| daṃḍa samāna bhayau jasa jākā ||
seṣa sahasrasīsa jaga kārana| jo avatareu bhūmi bhaya ṭārana ||
sadā so sānukūla raha mo para| kṛpāsiṃdhu saumitri gunākara ||
ripusūdana pada kamala namāmī| sūra susīla bharata anugāmī ||
mahāvīra binavau~ hanumānā| rāma jāsu jasa āpa bakhānā ||

so. pranavau~ pavanakumāra khala bana pāvaka gyānadhana|
jāsu hṛdaya āgāra basahiṃ rāma sara cāpa dhara || 17 ||

kapipati rīcha nisācara rājā| aṃgadādi je kīsa samājā ||
baṃdau~ saba ke carana suhāe| adhama sarīra rāma jinha pāe ||
raghupati carana upāsaka jete| khaga mṛga sura nara asura samete ||
baṃdau~ pada saroja saba kere| je binu kāma rāma ke cere ||
suka sanakādi bhagata muni nārada| je munibara bigyāna bisārada ||
pranavau~ sabahiṃ dharani dhari sīsā| karahu kṛpā jana jāni munīsā ||
janakasutā jaga janani jānakī| atisaya priya karunā nidhāna kī ||
tāke juga pada kamala manāvau~| jāsu kṛpā~ niramala mati pāvau~ ||
puni mana bacana karma raghunāyaka| carana kamala baṃdau~ saba lāyaka ||
rājivanayana dhareṃ dhanu sāyaka| bhagata bipati bhaṃjana sukha dāyaka ||

do. girā aratha jala bīci sama kahiata bhinna na bhinna|
badau~ sītā rāma pada jinhahi parama priya khinna || 18 ||

baṃdau~ nāma rāma raghuvara ko| hetu kṛsānu bhānu himakara ko ||
bidhi hari haramaya beda prāna so| aguna anūpama guna nidhāna so ||
mahāmaṃtra joi japata mahesū| kāsīṃ mukuti hetu upadesū ||
mahimā jāsu jāna ganarāu| prathama pūjiata nāma prabhāū ||
jāna ādikabi nāma pratāpū| bhayau suddha kari ulaṭā jāpū ||
sahasa nāma sama suni siva bānī| japi jeī piya saṃga bhavānī ||
haraṣe hetu heri hara hī ko| kiya bhūṣana tiya bhūṣana tī ko ||
nāma prabhāu jāna siva nīko| kālakūṭa phalu dīnha amī ko ||

do. baraṣā ritu raghupati bhagati tulasī sāli sudāsa ||
rāma nāma bara barana juga sāvana bhādava māsa || 19 ||

ākhara madhura manohara doū| barana bilocana jana jiya joū ||
sumirata sulabha sukhada saba kāhū| loka lāhu paraloka nibāhū ||
kahata sunata sumirata suṭhi nīke| rāma lakhana sama priya tulasī ke ||
baranata barana prīti bilagātī| brahma jīva sama sahaja sa~ghātī ||
nara nārāyana sarisa subhrātā| jaga pālaka biseṣi jana trātā ||
bhagati sutiya kala karana bibhūṣana| jaga hita hetu bimala bidhu pūṣana |
svāda toṣa sama sugati sudhā ke| kamaṭha seṣa sama dhara basudhā ke ||
jana mana maṃju kaṃja madhukara se| jīha jasomati hari haladhara se ||

do. eku chatru eku mukuṭamani saba baranani para jou|
tulasī raghubara nāma ke barana birājata dou || 20 ||

samujhata sarisa nāma aru nāmī| prīti parasapara prabhu anugāmī ||
nāma rūpa dui īsa upādhī| akatha anādi susāmujhi sādhī ||
ko baṛa choṭa kahata aparādhū| suni guna bheda samujhihahiṃ sādhū ||
dekhiahiṃ rūpa nāma ādhīnā| rūpa gyāna nahiṃ nāma bihīnā ||
rūpa biseṣa nāma binu jāneṃ| karatala gata na parahiṃ pahicāneṃ ||
sumiria nāma rūpa binu dekheṃ| āvata hṛdaya~ saneha biseṣeṃ ||
nāma rūpa gati akatha kahānī| samujhata sukhada na parati bakhānī ||
aguna saguna bica nāma susākhī| ubhaya prabodhaka catura dubhāṣī ||

do. rāma nāma manidīpa dharu jīha deharī dvāra|
tulasī bhītara bāherahu~ jauṃ cāhasi ujiāra || 21 ||

nāma jīha~ japi jāgahiṃ jogī| birati biraṃci prapaṃca biyogī ||
brahmasukhahi anubhavahiṃ anūpā| akatha anāmaya nāma na rūpā ||
jānā cahahiṃ gūṛha gati jeū| nāma jīha~ japi jānahiṃ teū ||
sādhaka nāma japahiṃ laya lāe~| hohiṃ siddha animādika pāe~ ||
japahiṃ nāmu jana ārata bhārī| miṭahiṃ kusaṃkaṭa hohiṃ sukhārī ||
rāma bhagata jaga cāri prakārā| sukṛtī cāriu anagha udārā ||
cahū catura kahu~ nāma adhārā| gyānī prabhuhi biseṣi piārā ||
cahu~ juga cahu~ śruti nā prabhāū| kali biseṣi nahiṃ āna upāū ||

do. sakala kāmanā hīna je rāma bhagati rasa līna|
nāma suprema piyūṣa hada tinhahu~ kie mana mīna || 22 ||

aguna saguna dui brahma sarūpā| akatha agādha anādi anūpā ||
moreṃ mata baṛa nāmu duhū teṃ| kie jehiṃ juga nija basa nija būteṃ ||
proṛhi sujana jani jānahiṃ jana kī| kahau~ pratīti prīti ruci mana kī ||
eku dārugata dekhia ekū| pāvaka sama juga brahma bibekū ||
ubhaya agama juga sugama nāma teṃ| kaheu~ nāmu baṛa brahma rāma teṃ ||
byāpaku eku brahma abināsī| sata cetana dhana āna~da rāsī ||
asa prabhu hṛdaya~ achata abikārī| sakala jīva jaga dīna dukhārī ||
nāma nirūpana nāma jatana teṃ| sou pragaṭata jimi mola ratana teṃ ||

do. niraguna teṃ ehi bhā~ti baṛa nāma prabhāu apāra|
kahau~ nāmu baṛa rāma teṃ nija bicāra anusāra || 23 ||

rāma bhagata hita nara tanu dhārī| sahi saṃkaṭa kie sādhu sukhārī ||
nāmu saprema japata anayāsā| bhagata hohiṃ muda maṃgala bāsā ||
rāma eka tāpasa tiya tārī| nāma koṭi khala kumati sudhārī ||
riṣi hita rāma suketusutā kī| sahita sena suta kīnha bibākī ||
sahita doṣa dukha dāsa durāsā| dalai nāmu jimi rabi nisi nāsā ||
bhaṃjeu rāma āpu bhava cāpū| bhava bhaya bhaṃjana nāma pratāpū ||
daṃḍaka banu prabhu kīnha suhāvana| jana mana amita nāma kie pāvana || |
nisicara nikara dale raghunaṃdana| nāmu sakala kali kaluṣa nikaṃdana ||

do. sabarī gīdha susevakani sugati dīnhi raghunātha|
nāma udhāre amita khala beda bidita guna gātha || 24 ||

rāma sukaṃṭha bibhīṣana doū| rākhe sarana jāna sabu koū ||
nāma garība aneka nevāje| loka beda bara birida birāje ||
rāma bhālu kapi kaṭaku baṭorā| setu hetu śramu kīnha na thorā ||
nāmu leta bhavasiṃdhu sukhāhīṃ| karahu bicāru sujana mana māhīṃ ||
rāma sakula rana rāvanu mārā| sīya sahita nija pura pagu dhārā ||
rājā rāmu avadha rajadhānī| gāvata guna sura muni bara bānī ||
sevaka sumirata nāmu saprītī| binu śrama prabala moha dalu jītī ||
phirata saneha~ magana sukha apaneṃ| nāma prasāda soca nahiṃ sapaneṃ ||

do. brahma rāma teṃ nāmu baṛa bara dāyaka bara dāni|
rāmacarita sata koṭi maha~ liya mahesa jiya~ jāni || 25 ||

māsapārāyaṇa, pahalā viśrāma
nāma prasāda saṃbhu abināsī| sāju amaṃgala maṃgala rāsī ||
suka sanakādi siddha muni jogī| nāma prasāda brahmasukha bhogī ||
nārada jāneu nāma pratāpū| jaga priya hari hari hara priya āpū ||
nāmu japata prabhu kīnha prasādū| bhagata siromani bhe prahalādū ||
dhruva~ sagalāni japeu hari nāū~| pāyau acala anūpama ṭhāū~ ||
sumiri pavanasuta pāvana nāmū| apane basa kari rākhe rāmū ||
apatu ajāmilu gaju ganikāū| bhae mukuta hari nāma prabhāū ||
kahauṃ kahā~ lagi nāma baṛāī| rāmu na sakahiṃ nāma guna gāī ||

do. nāmu rāma ko kalapataru kali kalyāna nivāsu|
jo sumirata bhayo bhā~ga teṃ tulasī tulasīdāsu || 26 ||

cahu~ juga tīni kāla tihu~ lokā| bhae nāma japi jīva bisokā ||
beda purāna saṃta mata ehū| sakala sukṛta phala rāma sanehū ||
dhyānu prathama juga makhabidhi dūjeṃ| dvāpara paritoṣata prabhu pūjeṃ ||
kali kevala mala mūla malīnā| pāpa payonidhi jana jana mīnā ||
nāma kāmataru kāla karālā| sumirata samana sakala jaga jālā ||
rāma nāma kali abhimata dātā| hita paraloka loka pitu mātā ||
nahiṃ kali karama na bhagati bibekū| rāma nāma avalaṃbana ekū ||
kālanemi kali kapaṭa nidhānū| nāma sumati samaratha hanumānū ||

do. rāma nāma narakesarī kanakakasipu kalikāla|
jāpaka jana prahalāda jimi pālihi dali surasāla || 27 ||

bhāya~ kubhāya~ anakha ālasahū~| nāma japata maṃgala disi dasahū~ ||
sumiri so nāma rāma guna gāthā| karau~ nāi raghunāthahi māthā ||
mori sudhārihi so saba bhā~tī| jāsu kṛpā nahiṃ kṛpā~ aghātī ||
rāma susvāmi kusevaku moso| nija disi daikhi dayānidhi poso ||
lokahu~ beda susāhiba rītīṃ| binaya sunata pahicānata prītī ||
ganī garība grāmanara nāgara| paṃḍita mūṛha malīna ujāgara ||
sukabi kukabi nija mati anuhārī| nṛpahi sarāhata saba nara nārī ||
sādhu sujāna susīla nṛpālā| īsa aṃsa bhava parama kṛpālā ||
suni sanamānahiṃ sabahi subānī| bhaniti bhagati nati gati pahicānī ||
yaha prākṛta mahipāla subhāū| jāna siromani kosalarāū ||
rījhata rāma saneha nisoteṃ| ko jaga maṃda malinamati moteṃ ||

do. saṭha sevaka kī prīti ruci rakhihahiṃ rāma kṛpālu|
upala kie jalajāna jehiṃ saciva sumati kapi bhālu || 28(ka) ||

hauhu kahāvata sabu kahata rāma sahata upahāsa|
sāhiba sītānātha so sevaka tulasīdāsa || 28(kha) ||

ati baṛi mori ḍhiṭhāī khorī| suni agha narakahu~ nāka sakorī ||
samujhi sahama mohi apaḍara apaneṃ| so sudhi rāma kīnhi nahiṃ sapaneṃ ||
suni avaloki sucita cakha cāhī| bhagati mori mati svāmi sarāhī ||
kahata nasāi hoi hiya~ nīkī| rījhata rāma jāni jana jī kī ||
rahati na prabhu cita cūka kie kī| karata surati saya bāra hie kī ||
jehiṃ agha badheu byādha jimi bālī| phiri sukaṃṭha soi kīnha kucālī ||
soi karatūti bibhīṣana kerī| sapanehu~ so na rāma hiya~ herī ||
te bharatahi bheṃṭata sanamāne| rājasabhā~ raghubīra bakhāne ||

do. prabhu taru tara kapi ḍāra para te kie āpu samāna ||
tulasī kahū~ na rāma se sāhiba sīlanidhāna || 29(ka) ||

rāma nikāīṃ rāvarī hai sabahī ko nīka|
joṃ yaha sā~cī hai sadā tau nīko tulasīka || 29(kha) ||

ehi bidhi nija guna doṣa kahi sabahi bahuri siru nāi|
baranau~ raghubara bisada jasu suni kali kaluṣa nasāi || 29(ga) ||

jāgabalika jo kathā suhāī| bharadvāja munibarahi sunāī ||
kahihau~ soi saṃbāda bakhānī| sunahu~ sakala sajjana sukhu mānī ||
saṃbhu kīnha yaha carita suhāvā| bahuri kṛpā kari umahi sunāvā ||
soi siva kāgabhusuṃḍihi dīnhā| rāma bhagata adhikārī cīnhā ||
tehi sana jāgabalika puni pāvā| tinha puni bharadvāja prati gāvā ||
te śrotā bakatā samasīlā| sava~darasī jānahiṃ harilīlā ||
jānahiṃ tīni kāla nija gyānā| karatala gata āmalaka samānā ||
aurau je haribhagata sujānā| kahahiṃ sunahiṃ samujhahiṃ bidhi nānā ||

do. mai puni nija gura sana sunī kathā so sūkarakheta|
samujhī nahi tasi bālapana taba ati raheu~ aceta || 30(ka) ||

śrotā bakatā gyānanidhi kathā rāma kai gūṛha|
kimi samujhauṃ mai jīva jaṛa kali mala grasita bimūṛha || 30(kha)

tadapi kahī gura bārahiṃ bārā| samujhi parī kachu mati anusārā ||
bhāṣābaddha karabi maiṃ soī| moreṃ mana prabodha jehiṃ hoī ||
jasa kachu budhi bibeka bala mereṃ| tasa kahihau~ hiya~ hari ke prereṃ ||
nija saṃdeha moha bhrama haranī| karau~ kathā bhava saritā taranī ||
budha biśrāma sakala jana raṃjani| rāmakathā kali kaluṣa bibhaṃjani ||
rāmakathā kali paṃnaga bharanī| puni bibeka pāvaka kahu~ aranī ||
rāmakathā kali kāmada gāī| sujana sajīvani mūri suhāī ||
soi basudhātala sudhā taraṃgini| bhaya bhaṃjani bhrama bheka bhuaṃgini ||
asura sena sama naraka nikaṃdini| sādhu bibudha kula hita girinaṃdini ||
saṃta samāja payodhi ramā sī| bisva bhāra bhara acala chamā sī ||
jama gana muha~ masi jaga jamunā sī| jīvana mukuti hetu janu kāsī ||
rāmahi priya pāvani tulasī sī| tulasidāsa hita hiya~ hulasī sī ||
sivapraya mekala saila sutā sī| sakala siddhi sukha saṃpati rāsī ||
sadaguna suragana aṃba aditi sī| raghubara bhagati prema paramiti sī ||

do. rāma kathā maṃdākinī citrakūṭa cita cāru|
tulasī subhaga saneha bana siya raghubīra bihāru || 31 ||

rāma carita ciṃtāmani cārū| saṃta sumati tiya subhaga siṃgārū ||
jaga maṃgala guna grāma rāma ke| dāni mukuti dhana dharama dhāma ke ||
sadagura gyāna birāga joga ke| bibudha baida bhava bhīma roga ke ||
janani janaka siya rāma prema ke| bīja sakala brata dharama nema ke ||
samana pāpa saṃtāpa soka ke| priya pālaka paraloka loka ke ||
saciva subhaṭa bhūpati bicāra ke| kuṃbhaja lobha udadhi apāra ke ||
kāma koha kalimala karigana ke| kehari sāvaka jana mana bana ke ||
atithi pūjya priyatama purāri ke| kāmada ghana dārida davāri ke ||
maṃtra mahāmani biṣaya byāla ke| meṭata kaṭhina kuaṃka bhāla ke ||
harana moha tama dinakara kara se| sevaka sāli pāla jaladhara se ||
abhimata dāni devataru bara se| sevata sulabha sukhada hari hara se ||
sukabi sarada nabha mana uḍagana se| rāmabhagata jana jīvana dhana se ||
sakala sukṛta phala bhūri bhoga se| jaga hita nirupadhi sādhu loga se ||
sevaka mana mānasa marāla se| pāvaka gaṃga taṃraga māla se ||

do. kupatha kutaraka kucāli kali kapaṭa daṃbha pāṣaṃḍa|
dahana rāma guna grāma jimi iṃdhana anala pracaṃḍa || 32(ka) ||

rāmacarita rākesa kara sarisa sukhada saba kāhu|
sajjana kumuda cakora cita hita biseṣi baṛa lāhu || 32(kha) ||

kīnhi prasna jehi bhā~ti bhavānī| jehi bidhi saṃkara kahā bakhānī ||
so saba hetu kahaba maiṃ gāī| kathāprabaṃdha bicitra banāī ||
jehi yaha kathā sunī nahiṃ hoī| jani ācaraju karaiṃ suni soī ||
kathā alaukika sunahiṃ je gyānī| nahiṃ ācaraju karahiṃ asa jānī ||
rāmakathā kai miti jaga nāhīṃ| asi pratīti tinha ke mana māhīṃ ||
nānā bhā~ti rāma avatārā| rāmāyana sata koṭi apārā ||
kalapabheda haricarita suhāe| bhā~ti aneka munīsanha gāe ||
karia na saṃsaya asa ura ānī| sunia kathā sārada rati mānī ||

do. rāma anaṃta anaṃta guna amita kathā bistāra|
suni ācaraju na mānihahiṃ jinha keṃ bimala bicāra || 33 ||

ehi bidhi saba saṃsaya kari dūrī| sira dhari gura pada paṃkaja dhūrī ||
puni sabahī binavau~ kara jorī| karata kathā jehiṃ lāga na khorī ||
sādara sivahi nāi aba māthā| baranau~ bisada rāma guna gāthā ||
saṃbata soraha sai ekatīsā| karau~ kathā hari pada dhari sīsā ||
naumī bhauma bāra madhu māsā| avadhapurīṃ yaha carita prakāsā ||
jehi dina rāma janama śruti gāvahiṃ| tīratha sakala tahā~ cali āvahiṃ ||
asura nāga khaga nara muni devā| āi karahiṃ raghunāyaka sevā ||
janma mahotsava racahiṃ sujānā| karahiṃ rāma kala kīrati gānā ||

do. majjahi sajjana bṛṃda bahu pāvana sarajū nīra|
japahiṃ rāma dhari dhyāna ura suṃdara syāma sarīra || 34 ||

darasa parasa majjana aru pānā| harai pāpa kaha beda purānā ||
nadī punīta amita mahimā ati| kahi na sakai sārada bimalamati ||
rāma dhāmadā purī suhāvani| loka samasta bidita ati pāvani ||
cāri khāni jaga jīva apārā| avadha taje tanu nahi saṃsārā ||
saba bidhi purī manohara jānī| sakala siddhiprada maṃgala khānī ||
bimala kathā kara kīnha araṃbhā| sunata nasāhiṃ kāma mada daṃbhā ||
rāmacaritamānasa ehi nāmā| sunata śravana pāia biśrāmā ||
mana kari viṣaya anala bana jaraī| hoi sukhī jau ehiṃ sara paraī ||
rāmacaritamānasa muni bhāvana| biraceu saṃbhu suhāvana pāvana ||
tribidha doṣa dukha dārida dāvana| kali kucāli kuli kaluṣa nasāvana ||
raci mahesa nija mānasa rākhā| pāi susamau sivā sana bhāṣā ||
tāteṃ rāmacaritamānasa bara| dhareu nāma hiya~ heri haraṣi hara ||
kahau~ kathā soi sukhada suhāī| sādara sunahu sujana mana lāī ||

do. jasa mānasa jehi bidhi bhayau jaga pracāra jehi hetu|
aba soi kahau~ prasaṃga saba sumiri umā bṛṣaketu || 35 ||

saṃbhu prasāda sumati hiya~ hulasī| rāmacaritamānasa kabi tulasī ||
karai manohara mati anuhārī| sujana sucita suni lehu sudhārī ||
sumati bhūmi thala hṛdaya agādhū| beda purāna udadhi ghana sādhū ||
baraṣahiṃ rāma sujasa bara bārī| madhura manohara maṃgalakārī ||
līlā saguna jo kahahiṃ bakhānī| soi svacchatā karai mala hānī ||
prema bhagati jo barani na jāī| soi madhuratā susītalatāī ||
so jala sukṛta sāli hita hoī| rāma bhagata jana jīvana soī ||
medhā mahi gata so jala pāvana| sakili śravana maga caleu suhāvana ||
bhareu sumānasa suthala thirānā| sukhada sīta ruci cāru cirānā ||

do. suṭhi suṃdara saṃbāda bara birace buddhi bicāri|
tei ehi pāvana subhaga sara ghāṭa manohara cāri || 36 ||

sapta prabandha subhaga sopānā| gyāna nayana nirakhata mana mānā ||
raghupati mahimā aguna abādhā| baranaba soi bara bāri agādhā ||
rāma sīya jasa salila sudhāsama| upamā bīci bilāsa manorama ||
puraini saghana cāru caupāī| juguti maṃju mani sīpa suhāī ||
chaṃda soraṭhā suṃdara dohā| soi bahuraṃga kamala kula sohā ||
aratha anūpa sumāva subhāsā| soi parāga makaraṃda subāsā ||
sukṛta puṃja maṃjula ali mālā| gyāna birāga bicāra marālā ||
dhuni avareba kabita guna jātī| mīna manohara te bahubhā~tī ||
aratha dharama kāmādika cārī| kahaba gyāna bigyāna bicārī ||
nava rasa japa tapa joga birāgā| te saba jalacara cāru taṛāgā ||
sukṛtī sādhu nāma guna gānā| te bicitra jala bihaga samānā ||
saṃtasabhā cahu~ disi ava~rāī| śraddhā ritu basaṃta sama gāī ||
bhagati nirupana bibidha bidhānā| chamā dayā dama latā bitānā ||
sama jama niyama phūla phala gyānā| hari pata rati rasa beda bakhānā ||
aurau kathā aneka prasaṃgā| tei suka pika bahubarana bihaṃgā ||

do. pulaka bāṭikā bāga bana sukha subihaṃga bihāru|
mālī sumana saneha jala sīṃcata locana cāru || 37 ||

je gāvahiṃ yaha carita sa~bhāre| tei ehi tāla catura rakhavāre ||
sadā sunahiṃ sādara nara nārī| tei surabara mānasa adhikārī ||
ati khala je biṣaī baga kāgā| ehiṃ sara nikaṭa na jāhiṃ abhāgā ||
saṃbuka bheka sevāra samānā| ihā~ na biṣaya kathā rasa nānā ||
tehi kārana āvata hiya~ hāre| kāmī kāka balāka bicāre ||
āvata ehiṃ sara ati kaṭhināī| rāma kṛpā binu āi na jāī ||
kaṭhina kusaṃga kupaṃtha karālā| tinha ke bacana bāgha hari byālā ||
gṛha kāraja nānā jaṃjālā| te ati durgama saila bisālā ||
bana bahu biṣama moha mada mānā| nadīṃ kutarka bhayaṃkara nānā ||

do. je śraddhā saṃbala rahita nahi saṃtanha kara sātha|
tinha kahu~ mānasa agama ati jinhahi na priya raghunātha || 38 ||

jauṃ kari kaṣṭa jāi puni koī| jātahiṃ nīṃda juṛāī hoī ||
jaṛatā jāṛa biṣama ura lāgā| gaehu~ na majjana pāva abhāgā ||
kari na jāi sara majjana pānā| phiri āvai sameta abhimānā ||
jauṃ bahori kou pūchana āvā| sara niṃdā kari tāhi bujhāvā ||
sakala bighna byāpahi nahiṃ tehī| rāma sukṛpā~ bilokahiṃ jehī ||
soi sādara sara majjanu karaī| mahā ghora trayatāpa na jaraī ||
te nara yaha sara tajahiṃ na kāū| jinha ke rāma carana bhala bhāū ||
jo nahāi caha ehiṃ sara bhāī| so satasaṃga karau mana lāī ||
asa mānasa mānasa cakha cāhī| bhai kabi buddhi bimala avagāhī ||
bhayau hṛdaya~ ānaṃda uchāhū| umageu prema pramoda prabāhū ||
calī subhaga kabitā saritā so| rāma bimala jasa jala bharitā so ||
sarajū nāma sumaṃgala mūlā| loka beda mata maṃjula kūlā ||
nadī punīta sumānasa naṃdini| kalimala tṛna taru mūla nikaṃdini ||

do. śrotā tribidha samāja pura grāma nagara duhu~ kūla|
saṃtasabhā anupama avadha sakala sumaṃgala mūla || 39 ||

rāmabhagati surasaritahi jāī| milī sukīrati saraju suhāī ||
sānuja rāma samara jasu pāvana| mileu mahānadu sona suhāvana ||
juga bica bhagati devadhuni dhārā| sohati sahita subirati bicārā ||
tribidha tāpa trāsaka timuhānī| rāma sarupa siṃdhu samuhānī ||
mānasa mūla milī surasarihī| sunata sujana mana pāvana karihī ||
bica bica kathā bicitra bibhāgā| janu sari tīra tīra bana bāgā ||
umā mahesa bibāha barātī| te jalacara aganita bahubhā~tī ||
raghubara janama anaṃda badhāī| bhava~ra taraṃga manoharatāī ||

do. bālacarita cahu baṃdhu ke banaja bipula bahuraṃga|
nṛpa rānī parijana sukṛta madhukara bāribihaṃga || 40 ||

sīya svayaṃbara kathā suhāī| sarita suhāvani so chabi chāī ||
nadī nāva paṭu prasna anekā| kevaṭa kusala utara sabibekā ||
suni anukathana paraspara hoī| pathika samāja soha sari soī ||
ghora dhāra bhṛgunātha risānī| ghāṭa subaddha rāma bara bānī ||
sānuja rāma bibāha uchāhū| so subha umaga sukhada saba kāhū ||
kahata sunata haraṣahiṃ pulakāhīṃ| te sukṛtī mana mudita nahāhīṃ ||
rāma tilaka hita maṃgala sājā| paraba joga janu jure samājā ||
kāī kumati kekaī kerī| parī jāsu phala bipati ghanerī ||

do. samana amita utapāta saba bharatacarita japajāga|
kali agha khala avaguna kathana te jalamala baga kāga || 41 ||

kīrati sarita chahū~ ritu rūrī| samaya suhāvani pāvani bhūrī ||
hima himasailasutā siva byāhū| sisira sukhada prabhu janama uchāhū ||
baranaba rāma bibāha samājū| so muda maṃgalamaya riturājū ||
grīṣama dusaha rāma banagavanū| paṃthakathā khara ātapa pavanū ||
baraṣā ghora nisācara rārī| surakula sāli sumaṃgalakārī ||
rāma rāja sukha binaya baṛāī| bisada sukhada soi sarada suhāī ||
satī siromani siya gunagāthā| soi guna amala anūpama pāthā ||
bharata subhāu susītalatāī| sadā ekarasa barani na jāī ||

do. avalokani bolani milani prīti parasapara hāsa|
bhāyapa bhali cahu baṃdhu kī jala mādhurī subāsa || 42 ||

ārati binaya dīnatā morī| laghutā lalita subāri na thorī ||
adabhuta salila sunata gunakārī| āsa piāsa manomala hārī ||
rāma supremahi poṣata pānī| harata sakala kali kaluṣa galānau ||
bhava śrama soṣaka toṣaka toṣā| samana durita dukha dārida doṣā ||
kāma koha mada moha nasāvana| bimala bibeka birāga baṛhāvana ||
sādara majjana pāna kie teṃ| miṭahiṃ pāpa paritāpa hie teṃ ||
jinha ehi bāri na mānasa dhoe| te kāyara kalikāla bigoe ||
tṛṣita nirakhi rabi kara bhava bārī| phirihahi mṛga jimi jīva dukhārī ||

do. mati anuhāri subāri guna gani mana anhavāi|
sumiri bhavānī saṃkarahi kaha kabi kathā suhāi || 43(ka) ||

aba raghupati pada paṃkaruha hiya~ dhari pāi prasāda |
kahau~ jugala munibarja kara milana subhaga saṃbāda || 43(kha) ||

bharadvāja muni basahiṃ prayāgā| tinhahi rāma pada ati anurāgā ||
tāpasa sama dama dayā nidhānā| paramāratha patha parama sujānā ||
māgha makaragata rabi jaba hoī| tīrathapatihiṃ āva saba koī ||
deva danuja kiṃnara nara śrenī| sādara majjahiṃ sakala tribenīṃ ||
pūjahi mādhava pada jalajātā| parasi akhaya baṭu haraṣahiṃ gātā ||
bharadvāja āśrama ati pāvana| parama ramya munibara mana bhāvana ||
tahā~ hoi muni riṣaya samājā| jāhiṃ je majjana tīratharājā ||
majjahiṃ prāta sameta uchāhā| kahahiṃ parasapara hari guna gāhā ||

do. brahma nirūpama dharama bidhi baranahiṃ tattva bibhāga|

kahahiṃ bhagati bhagavaṃta kai saṃjuta gyāna birāga || 44 ||

ehi prakāra bhari māgha nahāhīṃ| puni saba nija nija āśrama jāhīṃ ||
prati saṃbata ati hoi anaṃdā| makara majji gavanahiṃ munibṛṃdā ||
eka bāra bhari makara nahāe| saba munīsa āśramanha sidhāe ||
jagabālika muni parama bibekī| bharavdāja rākhe pada ṭekī ||
sādara carana saroja pakhāre| ati punīta āsana baiṭhāre ||
kari pūjā muni sujasa bakhānī| bole ati punīta mṛdu bānī ||
nātha eka saṃsau baṛa moreṃ| karagata bedatatva sabu toreṃ ||
kahata so mohi lāgata bhaya lājā| jau na kahau~ baṛa hoi akājā ||

do. saṃta kahahi asi nīti prabhu śruti purāna muni gāva|
hoi na bimala bibeka ura gura sana kie~ durāva || 45 ||

asa bicāri pragaṭau~ nija mohū| harahu nātha kari jana para chohū ||
rāsa nāma kara amita prabhāvā| saṃta purāna upaniṣada gāvā ||
saṃtata japata saṃbhu abināsī| siva bhagavāna gyāna guna rāsī ||
ākara cāri jīva jaga ahahīṃ| kāsīṃ marata parama pada lahahīṃ ||
so'pi rāma mahimā munirāyā| siva upadesu karata kari dāyā ||
rāmu kavana prabhu pūchau~ tohī| kahia bujhāi kṛpānidhi mohī ||
eka rāma avadhesa kumārā| tinha kara carita bidita saṃsārā ||
nāri biraha~ dukhu laheu apārā| bhayahu roṣu rana rāvanu mārā ||

do. prabhu soi rāma ki apara kou jāhi japata tripurāri|
satyadhāma sarbagya tumha kahahu bibeku bicāri || 46 ||

jaise miṭai mora bhrama bhārī| kahahu so kathā nātha bistārī ||
jāgabalika bole musukāī| tumhahi bidita raghupati prabhutāī ||
rāmamagata tumha mana krama bānī| caturāī tumhārī maiṃ jānī ||
cāhahu sunai rāma guna gūṛhā| kīnhihu prasna manahu~ ati mūṛhā ||
tāta sunahu sādara manu lāī| kahau~ rāma kai kathā suhāī ||
mahāmohu mahiṣesu bisālā| rāmakathā kālikā karālā ||
rāmakathā sasi kirana samānā| saṃta cakora karahiṃ jehi pānā ||
aisei saṃsaya kīnha bhavānī| mahādeva taba kahā bakhānī ||

do. kahau~ so mati anuhāri aba umā saṃbhu saṃbāda|
bhayau samaya jehi hetu jehi sunu muni miṭihi biṣāda || 47 ||

eka bāra tretā juga māhīṃ| saṃbhu gae kuṃbhaja riṣi pāhīṃ ||
saṃga satī jagajanani bhavānī| pūje riṣi akhilesvara jānī ||
rāmakathā munībarja bakhānī| sunī mahesa parama sukhu mānī ||
riṣi pūchī haribhagati suhāī| kahī saṃbhu adhikārī pāī ||
kahata sunata raghupati guna gāthā| kachu dina tahā~ rahe girināthā ||
muni sana bidā māgi tripurārī| cale bhavana sa~ga dacchakumārī ||
tehi avasara bhaṃjana mahibhārā| hari raghubaṃsa līnha avatārā ||
pitā bacana taji rāju udāsī| daṃḍaka bana bicarata abināsī ||

do. hdaya~ bicārata jāta hara kehi bidhi darasanu hoi|
gupta rupa avatareu prabhu gae~ jāna sabu koi || 48(ka) ||

so. saṃkara ura ati chobhu satī na jānahiṃ maramu soi ||
tulasī darasana lobhu mana ḍaru locana lālacī || 48(kha) ||

rāvana marana manuja kara jācā| prabhu bidhi bacanu kīnha caha sācā ||
jauṃ nahiṃ jāu~ rahai pachitāvā| karata bicāru na banata banāvā ||
ehi bidhi bhae socabasa īsā| tehi samaya jāi dasasīsā ||
līnha nīca mārīcahi saṃgā| bhayau turata soi kapaṭa kuraṃgā ||
kari chalu mūṛha harī baidehī| prabhu prabhāu tasa bidita na tehī ||
mṛga badhi bandhu sahita hari āe| āśramu dekhi nayana jala chāe ||
biraha bikala nara iva raghurāī| khojata bipina phirata dou bhāī ||
kabahū~ joga biyoga na jākeṃ| dekhā pragaṭa biraha dukha tākeṃ ||

do. ati vicitra raghupati carita jānahiṃ parama sujāna|
je matimaṃda bimoha basa hṛdaya~ dharahiṃ kachu āna || 49 ||

saṃbhu samaya tehi rāmahi dekhā| upajā hiya~ ati harapu biseṣā ||
bhari locana chabisiṃdhu nihārī| kusamaya jānina kīnhi cinhārī ||
jaya saccidānaṃda jaga pāvana| asa kahi caleu manoja nasāvana ||
cale jāta siva satī sametā| puni puni pulakata kṛpāniketā ||
satīṃ so dasā saṃbhu kai dekhī| ura upajā saṃdehu biseṣī ||
saṃkaru jagatabaṃdya jagadīsā| sura nara muni saba nāvata sīsā ||
tinha nṛpasutahi naha paranāmā| kahi saccidānaṃda paradhāmā ||
bhae magana chabi tāsu bilokī| ajahu~ prīti ura rahati na rokī ||

do. brahma jo vyāpaka biraja aja akala anīha abheda|

so ki deha dhari hoi nara jāhi na jānata veda || 50 ||

biṣnu jo sura hita naratanu dhārī| sou sarbagya jathā tripurārī ||
khojai so ki agya iva nārī| gyānadhāma śrīpati asurārī ||
saṃbhugirā puni mṛṣā na hoī| siva sarbagya jāna sabu koī ||
asa saṃsaya mana bhayau apārā| hoī na hṛdaya~ prabodha pracārā ||
jadyapi pragaṭa na kaheu bhavānī| hara aṃtarajāmī saba jānī ||
sunahi satī tava nāri subhāū| saṃsaya asa na dharia ura kāū ||
jāsu kathā kubhaṃja riṣi gāī| bhagati jāsu maiṃ munihi sunāī ||
sou mama iṣṭadeva raghubīrā| sevata jāhi sadā muni dhīrā ||

chaṃ. muni dhīra jogī siddha saṃtata bimala mana jehi dhyāvahīṃ|
kahi neti nigama purāna āgama jāsu kīrati gāvahīṃ ||
soi rāmu byāpaka brahma bhuvana nikāya pati māyā dhanī|
avatareu apane bhagata hita nijataṃtra nita raghukulamani ||

so. lāga na ura upadesu jadapi kaheu siva~ bāra bahu|
bole bihasi mahesu harimāyā balu jāni jiya~ || 51 ||

jauṃ tumhareṃ mana ati saṃdehū| tau kina jāi parīchā lehū ||
taba lagi baiṭha ahau~ baṭachāhiṃ| jaba lagi tumha aihahu mohi pāhī ||
jaiseṃ jāi moha bhrama bhārī| karehu so jatanu bibeka bicārī ||
calīṃ satī siva āyasu pāī| karahiṃ bicāru karauṃ kā bhāī ||
ihā~ saṃbhu asa mana anumānā| dacchasutā kahu~ nahiṃ kalyānā ||
morehu kaheṃ na saṃsaya jāhīṃ| bidhī biparīta bhalāī nāhīṃ ||
hoihi soi jo rāma raci rākhā| ko kari tarka baṛhāvai sākhā ||
asa kahi lage japana harināmā| gaī satī jaha~ prabhu sukhadhāmā ||

do. puni puni hṛdaya~ vicāru kari dhari sītā kara rupa|
āgeṃ hoi cali paṃtha tehi jehiṃ āvata narabhūpa || 52 ||

lachimana dīkha umākṛta beṣā cakita bhae bhrama hṛdaya~ biseṣā ||
kahi na sakata kachu ati gaṃbhīrā| prabhu prabhāu jānata matidhīrā ||
satī kapaṭu jāneu surasvāmī| sabadarasī saba aṃtarajāmī ||
sumirata jāhi miṭai agyānā| soi sarabagya rāmu bhagavānā ||
satī kīnha caha taha~hu~ durāū| dekhahu nāri subhāva prabhāū ||
nija māyā balu hṛdaya~ bakhānī| bole bihasi rāmu mṛdu bānī ||
jori pāni prabhu kīnha pranāmū| pitā sameta līnha nija nāmū ||
kaheu bahori kahā~ bṛṣaketū| bipina akeli phirahu kehi hetū ||

do. rāma bacana mṛdu gūṛha suni upajā ati saṃkocu|
satī sabhīta mahesa pahiṃ calīṃ hṛdaya~ baṛa socu || 53 ||

maiṃ saṃkara kara kahā na mānā| nija agyānu rāma para ānā ||
jāi utaru aba dehau~ kāhā| ura upajā ati dāruna dāhā ||
jānā rāma satīṃ dukhu pāvā| nija prabhāu kachu pragaṭi janāvā ||
satīṃ dīkha kautuku maga jātā| āgeṃ rāmu sahita śrī bhrātā ||
phiri citavā pācheṃ prabhu dekhā| sahita baṃdhu siya suṃdara veṣā ||
jaha~ citavahiṃ taha~ prabhu āsīnā| sevahiṃ siddha munīsa prabīnā ||
dekhe siva bidhi biṣnu anekā| amita prabhāu eka teṃ ekā ||
baṃdata carana karata prabhu sevā| bibidha beṣa dekhe saba devā ||

do. satī bidhātrī iṃdirā dekhīṃ amita anūpa|
jehiṃ jehiṃ beṣa ajādi sura tehi tehi tana anurūpa || 54 ||

dekhe jaha~ taha~ raghupati jete| saktinha sahita sakala sura tete ||
jīva carācara jo saṃsārā| dekhe sakala aneka prakārā ||
pūjahiṃ prabhuhi deva bahu beṣā| rāma rūpa dūsara nahiṃ dekhā ||
avaloke raghupati bahutere| sītā sahita na beṣa ghanere ||
soi raghubara soi lachimanu sītā| dekhi satī ati bhaī sabhītā ||
hṛdaya kaṃpa tana sudhi kachu nāhīṃ| nayana mūdi baiṭhīṃ maga māhīṃ ||
bahuri bilokeu nayana ughārī| kachu na dīkha taha~ dacchakumārī ||
puni puni nāi rāma pada sīsā| calīṃ tahā~ jaha~ rahe girīsā ||

do. gaī samīpa mahesa taba ha~si pūchī kusalāta|
līnhī parīchā kavana bidhi kahahu satya saba bāta || 55 ||

māsapārāyaṇa, dūsarā viśrāma
satīṃ samujhi raghubīra prabhāū| bhaya basa siva sana kīnha durāū ||
kachu na parīchā līnhi gosāī| kīnha pranāmu tumhārihi nāī ||
jo tumha kahā so mṛṣā na hoī| moreṃ mana pratīti ati soī ||
taba saṃkara dekheu dhari dhyānā| satīṃ jo kīnha carita saba jānā ||
bahuri rāmamāyahi siru nāvā| preri satihi jehiṃ jhū~ṭha kahāvā ||
hari icchā bhāvī balavānā| hṛdaya~ bicārata saṃbhu sujānā ||
satīṃ kīnha sītā kara beṣā| siva ura bhayau biṣāda biseṣā ||
jauṃ aba karau~ satī sana prītī| miṭai bhagati pathu hoi anītī ||

do. parama punīta na jāi taji kie~ prema baṛa pāpu|
pragaṭi na kahata mahesu kachu hṛdaya~ adhika saṃtāpu || 56 ||

taba saṃkara prabhu pada siru nāvā| sumirata rāmu hṛdaya~ asa āvā ||
ehiṃ tana satihi bheṭa mohi nāhīṃ| siva saṃkalpu kīnha mana māhīṃ ||
asa bicāri saṃkaru matidhīrā| cale bhavana sumirata raghubīrā ||
calata gagana bhai girā suhāī| jaya mahesa bhali bhagati dṛṛhāī ||
asa pana tumha binu karai ko ānā| rāmabhagata samaratha bhagavānā ||
suni nabhagirā satī ura socā| pūchā sivahi sameta sakocā ||
kīnha kavana pana kahahu kṛpālā| satyadhāma prabhu dīnadayālā ||
jadapi satīṃ pūchā bahu bhā~tī| tadapi na kaheu tripura ārātī ||

do. satīṃ hṛdaya anumāna kiya sabu jāneu sarbagya|
kīnha kapaṭu maiṃ saṃbhu sana nāri sahaja jaṛa agya || 57ka ||

hṛdaya~ socu samujhata nija karanī| ciṃtā amita jāi nahi baranī ||
kṛpāsiṃdhu siva parama agādhā| pragaṭa na kaheu mora aparādhā ||
saṃkara rukha avaloki bhavānī| prabhu mohi tajeu hṛdaya~ akulānī ||
nija agha samujhi na kachu kahi jāī| tapai avā~ iva ura adhikāī ||
satihi sasoca jāni bṛṣaketū| kahīṃ kathā suṃdara sukha hetū ||
baranata paṃtha bibidha itihāsā| bisvanātha pahu~ce kailāsā ||
taha~ puni saṃbhu samujhi pana āpana| baiṭhe baṭa tara kari kamalāsana ||
saṃkara sahaja sarupa saṃhārā| lāgi samādhi akhaṃḍa apārā ||

do. satī basahi kailāsa taba adhika socu mana māhiṃ|
maramu na koū jāna kachu juga sama divasa sirāhiṃ || 58 ||

nita nava socu satīṃ ura bhārā| kaba jaihau~ dukha sāgara pārā ||
maiṃ jo kīnha raghupati apamānā| punipati bacanu mṛṣā kari jānā ||
so phalu mohi bidhātā~ dīnhā| jo kachu ucita rahā soi kīnhā ||
aba bidhi asa būjhia nahi tohī| saṃkara bimukha jiāvasi mohī ||
kahi na jāī kachu hṛdaya galānī| mana mahu~ rāmāhi sumira sayānī ||
jau prabhu dīnadayālu kahāvā| āratī harana beda jasu gāvā ||
tau maiṃ binaya karau~ kara jorī| chūṭau begi deha yaha morī ||
jauṃ more siva carana sanehū| mana krama bacana satya bratu ehū ||

do. tau sabadarasī sunia prabhu karau so begi upāi|
hoi maranu jehī binahiṃ śrama dusaha bipatti bihāi || 59 ||

so. jalu paya sarisa bikāi dekhahu prīti ki rīti bhali|
bilaga hoi rasu jāi kapaṭa khaṭāī parata puni || 57kha ||

ehi bidhi dukhita prajesakumārī| akathanīya dāruna dukhu bhārī ||
bīteṃ saṃbata sahasa satāsī| tajī samādhi saṃbhu abināsī ||
rāma nāma siva sumirana lāge| jāneu satīṃ jagatapati jāge ||
jāi saṃbhu pada baṃdanu kīnhī| sanamukha saṃkara āsanu dīnhā ||
lage kahana harikathā rasālā| daccha prajesa bhae tehi kālā ||
dekhā bidhi bicāri saba lāyaka| dacchahi kīnha prajāpati nāyaka ||
baṛa adhikāra daccha jaba pāvā| ati abhimānu hṛdaya~ taba āvā ||
nahiṃ kou asa janamā jaga māhīṃ| prabhutā pāi jāhi mada nāhīṃ ||

do. daccha lie muni boli saba karana lage baṛa jāga|
nevate sādara sakala sura je pāvata makha bhāga || 60 ||


kiṃnara nāga siddha gaṃdharbā| badhunha sameta cale sura sarbā ||
biṣnu biraṃci mahesu bihāī| cale sakala sura jāna banāī ||
satīṃ biloke byoma bimānā| jāta cale suṃdara bidhi nānā ||
sura suṃdarī karahiṃ kala gānā| sunata śravana chūṭahiṃ muni dhyānā ||
pūcheu taba siva~ kaheu bakhānī| pitā jagya suni kachu haraṣānī ||
jauṃ mahesu mohi āyasu dehīṃ| kucha dina jāi rahauṃ misa ehīṃ ||
pati parityāga hṛdaya dukhu bhārī| kahai na nija aparādha bicārī ||
bolī satī manohara bānī| bhaya saṃkoca prema rasa sānī ||

do. pitā bhavana utsava parama jauṃ prabhu āyasu hoi|
tau mai jāu~ kṛpāyatana sādara dekhana soi || 61 ||

kahehu nīka morehu~ mana bhāvā| yaha anucita nahiṃ nevata paṭhāvā ||
daccha sakala nija sutā bolāī| hamareṃ bayara tumhau bisarāī ||
brahmasabhā~ hama sana dukhu mānā| tehi teṃ ajahu~ karahiṃ apamānā ||
jauṃ binu boleṃ jāhu bhavānī| rahai na sīlu sanehu na kānī ||
jadapi mitra prabhu pitu gura gehā| jāia binu bolehu~ na sa~dehā ||
tadapi birodha māna jaha~ koī| tahā~ gae~ kalyānu na hoī ||
bhā~ti aneka saṃbhu samujhāvā| bhāvī basa na gyānu ura āvā ||
kaha prabhu jāhu jo binahiṃ bolāe~| nahiṃ bhali bāta hamāre bhāe~ ||

do. kahi dekhā hara jatana bahu rahai na dacchakumāri|
die mukhya gana saṃga taba bidā kīnha tripurāri || 62 ||

pitā bhavana jaba gaī bhavānī| daccha trāsa kāhu~ na sanamānī ||
sādara bhalehiṃ milī eka mātā| bhaginīṃ milīṃ bahuta musukātā ||
daccha na kachu pūchī kusalātā| satihi biloki jare saba gātā ||
satīṃ jāi dekheu taba jāgā| katahu~ na dīkha saṃbhu kara bhāgā ||
taba cita caṛheu jo saṃkara kaheū| prabhu apamānu samujhi ura daheū ||
pāchila dukhu na hṛdaya~ asa byāpā| jasa yaha bhayau mahā paritāpā ||
jadyapi jaga dāruna dukha nānā| saba teṃ kaṭhina jāti avamānā ||
samujhi so satihi bhayau ati krodhā| bahu bidhi jananīṃ kīnha prabodhā ||

do. siva apamānu na jāi sahi hṛdaya~ na hoi prabodha|
sakala sabhahi haṭhi haṭaki taba bolīṃ bacana sakrodha || 63 ||

sunahu sabhāsada sakala muniṃdā| kahī sunī jinha saṃkara niṃdā ||
so phalu turata lahaba saba kāhū~| bhalī bhā~ti pachitāba pitāhū~ ||
saṃta saṃbhu śrīpati apabādā| sunia jahā~ taha~ asi marajādā ||
kāṭia tāsu jībha jo basāī| śravana mūdi na ta calia parāī ||
jagadātamā mahesu purārī| jagata janaka saba ke hitakārī ||
pitā maṃdamati niṃdata tehī| daccha sukra saṃbhava yaha dehī ||
tajihau~ turata deha tehi hetū| ura dhari caṃdramauli bṛṣaketū ||
asa kahi joga agini tanu jārā| bhayau sakala makha hāhākārā ||

do. satī maranu suni saṃbhu gana lage karana makha khīsa|
jagya bidhaṃsa biloki bhṛgu racchā kīnhi munīsa || 64 ||

samācāra saba saṃkara pāe| bīrabhadru kari kopa paṭhāe ||
jagya bidhaṃsa jāi tinha kīnhā| sakala suranha bidhivata phalu dīnhā ||
bhe jagabidita daccha gati soī| jasi kachu saṃbhu bimukha kai hoī ||
yaha itihāsa sakala jaga jānī| tāte maiṃ saṃchepa bakhānī ||
satīṃ marata hari sana baru māgā| janama janama siva pada anurāgā ||
tehi kārana himagiri gṛha jāī| janamīṃ pārabatī tanu pāī ||
jaba teṃ umā saila gṛha jāīṃ| sakala siddhi saṃpati taha~ chāī ||
jaha~ taha~ muninha suāśrama kīnhe| ucita bāsa hima bhūdhara dīnhe ||

do. sadā sumana phala sahita saba druma nava nānā jāti|

pragaṭīṃ suṃdara saila para mani ākara bahu bhā~ti || 65 ||

saritā saba punita jalu bahahīṃ| khaga mṛga madhupa sukhī saba rahahīṃ ||
sahaja bayaru saba jīvanha tyāgā| giri para sakala karahiṃ anurāgā ||
soha saila girijā gṛha āe~| jimi janu rāmabhagati ke pāe~ ||
nita nūtana maṃgala gṛha tāsū| brahmādika gāvahiṃ jasu jāsū ||
nārada samācāra saba pāe| kautukahīṃ giri geha sidhāe ||
sailarāja baṛa ādara kīnhā| pada pakhāri bara āsanu dīnhā ||
nāri sahita muni pada siru nāvā| carana salila sabu bhavanu siṃcāvā ||
nija saubhāgya bahuta giri baranā| sutā boli melī muni caranā ||

do. trikālagya sarbagya tumha gati sarbatra tumhāri ||
kahahu sutā ke doṣa guna munibara hṛdaya~ bicāri || 66 ||

kaha muni bihasi gūṛha mṛdu bānī| sutā tumhāri sakala guna khānī ||
suṃdara sahaja susīla sayānī| nāma umā aṃbikā bhavānī ||
saba lacchana saṃpanna kumārī| hoihi saṃtata piyahi piārī ||
sadā acala ehi kara ahivātā| ehi teṃ jasu paihahiṃ pitu mātā ||
hoihi pūjya sakala jaga māhīṃ| ehi sevata kachu durlabha nāhīṃ ||
ehi kara nāmu sumiri saṃsārā| triya caṛhahahi~ patibrata asidhārā ||
saila sulacchana sutā tumhārī| sunahu je aba avaguna dui cārī ||
aguna amāna mātu pitu hīnā| udāsīna saba saṃsaya chīnā ||

do. jogī jaṭila akāma mana nagana amaṃgala beṣa ||
asa svāmī ehi kaha~ milihi parī hasta asi rekha || 67 ||

suni muni girā satya jiya~ jānī| dukha daṃpatihi umā haraṣānī ||
nāradahu~ yaha bhedu na jānā| dasā eka samujhaba bilagānā ||
sakala sakhīṃ girijā giri mainā| pulaka sarīra bhare jala nainā ||
hoi na mṛṣā devariṣi bhāṣā| umā so bacanu hṛdaya~ dhari rākhā ||
upajeu siva pada kamala sanehū| milana kaṭhina mana bhā saṃdehū ||
jāni kuavasaru prīti durāī| sakhī ucha~ga baiṭhī puni jāī ||
jhūṭhi na hoi devariṣi bānī| socahi daṃpati sakhīṃ sayānī ||
ura dhari dhīra kahai girirāū| kahahu nātha kā karia upāū ||

do. kaha munīsa himavaṃta sunu jo bidhi likhā lilāra|
deva danuja nara nāga muni kou na meṭanihāra || 68 ||

tadapi eka maiṃ kahau~ upāī| hoi karai jauṃ daiu sahāī ||
jasa baru maiṃ baraneu~ tumha pāhīṃ| milahi umahi tasa saṃsaya nāhīṃ ||
je je bara ke doṣa bakhāne| te saba siva pahi maiṃ anumāne ||
jauṃ bibāhu saṃkara sana hoī| doṣau guna sama kaha sabu koī ||
jauṃ ahi seja sayana hari karahīṃ| budha kachu tinha kara doṣu na dharahīṃ ||
bhānu kṛsānu sarba rasa khāhīṃ| tinha kaha~ maṃda kahata kou nāhīṃ ||
subha aru asubha salila saba bahaī| surasari kou apunīta na kahaī ||
samaratha kahu~ nahiṃ doṣu gosāī| rabi pāvaka surasari kī nāī ||

do. jauṃ asa hisiṣā karahiṃ nara jaṛi bibeka abhimāna|
parahiṃ kalapa bhari naraka mahu~ jīva ki īsa samāna || 69 ||

surasari jala kṛta bāruni jānā| kabahu~ na saṃta karahiṃ tehi pānā ||
surasari mileṃ so pāvana jaiseṃ| īsa anīsahi aṃtaru taiseṃ ||
saṃbhu sahaja samaratha bhagavānā| ehi bibāha~ saba bidhi kalyānā ||
durārādhya pai ahahiṃ mahesū| āsutoṣa puni kie~ kalesū ||
jauṃ tapu karai kumāri tumhārī| bhāviu meṭi sakahiṃ tripurārī ||
jadyapi bara aneka jaga māhīṃ| ehi kaha~ siva taji dūsara nāhīṃ ||
bara dāyaka pranatārati bhaṃjana| kṛpāsiṃdhu sevaka mana raṃjana ||
icchita phala binu siva avarādhe| lahia na koṭi joga japa sādheṃ ||

do. asa kahi nārada sumiri hari girijahi dīnhi asīsa|
hoihi yaha kalyāna aba saṃsaya tajahu girīsa || 70 ||

kahi asa brahmabhavana muni gayaū| āgila carita sunahu jasa bhayaū ||
patihi ekāṃta pāi kaha mainā| nātha na maiṃ samujhe muni bainā ||
jauṃ gharu baru kulu hoi anūpā| karia bibāhu sutā anurupā ||
na ta kanyā baru rahau kuārī| kaṃta umā mama prānapiārī ||
jauṃ na milahi baru girijahi jogū| giri jaṛa sahaja kahihi sabu logū ||
soi bicāri pati karehu bibāhū| jehiṃ na bahori hoi ura dāhū ||
asa kahi pari carana dhari sīsā| bole sahita saneha girīsā ||
baru pāvaka pragaṭai sasi māhīṃ| nārada bacanu anyathā nāhīṃ ||

do. priyā socu pariharahu sabu sumirahu śrībhagavāna|
pārabatihi niramayau jehiṃ soi karihi kalyāna || 71 ||

aba jau tumhahi sutā para nehū| tau asa jāi sikhāvana dehū ||
karai so tapu jehiṃ milahiṃ mahesū| āna upāya~ na miṭahi kalesū ||
nārada bacana sagarbha sahetū| suṃdara saba guna nidhi bṛṣaketū ||
asa bicāri tumha tajahu asaṃkā| sabahi bhā~ti saṃkaru akalaṃkā ||
suni pati bacana haraṣi mana māhīṃ| gaī turata uṭhi girijā pāhīṃ ||
umahi biloki nayana bhare bārī| sahita saneha goda baiṭhārī ||
bārahiṃ bāra leti ura lāī| gadagada kaṃṭha na kachu kahi jāī ||
jagata mātu sarbagya bhavānī| mātu sukhada bolīṃ mṛdu bānī ||

do. sunahi mātu maiṃ dīkha asa sapana sunāvau~ tohi|
suṃdara gaura subiprabara asa upadeseu mohi || 72 ||

karahi jāi tapu sailakumārī| nārada kahā so satya bicārī ||
mātu pitahi puni yaha mata bhāvā| tapu sukhaprada dukha doṣa nasāvā ||
tapabala racai prapaṃca bidhātā| tapabala biṣnu sakala jaga trātā ||
tapabala saṃbhu karahiṃ saṃghārā| tapabala seṣu dharai mahibhārā ||
tapa adhāra saba sṛṣṭi bhavānī| karahi jāi tapu asa jiya~ jānī ||
sunata bacana bisamita mahatārī| sapana sunāyau girihi ha~kārī ||
mātu pituhi bahubidhi samujhāī| calīṃ umā tapa hita haraṣāī ||
priya parivāra pitā aru mātā| bhae bikala mukha āva na bātā ||

do. bedasirā muni āi taba sabahi kahā samujhāi ||
pārabatī mahimā sunata rahe prabodhahi pāi || 73 ||

ura dhari umā prānapati caranā| jāi bipina lāgīṃ tapu karanā ||
ati sukumāra na tanu tapa jogū| pati pada sumiri tajeu sabu bhogū ||
nita nava carana upaja anurāgā| bisarī deha tapahiṃ manu lāgā ||
saṃbata sahasa mūla phala khāe| sāgu khāi sata baraṣa gavā~e ||
kachu dina bhojanu bāri batāsā| kie kaṭhina kachu dina upabāsā ||
bela pātī mahi parai sukhāī| tīni sahasa saṃbata soī khāī ||
puni parihare sukhāneu paranā| umahi nāma taba bhayau aparanā ||
dekhi umahi tapa khīna sarīrā| brahmagirā bhai gagana gabhīrā ||

do. bhayau manoratha suphala tava sunu girijākumāri|
pariharu dusaha kalesa saba aba milihahiṃ tripurāri || 74 ||

asa tapu kāhu~ na kīnha bhavānī| bhau aneka dhīra muni gyānī ||
aba ura dharahu brahma bara bānī| satya sadā saṃtata suci jānī ||
āvai pitā bolāvana jabahīṃ| haṭha parihari ghara jāehu tabahīṃ ||
milahiṃ tumhahi jaba sapta riṣīsā| jānehu taba pramāna bāgīsā ||
sunata girā bidhi gagana bakhānī| pulaka gāta girijā haraṣānī ||
umā carita suṃdara maiṃ gāvā| sunahu saṃbhu kara carita suhāvā ||
jaba teṃ satī jāi tanu tyāgā| taba seṃ siva mana bhayau birāgā ||
japahiṃ sadā raghunāyaka nāmā| jaha~ taha~ sunahiṃ rāma guna grāmā ||

do. cidānanda sukhadhāma siva bigata moha mada kāma|
bicarahiṃ mahi dhari hṛdaya~ hari sakala loka abhirāma || 75 ||

katahu~ muninha upadesahiṃ gyānā| katahu~ rāma guna karahiṃ bakhānā ||
jadapi akāma tadapi bhagavānā| bhagata biraha dukha dukhita sujānā ||
ehi bidhi gayau kālu bahu bītī| nita nai hoi rāma pada prītī ||
naimu premu saṃkara kara dekhā| abicala hṛdaya~ bhagati kai rekhā ||
pragaṭai rāmu kṛtagya kṛpālā| rūpa sīla nidhi teja bisālā ||
bahu prakāra saṃkarahi sarāhā| tumha binu asa bratu ko nirabāhā ||
bahubidhi rāma sivahi samujhāvā| pārabatī kara janmu sunāvā ||
ati punīta girijā kai karanī| bistara sahita kṛpānidhi baranī ||

do. aba binatī mama sunehu siva jauṃ mo para nija nehu|
jāi bibāhahu sailajahi yaha mohi māgeṃ dehu || 76 ||


kaha siva jadapi ucita asa nāhīṃ| nātha bacana puni meṭi na jāhīṃ ||
sira dhari āyasu karia tumhārā| parama dharamu yaha nātha hamārā ||
mātu pitā gura prabhu kai bānī| binahiṃ bicāra karia subha jānī ||
tumha saba bhā~ti parama hitakārī| agyā sira para nātha tumhārī ||
prabhu toṣeu suni saṃkara bacanā| bhakti bibeka dharma juta racanā ||
kaha prabhu hara tumhāra pana raheū| aba ura rākhehu jo hama kaheū ||
aṃtaradhāna bhae asa bhāṣī| saṃkara soi mūrati ura rākhī ||
tabahiṃ saptariṣi siva pahiṃ āe| bole prabhu ati bacana suhāe ||

do. pārabatī pahiṃ jāi tumha prema paricchā lehu|
girihi preri paṭhaehu bhavana dūri karehu saṃdehu || 77 ||

riṣinha gauri dekhī taha~ kaisī| mūratimaṃta tapasyā jaisī ||
bole muni sunu sailakumārī| karahu kavana kārana tapu bhārī ||
kehi avarādhahu kā tumha cahahū| hama sana satya maramu kina kahahū ||
kahata bacata manu ati sakucāī| ha~sihahu suni hamāri jaṛatāī ||
manu haṭha parā na sunai sikhāvā| cahata bāri para bhīti uṭhāvā ||
nārada kahā satya soi jānā| binu paṃkhanha hama cahahiṃ uṛānā ||
dekhahu muni abibeku hamārā| cāhia sadā sivahi bharatārā ||

do. sunata bacana bihase riṣaya girisaṃbhava taba deha|
nārada kara upadesu suni kahahu baseu kisu geha || 78 ||

dacchasutanha upadesenhi jāī| tinha phiri bhavanu na dekhā āī ||
citraketu kara gharu una ghālā| kanakakasipu kara puni asa hālā ||
nārada sikha je sunahiṃ nara nārī| avasi hohiṃ taji bhavanu bhikhārī ||
mana kapaṭī tana sajjana cīnhā| āpu sarisa sabahī caha kīnhā ||
tehi keṃ bacana māni bisvāsā| tumha cāhahu pati sahaja udāsā ||
nirguna nilaja kubeṣa kapālī| akula ageha digaṃbara byālī ||
kahahu kavana sukhu asa baru pāe~| bhala bhūlihu ṭhaga ke baurāe~ ||
paṃca kaheṃ siva~ satī bibāhī| puni avaḍeri marāenhi tāhī ||

do. aba sukha sovata socu nahi bhīkha māgi bhava khāhiṃ|
sahaja ekākinha ke bhavana kabahu~ ki nāri khaṭāhiṃ || 79 ||

ajahū~ mānahu kahā hamārā| hama tumha kahu~ baru nīka bicārā ||
ati suṃdara suci sukhada susīlā| gāvahiṃ beda jāsu jasa līlā ||
dūṣana rahita sakala guna rāsī| śrīpati pura baikuṃṭha nivāsī ||
asa baru tumhahi milāuba ānī| sunata bihasi kaha bacana bhavānī ||
satya kahehu giribhava tanu ehā| haṭha na chūṭa chūṭai baru dehā ||
kanakau puni paṣāna teṃ hoī| jārehu~ sahaju na parihara soī ||
nārada bacana na maiṃ pariharaū~| basau bhavanu ujarau nahiṃ ḍaraū~ ||
gura keṃ bacana pratīti na jehī| sapanehu~ sugama na sukha sidhi tehī ||

do. mahādeva avaguna bhavana biṣnu sakala guna dhāma|
jehi kara manu rama jāhi sana tehi tehī sana kāma || 80 ||

jauṃ tumha milatehu prathama munīsā| sunatiu~ sikha tumhāri dhari sīsā ||
aba maiṃ janmu saṃbhu hita hārā| ko guna dūṣana karai bicārā ||
jauṃ tumhare haṭha hṛdaya~ biseṣī| rahi na jāi binu kie~ bareṣī ||
tau kautukianha ālasu nāhīṃ| bara kanyā aneka jaga māhīṃ ||
janma koṭi lagi ragara hamārī| barau~ saṃbhu na ta rahau~ kuārī ||
tajau~ na nārada kara upadesū| āpu kahahi sata bāra mahesū ||
maiṃ pā parau~ kahai jagadaṃbā| tumha gṛha gavanahu bhayau bilaṃbā ||
dekhi premu bole muni gyānī| jaya jaya jagadaṃbike bhavānī ||

do. tumha māyā bhagavāna siva sakala jagata pitu mātu|
nāi carana sira muni cale puni puni haraṣata gātu || 81 ||

jāi muninha himavaṃtu paṭhāe| kari binatī girajahiṃ gṛha lyāe ||
bahuri saptariṣi siva pahiṃ jāī| kathā umā kai sakala sunāī ||
bhae magana siva sunata sanehā| haraṣi saptariṣi gavane gehā ||
manu thira kari taba saṃbhu sujānā| lage karana raghunāyaka dhyānā ||
tāraku asura bhayau tehi kālā| bhuja pratāpa bala teja bisālā ||
teṃhi saba loka lokapati jīte| bhae deva sukha saṃpati rīte ||
ajara amara so jīti na jāī| hāre sura kari bibidha larāī ||
taba biraṃci sana jāi pukāre| dekhe bidhi saba deva dukhāre ||

do. saba sana kahā bujhāi bidhi danuja nidhana taba hoi|
saṃbhu sukra saṃbhūta suta ehi jītai rana soi || 82 ||

mora kahā suni karahu upāī| hoihi īsvara karihi sahāī ||
satīṃ jo tajī daccha makha dehā| janamī jāi himācala gehā ||
tehiṃ tapu kīnha saṃbhu pati lāgī| siva samādhi baiṭhe sabu tyāgī ||
jadapi ahai asamaṃjasa bhārī| tadapi bāta eka sunahu hamārī ||
paṭhavahu kāmu jāi siva pāhīṃ| karai chobhu saṃkara mana māhīṃ ||
taba hama jāi sivahi sira nāī| karavāuba bibāhu bariāī ||
ehi bidhi bhalehi devahita hoī| mara ati nīka kahai sabu koī ||
astuti suranha kīnhi ati hetū| pragaṭeu biṣamabāna jhaṣaketū ||

do. suranha kahīṃ nija bipati saba suni mana kīnha bicāra|
saṃbhu birodha na kusala mohi bihasi kaheu asa māra || 83 ||

tadapi karaba maiṃ kāju tumhārā| śruti kaha parama dharama upakārā ||
para hita lāgi tajai jo dehī| saṃtata saṃta prasaṃsahiṃ tehī ||
asa kahi caleu sabahi siru nāī| sumana dhanuṣa kara sahita sahāī ||
calata māra asa hṛdaya~ bicārā| siva birodha dhruva maranu hamārā ||
taba āpana prabhāu bistārā| nija basa kīnha sakala saṃsārā ||
kopeu jabahi bāricaraketū| chana mahu~ miṭe sakala śruti setū ||
brahmacarja brata saṃjama nānā| dhīraja dharama gyāna bigyānā ||
sadācāra japa joga birāgā| sabhaya bibeka kaṭaku saba bhāgā ||

chaṃ. bhāgeu bibeka sahāya sahita so subhaṭa saṃjuga mahi mure|
sadagraṃtha parbata kaṃdaranhi mahu~ jāi tehi avasara dure ||
honihāra kā karatāra ko rakhavāra jaga kharabharu parā|
dui mātha kehi ratinātha jehi kahu~ ko'pi kara dhanu saru dharā ||

do. je sajīva jaga acara cara nāri puruṣa asa nāma|
te nija nija marajāda taji bhae sakala basa kāma || 84 ||

saba ke hṛdaya~ madana abhilāṣā| latā nihāri navahiṃ taru sākhā ||
nadīṃ umagi aṃbudhi kahu~ dhāī| saṃgama karahiṃ talāva talāī ||
jaha~ asi dasā jaṛanha kai baranī| ko kahi sakai sacetana karanī ||
pasu pacchī nabha jala thalacārī| bhae kāmabasa samaya bisārī ||
madana aṃdha byākula saba lokā| nisi dinu nahiṃ avalokahiṃ kokā ||
deva danuja nara kiṃnara byālā| preta pisāca bhūta betālā ||
inha kai dasā na kaheu~ bakhānī| sadā kāma ke cere jānī ||
siddha birakta mahāmuni jogī| tepi kāmabasa bhae biyogī ||

chaṃ. bhae kāmabasa jogīsa tāpasa pāva~ranhi kī ko kahai|
dekhahiṃ carācara nārimaya je brahmamaya dekhata rahe ||
abalā bilokahiṃ puruṣamaya jagu puruṣa saba abalāmayaṃ|
dui daṃḍa bhari brahmāṃḍa bhītara kāmakṛta kautuka ayaṃ ||

so. dharī na kāhū~ dhira sabake mana manasija hare|
je rākhe raghubīra te ubare tehi kāla mahu~ || 85 ||


ubhaya gharī asa kautuka bhayaū| jau lagi kāmu saṃbhu pahiṃ gayaū ||
sivahi biloki sasaṃkeu mārū| bhayau jathāthiti sabu saṃsārū ||
bhae turata saba jīva sukhāre| jimi mada utari gae~ matavāre ||
rudrahi dekhi madana bhaya mānā| durādharaṣa durgama bhagavānā ||
phirata lāja kachu kari nahiṃ jāī| maranu ṭhāni mana racesi upāī ||
pragaṭesi turata rucira riturājā| kusumita nava taru rāji birājā ||
bana upabana bāpikā taṛāgā| parama subhaga saba disā bibhāgā ||
jaha~ taha~ janu umagata anurāgā| dekhi muehu~ mana manasija jāgā ||

chaṃ. jāgai manobhava muehu~ mana bana subhagatā na parai kahī|
sītala sugaṃdha sumaṃda māruta madana anala sakhā sahī ||
bikase saranhi bahu kaṃja guṃjata puṃja maṃjula madhukarā|
kalahaṃsa pika suka sarasa rava kari gāna nācahiṃ apacharā ||

do. sakala kalā kari koṭi bidhi hāreu sena sameta|
calī na acala samādhi siva kopeu hṛdayaniketa || 86 ||

dekhi rasāla biṭapa bara sākhā| tehi para caṛheu madanu mana mākhā ||
sumana cāpa nija sara saṃdhāne| ati risa tāki śravana lagi tāne ||
chāṛe biṣama bisikha ura lāge| chuṭi samādhi saṃbhu taba jāge ||
bhayau īsa mana chobhu biseṣī| nayana ughāri sakala disi dekhī ||
saurabha pallava madanu bilokā| bhayau kopu kaṃpeu trailokā ||
taba siva~ tīsara nayana ughārā| citavata kāmu bhayau jari chārā ||
hāhākāra bhayau jaga bhārī| ḍarape sura bhae asura sukhārī ||
samujhi kāmasukhu socahiṃ bhogī| bhae akaṃṭaka sādhaka jogī ||

chaṃ. jogi akaṃṭaka bhae pati gati sunata rati muruchita bhaī|
rodati badati bahu bhā~ti karunā karati saṃkara pahiṃ gaī|
ati prema kari binatī bibidha bidhi jori kara sanmukha rahī|
prabhu āsutoṣa kṛpāla siva abalā nirakhi bole sahī ||

do. aba teṃ rati tava nātha kara hoihi nāmu anaṃgu|
binu bapu byāpihi sabahi puni sunu nija milana prasaṃgu || 87 ||

jaba jadubaṃsa kṛṣna avatārā| hoihi harana mahā mahibhārā ||
kṛṣna tanaya hoihi pati torā| bacanu anyathā hoi na morā ||
rati gavanī suni saṃkara bānī| kathā apara aba kahau~ bakhānī ||
devanha samācāra saba pāe| brahmādika baikuṃṭha sidhāe ||
saba sura biṣnu biraṃci sametā| gae jahā~ siva kṛpāniketā ||
pṛthaka pṛthaka tinha kīnhi prasaṃsā| bhae prasanna caṃdra avataṃsā ||
bole kṛpāsiṃdhu bṛṣaketū| kahahu amara āe kehi hetū ||
kaha bidhi tumha prabhu aṃtarajāmī| tadapi bhagati basa binavau~ svāmī ||

do. sakala suranha ke hṛdaya~ asa saṃkara parama uchāhu|
nija nayananhi dekhā cahahiṃ nātha tumhāra bibāhu || 88 ||

yaha utsava dekhia bhari locana| soi kachu karahu madana mada mocana|
kāmu jāri rati kahu~ baru dīnhā| kṛpāsiṃdhu yaha ati bhala kīnhā ||
sāsati kari puni karahiṃ pasāū| nātha prabhunha kara sahaja subhāū ||
pārabatīṃ tapu kīnha apārā| karahu tāsu aba aṃgīkārā ||
suni bidhi binaya samujhi prabhu bānī| aisei hou kahā sukhu mānī ||
taba devanha duṃdubhīṃ bajāīṃ| baraṣi sumana jaya jaya sura sāī ||
avasaru jāni saptariṣi āe| turatahiṃ bidhi giribhavana paṭhāe ||
prathama gae jaha~ rahī bhavānī| bole madhura bacana chala sānī ||

do. kahā hamāra na sunehu taba nārada keṃ upadesa|
aba bhā jhūṭha tumhāra pana jāreu kāmu mahesa || 89 ||

māsapārāyaṇa,tīsarā viśrāma
suni bolīṃ musakāi bhavānī| ucita kahehu munibara bigyānī ||
tumhareṃ jāna kāmu aba jārā| aba lagi saṃbhu rahe sabikārā ||
hamareṃ jāna sadā siva jogī| aja anavadya akāma abhogī ||
jauṃ maiṃ siva seye asa jānī| prīti sameta karma mana bānī ||
tau hamāra pana sunahu munīsā| karihahiṃ satya kṛpānidhi īsā ||
tumha jo kahā hara jāreu mārā| soi ati baṛa abibeku tumhārā ||
tāta anala kara sahaja subhāū| hima tehi nikaṭa jāi nahiṃ kāū ||
gae~ samīpa so avasi nasāī| asi manmatha mahesa kī nāī ||

do. hiya~ haraṣe muni bacana suni dekhi prīti bisvāsa ||
cale bhavānihi nāi sira gae himācala pāsa || 90 ||

sabu prasaṃgu giripatihi sunāvā| madana dahana suni ati dukhu pāvā ||
bahuri kaheu rati kara baradānā| suni himavaṃta bahuta sukhu mānā ||
hṛdaya~ bicāri saṃbhu prabhutāī| sādara munibara lie bolāī ||
sudinu sunakhatu sugharī socāī| begi bedabidhi lagana dharāī ||
patrī saptariṣinha soi dīnhī| gahi pada binaya himācala kīnhī ||
jāi bidhihi dīnhi so pātī| bācata prīti na hṛdaya~ samātī ||
lagana bāci aja sabahi sunāī| haraṣe muni saba sura samudāī ||
sumana bṛṣṭi nabha bājana bāje| maṃgala kalasa dasahu~ disi sāje ||

do. lage sa~vārana sakala sura bāhana bibidha bimāna|
hohi saguna maṃgala subhada karahiṃ apacharā gāna || 91 ||


sivahi saṃbhu gana karahiṃ siṃgārā| jaṭā mukuṭa ahi mauru sa~vārā ||
kuṃḍala kaṃkana pahire byālā| tana bibhūti paṭa kehari chālā ||
sasi lalāṭa suṃdara sira gaṃgā| nayana tīni upabīta bhujaṃgā ||
garala kaṃṭha ura nara sira mālā| asiva beṣa sivadhāma kṛpālā ||
kara trisūla aru ḍamaru birājā| cale basaha~ caṛhi bājahiṃ bājā ||
dekhi sivahi suratriya musukāhīṃ| bara lāyaka dulahini jaga nāhīṃ ||
biṣnu biraṃci ādi surabrātā| caṛhi caṛhi bāhana cale barātā ||
sura samāja saba bhā~ti anūpā| nahiṃ barāta dūlaha anurūpā ||

do. biṣnu kahā asa bihasi taba boli sakala disirāja|
bilaga bilaga hoi calahu saba nija nija sahita samāja || 92 ||

bara anuhāri barāta na bhāī| ha~sī karaihahu para pura jāī ||
biṣnu bacana suni sura musakāne| nija nija sena sahita bilagāne ||
manahīṃ mana mahesu musukāhīṃ| hari ke biṃgya bacana nahiṃ jāhīṃ ||
ati priya bacana sunata priya kere| bhṛṃgihi preri sakala gana ṭere ||
siva anusāsana suni saba āe| prabhu pada jalaja sīsa tinha nāe ||
nānā bāhana nānā beṣā| bihase siva samāja nija dekhā ||
kou mukhahīna bipula mukha kāhū| binu pada kara kou bahu pada bāhū ||
bipula nayana kou nayana bihīnā| riṣṭapuṣṭa kou ati tanakhīnā ||

chaṃ. tana khīna kou ati pīna pāvana kou apāvana gati dhareṃ|
bhūṣana karāla kapāla kara saba sadya sonita tana bhareṃ ||
khara svāna suara sṛkāla mukha gana beṣa aganita ko ganai|
bahu jinasa preta pisāca jogi jamāta baranata nahiṃ banai ||

so. nācahiṃ gāvahiṃ gīta parama taraṃgī bhūta saba|
dekhata ati biparīta bolahiṃ bacana bicitra bidhi || 93 ||

jasa dūlahu tasi banī barātā| kautuka bibidha hohiṃ maga jātā ||
ihā~ himācala raceu bitānā| ati bicitra nahiṃ jāi bakhānā ||
saila sakala jaha~ lagi jaga māhīṃ| laghu bisāla nahiṃ barani sirāhīṃ ||
bana sāgara saba nadīṃ talāvā| himagiri saba kahu~ nevata paṭhāvā ||
kāmarūpa suṃdara tana dhārī| sahita samāja sahita bara nārī ||
gae sakala tuhinācala gehā| gāvahiṃ maṃgala sahita sanehā ||
prathamahiṃ giri bahu gṛha sa~varāe| jathājogu taha~ taha~ saba chāe ||
pura sobhā avaloki suhāī| lāgai laghu biraṃci nipunāī ||

chaṃ. laghu lāga bidhi kī nipunatā avaloki pura sobhā sahī|
bana bāga kūpa taṛāga saritā subhaga saba saka ko kahī ||
maṃgala bipula torana patākā ketu gṛha gṛha sohahīṃ ||
banitā puruṣa suṃdara catura chabi dekhi muni mana mohahīṃ ||

do. jagadaṃbā jaha~ avatarī so puru barani ki jāi|
riddhi siddhi saṃpatti sukha nita nūtana adhikāi || 94 ||

nagara nikaṭa barāta suni āī| pura kharabharu sobhā adhikāī ||
kari banāva saji bāhana nānā| cale lena sādara agavānā ||
hiya~ haraṣe sura sena nihārī| harihi dekhi ati bhae sukhārī ||
siva samāja jaba dekhana lāge| biḍari cale bāhana saba bhāge ||
dhari dhīraju taha~ rahe sayāne| bālaka saba lai jīva parāne ||
gae~ bhavana pūchahiṃ pitu mātā| kahahiṃ bacana bhaya kaṃpita gātā ||
kahia kāha kahi jāi na bātā| jama kara dhāra kidhauṃ bariātā ||
baru baurāha basaha~ asavārā| byāla kapāla bibhūṣana chārā ||

chaṃ. tana chāra byāla kapāla bhūṣana nagana jaṭila bhayaṃkarā|
sa~ga bhūta preta pisāca jogini bikaṭa mukha rajanīcarā ||
jo jiata rahihi barāta dekhata punya baṛa tehi kara sahī|
dekhihi so umā bibāhu ghara ghara bāta asi larikanha kahī ||

do. samujhi mahesa samāja saba janani janaka musukāhiṃ|
bāla bujhāe bibidha bidhi niḍara hohu ḍaru nāhiṃ || 95 ||

lai agavāna barātahi āe| die sabahi janavāsa suhāe ||
mainā~ subha āratī sa~vārī| saṃga sumaṃgala gāvahiṃ nārī ||
kaṃcana thāra soha bara pānī| parichana calī harahi haraṣānī ||
bikaṭa beṣa rudrahi jaba dekhā| abalanha ura bhaya bhayau biseṣā ||
bhāgi bhavana paiṭhīṃ ati trāsā| gae mahesu jahā~ janavāsā ||
mainā hṛdaya~ bhayau dukhu bhārī| līnhī boli girīsakumārī ||
adhika saneha~ goda baiṭhārī| syāma saroja nayana bhare bārī ||
jehiṃ bidhi tumhahi rūpu asa dīnhā| tehiṃ jaṛa baru bāura kasa kīnhā ||

chaṃ. kasa kīnha baru baurāha bidhi jehiṃ tumhahi suṃdaratā daī|
jo phalu cahia surataruhiṃ so barabasa babūrahiṃ lāgaī ||
tumha sahita giri teṃ girauṃ pāvaka jarauṃ jalanidhi mahu~ parauṃ ||
gharu jāu apajasu hou jaga jīvata bibāhu na hauṃ karauṃ ||

do. bhaī bikala abalā sakala dukhita dekhi girināri|
kari bilāpu rodati badati sutā sanehu sa~bhāri || 96 ||

nārada kara maiṃ kāha bigārā| bhavanu mora jinha basata ujārā ||
asa upadesu umahi jinha dīnhā| baure barahi lagi tapu kīnhā ||
sācehu~ unha ke moha na māyā| udāsīna dhanu dhāmu na jāyā ||
para ghara ghālaka lāja na bhīrā| bājha~ ki jāna prasava kaiṃ pīrā ||
jananihi bikala biloki bhavānī| bolī juta bibeka mṛdu bānī ||
asa bicāri socahi mati mātā| so na ṭarai jo racai bidhātā ||
karama likhā jau bāura nāhū| tau kata dosu lagāia kāhū ||

tumha sana miṭahiṃ ki bidhi ke aṃkā| mātu byartha jani lehu kalaṃkā ||

chaṃ. jani lehu mātu kalaṃku karunā pariharahu avasara nahīṃ|
dukhu sukhu jo likhā lilāra hamareṃ jāba jaha~ pāuba tahīṃ ||
suni umā bacana binīta komala sakala abalā socahīṃ ||
bahu bhā~ti bidhihi lagāi dūṣana nayana bāri bimocahīṃ ||

do. tehi avasara nārada sahita aru riṣi sapta sameta|
samācāra suni tuhinagiri gavane turata niketa || 97 ||

taba nārada sabahi samujhāvā| pūruba kathāprasaṃgu sunāvā ||
mayanā satya sunahu mama bānī| jagadaṃbā tava sutā bhavānī ||
ajā anādi sakti abināsini| sadā saṃbhu aradhaṃga nivāsini ||
jaga saṃbhava pālana laya kārini| nija icchā līlā bapu dhārini ||
janamīṃ prathama daccha gṛha jāī| nāmu satī suṃdara tanu pāī ||
taha~hu~ satī saṃkarahi bibāhīṃ| kathā prasiddha sakala jaga māhīṃ ||
eka bāra āvata siva saṃgā| dekheu raghukula kamala pataṃgā ||
bhayau mohu siva kahā na kīnhā| bhrama basa beṣu sīya kara līnhā ||

chaṃ. siya beṣu satī jo kīnha tehi aparādha saṃkara pariharīṃ|
hara biraha~ jāi bahori pitu keṃ jagya jogānala jarīṃ ||
aba janami tumhare bhavana nija pati lāgi dāruna tapu kiyā|
asa jāni saṃsaya tajahu girijā sarbadā saṃkara priyā ||

do. suni nārada ke bacana taba saba kara miṭā biṣāda|
chana mahu~ byāpeu sakala pura ghara ghara yaha saṃbāda || 98 ||

taba mayanā himavaṃtu anaṃde| puni puni pārabatī pada baṃde ||
nāri puruṣa sisu jubā sayāne| nagara loga saba ati haraṣāne ||
lage hona pura maṃgalagānā| saje sabahi hāṭaka ghaṭa nānā ||
bhā~ti aneka bhaī jevarānā| sūpasāstra jasa kachu byavahārā ||
so jevanāra ki jāi bakhānī| basahiṃ bhavana jehiṃ mātu bhavānī ||
sādara bole sakala barātī| biṣnu biraṃci deva saba jātī ||
bibidhi pā~ti baiṭhī jevanārā| lāge parusana nipuna suārā ||
nāribṛṃda sura jeva~ta jānī| lagīṃ dena gārīṃ mṛdu bānī ||

chaṃ. gārīṃ madhura svara dehiṃ suṃdari biṃgya bacana sunāvahīṃ|
bhojanu karahiṃ sura ati bilaṃbu binodu suni sacu pāvahīṃ ||
jeva~ta jo baṛhyo anaṃdu so mukha koṭihū~ na parai kahyo|
acavā~i dīnhe pāna gavane bāsa jaha~ jāko rahyo ||

do. bahuri muninha himavaṃta kahu~ lagana sunāī āi|
samaya biloki bibāha kara paṭhae deva bolāi || 99 ||

boli sakala sura sādara līnhe| sabahi jathocita āsana dīnhe ||
bedī beda bidhāna sa~vārī| subhaga sumaṃgala gāvahiṃ nārī ||
siṃghāsanu ati dibya suhāvā| jāi na barani biraṃci banāvā ||
baiṭhe siva bipranha siru nāī| hṛdaya~ sumiri nija prabhu raghurāī ||
bahuri munīsanha umā bolāī| kari siṃgāru sakhīṃ lai āī ||
dekhata rūpu sakala sura mohe| baranai chabi asa jaga kabi ko hai ||
jagadaṃbikā jāni bhava bhāmā| suranha manahiṃ mana kīnha pranāmā ||
suṃdaratā marajāda bhavānī| jāi na koṭihu~ badana bakhānī ||

chaṃ. koṭihu~ badana nahiṃ banai baranata jaga janani sobhā mahā|
sakucahiṃ kahata śruti seṣa sārada maṃdamati tulasī kahā ||
chabikhāni mātu bhavāni gavanī madhya maṃḍapa siva jahā~ ||
avaloki sakahiṃ na sakuca pati pada kamala manu madhukaru tahā~ ||

do. muni anusāsana ganapatihi pūjeu saṃbhu bhavāni|

kou suni saṃsaya karai jani sura anādi jiya~ jāni || 100 ||


jasi bibāha kai bidhi śruti gāī| mahāmuninha so saba karavāī ||
gahi girīsa kusa kanyā pānī| bhavahi samarapīṃ jāni bhavānī ||
pānigrahana jaba kīnha mahesā| hiṃya~ haraṣe taba sakala suresā ||
beda maṃtra munibara uccarahīṃ| jaya jaya jaya saṃkara sura karahīṃ ||
bājahiṃ bājana bibidha bidhānā| sumanabṛṣṭi nabha bhai bidhi nānā ||
hara girijā kara bhayau bibāhū| sakala bhuvana bhari rahā uchāhū ||
dāsīṃ dāsa turaga ratha nāgā| dhenu basana mani bastu bibhāgā ||
anna kanakabhājana bhari jānā| dāija dīnha na jāi bakhānā ||

chaṃ. dāija diyo bahu bhā~ti puni kara jori himabhūdhara kahyo|
kā deu~ pūranakāma saṃkara carana paṃkaja gahi rahyo ||
siva~ kṛpāsāgara sasura kara saṃtoṣu saba bhā~tihiṃ kiyo|
puni gahe pada pāthoja mayanā~ prema paripūrana hiyo ||

do. nātha umā mana prāna sama gṛhakiṃkarī karehu|
chamehu sakala aparādha aba hoi prasanna baru dehu || 101 ||

bahu bidhi saṃbhu sāsa samujhāī| gavanī bhavana carana siru nāī ||
jananīṃ umā boli taba līnhī| lai uchaṃga suṃdara sikha dīnhī ||
karehu sadā saṃkara pada pūjā| nāridharamu pati deu na dūjā ||
bacana kahata bhare locana bārī| bahuri lāi ura līnhi kumārī ||
kata bidhi sṛjīṃ nāri jaga māhīṃ| parādhīna sapanehu~ sukhu nāhīṃ ||
bhai ati prema bikala mahatārī| dhīraju kīnha kusamaya bicārī ||
puni puni milati parati gahi caranā| parama prema kachu jāi na baranā ||
saba nārinha mili bheṭi bhavānī| jāi janani ura puni lapaṭānī ||

chaṃ. jananihi bahuri mili calī ucita asīsa saba kāhū~ daīṃ|
phiri phiri bilokati mātu tana taba sakhīṃ lai siva pahiṃ gaī ||
jācaka sakala saṃtoṣi saṃkaru umā sahita bhavana cale|
saba amara haraṣe sumana baraṣi nisāna nabha bāje bhale ||

do. cale saṃga himavaṃtu taba pahu~cāvana ati hetu|
bibidha bhā~ti paritoṣu kari bidā kīnha bṛṣaketu || 102 ||

turata bhavana āe girirāī| sakala saila sara lie bolāī ||
ādara dāna binaya bahumānā| saba kara bidā kīnha himavānā ||
jabahiṃ saṃbhu kailāsahiṃ āe| sura saba nija nija loka sidhāe ||
jagata mātu pitu saṃbhu bhavānī| tehī siṃgāru na kahau~ bakhānī ||
karahiṃ bibidha bidhi bhoga bilāsā| gananha sameta basahiṃ kailāsā ||
hara girijā bihāra nita nayaū| ehi bidhi bipula kāla cali gayaū ||
taba janameu ṣaṭabadana kumārā| tāraku asura samara jehiṃ mārā ||
āgama nigama prasiddha purānā| ṣanmukha janmu sakala jaga jānā ||

chaṃ. jagu jāna ṣanmukha janmu karmu pratāpu puruṣārathu mahā|
tehi hetu maiṃ bṛṣaketu suta kara carita saṃchepahiṃ kahā ||
yaha umā saṃgu bibāhu je nara nāri kahahiṃ je gāvahīṃ|
kalyāna kāja bibāha maṃgala sarbadā sukhu pāvahīṃ ||

do. carita siṃdhu girijā ramana beda na pāvahiṃ pāru|
baranai tulasīdāsu kimi ati matimaṃda gavā~ru || 103 ||

saṃbhu carita suni sarasa suhāvā| bharadvāja muni ati sukha pāvā ||
bahu lālasā kathā para bāṛhī| nayananhi nīru romāvali ṭhāṛhī ||
prema bibasa mukha āva na bānī| dasā dekhi haraṣe muni gyānī ||
aho dhanya tava janmu munīsā| tumhahi prāna sama priya gaurīsā ||
siva pada kamala jinhahi rati nāhīṃ| rāmahi te sapanehu~ na sohāhīṃ ||
binu chala bisvanātha pada nehū| rāma bhagata kara lacchana ehū ||
siva sama ko raghupati bratadhārī| binu agha tajī satī asi nārī ||
panu kari raghupati bhagati dekhāī| ko siva sama rāmahi priya bhāī ||

do. prathamahiṃ mai kahi siva carita būjhā maramu tumhāra|
suci sevaka tumha rāma ke rahita samasta bikāra || 104 ||

maiṃ jānā tumhāra guna sīlā| kahau~ sunahu aba raghupati līlā ||
sunu muni āju samāgama toreṃ| kahi na jāi jasa sukhu mana moreṃ ||
rāma carita ati amita munisā| kahi na sakahiṃ sata koṭi ahīsā ||
tadapi jathāśruta kahau~ bakhānī| sumiri girāpati prabhu dhanupānī ||
sārada dārunāri sama svāmī| rāmu sūtradhara aṃtarajāmī ||
jehi para kṛpā karahiṃ janu jānī| kabi ura ajira nacāvahiṃ bānī ||
pranavau~ soi kṛpāla raghunāthā| baranau~ bisada tāsu guna gāthā ||
parama ramya giribaru kailāsū| sadā jahā~ siva umā nivāsū ||

do. siddha tapodhana jogijana sūra kiṃnara munibṛṃda|
basahiṃ tahā~ sukṛtī sakala sevahiṃ siba sukhakaṃda || 105 ||

hari hara bimukha dharma rati nāhīṃ| te nara taha~ sapanehu~ nahiṃ jāhīṃ ||
tehi giri para baṭa biṭapa bisālā| nita nūtana suṃdara saba kālā ||
tribidha samīra susītali chāyā| siva biśrāma biṭapa śruti gāyā ||
eka bāra tehi tara prabhu gayaū| taru biloki ura ati sukhu bhayaū ||
nija kara ḍāsi nāgaripu chālā| baiṭhai sahajahiṃ saṃbhu kṛpālā ||
kuṃda iṃdu dara gaura sarīrā| bhuja pralaṃba paridhana municīrā ||
taruna aruna aṃbuja sama caranā| nakha duti bhagata hṛdaya tama haranā ||
bhujaga bhūti bhūṣana tripurārī| ānanu sarada caṃda chabi hārī ||

do. jaṭā mukuṭa surasarita sira locana nalina bisāla|
nīlakaṃṭha lāvanyanidhi soha bālabidhu bhāla || 106 ||

baiṭhe soha kāmaripu kaiseṃ| dhareṃ sarīru sāṃtarasu jaiseṃ ||
pārabatī bhala avasaru jānī| gaī saṃbhu pahiṃ mātu bhavānī ||
jāni priyā ādaru ati kīnhā| bāma bhāga āsanu hara dīnhā ||
baiṭhīṃ siva samīpa haraṣāī| pūruba janma kathā cita āī ||
pati hiya~ hetu adhika anumānī| bihasi umā bolīṃ priya bānī ||
kathā jo sakala loka hitakārī| soi pūchana caha sailakumārī ||
bisvanātha mama nātha purārī| tribhuvana mahimā bidita tumhārī ||
cara aru acara nāga nara devā| sakala karahiṃ pada paṃkaja sevā ||

do. prabhu samaratha sarbagya siva sakala kalā guna dhāma ||
joga gyāna bairāgya nidhi pranata kalapataru nāma || 107 ||

jauṃ mo para prasanna sukharāsī| jānia satya mohi nija dāsī ||
tauṃ prabhu harahu mora agyānā| kahi raghunātha kathā bidhi nānā ||
jāsu bhavanu surataru tara hoī| sahi ki daridra janita dukhu soī ||
sasibhūṣana asa hṛdaya~ bicārī| harahu nātha mama mati bhrama bhārī ||
prabhu je muni paramārathabādī| kahahiṃ rāma kahu~ brahma anādī ||
sesa sāradā beda purānā| sakala karahiṃ raghupati guna gānā ||
tumha puni rāma rāma dina rātī| sādara japahu ana~ga ārātī ||
rāmu so avadha nṛpati suta soī| kī aja aguna alakhagati koī ||

do. jauṃ nṛpa tanaya ta brahma kimi nāri biraha~ mati bhori|
dekha carita mahimā sunata bhramati buddhi ati mori || 108 ||

jauṃ anīha byāpaka bibhu koū| kabahu bujhāi nātha mohi soū ||
agya jāni risa ura jani dharahū| jehi bidhi moha miṭai soi karahū ||
mai bana dīkhi rāma prabhutāī| ati bhaya bikala na tumhahi sunāī ||
tadapi malina mana bodhu na āvā| so phalu bhalī bhā~ti hama pāvā ||
ajahū~ kachu saṃsau mana more| karahu kṛpā binavau~ kara joreṃ ||
prabhu taba mohi bahu bhā~ti prabodhā| nātha so samujhi karahu jani krodhā ||
taba kara asa bimoha aba nāhīṃ| rāmakathā para ruci mana māhīṃ ||
kahahu punīta rāma guna gāthā| bhujagarāja bhūṣana suranāthā ||

do. baṃdau pada dhari dharani siru binaya karau~ kara jori|
baranahu raghubara bisada jasu śruti siddhāṃta nicori || 109 ||

jadapi joṣitā nahiṃ adhikārī| dāsī mana krama bacana tumhārī ||
gūṛhau tattva na sādhu durāvahiṃ| ārata adhikārī jaha~ pāvahiṃ ||
ati ārati pūchau~ surarāyā| raghupati kathā kahahu kari dāyā ||
prathama so kārana kahahu bicārī| nirguna brahma saguna bapu dhārī ||
puni prabhu kahahu rāma avatārā| bālacarita puni kahahu udārā ||
kahahu jathā jānakī bibāhīṃ| rāja tajā so dūṣana kāhīṃ ||
bana basi kīnhe carita apārā| kahahu nātha jimi rāvana mārā ||
rāja baiṭhi kīnhīṃ bahu līlā| sakala kahahu saṃkara sukhalīlā ||

do. bahuri kahahu karunāyatana kīnha jo acaraja rāma|
prajā sahita raghubaṃsamani kimi gavane nija dhāma || 110 ||

puni prabhu kahahu so tattva bakhānī| jehiṃ bigyāna magana muni gyānī ||
bhagati gyāna bigyāna birāgā| puni saba baranahu sahita bibhāgā ||
aurau rāma rahasya anekā| kahahu nātha ati bimala bibekā ||
jo prabhu maiṃ pūchā nahi hoī| sou dayāla rākhahu jani goī ||
tumha tribhuvana gura beda bakhānā| āna jīva pā~vara kā jānā ||
prasna umā kai sahaja suhāī| chala bihīna suni siva mana bhāī ||
hara hiya~ rāmacarita saba āe| prema pulaka locana jala chāe ||
śrīraghunātha rūpa ura āvā| paramānaṃda amita sukha pāvā ||

do. magana dhyānarasa daṃḍa juga puni mana bāhera kīnha|
raghupati carita mahesa taba haraṣita baranai līnha || 111 ||

jhūṭheu satya jāhi binu jāneṃ| jimi bhujaṃga binu raju pahicāneṃ ||
jehi jāneṃ jaga jāi herāī| jāgeṃ jathā sapana bhrama jāī ||
baṃdau~ bālarūpa soī rāmū| saba sidhi sulabha japata jisu nāmū ||
maṃgala bhavana amaṃgala hārī| dravau so dasaratha ajira bihārī ||
kari pranāma rāmahi tripurārī| haraṣi sudhā sama girā ucārī ||
dhanya dhanya girirājakumārī| tumha samāna nahiṃ kou upakārī ||
pū~chehu raghupati kathā prasaṃgā| sakala loka jaga pāvani gaṃgā ||
tumha raghubīra carana anurāgī| kīnhahu prasna jagata hita lāgī ||

do. rāmakṛpā teṃ pārabati sapanehu~ tava mana māhiṃ|
soka moha saṃdeha bhrama mama bicāra kachu nāhiṃ || 112 ||

tadapi asaṃkā kīnhihu soī| kahata sunata saba kara hita hoī ||
jinha hari kathā sunī nahiṃ kānā| śravana raṃdhra ahibhavana samānā ||
nayananhi saṃta darasa nahiṃ dekhā| locana morapaṃkha kara lekhā ||
te sira kaṭu tuṃbari samatūlā| je na namata hari gura pada mūlā ||
jinha haribhagati hṛdaya~ nahiṃ ānī| jīvata sava samāna tei prānī ||
jo nahiṃ karai rāma guna gānā| jīha so dādura jīha samānā ||
kulisa kaṭhora niṭhura soi chātī| suni haricarita na jo haraṣātī ||
girijā sunahu rāma kai līlā| sura hita danuja bimohanasīlā ||

do. rāmakathā suradhenu sama sevata saba sukha dāni|
satasamāja suraloka saba ko na sunai asa jāni || 113 ||


rāmakathā suṃdara kara tārī| saṃsaya bihaga uḍāvanihārī ||
rāmakathā kali biṭapa kuṭhārī| sādara sunu girirājakumārī ||
rāma nāma guna carita suhāe| janama karama aganita śruti gāe ||
jathā anaṃta rāma bhagavānā| tathā kathā kīrati guna nānā ||
tadapi jathā śruta jasi mati morī| kahihau~ dekhi prīti ati torī ||
umā prasna tava sahaja suhāī| sukhada saṃtasaṃmata mohi bhāī ||
eka bāta nahi mohi sohānī| jadapi moha basa kahehu bhavānī ||
tuma jo kahā rāma kou ānā| jehi śruti gāva dharahiṃ muni dhyānā ||

do. kahahi sunahi asa adhama nara grase je moha pisāca|
pāṣaṃḍī hari pada bimukha jānahiṃ jhūṭha na sāca || 114 ||

agya akobida aṃdha abhāgī| kāī biṣaya mukara mana lāgī ||
laṃpaṭa kapaṭī kuṭila biseṣī| sapanehu~ saṃtasabhā nahiṃ dekhī ||
kahahiṃ te beda asaṃmata bānī| jinha keṃ sūjha lābhu nahiṃ hānī ||
mukara malina aru nayana bihīnā| rāma rūpa dekhahiṃ kimi dīnā ||
jinha keṃ aguna na saguna bibekā| jalpahiṃ kalpita bacana anekā ||
harimāyā basa jagata bhramāhīṃ| tinhahi kahata kachu aghaṭita nāhīṃ ||
bātula bhūta bibasa matavāre| te nahiṃ bolahiṃ bacana bicāre ||
jinha kṛta mahāmoha mada pānā| tin kara kahā karia nahiṃ kānā ||

so. asa nija hṛdaya~ bicāri taju saṃsaya bhaju rāma pada|
sunu girirāja kumāri bhrama tama rabi kara bacana mama || 115 ||

sagunahi agunahi nahiṃ kachu bhedā| gāvahiṃ muni purāna budha bedā ||
aguna arupa alakha aja joī| bhagata prema basa saguna so hoī ||
jo guna rahita saguna soi kaiseṃ| jalu hima upala bilaga nahiṃ jaiseṃ ||
jāsu nāma bhrama timira pataṃgā| tehi kimi kahia bimoha prasaṃgā ||
rāma saccidānaṃda dinesā| nahiṃ taha~ moha nisā lavalesā ||
sahaja prakāsarupa bhagavānā| nahiṃ taha~ puni bigyāna bihānā ||
haraṣa biṣāda gyāna agyānā| jīva dharma ahamiti abhimānā ||
rāma brahma byāpaka jaga jānā| paramānanda paresa purānā ||

do. puruṣa prasiddha prakāsa nidhi pragaṭa parāvara nātha ||
raghukulamani mama svāmi soi kahi siva~ nāyau mātha || 116 ||

nija bhrama nahiṃ samujhahiṃ agyānī| prabhu para moha dharahiṃ jaṛa prānī ||
jathā gagana ghana paṭala nihārī| jhā~peu mānu kahahiṃ kubicārī ||
citava jo locana aṃguli lāe~| pragaṭa jugala sasi tehi ke bhāe~ ||
umā rāma biṣaika asa mohā| nabha tama dhūma dhūri jimi sohā ||
biṣaya karana sura jīva sametā| sakala eka teṃ eka sacetā ||
saba kara parama prakāsaka joī| rāma anādi avadhapati soī ||
jagata prakāsya prakāsaka rāmū| māyādhīsa gyāna guna dhāmū ||
jāsu satyatā teṃ jaḍa māyā| bhāsa satya iva moha sahāyā ||

do. rajata sīpa mahu~ māsa jimi jathā bhānu kara bāri|
jadapi mṛṣā tihu~ kāla soi bhrama na sakai kou ṭāri || 117 ||

ehi bidhi jaga hari āśrita rahaī| jadapi asatya deta dukha ahaī ||
jauṃ sapaneṃ sira kāṭai koī| binu jāgeṃ na dūri dukha hoī ||
jāsu kṛpā~ asa bhrama miṭi jāī| girijā soi kṛpāla raghurāī ||
ādi aṃta kou jāsu na pāvā| mati anumāni nigama asa gāvā ||
binu pada calai sunai binu kānā| kara binu karama karai bidhi nānā ||
ānana rahita sakala rasa bhogī| binu bānī bakatā baṛa jogī ||
tanu binu parasa nayana binu dekhā| grahai ghrāna binu bāsa aseṣā ||
asi saba bhā~ti alaukika karanī| mahimā jāsu jāi nahiṃ baranī ||

do. jehi imi gāvahi beda budha jāhi dharahiṃ muni dhyāna ||
soi dasaratha suta bhagata hita kosalapati bhagavāna || 118 ||

kāsīṃ marata jaṃtu avalokī| jāsu nāma bala karau~ bisokī ||
soi prabhu mora carācara svāmī| raghubara saba ura aṃtarajāmī ||
bibasahu~ jāsu nāma nara kahahīṃ| janama aneka racita agha dahahīṃ ||
sādara sumirana je nara karahīṃ| bhava bāridhi gopada iva tarahīṃ ||
rāma so paramātamā bhavānī| taha~ bhrama ati abihita tava bānī ||
asa saṃsaya ānata ura māhīṃ| gyāna birāga sakala guna jāhīṃ ||
suni siva ke bhrama bhaṃjana bacanā| miṭi gai saba kutaraka kai racanā ||
bhai raghupati pada prīti pratītī| dāruna asaṃbhāvanā bītī ||

do. puni puni prabhu pada kamala gahi jori paṃkaruha pāni|
bolī girijā bacana bara manahu~ prema rasa sāni || 119 ||

sasi kara sama suni girā tumhārī| miṭā moha saradātapa bhārī ||
tumha kṛpāla sabu saṃsau hareū| rāma svarupa jāni mohi pareū ||
nātha kṛpā~ aba gayau biṣādā| sukhī bhayau~ prabhu carana prasādā ||
aba mohi āpani kiṃkari jānī| jadapi sahaja jaḍa nāri ayānī ||
prathama jo maiṃ pūchā soi kahahū| jauṃ mo para prasanna prabhu ahahū ||
rāma brahma cinamaya abināsī| sarba rahita saba ura pura bāsī ||
nātha dhareu naratanu kehi hetū| mohi samujhāi kahahu bṛṣaketū ||
umā bacana suni parama binītā| rāmakathā para prīti punītā ||

do. hi~ya~ haraṣe kāmāri taba saṃkara sahaja sujāna
bahu bidhi umahi prasaṃsi puni bole kṛpānidhāna || 120(ka) ||

navānhapārāyana,pahalā viśrāma
māsapārāyaṇa, cauthā viśrāma

so. sunu subha kathā bhavāni rāmacaritamānasa bimala|
kahā bhusuṃḍi bakhāni sunā bihaga nāyaka garuḍa || 120(kha) ||

so saṃbāda udāra jehi bidhi bhā āgeṃ kahaba|
sunahu rāma avatāra carita parama suṃdara anagha || 120(ga) ||

hari guna nāma apāra kathā rūpa aganita amita|
maiṃ nija mati anusāra kahau~ umā sādara sunahu || 120(gha ||

sunu girijā haricarita suhāe| bipula bisada nigamāgama gāe ||
hari avatāra hetu jehi hoī| idamitthaṃ kahi jāi na soī ||
rāma atarkya buddhi mana bānī| mata hamāra asa sunahi sayānī ||
tadapi saṃta muni beda purānā| jasa kachu kahahiṃ svamati anumānā ||
tasa maiṃ sumukhi sunāvau~ tohī| samujhi parai jasa kārana mohī ||
jaba jaba hoi dharama kai hānī| bāḍhahiṃ asura adhama abhimānī ||
karahiṃ anīti jāi nahiṃ baranī| sīdahiṃ bipra dhenu sura dharanī ||
taba taba prabhu dhari bibidha sarīrā| harahi kṛpānidhi sajjana pīrā ||

do. asura māri thāpahiṃ suranha rākhahiṃ nija śruti setu|
jaga bistārahiṃ bisada jasa rāma janma kara hetu || 121 ||

soi jasa gāi bhagata bhava tarahīṃ| kṛpāsiṃdhu jana hita tanu dharahīṃ ||
rāma janama ke hetu anekā| parama bicitra eka teṃ ekā ||
janama eka dui kahau~ bakhānī| sāvadhāna sunu sumati bhavānī ||
dvārapāla hari ke priya doū| jaya aru bijaya jāna saba koū ||
bipra śrāpa teṃ dūnau bhāī| tāmasa asura deha tinha pāī ||
kanakakasipu aru hāṭaka locana| jagata bidita surapati mada mocana ||
bijaī samara bīra bikhyātā| dhari barāha bapu eka nipātā ||
hoi narahari dūsara puni mārā| jana prahalāda sujasa bistārā ||

do. bhae nisācara jāi tei mahābīra balavāna|
kuṃbhakarana rāvaṇa subhaṭa sura bijaī jaga jāna || 122 |

mukuta na bhae hate bhagavānā| tīni janama dvija bacana pravānā ||
eka bāra tinha ke hita lāgī| dhareu sarīra bhagata anurāgī ||
kasyapa aditi tahā~ pitu mātā| dasaratha kausalyā bikhyātā ||
eka kalapa ehi bidhi avatārā| caritra pavitra kie saṃsārā ||
eka kalapa sura dekhi dukhāre| samara jalaṃdhara sana saba hāre ||
saṃbhu kīnha saṃgrāma apārā| danuja mahābala marai na mārā ||
parama satī asurādhipa nārī| tehi bala tāhi na jitahiṃ purārī ||

do. chala kari ṭāreu tāsu brata prabhu sura kāraja kīnha ||
jaba tehi jāneu marama taba śrāpa kopa kari dīnha || 123 ||

tāsu śrāpa hari dīnha pramānā| kautukanidhi kṛpāla bhagavānā ||
tahā~ jalaṃdhara rāvana bhayaū| rana hati rāma parama pada dayaū ||
eka janama kara kārana ehā| jehi lāgi rāma dharī naradehā ||
prati avatāra kathā prabhu kerī| sunu muni baranī kabinha ghanerī ||
nārada śrāpa dīnha eka bārā| kalapa eka tehi lagi avatārā ||
girijā cakita bhaī suni bānī| nārada biṣnubhagata puni gyāni ||
kārana kavana śrāpa muni dīnhā| kā aparādha ramāpati kīnhā ||
yaha prasaṃga mohi kahahu purārī| muni mana moha ācaraja bhārī ||

do. bole bihasi mahesa taba gyānī mūṛha na koi|
jehi jasa raghupati karahiṃ jaba so tasa tehi chana hoi || 124(ka) ||

so. kahau~ rāma guna gātha bharadvāja sādara sunahu|
bhava bhaṃjana raghunātha bhaju tulasī taji māna mada || 124(kha) ||

himagiri guhā eka ati pāvani| baha samīpa surasarī suhāvani ||
āśrama parama punīta suhāvā| dekhi devariṣi mana ati bhāvā ||
nirakhi saila sari bipina bibhāgā| bhayau ramāpati pada anurāgā ||
sumirata harihi śrāpa gati bādhī| sahaja bimala mana lāgi samādhī ||
muni gati dekhi suresa ḍerānā| kāmahi boli kīnha samānā ||
sahita sahāya jāhu mama hetū| cakeu haraṣi hiya~ jalacaraketū ||
sunāsīra mana mahu~ asi trāsā| cahata devariṣi mama pura bāsā ||
je kāmī lolupa jaga māhīṃ| kuṭila kāka iva sabahi ḍerāhīṃ ||

do. sukha hāṛa lai bhāga saṭha svāna nirakhi mṛgarāja|
chīni lei jani jāna jaṛa timi surapatihi na lāja || 125 ||

tehi āśramahiṃ madana jaba gayaū| nija māyā~ basaṃta niramayaū ||
kusumita bibidha biṭapa bahuraṃgā| kūjahiṃ kokila guṃjahi bhṛṃgā ||
calī suhāvani tribidha bayārī| kāma kṛsānu baṛhāvanihārī ||
raṃbhādika suranāri nabīnā | sakala asamasara kalā prabīnā ||
karahiṃ gāna bahu tāna taraṃgā| bahubidhi krīṛahi pāni pataṃgā ||
dekhi sahāya madana haraṣānā| kīnhesi puni prapaṃca bidhi nānā ||
kāma kalā kachu munihi na byāpī| nija bhaya~ ḍareu manobhava pāpī ||
sīma ki cā~pi sakai kou tāsu| baṛa rakhavāra ramāpati jāsū ||

do. sahita sahāya sabhīta ati māni hāri mana maina|
gahesi jāi muni carana taba kahi suṭhi ārata baina || 126 ||

bhayau na nārada mana kachu roṣā| kahi priya bacana kāma paritoṣā ||
nāi carana siru āyasu pāī| gayau madana taba sahita sahāī ||
muni susīlatā āpani karanī| surapati sabhā~ jāi saba baranī ||
suni saba keṃ mana acaraju āvā| munihi prasaṃsi harihi siru nāvā ||
taba nārada gavane siva pāhīṃ| jitā kāma ahamiti mana māhīṃ ||
māra carita saṃkarahiṃ sunāe| atipriya jāni mahesa sikhāe ||
bāra bāra binavau~ muni tohīṃ| jimi yaha kathā sunāyahu mohīṃ ||
timi jani harihi sunāvahu kabahū~| calehu~ prasaṃga durāeḍu tabahū~ ||

do. saṃbhu dīnha upadesa hita nahiṃ nāradahi sohāna|
bhāradvāja kautuka sunahu hari icchā balavāna || 127 ||

rāma kīnha cāhahiṃ soi hoī| karai anyathā asa nahiṃ koī ||
saṃbhu bacana muni mana nahiṃ bhāe| taba biraṃci ke loka sidhāe ||
eka bāra karatala bara bīnā| gāvata hari guna gāna prabīnā ||
chīrasiṃdhu gavane munināthā| jaha~ basa śrīnivāsa śrutimāthā ||
haraṣi mile uṭhi ramāniketā| baiṭhe āsana riṣihi sametā ||
bole bihasi carācara rāyā| bahute dinana kīnhi muni dāyā ||
kāma carita nārada saba bhāṣe| jadyapi prathama baraji siva~ rākhe ||
ati pracaṃḍa raghupati kai māyā| jehi na moha asa ko jaga jāyā ||

do. rūkha badana kari bacana mṛdu bole śrībhagavāna |
tumhare sumirana teṃ miṭahiṃ moha māra mada māna || 128 ||

sunu muni moha hoi mana tākeṃ| gyāna birāga hṛdaya nahiṃ jāke ||
brahmacaraja brata rata matidhīrā| tumhahi ki karai manobhava pīrā ||
nārada kaheu sahita abhimānā| kṛpā tumhāri sakala bhagavānā ||
karunānidhi mana dīkha bicārī| ura aṃkureu garaba taru bhārī ||
begi so mai ḍārihau~ ukhārī| pana hamāra sevaka hitakārī ||
muni kara hita mama kautuka hoī| avasi upāya karabi mai soī ||
taba nārada hari pada sira nāī| cale hṛdaya~ ahamiti adhikāī ||
śrīpati nija māyā taba prerī| sunahu kaṭhina karanī tehi kerī ||

do. biraceu maga mahu~ nagara tehiṃ sata jojana bistāra|
śrīnivāsapura teṃ adhika racanā bibidha prakāra || 129 ||

basahiṃ nagara suṃdara nara nārī| janu bahu manasija rati tanudhārī ||
tehiṃ pura basai sīlanidhi rājā| aganita haya gaya sena samājā ||
sata suresa sama bibhava bilāsā| rūpa teja bala nīti nivāsā ||
bisvamohanī tāsu kumārī| śrī bimoha jisu rūpu nihārī ||
soi harimāyā saba guna khānī| sobhā tāsu ki jāi bakhānī ||
karai svayaṃbara so nṛpabālā| āe taha~ aganita mahipālā ||
muni kautukī nagara tehiṃ gayaū| purabāsiṃha saba pūchata bhayaū ||
suni saba carita bhūpagṛha~ āe| kari pūjā nṛpa muni baiṭhāe ||

do. āni dekhāī nāradahi bhūpati rājakumāri|
kahahu nātha guna doṣa saba ehi ke hṛdaya~ bicāri || 130 ||

dekhi rūpa muni birati bisārī| baṛī bāra lagi rahe nihārī ||
lacchana tāsu biloki bhulāne| hṛdaya~ haraṣa nahiṃ pragaṭa bakhāne ||
jo ehi barai amara soi hoī| samarabhūmi tehi jīta na koī ||
sevahiṃ sakala carācara tāhī| barai sīlanidhi kanyā jāhī ||
lacchana saba bicāri ura rākhe| kachuka banāi bhūpa sana bhāṣe ||
sutā sulacchana kahi nṛpa pāhīṃ| nārada cale soca mana māhīṃ ||
karauṃ jāi soi jatana bicārī| jehi prakāra mohi barai kumārī ||
japa tapa kachu na hoi tehi kālā| he bidhi milai kavana bidhi bālā ||

do. ehi avasara cāhia parama sobhā rūpa bisāla|
jo biloki rījhai kua~ri taba melai jayamāla || 131 ||

hari sana māgauṃ suṃdaratāī| hoihi jāta gaharu ati bhāī ||
moreṃ hita hari sama nahiṃ koū| ehi avasara sahāya soi hoū ||
bahubidhi binaya kīnhi tehi kālā| pragaṭeu prabhu kautukī kṛpālā ||
prabhu biloki muni nayana juṛāne| hoihi kāju hie~ haraṣāne ||
ati ārati kahi kathā sunāī| karahu kṛpā kari hohu sahāī ||
āpana rūpa dehu prabhu mohī| āna bhā~ti nahiṃ pāvauṃ ohī ||
jehi bidhi nātha hoi hita morā| karahu so begi dāsa maiṃ torā ||
nija māyā bala dekhi bisālā| hiya~ ha~si bole dīnadayālā ||

do. jehi bidhi hoihi parama hita nārada sunahu tumhāra|
soi hama karaba na āna kachu bacana na mṛṣā hamāra || 132 ||

kupatha māga ruja byākula rogī| baida na dei sunahu muni jogī ||
ehi bidhi hita tumhāra maiṃ ṭhayaū| kahi asa aṃtarahita prabhu bhayaū ||
māyā bibasa bhae muni mūṛhā| samujhī nahiṃ hari girā nigūṛhā ||
gavane turata tahā~ riṣirāī| jahā~ svayaṃbara bhūmi banāī ||
nija nija āsana baiṭhe rājā| bahu banāva kari sahita samājā ||
muni mana haraṣa rūpa ati moreṃ| mohi taji ānahi bārihi na bhoreṃ ||
muni hita kārana kṛpānidhānā| dīnha kurūpa na jāi bakhānā ||
so caritra lakhi kāhu~ na pāvā| nārada jāni sabahiṃ sira nāvā ||


do. rahe tahā~ dui rudra gana te jānahiṃ saba bheu|
biprabeṣa dekhata phirahiṃ parama kautukī teu || 133 ||

jeṃhi samāja baiṃṭhe muni jāī| hṛdaya~ rūpa ahamiti adhikāī ||
taha~ baiṭha mahesa gana doū| biprabeṣa gati lakhai na koū ||
karahiṃ kūṭi nāradahi sunāī| nīki dīnhi hari suṃdaratāī ||
rījhahi rājakua~ri chabi dekhī| inhahi barihi hari jāni biseṣī ||
munihi moha mana hātha parāe~| ha~sahiṃ saṃbhu gana ati sacu pāe~ ||
jadapi sunahiṃ muni aṭapaṭi bānī| samujhi na parai buddhi bhrama sānī ||
kāhu~ na lakhā so carita biseṣā| so sarūpa nṛpakanyā~ dekhā ||
markaṭa badana bhayaṃkara dehī| dekhata hṛdaya~ krodha bhā tehī ||

do. sakhīṃ saṃga lai kua~ri taba cali janu rājamarāla|
dekhata phirai mahīpa saba kara saroja jayamāla || 134 ||

jehi disi baiṭhe nārada phūlī| so disi dehi na bilokī bhūlī ||
puni puni muni ukasahiṃ akulāhīṃ| dekhi dasā hara gana musakāhīṃ ||
dhari nṛpatanu taha~ gayau kṛpālā| kua~ri haraṣi meleu jayamālā ||
dulahini lai ge lacchinivāsā| nṛpasamāja saba bhayau nirāsā ||
muni ati bikala moṃha~ mati nāṭhī| mani giri gaī chūṭi janu gā~ṭhī ||
taba hara gana bole musukāī| nija mukha mukura bilokahu jāī ||
asa kahi dou bhāge bhaya~ bhārī| badana dīkha muni bāri nihārī ||
beṣu biloki krodha ati bāṛhā| tinhahi sarāpa dīnha ati gāṛhā ||

do. hohu nisācara jāi tumha kapaṭī pāpī dou|
ha~sehu hamahi so lehu phala bahuri ha~sehu muni kou || 135 ||

puni jala dīkha rūpa nija pāvā| tadapi hṛdaya~ saṃtoṣa na āvā ||
pharakata adhara kopa mana māhīṃ| sapadī cale kamalāpati pāhīṃ ||
dehau~ śrāpa ki marihau~ jāī| jagata mora upahāsa karāī ||
bīcahiṃ paṃtha mile danujārī| saṃga ramā soi rājakumārī ||
bole madhura bacana surasāīṃ| muni kaha~ cale bikala kī nāīṃ ||
sunata bacana upajā ati krodhā| māyā basa na rahā mana bodhā ||
para saṃpadā sakahu nahiṃ dekhī| tumhareṃ iriṣā kapaṭa biseṣī ||
mathata siṃdhu rudrahi baurāyahu| suranha prerī biṣa pāna karāyahu ||

do. asura surā biṣa saṃkarahi āpu ramā mani cāru|
svāratha sādhaka kuṭila tumha sadā kapaṭa byavahāru || 136 ||

parama svataṃtra na sira para koī| bhāvai manahi karahu tumha soī ||
bhalehi maṃda maṃdehi bhala karahū| bisamaya haraṣa na hiya~ kachu dharahū ||
ḍahaki ḍahaki paricehu saba kāhū| ati asaṃka mana sadā uchāhū ||
karama subhāsubha tumhahi na bādhā| aba lagi tumhahi na kāhū~ sādhā ||
bhale bhavana aba bāyana dīnhā| pāvahuge phala āpana kīnhā ||
baṃcehu mohi javani dhari dehā| soi tanu dharahu śrāpa mama ehā ||
kapi ākṛti tumha kīnhi hamārī| karihahiṃ kīsa sahāya tumhārī ||
mama apakāra kīnhī tumha bhārī| nārī biraha~ tumha hoba dukhārī ||

do. śrāpa sīsa dharī haraṣi hiya~ prabhu bahu binatī kīnhi|
nija māyā kai prabalatā karaṣi kṛpānidhi līnhi || 137 ||

jaba hari māyā dūri nivārī| nahiṃ taha~ ramā na rājakumārī ||
taba muni ati sabhīta hari caranā| gahe pāhi pranatārati haranā ||
mṛṣā hou mama śrāpa kṛpālā| mama icchā kaha dīnadayālā ||
maiṃ durbacana kahe bahutere| kaha muni pāpa miṭihiṃ kimi mere ||
japahu jāi saṃkara sata nāmā| hoihi hṛdaya~ turaṃta biśrāmā ||
kou nahiṃ siva samāna priya moreṃ| asi paratīti tajahu jani bhoreṃ ||
jehi para kṛpā na karahiṃ purārī| so na pāva muni bhagati hamārī ||
asa ura dhari mahi bicarahu jāī| aba na tumhahi māyā niarāī ||

do. bahubidhi munihi prabodhi prabhu taba bhae aṃtaradhāna ||
satyaloka nārada cale karata rāma guna gāna || 138 ||

hara gana munihi jāta patha dekhī| bigatamoha mana haraṣa biseṣī ||
ati sabhīta nārada pahiṃ āe| gahi pada ārata bacana sunāe ||
hara gana hama na bipra munirāyā| baṛa aparādha kīnha phala pāyā ||
śrāpa anugraha karahu kṛpālā| bole nārada dīnadayālā ||
nisicara jāi hohu tumha doū| baibhava bipula teja bala hoū ||
bhujabala bisva jitaba tumha jahiā| dharihahiṃ biṣnu manuja tanu tahiā|
samara marana hari hātha tumhārā| hoihahu mukuta na puni saṃsārā ||
cale jugala muni pada sira nāī| bhae nisācara kālahi pāī ||

do. eka kalapa ehi hetu prabhu līnha manuja avatāra|
sura raṃjana sajjana sukhada hari bhaṃjana bhubi bhāra || 139 ||

ehi bidhi janama karama hari kere| suṃdara sukhada bicitra ghanere ||
kalapa kalapa prati prabhu avatarahīṃ| cāru carita nānābidhi karahīṃ ||
taba taba kathā munīsanha gāī| parama punīta prabaṃdha banāī ||
bibidha prasaṃga anūpa bakhāne| karahiṃ na suni ācaraju sayāne ||
hari anaṃta harikathā anaṃtā| kahahiṃ sunahiṃ bahubidhi saba saṃtā ||
rāmacaṃdra ke carita suhāe| kalapa koṭi lagi jāhiṃ na gāe ||
yaha prasaṃga maiṃ kahā bhavānī| harimāyā~ mohahiṃ muni gyānī ||
prabhu kautukī pranata hitakārī || sevata sulabha sakala dukha hārī ||

so. sura nara muni kou nāhiṃ jehi na moha māyā prabala ||
asa bicāri mana māhiṃ bhajia mahāmāyā patihi || 140 ||

apara hetu sunu sailakumārī| kahau~ bicitra kathā bistārī ||
jehi kārana aja aguna arūpā| brahma bhayau kosalapura bhūpā ||
jo prabhu bipina phirata tumha dekhā| baṃdhu sameta dhareṃ munibeṣā ||
jāsu carita avaloki bhavānī| satī sarīra rahihu baurānī ||
ajahu~ na chāyā miṭati tumhārī| tāsu carita sunu bhrama ruja hārī ||
līlā kīnhi jo tehiṃ avatārā| so saba kahihau~ mati anusārā ||
bharadvāja suni saṃkara bānī| sakuci saprema umā musakānī ||
lage bahuri barane bṛṣaketū| so avatāra bhayau jehi hetū ||

do. so maiṃ tumha sana kahau~ sabu sunu munīsa mana lāī ||
rāma kathā kali mala harani maṃgala karani suhāi || 141 ||

svāyaṃbhū manu aru satarūpā| jinha teṃ bhai narasṛṣṭi anūpā ||
daṃpati dharama ācarana nīkā| ajahu~ gāva śruti jinha kai līkā ||
nṛpa uttānapāda suta tāsū| dhruva hari bhagata bhayau suta jāsū ||
laghu suta nāma priyrabrata tāhī| beda purāna prasaṃsahi jāhī ||
devahūti puni tāsu kumārī| jo muni kardama kai priya nārī ||
ādideva prabhu dīnadayālā| jaṭhara dhareu jehiṃ kapila kṛpālā ||
sāṃkhya sāstra jinha pragaṭa bakhānā| tattva bicāra nipuna bhagavānā ||
tehiṃ manu rāja kīnha bahu kālā| prabhu āyasu saba bidhi pratipālā ||

so. hoi na biṣaya birāga bhavana basata bhā cauthapana|
hṛdaya~ bahuta dukha lāga janama gayau haribhagati binu || 142 ||

barabasa rāja sutahi taba dīnhā| nāri sameta gavana bana kīnhā ||
tīratha bara naimiṣa bikhyātā| ati punīta sādhaka sidhi dātā ||
basahiṃ tahā~ muni siddha samājā| taha~ hiya~ haraṣi caleu manu rājā ||
paṃtha jāta sohahiṃ matidhīrā| gyāna bhagati janu dhareṃ sarīrā ||
pahu~ce jāi dhenumati tīrā| haraṣi nahāne niramala nīrā ||
āe milana siddha muni gyānī| dharama dhuraṃdhara nṛpariṣi jānī ||
jaha~ ja~ha tīratha rahe suhāe| muninha sakala sādara karavāe ||
kṛsa sarīra munipaṭa paridhānā| sata samāja nita sunahiṃ purānā |

do. dvādasa acchara maṃtra puni japahiṃ sahita anurāga|
bāsudeva pada paṃkaruha daṃpati mana ati lāga || 143 ||

karahiṃ ahāra sāka phala kaṃdā| sumirahiṃ brahma saccidānaṃdā ||
puni hari hetu karana tapa lāge| bāri adhāra mūla phala tyāge ||
ura abhilāṣa niṃraṃtara hoī| dekhā nayana parama prabhu soī ||
aguna akhaṃḍa anaṃta anādī| jehi ciṃtahiṃ paramārathabādī ||
neti neti jehi beda nirūpā| nijānaṃda nirupādhi anūpā ||
saṃbhu biraṃci biṣnu bhagavānā| upajahiṃ jāsu aṃsa teṃ nānā ||
aiseu prabhu sevaka basa ahaī| bhagata hetu līlātanu gahaī ||
jauṃ yaha bacana satya śruti bhāṣā| tau hamāra pūjahi abhilāṣā ||

do. ehi bidhi bīteṃ baraṣa ṣaṭa sahasa bāri āhāra|
saṃbata sapta sahasra puni rahe samīra adhāra || 144 ||

baraṣa sahasa dasa tyāgeu soū| ṭhāṛhe rahe eka pada doū ||
bidhi hari tapa dekhi apārā| manu samīpa āe bahu bārā ||
māgahu bara bahu bhā~ti lobhāe| parama dhīra nahiṃ calahiṃ calāe ||
asthimātra hoi rahe sarīrā| tadapi manāga manahiṃ nahiṃ pīrā ||
prabhu sarbagya dāsa nija jānī| gati ananya tāpasa nṛpa rānī ||
māgu māgu baru bhai nabha bānī| parama gabhīra kṛpāmṛta sānī ||
mṛtaka jiāvani girā suhāī| śrabana raṃdhra hoi ura jaba āī ||
hraṣṭapuṣṭa tana bhae suhāe| mānahu~ abahiṃ bhavana te āe ||

do. śravana sudhā sama bacana suni pulaka praphullita gāta|
bole manu kari daṃḍavata prema na hṛdaya~ samāta || 145 ||

sunu sevaka surataru suradhenu| bidhi hari hara baṃdita pada renū ||
sevata sulabha sakala sukha dāyaka| pranatapāla sacarācara nāyaka ||
jauṃ anātha hita hama para nehū| tau prasanna hoi yaha bara dehū ||
jo sarūpa basa siva mana māhīṃ| jehi kārana muni jatana karāhīṃ ||
jo bhusuṃḍi mana mānasa haṃsā| saguna aguna jehi nigama prasaṃsā ||
dekhahiṃ hama so rūpa bhari locana| kṛpā karahu pranatārati mocana ||
daṃpati bacana parama priya lāge| mudula binīta prema rasa pāge ||
bhagata bachala prabhu kṛpānidhānā| bisvabāsa pragaṭe bhagavānā ||

do. nīla saroruha nīla mani nīla nīradhara syāma|
lājahiṃ tana sobhā nirakhi koṭi koṭi sata kāma || 146 ||

sarada mayaṃka badana chabi sīṃvā| cāru kapola cibuka dara grīvā ||
adhara aruna rada suṃdara nāsā| bidhu kara nikara biniṃdaka hāsā ||
nava abuṃja aṃbaka chabi nīkī| citavani lalita bhāva~tī jī kī ||
bhukuṭi manoja cāpa chabi hārī| tilaka lalāṭa paṭala dutikārī ||
kuṃḍala makara mukuṭa sira bhrājā| kuṭila kesa janu madhupa samājā ||
ura śrībatsa rucira banamālā| padika hāra bhūṣana manijālā ||
kehari kaṃdhara cāru janeu| bāhu bibhūṣana suṃdara teū ||
kari kara sari subhaga bhujadaṃḍā| kaṭi niṣaṃga kara sara kodaṃḍā ||

do. taḍita biniṃdaka pīta paṭa udara rekha bara tīni ||
nābhi manohara leti janu jamuna bhava~ra chabi chīni || 147 ||

pada rājīva barani nahi jāhīṃ| muni mana madhupa basahiṃ jenha māhīṃ ||
bāma bhāga sobhati anukūlā| ādisakti chabinidhi jagamūlā ||
jāsu aṃsa upajahiṃ gunakhānī| aganita lacchi umā brahmānī ||
bhṛkuṭi bilāsa jāsu jaga hoī| rāma bāma disi sītā soī ||
chabisamudra hari rūpa bilokī| ekaṭaka rahe nayana paṭa rokī ||
citavahiṃ sādara rūpa anūpā| tṛpti na mānahiṃ manu satarūpā ||
haraṣa bibasa tana dasā bhulānī| pare daṃḍa iva gahi pada pānī ||
sira parase prabhu nija kara kaṃjā| turata uṭhāe karunāpuṃjā ||

do. bole kṛpānidhāna puni ati prasanna mohi jāni|
māgahu bara joi bhāva mana mahādāni anumāni || 148 ||

suni prabhu bacana jori juga pānī| dhari dhīraju bolī mṛdu bānī ||
nātha dekhi pada kamala tumhāre| aba pūre saba kāma hamāre ||
eka lālasā baṛi ura māhī| sugama agama kahi jāta so nāhīṃ ||
tumhahi deta ati sugama gosāīṃ| agama lāga mohi nija kṛpanāīṃ ||
jathā daridra bibudhataru pāī| bahu saṃpati māgata sakucāī ||
tāsu prabhā jāna nahiṃ soī| tathā hṛdaya~ mama saṃsaya hoī ||
so tumha jānahu aṃtarajāmī| puravahu mora manoratha svāmī ||
sakuca bihāi māgu nṛpa mohi| moreṃ nahiṃ adeya kachu tohī ||

do. dāni siromani kṛpānidhi nātha kahau~ satibhāu ||
cāhau~ tumhahi samāna suta prabhu sana kavana durāu || 149 ||

dekhi prīti suni bacana amole| evamastu karunānidhi bole ||
āpu sarisa khojauṃ kaha~ jāī| nṛpa tava tanaya hoba maiṃ āī ||
satarūpahi biloki kara joreṃ| debi māgu baru jo ruci tore ||
jo baru nātha catura nṛpa māgā| soi kṛpāla mohi ati priya lāgā ||
prabhu paraṃtu suṭhi hoti ḍhiṭhāī| jadapi bhagata hita tumhahi sohāī ||
tumha brahmādi janaka jaga svāmī| brahma sakala ura aṃtarajāmī ||
asa samujhata mana saṃsaya hoī| kahā jo prabhu pravāna puni soī ||
je nija bhagata nātha tava ahahīṃ| jo sukha pāvahiṃ jo gati lahahīṃ ||

do. soi sukha soi gati soi bhagati soi nija carana sanehu ||
soi bibeka soi rahani prabhu hamahi kṛpā kari dehu || 150 ||

sunu mṛdu gūṛha rucira bara racanā| kṛpāsiṃdhu bole mṛdu bacanā ||
jo kachu ruci tumhera mana māhīṃ| maiṃ so dīnha saba saṃsaya nāhīṃ ||
mātu bibeka alokika toreṃ| kabahu~ na miṭihi anugraha moreṃ |
baṃdi carana manu kaheu bahorī| avara eka binati prabhu morī ||
suta biṣaika tava pada rati hoū| mohi baṛa mūṛha kahai kina koū ||
mani binu phani jimi jala binu mīnā| mama jīvana timi tumhahi adhīnā ||
asa baru māgi carana gahi raheū| evamastu karunānidhi kaheū ||
aba tumha mama anusāsana mānī| basahu jāi surapati rajadhānī ||

so. taha~ kari bhoga bisāla tāta gau~ kachu kāla puni|
hoihahu avadha bhuāla taba maiṃ hoba tumhāra suta || 151 ||

icchāmaya narabeṣa sa~vāreṃ| hoihau~ pragaṭa niketa tumhāre ||
aṃsanha sahita deha dhari tātā| karihau~ carita bhagata sukhadātā ||
je suni sādara nara baṛabhāgī| bhava tarihahiṃ mamatā mada tyāgī ||
ādisakti jehiṃ jaga upajāyā| sou avatarihi mori yaha māyā ||
purauba maiṃ abhilāṣa tumhārā| satya satya pana satya hamārā ||
puni puni asa kahi kṛpānidhānā| aṃtaradhāna bhae bhagavānā ||
daṃpati ura dhari bhagata kṛpālā| tehiṃ āśrama nivase kachu kālā ||
samaya pāi tanu taji anayāsā| jāi kīnha amarāvati bāsā ||

do. yaha itihāsa punīta ati umahi kahī bṛṣaketu|
bharadvāja sunu apara puni rāma janama kara hetu || 152 ||

māsapārāyaṇa,pā~cavā~ viśrāma

sunu muni kathā punīta purānī| jo girijā prati saṃbhu bakhānī ||
bisva bidita eka kaikaya desū| satyaketu taha~ basai naresū ||
dharama dhuraṃdhara nīti nidhānā| teja pratāpa sīla balavānā ||
tehi keṃ bhae jugala suta bīrā| saba guna dhāma mahā ranadhīrā ||

rāja dhanī jo jeṭha suta āhī| nāma pratāpabhānu asa tāhī ||
apara sutahi arimardana nāmā| bhujabala atula acala saṃgrāmā ||
bhāihi bhāihi parama samītī| sakala doṣa chala barajita prītī ||
jeṭhe sutahi rāja nṛpa dīnhā| hari hita āpu gavana bana kīnhā ||

do. jaba pratāparabi bhayau nṛpa phirī dohāī desa|
prajā pāla ati bedabidhi katahu~ nahīṃ agha lesa || 153 ||

nṛpa hitakāraka saciva sayānā| nāma dharamaruci sukra samānā ||
saciva sayāna baṃdhu balabīrā| āpu pratāpapuṃja ranadhīrā ||
sena saṃga caturaṃga apārā| amita subhaṭa saba samara jujhārā ||
sena biloki rāu haraṣānā| aru bāje gahagahe nisānā ||
bijaya hetu kaṭakaī banāī| sudina sādhi nṛpa caleu bajāī ||
ja~ha taha~ parīṃ aneka larāīṃ| jīte sakala bhūpa bariāī ||
sapta dīpa bhujabala basa kīnhe| lai lai daṃḍa chāṛi nṛpa dīnheṃ ||
sakala avani maṃḍala tehi kālā| eka pratāpabhānu mahipālā ||

do. svabasa bisva kari bāhubala nija pura kīnha prabesu|
aratha dharama kāmādi sukha sevai samaya~ naresu || 154 ||

bhūpa pratāpabhānu bala pāī| kāmadhenu bhai bhūmi suhāī ||
saba dukha barajita prajā sukhārī| dharamasīla suṃdara nara nārī ||
saciva dharamaruci hari pada prītī| nṛpa hita hetu sikhava nita nītī ||
gura sura saṃta pitara mahidevā| karai sadā nṛpa saba kai sevā ||
bhūpa dharama je beda bakhāne| sakala karai sādara sukha māne ||
dina prati deha bibidha bidhi dānā| sunahu sāstra bara beda purānā ||
nānā bāpīṃ kūpa taṛāgā| sumana bāṭikā suṃdara bāgā ||
biprabhavana surabhavana suhāe| saba tīrathanha bicitra banāe ||

do. ja~ha lagi kahe purāna śruti eka eka saba jāga|
bāra sahasra sahasra nṛpa kie sahita anurāga || 155 ||

hṛdaya~ na kachu phala anusaṃdhānā| bhūpa bibekī parama sujānā ||
karai je dharama karama mana bānī| bāsudeva arpita nṛpa gyānī ||
caṛhi bara bāji bāra eka rājā| mṛgayā kara saba sāji samājā ||
biṃdhyācala gabhīra bana gayaū| mṛga punīta bahu mārata bhayaū ||
phirata bipina nṛpa dīkha barāhū| janu bana dureu sasihi grasi rāhū ||
baṛa bidhu nahi samāta mukha māhīṃ| manahu~ krodhabasa ugilata nāhīṃ ||
kola karāla dasana chabi gāī| tanu bisāla pīvara adhikāī ||
ghurughurāta haya ārau pāe~| cakita bilokata kāna uṭhāe~ ||

do. nīla mahīdhara sikhara sama dekhi bisāla barāhu|
capari caleu haya suṭuki nṛpa hā~ki na hoi nibāhu || 156 ||

āvata dekhi adhika rava bājī| caleu barāha maruta gati bhājī ||
turata kīnha nṛpa sara saṃdhānā| mahi mili gayau bilokata bānā ||
taki taki tīra mahīsa calāvā| kari chala suara sarīra bacāvā ||
pragaṭata durata jāi mṛga bhāgā| risa basa bhūpa caleu saṃga lāgā ||
gayau dūri ghana gahana barāhū| jaha~ nāhina gaja bāji nibāhū ||
ati akela bana bipula kalesū| tadapi na mṛga maga tajai naresū ||
kola biloki bhūpa baṛa dhīrā| bhāgi paiṭha giriguhā~ gabhīrā ||
agama dekhi nṛpa ati pachitāī| phireu mahābana pareu bhulāī ||

do. kheda khinna chuddhita tṛṣita rājā bāji sameta|
khojata byākula sarita sara jala binu bhayau aceta || 157 ||

phirata bipina āśrama eka dekhā| taha~ basa nṛpati kapaṭa munibeṣā ||
jāsu desa nṛpa līnha chaṛāī| samara sena taji gayau parāī ||
samaya pratāpabhānu kara jānī| āpana ati asamaya anumānī ||
gayau na gṛha mana bahuta galānī| milā na rājahi nṛpa abhimānī ||
risa ura māri raṃka jimi rājā| bipina basai tāpasa keṃ sājā ||
tāsu samīpa gavana nṛpa kīnhā| yaha pratāparabi tehi taba cīnhā ||
rāu tṛṣita nahi so pahicānā| dekhi subeṣa mahāmuni jānā ||
utari turaga teṃ kīnha pranāmā| parama catura na kaheu nija nāmā ||
do0 bhūpati tṛṣita biloki tehiṃ sarabaru dīnha dekhāi|

majjana pāna sameta haya kīnha nṛpati haraṣāi || 158 ||

gai śrama sakala sukhī nṛpa bhayaū| nija āśrama tāpasa lai gayaū ||
āsana dīnha asta rabi jānī| puni tāpasa boleu mṛdu bānī ||
ko tumha kasa bana phirahu akeleṃ| suṃdara jubā jīva paraheleṃ ||
cakrabarti ke lacchana toreṃ| dekhata dayā lāgi ati moreṃ ||
nāma pratāpabhānu avanīsā| tāsu saciva maiṃ sunahu munīsā ||
phirata ahereṃ pareu~ bhulāī| baḍe bhāga dekhau~ pada āī ||
hama kaha~ durlabha darasa tumhārā| jānata hauṃ kachu bhala honihārā ||
kaha muni tāta bhayau a~dhiyārā| jojana sattari nagaru tumhārā ||

do. nisā ghora gambhīra bana paṃtha na sunahu sujāna|
basahu āju asa jāni tumha jāehu hota bihāna || 159(ka) ||

tulasī jasi bhavatabyatā taisī milai sahāi|
āpunu āvai tāhi pahiṃ tāhi tahā~ lai jāi || 159(kha) ||

bhalehiṃ nātha āyasu dhari sīsā| bā~dhi turaga taru baiṭha mahīsā ||
nṛpa bahu bhāti prasaṃseu tāhī| carana baṃdi nija bhāgya sarāhī ||
puni bole mṛdu girā suhāī| jāni pitā prabhu karau~ ḍhiṭhāī ||
mohi munisa suta sevaka jānī| nātha nāma nija kahahu bakhānī ||
tehi na jāna nṛpa nṛpahi so jānā| bhūpa suhrada so kapaṭa sayānā ||
bairī puni chatrī puni rājā| chala bala kīnha cahai nija kājā ||
samujhi rājasukha dukhita arātī| avā~ anala iva sulagai chātī ||
sarala bacana nṛpa ke suni kānā| bayara sa~bhāri hṛdaya~ haraṣānā ||


do. kapaṭa bori bānī mṛdula boleu juguti sameta|
nāma hamāra bhikhāri aba nirdhana rahita niketi || 160 ||

kaha nṛpa je bigyāna nidhānā| tumha sārikhe galita abhimānā ||
sadā rahahi apanapau durāe~| saba bidhi kusala kubeṣa banāe~ ||
tehi teṃ kahahi saṃta śruti ṭereṃ| parama akiṃcana priya hari kereṃ ||
tumha sama adhana bhikhāri agehā| hota biraṃci sivahi saṃdehā ||
josi sosi tava carana namāmī| mo para kṛpā karia aba svāmī ||
sahaja prīti bhūpati kai dekhī| āpu biṣaya bisvāsa biseṣī ||
saba prakāra rājahi apanāī| boleu adhika saneha janāī ||
sunu satibhāu kahau~ mahipālā| ihā~ basata bīte bahu kālā ||

do. aba lagi mohi na mileu kou maiṃ na janāvau~ kāhu|
lokamānyatā anala sama kara tapa kānana dāhu || 161(ka) ||

so. tulasī dekhi subeṣu bhūlahiṃ mūṛha na catura nara|
suṃdara kekihi pekhu bacana sudhā sama asana ahi || 161(kha)

tāteṃ guputa rahau~ jaga māhīṃ| hari taji kimapi prayojana nāhīṃ ||
prabhu jānata saba binahiṃ janāe~| kahahu kavani sidhi loka rijhāe~ ||
tumha suci sumati parama priya moreṃ| prīti pratīti mohi para toreṃ ||
aba jauṃ tāta durāvau~ tohī| dāruna doṣa ghaṭai ati mohī ||
jimi jimi tāpasu kathai udāsā| timi timi nṛpahi upaja bisvāsā ||
dekhā svabasa karma mana bānī| taba bolā tāpasa bagadhyānī ||
nāma hamāra ekatanu bhāī| suni nṛpa bole puni siru nāī ||
kahahu nāma kara aratha bakhānī| mohi sevaka ati āpana jānī ||

do. ādisṛṣṭi upajī jabahiṃ taba utapati bhai mori|
nāma ekatanu hetu tehi deha na dharī bahori || 162 ||

jani ācaruja karahu mana māhīṃ| suta tapa teṃ durlabha kachu nāhīṃ ||
tapabala teṃ jaga sṛjai bidhātā| tapabala biṣnu bhae paritrātā ||
tapabala saṃbhu karahiṃ saṃghārā| tapa teṃ agama na kachu saṃsārā ||
bhayau nṛpahi suni ati anurāgā| kathā purātana kahai so lāgā ||
karama dharama itihāsa anekā| karai nirūpana birati bibekā ||
udabhava pālana pralaya kahānī| kahesi amita ācaraja bakhānī ||
suni mahipa tāpasa basa bhayaū| āpana nāma kahata taba layaū ||
kaha tāpasa nṛpa jānau~ tohī| kīnhehu kapaṭa lāga bhala mohī ||

so. sunu mahīsa asi nīti jaha~ taha~ nāma na kahahiṃ nṛpa|
mohi tohi para ati prīti soi caturatā bicāri tava || 163 ||

nāma tumhāra pratāpa dinesā| satyaketu tava pitā naresā ||
gura prasāda saba jānia rājā| kahia na āpana jāni akājā ||
dekhi tāta tava sahaja sudhāī| prīti pratīti nīti nipunāī ||
upaji pari mamatā mana moreṃ| kahau~ kathā nija pūche toreṃ ||
aba prasanna maiṃ saṃsaya nāhīṃ| māgu jo bhūpa bhāva mana māhīṃ ||
suni subacana bhūpati haraṣānā| gahi pada binaya kīnhi bidhi nānā ||
kṛpāsiṃdhu muni darasana toreṃ| cāri padāratha karatala moreṃ ||
prabhuhi tathāpi prasanna bilokī| māgi agama bara hou~ asokī ||

do. jarā marana dukha rahita tanu samara jitai jani kou|
ekachatra ripuhīna mahi rāja kalapa sata hou || 164 ||

kaha tāpasa nṛpa aisei hoū| kārana eka kaṭhina sunu soū ||
kālau tua pada nāihi sīsā| eka biprakula chāṛi mahīsā ||
tapabala bipra sadā bariārā| tinha ke kopa na kou rakhavārā ||
jauṃ bipranha saba karahu naresā| tau tua basa bidhi biṣnu mahesā ||
cala na brahmakula sana bariāī| satya kahau~ dou bhujā uṭhāī ||
bipra śrāpa binu sunu mahipālā| tora nāsa nahi kavanehu~ kālā ||
haraṣeu rāu bacana suni tāsū| nātha na hoi mora aba nāsū ||
tava prasāda prabhu kṛpānidhānā| mo kahu~ sarba kāla kalyānā ||

do. evamastu kahi kapaṭamuni bolā kuṭila bahori|
milaba hamāra bhulāba nija kahahu ta hamahi na khori || 165 ||

tāteṃ mai tohi barajau~ rājā| kaheṃ kathā tava parama akājā ||

chaṭheṃ śravana yaha parata kahānī| nāsa tumhāra satya mama bānī ||
yaha pragaṭeṃ athavā dvijaśrāpā| nāsa tora sunu bhānupratāpā ||
āna upāya~ nidhana tava nāhīṃ| jauṃ hari hara kopahiṃ mana māhīṃ ||
satya nātha pada gahi nṛpa bhāṣā| dvija gura kopa kahahu ko rākhā ||
rākhai gura jauṃ kopa bidhātā| gura birodha nahiṃ kou jaga trātā ||
jauṃ na calaba hama kahe tumhāreṃ| hou nāsa nahiṃ soca hamāreṃ ||
ekahiṃ ḍara ḍarapata mana morā| prabhu mahideva śrāpa ati ghorā ||

do. hohiṃ bipra basa kavana bidhi kahahu kṛpā kari sou|
tumha taji dīnadayāla nija hitū na dekhau~ kou~ || 166 ||

sunu nṛpa bibidha jatana jaga māhīṃ| kaṣṭasādhya puni hohiṃ ki nāhīṃ ||
ahai eka ati sugama upāī| tahā~ paraṃtu eka kaṭhināī ||
mama ādhīna juguti nṛpa soī| mora jāba tava nagara na hoī ||
āju lageṃ aru jaba teṃ bhayaū~| kāhū ke gṛha grāma na gayaū~ ||
jauṃ na jāu~ tava hoi akājū| banā āi asamaṃjasa ājū ||
suni mahīsa boleu mṛdu bānī| nātha nigama asi nīti bakhānī ||
baṛe saneha laghunha para karahīṃ| giri nija sirani sadā tṛna dharahīṃ ||
jaladhi agādha mauli baha phenū| saṃtata dharani dharata sira renū ||

do. asa kahi gahe naresa pada svāmī hohu kṛpāla|
mohi lāgi dukha sahia prabhu sajjana dīnadayāla || 167 ||

jāni nṛpahi āpana ādhīnā| bolā tāpasa kapaṭa prabīnā ||
satya kahau~ bhūpati sunu tohī| jaga nāhina durlabha kachu mohī ||
avasi kāja maiṃ karihau~ torā| mana tana bacana bhagata taiṃ morā ||
joga juguti tapa maṃtra prabhāū| phalai tabahiṃ jaba karia durāū ||
jauṃ naresa maiṃ karauṃ rasoī| tumha parusahu mohi jāna na koī ||
anna so joi joi bhojana karaī| soi soi tava āyasu anusaraī ||
puni tinha ke gṛha jeva~i joū| tava basa hoi bhūpa sunu soū ||
jāi upāya racahu nṛpa ehū| saṃbata bhari saṃkalapa karehū ||

do. nita nūtana dvija sahasa sata barehu sahita parivāra|
maiṃ tumhare saṃkalapa lagi dinahiṃiba jevanāra || 168 ||

ehi bidhi bhūpa kaṣṭa ati thoreṃ| hoihahiṃ sakala bipra basa toreṃ ||
karihahiṃ bipra homa makha sevā| tehiṃ prasaṃga sahajehiṃ basa devā ||
aura eka tohi kahaū~ lakhāū| maiṃ ehi beṣa na āuba kāū ||
tumhare uparohita kahu~ rāyā| hari ānaba maiṃ kari nija māyā ||
tapabala tehi kari āpu samānā| rakhihau~ ihā~ baraṣa paravānā ||
maiṃ dhari tāsu beṣu sunu rājā| saba bidhi tora sa~vāraba kājā ||
gai nisi bahuta sayana aba kīje| mohi tohi bhūpa bheṃṭa dina tīje ||
maiṃ tapabala tohi turaga sametā| pahu~cehau~ sovatahi niketā ||

do. maiṃ āuba soi beṣu dhari pahicānehu taba mohi|
jaba ekāṃta bolāi saba kathā sunāvauṃ tohi || 169 ||

sayana kīnha nṛpa āyasu mānī| āsana jāi baiṭha chalagyānī ||
śramita bhūpa nidrā ati āī| so kimi sova soca adhikāī ||
kālaketu nisicara taha~ āvā| jehiṃ sūkara hoi nṛpahi bhulāvā ||
parama mitra tāpasa nṛpa kerā| jānai so ati kapaṭa ghanerā ||
tehi ke sata suta aru dasa bhāī| khala ati ajaya deva dukhadāī ||
prathamahi bhūpa samara saba māre| bipra saṃta sura dekhi dukhāre ||
tehiṃ khala pāchila bayaru sa~bharā| tāpasa nṛpa mili maṃtra bicārā ||
jehi ripu chaya soi racenhi upāū| bhāvī basa na jāna kachu rāū ||

do. ripu tejasī akela api laghu kari gania na tāhu|
ajahu~ deta dukha rabi sasihi sira avaseṣita rāhu || 170 ||

tāpasa nṛpa nija sakhahi nihārī| haraṣi mileu uṭhi bhayau sukhārī ||
mitrahi kahi saba kathā sunāī| jātudhāna bolā sukha pāī ||
aba sādheu~ ripu sunahu naresā| jauṃ tumha kīnha mora upadesā ||
parihari soca rahahu tumha soī| binu auṣadha biādhi bidhi khoī ||
kula sameta ripu mūla bahāī| cauthe divasa milaba maiṃ āī ||
tāpasa nṛpahi bahuta paritoṣī| calā mahākapaṭī atiroṣī ||
bhānupratāpahi bāji sametā| pahu~cāesi chana mājha niketā ||
nṛpahi nāri pahiṃ sayana karāī| hayagṛha~ bā~dhesi bāji banāī ||

do. rājā ke uparohitahi hari lai gayau bahori|
lai rākhesi giri khoha mahu~ māyā~ kari mati bhori || 171 ||

āpu biraci uparohita rūpā| pareu jāi tehi seja anūpā ||
jāgeu nṛpa anabhae~ bihānā| dekhi bhavana ati acaraju mānā ||
muni mahimā mana mahu~ anumānī| uṭheu gava~hi jehi jāna na rānī ||
kānana gayau bāji caṛhi tehīṃ| pura nara nāri na jāneu kehīṃ ||
gae~ jāma juga bhūpati āvā| ghara ghara utsava bāja badhāvā ||
uparohitahi dekha jaba rājā| cakita biloki sumiri soi kājā ||
juga sama nṛpahi gae dina tīnī| kapaṭī muni pada raha mati līnī ||
samaya jāni uparohita āvā| nṛpahi mate saba kahi samujhāvā ||

do. nṛpa haraṣeu pahicāni guru bhrama basa rahā na ceta|
bare turata sata sahasa bara bipra kuṭuṃba sameta || 172 ||

uparohita jevanāra banāī| charasa cāri bidhi jasi śruti gāī ||
māyāmaya tehiṃ kīnha rasoī| biṃjana bahu gani sakai na koī ||
bibidha mṛganha kara āmiṣa rā~dhā| tehi mahu~ bipra mā~su khala sā~dhā ||
bhojana kahu~ saba bipra bolāe| pada pakhāri sādara baiṭhāe ||
parusana jabahiṃ lāga mahipālā| bhai akāsabānī tehi kālā ||
biprabṛṃda uṭhi uṭhi gṛha jāhū| hai baṛi hāni anna jani khāhū ||
bhayau rasoīṃ bhūsura mā~sū| saba dvija uṭhe māni bisvāsū ||
bhūpa bikala mati moha~ bhulānī| bhāvī basa āva mukha bānī ||

do. bole bipra sakopa taba nahiṃ kachu kīnha bicāra|
jāi nisācara hohu nṛpa mūṛha sahita parivāra || 173 ||

chatrabaṃdhu taiṃ bipra bolāī| ghālai lie sahita samudāī ||
īsvara rākhā dharama hamārā| jaihasi taiṃ sameta parivārā ||
saṃbata madhya nāsa tava hoū| jaladātā na rahihi kula koū ||
nṛpa suni śrāpa bikala ati trāsā| bhai bahori bara girā akāsā ||
biprahu śrāpa bicāri na dīnhā| nahiṃ aparādha bhūpa kachu kīnhā ||
cakita bipra saba suni nabhabānī| bhūpa gayau jaha~ bhojana khānī ||
taha~ na asana nahiṃ bipra suārā| phireu rāu mana soca apārā ||
saba prasaṃga mahisuranha sunāī| trasita pareu avanīṃ akulāī ||

do. bhūpati bhāvī miṭai nahiṃ jadapi na dūṣana tora|
kie~ anyathā hoi nahiṃ bipraśrāpa ati ghora || 174 ||

asa kahi saba mahideva sidhāe| samācāra puraloganha pāe ||
socahiṃ dūṣana daivahi dehīṃ| bicarata haṃsa kāga kiya jehīṃ ||
uparohitahi bhavana pahu~cāī| asura tāpasahi khabari janāī ||
tehiṃ khala jaha~ taha~ patra paṭhāe| saji saji sena bhūpa saba dhāe ||
gherenhi nagara nisāna bajāī| bibidha bhā~ti nita hoī larāī ||
jūjhe sakala subhaṭa kari karanī| baṃdhu sameta pareu nṛpa dharanī ||
satyaketu kula kou nahiṃ bā~cā| bipraśrāpa kimi hoi asā~cā ||
ripu jiti saba nṛpa nagara basāī| nija pura gavane jaya jasu pāī ||

do. bharadvāja sunu jāhi jaba hoi bidhātā bāma|
dhūri merusama janaka jama tāhi byālasama dāma || |175 ||

kāla pāi muni sunu soi rājā| bhayau nisācara sahita samājā ||
dasa sira tāhi bīsa bhujadaṃḍā| rāvana nāma bīra baribaṃḍā ||
bhūpa anuja arimardana nāmā| bhayau so kuṃbhakarana baladhāmā ||
saciva jo rahā dharamaruci jāsū| bhayau bimātra baṃdhu laghu tāsū ||
nāma bibhīṣana jehi jaga jānā| biṣnubhagata bigyāna nidhānā ||
rahe je suta sevaka nṛpa kere| bhae nisācara ghora ghanere ||
kāmarūpa khala jinasa anekā| kuṭila bhayaṃkara bigata bibekā ||
kṛpā rahita hiṃsaka saba pāpī| barani na jāhiṃ bisva paritāpī ||

do. upaje jadapi pulastyakula pāvana amala anūpa|
tadapi mahīsura śrāpa basa bhae sakala agharūpa || 176 ||

kīnha bibidha tapa tīnihu~ bhāī| parama ugra nahiṃ barani so jāī ||
gayau nikaṭa tapa dekhi bidhātā| māgahu bara prasanna maiṃ tātā ||

kari binatī pada gahi dasasīsā| boleu bacana sunahu jagadīsā ||
hama kāhū ke marahiṃ na māreṃ| bānara manuja jāti dui bāreṃ ||
evamastu tumha baṛa tapa kīnhā| maiṃ brahmā~ mili tehi bara dīnhā ||
puni prabhu kuṃbhakarana pahiṃ gayaū| tehi biloki mana bisamaya bhayaū ||
jauṃ ehiṃ khala nita karaba ahārū| hoihi saba ujāri saṃsārū ||
sārada preri tāsu mati pherī| māgesi nīda māsa ṣaṭa kerī ||

do. gae bibhīṣana pāsa puni kaheu putra bara māgu|
tehiṃ māgeu bhagavaṃta pada kamala amala anurāgu || 177 ||

tinhi dei bara brahma sidhāe| haraṣita te apane gṛha āe ||
maya tanujā maṃdodari nāmā| parama suṃdarī nāri lalāmā ||
soi maya~ dīnhi rāvanahi ānī| hoihi jātudhānapati jānī ||
haraṣita bhayau nāri bhali pāī| puni dou baṃdhu biāhesi jāī ||
giri trikūṭa eka siṃdhu majhārī| bidhi nirmita durgama ati bhārī ||
soi maya dānava~ bahuri sa~vārā| kanaka racita manibhavana apārā ||
bhogāvati jasi ahikula bāsā| amarāvati jasi sakranivāsā ||
tinha teṃ adhika ramya ati baṃkā| jaga bikhyāta nāma tehi laṃkā ||

do. khāīṃ siṃdhu gabhīra ati cārihu~ disi phiri āva|
kanaka koṭa mani khacita dṛṛha barani na jāi banāva || 178(ka) ||

hariprerita jehiṃ kalapa joi jātudhānapati hoi|
sūra pratāpī atulabala dala sameta basa soi || 178(kha) ||

rahe tahā~ nisicara bhaṭa bhāre| te saba suranha samara saṃghāre ||
aba taha~ rahahiṃ sakra ke prere| racchaka koṭi jacchapati kere ||
dasamukha katahu~ khabari asi pāī| sena sāji gaṛha gheresi jāī ||
dekhi bikaṭa bhaṭa baṛi kaṭakāī| jaccha jīva lai gae parāī ||
phiri saba nagara dasānana dekhā| gayau soca sukha bhayau biseṣā ||
suṃdara sahaja agama anumānī| kīnhi tahā~ rāvana rajadhānī ||
jehi jasa joga bā~ṭi gṛha dīnhe| sukhī sakala rajanīcara kīnhe ||
eka bāra kubera para dhāvā| puṣpaka jāna jīti lai āvā ||

do. kautukahīṃ kailāsa puni līnhesi jāi uṭhāi|
manahu~ tauli nija bāhubala calā bahuta sukha pāi || 179 ||

sukha saṃpati suta sena sahāī| jaya pratāpa bala buddhi baṛāī ||
nita nūtana saba bāṛhata jāī| jimi pratilābha lobha adhikāī ||
atibala kuṃbhakarana asa bhrātā| jehi kahu~ nahiṃ pratibhaṭa jaga jātā ||
karai pāna sovai ṣaṭa māsā| jāgata hoi tihu~ pura trāsā ||
jauṃ dina prati ahāra kara soī| bisva begi saba caupaṭa hoī ||
samara dhīra nahiṃ jāi bakhānā| tehi sama amita bīra balavānā ||
bāridanāda jeṭha suta tāsū| bhaṭa mahu~ prathama līka jaga jāsū ||
jehi na hoi rana sanamukha koī| surapura nitahiṃ parāvana hoī ||

do. kumukha akaṃpana kulisarada dhūmaketu atikāya|
eka eka jaga jīti saka aise subhaṭa nikāya || 180 ||


kāmarūpa jānahiṃ saba māyā| sapanehu~ jinha keṃ dharama na dāyā ||
dasamukha baiṭha sabhā~ eka bārā| dekhi amita āpana parivārā ||
suta samūha jana parijana nātī| ge ko pāra nisācara jātī ||
sena biloki sahaja abhimānī| bolā bacana krodha mada sānī ||

sunahu sakala rajanīcara jūthā| hamare bairī bibudha barūthā ||
te sanamukha nahiṃ karahī larāī| dekhi sabala ripu jāhiṃ parāī ||
tenha kara marana eka bidhi hoī| kahau~ bujhāi sunahu aba soī ||
dvijabhojana makha homa sarādhā || saba kai jāi karahu tumha bādhā ||

do. chudhā chīna balahīna sura sahajehiṃ milihahiṃ āi|
taba mārihau~ ki chāṛihau~ bhalī bhā~ti apanāi || 181 ||


meghanāda kahu~ puni ha~karāvā| dīnhī sikha balu bayaru baṛhāvā ||

je sura samara dhīra balavānā| jinha keṃ laribe kara abhimānā ||
tinhahi jīti rana ānesu bā~dhī| uṭhi suta pitu anusāsana kā~dhī ||
ehi bidhi sabahī agyā dīnhī| āpunu caleu gadā kara līnhī ||
calata dasānana ḍolati avanī| garjata garbha stravahiṃ sura ravanī ||
rāvana āvata suneu sakohā| devanha take meru giri khohā ||
digapālanha ke loka suhāe| sūne sakala dasānana pāe ||
puni puni siṃghanāda kari bhārī| dei devatanha gāri pacārī ||
rana mada matta phirai jaga dhāvā| pratibhaṭa khaujata katahu~ na pāvā ||
rabi sasi pavana baruna dhanadhārī| agini kāla jama saba adhikārī ||
kiṃnara siddha manuja sura nāgā| haṭhi sabahī ke paṃthahiṃ lāgā ||
brahmasṛṣṭi jaha~ lagi tanudhārī| dasamukha basabartī nara nārī ||
āyasu karahiṃ sakala bhayabhītā| navahiṃ āi nita carana binītā ||

do. bhujabala bisva basya kari rākhesi kou na sutaṃtra|
maṃḍalīka mani rāvana rāja karai nija maṃtra || 182(kha) ||

deva jaccha gaṃdharva nara kiṃnara nāga kumāri|
jīti barīṃ nija bāhubala bahu suṃdara bara nāri || 182kha ||


iṃdrajīta sana jo kachu kaheū| so saba janu pahilehiṃ kari raheū ||
prathamahiṃ jinha kahu~ āyasu dīnhā| tinha kara carita sunahu jo kīnhā ||
dekhata bhīmarūpa saba pāpī| nisicara nikara deva paritāpī ||
karahi upadrava asura nikāyā| nānā rūpa dharahiṃ kari māyā ||
jehi bidhi hoi dharma nirmūlā| so saba karahiṃ beda pratikūlā ||
jehiṃ jehiṃ desa dhenu dvija pāvahiṃ| nagara gāu~ pura āgi lagāvahiṃ ||
subha ācarana katahu~ nahiṃ hoī| deva bipra gurū māna na koī ||
nahiṃ haribhagati jagya tapa gyānā| sapanehu~ sunia na beda purānā ||

chaṃ. japa joga birāgā tapa makha bhāgā śravana sunai dasasīsā|
āpunu uṭhi dhāvai rahai na pāvai dhari saba ghālai khīsā ||
asa bhraṣṭa acārā bhā saṃsārā dharma sunia nahi kānā|
tehi bahubidhi trāsai desa nikāsai jo kaha beda purānā ||

so. barani na jāi anīti ghora nisācara jo karahiṃ|
hiṃsā para ati prīti tinha ke pāpahi kavani miti || 183 ||

māsapārāyaṇa, chaṭhā viśrāma
bāṛhe khala bahu cora juārā| je laṃpaṭa paradhana paradārā ||
mānahiṃ mātu pitā nahiṃ devā| sādhunha sana karavāvahiṃ sevā ||
jinha ke yaha ācarana bhavānī| te jānehu nisicara saba prānī ||
atisaya dekhi dharma kai glānī| parama sabhīta dharā akulānī ||
giri sari siṃdhu bhāra nahiṃ mohī| jasa mohi garua eka paradrohī ||
sakala dharma dekhai biparītā| kahi na sakai rāvana bhaya bhītā ||
dhenu rūpa dhari hṛdaya~ bicārī| gaī tahā~ jaha~ sura muni jhārī ||
nija saṃtāpa sunāesi roī| kāhū teṃ kachu kāja na hoī ||

chaṃ. sura muni gaṃdharbā mili kari sarbā ge biraṃci ke lokā|
sa~ga gotanudhārī bhūmi bicārī parama bikala bhaya sokā ||
brahmā~ saba jānā mana anumānā mora kachū na basāī|
jā kari taiṃ dāsī so abināsī hamareu tora sahāī ||

so. dharani dharahi mana dhīra kaha biraṃci haripada sumiru|
jānata jana kī pīra prabhu bhaṃjihi dāruna bipati || 184 ||

baiṭhe sura saba karahiṃ bicārā| kaha~ pāia prabhu karia pukārā ||
pura baikuṃṭha jāna kaha koī| kou kaha payanidhi basa prabhu soī ||
jāke hṛdaya~ bhagati jasi prīti| prabhu taha~ pragaṭa sadā tehiṃ rītī ||
tehi samāja girijā maiṃ raheū~| avasara pāi bacana eka kaheū~ ||
hari byāpaka sarbatra samānā| prema teṃ pragaṭa hohiṃ maiṃ jānā ||
desa kāla disi bidisihu māhīṃ| kahahu so kahā~ jahā~ prabhu nāhīṃ ||
aga jagamaya saba rahita birāgī| prema teṃ prabhu pragaṭai jimi āgī ||
mora bacana saba ke mana mānā| sādhu sādhu kari brahma bakhānā ||

do. suni biraṃci mana haraṣa tana pulaki nayana baha nīra|
astuti karata jori kara sāvadhāna matidhīra || 185 ||

chaṃ. jaya jaya suranāyaka jana sukhadāyaka pranatapāla bhagavaṃtā|
go dvija hitakārī jaya asurārī sidhuṃsutā priya kaṃtā ||

pālana sura dharanī adbhuta karanī marama na jānai koī|
jo sahaja kṛpālā dīnadayālā karau anugraha soī ||
jaya jaya abināsī saba ghaṭa bāsī byāpaka paramānaṃdā|
abigata gotītaṃ carita punītaṃ māyārahita mukuṃdā ||
jehi lāgi birāgī ati anurāgī bigatamoha munibṛṃdā|
nisi bāsara dhyāvahiṃ guna gana gāvahiṃ jayati saccidānaṃdā ||
jehiṃ sṛṣṭi upāī tribidha banāī saṃga sahāya na dūjā|
so karau aghārī ciṃta hamārī jānia bhagati na pūjā ||
jo bhava bhaya bhaṃjana muni mana raṃjana gaṃjana bipati barūthā|
mana baca krama bānī chāṛi sayānī sarana sakala sura jūthā ||
sārada śruti seṣā riṣaya aseṣā jā kahu~ kou nahi jānā|
jehi dīna piāre beda pukāre dravau so śrībhagavānā ||
bhava bāridhi maṃdara saba bidhi suṃdara gunamaṃdira sukhapuṃjā|
muni siddha sakala sura parama bhayātura namata nātha pada kaṃjā ||

do. jāni sabhaya surabhūmi suni bacana sameta saneha|
gaganagirā gaṃbhīra bhai harani soka saṃdeha || 186 ||

jani ḍarapahu muni siddha suresā| tumhahi lāgi dharihau~ nara besā ||
aṃsanha sahita manuja avatārā| lehau~ dinakara baṃsa udārā ||
kasyapa aditi mahātapa kīnhā| tinha kahu~ maiṃ pūraba bara dīnhā ||
te dasaratha kausalyā rūpā| kosalapurīṃ pragaṭa narabhūpā ||
tinha ke gṛha avatarihau~ jāī| raghukula tilaka so cāriu bhāī ||
nārada bacana satya saba karihau~| parama sakti sameta avatarihau~ ||
harihau~ sakala bhūmi garuāī| nirbhaya hohu deva samudāī ||
gagana brahmabānī sunī kānā| turata phire sura hṛdaya juṛānā ||
taba brahmā dharanihi samujhāvā| abhaya bhaī bharosa jiya~ āvā ||

do. nija lokahi biraṃci ge devanha ihai sikhāi|
bānara tanu dhari dhari mahi hari pada sevahu jāi || 187 ||

gae deva saba nija nija dhāmā| bhūmi sahita mana kahu~ biśrāmā |
jo kachu āyasu brahmā~ dīnhā| haraṣe deva bilaṃba na kīnhā ||
banacara deha dhari chiti māhīṃ| atulita bala pratāpa tinha pāhīṃ ||
giri taru nakha āyudha saba bīrā| hari māraga citavahiṃ matidhīrā ||
giri kānana jaha~ taha~ bhari pūrī| rahe nija nija anīka raci rūrī ||
yaha saba rucira carita maiṃ bhāṣā| aba so sunahu jo bīcahiṃ rākhā ||
avadhapurīṃ raghukulamani rāū| beda bidita tehi dasaratha nāū~ ||
dharama dhuraṃdhara gunanidhi gyānī| hṛdaya~ bhagati mati sāra~gapānī ||

do. kausalyādi nāri priya saba ācarana punīta|
pati anukūla prema dṛṛha hari pada kamala binīta || 188 ||

eka bāra bhūpati mana māhīṃ| bhai galāni moreṃ suta nāhīṃ ||
gura gṛha gayau turata mahipālā| carana lāgi kari binaya bisālā ||
nija dukha sukha saba gurahi sunāyau| kahi basiṣṭha bahubidhi samujhāyau ||
dharahu dhīra hoihahiṃ suta cārī| tribhuvana bidita bhagata bhaya hārī ||
sṛṃgī riṣahi basiṣṭha bolāvā| putrakāma subha jagya karāvā ||
bhagati sahita muni āhuti dīnheṃ| pragaṭe agini carū kara līnheṃ ||
jo basiṣṭha kachu hṛdaya~ bicārā| sakala kāju bhā siddha tumhārā ||
yaha habi bā~ṭi dehu nṛpa jāī| jathā joga jehi bhāga banāī ||

do. taba adṛsya bhae pāvaka sakala sabhahi samujhāi ||
paramānaṃda magana nṛpa haraṣa na hṛdaya~ samāi || 189 ||

tabahiṃ rāya~ priya nāri bolāīṃ| kausalyādi tahā~ cali āī ||
ardha bhāga kausalyāhi dīnhā| ubhaya bhāga ādhe kara kīnhā ||
kaikeī kaha~ nṛpa so dayaū| rahyo so ubhaya bhāga puni bhayaū ||
kausalyā kaikeī hātha dhari| dīnha sumitrahi mana prasanna kari ||
ehi bidhi garbhasahita saba nārī| bhaīṃ hṛdaya~ haraṣita sukha bhārī ||
jā dina teṃ hari garbhahiṃ āe| sakala loka sukha saṃpati chāe ||
maṃdira maha~ saba rājahiṃ rānī| sobhā sīla teja kī khānīṃ ||
sukha juta kachuka kāla cali gayaū| jehiṃ prabhu pragaṭa so avasara bhayaū ||

do. joga lagana graha bāra tithi sakala bhae anukūla|
cara aru acara harṣajuta rāma janama sukhamūla || 190 ||

naumī tithi madhu māsa punītā| sukala paccha abhijita hariprītā ||
madhyadivasa ati sīta na ghāmā| pāvana kāla loka biśrāmā ||
sītala maṃda surabhi baha bāū| haraṣita sura saṃtana mana cāū ||
bana kusumita girigana maniārā| stravahiṃ sakala saritā'mṛtadhārā ||
so avasara biraṃci jaba jānā| cale sakala sura sāji bimānā ||
gagana bimala sakula sura jūthā| gāvahiṃ guna gaṃdharba barūthā ||
baraṣahiṃ sumana suaṃjali sājī| gahagahi gagana duṃdubhī bājī ||
astuti karahiṃ nāga muni devā| bahubidhi lāvahiṃ nija nija sevā ||

do. sura samūha binatī kari pahu~ce nija nija dhāma|
jaganivāsa prabhu pragaṭe akhila loka biśrāma || 191 ||

chaṃ. bhae pragaṭa kṛpālā dīnadayālā kausalyā hitakārī|
haraṣita mahatārī muni mana hārī adbhuta rūpa bicārī ||
locana abhirāmā tanu ghanasyāmā nija āyudha bhuja cārī|
bhūṣana banamālā nayana bisālā sobhāsiṃdhu kharārī ||
kaha dui kara jorī astuti torī kehi bidhi karauṃ anaṃtā|
māyā guna gyānātīta amānā beda purāna bhanaṃtā ||
karunā sukha sāgara saba guna āgara jehi gāvahiṃ śruti saṃtā|
so mama hita lāgī jana anurāgī bhayau pragaṭa śrīkaṃtā ||
brahmāṃḍa nikāyā nirmita māyā roma roma prati beda kahai|
mama ura so bāsī yaha upahāsī sunata dhīra pati thira na rahai ||
upajā jaba gyānā prabhu musakānā carita bahuta bidhi kīnha cahai|
kahi kathā suhāī mātu bujhāī jehi prakāra suta prema lahai ||
mātā puni bolī so mati ḍaulī tajahu tāta yaha rūpā|
kījai sisulīlā ati priyasīlā yaha sukha parama anūpā ||
suni bacana sujānā rodana ṭhānā hoi bālaka surabhūpā|
yaha carita je gāvahiṃ haripada pāvahiṃ te na parahiṃ bhavakūpā ||

do. bipra dhenu sura saṃta hita līnha manuja avatāra|
nija icchā nirmita tanu māyā guna go pāra || 192 ||

suni sisu rudana parama priya bānī| saṃbhrama cali āī saba rānī ||
haraṣita jaha~ taha~ dhāīṃ dāsī| āna~da magana sakala purabāsī ||
dasaratha putrajanma suni kānā| mānahu~ brahmānaṃda samānā ||
parama prema mana pulaka sarīrā| cāhata uṭhata karata mati dhīrā ||
jākara nāma sunata subha hoī| moreṃ gṛha āvā prabhu soī ||
paramānaṃda pūri mana rājā| kahā bolāi bajāvahu bājā ||
gura basiṣṭha kaha~ gayau ha~kārā| āe dvijana sahita nṛpadvārā ||
anupama bālaka dekhenhi jāī| rūpa rāsi guna kahi na sirāī ||

do. naṃdīmukha sarādha kari jātakarama saba kīnha|
hāṭaka dhenu basana mani nṛpa bipranha kaha~ dīnha || 193 ||

dhvaja patāka torana pura chāvā| kahi na jāi jehi bhā~ti banāvā ||
sumanabṛṣṭi akāsa teṃ hoī| brahmānaṃda magana saba loī ||
bṛṃda bṛṃda mili calīṃ logāī| sahaja saṃgāra kie~ uṭhi dhāī ||
kanaka kalasa maṃgala dhari thārā| gāvata paiṭhahiṃ bhūpa duārā ||
kari ārati nevachāvari karahīṃ| bāra bāra sisu carananhi parahīṃ ||
māgadha sūta baṃdigana gāyaka| pāvana guna gāvahiṃ raghunāyaka ||
sarbasa dāna dīnha saba kāhū| jehiṃ pāvā rākhā nahiṃ tāhū ||
mṛgamada caṃdana kuṃkuma kīcā| macī sakala bīthinha bica bīcā ||

do. gṛha gṛha bāja badhāva subha pragaṭe suṣamā kaṃda|
haraṣavaṃta saba jaha~ taha~ nagara nāri nara bṛṃda || 194 ||

kaikayasutā sumitrā doū| suṃdara suta janamata bhaiṃ oū ||
vaha sukha saṃpati samaya samājā| kahi na sakai sārada ahirājā ||
avadhapurī sohai ehi bhā~tī| prabhuhi milana āī janu rātī ||
dekhi bhānū janu mana sakucānī| tadapi banī saṃdhyā anumānī ||
agara dhūpa bahu janu a~dhiārī| uṛai abhīra manahu~ arunārī ||
maṃdira mani samūha janu tārā| nṛpa gṛha kalasa so iṃdu udārā ||
bhavana bedadhuni ati mṛdu bānī| janu khaga mūkhara samaya~ janu sānī ||
kautuka dekhi pataṃga bhulānā| eka māsa tei~ jāta na jānā ||

do. māsa divasa kara divasa bhā marama na jānai koi|
ratha sameta rabi thākeu nisā kavana bidhi hoi || 195 ||

yaha rahasya kāhū nahiṃ jānā| dina mani cale karata gunagānā ||
dekhi mahotsava sura muni nāgā| cale bhavana baranata nija bhāgā ||
aurau eka kahau~ nija corī| sunu girijā ati dṛṛha mati torī ||
kāka bhusuṃḍi saṃga hama doū| manujarūpa jānai nahiṃ koū ||
paramānaṃda premasukha phūle| bīthinha phirahiṃ magana mana bhūle ||
yaha subha carita jāna pai soī| kṛpā rāma kai jāpara hoī ||
tehi avasara jo jehi bidhi āvā| dīnha bhūpa jo jehi mana bhāvā ||
gaja ratha turaga hema go hīrā| dīnhe nṛpa nānābidhi cīrā ||

do. mana saṃtoṣe sabanhi ke jaha~ taha~ dehi asīsa|
sakala tanaya cira jīvahu~ tulasidāsa ke īsa || 196 ||


kachuka divasa bīte ehi bhā~tī| jāta na jānia dina aru rātī ||
nāmakarana kara avasaru jānī| bhūpa boli paṭhae muni gyānī ||
kari pūjā bhūpati asa bhāṣā| dharia nāma jo muni guni rākhā ||
inha ke nāma aneka anūpā| maiṃ nṛpa kahaba svamati anurūpā ||
jo ānaṃda siṃdhu sukharāsī| sīkara teṃ trailoka supāsī ||
so sukha dhāma rāma asa nāmā| akhila loka dāyaka biśrāmā ||
bisva bharana poṣana kara joī| tākara nāma bharata asa hoī ||
jāke sumirana teṃ ripu nāsā| nāma satruhana beda prakāsā ||

do. lacchana dhāma rāma priya sakala jagata ādhāra|
guru basiṣṭa tehi rākhā lachimana nāma udāra || 197 ||

dhare nāma gura hṛdaya~ bicārī| beda tattva nṛpa tava suta cārī ||
muni dhana jana sarabasa siva prānā| bāla keli tehiṃ sukha mānā ||
bārehi te nija hita pati jānī| lachimana rāma carana rati mānī ||
bharata satruhana dūnau bhāī| prabhu sevaka jasi prīti baṛāī ||
syāma gaura suṃdara dou jorī| nirakhahiṃ chabi jananīṃ tṛna torī ||
cāriu sīla rūpa guna dhāmā| tadapi adhika sukhasāgara rāmā ||
hṛdaya~ anugraha iṃdu prakāsā| sūcata kirana manohara hāsā ||
kabahu~ uchaṃga kabahu~ bara palanā| mātu dulārai kahi priya lalanā ||

do. byāpaka brahma niraṃjana nirguna bigata binoda|
so aja prema bhagati basa kausalyā ke goda || 198 ||

kāma koṭi chabi syāma sarīrā| nīla kaṃja bārida gaṃbhīrā ||
aruna carana pakaṃja nakha jotī| kamala dalanhi baiṭhe janu motī ||
rekha kulisa dhavaja aṃkura sohe| nūpura dhuni suni muni mana mohe ||
kaṭi kiṃkinī udara traya rekhā| nābhi gabhīra jāna jehi dekhā ||
bhuja bisāla bhūṣana juta bhūrī| hiya~ hari nakha ati sobhā rūrī ||
ura manihāra padika kī sobhā| bipra carana dekhata mana lobhā ||
kaṃbu kaṃṭha ati cibuka suhāī| ānana amita madana chabi chāī ||
dui dui dasana adhara arunāre| nāsā tilaka ko baranai pāre ||
suṃdara śravana sucāru kapolā| ati priya madhura totare bolā ||
cikkana kaca kuṃcita gabhuāre| bahu prakāra raci mātu sa~vāre ||
pīta jhaguliā tanu pahirāī| jānu pāni bicarani mohi bhāī ||
rūpa sakahiṃ nahiṃ kahi śruti seṣā| so jānai sapanehu~ jehi dekhā ||

do. sukha saṃdoha mohapara gyāna girā gotīta|
daṃpati parama prema basa kara sisucarita punīta || 199 ||

ehi bidhi rāma jagata pitu mātā| kosalapura bāsiṃha sukhadātā ||
jinha raghunātha carana rati mānī| tinha kī yaha gati pragaṭa bhavānī ||
raghupati bimukha jatana kara korī| kavana sakai bhava baṃdhana chorī ||
jīva carācara basa kai rākhe| so māyā prabhu soṃ bhaya bhākhe ||
bhṛkuṭi bilāsa nacāvai tāhī| asa prabhu chāṛi bhajia kahu kāhī ||
mana krama bacana chāṛi caturāī| bhajata kṛpā karihahiṃ raghurāī ||
ehi bidhi sisubinoda prabhu kīnhā| sakala nagarabāsiṃha sukha dīnhā ||
lai uchaṃga kabahu~ka halarāvai| kabahu~ pālaneṃ ghāli jhulāvai ||

do. prema magana kausalyā nisi dina jāta na jāna|
suta saneha basa mātā bālacarita kara gāna || 200 ||

eka bāra jananīṃ anhavāe| kari siṃgāra palanā~ pauṛhāe ||

nija kula iṣṭadeva bhagavānā| pūjā hetu kīnha asnānā ||
kari pūjā naibedya caṛhāvā| āpu gaī jaha~ pāka banāvā ||
bahuri mātu tahavā~ cali āī| bhojana karata dekha suta jāī ||
gai jananī sisu pahiṃ bhayabhītā| dekhā bāla tahā~ puni sūtā ||
bahuri āi dekhā suta soī| hṛdaya~ kaṃpa mana dhīra na hoī ||
ihā~ uhā~ dui bālaka dekhā| matibhrama mora ki āna biseṣā ||
dekhi rāma jananī akulānī| prabhu ha~si dīnha madhura musukānī ||

do. dekharāvā mātahi nija adabhuta rupa akhaṃḍa|
roma roma prati lāge koṭi koṭi brahmaṃḍa || 201 ||

aganita rabi sasi siva caturānana| bahu giri sarita siṃdhu mahi kānana ||
kāla karma guna gyāna subhāū| sou dekhā jo sunā na kāū ||
dekhī māyā saba bidhi gāṛhī| ati sabhīta joreṃ kara ṭhāṛhī ||
dekhā jīva nacāvai jāhī| dekhī bhagati jo chorai tāhī ||
tana pulakita mukha bacana na āvā| nayana mūdi caranani siru nāvā ||
bisamayavaṃta dekhi mahatārī| bhae bahuri sisurūpa kharārī ||
astuti kari na jāi bhaya mānā| jagata pitā maiṃ suta kari jānā ||
hari janani bahubidhi samujhāī| yaha jani katahu~ kahasi sunu māī ||

do. bāra bāra kausalyā binaya karai kara jori ||
aba jani kabahū~ byāpai prabhu mohi māyā tori || 202 ||

bālacarita hari bahubidhi kīnhā| ati anaṃda dāsanha kaha~ dīnhā ||
kachuka kāla bīteṃ saba bhāī| baṛe bhae parijana sukhadāī ||
cūṛākarana kīnha guru jāī| bipranha puni dachinā bahu pāī ||
parama manohara carita apārā| karata phirata cāriu sukumārā ||
mana krama bacana agocara joī| dasaratha ajira bicara prabhu soī ||
bhojana karata bola jaba rājā| nahiṃ āvata taji bāla samājā ||
kausalyā jaba bolana jāī| ṭhumaku ṭhumaku prabhu calahiṃ parāī ||
nigama neti siva aṃta na pāvā| tāhi dharai jananī haṭhi dhāvā ||
dhūrasa dhūri bhareṃ tanu āe| bhūpati bihasi goda baiṭhāe ||

do. bhojana karata capala cita ita uta avasaru pāi|
bhāji cale kilakata mukha dadhi odana lapaṭāi || 203 ||

bālacarita ati sarala suhāe| sārada seṣa saṃbhu śruti gāe ||
jina kara mana inha sana nahiṃ rātā| te jana baṃcita kie bidhātā ||
bhae kumāra jabahiṃ saba bhrātā| dīnha janeū guru pitu mātā ||
guragṛha~ gae paṛhana raghurāī| alapa kāla bidyā saba āī ||
jākī sahaja svāsa śruti cārī| so hari paṛha yaha kautuka bhārī ||
bidyā binaya nipuna guna sīlā| khelahiṃ khela sakala nṛpalīlā ||
karatala bāna dhanuṣa ati sohā| dekhata rūpa carācara mohā ||
jinha bīthinha biharahiṃ saba bhāī| thakita hohiṃ saba loga lugāī ||

do. kosalapura bāsī nara nāri bṛddha aru bāla|
prānahu te priya lāgata saba kahu~ rāma kṛpāla || 204 ||

baṃdhu sakhā saṃga lehiṃ bolāī| bana mṛgayā nita khelahiṃ jāī ||
pāvana mṛga mārahiṃ jiya~ jānī| dina prati nṛpahi dekhāvahiṃ ānī ||
je mṛga rāma bāna ke māre| te tanu taji suraloka sidhāre ||
anuja sakhā sa~ga bhojana karahīṃ| mātu pitā agyā anusarahīṃ ||
jehi bidhi sukhī hohiṃ pura logā| karahiṃ kṛpānidhi soi saṃjogā ||
beda purāna sunahiṃ mana lāī| āpu kahahiṃ anujanha samujhāī ||
prātakāla uṭhi kai raghunāthā| mātu pitā guru nāvahiṃ māthā ||
āyasu māgi karahiṃ pura kājā| dekhi carita haraṣai mana rājā ||

do. byāpaka akala anīha aja nirguna nāma na rūpa|
bhagata hetu nānā bidhi karata caritra anūpa || 205 ||

yaha saba carita kahā maiṃ gāī| āgili kathā sunahu mana lāī ||
bisvāmitra mahāmuni gyānī| basahi bipina subha āśrama jānī ||
jaha~ japa jagya muni karahī| ati mārīca subāhuhi ḍarahīṃ ||
dekhata jagya nisācara dhāvahi| karahi upadrava muni dukha pāvahiṃ ||
gādhitanaya mana ciṃtā byāpī| hari binu marahi na nisicara pāpī ||
taba munivara mana kīnha bicārā| prabhu avatareu harana mahi bhārā ||
ehu~ misa dekhauṃ pada jāī| kari binatī ānau dou bhāī ||
gyāna birāga sakala guna ayanā| so prabhu mai dekhaba bhari nayanā ||

do. bahubidhi karata manoratha jāta lāgi nahiṃ bāra|
kari majjana saraū jala gae bhūpa darabāra || 206 ||

muni āgamana sunā jaba rājā| milana gayaū lai bipra samājā ||
kari daṃḍavata munihi sanamānī| nija āsana baiṭhārenhi ānī ||
carana pakhāri kīnhi ati pūjā| mo sama āju dhanya nahiṃ dūjā ||
bibidha bhā~ti bhojana karavāvā| munivara hṛdaya~ haraṣa ati pāvā ||
puni caranani mele suta cārī| rāma dekhi muni deha bisārī ||
bhae magana dekhata mukha sobhā| janu cakora pūrana sasi lobhā ||
taba mana haraṣi bacana kaha rāū| muni asa kṛpā na kīnhihu kāū ||
kehi kārana āgamana tumhārā| kahahu so karata na lāvau~ bārā ||
asura samūha satāvahiṃ mohī| mai jācana āyau~ nṛpa tohī ||
anuja sameta dehu raghunāthā| nisicara badha maiṃ hoba sanāthā ||

do. dehu bhūpa mana haraṣita tajahu moha agyāna|
dharma sujasa prabhu tumha kauṃ inha kaha~ ati kalyāna || 207 ||

suni rājā ati apriya bānī| hṛdaya kaṃpa mukha duti kumulānī ||
cautheṃpana pāyau~ suta cārī| bipra bacana nahiṃ kahehu bicārī ||
māgahu bhūmi dhenu dhana kosā| sarbasa deu~ āju saharosā ||
deha prāna teṃ priya kachu nāhī| sou muni deu~ nimiṣa eka māhī ||
saba suta priya mohi prāna ki nāīṃ| rāma deta nahiṃ banai gosāī ||
kaha~ nisicara ati ghora kaṭhorā| kaha~ suṃdara suta parama kisorā ||
suni nṛpa girā prema rasa sānī| hṛdaya~ haraṣa mānā muni gyānī ||
taba basiṣṭa bahu nidhi samujhāvā| nṛpa saṃdeha nāsa kaha~ pāvā ||
ati ādara dou tanaya bolāe| hṛdaya~ lāi bahu bhā~ti sikhāe ||
mere prāna nātha suta doū| tumha muni pitā āna nahiṃ koū ||

do. sauṃpe bhūpa riṣihi suta bahu bidhi dei asīsa|
jananī bhavana gae prabhu cale nāi pada sīsa || 208(ka) ||

so. puruṣasiṃha dou bīra haraṣi cale muni bhaya harana ||
kṛpāsiṃdhu matidhīra akhila bisva kārana karana || 208(kha)

aruna nayana ura bāhu bisālā| nīla jalaja tanu syāma tamālā ||
kaṭi paṭa pīta kaseṃ bara bhāthā| rucira cāpa sāyaka duhu~ hāthā ||
syāma gaura suṃdara dou bhāī| bisbāmitra mahānidhi pāī ||
prabhu brahmanyadeva mai jānā| mohi niti pitā tajehu bhagavānā ||
cale jāta muni dīnhi dikhāī| suni tāṛakā krodha kari dhāī ||
ekahiṃ bāna prāna hari līnhā| dīna jāni tehi nija pada dīnhā ||
taba riṣi nija nāthahi jiya~ cīnhī| bidyānidhi kahu~ bidyā dīnhī ||
jāte lāga na chudhā pipāsā| atulita bala tanu teja prakāsā ||

do. āyuṣa saba samarpi kai prabhu nija āśrama āni|
kaṃda mūla phala bhojana dīnha bhagati hita jāni || 209 ||

prāta kahā muni sana raghurāī| nirbhaya jagya karahu tumha jāī ||
homa karana lāge muni jhārī| āpu rahe makha kīṃ rakhavārī ||
suni mārīca nisācara krohī| lai sahāya dhāvā munidrohī ||
binu phara bāna rāma tehi mārā| sata jojana gā sāgara pārā ||
pāvaka sara subāhu puni mārā| anuja nisācara kaṭaku sa~ghārā ||
māri asura dvija nirmayakārī| astuti karahiṃ deva muni jhārī ||
taha~ puni kachuka divasa raghurāyā| rahe kīnhi bipranha para dāyā ||
bhagati hetu bahu kathā purānā| kahe bipra jadyapi prabhu jānā ||
taba muni sādara kahā bujhāī| carita eka prabhu dekhia jāī ||
dhanuṣajagya muni raghukula nāthā| haraṣi cale munibara ke sāthā ||
āśrama eka dīkha maga māhīṃ| khaga mṛga jīva jaṃtu taha~ nāhīṃ ||
pūchā munihi silā prabhu dekhī| sakala kathā muni kahā biseṣī ||

do. gautama nāri śrāpa basa upala deha dhari dhīra|
carana kamala raja cāhati kṛpā karahu raghubīra || 210 ||

chaṃ. parasata pada pāvana soka nasāvana pragaṭa bhaī tapapuṃja sahī|
dekhata raghunāyaka jana sukha dāyaka sanamukha hoi kara jori rahī ||
ati prema adhīrā pulaka sarīrā mukha nahiṃ āvai bacana kahī|
atisaya baṛabhāgī carananhi lāgī jugala nayana jaladhāra bahī ||
dhīraju mana kīnhā prabhu kahu~ cīnhā raghupati kṛpā~ bhagati pāī|
ati nirmala bānīṃ astuti ṭhānī gyānagamya jaya raghurāī ||
mai nāri apāvana prabhu jaga pāvana rāvana ripu jana sukhadāī|
rājīva bilocana bhava bhaya mocana pāhi pāhi saranahiṃ āī ||
muni śrāpa jo dīnhā ati bhala kīnhā parama anugraha maiṃ mānā|
dekheu~ bhari locana hari bhavamocana ihai lābha saṃkara jānā ||
binatī prabhu morī maiṃ mati bhorī nātha na māgau~ bara ānā|
pada kamala parāgā rasa anurāgā mama mana madhupa karai pānā ||
jehiṃ pada surasaritā parama punītā pragaṭa bhaī siva sīsa dharī|
soi pada paṃkaja jehi pūjata aja mama sira dhareu kṛpāla harī ||
ehi bhā~ti sidhārī gautama nārī bāra bāra hari carana parī|
jo ati mana bhāvā so baru pāvā gai patiloka anaṃda bharī ||

do. asa prabhu dīnabaṃdhu hari kārana rahita dayāla|
tulasidāsa saṭha tehi bhaju chāṛi kapaṭa jaṃjāla || 211 ||

māsapārāyaṇa, sātavā~ viśrāma
cale rāma lachimana muni saṃgā| gae jahā~ jaga pāvani gaṃgā ||
gādhisūnu saba kathā sunāī| jehi prakāra surasari mahi āī ||
taba prabhu riṣinha sameta nahāe| bibidha dāna mahidevanhi pāe ||
haraṣi cale muni bṛṃda sahāyā| begi bideha nagara niarāyā ||
pura ramyatā rāma jaba dekhī| haraṣe anuja sameta biseṣī ||
bāpīṃ kūpa sarita sara nānā| salila sudhāsama mani sopānā ||
guṃjata maṃju matta rasa bhṛṃgā| kūjata kala bahubarana bihaṃgā ||
barana barana bikase bana jātā| tribidha samīra sadā sukhadātā ||

do. sumana bāṭikā bāga bana bipula bihaṃga nivāsa|
phūlata phalata supallavata sohata pura cahu~ pāsa || 212 ||

banai na baranata nagara nikāī| jahā~ jāi mana taha~i~ lobhāī ||
cāru bajāru bicitra a~bārī| manimaya bidhi janu svakara sa~vārī ||
dhanika banika bara dhanada samānā| baiṭha sakala bastu lai nānā ||
cauhaṭa suṃdara galīṃ suhāī| saṃtata rahahiṃ sugaṃdha siṃcāī ||
maṃgalamaya maṃdira saba kereṃ| citrita janu ratinātha citereṃ ||
pura nara nāri subhaga suci saṃtā| dharamasīla gyānī gunavaṃtā ||
ati anūpa jaha~ janaka nivāsū| bithakahiṃ bibudha biloki bilāsū ||
hota cakita cita koṭa bilokī| sakala bhuvana sobhā janu rokī ||

do. dhavala dhāma mani puraṭa paṭa sughaṭita nānā bhā~ti|
siya nivāsa suṃdara sadana sobhā kimi kahi jāti || 213 ||

subhaga dvāra saba kulisa kapāṭā| bhūpa bhīra naṭa māgadha bhāṭā ||
banī bisāla bāji gaja sālā| haya gaya ratha saṃkula saba kālā ||
sūra saciva senapa bahutere| nṛpagṛha sarisa sadana saba kere ||
pura bāhera sara sārita samīpā| utare jaha~ taha~ bipula mahīpā ||
dekhi anūpa eka a~varāī| saba supāsa saba bhā~ti suhāī ||
kausika kaheu mora manu mānā| ihā~ rahia raghubīra sujānā ||
bhalehiṃ nātha kahi kṛpāniketā| utare taha~ munibṛṃda sametā ||
bisvāmitra mahāmuni āe| samācāra mithilāpati pāe ||

do. saṃga saciva suci bhūri bhaṭa bhūsura bara gura gyāti|
cale milana munināyakahi mudita rāu ehi bhā~ti || 214 ||

kīnha pranāmu carana dhari māthā| dīnhi asīsa mudita munināthā ||
biprabṛṃda saba sādara baṃde| jāni bhāgya baṛa rāu anaṃde ||
kusala prasna kahi bārahiṃ bārā| bisvāmitra nṛpahi baiṭhārā ||
tehi avasara āe dou bhāī| gae rahe dekhana phulavāī ||
syāma gaura mṛdu bayasa kisorā| locana sukhada bisva cita corā ||
uṭhe sakala jaba raghupati āe| bisvāmitra nikaṭa baiṭhāe ||
bhae saba sukhī dekhi dou bhrātā| bāri bilocana pulakita gātā ||
mūrati madhura manohara dekhī| bhayau bidehu bidehu biseṣī ||

do. prema magana manu jāni nṛpu kari bibeku dhari dhīra|
boleu muni pada nāi siru gadagada girā gabhīra || 215 ||

kahahu nātha suṃdara dou bālaka| munikula tilaka ki nṛpakula pālaka ||
brahma jo nigama neti kahi gāvā| ubhaya beṣa dhari kī soi āvā ||
sahaja birāgarupa manu morā| thakita hota jimi caṃda cakorā ||
tāte prabhu pūchau~ satibhāū| kahahu nātha jani karahu durāū ||
inhahi bilokata ati anurāgā| barabasa brahmasukhahi mana tyāgā ||
kaha muni bihasi kahehu nṛpa nīkā| bacana tumhāra na hoi alīkā ||
e priya sabahi jahā~ lagi prānī| mana musukāhiṃ rāmu suni bānī ||
raghukula mani dasaratha ke jāe| mama hita lāgi naresa paṭhāe ||

do. rāmu lakhanu dou baṃdhubara rūpa sīla bala dhāma|
makha rākheu sabu sākhi jagu jite asura saṃgrāma || 216 ||


muni tava carana dekhi kaha rāū| kahi na sakau~ nija punya prābhāū ||
suṃdara syāma gaura dou bhrātā| āna~dahū ke āna~da dātā ||
inha kai prīti parasapara pāvani| kahi na jāi mana bhāva suhāvani ||
sunahu nātha kaha mudita bidehū| brahma jīva iva sahaja sanehū ||
puni puni prabhuhi citava naranāhū| pulaka gāta ura adhika uchāhū ||
mrunihi prasaṃsi nāi pada sīsū| caleu lavāi nagara avanīsū ||
suṃdara sadanu sukhada saba kālā| tahā~ bāsu lai dīnha bhuālā ||
kari pūjā saba bidhi sevakāī| gayau rāu gṛha bidā karāī ||

do. riṣaya saṃga raghubaṃsa mani kari bhojanu biśrāmu|
baiṭhe prabhu bhrātā sahita divasu rahā bhari jāmu || 217 ||

lakhana hṛdaya~ lālasā biseṣī| jāi janakapura āia dekhī ||
prabhu bhaya bahuri munihi sakucāhīṃ| pragaṭa na kahahiṃ manahiṃ musukāhīṃ ||
rāma anuja mana kī gati jānī| bhagata bachalatā hiṃya~ hulasānī ||
parama binīta sakuci musukāī| bole gura anusāsana pāī ||
nātha lakhanu puru dekhana cahahīṃ| prabhu sakoca ḍara pragaṭa na kahahīṃ ||
jauṃ rāura āyasu maiṃ pāvauṃ| nagara dekhāi turata lai āvau ||
suni munīsu kaha bacana saprītī| kasa na rāma tumha rākhahu nītī ||
dharama setu pālaka tumha tātā| prema bibasa sevaka sukhadātā ||

do. jāi dekhī āvahu nagaru sukha nidhāna dou bhāi|
karahu suphala saba ke nayana suṃdara badana dekhāi || 218 ||

māsapārāyaṇa, āṭhavā~ viśrāma
navānhapārāyaṇa, dūsarā viśrāma
muni pada kamala baṃdi dou bhrātā| cale loka locana sukha dātā ||
bālaka bṛṃdi dekhi ati sobhā| lage saṃga locana manu lobhā ||
pīta basana parikara kaṭi bhāthā| cāru cāpa sara sohata hāthā ||
tana anuharata sucaṃdana khorī| syāmala gaura manohara jorī ||
kehari kaṃdhara bāhu bisālā| ura ati rucira nāgamani mālā ||
subhaga sona sarasīruha locana| badana mayaṃka tāpatraya mocana ||
kānanhi kanaka phūla chabi dehīṃ| citavata citahi cori janu lehīṃ ||
citavani cāru bhṛkuṭi bara bā~kī| tilaka rekhā sobhā janu cā~kī ||

do. rucira cautanīṃ subhaga sira mecaka kuṃcita kesa|
nakha sikha suṃdara baṃdhu dou sobhā sakala sudesa || 219 ||

dekhana nagaru bhūpasuta āe| samācāra purabāsiṃha pāe ||
dhāe dhāma kāma saba tyāgī| manahu raṃka nidhi lūṭana lāgī ||
nirakhi sahaja suṃdara dou bhāī| hohiṃ sukhī locana phala pāī ||
jubatīṃ bhavana jharokhanhi lāgīṃ| nirakhahiṃ rāma rūpa anurāgīṃ ||
kahahiṃ parasapara bacana saprītī| sakhi inha koṭi kāma chabi jītī ||
sura nara asura nāga muni māhīṃ| sobhā asi kahu~ suniati nāhīṃ ||
biṣnu cāri bhuja bighi mukha cārī| bikaṭa beṣa mukha paṃca purārī ||
apara deu asa kou na āhī| yaha chabi sakhi paṭataria jāhī ||

do. baya kisora suṣamā sadana syāma gaura sukha dhāma |
aṃga aṃga para vāriahiṃ koṭi koṭi sata kāma || 220 ||

kahahu sakhī asa ko tanudhārī| jo na moha yaha rūpa nihārī ||
kou saprema bolī mṛdu bānī| jo maiṃ sunā so sunahu sayānī ||
e doū dasaratha ke ḍhoṭā| bāla marālanhi ke kala joṭā ||
muni kausika makha ke rakhavāre| jinha rana ajira nisācara māre ||
syāma gāta kala kaṃja bilocana| jo mārīca subhuja madu mocana ||
kausalyā suta so sukha khānī| nāmu rāmu dhanu sāyaka pānī ||
gaura kisora beṣu bara kācheṃ| kara sara cāpa rāma ke pācheṃ ||
lachimanu nāmu rāma laghu bhrātā| sunu sakhi tāsu sumitrā mātā ||

do. biprakāju kari baṃdhu dou maga munibadhū udhāri|
āe dekhana cāpamakha suni haraṣīṃ saba nāri || 221 ||

dekhi rāma chabi kou eka kahaī| jogu jānakihi yaha baru ahaī ||
jau sakhi inhahi dekha naranāhū| pana parihari haṭhi karai bibāhū ||
kou kaha e bhūpati pahicāne| muni sameta sādara sanamāne ||
sakhi paraṃtu panu rāu na tajaī| bidhi basa haṭhi abibekahi bhajaī ||
kou kaha jauṃ bhala ahai bidhātā| saba kaha~ sunia ucita phaladātā ||
tau jānakihi milihi baru ehū| nāhina āli ihā~ saṃdehū ||
jau bidhi basa asa banai sa~jogū| tau kṛtakṛtya hoi saba logū ||
sakhi hamareṃ ārati ati tāteṃ| kabahu~ka e āvahiṃ ehi nāteṃ ||

do. nāhiṃ ta hama kahu~ sunahu sakhi inha kara darasanu dūri|
yaha saṃghaṭu taba hoi jaba punya purākṛta bhūri || 222 ||

bolī apara kahehu sakhi nīkā| ehiṃ biāha ati hita sabahīṃ kā ||
kou kaha saṃkara cāpa kaṭhorā| e syāmala mṛdugāta kisorā ||
sabu asamaṃjasa ahai sayānī| yaha suni apara kahai mṛdu bānī ||
sakhi inha kaha~ kou kou asa kahahīṃ| baṛa prabhāu dekhata laghu ahahīṃ ||
parasi jāsu pada paṃkaja dhūrī| tarī ahalyā kṛta agha bhūrī ||
so ki rahihi binu sivadhanu toreṃ| yaha pratīti pariharia na bhoreṃ ||
jehiṃ biraṃci raci sīya sa~vārī| tehiṃ syāmala baru raceu bicārī ||
tāsu bacana suni saba haraṣānīṃ| aisei hou kahahiṃ mudu bānī ||

do. hiya~ haraṣahiṃ baraṣahiṃ sumana sumukhi sulocani bṛṃda|
jāhiṃ jahā~ jaha~ baṃdhu dou taha~ taha~ paramānaṃda || 223 ||

pura pūraba disi ge dou bhāī| jaha~ dhanumakha hita bhūmi banāī ||
ati bistāra cāru gaca ḍhārī| bimala bedikā rucira sa~vārī ||
cahu~ disi kaṃcana maṃca bisālā| race jahā~ beṭhahiṃ mahipālā ||
tehi pācheṃ samīpa cahu~ pāsā| apara maṃca maṃḍalī bilāsā ||
kachuka ū~ci saba bhā~ti suhāī| baiṭhahiṃ nagara loga jaha~ jāī ||
tinha ke nikaṭa bisāla suhāe| dhavala dhāma bahubarana banāe ||
jaha~ baiṃṭhaiṃ dekhahiṃ saba nārī| jathā jogu nija kula anuhārī ||
pura bālaka kahi kahi mṛdu bacanā| sādara prabhuhi dekhāvahiṃ racanā ||

do. saba sisu ehi misa premabasa parasi manohara gāta|
tana pulakahiṃ ati haraṣu hiya~ dekhi dekhi dou bhrāta || 224 ||

sisu saba rāma premabasa jāne| prīti sameta niketa bakhāne ||
nija nija ruci saba leṃhiṃ bolāī| sahita saneha jāhiṃ dou bhāī ||
rāma dekhāvahiṃ anujahi racanā| kahi mṛdu madhura manohara bacanā ||
lava nimeṣa maha~ bhuvana nikāyā| racai jāsu anusāsana māyā ||
bhagati hetu soi dīnadayālā| citavata cakita dhanuṣa makhasālā ||
kautuka dekhi cale guru pāhīṃ| jāni bilaṃbu trāsa mana māhīṃ ||
jāsu trāsa ḍara kahu~ ḍara hoī| bhajana prabhāu dekhāvata soī ||
kahi bāteṃ mṛdu madhura suhāīṃ| kie bidā bālaka bariāī ||

do. sabhaya saprema binīta ati sakuca sahita dou bhāi|
gura pada paṃkaja nāi sira baiṭhe āyasu pāi || 225 ||

nisi prabesa muni āyasu dīnhā| sabahīṃ saṃdhyābaṃdanu kīnhā ||
kahata kathā itihāsa purānī| rucira rajani juga jāma sirānī ||
munibara sayana kīnhi taba jāī| lage carana cāpana dou bhāī ||
jinha ke carana saroruha lāgī| karata bibidha japa joga birāgī ||
tei dou baṃdhu prema janu jīte| gura pada kamala paloṭata prīte ||
bārabāra muni agyā dīnhī| raghubara jāi sayana taba kīnhī ||
cāpata carana lakhanu ura lāe~| sabhaya saprema parama sacu pāe~ ||
puni puni prabhu kaha sovahu tātā| pauṛhe dhari ura pada jalajātā ||

do. uṭhe lakhana nisi bigata suni arunasikhā dhuni kāna ||
gura teṃ pahilehiṃ jagatapati jāge rāmu sujāna || 226 ||

sakala sauca kari jāi nahāe| nitya nibāhi munihi sira nāe ||
samaya jāni gura āyasu pāī| lena prasūna cale dou bhāī ||
bhūpa bāgu bara dekheu jāī| jaha~ basaṃta ritu rahī lobhāī ||
lāge biṭapa manohara nānā| barana barana bara beli bitānā ||
nava pallava phala sumāna suhāe| nija saṃpati sura rūkha lajāe ||
cātaka kokila kīra cakorā| kūjata bihaga naṭata kala morā ||
madhya bāga saru soha suhāvā| mani sopāna bicitra banāvā ||
bimala salilu sarasija bahuraṃgā| jalakhaga kūjata guṃjata bhṛṃgā ||

do. bāgu taṛāgu biloki prabhu haraṣe baṃdhu sameta|
parama ramya ārāmu yahu jo rāmahi sukha deta || 227 ||

cahu~ disi citai pū~chi māligana| lage lena dala phūla mudita mana ||
tehi avasara sītā taha~ āī| girijā pūjana janani paṭhāī ||
saṃga sakhīṃ saba subhaga sayānī| gāvahiṃ gīta manohara bānī ||
sara samīpa girijā gṛha sohā| barani na jāi dekhi manu mohā ||
majjanu kari sara sakhinha sametā| gaī mudita mana gauri niketā ||
pūjā kīnhi adhika anurāgā| nija anurūpa subhaga baru māgā ||
eka sakhī siya saṃgu bihāī| gaī rahī dekhana phulavāī ||
tehi dou baṃdhu biloke jāī| prema bibasa sītā pahiṃ āī ||

do. tāsu dasā dekhi sakhinha pulaka gāta jalu naina|
kahu kāranu nija haraṣa kara pūchahi saba mṛdu baina || 228 ||

dekhana bāgu kua~ra dui āe| baya kisora saba bhā~ti suhāe ||
syāma gaura kimi kahauṃ bakhānī| girā anayana nayana binu bānī ||
suni haraṣī~ saba sakhīṃ sayānī| siya hiya~ ati utakaṃṭhā jānī ||
eka kahai nṛpasuta tei ālī| sune je muni sa~ga āe kālī ||
jinha nija rūpa mohanī ḍārī| kīnha svabasa nagara nara nārī ||
baranata chabi jaha~ taha~ saba logū| avasi dekhiahiṃ dekhana jogū ||
tāsu vacana ati siyahi suhāne| darasa lāgi locana akulāne ||
calī agra kari priya sakhi soī| prīti purātana lakhai na koī ||

do. sumiri sīya nārada bacana upajī prīti punīta ||
cakita bilokati sakala disi janu sisu mṛgī sabhīta || 229 ||

kaṃkana kiṃkini nūpura dhuni suni| kahata lakhana sana rāmu hṛdaya~ guni ||
mānahu~ madana duṃdubhī dīnhī || manasā bisva bijaya kaha~ kīnhī ||
asa kahi phiri citae tehi orā| siya mukha sasi bhae nayana cakorā ||
bhae bilocana cāru acaṃcala| manahu~ sakuci nimi taje digaṃcala ||
dekhi sīya sobhā sukhu pāvā| hṛdaya~ sarāhata bacanu na āvā ||
janu biraṃci saba nija nipunāī| biraci bisva kaha~ pragaṭi dekhāī ||
suṃdaratā kahu~ suṃdara karaī| chabigṛha~ dīpasikhā janu baraī ||
saba upamā kabi rahe juṭhārī| kehiṃ paṭatarauṃ bidehakumārī ||

do. siya sobhā hiya~ barani prabhu āpani dasā bicāri|
bole suci mana anuja sana bacana samaya anuhāri || 230 ||

tāta janakatanayā yaha soī| dhanuṣajagya jehi kārana hoī ||
pūjana gauri sakhīṃ lai āī| karata prakāsu phirai phulavāī ||
jāsu biloki alokika sobhā| sahaja punīta mora manu chobhā ||
so sabu kārana jāna bidhātā| pharakahiṃ subhada aṃga sunu bhrātā ||
raghubaṃsiṃha kara sahaja subhāū| manu kupaṃtha pagu dharai na kāū ||
mohi atisaya pratīti mana kerī| jehiṃ sapanehu~ paranāri na herī ||
jinha kai lahahiṃ na ripu rana pīṭhī| nahiṃ pāvahiṃ paratiya manu ḍīṭhī ||
maṃgana lahahi na jinha kai nāhīṃ| te narabara thore jaga māhīṃ ||

do. karata batakahi anuja sana mana siya rūpa lobhāna|
mukha saroja makaraṃda chabi karai madhupa iva pāna || 231 ||

citavahi cakita cahū~ disi sītā| kaha~ gae nṛpakisora manu ciṃtā ||
jaha~ biloka mṛga sāvaka nainī| janu taha~ barisa kamala sita śrenī ||
latā oṭa taba sakhinha lakhāe| syāmala gaura kisora suhāe ||
dekhi rūpa locana lalacāne| haraṣe janu nija nidhi pahicāne ||
thake nayana raghupati chabi dekheṃ| palakanhihū~ pariharīṃ nimeṣeṃ ||
adhika saneha~ deha bhai bhorī| sarada sasihi janu citava cakorī ||
locana maga rāmahi ura ānī| dīnhe palaka kapāṭa sayānī ||
jaba siya sakhinha premabasa jānī| kahi na sakahiṃ kachu mana sakucānī ||

do. latābhavana teṃ pragaṭa bhe tehi avasara dou bhāi|
nikase janu juga bimala bidhu jalada paṭala bilagāi || 232 ||

sobhā sīva~ subhaga dou bīrā| nīla pīta jalajābha sarīrā ||
morapaṃkha sira sohata nīke| guccha bīca bica kusuma kalī ke ||
bhāla tilaka śramabiṃdu suhāe| śravana subhaga bhūṣana chabi chāe ||
bikaṭa bhṛkuṭi kaca ghūgharavāre| nava saroja locana ratanāre ||
cāru cibuka nāsikā kapolā| hāsa bilāsa leta manu molā ||
mukhachabi kahi na jāi mohi pāhīṃ| jo biloki bahu kāma lajāhīṃ ||
ura mani māla kaṃbu kala gīvā| kāma kalabha kara bhuja balasīṃvā ||
sumana sameta bāma kara donā| sāva~ra kua~ra sakhī suṭhi lonā ||

do. kehari kaṭi paṭa pīta dhara suṣamā sīla nidhāna|
dekhi bhānukulabhūṣanahi bisarā sakhinha apāna || 233 ||

dhari dhīraju eka āli sayānī| sītā sana bolī gahi pānī ||
bahuri gauri kara dhyāna karehū| bhūpakisora dekhi kina lehū ||
sakuci sīya~ taba nayana ughāre| sanamukha dou raghusiṃgha nihāre ||
nakha sikha dekhi rāma kai sobhā| sumiri pitā panu manu ati chobhā ||
parabasa sakhinha lakhī jaba sītā| bhayau gaharu saba kahahi sabhītā ||
puni āuba ehi beriā~ kālī| asa kahi mana bihasī eka ālī ||
gūṛha girā suni siya sakucānī| bhayau bilaṃbu mātu bhaya mānī ||
dhari baṛi dhīra rāmu ura āne| phiri apanapau pitubasa jāne ||

do. dekhana misa mṛga bihaga taru phirai bahori bahori|
nirakhi nirakhi raghubīra chabi bāṛhai prīti na thori || 234 ||

jāni kaṭhina sivacāpa bisūrati| calī rākhi ura syāmala mūrati ||
prabhu jaba jāta jānakī jānī| sukha saneha sobhā guna khānī ||
parama premamaya mṛdu masi kīnhī| cāru cita bhītīṃ likha līnhī ||
gaī bhavānī bhavana bahorī| baṃdi carana bolī kara jorī ||
jaya jaya giribararāja kisorī| jaya mahesa mukha caṃda cakorī ||
jaya gaja badana ṣaṛānana mātā| jagata janani dāmini duti gātā ||
nahiṃ tava ādi madhya avasānā| amita prabhāu bedu nahiṃ jānā ||
bhava bhava bibhava parābhava kārini| bisva bimohani svabasa bihārini ||

do. patidevatā sutīya mahu~ mātu prathama tava rekha|
mahimā amita na sakahiṃ kahi sahasa sāradā seṣa || 235 ||


sevata tohi sulabha phala cārī| baradāyanī purāri piārī ||
debi pūji pada kamala tumhāre| sura nara muni saba hohiṃ sukhāre ||
mora manorathu jānahu nīkeṃ| basahu sadā ura pura sabahī keṃ ||
kīnheu~ pragaṭa na kārana tehīṃ| asa kahi carana gahe baidehīṃ ||
binaya prema basa bhaī bhavānī| khasī māla mūrati musukānī ||
sādara siya~ prasādu sira dhareū| bolī gauri haraṣu hiya~ bhareū ||
sunu siya satya asīsa hamārī| pūjihi mana kāmanā tumhārī ||
nārada bacana sadā suci sācā| so baru milihi jāhiṃ manu rācā ||

chaṃ. manu jāhiṃ rāceu milihi so baru sahaja suṃdara sā~varo|
karunā nidhāna sujāna sīlu sanehu jānata rāvaro ||
ehi bhā~ti gauri asīsa suni siya sahita hiya~ haraṣīṃ alī|
tulasī bhavānihi pūji puni puni mudita mana maṃdira calī ||

so. jāni gauri anukūla siya hiya haraṣu na jāi kahi|
maṃjula maṃgala mūla bāma aṃga pharakana lage || 236 ||

hṛdaya~ sarāhata sīya lonāī| gura samīpa gavane dou bhāī ||
rāma kahā sabu kausika pāhīṃ| sarala subhāu chuata chala nāhīṃ ||
sumana pāi muni pūjā kīnhī| puni asīsa duhu bhāinha dīnhī ||
suphala manoratha hohu~ tumhāre| rāmu lakhanu suni bhae sukhāre ||
kari bhojanu munibara bigyānī| lage kahana kachu kathā purānī ||
bigata divasu guru āyasu pāī| saṃdhyā karana cale dou bhāī ||
prācī disi sasi uyau suhāvā| siya mukha sarisa dekhi sukhu pāvā ||
bahuri bicāru kīnha mana māhīṃ| sīya badana sama himakara nāhīṃ ||

do. janamu siṃdhu puni baṃdhu biṣu dina malīna sakalaṃka|
siya mukha samatā pāva kimi caṃdu bāpuro raṃka || 237 ||

ghaṭai baṛhai birahani dukhadāī| grasai rāhu nija saṃdhihiṃ pāī ||
koka sikaprada paṃkaja drohī| avaguna bahuta caṃdramā tohī ||
baidehī mukha paṭatara dīnhe| hoi doṣa baṛa anucita kīnhe ||
siya mukha chabi bidhu byāja bakhānī| guru pahiṃ cale nisā baṛi jānī ||
kari muni carana saroja pranāmā| āyasu pāi kīnha biśrāmā ||
bigata nisā raghunāyaka jāge| baṃdhu biloki kahana asa lāge ||
udau aruna avalokahu tātā| paṃkaja koka loka sukhadātā ||
bole lakhanu jori juga pānī| prabhu prabhāu sūcaka mṛdu bānī ||

do. arunodaya~ sakuce kumuda uḍagana joti malīna|
jimi tumhāra āgamana suni bhae nṛpati balahīna || 238 ||

nṛpa saba nakhata karahiṃ ujiārī| ṭāri na sakahiṃ cāpa tama bhārī ||
kamala koka madhukara khaga nānā| haraṣe sakala nisā avasānā ||
aisehiṃ prabhu saba bhagata tumhāre| hoihahiṃ ṭūṭeṃ dhanuṣa sukhāre ||
uyau bhānu binu śrama tama nāsā| dure nakhata jaga teju prakāsā ||
rabi nija udaya byāja raghurāyā| prabhu pratāpu saba nṛpanha dikhāyā ||
tava bhuja bala mahimā udaghāṭī| pragaṭī dhanu bighaṭana paripāṭī ||
baṃdhu bacana suni prabhu musukāne| hoi suci sahaja punīta nahāne ||
nityakriyā kari guru pahiṃ āe| carana saroja subhaga sira nāe ||
satānaṃdu taba janaka bolāe| kausika muni pahiṃ turata paṭhāe ||
janaka binaya tinha āi sunāī| haraṣe boli lie dou bhāī ||

do. satānaṃdaa baṃdi prabhu baiṭhe gura pahiṃ jāi|
calahu tāta muni kaheu taba paṭhavā janaka bolāi || 239 ||

sīya svayaṃbaru dekhia jāī| īsu kāhi dhauṃ dei baṛāī ||
lakhana kahā jasa bhājanu soī| nātha kṛpā tava jāpara hoī ||
haraṣe muni saba suni bara bānī| dīnhi asīsa sabahiṃ sukhu mānī ||
puni munibṛṃda sameta kṛpālā| dekhana cale dhanuṣamakha sālā ||
raṃgabhūmi āe dou bhāī| asi sudhi saba purabāsiṃha pāī ||
cale sakala gṛha kāja bisārī| bāla jubāna jaraṭha nara nārī ||
dekhī janaka bhīra bhai bhārī| suci sevaka saba lie ha~kārī ||
turata sakala loganha pahiṃ jāhū| āsana ucita dehū saba kāhū ||

do. kahi mṛdu bacana binīta tinha baiṭhāre nara nāri|
uttama madhyama nīca laghu nija nija thala anuhāri || 240 ||

rājakua~ra tehi avasara āe| manahu~ manoharatā tana chāe ||
guna sāgara nāgara bara bīrā| suṃdara syāmala gaura sarīrā ||
rāja samāja birājata rūre| uḍagana mahu~ janu juga bidhu pūre ||
jinha keṃ rahī bhāvanā jaisī| prabhu mūrati tinha dekhī taisī ||
dekhahiṃ rūpa mahā ranadhīrā| manahu~ bīra rasu dhareṃ sarīrā ||
ḍare kuṭila nṛpa prabhuhi nihārī| manahu~ bhayānaka mūrati bhārī ||
rahe asura chala chonipa beṣā| tinha prabhu pragaṭa kālasama dekhā ||
purabāsiṃha dekhe dou bhāī| narabhūṣana locana sukhadāī ||

do. nāri bilokahiṃ haraṣi hiya~ nija nija ruci anurūpa|
janu sohata siṃgāra dhari mūrati parama anūpa || 241 ||

biduṣanha prabhu birāṭamaya dīsā| bahu mukha kara paga locana sīsā ||
janaka jāti avalokahiṃ kaisaiṃ| sajana sage priya lāgahiṃ jaiseṃ ||
sahita bideha bilokahiṃ rānī| sisu sama prīti na jāti bakhānī ||
joginha parama tattvamaya bhāsā| sāṃta suddha sama sahaja prakāsā ||
haribhagatanha dekhe dou bhrātā| iṣṭadeva iva saba sukha dātā ||
rāmahi citava bhāya~ jehi sīyā| so sanehu sukhu nahiṃ kathanīyā ||
ura anubhavati na kahi saka soū| kavana prakāra kahai kabi koū ||
ehi bidhi rahā jāhi jasa bhāū| tehiṃ tasa dekheu kosalarāū ||

do. rājata rāja samāja mahu~ kosalarāja kisora|
suṃdara syāmala gaura tana bisva bilocana cora || 242 ||

sahaja manohara mūrati doū| koṭi kāma upamā laghu soū ||
sarada caṃda niṃdaka mukha nīke| nīraja nayana bhāvate jī ke ||
citavata cāru māra manu haranī| bhāvati hṛdaya jāti nahīṃ baranī ||
kala kapola śruti kuṃḍala lolā| cibuka adhara suṃdara mṛdu bolā ||
kumudabaṃdhu kara niṃdaka hā~sā| bhṛkuṭī bikaṭa manohara nāsā ||
bhāla bisāla tilaka jhalakāhīṃ| kaca biloki ali avali lajāhīṃ ||
pīta cautanīṃ siranhi suhāī| kusuma kalīṃ bica bīca banāīṃ ||
rekheṃ rucira kaṃbu kala gīvā~| janu tribhuvana suṣamā kī sīvā~ ||

do. kuṃjara mani kaṃṭhā kalita uranhi tulasikā māla|
bṛṣabha kaṃdha kehari ṭhavani bala nidhi bāhu bisāla || 243 ||

kaṭi tūnīra pīta paṭa bā~dhe| kara sara dhanuṣa bāma bara kā~dhe ||
pīta jagya upabīta suhāe| nakha sikha maṃju mahāchabi chāe ||
dekhi loga saba bhae sukhāre| ekaṭaka locana calata na tāre ||
haraṣe janaku dekhi dou bhāī| muni pada kamala gahe taba jāī ||
kari binatī nija kathā sunāī| raṃga avani saba munihi dekhāī ||
jaha~ jaha~ jāhi kua~ra bara doū| taha~ taha~ cakita citava sabu koū ||
nija nija rukha rāmahi sabu dekhā| kou na jāna kachu maramu biseṣā ||
bhali racanā muni nṛpa sana kaheū| rājā~ mudita mahāsukha laheū ||

do. saba maṃcanha te maṃcu eka suṃdara bisada bisāla|
muni sameta dou baṃdhu taha~ baiṭhāre mahipāla || 244 ||

prabhuhi dekhi saba nṛpa hi~ya~ hāre| janu rākesa udaya bhae~ tāre ||
asi pratīti saba ke mana māhīṃ| rāma cāpa toraba saka nāhīṃ ||
binu bhaṃjehu~ bhava dhanuṣu bisālā| melihi sīya rāma ura mālā ||
asa bicāri gavanahu ghara bhāī| jasu pratāpu balu teju gavā~ī ||
bihase apara bhūpa suni bānī| je abibeka aṃdha abhimānī ||
torehu~ dhanuṣu byāhu avagāhā| binu toreṃ ko kua~ri biāhā ||
eka bāra kālau kina hoū| siya hita samara jitaba hama soū ||
yaha suni avara mahipa musakāne| dharamasīla haribhagata sayāne ||

so. sīya biāhabi rāma garaba dūri kari nṛpanha ke ||
jīti ko saka saṃgrāma dasaratha ke rana bā~kure || 245 ||

byartha marahu jani gāla bajāī| mana modakanhi ki bhūkha butāī ||
sikha hamāri suni parama punītā| jagadaṃbā jānahu jiya~ sītā ||
jagata pitā raghupatihi bicārī| bhari locana chabi lehu nihārī ||
suṃdara sukhada sakala guna rāsī| e dou baṃdhu saṃbhu ura bāsī ||
sudhā samudra samīpa bihāī| mṛgajalu nirakhi marahu kata dhāī ||
karahu jāi jā kahu~ joī bhāvā| hama tau āju janama phalu pāvā ||
asa kahi bhale bhūpa anurāge| rūpa anūpa bilokana lāge ||
dekhahiṃ sura nabha caṛhe bimānā| baraṣahiṃ sumana karahiṃ kala gānā ||

do. jāni suavasaru sīya taba paṭhaī janaka bolāī|
catura sakhīṃ suṃdara sakala sādara calīṃ lavāīṃ || 246 ||

siya sobhā nahiṃ jāi bakhānī| jagadaṃbikā rūpa guna khānī ||
upamā sakala mohi laghu lāgīṃ| prākṛta nāri aṃga anurāgīṃ ||
siya barania tei upamā deī| kukabi kahāi ajasu ko leī ||
jau paṭataria tīya sama sīyā| jaga asi jubati kahā~ kamanīyā ||
girā mukhara tana aradha bhavānī| rati ati dukhita atanu pati jānī ||
biṣa bārunī baṃdhu priya jehī| kahia ramāsama kimi baidehī ||
jau chabi sudhā payonidhi hoī| parama rūpamaya kacchapa soī ||
sobhā raju maṃdaru siṃgārū| mathai pāni paṃkaja nija mārū ||

do. ehi bidhi upajai lacchi jaba suṃdaratā sukha mūla|
tadapi sakoca sameta kabi kahahiṃ sīya samatūla || 247 ||

caliṃ saṃga lai sakhīṃ sayānī| gāvata gīta manohara bānī ||
soha navala tanu suṃdara sārī| jagata janani atulita chabi bhārī ||
bhūṣana sakala sudesa suhāe| aṃga aṃga raci sakhinha banāe ||
raṃgabhūmi jaba siya pagu dhārī| dekhi rūpa mohe nara nārī ||
haraṣi suranha duṃdubhīṃ bajāī| baraṣi prasūna apacharā gāī ||
pāni saroja soha jayamālā| avacaṭa citae sakala bhuālā ||
sīya cakita cita rāmahi cāhā| bhae mohabasa saba naranāhā ||
muni samīpa dekhe dou bhāī| lage lalaki locana nidhi pāī ||

do. gurajana lāja samāju baṛa dekhi sīya sakucāni ||
lāgi bilokana sakhinha tana raghubīrahi ura āni || 248 ||

rāma rūpu aru siya chabi dekheṃ| nara nārinha pariharīṃ nimeṣeṃ ||
socahiṃ sakala kahata sakucāhīṃ| bidhi sana binaya karahiṃ mana māhīṃ ||
haru bidhi begi janaka jaṛatāī| mati hamāri asi dehi suhāī ||
binu bicāra panu taji naranāhu| sīya rāma kara karai bibāhū ||
jaga bhala kahahi bhāva saba kāhū| haṭha kīnhe aṃtahu~ ura dāhū ||
ehiṃ lālasā~ magana saba logū| baru sā~varo jānakī jogū ||
taba baṃdījana janaka baulāe| biridāvalī kahata cali āe ||
kaha nṛpa jāi kahahu pana morā| cale bhāṭa hiya~ haraṣu na thorā ||

do. bole baṃdī bacana bara sunahu sakala mahipāla|
pana bideha kara kahahiṃ hama bhujā uṭhāi bisāla || 249 ||

nṛpa bhujabala bidhu sivadhanu rāhū| garua kaṭhora bidita saba kāhū ||
rāvanu bānu mahābhaṭa bhāre| dekhi sarāsana gava~hiṃ sidhāre ||
soi purāri kodaṃḍu kaṭhorā| rāja samāja āju joi torā ||
tribhuvana jaya sameta baidehī || binahiṃ bicāra barai haṭhi tehī ||
suni pana sakala bhūpa abhilāṣe| bhaṭamānī atisaya mana mākhe ||
parikara bā~dhi uṭhe akulāī| cale iṣṭadevanha sira nāī ||
tamaki tāki taki sivadhanu dharahīṃ| uṭhai na koṭi bhā~ti balu karahīṃ ||
jinha ke kachu bicāru mana māhīṃ| cāpa samīpa mahīpa na jāhīṃ ||

do. tamaki dharahiṃ dhanu mūṛha nṛpa uṭhai na calahiṃ lajāi|
manahu~ pāi bhaṭa bāhubalu adhiku adhiku garuāi || 250 ||

bhūpa sahasa dasa ekahi bārā| lage uṭhāvana ṭarai na ṭārā ||
ḍagai na saṃbhu sarāsana kaiseṃ| kāmī bacana satī manu jaiseṃ ||
saba nṛpa bhae jogu upahāsī| jaiseṃ binu birāga saṃnyāsī ||
kīrati bijaya bīratā bhārī| cale cāpa kara barabasa hārī ||
śrīhata bhae hāri hiya~ rājā| baiṭhe nija nija jāi samājā ||
nṛpanha biloki janaku akulāne| bole bacana roṣa janu sāne ||
dīpa dīpa ke bhūpati nānā| āe suni hama jo panu ṭhānā ||
deva danuja dhari manuja sarīrā| bipula bīra āe ranadhīrā ||

do. kua~ri manohara bijaya baṛi kīrati ati kamanīya|
pāvanihāra biraṃci janu raceu na dhanu damanīya || 251 ||

kahahu kāhi yahu lābhu na bhāvā| kāhu~ na saṃkara cāpa caṛhāvā ||
rahau caṛhāuba toraba bhāī| tilu bhari bhūmi na sake chaṛāī ||
aba jani kou mākhai bhaṭa mānī| bīra bihīna mahī maiṃ jānī ||
tajahu āsa nija nija gṛha jāhū| likhā na bidhi baidehi bibāhū ||
sukṛta jāi jauṃ panu pariharaū~| kua~ri kuāri rahau kā karaū~ ||
jo janateu~ binu bhaṭa bhubi bhāī| tau panu kari hoteu~ na ha~sāī ||
janaka bacana suni saba nara nārī| dekhi jānakihi bhae dukhārī ||
mākhe lakhanu kuṭila bhai~ bhauṃheṃ| radapaṭa pharakata nayana risauṃheṃ ||

do. kahi na sakata raghubīra ḍara lage bacana janu bāna|
nāi rāma pada kamala siru bole girā pramāna || 252 ||

raghubaṃsiṃha mahu~ jaha~ kou hoī| tehiṃ samāja asa kahai na koī ||
kahī janaka jasi anucita bānī| bidyamāna raghukula mani jānī ||
sunahu bhānukula paṃkaja bhānū| kahau~ subhāu na kachu abhimānū ||
jau tumhāri anusāsana pāvauṃ| kaṃduka iva brahmāṃḍa uṭhāvauṃ ||
kāce ghaṭa jimi ḍārauṃ phorī| sakau~ meru mūlaka jimi torī ||
tava pratāpa mahimā bhagavānā| ko bāpuro pināka purānā ||
nātha jāni asa āyasu hoū| kautuku karauṃ bilokia soū ||
kamala nāla jimi cāpha caṛhāvauṃ| jojana sata pramāna lai dhāvauṃ ||

do. torauṃ chatraka daṃḍa jimi tava pratāpa bala nātha|
jauṃ na karauṃ prabhu pada sapatha kara na dharauṃ dhanu bhātha || 253 ||

lakhana sakopa bacana je bole| ḍagamagāni mahi diggaja ḍole ||
sakala loka saba bhūpa ḍerāne| siya hiya~ haraṣu janaku sakucāne ||
gura raghupati saba muni mana māhīṃ| mudita bhae puni puni pulakāhīṃ ||
sayanahiṃ raghupati lakhanu nevāre| prema sameta nikaṭa baiṭhāre ||
bisvāmitra samaya subha jānī| bole ati sanehamaya bānī ||
uṭhahu rāma bhaṃjahu bhavacāpā| meṭahu tāta janaka paritāpā ||
suni guru bacana carana siru nāvā| haraṣu biṣādu na kachu ura āvā ||
ṭhāṛhe bhae uṭhi sahaja subhāe~| ṭhavani jubā mṛgarāju lajāe~ ||

do. udita udayagiri maṃca para raghubara bālapataṃga|
bikase saṃta saroja saba haraṣe locana bhṛṃga || 254 ||

nṛpanha keri āsā nisi nāsī| bacana nakhata avalī na prakāsī ||
mānī mahipa kumuda sakucāne| kapaṭī bhūpa ulūka lukāne ||
bhae bisoka koka muni devā| barisahiṃ sumana janāvahiṃ sevā ||
gura pada baṃdi sahita anurāgā| rāma muninha sana āyasu māgā ||
sahajahiṃ cale sakala jaga svāmī| matta maṃju bara kuṃjara gāmī ||
calata rāma saba pura nara nārī| pulaka pūri tana bhae sukhārī ||
baṃdi pitara sura sukṛta sa~bhāre| jauṃ kachu punya prabhāu hamāre ||
tau sivadhanu mṛnāla kī nāīṃ| torahu~ rāma ganesa gosāīṃ ||

do. rāmahi prema sameta lakhi sakhinha samīpa bolāi|
sītā mātu saneha basa bacana kahai bilakhāi || 255 ||

sakhi saba kautuka dekhanihāre| jeṭha kahāvata hitū hamāre ||
kou na bujhāi kahai gura pāhīṃ| e bālaka asi haṭha bhali nāhīṃ ||
rāvana bāna chuā nahiṃ cāpā| hāre sakala bhūpa kari dāpā ||
so dhanu rājakua~ra kara dehīṃ| bāla marāla ki maṃdara lehīṃ ||
bhūpa sayānapa sakala sirānī| sakhi bidhi gati kachu jāti na jānī ||
bolī catura sakhī mṛdu bānī| tejavaṃta laghu gania na rānī ||
kaha~ kuṃbhaja kaha~ siṃdhu apārā| soṣeu sujasu sakala saṃsārā ||
rabi maṃḍala dekhata laghu lāgā| udaya~ tāsu tibhuvana tama bhāgā ||

do. maṃtra parama laghu jāsu basa bidhi hari hara sura sarba|
mahāmatta gajarāja kahu~ basa kara aṃkusa kharba || 256 ||

kāma kusuma dhanu sāyaka līnhe| sakala bhuvana apane basa kīnhe ||
debi tajia saṃsau asa jānī| bhaṃjaba dhanuṣa rāmu sunu rānī ||
sakhī bacana suni bhai paratītī| miṭā biṣādu baṛhī ati prītī ||
taba rāmahi biloki baidehī| sabhaya hṛdaya~ binavati jehi tehī ||
manahīṃ mana manāva akulānī| hohu prasanna mahesa bhavānī ||
karahu saphala āpani sevakāī| kari hitu harahu cāpa garuāī ||
gananāyaka baradāyaka devā| āju lageṃ kīnhiu~ tua sevā ||
bāra bāra binatī suni morī| karahu cāpa gurutā ati thorī ||

do. dekhi dekhi raghubīra tana sura manāva dhari dhīra ||
bhare bilocana prema jala pulakāvalī sarīra || 257 ||

nīkeṃ nirakhi nayana bhari sobhā| pitu panu sumiri bahuri manu chobhā ||
ahaha tāta dāruni haṭha ṭhānī| samujhata nahiṃ kachu lābhu na hānī ||
saciva sabhaya sikha dei na koī| budha samāja baṛa anucita hoī ||
kaha~ dhanu kulisahu cāhi kaṭhorā| kaha~ syāmala mṛdugāta kisorā ||
bidhi kehi bhā~ti dharauṃ ura dhīrā| sirasa sumana kana bedhia hīrā ||
sakala sabhā kai mati bhai bhorī| aba mohi saṃbhucāpa gati torī ||
nija jaṛatā loganha para ḍārī| hohi harua raghupatihi nihārī ||
ati paritāpa sīya mana māhī| lava nimeṣa juga saba saya jāhīṃ ||

do. prabhuhi citai puni citava mahi rājata locana lola|
khelata manasija mīna juga janu bidhu maṃḍala ḍola || 258 ||

girā alini mukha paṃkaja rokī| pragaṭa na lāja nisā avalokī ||
locana jalu raha locana konā| jaise parama kṛpana kara sonā ||
sakucī byākulatā baṛi jānī| dhari dhīraju pratīti ura ānī ||
tana mana bacana mora panu sācā| raghupati pada saroja citu rācā ||
tau bhagavānu sakala ura bāsī| karihiṃ mohi raghubara kai dāsī ||
jehi keṃ jehi para satya sanehū| so tehi milai na kachu saṃhehū ||
prabhu tana citai prema tana ṭhānā| kṛpānidhāna rāma sabu jānā ||
siyahi biloki takeu dhanu kaise| citava garuru laghu byālahi jaise ||

do. lakhana lakheu raghubaṃsamani tākeu hara kodaṃḍu|
pulaki gāta bole bacana carana cāpi brahmāṃḍu || 259 ||

disakuṃjarahu kamaṭha ahi kolā| dharahu dharani dhari dhīra na ḍolā ||
rāmu cahahiṃ saṃkara dhanu torā| hohu sajaga suni āyasu morā ||
cāpa sapīpa rāmu jaba āe| nara nārinha sura sukṛta manāe ||
saba kara saṃsau aru agyānū| maṃda mahīpanha kara abhimānū ||
bhṛgupati keri garaba garuāī| sura munibaranha keri kadarāī ||
siya kara socu janaka pachitāvā| rāninha kara dāruna dukha dāvā ||
saṃbhucāpa baḍa bohitu pāī| caḍhe jāi saba saṃgu banāī ||
rāma bāhubala siṃdhu apārū| cahata pāru nahi kou kaṛahārū ||

do. rāma biloke loga saba citra likhe se dekhi|
citaī sīya kṛpāyatana jānī bikala biseṣi || 260 ||

dekhī bipula bikala baidehī| nimiṣa bihāta kalapa sama tehī ||
tṛṣita bāri binu jo tanu tyāgā| mue~ karai kā sudhā taṛāgā ||
kā baraṣā saba kṛṣī sukhāneṃ| samaya cukeṃ puni kā pachitāneṃ ||
asa jiya~ jāni jānakī dekhī| prabhu pulake lakhi prīti biseṣī ||
gurahi pranāmu manahi mana kīnhā| ati lāghava~ uṭhāi dhanu līnhā ||
damakeu dāmini jimi jaba layaū| puni nabha dhanu maṃḍala sama bhayaū ||
leta caṛhāvata khaiṃcata gāṛheṃ| kāhu~ na lakhā dekha sabu ṭhāṛheṃ ||
tehi chana rāma madhya dhanu torā| bhare bhuvana dhuni ghora kaṭhorā ||

chaṃ. bhare bhuvana ghora kaṭhora rava rabi bāji taji māragu cale|
cikkarahiṃ diggaja ḍola mahi ahi kola kūruma kalamale ||
sura asura muni kara kāna dīnheṃ sakala bikala bicārahīṃ|
kodaṃḍa khaṃḍeu rāma tulasī jayati bacana ucārahī ||

so. saṃkara cāpu jahāju sāgaru raghubara bāhubalu|
būṛa so sakala samāju caṛhā jo prathamahiṃ moha basa || 261 ||

prabhu dou cāpakhaṃḍa mahi ḍāre| dekhi loga saba bhae sukhāre ||

kosikarupa payonidhi pāvana| prema bāri avagāhu suhāvana ||
rāmarūpa rākesu nihārī| baṛhata bīci pulakāvali bhārī ||
bāje nabha gahagahe nisānā| devabadhū nācahiṃ kari gānā ||
brahmādika sura siddha munīsā| prabhuhi prasaṃsahi dehiṃ asīsā ||
barisahiṃ sumana raṃga bahu mālā| gāvahiṃ kiṃnara gīta rasālā ||
rahī bhuvana bhari jaya jaya bānī| dhanuṣabhaṃga dhuni jāta na jānī ||
mudita kahahiṃ jaha~ taha~ nara nārī| bhaṃjeu rāma saṃbhudhanu bhārī ||

do. baṃdī māgadha sūtagana biruda badahiṃ matidhīra|
karahiṃ nichāvari loga saba haya gaya dhana mani cīra || 262 ||

jhā~jhi mṛdaṃga saṃkha sahanāī| bheri ḍhola duṃdubhī suhāī ||
bājahiṃ bahu bājane suhāe| jaha~ taha~ jubatinha maṃgala gāe ||
sakhinha sahita haraṣī ati rānī| sūkhata dhāna parā janu pānī ||
janaka laheu sukhu socu bihāī| pairata thakeṃ thāha janu pāī ||
śrīhata bhae bhūpa dhanu ṭūṭe| jaiseṃ divasa dīpa chabi chūṭe ||
sīya sukhahi barania kehi bhā~tī| janu cātakī pāi jalu svātī ||
rāmahi lakhanu bilokata kaiseṃ| sasihi cakora kisoraku jaiseṃ ||
satānaṃda taba āyasu dīnhā| sītā~ gamanu rāma pahiṃ kīnhā ||

do. saṃga sakhīṃ sudaṃra catura gāvahiṃ maṃgalacāra|
gavanī bāla marāla gati suṣamā aṃga apāra || 263 ||

sakhinha madhya siya sohati kaise| chabigana madhya mahāchabi jaiseṃ ||
kara saroja jayamāla suhāī| bisva bijaya sobhā jehiṃ chāī ||
tana sakocu mana parama uchāhū| gūṛha premu lakhi parai na kāhū ||
jāi samīpa rāma chabi dekhī| rahi janu ku~ari citra avarekhī ||
catura sakhīṃ lakhi kahā bujhāī| pahirāvahu jayamāla suhāī ||
sunata jugala kara māla uṭhāī| prema bibasa pahirāi na jāī ||
sohata janu juga jalaja sanālā| sasihi sabhīta deta jayamālā ||
gāvahiṃ chabi avaloki sahelī| siya~ jayamāla rāma ura melī ||

so. raghubara ura jayamāla dekhi deva barisahiṃ sumana|
sakuce sakala bhuāla janu biloki rabi kumudagana || 264 ||

pura aru byoma bājane bāje| khala bhae malina sādhu saba rāje ||
sura kiṃnara nara nāga munīsā| jaya jaya jaya kahi dehiṃ asīsā ||
nācahiṃ gāvahiṃ bibudha badhūṭīṃ| bāra bāra kusumāṃjali chūṭīṃ ||
jaha~ taha~ bipra bedadhuni karahīṃ| baṃdī biradāvali uccarahīṃ ||
mahi pātāla nāka jasu byāpā| rāma barī siya bhaṃjeu cāpā ||
karahiṃ āratī pura nara nārī| dehiṃ nichāvari bitta bisārī ||
sohati sīya rāma kai jaurī| chabi siṃgāru manahu~ eka ṭhorī ||
sakhīṃ kahahiṃ prabhupada gahu sītā| karati na carana parasa ati bhītā ||

do. gautama tiya gati surati kari nahiṃ parasati paga pāni|
mana bihase raghubaṃsamani prīti alaukika jāni || 265 ||

taba siya dekhi bhūpa abhilāṣe| kūra kapūta mūṛha mana mākhe ||
uṭhi uṭhi pahiri sanāha abhāge| jaha~ taha~ gāla bajāvana lāge ||
lehu chaṛāi sīya kaha koū| dhari bā~dhahu nṛpa bālaka doū ||
toreṃ dhanuṣu cāṛa nahiṃ saraī| jīvata hamahi kua~ri ko baraī ||
jauṃ bidehu kachu karai sahāī| jītahu samara sahita dou bhāī ||
sādhu bhūpa bole suni bānī| rājasamājahi lāja lajānī ||
balu pratāpu bīratā baṛāī| nāka pinākahi saṃga sidhāī ||
soi sūratā ki aba kahu~ pāī| asi budhi tau bidhi muha~ masi lāī ||

do. dekhahu rāmahi nayana bhari taji iriṣā madu kohu|
lakhana roṣu pāvaku prabala jāni salabha jani hohu || 266 ||

bainateya bali jimi caha kāgū| jimi sasu cahai nāga ari bhāgū ||
jimi caha kusala akārana kohī| saba saṃpadā cahai sivadrohī ||
lobhī lolupa kala kīrati cahaī| akalaṃkatā ki kāmī lahaī ||
hari pada bimukha parama gati cāhā| tasa tumhāra lālacu naranāhā ||
kolāhalu suni sīya sakānī| sakhīṃ lavāi gaīṃ jaha~ rānī ||
rāmu subhāya~ cale guru pāhīṃ| siya sanehu baranata mana māhīṃ ||
rāninha sahita socabasa sīyā| aba dhauṃ bidhihi kāha karanīyā ||
bhūpa bacana suni ita uta takahīṃ| lakhanu rāma ḍara boli na sakahīṃ ||

do. aruna nayana bhṛkuṭī kuṭila citavata nṛpanha sakopa|
manahu~ matta gajagana nirakhi siṃghakisorahi copa || 267 ||

kharabharu dekhi bikala pura nārīṃ| saba mili dehiṃ mahīpanha gārīṃ ||
tehiṃ avasara suni siva dhanu bhaṃgā| āyasu bhṛgukula kamala pataṃgā ||
dekhi mahīpa sakala sakucāne| bāja jhapaṭa janu lavā lukāne ||
gauri sarīra bhūti bhala bhrājā| bhāla bisāla tripuṃḍa birājā ||
sīsa jaṭā sasibadanu suhāvā| risabasa kachuka aruna hoi āvā ||
bhṛkuṭī kuṭila nayana risa rāte| sahajahu~ citavata manahu~ risāte ||
bṛṣabha kaṃdha ura bāhu bisālā| cāru janeu māla mṛgachālā ||
kaṭi muni basana tūna dui bā~dheṃ| dhanu sara kara kuṭhāru kala kā~dheṃ ||

do. sāṃta beṣu karanī kaṭhina barani na jāi sarupa|
dhari munitanu janu bīra rasu āyau jaha~ saba bhūpa || 268 ||

dekhata bhṛgupati beṣu karālā| uṭhe sakala bhaya bikala bhuālā ||
pitu sameta kahi kahi nija nāmā| lage karana saba daṃḍa pranāmā ||
jehi subhāya~ citavahiṃ hitu jānī| so jānai janu āi khuṭānī ||
janaka bahori āi siru nāvā| sīya bolāi pranāmu karāvā ||
āsiṣa dīnhi sakhīṃ haraṣānīṃ| nija samāja lai gaī sayānīṃ ||
bisvāmitru mile puni āī| pada saroja mele dou bhāī ||
rāmu lakhanu dasaratha ke ḍhoṭā| dīnhi asīsa dekhi bhala joṭā ||
rāmahi citai rahe thaki locana| rūpa apāra māra mada mocana ||

do. bahuri biloki bideha sana kahahu kāha ati bhīra ||
pūchata jāni ajāna jimi byāpeu kopu sarīra || 269 ||

samācāra kahi janaka sunāe| jehi kārana mahīpa saba āe ||
sunata bacana phiri anata nihāre| dekhe cāpakhaṃḍa mahi ḍāre ||
ati risa bole bacana kaṭhorā| kahu jaṛa janaka dhanuṣa kai torā ||
begi dekhāu mūṛha na ta ājū| ulaṭau~ mahi jaha~ lahi tava rājū ||
ati ḍaru utaru deta nṛpu nāhīṃ| kuṭila bhūpa haraṣe mana māhīṃ ||
sura muni nāga nagara nara nārī || socahiṃ sakala trāsa ura bhārī ||
mana pachitāti sīya mahatārī| bidhi aba sa~varī bāta bigārī ||
bhṛgupati kara subhāu suni sītā| aradha nimeṣa kalapa sama bītā ||

do. sabhaya biloke loga saba jāni jānakī bhīru|
hṛdaya~ na haraṣu biṣādu kachu bole śrīraghubīru || 270 ||

māsapārāyaṇa, navā~ viśrāma
nātha saṃbhudhanu bhaṃjanihārā| hoihi keu eka dāsa tumhārā ||
āyasu kāha kahia kina mohī| suni risāi bole muni kohī ||
sevaku so jo karai sevakāī| ari karanī kari karia larāī ||
sunahu rāma jehiṃ sivadhanu torā| sahasabāhu sama so ripu morā ||
so bilagāu bihāi samājā| na ta māre jaihahiṃ saba rājā ||
suni muni bacana lakhana musukāne| bole parasudharahi apamāne ||
bahu dhanuhīṃ torīṃ larikāīṃ| kabahu~ na asi risa kīnhi gosāīṃ ||
ehi dhanu para mamatā kehi hetū| suni risāi kaha bhṛgukulaketū ||

do. re nṛpa bālaka kālabasa bolata tohi na sa~māra ||
dhanuhī sama tipurāri dhanu bidita sakala saṃsāra || 271 ||

lakhana kahā ha~si hamareṃ jānā| sunahu deva saba dhanuṣa samānā ||
kā chati lābhu jūna dhanu taureṃ| dekhā rāma nayana ke bhoreṃ ||
chuata ṭūṭa raghupatihu na dosū| muni binu kāja karia kata rosū |
bole citai parasu kī orā| re saṭha sunehi subhāu na morā ||
bālaku boli badhau~ nahiṃ tohī| kevala muni jaṛa jānahi mohī ||
bāla brahmacārī ati kohī| bisva bidita chatriyakula drohī ||
bhujabala bhūmi bhūpa binu kīnhī| bipula bāra mahidevanha dīnhī ||
sahasabāhu bhuja chedanihārā| parasu biloku mahīpakumārā ||

do. mātu pitahi jani socabasa karasi mahīsakisora|
garbhanha ke arbhaka dalana parasu mora ati ghora || 272 ||

bihasi lakhanu bole mṛdu bānī| aho munīsu mahā bhaṭamānī ||
puni puni mohi dekhāva kuṭhārū| cahata uṛāvana phū~ki pahārū ||
ihā~ kumhaṛabatiyā kou nāhīṃ| je tarajanī dekhi mari jāhīṃ ||
dekhi kuṭhāru sarāsana bānā| maiṃ kachu kahā sahita abhimānā ||
bhṛgusuta samujhi janeu bilokī| jo kachu kahahu sahau~ risa rokī ||
sura mahisura harijana aru gāī| hamareṃ kula inha para na surāī ||
badheṃ pāpu apakīrati hāreṃ| māratahū~ pā paria tumhāreṃ ||
koṭi kulisa sama bacanu tumhārā| byartha dharahu dhanu bāna kuṭhārā ||

do. jo biloki anucita kaheu~ chamahu mahāmuni dhīra|
suni saroṣa bhṛgubaṃsamani bole girā gabhīra || 273 ||

kausika sunahu maṃda yahu bālaku| kuṭila kālabasa nija kula ghālaku ||
bhānu baṃsa rākesa kalaṃkū| nipaṭa niraṃkusa abudha asaṃkū ||
kāla kavalu hoihi chana māhīṃ| kahau~ pukāri khori mohi nāhīṃ ||
tumha haṭakau jauṃ cahahu ubārā| kahi pratāpu balu roṣu hamārā ||
lakhana kaheu muni sujasa tumhārā| tumhahi achata ko baranai pārā ||
apane mu~ha tumha āpani karanī| bāra aneka bhā~ti bahu baranī ||
nahiṃ saṃtoṣu ta puni kachu kahahū| jani risa roki dusaha dukha sahahū ||
bīrabratī tumha dhīra achobhā| gārī deta na pāvahu sobhā ||

do. sūra samara karanī karahiṃ kahi na janāvahiṃ āpu|
bidyamāna rana pāi ripu kāyara kathahiṃ pratāpu || 274 ||

tumha tau kālu hā~ka janu lāvā| bāra bāra mohi lāgi bolāvā ||
sunata lakhana ke bacana kaṭhorā| parasu sudhāri dhareu kara ghorā ||
aba jani dei dosu mohi logū| kaṭubādī bālaku badhajogū ||
bāla biloki bahuta maiṃ bā~cā| aba yahu maranihāra bhā sā~cā ||
kausika kahā chamia aparādhū| bāla doṣa guna ganahiṃ na sādhū ||
khara kuṭhāra maiṃ akaruna kohī| āgeṃ aparādhī gurudrohī ||
utara deta choṛau~ binu māreṃ| kevala kausika sīla tumhāreṃ ||
na ta ehi kāṭi kuṭhāra kaṭhoreṃ| gurahi urina hoteu~ śrama thoreṃ ||

do. gādhisūnu kaha hṛdaya~ ha~si munihi hariarai sūjha|
ayamaya khā~ḍa na ūkhamaya ajahu~ na būjha abūjha || 275 ||

kaheu lakhana muni sīlu tumhārā| ko nahi jāna bidita saṃsārā ||
mātā pitahi urina bhae nīkeṃ| gura rinu rahā socu baṛa jīkeṃ ||
so janu hamarehi māthe kāṛhā| dina cali gae byāja baṛa bāṛhā ||
aba ānia byavahariā bolī| turata deu~ maiṃ thailī kholī ||
suni kaṭu bacana kuṭhāra sudhārā| hāya hāya saba sabhā pukārā ||
bhṛgubara parasu dekhāvahu mohī| bipra bicāri bacau~ nṛpadrohī ||
mile na kabahu~ subhaṭa rana gāṛhe| dvija devatā gharahi ke bāṛhe ||
anucita kahi saba loga pukāre| raghupati sayanahiṃ lakhanu nevāre ||

do. lakhana utara āhuti sarisa bhṛgubara kopu kṛsānu|
baṛhata dekhi jala sama bacana bole raghukulabhānu || 276 ||

nātha karahu bālaka para chohū| sūdha dūdhamukha karia na kohū ||
jauṃ pai prabhu prabhāu kachu jānā| tau ki barābari karata ayānā ||
jauṃ larikā kachu acagari karahīṃ| gura pitu mātu moda mana bharahīṃ ||
karia kṛpā sisu sevaka jānī| tumha sama sīla dhīra muni gyānī ||
rāma bacana suni kachuka juṛāne| kahi kachu lakhanu bahuri musakāne ||
ha~sata dekhi nakha sikha risa byāpī| rāma tora bhrātā baṛa pāpī ||
gaura sarīra syāma mana māhīṃ| kālakūṭamukha payamukha nāhīṃ ||
sahaja ṭeṛha anuharai na tohī| nīcu mīcu sama dekha na mauhīṃ ||

do. lakhana kaheu ha~si sunahu muni krodhu pāpa kara mūla|
jehi basa jana anucita karahiṃ carahiṃ bisva pratikūla || 277 ||

maiṃ tumhāra anucara munirāyā| parihari kopu karia aba dāyā ||
ṭūṭa cāpa nahiṃ jurahi risāne| baiṭhia hoihiṃ pāya pirāne ||
jau ati priya tau karia upāī| joria kou baṛa gunī bolāī ||
bolata lakhanahiṃ janaku ḍerāhīṃ| maṣṭa karahu anucita bhala nāhīṃ ||
thara thara kāpahiṃ pura nara nārī| choṭa kumāra khoṭa baṛa bhārī ||
bhṛgupati suni suni nirabhaya bānī| risa tana jarai hoi bala hānī ||
bole rāmahi dei nihorā| bacau~ bicāri baṃdhu laghu torā ||
manu malīna tanu suṃdara kaiseṃ| biṣa rasa bharā kanaka ghaṭu jaisaiṃ ||

do. suni lachimana bihase bahuri nayana tarere rāma|
gura samīpa gavane sakuci parihari bānī bāma || 278 ||

ati binīta mṛdu sītala bānī| bole rāmu jori juga pānī ||
sunahu nātha tumha sahaja sujānā| bālaka bacanu karia nahiṃ kānā ||
bararai bālaka eku subhāū| inhahi na saṃta bidūṣahiṃ kāū ||
tehiṃ nāhīṃ kachu kāja bigārā| aparādhī meṃ nātha tumhārā ||
kṛpā kopu badhu ba~dhaba gosāīṃ| mo para karia dāsa kī nāī ||
kahia begi jehi bidhi risa jāī| munināyaka soi karauṃ upāī ||
kaha muni rāma jāi risa kaiseṃ| ajahu~ anuja tava citava anaiseṃ ||
ehi ke kaṃṭha kuṭhāru na dīnhā| tau maiṃ kāha kopu kari kīnhā ||

do. garbha stravahiṃ avanipa ravani suni kuṭhāra gati ghora|
parasu achata dekhau~ jiata bairī bhūpakisora || 279 ||

bahai na hāthu dahai risa chātī| bhā kuṭhāru kuṃṭhita nṛpaghātī ||
bhayau bāma bidhi phireu subhāū| more hṛdaya~ kṛpā kasi kāū ||
āju dayā dukhu dusaha sahāvā| suni saumitra bihasi siru nāvā ||
bāu kṛpā mūrati anukūlā| bolata bacana jharata janu phūlā ||
jauṃ pai kṛpā~ jarihiṃ muni gātā| krodha bhae~ tanu rākha bidhātā ||
dekhu janaka haṭhi bālaka ehū| kīnha cahata jaṛa jamapura gehū ||
begi karahu kina ā~khinha oṭā| dekhata choṭa khoṭa nṛpa ḍhoṭā ||
bihase lakhanu kahā mana māhīṃ| mūdeṃ ā~khi katahu~ kou nāhīṃ ||

do. parasurāmu taba rāma prati bole ura ati krodhu|
saṃbhu sarāsanu tori saṭha karasi hamāra prabodhu || 280 ||

baṃdhu kahai kaṭu saṃmata toreṃ| tū chala binaya karasi kara joreṃ ||
karu paritoṣu mora saṃgrāmā| nāhiṃ ta chāṛa kahāuba rāmā ||
chalu taji karahi samaru sivadrohī| baṃdhu sahita na ta mārau~ tohī ||
bhṛgupati bakahiṃ kuṭhāra uṭhāe~| mana musakāhiṃ rāmu sira nāe~ ||
gunaha lakhana kara hama para roṣū| katahu~ sudhāihu te baṛa doṣū ||
ṭeṛha jāni saba baṃdai kāhū| bakra caṃdramahi grasai na rāhū ||
rāma kaheu risa tajia munīsā| kara kuṭhāru āgeṃ yaha sīsā ||
jeṃhiṃ risa jāi karia soi svāmī| mohi jāni āpana anugāmī ||

do. prabhuhi sevakahi samaru kasa tajahu biprabara rosu|
beṣu bilokeṃ kahesi kachu bālakahū nahiṃ dosu || 281 ||

dekhi kuṭhāra bāna dhanu dhārī| bhai larikahi risa bīru bicārī ||
nāmu jāna pai tumhahi na cīnhā| baṃsa subhāya~ utaru teṃhiṃ dīnhā ||
jauṃ tumha autehu muni kī nāīṃ| pada raja sira sisu dharata gosāīṃ ||
chamahu cūka anajānata kerī| cahia bipra ura kṛpā ghanerī ||
hamahi tumhahi saribari kasi nāthā || kahahu na kahā~ carana kaha~ māthā ||
rāma mātra laghu nāma hamārā| parasu sahita baṛa nāma tohārā ||
deva eku gunu dhanuṣa hamāreṃ| nava guna parama punīta tumhāreṃ ||
saba prakāra hama tumha sana hāre| chamahu bipra aparādha hamāre ||

do. bāra bāra muni biprabara kahā rāma sana rāma|
bole bhṛgupati saruṣa hasi tahū~ baṃdhu sama bāma || 282 ||

nipaṭahiṃ dvija kari jānahi mohī| maiṃ jasa bipra sunāvau~ tohī ||
cāpa struvā sara āhuti jānū| kopa mora ati ghora kṛsānu ||
samidhi sena caturaṃga suhāī| mahā mahīpa bhae pasu āī ||
mai ehi parasu kāṭi bali dīnhe| samara jagya japa koṭinha kīnhe ||
mora prabhāu bidita nahiṃ toreṃ| bolasi nidari bipra ke bhoreṃ ||
bhaṃjeu cāpu dāpu baṛa bāṛhā| ahamiti manahu~ jīti jagu ṭhāṛhā ||
rāma kahā muni kahahu bicārī| risa ati baṛi laghu cūka hamārī ||
chuatahiṃ ṭūṭa pināka purānā| maiṃ kahi hetu karauṃ abhimānā ||

do. jauṃ hama nidarahiṃ bipra badi satya sunahu bhṛgunātha|
tau asa ko jaga subhaṭu jehi bhaya basa nāvahiṃ mātha || 283 ||

deva danuja bhūpati bhaṭa nānā| samabala adhika hou balavānā ||
jauṃ rana hamahi pacārai koū| larahiṃ sukhena kālu kina hoū ||
chatriya tanu dhari samara sakānā| kula kalaṃku tehiṃ pāva~ra ānā ||
kahau~ subhāu na kulahi prasaṃsī| kālahu ḍarahiṃ na rana raghubaṃsī ||
biprabaṃsa kai asi prabhutāī| abhaya hoi jo tumhahi ḍerāī ||
sunu mṛdu gūṛha bacana raghupati ke| ughare paṭala parasudhara mati ke ||
rāma ramāpati kara dhanu lehū| khaiṃcahu miṭai mora saṃdehū ||
deta cāpu āpuhiṃ cali gayaū| parasurāma mana bisamaya bhayaū ||

do. jānā rāma prabhāu taba pulaka praphullita gāta|
jori pāni bole bacana hdaya~ na premu amāta || 284 ||

jaya raghubaṃsa banaja bana bhānū| gahana danuja kula dahana kṛsānu ||
jaya sura bipra dhenu hitakārī| jaya mada moha koha bhrama hārī ||
binaya sīla karunā guna sāgara| jayati bacana racanā ati nāgara ||
sevaka sukhada subhaga saba aṃgā| jaya sarīra chabi koṭi anaṃgā ||
karauṃ kāha mukha eka prasaṃsā| jaya mahesa mana mānasa haṃsā ||
anucita bahuta kaheu~ agyātā| chamahu chamāmaṃdira dou bhrātā ||
kahi jaya jaya jaya raghukulaketū| bhṛgupati gae banahi tapa hetū ||
apabhaya~ kuṭila mahīpa ḍerāne| jaha~ taha~ kāyara gava~hiṃ parāne ||

do. devanha dīnhīṃ duṃdubhīṃ prabhu para baraṣahiṃ phūla|
haraṣe pura nara nāri saba miṭī mohamaya sūla || 285 ||

ati gahagahe bājane bāje| sabahiṃ manohara maṃgala sāje ||
jūtha jūtha mili sumukha sunayanīṃ| karahiṃ gāna kala kokilabayanī ||
sukhu bideha kara barani na jāī| janmadaridra manahu~ nidhi pāī ||
gata trāsa bhai sīya sukhārī| janu bidhu udaya~ cakorakumārī ||
janaka kīnha kausikahi pranāmā| prabhu prasāda dhanu bhaṃjeu rāmā ||
mohi kṛtakṛtya kīnha duhu~ bhāīṃ| aba jo ucita so kahia gosāī ||
kaha muni sunu naranātha prabīnā| rahā bibāhu cāpa ādhīnā ||
ṭūṭatahīṃ dhanu bhayau bibāhū| sura nara nāga bidita saba kāhu ||

do. tadapi jāi tumha karahu aba jathā baṃsa byavahāru|
būjhi bipra kulabṛddha gura beda bidita ācāru || 286 ||

dūta avadhapura paṭhavahu jāī| ānahiṃ nṛpa dasarathahi bolāī ||
mudita rāu kahi bhalehiṃ kṛpālā| paṭhae dūta boli tehi kālā ||
bahuri mahājana sakala bolāe| āi sabanhi sādara sira nāe ||
hāṭa bāṭa maṃdira surabāsā| nagaru sa~vārahu cārihu~ pāsā ||
haraṣi cale nija nija gṛha āe| puni paricāraka boli paṭhāe ||
racahu bicitra bitāna banāī| sira dhari bacana cale sacu pāī ||
paṭhae boli gunī tinha nānā| je bitāna bidhi kusala sujānā ||
bidhihi baṃdi tinha kīnha araṃbhā| birace kanaka kadali ke khaṃbhā ||

do. harita maninha ke patra phala padumarāga ke phūla|
racanā dekhi bicitra ati manu biraṃci kara bhūla || 287 ||

beni harita manimaya saba kīnhe| sarala saparaba parahiṃ nahiṃ cīnhe ||
kanaka kalita ahibela banāī| lakhi nahi parai saparana suhāī ||
tehi ke raci paci baṃdha banāe| bica bica mukatā dāma suhāe ||
mānika marakata kulisa pirojā| cīri kori paci race sarojā ||
kie bhṛṃga bahuraṃga bihaṃgā| guṃjahiṃ kūjahiṃ pavana prasaṃgā ||
sura pratimā khaṃbhana gaṛhī kāṛhī| maṃgala drabya lie~ saba ṭhāṛhī ||
cauṃkeṃ bhā~ti aneka purāīṃ| siṃdhura manimaya sahaja suhāī ||

do. saurabha pallava subhaga suṭhi kie nīlamani kori ||
hema baura marakata ghavari lasata pāṭamaya ḍori || 288 ||

race rucira bara baṃdanibāre| manahu~ manobhava~ phaṃda sa~vāre ||
maṃgala kalasa aneka banāe| dhvaja patāka paṭa camara suhāe ||
dīpa manohara manimaya nānā| jāi na barani bicitra bitānā ||
jehiṃ maṃḍapa dulahini baidehī| so baranai asi mati kabi kehī ||
dūlahu rāmu rūpa guna sāgara| so bitānu tihu~ loka ujāgara ||
janaka bhavana kai saubhā jaisī| gṛha gṛha prati pura dekhia taisī ||
jehiṃ terahuti tehi samaya nihārī| tehi laghu lagahiṃ bhuvana dasa cārī ||
jo saṃpadā nīca gṛha sohā| so biloki suranāyaka mohā ||

do. basai nagara jehi laccha kari kapaṭa nāri bara beṣu ||
tehi pura kai sobhā kahata sakucahiṃ sārada seṣu || 289 ||

pahu~ce dūta rāma pura pāvana| haraṣe nagara biloki suhāvana ||
bhūpa dvāra tinha khabari janāī| dasaratha nṛpa suni lie bolāī ||
kari pranāmu tinha pātī dīnhī| mudita mahīpa āpu uṭhi līnhī ||
bāri bilocana bācata pā~tī| pulaka gāta āī bhari chātī ||
rāmu lakhanu ura kara bara cīṭhī| rahi gae kahata na khāṭī mīṭhī ||
puni dhari dhīra patrikā bā~cī| haraṣī sabhā bāta suni sā~cī ||
khelata rahe tahā~ sudhi pāī| āe bharatu sahita hita bhāī ||
pūchata ati saneha~ sakucāī| tāta kahā~ teṃ pātī āī ||

do. kusala prānapriya baṃdhu dou ahahiṃ kahahu kehiṃ desa|
suni saneha sāne bacana bācī bahuri naresa || 290 ||

suni pātī pulake dou bhrātā| adhika sanehu samāta na gātā ||
prīti punīta bharata kai dekhī| sakala sabhā~ sukhu laheu biseṣī ||
taba nṛpa dūta nikaṭa baiṭhāre| madhura manohara bacana ucāre ||
bhaiyā kahahu kusala dou bāre| tumha nīkeṃ nija nayana nihāre ||
syāmala gaura dhareṃ dhanu bhāthā| baya kisora kausika muni sāthā ||
pahicānahu tumha kahahu subhāū| prema bibasa puni puni kaha rāū ||
jā dina teṃ muni gae lavāī| taba teṃ āju sā~ci sudhi pāī ||
kahahu bideha kavana bidhi jāne| suni priya bacana dūta musakāne ||

do. sunahu mahīpati mukuṭa mani tumha sama dhanya na kou|
rāmu lakhanu jinha ke tanaya bisva bibhūṣana dou || 291 ||

pūchana jogu na tanaya tumhāre| puruṣasiṃgha tihu pura ujiāre ||
jinha ke jasa pratāpa keṃ āge| sasi malīna rabi sītala lāge ||
tinha kaha~ kahia nātha kimi cīnhe| dekhia rabi ki dīpa kara līnhe ||
sīya svayaṃbara bhūpa anekā| samiṭe subhaṭa eka teṃ ekā ||
saṃbhu sarāsanu kāhu~ na ṭārā| hāre sakala bīra bariārā ||
tīni loka maha~ je bhaṭamānī| sabha kai sakati saṃbhu dhanu bhānī ||
sakai uṭhāi sarāsura merū| sou hiya~ hāri gayau kari pherū ||
jehi kautuka sivasailu uṭhāvā| sou tehi sabhā~ parābhau pāvā ||

do. tahā~ rāma raghubaṃsa mani sunia mahā mahipāla|
bhaṃjeu cāpa prayāsa binu jimi gaja paṃkaja nāla || 292 ||

suni saroṣa bhṛgunāyaku āe| bahuta bhā~ti tinha ā~khi dekhāe ||
dekhi rāma balu nija dhanu dīnhā| kari bahu binaya gavanu bana kīnhā ||
rājana rāmu atulabala jaiseṃ| teja nidhāna lakhanu puni taiseṃ ||
kaṃpahi bhūpa bilokata jākeṃ| jimi gaja hari kisora ke tākeṃ ||
deva dekhi tava bālaka doū| aba na ā~khi tara āvata koū ||
dūta bacana racanā priya lāgī| prema pratāpa bīra rasa pāgī ||
sabhā sameta rāu anurāge| dūtanha dena nichāvari lāge ||
kahi anīti te mūdahiṃ kānā| dharamu bicāri sabahiṃ sukha mānā ||

do. taba uṭhi bhūpa basiṣṭha kahu~ dīnhi patrikā jāi|
kathā sunāī gurahi saba sādara dūta bolāi || 293 ||

suni bole gura ati sukhu pāī| punya puruṣa kahu~ mahi sukha chāī ||
jimi saritā sāgara mahu~ jāhīṃ| jadyapi tāhi kāmanā nāhīṃ ||
timi sukha saṃpati binahiṃ bolāe~| dharamasīla pahiṃ jāhiṃ subhāe~ ||
tumha gura bipra dhenu sura sebī| tasi punīta kausalyā debī ||
sukṛtī tumha samāna jaga māhīṃ| bhayau na hai kou honeu nāhīṃ ||
tumha te adhika punya baṛa kākeṃ| rājana rāma sarisa suta jākeṃ ||
bīra binīta dharama brata dhārī| guna sāgara bara bālaka cārī ||
tumha kahu~ sarba kāla kalyānā| sajahu barāta bajāi nisānā ||

do. calahu begi suni gura bacana bhalehiṃ nātha siru nāi|
bhūpati gavane bhavana taba dūtanha bāsu devāi || 294 ||

rājā sabu ranivāsa bolāī| janaka patrikā bāci sunāī ||
suni saṃdesu sakala haraṣānīṃ| apara kathā saba bhūpa bakhānīṃ ||
prema praphullita rājahiṃ rānī| manahu~ sikhini suni bārida banī ||
mudita asīsa dehiṃ guru nārīṃ| ati ānaṃda magana mahatārīṃ ||
lehiṃ paraspara ati priya pātī| hṛdaya~ lagāi juṛāvahiṃ chātī ||
rāma lakhana kai kīrati karanī| bārahiṃ bāra bhūpabara baranī ||
muni prasādu kahi dvāra sidhāe| rāninha taba mahideva bolāe ||
die dāna ānaṃda sametā| cale biprabara āsiṣa detā ||

so. jācaka lie ha~kāri dīnhi nichāvari koṭi bidhi|
ciru jīvahu~ suta cāri cakrabarti dasarattha ke || 295 ||

kahata cale pahireṃ paṭa nānā| haraṣi hane gahagahe nisānā ||
samācāra saba loganha pāe| lāge ghara ghara hone badhāe ||
bhuvana cāri dasa bharā uchāhū| janakasutā raghubīra biāhū ||
suni subha kathā loga anurāge| maga gṛha galīṃ sa~vārana lāge ||
jadyapi avadha sadaiva suhāvani| rāma purī maṃgalamaya pāvani ||
tadapi prīti kai prīti suhāī| maṃgala racanā racī banāī ||
dhvaja patāka paṭa cāmara cāru| chāvā parama bicitra bajārū ||
kanaka kalasa torana mani jālā| harada dūba dadhi acchata mālā ||

do. maṃgalamaya nija nija bhavana loganha race banāi|
bīthīṃ sīcīṃ caturasama caukeṃ cāru purāi || 296 ||

jaha~ taha~ jūtha jūtha mili bhāmini| saji nava sapta sakala duti dāmini ||
bidhubadanīṃ mṛga sāvaka locani| nija sarupa rati mānu bimocani ||
gāvahiṃ maṃgala maṃjula bānīṃ| sunikala rava kalakaṃṭhi lajānīṃ ||
bhūpa bhavana kimi jāi bakhānā| bisva bimohana raceu bitānā ||
maṃgala drabya manohara nānā| rājata bājata bipula nisānā ||
katahu~ birida baṃdī uccarahīṃ| katahu~ beda dhuni bhūsura karahīṃ ||
gāvahiṃ suṃdari maṃgala gītā| lai lai nāmu rāmu aru sītā ||
bahuta uchāhu bhavanu ati thorā| mānahu~ umagi calā cahu orā ||

do. sobhā dasaratha bhavana kai ko kabi baranai pāra|
jahā~ sakala sura sīsa mani rāma līnha avatāra || 297 ||

bhūpa bharata puni lie bolāī| haya gaya syaṃdana sājahu jāī ||
calahu begi raghubīra barātā| sunata pulaka pūre dou bhrātā ||
bharata sakala sāhanī bolāe| āyasu dīnha mudita uṭhi dhāe ||
raci ruci jīna turaga tinha sāje| barana barana bara bāji birāje ||
subhaga sakala suṭhi caṃcala karanī| aya iva jarata dharata paga dharanī ||
nānā jāti na jāhiṃ bakhāne| nidari pavanu janu cahata uṛāne ||
tinha saba chayala bhae asavārā| bharata sarisa baya rājakumārā ||
saba suṃdara saba bhūṣanadhārī| kara sara cāpa tūna kaṭi bhārī ||

do. chare chabīle chayala saba sūra sujāna nabīna|
juga padacara asavāra prati je asikalā prabīna || 298 ||

bā~dhe birada bīra rana gāṛhe| nikasi bhae pura bāhera ṭhāṛhe ||
pherahiṃ catura turaga gati nānā| haraṣahiṃ suni suni pavana nisānā ||
ratha sārathinha bicitra banāe| dhvaja patāka mani bhūṣana lāe ||
cava~ra cāru kiṃkina dhuni karahī| bhānu jāna sobhā apaharahīṃ ||
sāva~karana aganita haya hote| te tinha rathanha sārathinha jote ||
suṃdara sakala alaṃkṛta sohe| jinhahi bilokata muni mana mohe ||
je jala calahiṃ thalahi kī nāī| ṭāpa na būṛa bega adhikāī ||
astra sastra sabu sāju banāī| rathī sārathinha lie bolāī ||

do. caṛhi caṛhi ratha bāhera nagara lāgī jurana barāta|
hota saguna sundara sabahi jo jehi kāraja jāta || 299 ||

kalita karibaranhi parīṃ a~bārīṃ| kahi na jāhiṃ jehi bhā~ti sa~vārīṃ ||
cale mattagaja ghaṃṭa birājī| manahu~ subhaga sāvana ghana rājī ||
bāhana apara aneka bidhānā| sibikā subhaga sukhāsana jānā ||
tinha caṛhi cale biprabara vṛndā| janu tanu dhareṃ sakala śruti chaṃdā ||
māgadha sūta baṃdi gunagāyaka| cale jāna caṛhi jo jehi lāyaka ||
besara ū~ṭa bṛṣabha bahu jātī| cale bastu bhari aganita bhā~tī ||
koṭinha kā~vari cale kahārā| bibidha bastu ko baranai pārā ||
cale sakala sevaka samudāī| nija nija sāju samāju banāī ||

do. saba keṃ ura nirbhara haraṣu pūrita pulaka sarīra|
kabahiṃ dekhibe nayana bhari rāmu lakhanū dou bīra || 300 ||

garajahiṃ gaja ghaṃṭā dhuni ghorā| ratha rava bāji hiṃsa cahu orā ||
nidari ghanahi ghurmmarahiṃ nisānā| nija parāi kachu sunia na kānā ||
mahā bhīra bhūpati ke dvāreṃ| raja hoi jāi paṣāna pabāreṃ ||
caṛhī aṭārinha dekhahiṃ nārīṃ| li~e~ āratī maṃgala thārī ||
gāvahiṃ gīta manohara nānā| ati ānaṃdu na jāi bakhānā ||
taba sumaṃtra dui spaṃdana sājī| jote rabi haya niṃdaka bājī ||
dou ratha rucira bhūpa pahiṃ āne| nahiṃ sārada pahiṃ jāhiṃ bakhāne ||
rāja samāju eka ratha sājā| dūsara teja puṃja ati bhrājā ||

do. tehiṃ ratha rucira basiṣṭha kahu~ haraṣi caṛhāi naresu|
āpu caṛheu spaṃdana sumiri hara gura gauri ganesu || 301 ||

sahita basiṣṭha soha nṛpa kaiseṃ| sura gura saṃga puraṃdara jaiseṃ ||
kari kula rīti beda bidhi rāū| dekhi sabahi saba bhā~ti banāū ||
sumiri rāmu gura āyasu pāī| cale mahīpati saṃkha bajāī ||
haraṣe bibudha biloki barātā| baraṣahiṃ sumana sumaṃgala dātā ||
bhayau kolāhala haya gaya gāje| byoma barāta bājane bāje ||
sura nara nāri sumaṃgala gāī| sarasa rāga bājahiṃ sahanāī ||
ghaṃṭa ghaṃṭi dhuni barani na jāhīṃ| sarava karahiṃ pāika phaharāhīṃ ||
karahiṃ bidūṣaka kautuka nānā| hāsa kusala kala gāna sujānā |

do. turaga nacāvahiṃ ku~ara bara akani mṛdaṃga nisāna ||
nāgara naṭa citavahiṃ cakita ḍagahiṃ na tāla ba~dhāna || 302 ||

banai na baranata banī barātā| hohiṃ saguna suṃdara subhadātā ||
cārā cāṣu bāma disi leī| manahu~ sakala maṃgala kahi deī ||
dāhina kāga sukheta suhāvā| nakula darasu saba kāhū~ pāvā ||
sānukūla baha tribidha bayārī| saghaṭa savāla āva bara nārī ||
lovā phiri phiri darasu dekhāvā| surabhī sanamukha sisuhi piāvā ||
mṛgamālā phiri dāhini āī| maṃgala gana janu dīnhi dekhāī ||
chemakarī kaha chema biseṣī| syāmā bāma sutaru para dekhī ||
sanamukha āyau dadhi aru mīnā| kara pustaka dui bipra prabīnā ||

do. maṃgalamaya kalyānamaya abhimata phala dātāra|
janu saba sāce hona hita bhae saguna eka bāra || 303 ||

maṃgala saguna sugama saba tākeṃ| saguna brahma suṃdara suta jākeṃ ||
rāma sarisa baru dulahini sītā| samadhī dasarathu janaku punītā ||
suni asa byāhu saguna saba nāce| aba kīnhe biraṃci hama sā~ce ||
ehi bidhi kīnha barāta payānā| haya gaya gājahiṃ hane nisānā ||
āvata jāni bhānukula ketū| saritanhi janaka ba~dhāe setū ||
bīca bīca bara bāsa banāe| surapura sarisa saṃpadā chāe ||
asana sayana bara basana suhāe| pāvahiṃ saba nija nija mana bhāe ||
nita nūtana sukha lakhi anukūle| sakala barātinha maṃdira bhūle ||

do. āvata jāni barāta bara suni gahagahe nisāna|
saji gaja ratha padacara turaga lena cale agavāna || 304 ||

māsapārāyaṇa,dasavā~ viśrāma
kanaka kalasa bhari kopara thārā| bhājana lalita aneka prakārā ||
bhare sudhāsama saba pakavāne| nānā bhā~ti na jāhiṃ bakhāne ||
phala aneka bara bastu suhāīṃ| haraṣi bheṃṭa hita bhūpa paṭhāīṃ ||
bhūṣana basana mahāmani nānā| khaga mṛga haya gaya bahubidhi jānā ||
maṃgala saguna sugaṃdha suhāe| bahuta bhā~ti mahipāla paṭhāe ||
dadhi ciurā upahāra apārā| bhari bhari kā~vari cale kahārā ||
agavānanha jaba dīkhi barātā|ura ānaṃdu pulaka bhara gātā ||
dekhi banāva sahita agavānā| mudita barātinha hane nisānā ||

do. haraṣi parasapara milana hita kachuka cale bagamela|
janu ānaṃda samudra dui milata bihāi subela || 305 ||

baraṣi sumana sura suṃdari gāvahiṃ| mudita deva duṃdubhīṃ bajāvahiṃ ||
bastu sakala rākhīṃ nṛpa āgeṃ| binaya kīnha tinha ati anurāgeṃ ||
prema sameta rāya~ sabu līnhā| bhai bakasīsa jācakanhi dīnhā ||
kari pūjā mānyatā baṛāī| janavāse kahu~ cale lavāī ||
basana bicitra pā~vaṛe parahīṃ| dekhi dhanahu dhana madu pariharahīṃ ||
ati suṃdara dīnheu janavāsā| jaha~ saba kahu~ saba bhā~ti supāsā ||
jānī siya~ barāta pura āī| kachu nija mahimā pragaṭi janāī ||
hṛdaya~ sumiri saba siddhi bolāī| bhūpa pahunaī karana paṭhāī ||

do. sidhi saba siya āyasu akani gaīṃ jahā~ janavāsa|
lie~ saṃpadā sakala sukha surapura bhoga bilāsa || 306 ||

nija nija bāsa biloki barātī| sura sukha sakala sulabha saba bhā~tī ||
bibhava bheda kachu kou na jānā| sakala janaka kara karahiṃ bakhānā ||
siya mahimā raghunāyaka jānī| haraṣe hṛdaya~ hetu pahicānī ||
pitu āgamanu sunata dou bhāī| hṛdaya~ na ati ānaṃdu amāī ||
sakucanha kahi na sakata guru pāhīṃ| pitu darasana lālacu mana māhīṃ ||
bisvāmitra binaya baṛi dekhī| upajā ura saṃtoṣu biseṣī ||
haraṣi baṃdhu dou hṛdaya~ lagāe| pulaka aṃga aṃbaka jala chāe ||
cale jahā~ dasarathu janavāse| manahu~ sarobara takeu piāse ||

do. bhūpa biloke jabahiṃ muni āvata sutanha sameta|
uṭhe haraṣi sukhasiṃdhu mahu~ cale thāha sī leta || 307 ||

munihi daṃḍavata kīnha mahīsā| bāra bāra pada raja dhari sīsā ||
kausika rāu liye ura lāī| kahi asīsa pūchī kusalāī ||
puni daṃḍavata karata dou bhāī| dekhi nṛpati ura sukhu na samāī ||
suta hiya~ lāi dusaha dukha meṭe| mṛtaka sarīra prāna janu bheṃṭe ||
puni basiṣṭha pada sira tinha nāe| prema mudita munibara ura lāe ||
bipra bṛṃda baṃde duhu~ bhāīṃ| mana bhāvatī asīseṃ pāīṃ ||
bharata sahānuja kīnha pranāmā| lie uṭhāi lāi ura rāmā ||
haraṣe lakhana dekhi dou bhrātā| mile prema paripūrita gātā ||

do. purajana parijana jātijana jācaka maṃtrī mīta|
mile jathābidhi sabahi prabhu parama kṛpāla binīta || 308 ||

rāmahi dekhi barāta juṛānī| prīti ki rīti na jāti bakhānī ||
nṛpa samīpa sohahiṃ suta cārī| janu dhana dharamādika tanudhārī ||
sutanha sameta dasarathahi dekhī| mudita nagara nara nāri biseṣī ||
sumana barisi sura hanahiṃ nisānā| nākanaṭīṃ nācahiṃ kari gānā ||
satānaṃda aru bipra saciva gana| māgadha sūta biduṣa baṃdījana ||
sahita barāta rāu sanamānā| āyasu māgi phire agavānā ||
prathama barāta lagana teṃ āī| tāteṃ pura pramodu adhikāī ||
brahmānaṃdu loga saba lahahīṃ| baṛhahu~ divasa nisi bidhi sana kahahīṃ ||

do. rāmu sīya sobhā avadhi sukṛta avadhi dou rāja|
jaha~ jaha~ purajana kahahiṃ asa mili nara nāri samāja || |309 ||

janaka sukṛta mūrati baidehī| dasaratha sukṛta rāmu dhareṃ dehī ||
inha sama kā~hu na siva avarādhe| kāhi~ na inha samāna phala lādhe ||
inha sama kou na bhayau jaga māhīṃ| hai nahiṃ katahū~ honeu nāhīṃ ||
hama saba sakala sukṛta kai rāsī| bhae jaga janami janakapura bāsī ||
jinha jānakī rāma chabi dekhī| ko sukṛtī hama sarisa biseṣī ||
puni dekhaba raghubīra biāhū| leba bhalī bidhi locana lāhū ||
kahahiṃ parasapara kokilabayanīṃ| ehi biāha~ baṛa lābhu sunayanīṃ ||
baṛeṃ bhāga bidhi bāta banāī| nayana atithi hoihahiṃ dou bhāī ||

do. bārahiṃ bāra saneha basa janaka bolāuba sīya|
lena āihahiṃ baṃdhu dou koṭi kāma kamanīya || 310 ||

bibidha bhā~ti hoihi pahunāī| priya na kāhi asa sāsura māī ||
taba taba rāma lakhanahi nihārī| hoihahiṃ saba pura loga sukhārī ||
sakhi jasa rāma lakhanakara joṭā| taisei bhūpa saṃga dui ḍhoṭā ||
syāma gaura saba aṃga suhāe| te saba kahahiṃ dekhi je āe ||
kahā eka maiṃ āju nihāre| janu biraṃci nija hātha sa~vāre ||
bharatu rāmahī kī anuhārī| sahasā lakhi na sakahiṃ nara nārī ||
lakhanu satrusūdanu ekarūpā| nakha sikha te saba aṃga anūpā ||
mana bhāvahiṃ mukha barani na jāhīṃ| upamā kahu~ tribhuvana kou nāhīṃ ||

chaṃ. upamā na kou kaha dāsa tulasī katahu~ kabi kobida kahaiṃ|
bala binaya bidyā sīla sobhā siṃdhu inha se ei ahaiṃ ||
pura nāri sakala pasāri aṃcala bidhihi bacana sunāvahīṃ ||
byāhiahu~ cāriu bhāi ehiṃ pura hama sumaṃgala gāvahīṃ ||

so. kahahiṃ paraspara nāri bāri bilocana pulaka tana|
sakhi sabu karaba purāri punya payonidhi bhūpa dou || 311 ||

ehi bidhi sakala manoratha karahīṃ| āna~da umagi umagi ura bharahīṃ ||
je nṛpa sīya svayaṃbara āe| dekhi baṃdhu saba tinha sukha pāe ||
kahata rāma jasu bisada bisālā| nija nija bhavana gae mahipālā ||
gae bīti kucha dina ehi bhā~tī| pramudita purajana sakala barātī ||
maṃgala mūla lagana dinu āvā| hima ritu agahanu māsu suhāvā ||
graha tithi nakhatu jogu bara bārū| lagana sodhi bidhi kīnha bicārū ||
paṭhai dīnhi nārada sana soī| ganī janaka ke ganakanha joī ||
sunī sakala loganha yaha bātā| kahahiṃ jotiṣī āhiṃ bidhātā ||

do. dhenudhūri belā bimala sakala sumaṃgala mūla|
bipranha kaheu bideha sana jāni saguna anukula || 312 ||

uparohitahi kaheu naranāhā| aba bilaṃba kara kāranu kāhā ||
satānaṃda taba saciva bolāe| maṃgala sakala sāji saba lyāe ||
saṃkha nisāna panava bahu bāje| maṃgala kalasa saguna subha sāje ||
subhaga suāsini gāvahiṃ gītā| karahiṃ beda dhuni bipra punītā ||
lena cale sādara ehi bhā~tī| gae jahā~ janavāsa barātī ||
kosalapati kara dekhi samājū| ati laghu lāga tinhahi surarājū ||
bhayau samau aba dhāria pāū| yaha suni parā nisānahiṃ ghāū ||
gurahi pūchi kari kula bidhi rājā| cale saṃga muni sādhu samājā ||

do. bhāgya bibhava avadhesa kara dekhi deva brahmādi|
lage sarāhana sahasa mukha jāni janama nija bādi || 313 ||

suranha sumaṃgala avasaru jānā| baraṣahiṃ sumana bajāi nisānā ||
siva brahmādika bibudha barūthā| caṛhe bimānanhi nānā jūthā ||
prema pulaka tana hṛdaya~ uchāhū| cale bilokana rāma biāhū ||
dekhi janakapuru sura anurāge| nija nija loka sabahiṃ laghu lāge ||
citavahiṃ cakita bicitra bitānā| racanā sakala alaukika nānā ||
nagara nāri nara rūpa nidhānā| sughara sudharama susīla sujānā ||
tinhahi dekhi saba sura suranārīṃ| bhae nakhata janu bidhu ujiārīṃ ||
bidhihi bhayaha ācaraju biseṣī| nija karanī kachu katahu~ na dekhī ||

do. siva~ samujhāe deva saba jani ācaraja bhulāhu|
hṛdaya~ bicārahu dhīra dhari siya raghubīra biāhu || 314 ||

jinha kara nāmu leta jaga māhīṃ| sakala amaṃgala mūla nasāhīṃ ||
karatala hohiṃ padāratha cārī| tei siya rāmu kaheu kāmārī ||
ehi bidhi saṃbhu suranha samujhāvā| puni āgeṃ bara basaha calāvā ||
devanha dekhe dasarathu jātā| mahāmoda mana pulakita gātā ||
sādhu samāja saṃga mahidevā| janu tanu dhareṃ karahiṃ sukha sevā ||
sohata sātha subhaga suta cārī| janu apabaraga sakala tanudhārī ||
marakata kanaka barana bara jorī| dekhi suranha bhai prīti na thorī ||
puni rāmahi biloki hiya~ haraṣe| nṛpahi sarāhi sumana tinha baraṣe ||

do. rāma rūpu nakha sikha subhaga bārahiṃ bāra nihāri|
pulaka gāta locana sajala umā sameta purāri || 315 ||

keki kaṃṭha duti syāmala aṃgā| taṛita biniṃdaka basana suraṃgā ||
byāha bibhūṣana bibidha banāe| maṃgala saba saba bhā~ti suhāe ||
sarada bimala bidhu badanu suhāvana| nayana navala rājīva lajāvana ||
sakala alaukika suṃdaratāī| kahi na jāi manahīṃ mana bhāī ||
baṃdhu manohara sohahiṃ saṃgā| jāta nacāvata capala turaṃgā ||
rājakua~ra bara bāji dekhāvahiṃ| baṃsa prasaṃsaka birida sunāvahiṃ ||
jehi turaṃga para rāmu birāje| gati biloki khaganāyaku lāje ||
kahi na jāi saba bhā~ti suhāvā| bāji beṣu janu kāma banāvā ||

chaṃ. janu bāji beṣu banāi manasiju rāma hita ati sohaī|
āpaneṃ baya bala rūpa guna gati sakala bhuvana bimohaī ||
jagamagata jīnu jarāva joti sumoti mani mānika lage|
kiṃkini lalāma lagāmu lalita biloki sura nara muni ṭhage ||

do. prabhu manasahiṃ layalīna manu calata bāji chabi pāva|
bhūṣita uṛagana taṛita ghanu janu bara barahi nacāva || 316 ||

jehiṃ bara bāji rāmu asavārā| tehi sāradau na baranai pārā ||
saṃkaru rāma rūpa anurāge| nayana paṃcadasa ati priya lāge ||
hari hita sahita rāmu jaba johe| ramā sameta ramāpati mohe ||
nirakhi rāma chabi bidhi haraṣāne| āṭhai nayana jāni pachitāne ||
sura senapa ura bahuta uchāhū| bidhi te ḍevaṛha locana lāhū ||
rāmahi citava suresa sujānā| gautama śrāpu parama hita mānā ||
deva sakala surapatihi sihāhīṃ| āju puraṃdara sama kou nāhīṃ ||
mudita devagana rāmahi dekhī| nṛpasamāja duhu~ haraṣu biseṣī ||

chaṃ. ati haraṣu rājasamāja duhu disi duṃdubhīṃ bājahiṃ ghanī|
baraṣahiṃ sumana sura haraṣi kahi jaya jayati jaya raghukulamanī ||
ehi bhā~ti jāni barāta āvata bājane bahu bājahīṃ|
rāni suāsini boli parichani hetu maṃgala sājahīṃ ||

do. saji āratī aneka bidhi maṃgala sakala sa~vāri|
calīṃ mudita parichani karana gajagāmini bara nāri || 317 ||

bidhubadanīṃ saba saba mṛgalocani| saba nija tana chabi rati madu mocani ||
pahireṃ barana barana bara cīrā| sakala bibhūṣana sajeṃ sarīrā ||
sakala sumaṃgala aṃga banāe~| karahiṃ gāna kalakaṃṭhi lajāe~ ||
kaṃkana kiṃkini nūpura bājahiṃ| cāli biloki kāma gaja lājahiṃ ||
bājahiṃ bājane bibidha prakārā| nabha aru nagara sumaṃgalacārā ||
sacī sāradā ramā bhavānī| je suratiya suci sahaja sayānī ||
kapaṭa nāri bara beṣa banāī| milīṃ sakala ranivāsahiṃ jāī ||
karahiṃ gāna kala maṃgala bānīṃ| haraṣa bibasa saba kāhu~ na jānī ||

chaṃ. ko jāna kehi ānaṃda basa saba brahmu bara parichana calī|
kala gāna madhura nisāna baraṣahiṃ sumana sura sobhā bhalī ||
ānaṃdakaṃdu biloki dūlahu sakala hiya~ haraṣita bhaī ||
aṃbhoja aṃbaka aṃbu umagi suaṃga pulakāvali chaī ||

do. jo sukha bhā siya mātu mana dekhi rāma bara beṣu|
so na sakahiṃ kahi kalapa sata sahasa sāradā seṣu || 318 ||


nayana nīru haṭi maṃgala jānī| parichani karahiṃ mudita mana rānī ||
beda bihita aru kula ācārū| kīnha bhalī bidhi saba byavahārū ||
paṃca sabada dhuni maṃgala gānā| paṭa pā~vaṛe parahiṃ bidhi nānā ||
kari āratī araghu tinha dīnhā| rāma gamanu maṃḍapa taba kīnhā ||
dasarathu sahita samāja birāje| bibhava biloki lokapati lāje ||
samaya~ samaya~ sura baraṣahiṃ phūlā| sāṃti paṛhahiṃ mahisura anukūlā ||
nabha aru nagara kolāhala hoī| āpani para kachu sunai na koī ||
ehi bidhi rāmu maṃḍapahiṃ āe| araghu dei āsana baiṭhāe ||

chaṃ. baiṭhāri āsana āratī kari nirakhi baru sukhu pāvahīṃ ||
mani basana bhūṣana bhūri vārahiṃ nāri maṃgala gāvahīṃ ||
brahmādi surabara bipra beṣa banāi kautuka dekhahīṃ|
avaloki raghukula kamala rabi chabi suphala jīvana lekhahīṃ ||

do. nāū bārī bhāṭa naṭa rāma nichāvari pāi|
mudita asīsahiṃ nāi sira haraṣu na hṛdaya~ samāi || 319 ||

mile janaku dasarathu ati prītīṃ| kari baidika laukika saba rītīṃ ||
milata mahā dou rāja birāje| upamā khoji khoji kabi lāje ||
lahī na katahu~ hāri hiya~ mānī| inha sama ei upamā ura ānī ||
sāmadha dekhi deva anurāge| sumana baraṣi jasu gāvana lāge ||
jagu biraṃci upajāvā jaba teṃ| dekhe sune byāha bahu taba teṃ ||
sakala bhā~ti sama sāju samājū| sama samadhī dekhe hama ājū ||
deva girā suni suṃdara sā~cī| prīti alaukika duhu disi mācī ||
deta pā~vaṛe araghu suhāe| sādara janaku maṃḍapahiṃ lyāe ||

chaṃ. maṃḍapu biloki bicītra racanā~ ruciratā~ muni mana hare ||
nija pāni janaka sujāna saba kahu~ āni siṃghāsana dhare ||
kula iṣṭa sarisa basiṣṭa pūje binaya kari āsiṣa lahī|
kausikahi pūjata parama prīti ki rīti tau na parai kahī ||

do. bāmadeva ādika riṣaya pūje mudita mahīsa|
die dibya āsana sabahi saba sana lahī asīsa || 320 ||

bahuri kīnha kosalapati pūjā| jāni īsa sama bhāu na dūjā ||
kīnha jori kara binaya baṛāī| kahi nija bhāgya bibhava bahutāī ||
pūje bhūpati sakala barātī| samadhi sama sādara saba bhā~tī ||
āsana ucita die saba kāhū| kahauṃ kāha mūkha eka uchāhū ||
sakala barāta janaka sanamānī| dāna māna binatī bara bānī ||
bidhi hari haru disipati dinarāū| je jānahiṃ raghubīra prabhāū ||
kapaṭa bipra bara beṣa banāe~| kautuka dekhahiṃ ati sacu pāe~ ||
pūje janaka deva sama jāneṃ| die suāsana binu pahicāneṃ ||

chaṃ. pahicāna ko kehi jāna sabahiṃ apāna sudhi bhorī bhaī|
ānaṃda kaṃdu biloki dūlahu ubhaya disi āna~da maī ||
sura lakhe rāma sujāna pūje mānasika āsana dae|
avaloki sīlu subhāu prabhu ko bibudha mana pramudita bhae ||

do. rāmacaṃdra mukha caṃdra chabi locana cāru cakora|
karata pāna sādara sakala premu pramodu na thora || 321 ||

samau biloki basiṣṭha bolāe| sādara satānaṃdu suni āe ||
begi kua~ri aba ānahu jāī| cale mudita muni āyasu pāī ||
rānī suni uparohita bānī| pramudita sakhinha sameta sayānī ||
bipra badhū kulabṛddha bolāīṃ| kari kula rīti sumaṃgala gāīṃ ||
nāri beṣa je sura bara bāmā| sakala subhāya~ suṃdarī syāmā ||
tinhahi dekhi sukhu pāvahiṃ nārīṃ| binu pahicāni prānahu te pyārīṃ ||
bāra bāra sanamānahiṃ rānī| umā ramā sārada sama jānī ||
sīya sa~vāri samāju banāī| mudita maṃḍapahiṃ calīṃ lavāī ||

chaṃ. cali lyāi sītahi sakhīṃ sādara saji sumaṃgala bhāminīṃ|
navasapta sājeṃ suṃdarī saba matta kuṃjara gāminīṃ ||
kala gāna suni muni dhyāna tyāgahiṃ kāma kokila lājahīṃ|
maṃjīra nūpura kalita kaṃkana tāla gatī bara bājahīṃ ||

do. sohati banitā bṛṃda mahu~ sahaja suhāvani sīya|
chabi lalanā gana madhya janu suṣamā tiya kamanīya || 322 ||

siya suṃdaratā barani na jāī| laghu mati bahuta manoharatāī ||
āvata dīkhi barātinha sītā || rūpa rāsi saba bhā~ti punītā ||
sabahi manahiṃ mana kie pranāmā| dekhi rāma bhae pūranakāmā ||
haraṣe dasaratha sutanha sametā| kahi na jāi ura āna~du jetā ||
sura pranāmu kari barasahiṃ phūlā| muni asīsa dhuni maṃgala mūlā ||
gāna nisāna kolāhalu bhārī| prema pramoda magana nara nārī ||
ehi bidhi sīya maṃḍapahiṃ āī| pramudita sāṃti paṛhahiṃ munirāī ||
tehi avasara kara bidhi byavahārū| duhu~ kulagura saba kīnha acārū ||

chaṃ. ācāru kari gura gauri ganapati mudita bipra pujāvahīṃ|
sura pragaṭi pūjā lehiṃ dehiṃ asīsa ati sukhu pāvahīṃ ||
madhuparka maṃgala drabya jo jehi samaya muni mana mahu~ cahaiṃ|
bhare kanaka kopara kalasa so saba liehiṃ paricāraka rahaiṃ || 1 ||


kula rīti prīti sameta rabi kahi deta sabu sādara kiyo|

ehi bhā~ti deva pujāi sītahi subhaga siṃghāsanu diyo ||

siya rāma avalokani parasapara prema kāhu na lakhi parai ||

mana buddhi bara bānī agocara pragaṭa kabi kaiseṃ karai || 2 ||

do. homa samaya tanu dhari analu ati sukha āhuti lehiṃ|
bipra beṣa dhari beda saba kahi bibāha bidhi dehiṃ || 323 ||

janaka pāṭamahiṣī jaga jānī| sīya mātu kimi jāi bakhānī ||
sujasu sukṛta sukha sudaṃratāī| saba sameṭi bidhi racī banāī ||
samau jāni munibaranha bolāī| sunata suāsini sādara lyāī ||
janaka bāma disi soha sunayanā| himagiri saṃga bani janu mayanā ||
kanaka kalasa mani kopara rūre| suci suṃgadha maṃgala jala pūre ||
nija kara mudita rāya~ aru rānī| dhare rāma ke āgeṃ ānī ||
paṛhahiṃ beda muni maṃgala bānī| gagana sumana jhari avasaru jānī ||
baru biloki daṃpati anurāge| pāya punīta pakhārana lāge ||

chaṃ. lāge pakhārana pāya paṃkaja prema tana pulakāvalī|
nabha nagara gāna nisāna jaya dhuni umagi janu cahu~ disi calī ||
je pada saroja manoja ari ura sara sadaiva birājahīṃ|
je sakṛta sumirata bimalatā mana sakala kali mala bhājahīṃ || 1 ||

je parasi munibanitā lahī gati rahī jo pātakamaī|
makaraṃdu jinha ko saṃbhu sira sucitā avadhi sura baranaī ||
kari madhupa mana muni jogijana je sei abhimata gati lahaiṃ|
te pada pakhārata bhāgyabhājanu janaku jaya jaya saba kahai || 2 ||

bara kua~ri karatala jori sākhocāru dou kulagura karaiṃ|
bhayo pānigahanu biloki bidhi sura manuja muni ā~nada bharaiṃ ||
sukhamūla dūlahu dekhi daṃpati pulaka tana hulasyo hiyo|
kari loka beda bidhānu kanyādānu nṛpabhūṣana kiyo || 3 ||

himavaṃta jimi girijā mahesahi harihi śrī sāgara daī|
timi janaka rāmahi siya samarapī bisva kala kīrati naī ||
kyoṃ karai binaya bidehu kiyo bidehu mūrati sāva~rī|
kari homa bidhivata gā~ṭhi jorī hona lāgī bhāva~rī || 4 ||

do. jaya dhuni baṃdī beda dhuni maṃgala gāna nisāna|
suni haraṣahiṃ baraṣahiṃ bibudha surataru sumana sujāna || 324 ||

kua~ru kua~ri kala bhāva~ri dehīṃ || nayana lābhu saba sādara lehīṃ ||
jāi na barani manohara jorī| jo upamā kachu kahauṃ so thorī ||
rāma sīya suṃdara pratichāhīṃ| jagamagāta mani khaṃbhana māhīṃ |
manahu~ madana rati dhari bahu rūpā| dekhata rāma biāhu anūpā ||
darasa lālasā sakuca na thorī| pragaṭata durata bahori bahorī ||
bhae magana saba dekhanihāre| janaka samāna apāna bisāre ||
pramudita muninha bhāva~rī pherī| negasahita saba rīti niberīṃ ||
rāma sīya sira seṃdura dehīṃ| sobhā kahi na jāti bidhi kehīṃ ||
aruna parāga jalaju bhari nīkeṃ| sasihi bhūṣa ahi lobha amī keṃ ||
bahuri basiṣṭha dīnha anusāsana| baru dulahini baiṭhe eka āsana ||

chaṃ. baiṭhe barāsana rāmu jānaki mudita mana dasarathu bhae|
tanu pulaka puni puni dekhi apaneṃ sukṛta surataru phala nae ||
bhari bhuvana rahā uchāhu rāma bibāhu bhā sabahīṃ kahā|
kehi bhā~ti barani sirāta rasanā eka yahu maṃgalu mahā || 1 ||

taba janaka pāi basiṣṭha āyasu byāha sāja sa~vāri kai|
mā~ḍavī śrutikīrati uramilā kua~ri laīṃ ha~kāri ke ||
kusaketu kanyā prathama jo guna sīla sukha sobhāmaī|
saba rīti prīti sameta kari so byāhi nṛpa bharatahi daī || 2 ||

jānakī laghu bhaginī sakala suṃdari siromani jāni kai|
so tanaya dīnhī byāhi lakhanahi sakala bidhi sanamāni kai ||
jehi nāmu śrutakīrati sulocani sumukhi saba guna āgarī|
so daī ripusūdanahi bhūpati rūpa sīla ujāgarī || 3 ||

anurupa bara dulahini paraspara lakhi sakuca hiya~ haraṣahīṃ|
saba mudita suṃdaratā sarāhahiṃ sumana sura gana baraṣahīṃ ||
suṃdarī suṃdara baranha saha saba eka maṃḍapa rājahīṃ|
janu jīva ura cāriu avasthā bimuna sahita birājahīṃ || 4 ||

do. mudita avadhapati sakala suta badhunha sameta nihāri|
janu pāra mahipāla mani kriyanha sahita phala cāri || 325 ||

jasi raghubīra byāha bidhi baranī| sakala kua~ra byāhe tehiṃ karanī ||
kahi na jāi kachu dāija bhūrī| rahā kanaka mani maṃḍapu pūrī ||
kaṃbala basana bicitra paṭore| bhā~ti bhā~ti bahu mola na thore ||
gaja ratha turaga dāsa aru dāsī| dhenu alaṃkṛta kāmaduhā sī ||
bastu aneka karia kimi lekhā| kahi na jāi jānahiṃ jinha dekhā ||
lokapāla avaloki sihāne| līnha avadhapati sabu sukhu māne ||
dīnha jācakanhi jo jehi bhāvā| ubarā so janavāsehiṃ āvā ||
taba kara jori janaku mṛdu bānī| bole saba barāta sanamānī ||

chaṃ. sanamāni sakala barāta ādara dāna binaya baṛāi kai|
pramudita mahā muni bṛṃda baṃde pūji prema laṛāi kai ||
siru nāi deva manāi saba sana kahata kara saṃpuṭa kie~|
sura sādhu cāhata bhāu siṃdhu ki toṣa jala aṃjali die~ || 1 ||

kara jori janaku bahori baṃdhu sameta kosalarāya soṃ|
bole manohara bayana sāni saneha sīla subhāya soṃ ||
saṃbaṃdha rājana rāvareṃ hama baṛe aba saba bidhi bhae|
ehi rāja sāja sameta sevaka jānibe binu gatha lae || 2 ||

e dārikā paricārikā kari pālibīṃ karunā naī|
aparādhu chamibo boli paṭhae bahuta hauṃ ḍhīṭyo kaī ||
puni bhānukulabhūṣana sakala sanamāna nidhi samadhī kie|
kahi jāti nahiṃ binatī paraspara prema paripūrana hie || 3 ||

bṛṃdārakā gana sumana barisahiṃ rāu janavāsehi cale|
duṃdubhī jaya dhuni beda dhuni nabha nagara kautūhala bhale ||
taba sakhīṃ maṃgala gāna karata munīsa āyasu pāi kai|
dūlaha dulahininha sahita suṃdari calīṃ kohabara lyāi kai || 4 ||

do. puni puni rāmahi citava siya sakucati manu sakucai na|
harata manohara mīna chabi prema piāse naina || 326 ||

māsapārāyaṇa, gyārahavā~ viśrāma
syāma sarīru subhāya~ suhāvana| sobhā koṭi manoja lajāvana ||
jāvaka juta pada kamala suhāe| muni mana madhupa rahata jinha chāe ||
pīta punīta manohara dhotī| harati bāla rabi dāmini jotī ||
kala kiṃkini kaṭi sūtra manohara| bāhu bisāla bibhūṣana suṃdara ||
pīta janeu mahāchabi deī| kara mudrikā cori citu leī ||
sohata byāha sāja saba sāje| ura āyata urabhūṣana rāje ||
piara uparanā kākhāsotī| duhu~ ā~caranhi lage mani motī ||
nayana kamala kala kuṃḍala kānā| badanu sakala sauṃdarja nidhānā ||
suṃdara bhṛkuṭi manohara nāsā| bhāla tilaku ruciratā nivāsā ||
sohata mauru manohara māthe| maṃgalamaya mukutā mani gāthe ||

chaṃ. gāthe mahāmani maura maṃjula aṃga saba cita corahīṃ|
pura nāri sura suṃdarīṃ barahi biloki saba tina torahīṃ ||
mani basana bhūṣana vāri ārati karahiṃ maṃgala gāvahiṃ|
sura sumana barisahiṃ sūta māgadha baṃdi sujasu sunāvahīṃ || 1 ||

kohabarahiṃ āne ku~ara ku~ari suāsininha sukha pāi kai|
ati prīti laukika rīti lāgīṃ karana maṃgala gāi kai ||
lahakauri gauri sikhāva rāmahi sīya sana sārada kahaiṃ|
ranivāsu hāsa bilāsa rasa basa janma ko phalu saba lahaiṃ || 2 ||

nija pāni mani mahu~ dekhiati mūrati surūpanidhāna kī|
cālati na bhujaballī bilokani biraha bhaya basa jānakī ||
kautuka binoda pramodu premu na jāi kahi jānahiṃ alīṃ|
bara kua~ri suṃdara sakala sakhīṃ lavāi janavāsehi calīṃ || 3 ||

tehi samaya sunia asīsa jaha~ taha~ nagara nabha āna~du mahā|
ciru jiahu~ jorīṃ cāru cārayo mudita mana sabahīṃ kahā ||
jogīndra siddha munīsa deva biloki prabhu duṃdubhi hanī|
cale haraṣi baraṣi prasūna nija nija loka jaya jaya jaya bhanī || 4 ||

do. sahita badhūṭinha kua~ra saba taba āe pitu pāsa|
sobhā maṃgala moda bhari umageu janu janavāsa || 327 ||

puni jevanāra bhaī bahu bhā~tī| paṭhae janaka bolāi barātī ||
parata pā~vaṛe basana anūpā| sutanha sameta gavana kiyo bhūpā ||
sādara sabake pāya pakhāre| jathājogu pīṛhanha baiṭhāre ||
dhoe janaka avadhapati caranā| sīlu sanehu jāi nahiṃ baranā ||
bahuri rāma pada paṃkaja dhoe| je hara hṛdaya kamala mahu~ goe ||
tīniu bhāī rāma sama jānī| dhoe carana janaka nija pānī ||
āsana ucita sabahi nṛpa dīnhe| boli sūpakārī saba līnhe ||
sādara lage parana panavāre| kanaka kīla mani pāna sa~vāre ||

do. sūpodana surabhī sarapi suṃdara svādu punīta|
chana mahu~ saba keṃ parusi ge catura suāra binīta || 328 ||

paṃca kavala kari jevana lāge| gāri gāna suni ati anurāge ||
bhā~ti aneka pare pakavāne| sudhā sarisa nahiṃ jāhiṃ bakhāne ||
parusana lage suāra sujānā| biṃjana bibidha nāma ko jānā ||
cāri bhā~ti bhojana bidhi gāī| eka eka bidhi barani na jāī ||
charasa rucira biṃjana bahu jātī| eka eka rasa aganita bhā~tī ||
jeva~ta dehiṃ madhura dhuni gārī| lai lai nāma puruṣa aru nārī ||
samaya suhāvani gāri birājā| ha~sata rāu suni sahita samājā ||
ehi bidhi sabahīṃ bhaujanu kīnhā| ādara sahita ācamanu dīnhā ||

do. dei pāna pūje janaka dasarathu sahita samāja|
janavāsehi gavane mudita sakala bhūpa siratāja || 329 ||

nita nūtana maṃgala pura māhīṃ| nimiṣa sarisa dina jāmini jāhīṃ ||
baṛe bhora bhūpatimani jāge| jācaka guna gana gāvana lāge ||
dekhi kua~ra bara badhunha sametā| kimi kahi jāta modu mana jetā ||
prātakriyā kari ge guru pāhīṃ| mahāpramodu premu mana māhīṃ ||
kari pranāma pūjā kara jorī| bole girā amia~ janu borī ||
tumharī kṛpā~ sunahu munirājā| bhayau~ āju maiṃ pūranakājā ||
aba saba bipra bolāi gosāīṃ| dehu dhenu saba bhā~ti banāī ||
suni gura kari mahipāla baṛāī| puni paṭhae muni bṛṃda bolāī ||

do. bāmadeu aru devariṣi bālamīki jābāli|
āe munibara nikara taba kausikādi tapasāli || 330 ||

daṃḍa pranāma sabahi nṛpa kīnhe| pūji saprema barāsana dīnhe ||
cāri laccha bara dhenu magāī| kāmasurabhi sama sīla suhāī ||
saba bidhi sakala alaṃkṛta kīnhīṃ| mudita mahipa mahidevanha dīnhīṃ ||
karata binaya bahu bidhi naranāhū| laheu~ āju jaga jīvana lāhū ||
pāi asīsa mahīsu anaṃdā| lie boli puni jācaka bṛṃdā ||
kanaka basana mani haya gaya syaṃdana| die būjhi ruci rabikulanaṃdana ||
cale paṛhata gāvata guna gāthā| jaya jaya jaya dinakara kula nāthā ||
ehi bidhi rāma biāha uchāhū| sakai na barani sahasa mukha jāhū ||

do. bāra bāra kausika carana sīsu nāi kaha rāu|
yaha sabu sukhu munirāja tava kṛpā kaṭāccha pasāu || 331 ||

janaka sanehu sīlu karatūtī| nṛpu saba bhā~ti sarāha bibhūtī ||
dina uṭhi bidā avadhapati māgā| rākhahiṃ janaku sahita anurāgā ||
nita nūtana ādaru adhikāī| dina prati sahasa bhā~ti pahunāī ||
nita nava nagara anaṃda uchāhū| dasaratha gavanu sohāi na kāhū ||
bahuta divasa bīte ehi bhā~tī| janu saneha raju ba~dhe barātī ||
kausika satānaṃda taba jāī| kahā bideha nṛpahi samujhāī ||
aba dasaratha kaha~ āyasu dehū| jadyapi chāṛi na sakahu sanehū ||
bhalehiṃ nātha kahi saciva bolāe| kahi jaya jīva sīsa tinha nāe ||

do. avadhanāthu cāhata calana bhītara karahu janāu|
bhae premabasa saciva suni bipra sabhāsada rāu || 332 ||

purabāsī suni calihi barātā| būjhata bikala paraspara bātā ||
satya gavanu suni saba bilakhāne| manahu~ sā~jha sarasija sakucāne ||
jaha~ jaha~ āvata base barātī| taha~ taha~ siddha calā bahu bhā~tī ||
bibidha bhā~ti mevā pakavānā| bhojana sāju na jāi bakhānā ||
bhari bhari basaha~ apāra kahārā| paṭhaī janaka aneka susārā ||
turaga lākha ratha sahasa pacīsā| sakala sa~vāre nakha aru sīsā ||
matta sahasa dasa siṃdhura sāje| jinhahi dekhi disikuṃjara lāje ||
kanaka basana mani bhari bhari jānā| mahiṣīṃ dhenu bastu bidhi nānā ||

do. dāija amita na sakia kahi dīnha bideha~ bahori|
jo avalokata lokapati loka saṃpadā thori || 333 ||

sabu samāju ehi bhā~ti banāī| janaka avadhapura dīnha paṭhāī ||
calihi barāta sunata saba rānīṃ| bikala mīnagana janu laghu pānīṃ ||
puni puni sīya goda kari lehīṃ| dei asīsa sikhāvanu dehīṃ ||
hoehu saṃtata piyahi piārī| ciru ahibāta asīsa hamārī ||
sāsu sasura gura sevā karehū| pati rukha lakhi āyasu anusarehū ||
ati saneha basa sakhīṃ sayānī| nāri dharama sikhavahiṃ mṛdu bānī ||
sādara sakala kua~ri samujhāī| rāninha bāra bāra ura lāī ||
bahuri bahuri bheṭahiṃ mahatārīṃ| kahahiṃ biraṃci racīṃ kata nārīṃ ||

do. tehi avasara bhāinha sahita rāmu bhānu kula ketu|
cale janaka maṃdira mudita bidā karāvana hetu || 334 ||

cāria bhāi subhāya~ suhāe| nagara nāri nara dekhana dhāe ||
kou kaha calana cahata hahiṃ ājū| kīnha bideha bidā kara sājū ||
lehu nayana bhari rūpa nihārī| priya pāhune bhūpa suta cārī ||
ko jānai kehi sukṛta sayānī| nayana atithi kīnhe bidhi ānī ||
maranasīlu jimi pāva piūṣā| surataru lahai janama kara bhūkhā ||
pāva nārakī haripadu jaiseṃ| inha kara darasanu hama kaha~ taise ||
nirakhi rāma sobhā ura dharahū| nija mana phani mūrati mani karahū ||
ehi bidhi sabahi nayana phalu detā| gae kua~ra saba rāja niketā ||

do. rūpa siṃdhu saba baṃdhu lakhi haraṣi uṭhā ranivāsu|
karahi nichāvari āratī mahā mudita mana sāsu || 335 ||

dekhi rāma chabi ati anurāgīṃ| premabibasa puni puni pada lāgīṃ ||
rahī na lāja prīti ura chāī| sahaja sanehu barani kimi jāī ||
bhāinha sahita ubaṭi anhavāe| charasa asana ati hetu jevā~e ||
bole rāmu suavasaru jānī| sīla saneha sakucamaya bānī ||
rāu avadhapura cahata sidhāe| bidā hona hama ihā~ paṭhāe ||
mātu mudita mana āyasu dehū| bālaka jāni karaba nita nehū ||
sunata bacana bilakheu ranivāsū| boli na sakahiṃ premabasa sāsū ||
hṛdaya~ lagāi kua~ri saba līnhī| patinha sauṃpi binatī ati kīnhī ||

chaṃ. kari binaya siya rāmahi samarapī jori kara puni puni kahai|
bali jā~u tāta sujāna tumha kahu~ bidita gati saba kī ahai ||
parivāra purajana mohi rājahi prānapriya siya jānibī|
tulasīsa sīlu sanehu lakhi nija kiṃkarī kari mānibī ||

so. tumha paripūrana kāma jāna siromani bhāvapriya|
jana guna gāhaka rāma doṣa dalana karunāyatana || 336 ||

asa kahi rahī carana gahi rānī| prema paṃka janu girā samānī ||
suni sanehasānī bara bānī| bahubidhi rāma sāsu sanamānī ||
rāma bidā māgata kara jorī| kīnha pranāmu bahori bahorī ||
pāi asīsa bahuri siru nāī| bhāinha sahita cale raghurāī ||
maṃju madhura mūrati ura ānī| bhaī saneha sithila saba rānī ||
puni dhīraju dhari kua~ri ha~kārī| bāra bāra bheṭahiṃ mahatārīṃ ||
pahu~cāvahiṃ phiri milahiṃ bahorī| baṛhī paraspara prīti na thorī ||
puni puni milata sakhinha bilagāī| bāla baccha jimi dhenu lavāī ||

do. premabibasa nara nāri saba sakhinha sahita ranivāsu|
mānahu~ kīnha bidehapura karunā~ biraha~ nivāsu || 337 ||

suka sārikā jānakī jyāe| kanaka piṃjaranhi rākhi paṛhāe ||
byākula kahahiṃ kahā~ baidehī| suni dhīraju pariharai na kehī ||
bhae bikala khaga mṛga ehi bhā~ti| manuja dasā kaiseṃ kahi jātī ||
baṃdhu sameta janaku taba āe| prema umagi locana jala chāe ||
sīya biloki dhīratā bhāgī| rahe kahāvata parama birāgī ||
līnhi rā~ya ura lāi jānakī| miṭī mahāmarajāda gyāna kī ||
samujhāvata saba saciva sayāne| kīnha bicāru na avasara jāne ||
bārahiṃ bāra sutā ura lāī| saji suṃdara pālakīṃ magāī ||

do. premabibasa parivāru sabu jāni sulagana naresa|
ku~ari caṛhāī pālakinha sumire siddhi ganesa || 338 ||

bahubidhi bhūpa sutā samujhāī| nāridharamu kularīti sikhāī ||
dāsīṃ dāsa die bahutere| suci sevaka je priya siya kere ||
sīya calata byākula purabāsī| hohiṃ saguna subha maṃgala rāsī ||
bhūsura saciva sameta samājā| saṃga cale pahu~cāvana rājā ||
samaya biloki bājane bāje| ratha gaja bāji barātinha sāje ||
dasaratha bipra boli saba līnhe| dāna māna paripūrana kīnhe ||
carana saroja dhūri dhari sīsā| mudita mahīpati pāi asīsā ||
sumiri gajānanu kīnha payānā| maṃgalamūla saguna bhae nānā ||

do. sura prasūna baraṣahi haraṣi karahiṃ apacharā gāna|
cale avadhapati avadhapura mudita bajāi nisāna || 339 ||

nṛpa kari binaya mahājana phere| sādara sakala māgane ṭere ||
bhūṣana basana bāji gaja dīnhe| prema poṣi ṭhāṛhe saba kīnhe ||
bāra bāra biridāvali bhāṣī| phire sakala rāmahi ura rākhī ||
bahuri bahuri kosalapati kahahīṃ| janaku premabasa phirai na cahahīṃ ||
puni kaha bhūpati bacana suhāe| phiria mahīsa dūri baṛi āe ||
rāu bahori utari bhae ṭhāṛhe| prema prabāha bilocana bāṛhe ||
taba bideha bole kara jorī| bacana saneha sudhā~ janu borī ||
karau kavana bidhi binaya banāī| mahārāja mohi dīnhi baṛāī ||

do. kosalapati samadhī sajana sanamāne saba bhā~ti|
milani parasapara binaya ati prīti na hṛdaya~ samāti || 340 ||

muni maṃḍalihi janaka siru nāvā| āsirabādu sabahi sana pāvā ||
sādara puni bheṃṭe jāmātā| rūpa sīla guna nidhi saba bhrātā ||
jori paṃkaruha pāni suhāe| bole bacana prema janu jāe ||
rāma karau kehi bhā~ti prasaṃsā| muni mahesa mana mānasa haṃsā ||
karahiṃ joga jogī jehi lāgī| kohu mohu mamatā madu tyāgī ||
byāpaku brahmu alakhu abināsī| cidānaṃdu niraguna gunarāsī ||
mana sameta jehi jāna na bānī| taraki na sakahiṃ sakala anumānī ||
mahimā nigamu neti kahi kahaī| jo tihu~ kāla ekarasa rahaī ||

do. nayana biṣaya mo kahu~ bhayau so samasta sukha mūla|
sabai lābhu jaga jīva kaha~ bhae~ īsu anukula || 341 ||

sabahi bhā~ti mohi dīnhi baṛāī| nija jana jāni līnha apanāī ||
hohiṃ sahasa dasa sārada seṣā| karahiṃ kalapa koṭika bhari lekhā ||
mora bhāgya rāura guna gāthā| kahi na sirāhiṃ sunahu raghunāthā ||
mai kachu kahau~ eka bala moreṃ| tumha rījhahu saneha suṭhi thoreṃ ||
bāra bāra māgau~ kara joreṃ| manu pariharai carana jani bhoreṃ ||
suni bara bacana prema janu poṣe| pūranakāma rāmu paritoṣe ||
kari bara binaya sasura sanamāne| pitu kausika basiṣṭha sama jāne ||
binatī bahuri bharata sana kīnhī| mili sapremu puni āsiṣa dīnhī ||

do. mile lakhana ripusūdanahi dīnhi asīsa mahīsa|
bhae paraspara premabasa phiri phiri nāvahiṃ sīsa || 342 ||

bāra bāra kari binaya baṛāī| raghupati cale saṃga saba bhāī ||
janaka gahe kausika pada jāī| carana renu sira nayananha lāī ||
sunu munīsa bara darasana toreṃ| agamu na kachu pratīti mana moreṃ ||
jo sukhu sujasu lokapati cahahīṃ| karata manoratha sakucata ahahīṃ ||
so sukhu sujasu sulabha mohi svāmī| saba sidhi tava darasana anugāmī ||
kīnhi binaya puni puni siru nāī| phire mahīsu āsiṣā pāī ||
calī barāta nisāna bajāī| mudita choṭa baṛa saba samudāī ||
rāmahi nirakhi grāma nara nārī| pāi nayana phalu hohiṃ sukhārī ||

do. bīca bīca bara bāsa kari maga loganha sukha deta|
avadha samīpa punīta dina pahu~cī āi janeta || 343 ||
hane nisāna panava bara bāje| bheri saṃkha dhuni haya gaya gāje ||
jhā~jhi birava ḍiṃḍamīṃ suhāī| sarasa rāga bājahiṃ sahanāī ||
pura jana āvata akani barātā| mudita sakala pulakāvali gātā ||
nija nija suṃdara sadana sa~vāre| hāṭa bāṭa cauhaṭa pura dvāre ||
galīṃ sakala aragajā~ siṃcāī| jaha~ taha~ caukeṃ cāru purāī ||
banā bajāru na jāi bakhānā| torana ketu patāka bitānā ||
saphala pūgaphala kadali rasālā| rope bakula kadaṃba tamālā ||
lage subhaga taru parasata dharanī| manimaya ālabāla kala karanī ||

do. bibidha bhā~ti maṃgala kalasa gṛha gṛha race sa~vāri|
sura brahmādi sihāhiṃ saba raghubara purī nihāri || 344 ||

bhūpa bhavana tehi avasara sohā| racanā dekhi madana manu mohā ||
maṃgala saguna manoharatāī| ridhi sidhi sukha saṃpadā suhāī ||
janu uchāha saba sahaja suhāe| tanu dhari dhari dasaratha dasaratha gṛha~ chāe ||
dekhana hetu rāma baidehī| kahahu lālasā hohi na kehī ||
jutha jūtha mili calīṃ suāsini| nija chabi nidarahiṃ madana bilāsani ||
sakala sumaṃgala sajeṃ āratī| gāvahiṃ janu bahu beṣa bhāratī ||
bhūpati bhavana kolāhalu hoī| jāi na barani samau sukhu soī ||
kausalyādi rāma mahatārīṃ| prema bibasa tana dasā bisārīṃ ||

do. die dāna bipranha bipula pūji ganesa purārī|
pramudita parama daridra janu pāi padāratha cāri || 345 ||

moda pramoda bibasa saba mātā| calahiṃ na carana sithila bhae gātā ||
rāma darasa hita ati anurāgīṃ| parichani sāju sajana saba lāgīṃ ||
bibidha bidhāna bājane bāje| maṃgala mudita sumitrā~ sāje ||
harada dūba dadhi pallava phūlā| pāna pūgaphala maṃgala mūlā ||
acchata aṃkura locana lājā| maṃjula maṃjari tulasi birājā ||
chuhe puraṭa ghaṭa sahaja suhāe| madana sakuna janu nīṛa banāe ||
saguna suṃgadha na jāhiṃ bakhānī| maṃgala sakala sajahiṃ saba rānī ||
racīṃ āratīṃ bahuta bidhānā| mudita karahiṃ kala maṃgala gānā ||

do. kanaka thāra bhari maṃgalanhi kamala karanhi lie~ māta|
calīṃ mudita parichani karana pulaka pallavita gāta || 346 ||

dhūpa dhūma nabhu mecaka bhayaū| sāvana ghana ghamaṃḍu janu ṭhayaū ||
surataru sumana māla sura baraṣahiṃ| manahu~ balāka avali manu karaṣahiṃ ||
maṃjula manimaya baṃdanivāre| manahu~ pākaripu cāpa sa~vāre ||
pragaṭahiṃ durahiṃ aṭanha para bhāmini| cāru capala janu damakahiṃ dāmini ||
duṃdubhi dhuni ghana garajani ghorā| jācaka cātaka dādura morā ||
sura sugandha suci baraṣahiṃ bārī| sukhī sakala sasi pura nara nārī ||
samau jānī gura āyasu dīnhā| pura prabesu raghukulamani kīnhā ||
sumiri saṃbhu girajā ganarājā| mudita mahīpati sahita samājā ||

do. hohiṃ saguna baraṣahiṃ sumana sura duṃdubhīṃ bajāi|
bibudha badhū nācahiṃ mudita maṃjula maṃgala gāi || 347 ||

māgadha sūta baṃdi naṭa nāgara| gāvahiṃ jasu tihu loka ujāgara ||
jaya dhuni bimala beda bara bānī| dasa disi sunia sumaṃgala sānī ||
bipula bājane bājana lāge| nabha sura nagara loga anurāge ||
bane barātī barani na jāhīṃ| mahā mudita mana sukha na samāhīṃ ||
purabāsiṃha taba rāya johāre| dekhata rāmahi bhae sukhāre ||
karahiṃ nichāvari manigana cīrā| bāri bilocana pulaka sarīrā ||
ārati karahiṃ mudita pura nārī| haraṣahiṃ nirakhi ku~ara bara cārī ||
sibikā subhaga ohāra ughārī| dekhi dulahininha hohiṃ sukhārī ||

do. ehi bidhi sabahī deta sukhu āe rājaduāra|
mudita mātu paruchani karahiṃ badhunha sameta kumāra || 348 ||

karahiṃ āratī bārahiṃ bārā| premu pramodu kahai ko pārā ||
bhūṣana mani paṭa nānā jātī || karahī nichāvari aganita bhā~tī ||
badhunha sameta dekhi suta cārī| paramānaṃda magana mahatārī ||
puni puni sīya rāma chabi dekhī || mudita saphala jaga jīvana lekhī ||
sakhīṃ sīya mukha puni puni cāhī| gāna karahiṃ nija sukṛta sarāhī ||
baraṣahiṃ sumana chanahiṃ chana devā| nācahiṃ gāvahiṃ lāvahiṃ sevā ||
dekhi manohara cāriu jorīṃ| sārada upamā sakala ḍha~ḍhorīṃ ||
deta na banahiṃ nipaṭa laghu lāgī| ekaṭaka rahīṃ rūpa anurāgīṃ ||

do. nigama nīti kula rīti kari aragha pā~vaṛe deta|
badhunha sahita suta parichi saba calīṃ lavāi niketa || 349 ||

cāri siṃghāsana sahaja suhāe| janu manoja nija hātha banāe ||
tinha para kua~ri kua~ra baiṭhāre| sādara pāya punita pakhāre ||
dhūpa dīpa naibeda beda bidhi| pūje bara dulahini maṃgalanidhi ||
bārahiṃ bāra āratī karahīṃ| byajana cāru cāmara sira ḍharahīṃ ||
bastu aneka nichāvara hohīṃ| bharīṃ pramoda mātu saba sohīṃ ||
pāvā parama tattva janu jogīṃ| amṛta laheu janu saṃtata rogīṃ ||
janama raṃka janu pārasa pāvā| aṃdhahi locana lābhu suhāvā ||
mūka badana janu sārada chāī| mānahu~ samara sūra jaya pāī ||

do. ehi sukha te sata koṭi guna pāvahiṃ mātu anaṃdu ||
bhāinha sahita biāhi ghara āe raghukulacaṃdu || 350(ka) ||

loka rīta jananī karahiṃ bara dulahini sakucāhiṃ|
modu binodu biloki baṛa rāmu manahiṃ musakāhiṃ || 350(kha) ||

deva pitara pūje bidhi nīkī| pūjīṃ sakala bāsanā jī kī ||
sabahiṃ baṃdi māgahiṃ baradānā| bhāinha sahita rāma kalyānā ||
aṃtarahita sura āsiṣa dehīṃ| mudita mātu aṃcala bhari leṃhīṃ ||
bhūpati boli barātī līnhe| jāna basana mani bhūṣana dīnhe ||
āyasu pāi rākhi ura rāmahi| mudita gae saba nija nija dhāmahi ||
pura nara nāri sakala pahirāe| ghara ghara bājana lage badhāe ||
jācaka jana jācahi joi joī| pramudita rāu dehiṃ soi soī ||
sevaka sakala bajaniā nānā| pūrana kie dāna sanamānā ||

do. deṃhiṃ asīsa johāri saba gāvahiṃ guna gana gātha|
taba gura bhūsura sahita gṛha~ gavanu kīnha naranātha || 351 ||

jo basiṣṭha anusāsana dīnhī| loka beda bidhi sādara kīnhī ||
bhūsura bhīra dekhi saba rānī| sādara uṭhīṃ bhāgya baṛa jānī ||
pāya pakhāri sakala anhavāe| pūji bhalī bidhi bhūpa jevā~e ||
ādara dāna prema paripoṣe| deta asīsa cale mana toṣe ||
bahu bidhi kīnhi gādhisuta pūjā| nātha mohi sama dhanya na dūjā ||
kīnhi prasaṃsā bhūpati bhūrī| rāninha sahita līnhi paga dhūrī ||
bhītara bhavana dīnha bara bāsu| mana jogavata raha nṛpa ranivāsū ||
pūje gura pada kamala bahorī| kīnhi binaya ura prīti na thorī ||

do. badhunha sameta kumāra saba rāninha sahita mahīsu|
puni puni baṃdata gura carana deta asīsa munīsu || 352 ||

binaya kīnhi ura ati anurāgeṃ| suta saṃpadā rākhi saba āgeṃ ||
negu māgi munināyaka līnhā| āsirabādu bahuta bidhi dīnhā ||
ura dhari rāmahi sīya sametā| haraṣi kīnha gura gavanu niketā ||
biprabadhū saba bhūpa bolāī| caila cāru bhūṣana pahirāī ||
bahuri bolāi suāsini līnhīṃ| ruci bicāri pahirāvani dīnhīṃ ||
negī nega joga saba lehīṃ| ruci anurupa bhūpamani dehīṃ ||
priya pāhune pūjya je jāne| bhūpati bhalī bhā~ti sanamāne ||
deva dekhi raghubīra bibāhū| baraṣi prasūna prasaṃsi uchāhū ||

do. cale nisāna bajāi sura nija nija pura sukha pāi|
kahata parasapara rāma jasu prema na hṛdaya~ samāi || 353 ||

saba bidhi sabahi samadi naranāhū| rahā hṛdaya~ bhari pūri uchāhū ||
jaha~ ranivāsu tahā~ pagu dhāre| sahita bahūṭinha kua~ra nihāre ||
lie goda kari moda sametā| ko kahi sakai bhayau sukhu jetā ||
badhū saprema goda baiṭhārīṃ| bāra bāra hiya~ haraṣi dulārīṃ ||
dekhi samāju mudita ranivāsū| saba keṃ ura anaṃda kiyo bāsū ||
kaheu bhūpa jimi bhayau bibāhū| suni haraṣu hota saba kāhū ||
janaka rāja guna sīlu baṛāī| prīti rīti saṃpadā suhāī ||
bahubidhi bhūpa bhāṭa jimi baranī| rānīṃ saba pramudita suni karanī ||

do. sutanha sameta nahāi nṛpa boli bipra gura gyāti|
bhojana kīnha aneka bidhi gharī paṃca gai rāti || 354 ||

maṃgalagāna karahiṃ bara bhāmini| bhai sukhamūla manohara jāmini ||
a~cai pāna saba kāhū~ pāe| straga sugaṃdha bhūṣita chabi chāe ||
rāmahi dekhi rajāyasu pāī| nija nija bhavana cale sira nāī ||
prema pramoda binodu baṛhāī| samau samāju manoharatāī ||
kahi na sakahi sata sārada sesū| beda biraṃci mahesa ganesū ||
so mai kahauṃ kavana bidhi baranī| bhūmināgu sira dharai ki dharanī ||
nṛpa saba bhā~ti sabahi sanamānī| kahi mṛdu bacana bolāī rānī ||
badhū larikanīṃ para ghara āīṃ| rākhehu nayana palaka kī nāī ||

do. larikā śramita unīda basa sayana karāvahu jāi|
asa kahi ge biśrāmagṛha~ rāma carana citu lāi || 355 ||

bhūpa bacana suni sahaja suhāe| jarita kanaka mani pala~ga ḍasāe ||
subhaga surabhi paya phena samānā| komala kalita supetīṃ nānā ||
upabarahana bara barani na jāhīṃ| straga sugaṃdha manimaṃdira māhīṃ ||
ratanadīpa suṭhi cāru ca~dovā| kahata na banai jāna jehiṃ jovā ||
seja rucira raci rāmu uṭhāe| prema sameta pala~ga pauṛhāe ||
agyā puni puni bhāinha dīnhī| nija nija seja sayana tinha kīnhī ||
dekhi syāma mṛdu maṃjula gātā| kahahiṃ saprema bacana saba mātā ||
māraga jāta bhayāvani bhārī| kehi bidhi tāta tāṛakā mārī ||

do. ghora nisācara bikaṭa bhaṭa samara ganahiṃ nahiṃ kāhu ||
māre sahita sahāya kimi khala mārīca subāhu || 356 ||

muni prasāda bali tāta tumhārī| īsa aneka karavareṃ ṭārī ||
makha rakhavārī kari duhu~ bhāī| guru prasāda saba bidyā pāī ||
munitaya tarī lagata paga dhūrī| kīrati rahī bhuvana bhari pūrī ||
kamaṭha pīṭhi pabi kūṭa kaṭhorā| nṛpa samāja mahu~ siva dhanu torā ||
bisva bijaya jasu jānaki pāī| āe bhavana byāhi saba bhāī ||
sakala amānuṣa karama tumhāre| kevala kausika kṛpā~ sudhāre ||
āju suphala jaga janamu hamārā| dekhi tāta bidhubadana tumhārā ||
je dina gae tumhahi binu dekheṃ| te biraṃci jani pārahiṃ lekheṃ ||

do. rāma pratoṣīṃ mātu saba kahi binīta bara baina|
sumiri saṃbhu gura bipra pada kie nīdabasa naina || 357 ||

nīdau~ badana soha suṭhi lonā| manahu~ sā~jha sarasīruha sonā ||
ghara ghara karahiṃ jāgarana nārīṃ| dehiṃ parasapara maṃgala gārīṃ ||
purī birājati rājati rajanī| rānīṃ kahahiṃ bilokahu sajanī ||
suṃdara badhunha sāsu lai soī| phanikanha janu siramani ura goī ||
prāta punīta kāla prabhu jāge| arunacūṛa bara bolana lāge ||
baṃdi māgadhanhi gunagana gāe| purajana dvāra johārana āe ||
baṃdi bipra sura gura pitu mātā| pāi asīsa mudita saba bhrātā ||
jananinha sādara badana nihāre| bhūpati saṃga dvāra pagu dhāre ||

do. kīnha sauca saba sahaja suci sarita punīta nahāi|
prātakriyā kari tāta pahiṃ āe cāriu bhāi || 358 ||

navānhapārāyaṇa,tīsarā viśrāma
bhūpa biloki lie ura lāī| baiṭhai haraṣi rajāyasu pāī ||
dekhi rāmu saba sabhā juṛānī| locana lābha avadhi anumānī ||
puni basiṣṭu muni kausika āe| subhaga āsananhi muni baiṭhāe ||
sutanha sameta pūji pada lāge| nirakhi rāmu dou gura anurāge ||
kahahiṃ basiṣṭu dharama itihāsā| sunahiṃ mahīsu sahita ranivāsā ||
muni mana agama gādhisuta karanī| mudita basiṣṭa bipula bidhi baranī ||
bole bāmadeu saba sā~cī| kīrati kalita loka tihu~ mācī ||
suni ānaṃdu bhayau saba kāhū| rāma lakhana ura adhika uchāhū ||

do. maṃgala moda uchāha nita jāhiṃ divasa ehi bhā~ti|
umagī avadha anaṃda bhari adhika adhika adhikāti || 359 ||

sudina sodhi kala kaṃkana chaure| maṃgala moda binoda na thore ||
nita nava sukhu sura dekhi sihāhīṃ| avadha janma jācahiṃ bidhi pāhīṃ ||
bisvāmitru calana nita cahahīṃ| rāma saprema binaya basa rahahīṃ ||
dina dina sayaguna bhūpati bhāū| dekhi sarāha mahāmunirāū ||
māgata bidā rāu anurāge| sutanha sameta ṭhāṛha bhe āge ||
nātha sakala saṃpadā tumhārī| maiṃ sevaku sameta suta nārī ||
karaba sadā larikanaḥ para chohū| darasana deta rahaba muni mohū ||
asa kahi rāu sahita suta rānī| pareu carana mukha āva na bānī ||
dīnha asīsa bipra bahu bhā~tī| cale na prīti rīti kahi jātī ||
rāmu saprema saṃga saba bhāī| āyasu pāi phire pahu~cāī ||

do. rāma rūpu bhūpati bhagati byāhu uchāhu anaṃdu|
jāta sarāhata manahiṃ mana mudita gādhikulacaṃdu || 360 ||

bāmadeva raghukula gura gyānī| bahuri gādhisuta kathā bakhānī ||
suni muni sujasu manahiṃ mana rāū| baranata āpana punya prabhāū ||
bahure loga rajāyasu bhayaū| sutanha sameta nṛpati gṛha~ gayaū ||
jaha~ taha~ rāma byāhu sabu gāvā| sujasu punīta loka tihu~ chāvā ||
āe byāhi rāmu ghara jaba teṃ| basai anaṃda avadha saba taba teṃ ||
prabhu bibāha~ jasa bhayau uchāhū| sakahiṃ na barani girā ahināhū ||
kabikula jīvanu pāvana jānī || rāma sīya jasu maṃgala khānī ||
tehi te maiṃ kachu kahā bakhānī| karana punīta hetu nija bānī ||

chaṃ. nija girā pāvani karana kārana rāma jasu tulasī kahyo|
raghubīra carita apāra bāridhi pāru kabi kauneṃ lahyo ||
upabīta byāha uchāha maṃgala suni je sādara gāvahīṃ|
baidehi rāma prasāda te jana sarbadā sukhu pāvahīṃ ||

so. siya raghubīra bibāhu je saprema gāvahiṃ sunahiṃ|
tinha kahu~ sadā uchāhu maṃgalāyatana rāma jasu || 361 ||