శ్రీ సిద్ధలక్ష్మీ స్తోత్రమ్

అస్య శ్రీసిద్ధలక్ష్మీస్తోత్రమన్త్రస్య హిరణ్యగర్భ ఋషిః అనుష్టుప్ ఛన్దః, శ్రీమహాకాలీమహాలక్ష్మీమహాసరస్వత్యో దేవతాః శ్రీం బీజం హ్రీం శక్తిః క్లీం కీలకం మమ సర్వక్లేశపీడాపరిహారార్థం సర్వదుఃఖదారిద్ర్యనాశనార్థం సర్వకార్యసిద్ధ్యర్థం శ్రీసిద్ధిలక్ష్మీస్తోత్ర పాఠే వినియోగః ॥
ఋష్యాదిన్యాసః
ఓం హిరణ్యగర్భ ఋషయే నమః శిరసి ।
అనుష్టుప్ఛన్దసే నమో ముఖే ।
శ్రీమహాకాలీమహాలక్ష్మీమహాసరస్వతీదేవతాభ్యో నమో హృదిః ।
శ్రీం బీజాయ నమో గుహ్యే ।
హ్రీం శక్తయే నమః పాదయోః ।
క్లీం కీలకాయ నమో నాభౌ ।
వినియోగాయ నమః సర్వాఙ్గేషు ॥
కరన్యాసః
ఓం శ్రీం సిద్ధలక్ష్మ్యై అఙ్గుష్ఠాభ్యాం నమః ।
ఓం హ్రీం విష్ణుతేజసే తర్జనీభ్యాం నమః ।
ఓం క్లీం అమృతానన్దాయై మధ్యమాభ్యాం నమః ।
ఓం శ్రీం దైత్యమాలిన్యై అనామికాభ్యాం నమః ।
ఓం హ్రీం తేజః ప్రకాశిన్యై కనిష్ఠికాభ్యాం నమః ।
ఓం క్లీం బ్రాహ్మ్యై వైష్ణవ్యై రుద్రాణ్యై కరతల కరపృష్ఠాభ్యాం నమః ॥
అఙ్గన్యాసః
ఓం శ్రీం సిద్ధలక్ష్మ్యై హృదయాయ నమః ।
ఓం హ్రీం విష్ణుతేజసే శిరసే స్వాహా ।
ఓం క్లీం అమృతానన్దాయై శిఖాయై వషట్ ।
ఓం శ్రీం దైత్యమాలిన్యై కవచాయ హుమ్ ।
ఓం హ్రీం తేజః ప్రకాశిన్యై నేత్రత్రయాయ వౌషట్ ।
ఓం క్లీం బ్రాహ్మ్యై వైష్ణవ్యై రుద్రాణ్యై అస్త్రాయ ఫట్ ॥
ఓం శ్రీం హ్రీం క్లీం శ్రీం సిద్ధలక్ష్మ్యై నమః ఇతి దిగ్బన్ధః ॥
అథ ధ్యానమ్
బ్రాహ్మీం చ వైష్ణవీం భద్రాం షడ్భుజాం చ చతుర్ముఖీమ్ ।
త్రినేత్రాం ఖడ్గత్రిశూలపద్మచక్రగదాధరామ్ ॥ 1 ॥

పీతామ్బరధరాం దేవీం నానాలఙ్కారభూషితామ్ ।
తేజఃపుఞ్జధరీం శ్రేష్ఠాం ధ్యాయేద్బాలకుమారికామ్ ॥ 2 ॥

అథ స్తోత్రమ్
ఓఙ్కారం లక్ష్మీరూపం తు విష్ణుం వాగ్భవమవ్యయమ్ ।
విష్ణుమానన్దమవ్యక్తం హ్రీఙ్కారం బీజరూపిణీమ్ ॥ 3 ॥

క్లీం అమృతానన్దినీం భద్రాం సత్యానన్దదాయినీమ్ ।
శ్రీం దైత్యశమనీం శక్తిం మాలినీం శత్రుమర్దినీమ్ ॥ 4 ॥

తేజః ప్రకాశినీం దేవీం వరదాం శుభకారిణీమ్ ।
బ్రాహ్మీం చ వైష్ణవీం రౌద్రీం కాలికారూపశోభినీమ్ ॥ 5 ॥

అకారే లక్ష్మీరూపం తు ఉకారే విష్ణుమవ్యయమ్ ।
మకారః పురుషోఽవ్యక్తో దేవీ ప్రణవ ఉచ్యతే ॥ 6 ॥

సూర్యకోటిప్రతీకాశం చన్ద్రకోటిసమప్రభమ్ ।
తన్మధ్యే నికరం సూక్ష్మం బ్రహ్మరుపం వ్యవస్థితమ్ ॥ 7 ॥

ఓఙ్కారం పరమానన్దం సదైవ సురసున్దరీమ్ ।
సిద్ధలక్ష్మీ మోక్షలక్ష్మీ ఆద్యలక్ష్మీ నమోఽస్తు తే ॥ 8 ॥

శ్రీఙ్కారం పరమం సిద్ధం సర్వబుద్ధిప్రదాయకమ్ ।
సౌభాగ్యాఽమృతా కమలా సత్యలక్ష్మీ నమోఽస్తు తే ॥ 9 ॥

హ్రీఙ్కారం పరమం శుద్ధం పరమైశ్వర్యదాయకమ్ ।
కమలా ధనదా లక్ష్మీ భోగలక్ష్మీ నమోఽస్తు తే ॥ 10 ॥

క్లీఙ్కారం కామరూపిణ్యం కామనాపరిపూర్తిదమ్ ।
చపలా చఞ్చలా లక్ష్మీ కాత్యాయనీ నమోఽస్తు తే ॥ 11 ॥

శ్రీఙ్కారం సిద్ధిరూపిణ్యం సర్వసిద్ధిప్రదాయకమ్ ।
పద్మాననాం జగన్మాత్రే అష్టలక్ష్మీం నమోఽస్తు తే ॥ 12 ॥

సర్వమఙ్గలమాఙ్గల్యే శివే సర్వార్థసాధికే ।
శరణ్యే త్ర్యమ్బకే గౌరి నారాయణీ నమోఽస్తు తే ॥ 13 ॥

ప్రథమం త్ర్యమ్బకా గౌరీ ద్వితీయం వైష్ణవీ తథా ।
తృతీయం కమలా ప్రోక్తా చతుర్థం సున్దరీ తథా ॥ 14 ॥

పఞ్చమం విష్ణుశక్తిశ్చ షష్ఠం కాత్యాయనీ తథా ।
వారాహీ సప్తమం చైవ హ్యష్టమం హరివల్లభా ॥ 15 ॥

నవమం ఖడ్గినీ ప్రోక్తా దశమం చైవ దేవికా ।
ఏకాదశం సిద్ధలక్ష్మీర్ద్వాదశం హంసవాహినీ ॥ 16 ॥

ఉత్తరన్యాసః
ఓం శ్రీం సిద్ధలక్ష్మ్యై హృదయాయ నమః ।
ఓం హ్రీం విష్ణుతేజసే శిరసే స్వాహా ।
ఓం క్లీం అమృతానన్దాయై శిఖాయై వషట్ ।
ఓం శ్రీం దైత్యమాలిన్యై కవచాయ హుమ్ ।
ఓం హ్రీం తేజః ప్రకాశిన్యై నేత్రత్రయాయ వౌషట్ ।
ఓం క్లీం బ్రాహ్మ్యై వైష్ణవ్యై రుద్రాణ్యై అస్త్రాయ ఫట్ ॥
ఓం శ్రీం హ్రీం క్లీం శ్రీం సిద్ధలక్ష్మ్యై నమః ఇతి దిగ్విమోకః ॥
అథ ఫలశృతిః
ఏతత్ స్తోత్రవరం దేవ్యా యే పఠన్తి సదా నరాః ।
సర్వాపద్భ్యో విముచ్యన్తే నాత్ర కార్యా విచారణా ॥ 17 ॥

ఏకమాసం ద్విమాసం చ త్రిమాసం చ చతుస్థథా ।
పఞ్చమాసం చ షణ్మాసం త్రికాలం యః సదా పఠేత్ ॥ 18 ॥

బ్రాహ్మణః క్లేశితో దుఃఖీ దారిద్ర్యభయపీడితః ।
జన్మాన్తర సహస్రోత్థైర్ముచ్యతే సర్వకిల్బషైః ॥ 19 ॥

దరిద్రో లభతే లక్ష్మీమపుత్రః పుత్రవాన్ భవేత్ ।
ధన్యో యశస్వీ శత్రుఘ్నో వహ్నిచౌరభయేషు చ ॥ 20 ॥

శాకినీ భూత వేతాల సర్ప వ్యాఘ్ర నిపాతనే ।
రాజద్వారే సభాస్థానే కారాగృహనిబన్ధనే ॥ 21 ॥

ఈశ్వరేణ కృతం స్తోత్రం ప్రాణినాం హితకారకమ్ ।
స్తువన్తు బ్రాహ్మణాః నిత్యం దారిద్ర్యం న చ బాధతే ॥ 22 ॥

సర్వపాపహరా లక్ష్మీః సర్వసిద్ధిప్రదాయినీమ్ ।
సాధకాః లభతే సర్వం పఠేత్ స్తోత్రం నిరన్తరమ్ ॥ 23 ॥
ప్రార్థనా
యా శ్రీః పద్మవనే కదమ్బశిఖరే రాజగృహే కుఞ్జరే
శ్వేతే చాశ్వయుతే వృషే చ యుగలే యజ్ఞే చ యూపస్థితే ।
శఙ్ఖే దైవకులే నరేన్ద్రభవనే గఙ్గాతటే గోకులే
సా శ్రీస్తిష్ఠతు సర్వదా మమ గృహే భూయాత్ సదా నిశ్చలా ॥
యా సా పద్మాసనస్థా విపులకటితటీ పద్మపత్రాయతాక్షీ
గమ్భీరావర్తనాభిః స్తనభరనమితా శుద్ధవస్త్రోత్తరీయా ।
లక్ష్మీర్దివ్యైర్గజేన్ద్రైర్మణిగణఖచితైః స్నాపితా హేమకుమ్భైః
నిత్యం సా పద్మహస్తా మమ వసతు గృహే సర్వమాఙ్గల్యయుక్తా ॥