ಶ್ರೀವೇಙ್ಕಟಾದ್ರಿಧಾಮಾ ಭೂಮಾ ಭೂಮಾಪ್ರಿಯಃ ಕೃಪಾಸೀಮಾ ।
ನಿರವಧಿಕನಿತ್ಯಮಹಿಮಾ ಭವತು ಜಯೀ ಪ್ರಣತದರ್ಶಿತಪ್ರೇಮಾ ॥ 1 ॥
ನಿರವಧಿಕನಿತ್ಯಮಹಿಮಾ ಭವತು ಜಯೀ ಪ್ರಣತದರ್ಶಿತಪ್ರೇಮಾ ॥ 1 ॥
ಜಯ ಜನತಾ ವಿಮಲೀಕೃತಿಸಫಲೀಕೃತಸಕಲಮಙ್ಗಲಾಕಾರ ।
ವಿಜಯೀ ಭವ ವಿಜಯೀ ಭವ ವಿಜಯೀ ಭವ ವೇಙ್ಕಟಾಚಲಾಧೀಶ ॥ 2 ॥
ವಿಜಯೀ ಭವ ವಿಜಯೀ ಭವ ವಿಜಯೀ ಭವ ವೇಙ್ಕಟಾಚಲಾಧೀಶ ॥ 2 ॥
ಕಮನೀಯಮನ್ದಹಸಿತಂ ಕಞ್ಚನ ಕನ್ದರ್ಪಕೋಟಿಲಾವಣ್ಯಮ್ ।
ಪಶ್ಯೇಯಮಞ್ಜನಾದ್ರೌ ಪುಂಸಾಂ ಪೂರ್ವತನಪುಣ್ಯಪರಿಪಾಕಮ್ ॥ 3 ॥
ಪಶ್ಯೇಯಮಞ್ಜನಾದ್ರೌ ಪುಂಸಾಂ ಪೂರ್ವತನಪುಣ್ಯಪರಿಪಾಕಮ್ ॥ 3 ॥
ಮರತಕಮೇಚಕರುಚಿನಾ ಮದನಾಜ್ಞಾಗನ್ಧಿಮಧ್ಯಹೃದಯೇನ ।
ವೃಷಶೈಲಮೌಲಿಸುಹೃದಾ ಮಹಸಾ ಕೇನಾಪಿ ವಾಸಿತಂ ಜ್ಞೇಯಮ್ ॥ 4 ॥
ವೃಷಶೈಲಮೌಲಿಸುಹೃದಾ ಮಹಸಾ ಕೇನಾಪಿ ವಾಸಿತಂ ಜ್ಞೇಯಮ್ ॥ 4 ॥
ಪತ್ಯೈ ನಮೋ ವೃಷಾದ್ರೇಃ ಕರಯುಗಪರಿಕರ್ಮಶಙ್ಖಚಕ್ರಾಯ ।
ಇತರಕರಕಮಲಯುಗಲೀದರ್ಶಿತ-ಕಟಿಬನ್ಧದಾನಮುದ್ರಾಯ ॥ 5 ॥
ಇತರಕರಕಮಲಯುಗಲೀದರ್ಶಿತ-ಕಟಿಬನ್ಧದಾನಮುದ್ರಾಯ ॥ 5 ॥
ಸಾಮ್ರಾಜ್ಯಪಿಶುನಮಕುಟೀಸುಘಟಲಲಾಟಾತ್ ಸುಮಙ್ಗಲಾ ಪಾಙ್ಗಾತ್ ।
ಸ್ಮಿತರುಚಿಫುಲ್ಲಕಪೋಲಾದಪರೋ ನ ಪರೋಽಸ್ತಿ ವೇಙ್ಕಟಾದ್ರೀಶಾತ್ ॥ 6 ॥
ಸ್ಮಿತರುಚಿಫುಲ್ಲಕಪೋಲಾದಪರೋ ನ ಪರೋಽಸ್ತಿ ವೇಙ್ಕಟಾದ್ರೀಶಾತ್ ॥ 6 ॥
ಸರ್ವಾಭರಣವಿಭೂಷಿತದಿವ್ಯಾವಯವಸ್ಯ ವೇಙ್ಕಟಾದ್ರಿಪತೇಃ ।
ಪಲ್ಲವಪುಷ್ಪವಿಭೂಷಿತಕಲ್ಪತರೋಶ್ಚಾಪಿ ಕಾ ಭಿದಾ ದೃಷ್ಟಾ ॥ 7 ॥
ಪಲ್ಲವಪುಷ್ಪವಿಭೂಷಿತಕಲ್ಪತರೋಶ್ಚಾಪಿ ಕಾ ಭಿದಾ ದೃಷ್ಟಾ ॥ 7 ॥
ಲಕ್ಷ್ಮೀಲಲಿತಪದಾಮ್ಬುಜಲಾಕ್ಷಾರಸರಞ್ಜಿತಾಯತೋರಸ್ಕೇ ।
ಶ್ರೀವೇಙ್ಕಟಾದ್ರಿನಾಥೇ ನಾಥೇ ಮಮ ನಿತ್ಯಮರ್ಪಿತೋ ಭಾರಃ ॥ 8 ॥
ಶ್ರೀವೇಙ್ಕಟಾದ್ರಿನಾಥೇ ನಾಥೇ ಮಮ ನಿತ್ಯಮರ್ಪಿತೋ ಭಾರಃ ॥ 8 ॥
ಆರ್ಯಾವೃತ್ತಸಮೇತಾ ಸಪ್ತವಿಭಕ್ತಿರ್ವೃಷಾದ್ರಿನಾಥಸ್ಯ ।
ವಾದೀನ್ದ್ರಭೀಕೃದಾಖ್ಯೈರಾರ್ಯೈ ರಚಿತಾ ಜಯತ್ವಿಯಂ ಸತತಮ್ ॥ 9 ॥
ವಾದೀನ್ದ್ರಭೀಕೃದಾಖ್ಯೈರಾರ್ಯೈ ರಚಿತಾ ಜಯತ್ವಿಯಂ ಸತತಮ್ ॥ 9 ॥
ಇತಿ ಶ್ರೀವೇಙ್ಕಟೇಶವಿಜಯಾರ್ಯಾಸಪ್ತವಿಭಕ್ತಿ ಸ್ತೋತ್ರಂ ಸಮ್ಪೂರ್ಣಮ್ ।